ប្រទេសវៀតណាម ៖ សារព័ត៌មានរ៉យទ័ររាយការណ៍ថា មន្ត្រីវៀតណាមបានរឹបអូសយកភ្លុកដំរីចំនួន៧តោន ដែលពួកឈ្មួញបានលួចនាំចូលខុសច្បាប់មកប្រទេសវៀតណាមពីប្រទេសអង់ហ្គោឡា (ជាប្រទេសស្ថិតនៅតំបន់អាហ្វ្រិកកណ្តាល) ។ រដ្ឋាភិបាលវៀតណាមចាត់ទុកថា វាជាការចាប់យកផលិតផលធ្វើពីសត្វព្រៃដ៏ធំបំផុតក្នុងរយៈពេលជាច្រើនឆ្នាំមកនេះ ។

ការទិញ-លក់ភ្លុកដំរី គឺជាអំពើខុសច្បាប់នៅប្រទេសវៀតណាម ប៉ុន្តែការជួញដូរសត្វព្រៃខុសច្បាប់នៅតែបន្តកើតមានក្នុងប្រទេសនេះ ។ ក្រៅពីការជួញដូរភ្លុកដំរីហើយ គឺនៅមានផលិតផលធ្វើពីសត្វព្រៃផ្សេងទៀត ក៏ត្រូវបានគេលួចនាំចូលមកកាន់ប្រទេសវៀតណាមផងដែរ ។

កាលពីថ្ងៃទី២០ ខែមីនា កន្លងមក មន្ត្រីគយវៀតណាមនៅខេត្តហៃផុង បានពិនិត្យឃើញភ្លុកដំរីលាក់នៅក្នុងទូរកុងតឺន័រដឹកទំនិញ ហើយឈ្មួញនាំចូលទាំងនេះប្រាប់មន្ត្រីគយវៀតណាមថា គឺជាសណ្តែកដី ។ រដ្ឋាភិបាលវៀតណាមបានបញ្ជាក់ក្នុងសេចក្តីថ្លែងការណ៍ថា ទូរកុងតឺន័រដឹកទំនិញនេះមកពីប្រទេសសិង្ហបុរី ។

ហេតុការណ៍នេះកើតឡើងក្រោយពីវៀតណាមបានប្រទះឃើញភ្លុកដំរី ដែលលួចនាំចូលពីតំបន់អាហ្វ្រិកជាង៦០០គីឡូក្រាមនៅកំពង់ផែ Lach Huyen កាលពីខែកុម្ភៈ ឆ្នាំ២០២៣ ហើយនៅខែកុម្ភៈ នេះដែរ តុលាការវៀតណាមបានកាត់ទោសបុរសម្នាក់ឱ្យជាប់ពន្ធនាគាររយៈពេល១៣ឆ្នាំ ពីបទលួចលក់ដូរផ្នែកផ្សេងៗនៃសត្វជិតផុតពូជពីអាហ្វ្រិក ចំនួនប្រមាណ១០តោន ក្នុងនោះមានភ្លុកដំរី និងស្នែងរមាសផងដែរ ៕ ប្រភព ៖ mgronline

នៅបណ្តាប្រទេសនៃពិភពលោកយើងមានប្រទេសជាច្រើនដែលប្រទេសខ្លះជាប្រទេសអភិវឌ្ឍនិងខ្លះទៀតជាប្រទេសកំពុងអភិវឌ្ឍ។ ចំពោះប្រទេសអភិវឌ្ឍឬប្រទេសអ្នកមានប្រហែលជាប្រិយមិត្តបានដឹងនឹងស្គាល់ស្ទើតែទាំងអស់ទៅហើយ ប៉ុន្តែដោយឡែកថ្ងៃនេះយើងខ្ញុំសូមលើកយកប្រទេសដែលក្រីក្រជាងគេទាំង១០លើពិភពលោកដើម្បីអោយប្រិយមិត្តបានយល់ដឹងបន្ត ដែលប្រទេសទាំង១០នោះមានដូចជា៖

១.ប្រទេសប៊ូរុនឌី(Burundi)៖ មានទីតាំងស្ថិតនៅតំបន់អាហ្រិ្វកខាងកើត ដែលមានប្រជាជនជាង១២លាននាក់ នាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ២៧០ដុល្លារ ដែលគិតក្នុងឆ្នាំ២០២២។
២.ប្រទេសសូម៉ាលី(Somali)៖ ប្រទេសនេះបច្ចុប្បន្នមានប្រជាជនប្រហែល១៦លាននាក់ ដែលមានប្រាក់ចំណូលក្នុងប្រទេសត្រឹមតែ៣១០ដុល្លារ គិតក្នុងឆ្នាំ២០២២។
៣.ប្រទេសម៉ូសំប៊ិក(Mozambique)៖ គឺជាប្រទេសដែលស្ថិតនៅតំបន់អាហ្រ្វិកខាងកើត ដែលមានប្រជាជនសរុប៣២លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៤៦០ដុល្លារ គិតក្នុងឆ្នាំ២០២២។
៤.ប្រទេសម៉ាដាហ្កាស្កា(Madagascar)៖ មានទីតាំងស្ថិតនៅតំបន់អាហ្រិ្វកខាងកើត ដែលមានប្រជាជន២៨លាននាក់ នាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៤៨០ដុល្លារ គិតក្នុងឆ្នាំ២០២២។៥.ប្រទេសស៊ីរ៉ាលេអុង(Sierra Leone)៖ ជាប្រទេសស្ថិតនៅតំបន់អាហ្រិ្វកខាងលិច ដែលមានប្រជាជនជាង៨លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៤៩០ដុល្លារ គិតក្នុងឆ្នាំ២០២២។
៦.ប្រទេសអាហ្កានីស្ថាន(Afghanistan)៖ ប្រទេសនេះមានប្រជាជនជាង៤០លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៥០០ដុល្លារ គិតក្នុងឆ្នាំ២០២២។
៧.ប្រទេសអាព្រិកកណ្តាល(Central Africa)៖ សាធារណរដ្ឋអាព្រិកកណ្តាល មានប្រជាជនសរុបជាង៥លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៥១០ដុល្លារ គិតក្នុងឆ្នាំ២០២២។
៨.ប្រទេសលីប៊ែរីយ៉ា(Beria)៖ មានទីតាំងស្ថិតនៅតំបន់អាហ្រិ្វកខាងលិច ដែលមានប្រជាជនសរុបជាង៥លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៥៣០ដុល្លារ គិតក្នុងឆ្នាំ២០២២។
៩.ប្រទេសនីហ្គ័រ(Niger)៖ ប្រទេសនេះស្ថិតនៅតំបន់អាហ្រិ្វកខាងលិច ដែលមានប្រជាជនជាង២៥លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៥៤០ដុល្លារ គិតក្នុងឆ្នាំ២០២២។
១០.ប្រទេសកុងហ្គោ(Congo)៖ សាធារណរដ្ឋប្រជាធិបតេយ្យកុងហ្គោជាប្រទេសមួយស្ថិតនៅអាមេរិកកណ្តាល ដែលមានផ្ទៃដីសរុប២,៣៤០០គីឡូម៉ែត្រក្រឡា មានប្រជាជនសរុបទាំងអស់ជាង៩២លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៥៥០ដុល្លារ គិតក្នុងឆ្នាំ២០២២៕

ប្រទេសរុស្ស៊ី ៖ សារព័ត៌មានរបស់រុស្ស៊ីរាយការណ៍ថា កាលពីថ្ងៃទី២០ ខែមីនា ប្រធានាធិបតីចិន លោក ស៊ី ជិនពីង បានពិភាក្សាមិនផ្លូវការជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន នៅវិមានក្រឹមឡាំងក្នុងទីក្រុងមូស្គូ ប្រទេសរុស្ស៊ី ក្នុងរយៈពេលប្រមាណ៤ម៉ោងនិង៣០នាទី ហើយមេដឹកនាំប្រទេសទាំងពីរបានចរចាគ្នាជាផ្លូវការនៅថ្ងៃទី២១ ខែមីនា ។

តាមសេចក្តីរាយការណ៍ថា លោក ស៊ី ជិនពីង បានធ្វើដំណើរមកកាន់រុស្ស៊ីចំនួន៣ថ្ងៃ ហើយគេចាត់ទុកថា មេដឹកនាំប្រទេសទាំងពីរនេះបានជួបគ្នាជាលើកដំបូង ចាប់តាំងពីពេលរុស្ស៊ីបើកការវាយប្រហារប្រទេសអ៊ុយក្រែន ។

សារព័ត៌មានស៊ីនហួររបស់ចិនបានរាយការណ៍ពីការជួបគ្នារបស់មេដឹកនាំពីររូបថា ចិនបានត្រៀមខ្លួនជានិច្ចដើម្បីដើរតួនាទីរកដំណោះស្រាយវិបត្តិនៅអ៊ុយក្រែន ។ លោក ជិនពីង សង្កត់ធ្ងន់ថា សម្រាប់សង្គ្រាមនៅអ៊ុយក្រែន បណ្តាប្រទេសនានាបានអំពាវនាវឱ្យមានការចរចារកសន្តិភាព ហើយប្រឆាំងនឹងការបង្កជម្លោះ ។

លោក ជិនពីង ថ្លែងថា ប្រទេសចិនបានប្រកាសអំពីគោលជំហររបស់ខ្លួនក្នុងសង្គ្រាមនៅអ៊ុយក្រែន និងអំពាវនាវឱ្យមានការដោះស្រាយវិបត្តិនេះ ។ លើសពីនេះ ចិនក៏បានប្រឆាំងនឹងសង្គ្រាមត្រជាក់ និងការដាក់ទណ្ឌកម្មផងដែរ ។ ចិនជឿជាក់ថា ការប្រឈមនឹងឧបសគ្គខ្លាំងប៉ុនណា គឺនឹងមានការស្វែងរកសន្តិភាពខ្លាំងដូចគ្នាដែរ ហើយចិននៅតែគាំទ្រការដោះស្រាយបញ្ហានយោបាយនៅអ៊ុយក្រែនបន្តទៀត ។

រីឯលោក ពូទីន បានទទួលស្វាគមន៍ការមកដល់របស់មេដឹកនាំចិនសម្រាប់រយៈពេល៣ថ្ងៃ ដោយលោក ពូទីន បាននិយាយផ្តោតទៅលើការគាំទ្ររបស់ចិនចំពោះប្រទេសរុស្ស៊ី ក្នុងនោះលោកនឹងពិភាក្សាគ្នាជាមួយមេដឹកនាំចិន អំពីការបញ្ចប់ជម្លោះនៅអ៊ុយក្រែនផងដែរ ។

លោក ពូទីន បានថ្លែងទៅកាន់លោក ជិនពីង ថា លោកចាត់ទុកសំណើរបស់ចិនក្នុងការដោះស្រាយជម្លោះនៅអ៊ុយក្រែនដោយការគោរព ហើយលោកមានអារម្មណ៍ច្រណែនបន្តិចដែរ ដែលចិនមានប្រព័ន្ធអភិវឌ្ឍន៍សេដ្ឋកិច្ចប្រកបដោយប្រសិទ្ធភាពខ្ពស់ និងរឹងមាំ ។

ចំណែករដ្ឋាភិបាលអាមេរិកបានថ្កោលទោសការធ្វើដំណើរទស្សនកិច្ចទៅកាន់រុស្ស៊ីរបស់លោក ជិនពីង ដោយនិយាយថា វាជាដំណើរទស្សនកិច្ចរយៈពេលខ្លីប៉ុណ្ណោះ ក្រោយពីតុលាការឧក្រិដ្ឋកម្មអន្តរជាតិបានចេញដីកាចាប់ខ្លួនលោក ពូទីន ក្នុងបទប្រព្រឹត្តឧក្រិដ្ឋកម្មសង្គ្រាម ។ លើសពីនេះ ចិនមិនអើពើនឹងដីកាចាប់ខ្លួនរបស់តុលាការ បង្ហាញថា ចិនចង់ការពាររុស្ស៊ីដើម្បីឱ្យប្រទេសនេះបង្កឧក្រិដ្ឋកម្មកាន់តែខ្លាំងឡើងនៅអ៊ុយក្រែន ៕ ប្រភព ៖ The better

ប្រទេសម៉ាឡេស៊ី ៖ សារព័ត៌មានស៊ីនហួរបានដកស្រង់របាយការណ៍ពីទីក្រុងគូឡាឡាំពួរ ប្រទេសម៉ាឡេស៊ី ដែលបញ្ជាក់អំពីសេចក្តីថ្លែងការណ៍របស់ក្រុមប្រឹក្សាទេសចរណ៍សុខភាពរបស់ប្រទេសម៉ាឡេស៊ី កាលពីថ្ងៃទី១៨ ខែមីនាថា ម៉ាឡេស៊ីបានបង្កើតគម្រោងទេសចរណ៍សុខភាពដើម្បីជំរុញវិស័យទេសចរណ៍ ហើយបណ្តាមន្ទីរពេទ្យធំៗក្នុងប្រទេសនេះកំពុងបង្កើនកិច្ចខិតខំប្រឹងប្រែងផ្តល់សេវាកម្មថ្មីដល់អ្នកជំងឺ ។

ការបង្កើតគម្រោងទេសចរណ៍សុខភាពនេះ គឺក្នុងគោលបំណងពង្រឹងឋានៈម៉ាឡេស៊ីឱ្យក្លាយជាប្រទេសគោលដៅមួយសម្រាប់ភ្ញៀវទេសចរនៅលើពិភពលោក ខណៈពួកគេមកកម្សាន្តនៅម៉ាឡេស៊ីមានសុវត្ថិភាព និងទំនុកចិត្តផ្នែកសេវាកម្មសុខភាព ក៏ដូចជាជួយជំរុញឱ្យមន្ទីរពេទ្យនានារបស់ម៉ាឡេស៊ីមានការទទួលស្គាល់នៅទូទាំងពិភពលោកផងដែរ ។

គម្រោងទេសចរណ៍សុខភាពមានការចូលរួមពីមន្ទីរពេទ្យធំៗចំនួន៤ រួមមាន ៖ វិទ្យាស្ថានជាតិបេះដូង, មន្ទីរពេទ្យ island, មជ្ឈមណ្ឌលវេជ្ជសាស្ត្រ Mahkota និងមជ្ឈមណ្ឌលវេជ្ជសាស្ត្រ Subang Jaya ។ គម្រោងថ្មីនេះ នឹងឆ្លុះបញ្ចាំងអំពីការឈានឡើងសំខាន់មួយសម្រាប់ផ្នែកការថែទាំសុខភាពនៅម៉ាឡេស៊ី ដើម្បីសម្រេចបានគោលដៅក្លាយជាប្រទេសទេសចរណ៍ផង និងផ្តល់សេវាកម្មថែទាំសុខភាពផងនៅត្រឹមឆ្នាំ២០២៥ ។

លើសពីនេះ គម្រោងនេះនឹងជួយជំរុញការងើបឡើងវិញ និងការលូតលាស់របស់ឧស្សាហកម្មទេសចរណ៍សុខភាព ក៏ដូចជាបង្កើនចំនួនភ្ញៀវទេសចរបរទេសឱ្យលើសឆ្នាំ២០២២ ។ ដូច្នេះ គម្រោងនេះអាចបង្កើតប្រាក់ចំណូលផ្នែកទេសចរណ៍ជាង១.៣០០លានរីងហ្គីត ស្មើនឹង៧៦% ខណៈនៅឆ្នាំ២០១៩ ជាអំឡុងពេលមុនមានការឆ្លងរាលដាលនៃជំងឺកូវីដ-១៩ ម៉ាឡេស៊ីបានប្រាក់ចំណូលពីទេសចរណ៍ស្មើ១.៧០០លានរីងហ្គីតឯណោះ ៕

ប្រភព ៖ beartaiBRIEF

តារាសម្តែងស្រី ជនជាតិសិង្ហបុរី ម៉ី ស៊ីន (Meixin) ត្រូវបានវិញ្ញាខ្មោចនៅកម្ពុជា តាមសុំនាងរៀបការ នេះបើតាមសម្តីរបស់មិត្តភ័ក្ររបស់នាង។

បទពិសោធន៍ដ៏ចម្លែកនេះបានកើតឡើងនៅពេលដែលតារាសម្តែងវ័យ ៣៦ ឆ្នាំរូបនេះកំពុងថតភាពយន្តឯកសារអំពីភូមិបណ្តែតទឹកលើបឹងទន្លេសាបក្នុងប្រទេសកម្ពុជា ដែលរាបរៀបពីជនភៀសខ្លួនពីប្រទេសវៀតណាមមករស់នៅដោយគ្មានការអនុញ្ញាតឱ្យឡើងលើគោករហូតដល់ស្លាប់ និងកប់។

ម៉ី ស៊ីន (Meixin) បានប្រាប់សារព័ត៌មានក្នុងស្រុក 8days ថា “បន្ទាប់ពីខ្ញុំជិះយន្តហោះត្រឡប់ទៅផ្ទះវិញ មិត្តរបស់ខ្ញុំដែលមានភ្នែកទីបី និងជាអ្នកជឿលើវិញ្ញាណខ្មោចផងនោះ បានមកផ្ទះរបស់ខ្ញុំ។ គាត់បានសួរថា “តើឯងមានដើរជាន់លើអ្វីមួយអត់?”

នាង​ក៏បាននិយាយ​ថា “អត់​ទេ យើង​ថត​នៅ​បឹង​មួយ​តែប៉ុណ្ណោះ។”

តាមការប្រើញ្ញាណពិសេស មិត្តរបស់នាងបាននិយាយថា៖” ម៉ី ស៊ីន (Meixin) បានជាន់លើភ្នែកសត្វមួយ ដែលជាសំណែននៅតាមបណ្តាលមាត់បឹងនោះ វិញ្ញាណខ្មោចទីនោះខឹងនឹងនាងជាខ្លាំង តែដោយសារតែរូបសម្រស់នាងស្អាត វិញ្ញាណនោះក៏បានតាមនាង និងចង់សុំនាងរៀបការថែមទៀតផង”។

នាងបានបន្តថា៖ “មិត្តរបស់នាងបានធ្វើពិធីបួងសួង សុំកុំឱ្យវិញ្ញាណនោះតាមមិត្តរបស់នាងទៀត អស់រយៈពេលប្រមាណជាង២សប្តាហ៍​ នាងក៏លែងជួបហេតុការណ៍ចម្លែក ឬឃើញវិញ្ញាណនៅពេលយប់ទៀត”៕

ប្រភព៖ 8days