ប្រទេសម៉ាឡេស៊ី ៖ សារព័ត៌មានស៊ីនហួរបានដកស្រង់របាយការណ៍ពីទីក្រុងគូឡាឡាំពួរ ប្រទេសម៉ាឡេស៊ី ដែលបញ្ជាក់អំពីសេចក្តីថ្លែងការណ៍របស់ក្រុមប្រឹក្សាទេសចរណ៍សុខភាពរបស់ប្រទេសម៉ាឡេស៊ី កាលពីថ្ងៃទី១៨ ខែមីនាថា ម៉ាឡេស៊ីបានបង្កើតគម្រោងទេសចរណ៍សុខភាពដើម្បីជំរុញវិស័យទេសចរណ៍ ហើយបណ្តាមន្ទីរពេទ្យធំៗក្នុងប្រទេសនេះកំពុងបង្កើនកិច្ចខិតខំប្រឹងប្រែងផ្តល់សេវាកម្មថ្មីដល់អ្នកជំងឺ ។

ការបង្កើតគម្រោងទេសចរណ៍សុខភាពនេះ គឺក្នុងគោលបំណងពង្រឹងឋានៈម៉ាឡេស៊ីឱ្យក្លាយជាប្រទេសគោលដៅមួយសម្រាប់ភ្ញៀវទេសចរនៅលើពិភពលោក ខណៈពួកគេមកកម្សាន្តនៅម៉ាឡេស៊ីមានសុវត្ថិភាព និងទំនុកចិត្តផ្នែកសេវាកម្មសុខភាព ក៏ដូចជាជួយជំរុញឱ្យមន្ទីរពេទ្យនានារបស់ម៉ាឡេស៊ីមានការទទួលស្គាល់នៅទូទាំងពិភពលោកផងដែរ ។

គម្រោងទេសចរណ៍សុខភាពមានការចូលរួមពីមន្ទីរពេទ្យធំៗចំនួន៤ រួមមាន ៖ វិទ្យាស្ថានជាតិបេះដូង, មន្ទីរពេទ្យ island, មជ្ឈមណ្ឌលវេជ្ជសាស្ត្រ Mahkota និងមជ្ឈមណ្ឌលវេជ្ជសាស្ត្រ Subang Jaya ។ គម្រោងថ្មីនេះ នឹងឆ្លុះបញ្ចាំងអំពីការឈានឡើងសំខាន់មួយសម្រាប់ផ្នែកការថែទាំសុខភាពនៅម៉ាឡេស៊ី ដើម្បីសម្រេចបានគោលដៅក្លាយជាប្រទេសទេសចរណ៍ផង និងផ្តល់សេវាកម្មថែទាំសុខភាពផងនៅត្រឹមឆ្នាំ២០២៥ ។

លើសពីនេះ គម្រោងនេះនឹងជួយជំរុញការងើបឡើងវិញ និងការលូតលាស់របស់ឧស្សាហកម្មទេសចរណ៍សុខភាព ក៏ដូចជាបង្កើនចំនួនភ្ញៀវទេសចរបរទេសឱ្យលើសឆ្នាំ២០២២ ។ ដូច្នេះ គម្រោងនេះអាចបង្កើតប្រាក់ចំណូលផ្នែកទេសចរណ៍ជាង១.៣០០លានរីងហ្គីត ស្មើនឹង៧៦% ខណៈនៅឆ្នាំ២០១៩ ជាអំឡុងពេលមុនមានការឆ្លងរាលដាលនៃជំងឺកូវីដ-១៩ ម៉ាឡេស៊ីបានប្រាក់ចំណូលពីទេសចរណ៍ស្មើ១.៧០០លានរីងហ្គីតឯណោះ ៕

ប្រភព ៖ beartaiBRIEF

តារាសម្តែងស្រី ជនជាតិសិង្ហបុរី ម៉ី ស៊ីន (Meixin) ត្រូវបានវិញ្ញាខ្មោចនៅកម្ពុជា តាមសុំនាងរៀបការ នេះបើតាមសម្តីរបស់មិត្តភ័ក្ររបស់នាង។

បទពិសោធន៍ដ៏ចម្លែកនេះបានកើតឡើងនៅពេលដែលតារាសម្តែងវ័យ ៣៦ ឆ្នាំរូបនេះកំពុងថតភាពយន្តឯកសារអំពីភូមិបណ្តែតទឹកលើបឹងទន្លេសាបក្នុងប្រទេសកម្ពុជា ដែលរាបរៀបពីជនភៀសខ្លួនពីប្រទេសវៀតណាមមករស់នៅដោយគ្មានការអនុញ្ញាតឱ្យឡើងលើគោករហូតដល់ស្លាប់ និងកប់។

ម៉ី ស៊ីន (Meixin) បានប្រាប់សារព័ត៌មានក្នុងស្រុក 8days ថា “បន្ទាប់ពីខ្ញុំជិះយន្តហោះត្រឡប់ទៅផ្ទះវិញ មិត្តរបស់ខ្ញុំដែលមានភ្នែកទីបី និងជាអ្នកជឿលើវិញ្ញាណខ្មោចផងនោះ បានមកផ្ទះរបស់ខ្ញុំ។ គាត់បានសួរថា “តើឯងមានដើរជាន់លើអ្វីមួយអត់?”

នាង​ក៏បាននិយាយ​ថា “អត់​ទេ យើង​ថត​នៅ​បឹង​មួយ​តែប៉ុណ្ណោះ។”

តាមការប្រើញ្ញាណពិសេស មិត្តរបស់នាងបាននិយាយថា៖” ម៉ី ស៊ីន (Meixin) បានជាន់លើភ្នែកសត្វមួយ ដែលជាសំណែននៅតាមបណ្តាលមាត់បឹងនោះ វិញ្ញាណខ្មោចទីនោះខឹងនឹងនាងជាខ្លាំង តែដោយសារតែរូបសម្រស់នាងស្អាត វិញ្ញាណនោះក៏បានតាមនាង និងចង់សុំនាងរៀបការថែមទៀតផង”។

នាងបានបន្តថា៖ “មិត្តរបស់នាងបានធ្វើពិធីបួងសួង សុំកុំឱ្យវិញ្ញាណនោះតាមមិត្តរបស់នាងទៀត អស់រយៈពេលប្រមាណជាង២សប្តាហ៍​ នាងក៏លែងជួបហេតុការណ៍ចម្លែក ឬឃើញវិញ្ញាណនៅពេលយប់ទៀត”៕

ប្រភព៖ 8days

ក្រុមហ៊ុន Amazon.com Inc បានប្រកាសកាលពីថ្ងៃទី២០ ខែមីនា កន្លងមកថា នឹងកាត់បន្ថយបុគ្គលិករបស់ខ្លួនចំនួន៩.០០០នាក់ ។ នេះជាការកាត់បន្ថយបុគ្គលិកជាលើកទី២ របស់ក្រុមហ៊ុនបច្ចេកវិទ្យាធំបំផុតមួយនេះ ស្របពេលមានវិបត្តិសេដ្ឋកិច្ច ។

ក្រុមហ៊ុនបច្ចេកវិទ្យាធំៗជាច្រើន រួមទាំង Microsoft Corp, Salesforce Inc និង Alphabet and Meta Platforms បាននាំគ្នាកាត់បន្ថយបុគ្គលិករាប់ពាន់នាក់ក្នុងរយៈពេលប៉ុន្មានខែកន្លងមក ខណៈក្រុមហ៊ុនទាំងនេះបានជួលបុគ្គលិកជាច្រើននាក់ ។ ចំណែក Amazon បានដើរតាមក្រោយ Meta ជាក្រុមហ៊ុនមេរបស់ Facebook ដែលបានប្រកាសកាត់បន្ថយបុគ្គលិករបស់ខ្លួននៅឆ្នាំ២០២៣ ។

លោក Andy Jesse នាយកប្រតិបត្តិ ឬ CEO របស់ Amazon ថ្លែងថា ក្នុងរយៈពេលប៉ុន្មានឆ្នាំកន្លងមកនេះ ក្រុមហ៊ុនរបស់លោកបានបន្ថែមបុគ្គលិកជាច្រើននាក់ ប៉ុន្តែស្ថានភាពសេដ្ឋកិច្ចពេលនេះមិនស្ថិតស្ថេរ ទើបធ្វើឱ្យក្រុមហ៊ុនត្រូវកាត់បន្ថយដើមទុន និងកាត់បន្ថយបុគ្គលិក ហើយក្រុមហ៊ុននឹងកាត់បុគ្គលិកផ្នែកផ្សព្វផ្សាយពាណិជ្ជកម្ម និង twitter ។

កាលពីខែកុម្ភៈ ឆ្នាំ២០២៣ កន្លងមក Amazon បានប្រកាសថា ប្រាក់ចំណូលអាចបន្តធ្លាក់ចុះនៅត្រីមាសបច្ចុប្បន្ន ដោយសាររងផលប៉ះពាល់ពីផ្នែកហិរញ្ញវត្ថុរបស់អតិថិជន ហើយអតិថិជនក៏កាត់បន្ថយការចំណាយរបស់ពួកគេផងដែរ ។

មុននេះ ក្រមហ៊ុន Meta Platforms បានបញ្ជាក់ថា នឹងកាត់បន្ថយបុគ្គលិករបស់ខ្លួនចំនួន១ម៉ឺននាក់នៅឆ្នាំ២០២៣ ខណៈក្រុមហ៊ុននេះបានកាត់បន្ថយបុគ្គលិកជាលើកដំបូងជាង១ម៉ឺន១ពាន់នាក់ ៕ ប្រភព ៖ TNN World

ប្រទេសចិន ៖ ក្រោយពីមានព័ត៌មានថា ចិនអាចដាំដុះទុរេននៅក្នុងប្រទេសរបស់ខ្លួនបាន ធ្វើឱ្យពលរដ្ឋថៃជាច្រើននាក់ភ្ញាក់ផ្អើល និងខ្លាចថា ថៃមិនអាចនាំចេញទុរេនទៅលក់នៅប្រទេសចិនបានទៀត ។ លើសពីនេះ នៅមានទុរេនរបស់ប្រទេសម៉ាឡេស៊ី ដែលពលរដ្ឋចិនចូលចិត្តបរិភោគ ដោយសារទុរេនម៉ាឡេស៊ីរក្សាទុកបានយូរ និងមានការវេចខ្ចប់ស្រស់ស្អាតទៀតផង ។

តាមរបាយការណ៍របស់ការិយាល័យប្រឹក្សាផ្នែកកសិកម្មក្រៅប្រទេស ប្រចាំទីក្រុងប៉េកាំង ដែលបានដើរពិនិត្យមើលតម្លៃលក់រាយផ្លែឈើនៅតាមហាងនានា និងនៅតាមផ្សារទំនើបនៅក្រុងប៉េកាំង ចាប់ពីថ្ងៃទី១ ដល់ថ្ងៃទី១៥ ខែមីនា ឆ្នាំ២០២៣ ឃើញថា ៖

១-ទុរេនស្រស់ពីប្រទេសថៃ ៖ តាមការពិនិត្យមើលជំហានដំបូងឃើញថា ទុរេនស្រស់របស់ថៃក្នុងទីផ្សារចិនមានបរិមាណកើនឡើងតិចតួច ហើយភាគច្រើនគេសង្កេតឃើញទុរេនថៃមានដាក់លក់នៅតាមហាងធំៗ ។ ចំណែកឯតម្លៃវិញ ទុរេនថៃបានឡើងថ្លៃបន្តិចបន្តួចប៉ុណ្ណោះ ។

តាមការសាកសួរទៅកាន់បុគ្គលិកផ្សារទំនើបអំពីការទិញទុរេនថៃឱ្យដឹងថា អតិថិជនចិនចាប់អារម្មណ៍ទុរេនថៃច្រើន ជាពិសេស ទុរេនស្រស់ ព្រោះអ្នកបរិភោគភាគច្រើនចូលចិត្តទុរេនស្រស់ជាងទុរេនក្លាស្សេ ។ ក្រៅពីនេះ ទុរេនស្រស់ដែលគេបកសំបករួចហើយចាប់ផ្តើមពេញនិយមខ្លាំង ព្រោះវាងាយស្រួលក្នុងការបរិភោគ ។

២-ទុរេនស្រស់ពីប្រទេសវៀតណាម ៖ តាមការពិនិត្យមើលនៅតាមហាងលក់ផ្លែឈើជាច្រើនកន្លែងឃើញថា បរិមាណទុរេនវៀតណាមនៅលើទីផ្សារចិនបានធ្លាក់ចុះ ខណៈកាលពីមុន គេបានដាក់លក់ទុរេនវៀតណាមកម្រិត A និងកម្រិត B ប៉ុន្តែបច្ចុប្បន្នឃើញថា គេដាក់លក់ទុរេនកម្រិត B តែមួយប៉ុណ្ណោះ ។

ហេតុផលនេះបានធ្វើឱ្យតម្លៃទុរេនវៀតណាមធ្លាក់ចុះ ហើយមិនត្រឹមតែតម្លៃធ្លាក់ចុះទេ គេឃើញថា នៅតាមហាងនានាបានផ្សព្វផ្សាយពាណិជ្ជកម្មពីការបញ្ចុះតម្លៃទុរេនវៀតណាមផងដែរ ។ ក្រុមហ៊ុនអាជីវកម្មលើកឡើងថា បរិមាណទុរេនវៀតណាមនៅលើទីផ្សារចិនធ្លាក់ចុះ ដោយសារចិនត្រៀមទិញទុរេនថៃ ដែលនឹងបញ្ជូនមកទីផ្សារចិននាពេលឆាប់ៗនេះ ។

៣-ទុរេនក្លាស្សេពីប្រទេសម៉ាឡេស៊ី ៖ តាមការពិនិត្យជំហានដំបូងលើទុរេនម៉ាឡេស៊ីឃើញថា តម្លៃទុរេននៅដូចដើម គ្មានការបញ្ចុះតម្លៃទេ ហើយក៏គ្មានផ្សាយពាណិជ្ជកម្មបង្កើនការលក់នៅទីផ្សារចិនដែរ ។ គេឃើញថា នៅតាមហាងនានាបានដាក់លក់ទុរេនម៉ាឡេស៊ី ២-៣ពូជផ្សេងគ្នា ដូចជា ពូជមូសាងឃីង ឬពូជណាមដាំ ព្រោះពូជទាំងនេះមានការនិយមចូលចិត្តពីពលរដ្ឋចិន និងមានតម្លៃខ្ពស់ផងដែរ ។

តាមការសាកសួរទៅកាន់បុគ្គលិកហាងនានាឃើញថា ទុរេនម៉ាឡេស៊ីទទួលបានការពេញនិយមច្រើននៅប្រទេសចិន ដោយសារគេអាចរក្សាទុកវាបានយូរ និងមានការវេចខ្ចប់ត្រឹមត្រូវ ហើយដោយសារការវេចខ្ចប់បានស្អាត អតិថិជនចិនចូលចិត្តទិញវាសម្រាប់ផ្ញើទៅកាន់មិត្តភក្តិ ឬបងប្អូនទៀតផង ៕

ប្រភព ៖ The Durian Times