រាជរដ្ឋាភិបាលកម្ពុជា បានចេញអនុក្រឹត្យលេខ៦៥ ស្តីពីការអនុវត្តកម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ និងត្រៀមថវិកាជាង ៤លាន ដុល្លារ សម្រាប់អនុវត្តនៅឆ្នាំ២០២៣។
កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ មានគោលបំណងលើកកម្ពស់អាហារូបត្ថម្ភ និងការសិក្សារបស់កុមារក្នុងតំបន់មានភាពក្រីក្រ និងភាពងាយរងគ្រោះខ្ពស់ ដោយចូលរួមចំណែកបង្កើនការចុះឈ្មោះចូលរៀន, និងកាត់បន្ថយអត្រាបោះបង់ការសិក្សានៅកម្រិតបឋមសិក្សា ព្រមទាំងចូលរួមលើកកម្ពស់សេដ្ឋកិច្ចសហគមន៍ផងដែរ។
នេះបើយោងតាមអនុក្រឹត្យស្តីពីការអនុវត្តកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ ដែលបានចុះហត្ថលេខាដោយលោកនាយករដ្ឋមន្ត្រី ហ៊ុន សែន, រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ននិងរដ្ឋមន្ត្រីក្រសួងអប់រំ យុវជន និងកីឡាលោក ហង់ជួន ណារ៉ុន កាលពីថ្ងៃទី ១៣ ខែមីនា ឆ្នាំ ២០២៣។
អនុក្រឹត្យដែលមាន ១០ ជំពូក និង ៣១ មាត្រា បានលើកឡើងថា អនុក្រឹត្យនេះមានវិសាលភាពអនុវត្តចំពោះសាលារៀនសាធារណៈដែលត្រូវបានជ្រើសរើសឱ្យអនុវត្តកម្មវិធីនេះដែលក្រសួងអប់រំ យុវជន និងកីឡា ជាស្ថាប័នគ្រប់គ្រងការអនុវត្តនេះ។
អនុក្រឹត្យនេះបានបញ្ជាក់ថា «ក្រសួងអប់រំ យុវជន និងកីឡា ត្រូវរៀបចំលិខិតបទដ្ឋានគតិយុត្ត ប្រព័ន្ធគ្រប់គ្រង ការបណ្តុះបណ្តាល និងការអភិវឌ្ឍសមត្ថភាពរាល់ឯកសារពាក់ព័ន្ធនឹងការអនុវត្តកម្មវិធីដើម្បីគ្រប់គ្រងនិងអនុវត្តកម្មវិធីប្រកបដោយប្រសិទ្ធភាព និងប្រសិទ្ធផល»។
មិនតែប៉ុណ្ណោះប្រមុខរាជរដ្ឋាភិបាលក៏បានកំណត់ក្នុងអនុក្រឹត្យនេះផងដែរទាក់ទងនឹងការកំណត់ពីហេដ្ឋារចនាសម្ព័ន្ធរូបវន្ត ស្តង់ដាសំណង់ផ្ទះបាយ និងកន្លែងសិស្សទទួលទានអាហារនៅតាមសាលារៀនគោលដៅ នៅក្នុងសៀវភៅណែនាំប្រតិបត្តិកម្មវិធី៕
