ប្រទេសចិន ៖ កាលពីថ្ងៃទី២៤ ខែមីនា កន្លងមក លោក Qin Kang រដ្ឋមន្ត្រីក្រសួងការបរទេសចិនបានជួបពិភាក្សាគ្នាជាមួយលោកស្រី Nanaia Mahuta រដ្ឋមន្ត្រីក្រសួងការបរទេសនូវែលសេឡង់ នៅទីក្រុងប៉េកាំង ប្រទេសចិន ។ គោលបំណងនៃការជួបពិភាក្សាគ្នានេះ គឺប្រទេសទាំងពីរបានផ្តោតទៅលើទំនាក់ទំនងការទូត និងការអភិវឌ្ឍផ្នែកផ្សេងៗ ។

លោក Qin Kang បានថ្លែងថា តាំងពីប្រទេសទាំងពីរបានភ្ជាប់ទំនាក់ទំនងការទូតជាមួយគ្នាមក ចិន និងនូវែលសេឡង់បានផ្តល់ការគោរពគ្នាទៅវិញទៅមក ហើយប្រទេសទាំងពីរបានប្រព្រឹត្តចំពោះគ្នាដោយសមភាព និងរួមសហការគ្នាសម្រាប់ផលប្រយោជន៍រួម ។ លើសពីនេះ ទំនាក់ទំនងទ្វេភាគីសម្រេចបាននូវការអភិវឌ្ឍប្រកបដោយស្ថិរភាពយូរអង្វែង រហូតដល់ក្លាយជាគំរូនៃទំនាក់ទំនងមិត្តភាពរវាងប្រទេសទាំងពីរជាមួយប្រព័ន្ធសង្គម ប្រវត្តិសាស្ត្រ វប្បធម៌ និងលក្ខខណ្ឌការអភិវឌ្ឍខុសៗគ្នា ។

កាលពីឆ្នាំ២០២២ កន្លងមក មេដឹកនាំរបស់ប្រទេសទាំងពីរទទួលបានជោគជ័យក្នុងកិច្ចប្រជុំ ហើយប្រទេសទាំងពីរក៏បានឈានដល់ការឯកភាពគ្នាលើផ្នែកសំខាន់ៗ ដែលគួរតែប្រតិបត្តិតាមយ៉ាងហ្មត់ចត់ ដើម្បីលើកកម្ពស់ទំនាក់ទំនងភាពជាដៃគូយុទ្ធសាស្ត្រដ៏ទូលំទូលាយរវាងប្រទេសចិន និងនូវែលសេឡង់ ឱ្យទទួលបានការអភិវឌ្ឍកាន់តែខ្លាំងឡើងនៅថ្ងៃអនាគត ។

ចំណែកលោកស្រី Nanaia Mahuta បានថ្លែងដែរថា ប្រទេសនូវែលសេឡង់គាំទ្រទៅលើគោលនយោបាយចិនតែមួយ ហើយនូវែលសេឡង់សង្ឃឹមថា នឹងពង្រឹងការផ្លាស់ប្តូរកម្រិតខ្ពស់ និងការផ្លាស់ប្តូររវាងពលរដ្ឋប្រទេសទាំងពីរទៅលើផ្នែកវប្បធម៌ ពង្រីកកិច្ចសហការផ្នែកផ្សេងៗ និងសម្រេចបាននូវភាពជោគជ័យថ្មីៗបន្តទៀត ៕ ប្រភព ៖ Chinaface

ប្រទេសអេស្ប៉ាញ ៖ នាយករដ្ឋមន្ត្រីប្រទេសអេស្ប៉ាញ លោក Pedro Sanchez បានថ្លែងកាលពីថ្ងៃទី២៤ ខែមីនា កន្លងមកថា ពិភពលោកគួរតែស្តាប់មតិរបស់ចិន ដើម្បីស្វែងរកវិធីបញ្ចប់សង្គ្រាមនៅប្រទេសអ៊ុយក្រែន ព្រោះចិនជាប្រទេសខ្លាំងមួយលំដាប់ពិភពលោក ។ ដូច្នេះ ប្រាកដណាស់ថា ភាគីទាំងអស់ត្រូវតែស្តាប់យោបល់របស់ចិនដើម្បីឱ្យដឹងថា តើប្រទេសទាំងអស់នឹងអាចរកវិធីបញ្ចប់ជម្លោះនៅអ៊ុយក្រែនបានឬអត់ ហើយអ៊ុយក្រែននឹងអាចរួបរួមទឹកដីរបស់ខ្លួនបានឬអត់ ។

នាយករដ្ឋមន្ត្រីប្រទេសអេស្ប៉ាញបានថ្លែងបែបនេះ មុនពេលលោកធ្វើទស្សនកិច្ចជាផ្លូវការទៅកាន់ប្រទេសចិន នៅថ្ងៃទី៣១ ខែមីនា និងមានគម្រោងជួបពិភាក្សាជាមួយប្រធានាធិបតីចិន លោក ស៊ី ជិនពីង ផងដែរ ។

គម្រោងជួបពិភាក្សាគ្នារបស់មេដឹកនាំប្រទេសចិន និងអេស្ប៉ាញ ត្រូវបានគេតាមដានខ្លាំងបំផុតពាក់ព័ន្ធនឹងបញ្ហាជម្លោះនៅប្រទេសអ៊ុយក្រែន ។ កន្លងមក នាយករដ្ឋមន្ត្រីអេស្ប៉ាញ លោក Pedro Sanchez បានគាំទ្រផែនការសន្តិភាពរបស់ប្រធានាធិបតីអ៊ុយក្រែន លោក Volodymyr Zelensky ដែលលោកបានអំពាវនាវឱ្យបង្រួបបង្រួមទឹកដីអ៊ុយក្រែនឡើងវិញ តាំងពីពេលរុស្ស៊ីបានដណ្តើមយកឧបទ្វីបគ្រីមៀពីអ៊ុយក្រែនកាលពីឆ្នាំ២០១៤ ។ ប៉ុន្តែក្នុងសេចក្តីថ្លែងការណ៍កាលពីថ្ងៃទី២៤ ខែមីនា លោក Pedro Sanchez មិនបានគាំទ្រផែនការសន្តិភាពរបស់អ៊ុយក្រែនទេ ។

គួរបញ្ជាក់ថា ប្រទេសចិនបានបញ្ជាក់ថា ខ្លួនប្រកាន់ជំហរកណ្តាលក្នុងជម្លោះនៅអ៊ុយក្រែនរហូតមក ហើយចិនមិនធ្លាប់បានបញ្ជូនអាវុធទៅឱ្យភាគីណាមួយទេក្នុងជម្លោះនេះ ។ លើសពីនេះ ប្រទេសចិនបានស្នើដាក់ផែនការសន្តិភាព១២ចំណុច ដើម្បីអំពាវនាវឱ្យភាគីទាំងអស់ឈប់បាញ់គ្នាក្នុងសង្គ្រាមនៅអ៊ុយក្រែនផងដែរ ។ ប៉ុន្តែអាមេរិក និងបណ្តាប្រទេសលោកខាងលិចបានលើកឡើងថា បើទោះជាចិនមិនបានបញ្ជូនអាវុធជួយរុស្ស៊ីក្តី ប៉ុន្តែចិនបានគាំទ្ររុស្ស៊ីផ្នែកការទូត និងជាដៃគូពាណិជ្ជកម្មជាមួយរុស្ស៊ី ៕ ប្រភព ៖ TNN World

យើងនឹងទទួលបានការងារធ្វើឬក៏អត់នោះ គឺអាស្រ័យលើការត្រៀមខ្លួនរបស់យើងឱ្យមានប្រៀបជាងអ្នកមកសម្ភាសន៍ការងារដូចគ្នា ។ ដូច្នេះ សំខាន់ណាស់ដែលយើងត្រូវត្រៀមអ្វីគ្រប់យ៉ាងឱ្យរៀបរយដូចជា ការឆ្លើយតបសំណួរ ស្វែងរកទិន្នន័យផ្សេងៗរបស់ក្រុមហ៊ុន និងតួនាទីការងារជាដើម ។ លើសពីនេះ គួរត្រៀមឯកសារនានាដើម្បីទៅសម្ភាសន៍ប្រកបដោយទំនុកចិត្ត និងទទួលបានការងារធ្វើ ។

១-សិក្សាព័ត៌មានរបស់ក្រុមហ៊ុន ៖
មុននឹងយើងទៅសម្ភាសន៍ការងារ គួរតែស្វែងរកព័ត៌មានរបស់ក្រុមហ៊ុន ប្រភេទអាជីវកម្ម និងចំណុចលម្អិតរបស់តួនាទីការងារនោះ វានឹងធ្វើឱ្យយើងមានចំណេះដឹងជាមូលដ្ឋានអំពីក្រុមហ៊ុន និងបង្ហាញឱ្យក្រុមហ៊ុនមើលឃើញថា យើងចាប់អារម្មណ៍នឹងការងារនេះ ។

២-ស្លៀកពាក់ឱ្យត្រឹមត្រូវ ៖
យើងគួរតែស្លៀកសម្លៀកបំពាក់ឱ្យសុភាពរៀបរយ មើលទៅគួរឱ្យទុកចិត្ត សមស្របនឹងតួនាទីការងារ ហើយបើចំពោះស្ត្រីវិញ គួរតុបតែងមុខស្រាលៗដើម្បីជាការផ្តល់កិត្តិយសដល់អ្នកសម្ភាសន៍យើង និងមើលទៅមានវិជ្ជាជីវៈ ។ ការស្លៀកពាក់មកសម្ភាសន៍ការងារ គឺត្រូវស្លៀកពាក់របៀបផ្លូវការច្រើនជាងការមកធ្វើការពិតប្រាកដ ។

៣-ត្រៀមឯកសារការងារ ៖
គួរតែត្រៀមឯកសារផ្សេងៗពាក់ព័ន្ធនឹងការងារឱ្យគ្រប់ចំនួនដូចជា ៖
-ប្រវត្តិរូប និងរូបថតបិទក្នុងប្រវត្តិរូប
-លទ្ធផលការងាររបស់យើងដូចជា លទ្ធផលការសរសេរ ប៉ុន្តែត្រូវដឹងថា លទ្ធផលការងារនេះមិនមែនជាទិន្នន័យដែលក្រុមហ៊ុនចាស់ហាមផ្សព្វផ្សាយ
-អត្តសញ្ញាប័ណ្ណ និងវិញ្ញាបនបត្រផ្សេងៗ
-ឈ្មោះអ្នកធានាយើងក្នុងប្រវត្តិរូប ដោយដាក់លេខទូរស័ព្ទទំនាក់ទំនង និងអ៊ីម៉ែល ។

៤-មកដល់ក្រុមហ៊ុនមុនពេលណាត់ ៖
គួរតែទៅដល់ក្រុមហ៊ុនឱ្យបានមុន៣០នាទីដើម្បីយើងអាចត្រៀមខ្លួន ក្នុងករណីមានការបំពេញទិន្នន័យផ្សេងៗលើប្រវត្តិរូប ឬក៏ត្រួតពិនិត្យឯកសារផ្សេងបន្ថែមទៀត ។ ការមកកាន់ក្រុមហ៊ុនមុនពេលវេលា គឺជាការធ្វើឱ្យក្រុមហ៊ុនចាប់អារម្មណ៍មកលើយើងក្នុងពេលជួបគ្នាលើកដំបូង ។ យើងអាចស្វែងរកផែនទីទីតាំងក្រុមហ៊ុន និងពិនិត្យការធ្វើចរាចរណ៍ក្នុងទីតាំងនោះ ។ លើសពីនេះ កុំភ្លេចបិទសំឡេងទូរស័ព្ទគ្រប់ប្រភេទផងដែរ មុននឹងចូលបន្ទប់សម្ភាសន៍ ។

៥-ត្រៀមខ្លួនឆ្លើយតបសំណួរ ៖
យើងអាចហ្វឹកហាត់ណែនាំខ្លួនឯង ហើយរៀបរាប់បទពិសោធន៍ការងារ សមត្ថភាពការងារ និងចំណុចត្រូវការរៀនសូត្របន្ថែមទៀត ដើម្បីឱ្យយើងអាចឆ្លើយតបសំណួរយ៉ាងមានទំនុកចិត្ត និងទទួលបានការចាប់អារម្មណ៍ពីក្រុមហ៊ុន ៕ ប្រភព ៖ Derma’s Life

ឥណ្ឌាគឺជាប្រទេសដែលចម្រុះទៅដោយសាសានាខុសៗគ្នា ប្រទេសឥណ្ឌាតែងតែមានប្រពៃណីនិងទំនៀមទំលាប់ប្លែកៗជាច្រើន ដែលប្រទេសផ្សេងទៀតមិនមានដូច។ ដូច្នេះហើយខាងក្រោមនេះគឺជារឿងចម្លែកៗទាំង៤នៅក្នុងប្រទេសឥណ្ឌា ដែលមានដូចតទៅ៖

១.ព្រះមានចំនួន៣៣០លាន៖ នៅក្នុងប្រទេសឥណ្ឌា៨០%គឺគេជឿលើសាសនាហិណ្ឌូ ដែលសាសនានេះមានព្រះរហូតទៅដល់ជាង៣៣០លានអង្គនិងអទិទេព ។

២.បុរសដែលតមអាហាររយះពេល៨០ឆ្នាំ៖ Prahlad Jani គឺជាព្រះសង្ឃជនជាតិឥណ្ឌាម្នាក់ដែលបានអះអាងថាខ្លួនរស់នៅដោយគ្មានអាហារនិងទឹកតាំងពីឆ្នាំ១៩៤០មកម្លេះ ។ ក្រុមអ្នកស្រាវជ្រាវបានធ្វើការពិសោធន៍នៅក្នុងឆ្នាំ២០០៣រហូតដល់ឆ្នាំ២០១០ ហើយបានរកឃើញថាPrahlad Jani ពិតជាមានសុខភាពល្អដោយគ្មានអាហារនិងទឹក ក្នុងអំឡុងពេលសាកល្បងពិសោធន៍នោះពិតមែន។

៣.ជញ្ចៀនរៀបការពាក់នៅម្រាមជើង៖ នៅប្រទេសឥណ្ឌាគេជឿថាការពាក់ជញ្ចៀនរៀបការនៅម្រាមជើង គឺធ្វើឱ្យកូនក្រមុំមានសុខភាពល្អនិងឆាប់មានផ្ទៃពោះ ។

៤.ធម្មយាត្រា១៣០លាននាក់៖ នេះគឺជាព្រឹត្តិការណ៍សាសនាហិណ្ឌូដ៏ធំជាងគេលើលោក ជនជាតិឥណ្ឌាជឿថាការរៀបចំពិធីនេះអាចមើលឃើញអទិទេពទាំងអស់នៅលើមេឃ ហើយនិងទទួលបានការប្រទានពរពីព្រះជាម្ចាស់ផ្ទាល់បានទៀតផង។ ដែលកម្មវិធីនេះប្រារព្ធរយះពេល១២ឆ្នាំមួយដង នៅថ្ងៃទី១៥ ខែមករា រហូតដល់ថ្ងៃទី ១៤ ខែមិនា ដែលមានមនុស្សចូលរួមជាង១០០លាននាក់៕