ស្ករគ្រាប់ ដែលទស្សនិកជនបានស្គាល់ថាជាអ្នកនៅពីក្រោយឈុតតំណាងជាតិរបស់បវរកញ្ញាល្បីៗជាច្រើនរូបបានបង្ហោះសំណេរដ៏ក្តៅគគុកមួយដែលជំរុញឱ្យមានមតិជាច្រើន។ ការបង្ហោះរបស់ស្ករគ្រាប់គេបានឃើញបវរកញ្ញា អ៊ិន លក្ខិណា ហ្វីយ៉ាតា និង ភឹម ស្រីណូ បានចូលទៅខម្មិន ខណៈ Beauty Pageant Reviewer បានចែករំលែកបន្តដោយសង្កត់ធ្ងន់ទៅកាន់អ្នកមួយចំនួនដែលគិតថាជា ពេជ្រ វត្តីសារ៉ាវឌ្ឍី។
ពេជ្រ វត្តីសារ៉ាវឌ្ឍី គឺជាបវរកញ្ញាខ្មែរមួយរូបដ៏មានប្រជាប្រិយទាំងនៅក្នុងស្រុកនិងក្រៅស្រុក ប៉ុន្តែរាល់ពេលដែលមានបញ្ហាចម្រូងចម្រាសទាក់ទងនឹងអត្តចរិតមិនល្អរបស់បវរកញ្ញា ឬទាក់ទងនឹងខាងផ្ទះលេខ២រូបនាងគឺជាមុខសញ្ញាមុនគេ ហើយកន្លងមកនេះនាងបានជួបរឿងរ៉ាវជាច្រើន។ រឿងចម្រូងចម្រាសកន្លងមកទាំងនៅក្នុងរង្វង់គ្រួសារ ជាងផាត់មុខ និងរឿងដទៃទៀតបានធ្វើឱ្យឈ្មោះរបស់នាងគេចមិនផុតពីមតិសាធារណៈ។
នាពេលថ្មីៗនេះទៀតសោត(២៧ មេសា) Skor Krob ដែលជាអ្នកច្នៃម៉ូតសំលៀកបំពាក់បុរាណ និងឈុតតំណាងជាតិ បានចេញមកបង្ហោះសំណេរមួយយ៉ាងក្តៅគគុកថា«គ្មានតារាសម្ដែងរូបណា ពូកែសម្ដែងជាង បវរកញ្ញាទេ Sending love sister» ដោយអមមកជាមួយរូប Emoji រូបពស់ទៀតផង។ ប្រយោគខ្លីនេះបានធ្វើឱ្យអ្នកតាមដានវិស័យបវរកញ្ញាមានការចាប់អារម្មណ៍ជាច្រើន ខណៈគេបានឃើញ អ៊ិន លក្ខិណា បានចូលទៅខម្មិនជាមួយរូបភាពសើច ហ្វីយ៉ាតា និង ភឹម ស្រីនោ ក៏បានចូលទៅបញ្ចេញមតិយោបល់ផងដែរ។
សញ្ញាខាងលើនេះ កាន់តែធ្វើឱ្យមានមតិសង្ស័យនិងចង់ដឹងថាបវរកញ្ញារូបនោះជាអ្នកណា ខណៈឈ្មោះរបស់ ពេជ្រ វត្តីសារ៉ាវឌ្ឍី ក៏ស្ថិតនៅក្នុងការសង្ស័យជៀសមិនផុត។ ជុំវិញការបង្ហោះខាងលើនេះបានជំរុញឱ្យផេក Beauty Pageant Reviewer ដែលគេដឹងថាមានទំនាក់ទំនងស្និទ្ធស្នាលនឹងពេជ្រ វត្តីសារ៉ាវឌ្ឍី បានចែករំលែកបន្តដោយភ្ជាប់មកជាមួយនឹងចំណងជើងយ៉ាងខ្លីថា «គិតថាជា ពេជ្រវត្តី ទៀតហើយមែនទេ? ខួរគិតបានតែប៉ុណ្ណឹងរឺ?»។
អ្នកគាំទ្ររបស់ ពេជ្រ វត្តីសារ៉ាវឌ្ឍី បានបង្ហាញការហួសចិត្តយ៉ាងខ្លាំងពីព្រោះរាល់ពេលដែលមានបញ្ហាចម្រូងចម្រាសនៅក្នុងវិស័យបវរកញ្ញាអាយដលរបស់ពួកគេតែងតែជាមុខសញ្ញារបស់គេជានិច្ច៕
