ប្រទេសសិង្ហបុរី ៖ សេដ្ឋីចិនបានផ្លាស់មករស់នៅប្រទេសសិង្ហបុរីកាន់តែច្រើន ដោយសារអត្រាពន្ធទាប និងការសិក្សានៅប្រទេសសិង្ហបុរីមានគុណភាពល្អ ស្របពេលពលរដ្ឋចិនមួយចំនួនបារម្ភពីការដឹកនាំប្រទេសរបស់ប្រធានាធិបតីចិន លោក ស៊ី ជិនពីង ។

ការផ្លាស់ប្តូរមករស់នៅប្រទេសសិង្ហបុរីរបស់សេដ្ឋីចិនបានកើនឡើងជាបន្តបន្ទាប់ ខណៈចិនបានបើកប្រទេសឡើងវិញ ដោយអនុញ្ញាតឱ្យពលរដ្ឋរបស់ខ្លួនអាចធ្វើដំណើរចេញចូលក្រៅប្រទេសកាន់តែច្រើនឡើង ។ ដូច្នេះ វាងាយស្រួលសម្រាប់សេដ្ឋីចិនក្នុងការនាំក្រុមគ្រួសារផ្លាស់ប្តូរទីកន្លែងរស់នៅ និងអាចគ្រប់គ្រងទ្រព្យសម្បត្តិរបស់ពួកគេនៅក្រៅប្រទេសបាន ។

ទោះយ៉ាងណា រដ្ឋាភិបាលសិង្ហបុរីមិនបានផ្សព្វផ្សាយព័ត៌មានពីអ្នកមករស់នៅថ្មីក្នុងប្រទេសរបស់ខ្លួនទេ ប៉ុន្តែផ្នែកប្រឹក្សាជនអន្តោប្រវេសន៍របស់សិង្ហបុរីជាច្រើននាក់និយាយថា ជនជាតិចិនស្វែងរកលំនៅឋានថ្មីបានកើនឡើងជាបន្តបន្ទាប់ ។

ក្រៅពីនេះ តាមការប៉ាន់ស្មានរបស់ក្រុមហ៊ុនស្រាវជ្រាវ New World Wealth ឃើញថា មានសេដ្ឋីចិនជាង១០.៨០០នាក់បានផ្លាស់ទីលំនៅពីប្រទេសចិននៅឆ្នាំ២០២២ ។ លោក Andrew Amoils ប្រធានក្រុមស្រាវជ្រាវលើកឡើងថា ចំនួនការធ្វើដំណើរចេញពីប្រទេសចិននៅឆ្នាំ២០២៣នេះ នឹងកើនឡើងទៀត ស្របពេលអ្នកមានទ្រព្យសម្បត្តិបានធ្វើចំណាកស្រុកទៅរស់នៅបណ្តាប្រទេសនានាលើពិភពលោក ។

ក្រុមហ៊ុន New World Wealth រំពឹងថា មនុស្សចំនួន១២ម៉ឺន៥ពាន់នាក់ដែលមានទ្រព្យសម្បត្តិជាង១លានដុល្លារអាមេរិក នឹងផ្លាស់ប្តូរទីលំនៅក្នុងឆ្នាំ២០២៣នេះ ខណៈកាលពីឆ្នាំ២០១៩ មានមនុស្សចំនួន១១ម៉ឺននាក់បានផ្លាស់ប្តូរទីលំនៅ ហើយក្នុងចំណោមនោះមានជនជាតិចិនពី៨%-១០% ។

គួរបញ្ជាក់ថា សិង្ហបុរីជាប្រទេសមួយដែលបានទាក់ទាញជនជាតិចិនមករស់នៅ ខណៈប្រទេសនេះមានទម្លាប់ការរស់នៅស្រដៀងគ្នាជាមួយហុងកុង និងចិន ហើយមនុស្សភាគច្រើនក្នុងប្រទេសនេះនិយាយភាសាចិនកណ្តាល និងភាសាអង់គ្លេស ។ លើសពីនេះ ប្រទេសសិង្ហបុរីមានសាលារៀនល្អៗ ខណៈផ្នែកហិរញ្ញវត្ថុរបស់សិង្ហបុរី ក៏យកចិត្តទុកដាក់លើការគ្រប់គ្រងទ្រព្យសម្បត្តិផងដែរ ។ ម្យ៉ាងទៀត សូម្បីតែក្រុមហ៊ុនធំៗរបស់ចិន ក៏បានបង្កើតសាខានៅប្រទេសសិង្ហបុរីដែរ ដូចជា TikTok និងក្រុមហ៊ុនមេ ByteDance បានបញ្ជូនបុគ្គលិក និងនាយកគ្រប់គ្រងក្រុមហ៊ុនរបស់ខ្លួនមកសិង្ហបុរី ដើម្បីកាត់បន្ថយការបារម្ភពីភាពតានតឹងរវាងចិន និងអាមេរិក ៕ ប្រភព ៖ AEC connect

សហរដ្ឋអាមេរិក កាណាដា និងអឺរ៉ុប កំពុងព្រួតដៃគ្នា​ដាក់ចេញបម្រាម​មិនឱ្យប្រជាជនខ្លួន ​ប្រើបណ្តាញសង្គម Tiktok របស់​ចិន ដោយបានលើកហេតុផល​ថា ទប់ស្កាត់​ការគំរាម​កំហែង​ដល់​សន្តិសុខជាតិ និង​សុវត្ថិភាព​ទិន្នន័យ​របស់​ពួកគេ។

កាលពីដើមខែមីនានេះ ​លោក ចូ​ បៃឌិន បាន​ទុកពេល​ឱ្យភ្នាក់ងារ​សហព័ន្ធ រយៈពេល៣០ថ្ងៃ គិតចាប់ពីថ្ងៃទី២៨កុម្ភៈ ដើម្បីធានា​ថា គ្មាន​កម្មវិធី TikTok នៅលើ​ឧបករណ៍​របស់​ភ្នាក់ងារ​សហព័ន្ធណាមួយឡើយ។ វិធានការ​នេះ គឺ​ដើម្បី​ធានាសន្តិសុខ​​នូវ​ហេដ្ឋារចនាសម្ព័ន្ធ​ឌីជីថល​របស់ខ្លួន ព្រមទាំងការការពារ​សុវត្ថិភាព និង​ឯកជនភាព​របស់​ប្រជាជនអាមេរិក។

ដោយឡែកកាណាដា​ ក៏បានចាត់វិធានការ​ដូចគ្នាផងដែរ​ពោលគឺ​បាន​ហាមឃាត់​នូវការ​ដំឡើង​App​TikTok​នៅក្នុង​ឧបករណ៍​របស់​រដ្ឋាភិបាល​ទាំងអស់​ចាប់ពីថ្ងៃទី១​ខែមីនានេះតទៅ។

រីឯសភាអឺរ៉ុប​ឯណោះវិញ​បាន​ហាមឃាត់មិនឱ្យមាន​​TikTok​នៅលើ​ទូរសព្ទរបស់​មន្រ្តីខ្លួនឡើយ​ចាប់ពីថ្ងៃទី២០​ខែមីនាតទៅ​ដែលជាការដើរតាមគន្លងផ្លូវរបស់​គណៈកម្មការ​អឺរ៉ុប​និង​ក្រុមប្រឹក្សា​អឺរ៉ុប។​វិធានការ​នេះ​ដោយសារបារម្ភថា​រដ្ឋាភិបាលចិនអាចនឹងប្រមូលទិន្នន័យអ្នកប្រើប្រាស់​​តាមរយៈ​​App​ដែល​ជារបស់​ក្រុមហ៊ុន​ByteDance​នេះ​ខណៈពលរដ្ឋ​EU​ដែល​ប្រើ​App​នេះ​មានដល់​១២៥លាននាក់ឯណោះ៕

ប្រភព៖ AS

រដ្ឋធានីវ៉ាស៊ីនតោន៖ រុស្ស៊ី ជាប្រទេស មានប្រវត្ដិរកបានចំណូលដ៏ច្រើនបំផុត ពីឧស្សាហកម្មនាំចេញគ្រឿងសព្វាវុធរបស់ខ្លួន បន្ទាប់ពីសហរដ្ឋអាមេរិក ប៉ុន្ដែសង្គ្រាមរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន បានជំរុញឲ្យមានយុទ្ធនាការ ហ៊ុមព័ទ្ធ ដោយទណ្ឌកម្ម ពីបណ្ដាប្រទេសលោកខាងលិច និង សម្ពន្ធមិត្ត ទើបធ្វើឲ្យការនាំចេញឧស្សាហកម្មគ្រឿងសឹករបស់ប្រទេសមហាអំណាចមួយនេះ ប្រឈមមុខនឹងការដួលរលំ។

ទស្សនាវដ្ដីព័ត៌មាន Newsweek បានចេញផ្សាយ កាលពីព្រឹក ថ្ងៃចន្ទ ទី១៣ ខែមីនា ឆ្នាំ២០២៣ ថា អង្គការឃ្លាំងមើលឧស្សហកម្មគ្រឿងសព្វាវុធឈានមុខគេរបស់ពិភពលោក បានចេញសេចក្ដីរាយការណ៍របស់ខ្លួន ថា ឧស្សាហកម្មនាំចេញគ្រឿងសព្វាវុធរបស់រុស្ស៊ី មានប្រវត្តិសាស្ត្រ រកបានប្រាក់ចំណូលដ៏ច្រើនបំផុត លំដាប់ទី២ នៅលើពិភពលោក បន្ទាប់ពីសហរដ្ឋអាមេរិក។ ប៉ុន្ដែបច្ចុប្បន្ន ឧស្សាហកម្មគ្រឿងសឹករបស់ប្រទេសមហាអំណាចមួយនេះ ហាក់ដូចបីដូចជាបង្ហាញសញ្ញា អំពីការដួលរលំ នៅក្រោមទម្ងន់ផ្លាស់ប្តូរបច្ចេកវិទ្យា ភាពឯកោខាងនយោបាយ នៅលើអន្តរជាតិ និង សង្រ្គាមដ៏ឃោរឃៅ និង បង្កគ្រោះមហន្តរាយយ៉ាងខ្លាំង នៅក្នុងប្រទេសអ៊ុយក្រែន។

វិទ្យាស្ថានស្រាវជ្រាវសន្ដិភាពអន្ដរជាតិស្ដុកខម ហៅកាត់ SIPRI បានចេញផ្សាយនូុវទិន្នន័យរបស់ខ្លួន នៅថ្ងៃចន្ទ នេះ ថា ការនាំចេញសម្ភារយោធារបស់រុស្ស៊ី បានធ្លាក់ចុះ រហូតដល់៣១ភាគរយ នៅក្នុងរយៈពេល៥ឆ្នាំមកនេះ បើធៀបនឹងរយៈពេលដូចគ្នា កាលពីមុន។ សកម្មភាពបែបនេះ កំពុងតែគំរាមកំហែង ដល់តួនាទីរបស់ក្រុងមូស្គូ ជាអ្នកចុះកិច្ចព្រមព្រៀងលក់គ្រឿងសព្វាវុធដ៏មានឥទ្ធិពលបំផុតលំដាប់លេខ២ នៅលើពិភពលោក។

ចំណែកនាំចេញគ្រឿងសព្វាវុធនៅលើពិភពលោករបស់រុស្ស៊ី បានធ្លាក់ចុះ ពី២២ភាគរយ មកនៅត្រឹម១៦ភាគរយ ចន្លោះពីឆ្នាំ២០១៣-២០១៧ និង ចន្លោះពីឆ្នាំ២០១៨ ដល់ ឆ្នាំ២០២២។ សកម្មភាពបែបនេះ ធ្វើឲ្យកាន់តែឃ្លាតឆ្ងាយ ពីការនាំចេញសម្ភារយោធារបស់សហរដ្ឋអាមេរិក រហូតដល់៤០ភាគរយ ដោយបាននាំមុខតែបន្ដិច លើប្រទេសបារាំង ដែលនាំចេញ ចំនួន១១ភាគរយ នៅក្នុងរយៈពេល៥ឆ្នាំកន្លងមកនេះ។

លោក ស៊ាម៉ុន វេហ្សេម៉ាន់ (Siemon Wezeman) អ្នកស្រាវជ្រាវជាន់ខ្ពស់របស់វិទ្យាស្ថានស្រាវជ្រាវសន្ដិភាពអន្ដរជាតិស្ដុកខម ហៅកាត់ SIPRI បានប្រាប់ដល់ Newsweek ថា «ផ្អែកលើទិន្នន័យទាំងនេះ វាជាការបង្ហាញសញ្ញាដ៏អាក្រក់មួយ សម្រាប់ការនាំចេញសម្ភារយោធារបស់រុស្ស៊ី។ បញ្ហានេះ ពិតជាមានសារសំខាន់ខ្លាំងណាស់ ប៉ុន្តែវាពិតជាមិនគួរឱ្យភ្ញាក់ផ្អើលនោះឡើយ ហើយវាមិនមែនដោយសារតែអ្វីដែលកំពុងតែកើតឡើង នៅអ៊ុយក្រែន ចាប់តាំងពីឆ្នាំ២០២២មកនោះដែរ។ អ្វីមួយដែលអ្នកអាចមើលឃើញ ថា វានឹងកើតឡើង»។

បណ្ដាប្រទេសលោកខាងលិច និង សម្ពន្ធមិត្ត កំពុងតែដាក់ប្រទេសរុស្ស៊ី ឲ្យស្ថិតនៅឯកោ ចាប់តាំងពីការការឈ្លានពាន និង ដាក់ឧបទ្វីបគ្រីមៀ (Crimea) ហើយការបំផុសគំនិតបះបោរ នៅក្នុងតំបន់ដុនបាស (Donbas) របស់អ៊ុយក្រែន នាភាគខាងកើតប្រទេស ចាប់តាំងពីឆ្នាំ២០១៤រហូតមក។ កិច្ចខិតខំប្រឹងប្រែងទាំងនេះ ត្រូវបានបានដាក់បន្ទុកខ្លាំង ចាប់តាំងពីកងទ័ពរុស្ស៊ី បានវិលចូល ឈ្លានពាននៅលើទឹកដីរបស់អ៊ុយក្រែន ម្តងទៀត ចាប់តាំងពីថ្ងៃទី២៤ ខែកុម្ភៈ ឆ្នាំ២០២២រហូតមក។ ក្រុងវ៉ាស៊ីនតោន ជាសត្រូវដ៏ចម្បងរបស់ក្រុងម៉ូស្គូ កំពុងវាយលុក ទៅលើមូលដ្ឋានអតិថិជនរបស់វិមានក្រឹមឡាំង។

ទន្ទឹមនឹងនេះ អត្រាដ៏ខ្ពស់គួរឱ្យភ្ញាក់ផ្អើល ចំពោះការខូចខាតកម្លាំងទាហាន មានការស្លាប់ និង រងរបួស ហើយការបាត់បង់គ្រឿងយុទ្ធោបករណ៍របស់រុស្ស៊ី នៅក្នុងសង្គ្រាមរបស់ក្រុងមូស្គូ នៅលើទឹកដីរបស់អ៊ុយក្រែន កំពុងតែដាក់សម្ពាធ ទៅលើក្រុមហ៊ុនផលិតសម្ភារការពារជាតិ ក៏ដូចជា ការបង្ហាញតួលេខតិចជាងតារាងវេទិកាអាវុធសំខាន់ៗរបស់រុស្ស៊ី។ សកម្មភាពទាំងនេះ ហាក់បីដូចជា មិនអាចទប់ទល់នឹងអាវុធដ៏ទំនើបៗបំផុតរបស់អង្គការណាតូ ត្រូវបានប្រើប្រាស់ ដោយកងទ័ពរបស់អ៊ុយក្រែន។

លោក ដេនីស ម៉ាន់ទូរ៉ូវ (Denis Manturov) ឧបនាយករដ្ឋមន្រ្ដីរុស្ស៊ី ទទួលបន្ទុកវិស័យឧស្សាហកម្ម និង ពាណិជ្ជកម្ម បានប្រាប់ដល់សារព័ត៌មាន Interfax កាលពីខែមុន ថា «ផ្នែកសំខាន់ៗបំផុត សម្រាប់គ្រឿងសព្វាវុធ ផលិតនៅក្នុងប្រទេស កំពុងតែត្រូវបានបញ្ជូន ទៅកាន់សមរភូមិនៅអ៊ុយក្រែន។ ការផ្តល់គ្រឿងសព្វាវុធទាំងនេះ ជាអាទិភាពដាច់ខាតរបស់យើង ប៉ុន្តែសូម្បីតែនៅក្នុងលក្ខខណ្ឌទាំងនេះ យើងនៅតែបន្តធ្វើការជាមួយដៃគូរបស់យើង មកពីប្រទេសជាមិត្ត និង បំពេញកាតព្វកិច្ចរបស់យើង»។

លោក ស៊ាម៉ុន វែហ្សេម៉ាន់ (Siemon Wezeman) អ្នកស្រាវជ្រាវជាន់ខ្ពស់របស់វិទ្យាស្ថានស្រាវជ្រាវសន្ដិភាពអន្ដរជាតិស្ដុកខម ហៅកាត់ SIPRI បានសង្កត់ធ្ងន់ ថា «ជាការពិតណាស់ វាមានបញ្ហាផ្សេងគ្នា ខណៈរុស្ស៊ីត្រូវតស៊ូជាមួយនឹងសម្ពាធ ពីសហរដ្ឋអាមេរិក និង បណ្ដាប្រទេសដទៃទៀត កំពុងតែបន្ត ចាប់តាំងពីឆ្នាំ២០១៤មក។ បញ្ហានេះ ធ្វើឲ្យប៉ះពាល់ដល់អតិថិជនដ៏សក្តានុពល និង អតិថិជនដែលមានស្រាប់ សម្រាប់រុស្ស៊ី ដើម្បីបញ្ឈប់ និង មិនទិញអាវុធរបស់រុស្ស៊ី។ នៅក្នុងពេលជាមួយគ្នានេះ ក្រុងមូស្គូ ត្រូវផ្តល់នូវបច្ចេកវិទ្យា និង អាវុធផ្សេង ទៅដល់ប្រទេសជាអ្នកបញ្ជាទិញគ្រឿងសព្វាវុធ។ រុស្ស៊ី កំពុងតែធ្វើការឲ្យបានខ្លាំងក្លា ជាមួយនឹងឥណ្ឌា និង ប្រទេសដទៃទៀត មានដូចជា ឥណ្ឌូណេស៊ី ខណៈប្រទេសអាស៊ានមួយនេះ បានលុបចោលនូវការបញ្ជាទិញយន្ដហោះប្រយុទ្ធរបស់រុស្ស៊ី។

យុទ្ធនាការដាក់ទណ្ឌកម្មរបស់លោកខាងលិច មិនធ្លាប់មានពីមុនមក ប្រឆាំងនឹងក្រុងម៉ូស្គូ កំពុងតែវាយប្រហារយ៉ាងខ្លាំង ថ្វីបើសេដ្ឋកិច្ចរបស់រុស្ស៊ី មិនបានធ្លាក់ចុះ ដល់កម្រិតមួយ ដូចការរំពឹងទុក កាលពីឆ្នាំមុនយ៉ាងណាក្ដី ប៉ុន្តែឱនភាពថវិការបស់វិមានក្រឹមឡាំង កំពុងតែកើនឡើងខ្ពស់ ខណៈប្រាក់ចំណេញ មកពីការនាំចេញឥន្ធនៈហ្វូស៊ីលរបស់ខ្លួន កំពុងតែធ្លាក់ចុះខ្លាំង។ ដោយឡែក ក្រុមហ៊ុនបរទេសជាង ១០០០ បានដកខ្លួនចេញពីប្រទេសរុស្ស៊ី ហើយការគ្រប់គ្រងការនាំចេញ កំពុងតែធ្វើឱ្យក្រុមហ៊ុនផលិតនានា មានការលំបាក កាន់តែខ្លាំងឡើង នៅក្នុងការទទួលបានគ្រឿងបន្លាស់ទំនើបៗ ដែលត្រូវការចាំបាច់ សម្រាប់ទំនិញ និង អាវុធបំពាក់ដោយបច្ចេកវិទ្យាជាន់ខ្ពស់៕

ប្រទេសមីយ៉ាន់ម៉ា ៖ ស្ថានីយទូរទស្សន៍ជាតិមីយ៉ាន់ម៉ា (MRTV) បានរាយការណ៍ថា ចិនជាប្រទេសទិញជ័រកៅស៊ូធំមួយពីមីយ៉ាន់ម៉ា ស្មើនឹង៧៥% របស់ការនាំចេញជ័រកៅស៊ូទាំងអស់របស់ប្រទេសមីយ៉ាន់ម៉ា ។

មីយ៉ាន់ម៉ាបាននាំចេញជ័រកៅស៊ូជាង២០ម៉ឺនតោនទៅកាន់ប្រទេសនានាលើពិភពលោកដូចជា ចិន កូរ៉េខាងត្បូង ឥណ្ឌា ម៉ាឡេស៊ី ឥណ្ឌូណេស៊ី សិង្ហបុរី និងជប៉ុន តាំងពីថ្ងៃទី១ ខែមេសា ឆ្នាំ២០២២ រហូតដល់ដើមខែកុម្ភៈ ឆ្នាំ២០២៣ កន្លងមក ។ នៅឆ្នាំ២០២៣នេះ មីយ៉ាន់ម៉ាមានគោលដៅនាំចេញជ័រកៅស៊ូរបស់ខ្លួនឱ្យស្មើគោលដៅដែលបានកំណត់ គឺ៣០ម៉ឺនតោន ។ តាមទិន្នន័យរបស់មជ្ឈមណ្ឌលទំនិញបញ្ជាក់ថា កាលពីដើមខែមករា ឆ្នាំ២០២៣ តម្លៃជ័រកៅស៊ូបន្ទះស្ងួតស្មើប្រមាណ១.១៩០kyat ក្នុង១ដុំ ។

មន្ត្រីសមាគមអ្នកដាំដុះ និងផលិតជ័រកៅស៊ូមីយ៉ាន់ម៉ានិយាយថា បច្ចុប្បន្ន តម្លៃជ័រកៅស៊ូក្នុងទីផ្សារក្រៅប្រទេស គឺស្មើប្រមាណ១.៧០០ដុល្លារអាមេរិកក្នុង១តោន ។ ទោះយ៉ាងណា តម្លៃជ័រកៅស៊ូបច្ចុប្បន្នមិនបានបំផ្លាញស្ថិតិតម្លៃខ្ពស់បំផុត១.៦០០ kyat ក្នុង១ដុំ ក្នុងរដូវចៀរកៅស៊ូនៅសប្តាហ៍ទី៣ របស់ខែកញ្ញា ឆ្នាំ២០២២ ទេ ។

គួរបញ្ជាក់ថា មីយ៉ាន់ម៉ាមានផ្ទៃដីដាំដុះកៅស៊ូទូទាំងប្រទេសប្រមាណ១,៦៤លានហិកតា ហើយកន្លែងផលិតជ័រកៅស៊ូភាគច្រើនស្ថិតនៅក្នុងរដ្ឋម៉ន តំបន់តាណាវស្រ៊ី និងរដ្ឋការៀង រួមទាំងនៅតំបន់ថេបបាហ្គោ អិរ៉ាវ៉ាឌី ទីក្រុងយ៉ាំងហ្គន រដ្ឋសាន និងរដ្ឋខាឆិន ។ ប្រទេសមីយ៉ាន់ម៉ារំពឹងថា នឹងអាចផលិតជ័រកៅស៊ូបានប្រមាណ៤០ម៉ឺនតោននៅឆ្នាំ២០២៣នេះ ខណៈការផលិតជ័រកៅស៊ូជារៀងរាល់ឆ្នាំ មីយ៉ាន់ម៉ាអាចរកប្រាក់ចំណេញបានច្រើនពីក្រៅប្រទេស ។

ក្រៅពីនេះ តម្រូវការ និងការផ្គត់ផ្គង់ក្នុងទីផ្សារពិភពលោក រួមទាំងការផលិតជ័រកៅស៊ូក្នុងតំបន់អាស៊ាន គឺមានទំនាក់ទំនងគ្នាខ្លាំងជាមួយតម្លៃជ័រកៅស៊ូរបស់មីយ៉ាន់ម៉ាផងដែរ ៕ ប្រភព ៖ AEC connect

ប្រទេសកូរ៉េខាងជើង ៖ តាមសារព័ត៌មានកូរ៉េខាងជើងផ្សព្វផ្សាយថា កូរ៉េខាងជើងបានសម្រេចចិត្តប្រើប្រាស់វិធានការដើម្បីទប់ស្កាត់សង្គ្រាម ដោយរៀបចំសកម្មភាពប្រតិបត្តិការយ៉ាងសំខាន់ ។ ការប្រកាសនេះ គឺមុនពេលកូរ៉េខាងត្បូង និងអាមេរិកនឹងចាប់ផ្តើមធ្វើសមយុទ្ធរួមគ្នាដ៏ធំមួយក្នុងរយៈពេល៥ឆ្នាំ ។

សារព័ត៌មានកណ្តាលរបស់កូរ៉េខាងជើង KCNA បានរាយការណ៍ថា ក្នុងកិច្ចប្រជុំគណៈកម្មាធិការយោធានៃគណបក្សពលករ ដែលមានលោក គឹម ជុងអ៊ុន មេដឹកនាំកំពូលនៃប្រទេសកូរ៉េខាងជើងធ្វើជាប្រធាននៃកិច្ចប្រជុំដើម្បីពិភាក្សា និងសម្រេចចិត្តប្រើប្រាស់វិធានការគ្រប់គ្រងសកម្មភាពសំខាន់ៗដើម្បីទប់ស្កាត់សង្គ្រាមប្រកបដោយប្រសិទ្ធភាព និងពង្រឹងកងកម្លាំងឱ្យកាន់តែខ្លាំងក្លាជាមុន ។ ការប្រកាសចាត់វិធានការរបស់កូរ៉េខាងជើងនេះ គឺក្នុងគោលបំណងទប់ស្កាត់ស្ថានការណ៍បច្ចុប្បន្ន ខណៈកូរ៉េខាងជើងអះអាងថា កូរ៉េខាងត្បូង និងអាមេរិកកំពុងតែបង្កសង្គ្រាម ។

កាលពីមុន កូរ៉េខាងត្បូង និងអាមេរិកបានប្រកាសថា ប្រទេសទាំងពីរនឹងធ្វើសមយុទ្ធរួមគ្នាមួយក្រោមឈ្មោះថា Freedom Shield នាពេលឆាប់ៗនេះ ។ ការធ្វើសមយុទ្ធរួមគ្នារវាងប្រទេសទាំងពីរ គឺផ្តោតទៅលើស្ថានភាពសន្តិសុខដែលកំពុងផ្លាស់ប្តូរ ព្រោះកូរ៉េខាងជើងបានបង្កើនការឈ្លានពានរបស់ខ្លួនរហូតដល់២ដង ។

កាលពីថ្ងៃទី១០ ខែមីនា កន្លងមក សារព័ត៌មានកណ្តាលរបស់កូរ៉េខាងជើង KCNA រាយការណ៍ថា មេដឹកនាំកំពូលកូរ៉េខាងជើងបានបញ្ជាឱ្យកងទ័ពរបស់ខ្លួនបង្កើនការហ្វឹកហាត់សម្រាប់ត្រៀមខ្លួនធ្វើសង្គ្រាមពិតប្រាកដ ។ លោក គឹម ជុងអ៊ុន បានថ្លែងក្នុងអំឡុងពេលត្រួតពិនិត្យការហ្វឹកហាត់ការបាញ់ប្រហាររបស់កងទ័ពថា កងទ័ពត្រូវត្រៀមខ្លួនសម្រាប់ភារកិច្ចផ្នែកយុទ្ធសាស្ត្រ២យ៉ាង គឺការទប់សង្កាត់សង្គ្រាម និងចាប់ផ្តើមធ្វើសង្គ្រាម ។

ទោះយ៉ាងណា អ្នកវិភាគមើលឃើញថា កូរ៉េខាងជើងនឹងយកការធ្វើសមយុទ្ធរួមគ្នារវាងកូរ៉េខាងត្បូង និងអាមេរិក ធ្វើជាលេសដើម្បីធ្វើសកម្មភាពអាក្រក់ថែមទៀត ដូចជា សាកល្បងបាញ់មីស៊ីល ឬសាកល្បងអាវុធនុយក្លេអ៊ែរ ជាដើម ៕

ប្រភព ៖ TNN World

នៅយប់ថ្ងៃទី១២ ខែមីនា ឆ្នាំ២០២៣ នេះ សម្តេចតេជោ ហ៊ុន សែន បានផ្ញើសារ​ ក្រើនរម្លឹកដល់​ប្រជាពលរដ្ឋ ឱ្យ​បងប្អូនប្រជាពលរដ្ឋមានការប្រុងប្រយ័ត្នការឆបោក តាមតេឡេក្រាម។ នេះក៏ដោយសារ​តែសម្តេច បានទទួល​សារ​តាមតេឡេក្រាម ពីអ្នកដាក់ឈ្មោះ និងរូបថតអ្នកឧកញ៉ា ឃុន សៀ ហើយ​ឱ្យ​សម្តេច ផ្ទេរប្រាក់ឱ្យតាម Account ធនាគារ ABA។

សម្តេចតេជោ ហ៊ុន សែន បានប្រកាសតាមសារ​ជាសំឡេងថា៖ “លេខអ្នកផ្ញើសារចូល​តេឡេក្រាមសម្តេចនោះ ជាលេខនៅឡាវ។ តែតាមការស្រាវជ្រាវ គឺអ្នកផ្ញើចេញពីតៃវ៉ាន់​។ គេបានផ្ញើសារជាភាសាអង់គ្លេស មកសម្តេច ឱ្យវេរលុយ តាម ABA”។

ដូច្នេះ​ករណី​ឆបោកប្រាក់នេះ សម្តេចតេជោ បានប្រកាសអំពាវនាវដល់​បងប្អូន​ជនរួមជាតិ សូម​ប្រុងប្រយ័ត្ន​ កុំ​ចាញ់បោក​គេ ក្នុងករណីណាមួយ៕

ចូលស្តាប់ប្រសាសន៍សម្តេចពេញ៖ https://t.me/spmhunsen