រដ្ឋធានីវ៉ាសាវី៖ ក្រុងវ៉ាសាវី ជាសម្ពន្ធមិត្តដ៏ជិតស្និទ្ធបំផុតមួយរបស់ក្រុងកៀវ ហើយឥឡូវនេះ សមត្ថកិច្ចរបស់ប៉ូឡូញ បានចាប់ឃាត់ខ្លួនជនស៊ីវិលមួយក្រុម មានការជាប់សង័្សយ អំពីការធ្វើចារកម្ម ជួយដល់ប្រទេសរុស្ស៊ី។

បណ្ដាញទូរទស្សន៍របស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃព្រហស្បតិ៍ ទី១៦ ខែមីនា ឆ្នាំ២០២៣ ថា មន្រ្ដីរដ្ឋាភិបាលប៉ូឡូញ បានប្រាប់ដល់ BBC ថា ជនស៊ីវិលបរទេសមួយក្រុម ត្រូវបានចាប់ខ្លួន ដោយសារសង័្សយ ពីការលួចការណ៍ ទៅឲ្យប្រទេសរុស្ស៊ី។

ស្របគ្នានេះ ស្ថានីយវិទ្យុ RMF FM បានរាយការណ៍ ថា ទីភ្នាក់ងារសន្ដិសុខប៉ូឡូញ បានកាត់ផ្ដាច់បណ្ដាញចារកម្ម ធ្វើការបម្រើឲ្យរុស្ស៊ី។ មនុស្សចំនួន៦នាក់ ត្រូវបានចាប់ឃាត់ខ្លួន នាំទៅសាកសួរ ដោយមានការសង្ស័យ អំពីការដំឡើងកាមេរ៉ាសម្ងាត់ សម្រាប់ថតរូបភាព អំពីហេដ្ឋារចនាសម្ព័ន្ធដឹកជញ្ជូនសំខាន់ៗ ប្រើប្រាស់ ដើម្បីផ្តល់ជំនួយជួយដល់ប្រទេសអ៊ុយក្រែន។

ស្ថានីយវិទ្យុ RMF FM បានរាយការណ៍ទៀត ថា ការរៀបចំផែនការរបស់រុស្ស៊ី ត្រូវបានបំផ្លាញ។ បើទោះជាយ៉ាងណាក៏ដោយ រហូតមកដល់ពេលនេះ ជម្លោះអំពីរឿងចារកម្ម អស់រយៈពេលជាច្រើនទសវត្សរ៍ កន្លងមកនេះ កាន់តែមានភាពតានតឹងខ្លាំងឡើង ចាប់តាំងពីសង្គ្រាមរបស់ក្រុងមូស្គូ បានផ្ទុះឡើង នៅលើទឹកដីអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២។

ប៉ូឡូញ ជាសម្ពន្ធមិត្ត និង កម្លាំងសន្ដិសុខដ៏រឹងមាំមួយរបស់អ៊ុយក្រែន បានចាប់ខ្លួនមនុស្សជាច្រើននាក់ ដោយមានការសង័្សយ អំពីការធ្វើចារកម្ម ទៅឲ្យរុស្ស៊ី ចាប់តាំងពីការផ្ទុះសង្គ្រាម រហូតមក។ ក្រុមជនស៊ីវិលបរទេសទាំងនោះ បានលួចបំពាក់កាមេរ៉ាសុវត្ថិភាព រាប់សិបគ្រឿង នៅក្បែរផ្លូវរថភ្លើង និង ផ្លូវដឹកជញ្ជូនសំខាន់ៗ នៅក្នុងខេត្តប៉ូដកាប៉ាកគី (Podkarpackie) ប្រទេសប៉ូឡូញ ដែលនៅជិតព្រំដែនរបស់អ៊ុយក្រែន។ ចំណែកកាមេរ៉ាខ្លះទៀត ត្រូវបានប្រទះឃើញ នៅជិតអាកាសយានដ្ឋានតូចមួយ ប្រចាំតំបន់ ដែលប្រែក្លាយទៅជាមជ្ឈមណ្ឌលដឹកជញ្ជូនអន្តរជាតិ ផ្តល់ជំនួយផ្នែកយោធា និង មនុស្សធម៌ ជួយដល់អ៊ុយក្រែន។

យន្តហោះយោធា និង ការដឹកជញ្ជូនទំនិញ មកពីសហរដ្ឋអាមេរិក ហើយទូទាំងទ្វីបអឺរ៉ុប តែងតែហោះហើរចេញ-ចូល មកកាន់អាកាសយានដ្ឋាន Rzeszow-Jasionka (រ៉េសហ្សូវ-ចាសិនកា) ដែលជាកន្លែងទាហានអាមេរិក អាចចែកចាយនូវការផ្គត់ផ្គង់ ដល់រថយន្តធំៗ កំពុងរង់ចាំធ្វើដំណើរចម្ងាយ១០០គីឡូម៉ែត្រ ទៅកាន់ព្រំដែនរបស់អ៊ុយក្រែន។ នៅតំបន់នោះ ត្រូវបានគេចាត់ទុកជាចំណុចរសើប ហើយក្រុងវ៉ាស៊ីនតោន ក៏បានដាក់ពង្រាយប្រព័ន្ធការពារដែនអាកាស Patriot របស់សហរដ្ឋអាមេរិក ដើម្បីការពារដែនអាកាស។

លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានដំណើរតាមយន្ដហោះ Air Force One (អ៊ែរ ហ្វស វ៉ាន់) ទៅចុះចត នៅក្នុងអាកាសយានដ្ឋាននោះ នៅក្នុងដំណើររបស់គាត់ ទៅកាន់រដ្ឋធានីកៀវ ដើម្បីជួបជាមួយនឹងសមភាគីអ៊ុយក្រែន លោក វ៉ូឡូឌីមៀរ ហ្សេឡែនស្គី កាលពីពេលថ្មីៗនេះ។ ចំណែកសន្ដិសុខ នៅក្នុងកន្លែងហេដ្ឋារចនាសម្ព័ន្ធសំខាន់ៗទាំងនោះ ត្រូវបានរឹតបន្ដឹងយ៉ាងខ្លាំង៕

ប្រទេសជប៉ុន ៖ ក្រុមហ៊ុនធំៗរបស់ជប៉ុនបានប្រកាសដំឡើងប្រាក់ខែបុគ្គលិករបស់ខ្លួនក្នុងរយៈពេលជាច្រើនឆ្នាំមកនេះ ដែលកំពុងស្ថិតក្នុងដំណាក់កាលចរចាជាមួយសហជីពការងារនៅថ្ងៃទី១៥ ខែមីនា ក្រោយពីនាយករដ្ឋមន្ត្រីជប៉ុន លោក Fumio Kishida បានអំពាវនាវឱ្យក្រុមហ៊ុននានាដំឡើងប្រាក់ខែបុគ្គលិក ដើម្បីជួយពួកគេអាចទប់ទល់នឹងអត្រាអតិផរណាកើនឡើងខ្ពស់ ។

ចាប់តាំងពីឆ្នាំ១៩៩០ មក ប្រាក់ខែរបស់បុគ្គលិកជប៉ុនស្ទើរតែមិនកើនឡើងឡើយ ហើយបើតាមអង្គការកិច្ចសហប្រតិបត្តិការសេដ្ឋកិច្ច និងការអភិវឌ្ឍបង្ហាញថា ប្រាក់ខែជាមធ្យមរបស់បុគ្គលិកនៅតាមក្រុមហ៊ុននានាបានកើនឡើងត្រឹម៦,៣% ប៉ុណ្ណោះ គិតចាប់តាំងពីឆ្នាំ១៩៩០ ដល់ឆ្នាំ២០២១ ខណៈក្រុមប្រទេស G7 ដូចជា អាមេរិក និងអង់គ្លេស ប្រាក់ខែបុគ្គលិករបស់ពួកគេបានកើនឡើងរហូតដល់៥០% ក្នុងរយៈពេលដូចគ្នា ។

ទោះយ៉ាងណា បច្ចុប្បន្ន អត្រាអតិផរណានៅប្រទេសជប៉ុនបានកើនឡើងខ្ពស់ក្នុងរយៈពេល៤០ឆ្នាំ រីឯតម្លៃទំនិញប្រើប្រាស់ជាមូលដ្ឋានរបស់ជប៉ុនបានកើនឡើង៤,២% នៅខែមករា ឆ្នាំ២០២៣ បើធៀបពីមួយឆ្នាំទៅមួយឆ្នាំ ហើយជាការកើនឡើងឆាប់រហ័សបំផុត គិតចាប់ពីខែកញ្ញា ឆ្នាំ១៩៨១ មក ។ ការធ្លាក់ថ្លៃប្រាក់យេនរបស់ជប៉ុន រួមផ្សំនឹងការកើនឡើងថ្លៃដើមទំនិញបានធ្វើឱ្យរយៈពេលកន្លងមក រដ្ឋាភិបាលរបស់លោក Fumio Kishida ព្យាយាមជំរុញឱ្យបណ្តាក្រុមហ៊ុនផ្សេងៗដំឡើងប្រាក់ខែបុគ្គលិករបស់ខ្លួន ។

ក្រុមហ៊ុន Nissan ប្រកាសថា នឹងដំឡើងប្រាក់ខែបុគ្គលិកជាមធ្យមប្រមាណ១២.០០០យេន ដែលគេចាត់ទុកថា ជាការដំឡើងប្រាក់ខែដល់បុគ្គលិកខ្ពស់បំផុតគិតចាប់តាំងពីឆ្នាំ២០០៤មក ហើយក្រុមហ៊ុននឹងត្រៀមដំឡើងប្រាក់បំណាច់ឆ្នាំដល់បុគ្គលិកផងដែរតាមការអំពាវនាវរបស់សហជីពការងារ ។ ចំណែកក្រុមហ៊ុន Toyota Motor ក៏បានត្រៀមដំឡើងប្រាក់ខែបុគ្គលិកដែរក្នុងរយៈពេល២០ឆ្នាំ ខណៈក្រុមហ៊ុន Honda Motor ក៏បានយល់ព្រមដំឡើងប្រាក់ខែបុគ្គលិករបស់ខ្លួនដូចគ្នាដែរក្នុងរយៈពេល៣០ឆ្នាំ ។

ក្រៅពីវិស័យឧស្សាហកម្មរថយន្តប្រកាសដំឡើងប្រាក់ខែបុគ្គលិកហើយ ក៏មាន Hitachi ជាក្រុមហ៊ុនលក់សម្ភារអគ្គិសនីល្បីឈ្មោះបានសម្រេចចិត្តដំឡើងប្រាក់បុគ្គលិកចំនួន៧.០០០យេនផងដែរ ដែលជាការឡើងខ្ពស់បំផុតគិតចាប់ពីឆ្នាំ១៩៩៨ មក ។ ចំណែកក្រុមហ៊ុនភេសជ្ជៈឈ្មោះ Sapporo ក៏ត្រៀមដំឡើងប្រាក់ខែបុគ្គលិកដែរចំនួន៩.០០០យេន គឺខ្ពស់បំផុតក្នុងរយៈពេល៤០ឆ្នាំ ។

ទោះយ៉ាងណា នៅមិនទាន់ច្បាស់លាស់ទេថា តើក្រុមហ៊ុនតូចៗនៅជប៉ុននឹងមានគោលការណ៍ដំឡើងប្រាក់ខែបុគ្គលិកដូចក្រុមហ៊ុនធំៗដែរឬអត់ ដោយសារក្រុមហ៊ុនទាំងនេះទទួលស្គាល់ថា ពួកគេមានការបារម្ភ បើបណ្តោយឱ្យអតិថិជនទទួលបន្ទុកចំណាយខ្ពស់ជាងនេះ ៕ ប្រភព ៖ The standard

ក្រុមហ៊ុនបច្ចេកវិទ្យាជាច្រើនបានកាត់បន្ថយបុគ្គលិករបស់ខ្លួនជាបន្តបន្ទាប់ ដូចជា Google, Amazon, Microsoft និង Meta ដោយសារអត្រាអតិផរណាបានជំរុញឱ្យដើមទុនសម្រាប់ប្រតិបត្តិការរបស់ក្រុមហ៊ុនបច្ចេកវិទ្យាទាំងនេះកាន់តែខ្ពស់ ជាពិសេស ក្រុមហ៊ុន hardware ដែលផលិតឧបករណ៍អេឡិចត្រូនិក ដូចជា Notebook, កុំព្យូទ័រ និងស្មាតហ្វូន ។ ក្នុងចំណោមក្រុមហ៊ុនទាំងនេះ មានក្រុមហ៊ុនមួយដែលមិនធ្លាប់មានព័ត៌មានថា កាត់បន្ថយបុគ្គលិក គឺ Apple តើមកពីមូលហេតុអ្វី ?

ក្នុងអំឡុងពេលមានជំងឺកូវីដរាតត្បាត ក្រុមហ៊ុនបច្ចេកវិទ្យានានាបានជួលបុគ្គលិកបន្ថែមជាច្រើននាក់ដើម្បីធ្វើការងារ ខណៈមានតម្រូវការផលិតផល និងដំណោះស្រាយបច្ចេកវិទ្យាកើនឡើង ស្របពេលប្រទេសភាគច្រើនបានបិទព្រំដែន ដូច្នេះ ក្រុមហ៊ុនទាំងនេះត្រូវការជួលបុគ្គលិកមកធ្វើការងារបន្ថែមទៀត ។ បន្ទាប់មក នៅពេលជំងឺកូវីដបានធូរស្រាលឡើងវិញ ប្រទេសនានាបានបើកព្រំដែន តម្រូវការប្រើប្រាស់បច្ចេកវិទ្យាថយចុះ ស្របពេលមានអត្រាអតិផរណាកើនឡើងនៅតាមប្រទេសនានាផងនោះ ក្រុមហ៊ុនបច្ចេកវិទ្យាទាំងនេះគ្មានជម្រើសអ្វីផ្សេងទេ ក្រៅពីការកាត់បន្ថយបុគ្គលិករបស់ខ្លួន ។

Bloomberg បានបង្ហាញពីការជួលបុគ្គលិករបស់ក្រុមហ៊ុនបច្ចេកវិទ្យាធំៗ ចាប់ពីឆ្នាំ២០២០-២០២២ រួមមាន ៖
-Microsoft បានបន្ថែមបុគ្គលិក៥៣,៥%
-Alphabet ជាក្រុមហ៊ុនមេរបស់ Google បានបន្ថែមបុគ្គលិក៦០%
-Meta បានបន្ថែមបុគ្គលិក៩២,៤%
-Amazon បានបន្ថែមបុគ្គលិក៩៣,១%
-Salesforce បានបន្ថែមបុគ្គលិក១០៤,៣%

ចំណែកក្រុមហ៊ុន Apple បានបន្ថែមបុគ្គលិកត្រឹមតែ១៩,៧% ប៉ុណ្ណោះ ហើយមិនត្រឹមតែជួលបុគ្គលិកបន្ថែមតិចប៉ុណ្ណោះទេ ប៉ុន្តែក្រុមហ៊ុនបានបង្កើតប្រាក់ចំណូលសម្រាប់ការជួលបុគ្គលិកថ្មី បានច្រើនជាងក្រុមហ៊ុនផ្សេងៗទៀតផងដែរ ។ នេះបើតាមទិន្នន័យពី Bloomberg ។

Apple គឺជាក្រុមហ៊ុនមួយដែលអាចរកប្រាក់ចំណូល និងប្រាក់ចំណេញបានច្រើនក្នុងពេលក្រុមហ៊ុនផ្សេងៗជួបវិបត្តិ ។ ជាក់ស្តែង តាមរបាយការណ៍ហិរញ្ញវត្ថុប្រចាំត្រីមាសដំបូងក្នុងឆ្នាំ២០២៣ នេះ ក្រុមហ៊ុនទទួលបានប្រាក់ចំណូលចំនួន១១៧,២ពាន់លានដុល្លារអាមេរិក ដែលបានបង្កើតកំណត់ត្រាថ្មីមួយសម្រាប់ប្រាក់ចំណូលពីអាជីវកម្មសេវាកម្មស្មើ២០,៨ពាន់លានដុល្លារអាមេរិក បើទោះជាក្រុមហ៊ុន Apple ប្រឈមមុខនឹងបញ្ហាសេដ្ឋកិច្ច និងចំនួនការលក់ hardware ធ្លាក់ចុះក្តី ។

អ្នកវិភាគមកពី Saxo Bank A/S លើកឡើងថា ៖ «វាបង្ហាញពីគុណភាពនៃការគ្រប់គ្រងកាន់តែប្រសើរឡើងរបស់ក្រុមហ៊ុន Apple បើធៀបជាមួយក្រុមហ៊ុនបច្ចេកវិទ្យាផ្សេងទៀត ដែលពួកគេបានប៉ាន់ស្មានខុសទៅលើស្ថានការណ៍ជំងឺកូវីដ» ។

ចំណែកអ្នកវិភាគមកពី Credit Suisse Group AG លើកឡើងដែរថា ៖ «Apple ជាក្រុមហ៊ុនចេះសន្សំសំចៃ ដែលគ្រប់យ៉ាងវាអាស្រ័យលើការថែទាំផលប្រយោជន៍របស់វិនិយោគិន និងការសម្លឹងមើលថា គួរតែវិនិយោគទៅលើផ្នែកណា ដែលអាចធ្វើឱ្យក្រុមហ៊ុនរីកចម្រើននាថ្ងៃអនាគត» ៕ ប្រភព ៖ todaybizview

រឿងរាវខ្មោចលងមានអ្នកខ្លះជឿនិងអ្នកខ្លះទៀតមិនជឿ រីឯមនុស្សមួយចំនួនទៀតក៏លើកឡើងថាមិនមែនភ្នែកមនុស្សទាំងអស់សុទ្ធតែអាចមើលឃើញគ្រប់សភាវះនោះទេ។ ដូច្នេះហើយថ្ងៃនេះយើងខ្ញុំសូមលើកយក កន្លែងទាំង៨ ដែលល្បីថាមានខ្មោចលងសាហាវជាងគេលើពិភពលោក តើកន្លែងនោះមាននៅប្រទេសណាខ្លះ? តោះចូលរួមតាមដានទាំងអស់គ្នា៖

១.ឆ្នេរខ្សាច់Changi៖ ឆ្នេរនេះគឺមាននៅក្នុងប្រទេសចិនដែលនៅពេលយប់គេតែងតែលឺសំឡេងមនុស្សស្រែកយំខ្លាំងៗ នឹងមានអ្នកខ្លះទៀតបានឃើញ ខ្មោចអត់ក្បាល ឬ ខ្មោចហោះពេញលើមេឃជាដើម។២.សកលវិទ្យាល័យOhio៖ សកលវិទ្យាល័យនេះគឺមាននៅក្នុងប្រទេសសហរដ្ឋអាមេរិក ដែលមានគេនិយាយថាសកលវិទ្យាល័យនោះត្រូវបណ្តាសា ហើយសិស្សដែលរៀននៅសាលានោះតែងតែមានអ្នកស្លាប់ជារៀងរាល់ឆ្នាំ។៣.ផ្លូវរូង Niagara Falls៖ ផ្លូវរូងនេះគឺមាននៅក្នុងប្រទេសសហរដ្ឋអាមេរិក ដែលនៅទីនេះមានការលងបន្លាចយ៉ាងសាហាវ ដែលគេជឿថាមានខ្មោចក្មេងស្រីម្នាក់ ដែលនៅពេលយប់នាងតែងតែអង្គុយយំម្នាក់ឯង ហើយបើអ្នកណាទៅជិតខ្មោចក្មេងស្រីនោះ នាងនឹងកាច់កនាក់នោះចោលយ៉ាងព្រៃផ្សៃទៀតផង។៤.វិមាន Bhangarh Fort៖ វិមាននេះគឺមាននៅក្នុងប្រទេសឥណ្ឌា ដែលមានគេនិយាយតៗគ្នាថាវិមាននេះមានជាប់បណ្តាសា បើអ្នកណាចូលក្នុងវិមាននេះនឹងត្រូវបាត់បង់ជីវិតជាក់ជាមិនខាន។៥.ផ្ទះសំណាក់Ancient Ram៖ ផ្ទះនេះមាននៅក្នុងប្រទេសអង់គ្លេស ដែលមនុស្សគ្រប់គ្នាជឿថាផ្ទះនេះគឺមានខ្មោចលងយ៉ាងសាហាវផងដែរ ព្រោះដោយសារផ្ទះនេះបានសាងសង់នៅលើកន្លែងដែលគេកប់ខ្មោច។៦.វិមានMonte Cristo៖ វិមាននេះមាននៅក្នុងប្រទេសអូស្រ្តាលី ដែលវិមាននេះគេល្បីថាមានខ្មោចលងសាហាវ ខ្មោចនេះគឺជាម្ចាស់នៃវិមាននេះតែម្តង ខ្មោចនេះតែងតែលងបន្លាចដូចជាឈរលើដំបូលផ្ទះ ឈរសម្លក់នៅក្បែរបង្អួចជាដើម។៧.អាគារនៅលើកូនភ្នំDominican៖ អាគារនេះគឺមាននៅក្នុងប្រទេសភីលីពីនដែលគេជឿថាមានព្រលឹងខ្មោចដែលស្លាប់យ៉ាងសាហាវកាលពីសម័យសង្រាមលោកលើកទី២ រាល់យប់គេតែងតែលឺសំឡេងគោះទ្វារនិងបិទទ្វារ ហើយពេលខ្លះទៀតគេលឺសំឡេងមនុស្សនិយាយគ្នាសើចខ្លាំងៗជារៀងរាល់យប់តែម្តង។៨.ប្រាសាទBerry Pomeroy៖ ប្រាសាទនេះមាននៅក្នុងប្រទេសអង់គ្លេស ហើយប្រាសាទនេះមានរឿងជាច្រើនដែលទាក់ទងនឹងខ្មោចព្រាយ យោងតាមការនិយាយតៗគ្នាបានអោយដឹងថា ប្រាសាទនេះមានខ្មោចស្រីតៃហោង២នាក់ ម្នាក់ពាក់ឈុតសនិងម្នាក់ទៀតពាក់ឈុតខៀវ៕