ប្រទេសអង់គ្លេស ៖ កាលពីថ្ងៃទី១២ ខែមីនា កន្លងមក នាយករដ្ឋមន្ត្រីប្រទេសអង់គ្លេស លោក Richie Sunak បានថ្លែងថា ប្រទេសអង់គ្លេសមានគម្រោងបង្កើនថវិកាផ្នែកការពារជាតិចំនួន៥ពាន់លានផោនដើម្បីយកទៅទិញអាវុធ និងវិនិយោគក្នុងកិច្ចព្រមព្រៀង «Acus» ដែលជាកិច្ចព្រមព្រៀងត្រីភាគីរវាងសហរដ្ឋអាមេរិក អង់គ្លេស និងអូស្ត្រាលី ។

កិច្ចព្រមព្រៀងត្រីភាគីនេះ ប្រទេសទាំងបីនឹងរួមគ្នាអភិវឌ្ឍន៍ និងដំណើរការនាវាមុជទឹកដើរដោយថាមពលនុយក្លេអ៊ែរ ក្នុងគោលបំណងបង្កើនតួនាទីផ្នែកកងទ័ពនៅប្រទេសលោកខាងលិចក្នុងតំបន់អាស៊ីប៉ាស៊ីហ្វិក ។

នាយករដ្ឋមន្ត្រីប្រទេសអង់គ្លេស លោក Richie Sunak បានថ្លែងបែបនេះក្នុងអំឡុងពេលលោកធ្វើដំណើរទៅកាន់ទីក្រុង San Diego រដ្ឋកាលីហ្វ័រញ៉ា សហរដ្ឋអាមេរិក ដើម្បីពិភាក្សាគ្នាពីលក្ខខណ្ឌដំណាក់កាលបន្ទាប់នៃកិច្ចព្រមព្រៀង «Acus» ជាមួយមន្ត្រីតំណាងមកពីអាមេរិក និងអូស្ត្រាលី ។

លោក Richie Sunak បានបញ្ជាក់ពីការបង្កើនថវិកាក្នុងផ្នែកការពារជាតិលើកនេះថា វាដើម្បីជាការធានាថា អង់គ្លេសនឹងគ្មានថ្ងៃទន់ខ្សោយដោយសារការរំលោភបំពានពីសត្រូវដែលមានអំណាចបន្តទៀតទេ ។

ទោះយ៉ាងណា ការស្នើបង្កើនថវិកាផ្នែកការពារជាតិប្រមាណ៥ពាន់លានផោនរបស់លោក Richie Sunak នោះ វាជាចំនួនតិចជាងពាក់កណ្តាលនៃចំនួនប្រាក់ដែលគណបក្សអភិរក្សនិយមបាននិយាយថា លោក Richie Sunak ចាំបាច់ប្រើប្រាស់ប្រាក់នេះដើម្បីជួយគាំទ្រប្រទេសអ៊ុយក្រែនឱ្យការពារដែនដីរបស់ខ្លួន ៕

ប្រភព ៖ TNN World

ប្រទេសវៀតណាម ៖ រដ្ឋមន្ត្រីក្រសួងកសិកម្ម និងអភិវឌ្ឍន៍ជនបរទេសវៀតណាម លោក Le Minh Hoan បានថ្លែងថា វៀតណាមត្រូវតែផ្តោតលើគុណភាពទិន្នផលកសិកម្ម ជាជាងផ្តោតលើបរិមាណការផលិត ទើបប្រទេសវៀតណាមអាចប្រកួតប្រជែងជាមួយប្រទេសជិតខាងបាន ។

នៅឆ្នាំ២០២២ កន្លងមក ទិន្នផលកសិកម្មរបស់វៀតណាមដែលបាននាំចេញទៅក្រៅប្រទេសបានងើបឡើងវិញ បន្ទាប់ពីស្ថានភាពជំងឺកូវីដបានធូរស្រាល និងបានរីកលូតលាស់យ៉ាងរឹងមាំ ។ នៅឆ្នាំ២០២២ គឺជាឆ្នាំដែលវៀតណាមអាចផលិតទិន្នផលកសិកម្មបានល្អ ប៉ុន្តែការនាំចេញបន្លែ និងផ្លែឈើរបស់វៀតណាមបានធ្លាក់ចុះជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ ដោយសារវៀតណាមបានប្រើយុទ្ធសាស្ត្រអភិវឌ្ឍន៍ទីផ្សារមិនត្រឹមត្រូវ ខណៈកសិករវៀតណាមភាគច្រើនបានផ្តោតទៅលើបរិមាណផលិតទិន្នផលច្រើនជាងគុណភាព ។

ក្រៅពីនេះ កសិករវៀតណាមជាច្រើននាក់បានលួចនាំចេញផលិតផលរបស់ពួកគេតាមច្រកមិនផ្លូវការទៅកាន់ប្រទេសចិន ហេតុនេះហើយទើបធ្វើឱ្យការនាំចេញផ្លែឈើរបស់វៀតណាមធ្លាក់ចុះ ។ កន្លងមក ប្រទេសចិនដែលជាអតិថិជនទិញផ្លែឈើដ៏ធំបំផុតរបស់វៀតណាម បានដាក់កំណត់ឱ្យវៀតណាមផ្តោតលើគុណភាពទិន្នផលរបស់ខ្លួនសម្រាប់នាំចេញទៅកាន់ទីផ្សារចិន និងលុបបំបាត់ការនាំចេញលួចលាក់មិនផ្លូវការនានា ។

អ្នកជំនាញបានចង្អុលបង្ហាញថា អតិថិជនមិនត្រឹមតែត្រូវការផលិតផលមានអនាម័យ និងឆ្ងាញ់ប៉ុណ្ណោះទេ ប៉ុន្តែពួកគេត្រូវការភាពងាយស្រួលផងដែរដូចជា ការវេចខ្ចប់ត្រឹមត្រូវ ។ ទោះយ៉ាងណា កសិករ និងក្រុមហ៊ុននាំចេញរបស់វៀតណាមមិនទាន់បានសម្របខ្លួនទៅតាមឥរិយាបថថ្មីនេះទេ ដោយពួកគេចូលចិត្តលក់ផ្លែឈើស្រស់ រីឯការលក់ផ្លែឈើវេចខ្ចប់ត្រឹមត្រូវតាមស្តង់ដារនោះ គឺមានកំណត់នៅឡើយ ៕ ប្រភព ៖ The Durian Times

ប្រទេសវៀតណាម ៖ តាមវែបសាយល្បីឈ្មោះរបស់វៀតណាមឈ្មោះ vnexpress.net បានរាយការណ៍ថា ការនាំចេញទុរេនរបស់វៀតណាមមាននិន្នាការធ្លាក់ចុះយ៉ាងឆាប់រហ័ស ដោយសារវៀតណាមមិនបានកែលម្អគុណភាពទំនិញ និងផលិតផលកសិកម្មរបស់ខ្លួន ។ លើសពីនេះ ប្រទេសចិនបានពង្រីកផ្ទៃដីដាំដុះទុរេន និងបង្កើនទិន្នផលផលិតជាបន្តបន្ទាប់ ក្រោយពីការដាំដុះទុរេនរបស់ចិនបានបរាជ័យអស់ជាច្រើនឆ្នាំ ។

វិទ្យាស្ថានផ្លែឈើតំបន់ត្រូពិក (Hainan Academy of Agricultural Sciences) លើកឡើងថា ខេត្តស្ថិតនៅភាគខាងត្បូងប្រទេសចិន បានទទួលជោគជ័យក្នុងការដាំទុរេននៅលើផ្ទៃដីជាង២.០០០ហិកតា ហើយគេសង្ឃឹមថា ចិននឹងអាចផ្គត់ផ្គង់ទុរេនទៅកាន់ទីផ្សារនៅឆ្នាំ២០២៤ ក្នុងបរិមាណពី៤៥.០០០តោន ទៅ៧៥.០០០តោន ។ វិទ្យាស្ថាននេះបន្តថា ចិននឹងពង្រីកផ្ទៃដីដាំទុរេនទៅកាន់ខេត្តភាគខាងជើងប្រទេស និងស្វែងរកការនាំចូលដើមទុរេនមានគុណភាពល្អពីក្រៅប្រទេសផងដែរ ។ លើសពីនេះ កសិករចិនអាចដាំទុរេនក្នុងស្រុកឱ្យមានផ្លែច្រើន និងពង្រីកពូជទៀតផង ។

ទោះយ៉ាងណា លោក Du Baizhong អគ្គនាយកក្រុមហ៊ុន Hainan Youqi Agriculture បានថ្លែងថា ដើមទុរេនរបស់ក្រុមហ៊ុនលោកបានធំលូតលាស់ល្អ និងចេញផ្លែជាប្រចាំ ។ នៅថ្ងៃខាងមុខនេះ ការពង្រីកផ្ទៃដីដាំទុរេននៅប្រទេសវៀតណាមនឹងកើនឡើងយ៉ាងឆាប់រហ័ស ។

អ្នកនាង Ngo Tuong Vy នាយករងក្រុមហ៊ុន Chanh Thu Import-Export Co., Ltd (Ben Tre) ជាក្រុមហ៊ុននាំចេញទុរេនទៅកាន់ប្រទេសចិន បានបង្ហាញក្តីបារម្ភថា ទំនិញ និងផលិតផលរបស់វៀតណាមនឹងបាត់បង់ទីផ្សារ បើវៀតណាមមិនកែលម្អគុណភាពទំនិញរបស់ខ្លួនទេនោះ ។

ក្រៅពីនេះ អ្នកតំណាងក្រុមហ៊ុន Sunwah International Trading Company (Guangzhou) និយាយដែរថា ទុរេនវៀតណាមស្ថិតនៅក្រោមសម្ពាធប្រកួតប្រជែងខ្លាំងជាមួយទុរេនថៃ និងម៉ាឡេស៊ី ខណៈប្រទេសទាំងពីរនេះបាននាំចេញទុរេនទៅកាន់ទីផ្សារចិនក្នុងរយៈពេលយូរជាងវៀតណាម ។ អ្នកតំណាងក្រុមហ៊ុនរូបនេះបានលើកឡើងពីការស្រាវជ្រាវទីផ្សារថា ការប្រកបអាជីវកម្មកន្លងមកឃើញថា មានផលិតផលមួយចំនួនបានបំពានលក្ខខណ្ឌកិច្ចសន្យាការនាំចេញ ដែលធ្វើឱ្យខូចកេរ្តិ៍ឈ្មោះការនាំចេញផលិតផលរបស់ក្រុមហ៊ុនវៀតណាម ៕ ប្រភព ៖ The Durian Times

ប្រទេសកូរ៉េខាងជើង ៖ តាមព័ត៌មានពីកងទ័ពកូរ៉េខាងត្បូងបង្ហាញថា នៅព្រឹកថ្ងៃទី១៤ ខែមីនា កូរ៉េខាងជើងបានបាញ់មីស៊ីលរយៈចម្ងាយខ្លីចំនួន២គ្រាប់ទៅកាន់សមុទ្រខាងកើត ។ គេចាត់ទុកថា វាជាការសាកល្បងអាវុធលើកចុងក្រោយរបស់កូរ៉េខាងជើង ខណៈអាមេរិក និងកូរ៉េខាងត្បូងបានធ្វើសមយុទ្ធរួមគ្នាដ៏ធំបំផុត ។

អគ្គលេខាធិការចម្រុះរបស់កូរ៉េខាងត្បូងលើកឡើងថា កូរ៉េខាងជើងបានបាញ់មីស៊ីលចេញពីខេត្ត Huanghae ស្ថិតនៅភាគខាងត្បូងប្រទេស ដោយមីស៊ីលនេះហោះបានចម្ងាយ៦២០គីឡូម៉ែត្រ ។

នាយករដ្ឋមន្ត្រីជប៉ុន លោក Fumio Kishida ថ្លែងថា ជប៉ុនកំពុងប្រមូលព័ត៌មានពាក់ព័ន្ធនឹងមីស៊ីលនេះ ប៉ុន្តែពុំមានសេចក្តីរាយការណ៍ពីការខូចខាតដល់ប្រទេសជប៉ុនទេ ខណៈលេខាធិការខុទ្ទកាល័យជប៉ុន លោក Matsuno Hirokazu បានថ្លែងដែរថា មិនទាន់មានការរាយការណ៍ថា មីស៊ីលនេះបានធ្លាក់ក្នុងទឹកដី ឬតំបន់សេដ្ឋកិច្ចរបស់ជប៉ុនទេ ។ ប៉ុន្តែលោក Matsuno Hirokazu ថ្លែងថា ៖ «វាអាចទៅរួចដែលកូរ៉េខាងជើងនឹងបង្កើនការបាញ់មីស៊ីល និងសាកល្បងអាវុធនុយក្លេអ៊ែររបស់ខ្លួនខ្លាំងជាងមុន ។ ដូច្នេះ ជប៉ុននឹងសហការគ្នាជាមួយអាមេរិក និងកូរ៉េខាងត្បូង ពាក់ព័ន្ធនឹងបញ្ហាកូរ៉េខាងជើង ហើយជប៉ុននឹងវិភាគព័ត៌មាននេះបន្តទៀត» ។

ចំណែកកូរ៉េខាងត្បូងបានថ្កោលទោសការបាញ់សាកល្បងមីស៊ីលរបស់កូរ៉េខាងជើងថា វាជាអំពើអាក្រក់បំផុតដែលបានគំរាមកំហែងសុវត្ថិភាព និងសន្តិសុខក្នុងតំបន់ ហើយក៏បានបំពានលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិផងដែរ ។

កាលពីពេលថ្មីៗនេះ កូរ៉េខាងជើងបានសាកល្បងបាញ់មីស៊ីលរបស់ខ្លួនជាច្រើនលើក ហើយមេដឹកនាំកំពូលរបស់កូរ៉េខាងជើង លោក គឹម ជុងអ៊ុន ក៏បានបញ្ជាទៅកាន់កងទ័ពឱ្យធ្វើការហ្វឹកហាត់ដូចសង្គ្រាមពិតប្រាកដ ដើម្បីការពារប្រទេសកូរ៉េខាងជើង ក៏ដូចជាប្រឆាំងនឹងការធ្វើសមយុទ្ធរួមគ្នារវាងអាមេរិក និងកូរ៉េខាងត្បូង ។

គួរបញ្ជាក់ថា កាលពីថ្ងៃទី១៣ ខែមីនា កន្លងមក កងទ័ពរបស់អាមេរិក និងកូរ៉េខាងត្បូង បានបើកឆាកធ្វើសមយុទ្ធរួមគ្នាមានរយៈពេល១១ថ្ងៃ ក្រោមឈ្មោះ Freedom Shield 23 ដែលជាការធ្វើសមយុទ្ធដ៏ធំបំផុតក្នុងរយៈពេល៦ឆ្នាំ ដើម្បីប្រឆាំងនឹងការគំរាមកំហែងពីកូរ៉េខាងជើង៕

ប្រភព ៖ The standard

សហរដ្ឋអាមេរិក ៖ បណ្តាញផ្សព្វផ្សាយសង្គមពេញនិយមនានាដូចជា Instagram, Facebook និង Snapchat បានក្លាយជាគោលដៅមួយដែលពលរដ្ឋអាមេរិកកំពុងស្វែងរកវិធីលុបកម្មវិធីទាំងនេះចេញពីទូរស័ព្ទដៃរបស់ពួកគេ ក្នុងរយៈពេល៦ខែកន្លងមក ។ ជាក់ស្តែង មានពលរដ្ឋអាមេរិកជាច្រើននាក់បានស្វែងរកវិធីលុបកម្មវិធី Instagram ចំនួនជាង៩០ម៉ឺនដង បន្ទាប់មក ពួកគេបានស្វែងរកវិធីលុប Facebook ចេញពីទូរស័ព្ទដៃ ចំនួន៣៨ម៉ឺន៥ពាន់ដងផងដែរ ។

តាមការវិភាគរបស់វែបសាយ keywordtool.io និងទិន្នន័យពីវែបសាយស្រដៀងគ្នានេះ អំពីការស្វែងរកវិធីលុបបណ្តាញសង្គមនានាចេញពីទូរស័ព្ទដៃ គេសង្កេតឃើញថា មានកម្មវិធីចំនួន៥ ដែលពលរដ្ឋអាមេរិកបានស្វែងរកច្រើនបំផុត ដូចជា ៖
១-Instagram (៩០០.១២០ដង)
២-Facebook (៣៨៥.៤១០ដង)
៣-Snapchat (២១៧.៤០០ដង)
៤-Twitter (៩២.៤៩០ដង)
៥-Telegram (២៤.៨១៩ដង)

គេចាត់ទុកថា វាជារឿងគួរឱ្យភ្ញាក់ផ្អើលណាស់ ពីព្រោះ Instagram គឺជាកម្មវិធីមួយដែលគេបានដោនឡូតច្រើនបំផុតក្នុងលំដាប់ទី២ នៅឆ្នាំ២០២២ ដោយមានការដោនឡូតកម្មវិធីនេះជាង៥៤៨លានដងនៅទូទាំងពិភពលោក ខណៈការដោនឡូត TikTok មានចំនួន៦៧២លានដង ។

កាលពីឆ្នាំ២០២២ កន្លងមក ចំនួនការប្រើប្រាស់បណ្តាញសង្គមបានថយចុះក្នុងចំណោមពលរដ្ឋអាមេរិកបង្ហាញឱ្យឃើញថា ពួកគេកាន់តែមិនទុកចិត្តបណ្តាញសង្គមនានាដូចជា ផ្សព្វផ្សាយព័ត៌មានមិនពិត ការគំរាមកំហែងតាមអ៊ិនធើរណេត និងការបារម្ភពីរឿងផ្ទាល់ខ្លួនជាដើម ។ លើសពីនេះ ពលរដ្ឋអាមេរិកមួយចំនួនបារម្ភពីការលេងបណ្តាញសង្គមធ្វើឱ្យយុវវ័យមានសុខភាពផ្លូវចិត្ត និងការសិក្សាធ្លាក់ចុះ ។

តាមការស្ទង់មតិទៅលើយុវវ័យរបស់ Pew Center បង្ហាញថា ៥៤% ឆ្លើយថា វាជារឿងលំបាកដែលឱ្យពួកគេឈប់ប្រើប្រាស់បណ្តាញសង្គម ហើយ៤៦% ឆ្លើយថា វាងាយស្រួលក្នុងការបោះបង់បណ្តាញសង្គម ខណៈ២០%ទៀតឆ្លើយថា ងាយស្រួលណាស់ បើពួកគេចង់បោះបង់បណ្តាញសង្គមចោល ។ ក្នុងការស្ទង់មតិដូចគ្នានេះ យុវវ័យ៦២% ឆ្លើយថា ពួកគេបានប្រើប្រាស់ Instagram ហើយមានតែ៣២%ប៉ុណ្ណោះឆ្លើយថា បានប្រើប្រាស់ Facebook ៕

ប្រភព ៖ The standard

រដ្ឋធានីវ៉ាស៊ីនតោន៖ ស្របពេល ក្រុងប៉េកាំង បានធ្វើយោធូបនីយកម្មយ៉ាងឆាប់រហ័ស ហើយកំពុងតែបង្កើនសកម្មភាពយោធា នៅក្នុងតំបន់ផងនោះ សហរដ្ឋអាមេរិក បានបង្កើតសន្ធិសញ្ញា ឬ កតិកាសញ្ញាជាច្រើន ជាមួយនឹងសម្ពន្ធមិត្ត ដោយផ្ដោតយ៉ាងសំខាន់ ទៅលើការធានានូវសន្ដិសុខ នៅក្នុងតំបន់ឥណ្ឌូ-ប៉ាស៊ីហ្វិក ហើយឥឡូវនេះ មេដឹកនាំកតិកាសញ្ញាសន្ដិសុខត្រីភាគី ដែលគេស្គាល់ ថា AUKUS (អូកខឺស) បានបង្ហាញ អំពីគម្រោងជាច្រើន សម្រាប់នាវាមុជទឹក ដើរដោយថាមពលនុយក្លេអ៊ែរ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃអង្គារ ទី១៤ ខែមីនា ឆ្នាំ២០២៣ ថា មេដឹកនាំរបស់សហរដ្ឋអាមេរិក ចក្រភពអង់គ្លេស និង អូស្រ្ដាលី បានប្រកាសព័ត៌មានលម្អិត អំពីវិធីសាស្រ្ដ ដែលអូស្រ្ដាលី នឹងទទួលបាននាវាមុជទឹក ដើរដោយថាមពលបរមាណូ ក្រោមកតិកាសញ្ញាសន្ដិសុខ សម្រាប់តំបន់អាស៊ីប៉ាស៊ីហ្វិក ដែលត្រូវបានបង្ហាញ អស់រយៈពេល១៨ខែជាលើកដំបូងមកនេះ។

លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានបញ្ជាក់ថា ក្រុងវ៉ាស៊ីនតោន នឹងបញ្ជូននាវាមុជទឹកដើរដោយថាមពលនុយក្លេអ៊ែរ ប្រភេទ Virginia-Class ចំនួន៣គ្រឿងទៅកាន់ប្រទេសអូស្ត្រាលី ជាមួយនឹងសក្តានុពលក្នុងការលក់ រហូតដល់២គ្រឿងបន្ថែមទៀត ប្រសិនបើចាំបាច់។

ប្រធានាធិបតីសហរដ្ឋអាមេរិក លោក ចូ បៃដិន (Joe Biden), នាយករដ្ឋមន្ត្រីចក្រភពអង់គ្លេស លោក រីស៊ី ស៊ូណាក់ (Rishi Sunak) និង នាយករដ្ឋមន្ត្រីអូស្ត្រាលី លោក អាតូនី អាល់បាណេស (Anthony Albanese) បានបញ្ជាក់ នៅក្នុងសេចក្តីថ្លែងការណ៍រួមមួយ កាលពីថ្ងៃចន្ទ ខណៈមេដឹកនាំទាំងនេះ បានជួបប្រជុំគ្នា នៅរដ្ឋកាលីហ្វ័រញ៉ា សហរដ្ឋអាមេរិក។

កតិកាសញ្ញាសន្ដិសុខត្រីភាគី ដែលស្គាល់ ថា AUKUS នេះ មានប្រទេសចំនួន៣ ជាសមាជិក រួមមាន សហរដ្ឋអាមេរិក ចក្រភពអង់គ្លេស និង អូស្រ្ដាលី។ កិច្ចព្រមព្រៀងនេះ មានគោលបំណងរក្សាឲ្យបាននូវសេរីភាព និង បើកចំហ សម្រាប់តំបន់ឥណ្ឌូ-ប៉ាស៊ីហ្វិក។ ក្រោមកិច្ចព្រមព្រៀង AUKUS នេះ អូស្រ្ដាលី នឹងទិញនាវាមុជទឹកដើរដោយថាមពលនុយក្លេអ៊ែររបស់សហរដ្ឋអាមេរិក ចំនួន៣គ្រឿង។ ជាមួយគ្នានេះ អូស្រ្ដាលី ក៏នឹងមានជម្រើសទិញនាវាមុជទឹកដើរដោយថាមពលនុយក្លេអ៊ែរ ចំនួន២គ្រឿងបន្ថែមទៀត ក្រោយពេលមានកិច្ចព្រមព្រៀងជាលើកដំបូង ដែលគ្រោង សម្រាប់ដើមទសវត្សរ៍ឆ្នាំ២០៣០។

សហរដ្ឋអាមេរិក ចក្រភពអង់គ្លេស និង អូស្រ្ដាលី បានបង្កើតកិច្ចព្រមព្រៀងសន្តិសុខនេះឡើង ក៏ជាផ្នែកមួយនៃកិច្ចខិតខំប្រឹងប្រែង ដែលកំពុងតែបន្ត ដើម្បីឆ្លើយតបទៅនឹងកម្លាំងយោធារបស់ក្រុងប៉េកាំង ដែលកំពុងតែកើនឡើង និង វត្តមានដ៏រឹងមាំ នៅក្នុងតំបន់អាស៊ីប៉ាស៊ីហ្វិក។ កិច្ចព្រមព្រមព្រៀងនេះ រាប់បញ្ចូលទាំងការប្ដេជ្ញាចិត្ត ដើម្បីធ្វើកិច្ចសហប្រតិបត្ដិការ កសាងសមត្ថភាពស៊ើបអង្កេតសិប្បនិមិត្ដ អាវុធមានល្បឿនលឿនជាងសំឡេង និង បច្ចេកវិទ្យាជាន់ខ្ពស់ផ្សេងៗទៀត។

ថ្លែងចេញពីមូលដ្ឋានកងទ័ពជើងទឹក Point Loma (ផញឡូម៉ា) ស្ថិតក្នុងទីក្រុងសាន់ឌាហ្គោ (San Diego) រដ្ឋកាលីហ្វ័រញ៉ា សហរដ្ឋអាមេរិក លោកប្រធានាធិបតី ចូ បៃដិន បានហៅពេលវេលានេះ ថា «វាជាចំណុចឆ្លងកាត់ នៅក្នុងប្រវត្តិសាស្ត្រ ខណៈការខិតខំប្រឹងប្រែង ពង្រឹងនូវការរារាំង និង ការលើកកម្ពស់ស្ថិរភាព កំពុងតែបង្កផលប៉ះពាល់ដល់ការរំពឹងទុក សម្រាប់សន្តិភាព សម្រាប់រយៈពេលរាប់សិបទសវត្សរ៍ ទៅខាងមុខទៀត»។

លោកប្រធានាធិបតីសហរដ្ឋអាមេរិក បានប្រាប់ដល់នាយករដ្ឋមន្រ្ដីអូស្រ្ដាលី និង ចក្រភពអង់គ្លេស ថា «ខ្ញុំមានមោទកភាពខ្លាំងណាស់ ក្លាយជាមិត្ដរួមនាវាជាមួយគ្នា»។

ទន្ទឹមនឹងនេះ លោក រីស៊ី ស៊ូនាក់ នាយករដ្ឋមន្រ្ដីចក្រភពអង់គ្លេស បានលើកឡើង អំពីបញ្ហាប្រឈម កំពុងកើនឡើង រួមទាំងការលុកលុយ ដោយខុសច្បាប់របស់រុស្ស៊ី ទៅលើអ៊ុយក្រែន ការអះអាងរបស់ចិនកាន់តែខ្លាំងឡើង ទៅលើសមុទ្រចិនខាងត្បូង អាកប្បកិរិយាបង្កអស្ថិរភាពរបស់អ៊ីរ៉ង់ និង កូរ៉េខាងជើង។

លោកនាយករដ្ឋមន្រ្ដីចក្រភពអង់គ្លេស បានសង្កត់ធ្ងន់ ថា «ការប្រឈមមុខនឹងការពិតថ្មីបែបនេះ វាពិតជាមានសារៈសំខាន់ជាងពេលណាៗទាំងអស់។ យើងពង្រឹងនូវភាពធន់ សម្រាប់ប្រទេសរបស់យើង។ ប៉ុន្តែចុងក្រោយ កិច្ចការពារតម្លៃរបស់យើង ពឹងផ្អែកលើអ្វីៗ ដូចដែលយើងតែងតែមាន គឺលើគុណភាពលើទំនាក់ទំនងរបស់យើង ជាមួយបណ្ដាប្រទេសផ្សេងៗទៀត»។

ដោយឡែក រដ្ឋាភិបាលក្រុងប៉េកាំង បានចោទប្រកាន់ជាដដែល ថា កិច្ចព្រមព្រៀងត្រីភាគី AUKUS នេះ ជាការបង្កើតគំនិតសង្គ្រាមត្រជាក់ ហើយវាជាការប្រថុយប្រថាន នឹងការបង្កើនជម្លោះឲ្យកាន់តែខ្លាំងឡើង នៅក្នុងតំបន់។

បើតាមផែនការចេញផ្សាយ ដោយសហរដ្ឋអាមេរិក ចក្រភពអង់គ្លេស និង អូស្រ្ដាលី បានឲ្យដឹង ថា នៅដើមទសវត្សរ៍ ឆ្នាំ២០៣០ នឹងងរង់ចាំការយល់ព្រម ពីសភាអាមេរិក ហើយក្រុងវ៉ាស៊ីនតោន នឹងលក់នាវាមុជទឹកដើរដោយថាមពលនុយក្លេអ៊ែរ ប្រភេទ Virginia-class ចំនួន៣ គ្រឿង មានតម្លៃប្រមាណ៣ពាន់លានដុល្លារ ទៅឱ្យប្រទេសអូស្ត្រាលី។

ជាមួយគ្នានេះ អូស្រ្ដាលី និង ចក្រភពអង់គ្លេស នឹងចាប់ផ្ដើមសាងសង់នាវាមុជទឹក ម៉ូដែលថ្មីជាមួយនឹងបច្ចេកវិទ្យា និង ការគាំទ្រ ពីសហរដ្ឋអាមេរិក។ រីឯចក្រភពអង់គ្លេស ត្រូវគេរំពឹង ថា បញ្ចេញនាវាមុជទឹកដើរ ដោយថាមពលនុយក្លេអ៊ែរ សាងសង់ក្នុងប្រទេស ជាលើកដំបូង នៅចុងទសវត្សរ៍ ២០៣០ ខណៈអូស្ដ្រាលី នឹងបញ្ចេញនាវាមុជទឹកថ្មី ទៅឲ្យកងទ័ពជើងទឹករបស់ខ្លួន នៅដើមទសវត្សរ៍ ២០៤០។

សហរដ្ឋអាមេរិក ក៏បានសន្យា ចំណាយថវិកា សរុបរហូតដល់៤,៦ពាន់លានដុល្លារ នៅក្នុងរយៈពេលប៉ុន្មានឆ្នាំខាងមុខនេះ ដើម្បីសាងសង់នាវាមុជទឹក ដើរដោយថាមពលនុយក្លេអ៊ែរ ឲ្យកាន់តែទំនើប ប្រភេទ Virginia class SSN (វីជិននៀ ក្លាស អេសអេសអិន) ៕