រដ្ឋធានីមូស្គូ៖ ក្រោយពេលតុលាការឧក្រិដ្ឋកម្មអន្ដរជាតិ (ICC) បានចេញដីកាចាប់ខ្លួនប្រធានាធិបតីរុស្ស៊ី មិនបានប៉ុន្មានថ្ងៃផង មេដឹកនាំកំពូលរបស់ចិន បានធ្វើដំណើរទៅកាន់រដ្ឋធានីមូស្គូ ធ្វើឲ្យលោកខាងលិច ចោទប្រកាន់ អំពីការបង្ហាញនូវកិច្ចគាំទ្រដល់មេដឹកនាំវិមានក្រឹមឡាំង ខណៈនៅឯកោពីអន្ដរជាតិ ជុំវិញសង្គ្រាម នៅក្នុងប្រទេសអ៊ុយក្រែន។

សារព័ត៌មាន Tass គ្រប់គ្រងដោយរដ្ឋ រុស្ស៊ី បានចេញផ្សាយ កាលពីព្រឹក ថ្ងៃអង្គារ ទី២១ ខែមីនា ឆ្នាំ២០២២ ថា ក្រសួងការបរទេសចិន បានបញ្ជាក់ នៅក្នុងសេចក្តីថ្លែងការណ៍មួយ កាលពីថ្ងៃអង្គារ ថា ក្នុងអំឡុងជំនួបកំពូល ជាមួយនឹងប្រធានាធិបតីរុស្ស៊ី លោក វ្ល៉ាឌីមៀ ពូទីន នៅរដ្ឋធានីក្រុងម៉ូស្គូ មេដឹកនាំចិន លោក ស៊ី ជិនពីង (Xi Jinping) បានសង្កត់ធ្ងន់ លើការជំរុញទំនាក់ទំនងទ្វេភាគី ព្រោះវាជាជម្រើស ប្រកបដោយយុទ្ធសាស្ត្ររបស់រដ្ឋាភិបាលក្រុងប៉េកាំង ផងដែរ។

លោក ស៊ី ជិនពីង (Xi Jinping) ប្រធានាធិបតីចិន បានគូសបញ្ជាក់ ថា «ការបង្រួបបង្រួម និង ការអភិវឌ្ឍឱ្យបានល្អ រវាងទំនាក់ទំនងចិន និង រុស្ស៊ី នឹងក្លាយជាជម្រើសយុទ្ធសាស្រ្ត។ ប្រទេសចិន បានឈរលើមូលដ្ឋាន សម្រាប់ផលប្រយោជន៍ ជាមូលដ្ឋានរបស់ខ្លួន និង និន្នាការទូទៅ សម្រាប់ពិភពលោក។ ចិន មានភាពរឹងមាំ នៅក្នុងការបន្តដំណើរ ឆ្ពោះទៅរកការពង្រឹងនូវកិច្ចសហប្រតិបត្តិការ ជាយុទ្ធសាស្ត្រ ជាមួយនឹងប្រទេសរុស្ស៊ី។

ក្រសួងការបរទេសចិន បានបន្ដ ថា បើតាមមេដឹកនាំរបស់ចិន បានឲ្យដឹង ថា ប្រទេស ភាគច្រើន គាំទ្រដល់ការបន្ធូរបន្ថយនូវភាពតានតឹង ហើយឈរលើគោលជំហរចរចាសន្តិភាព ប៉ុន្ដែប្រឆាំងនឹងការបញ្ឆេះសង្គ្រាមបន្ថែមទៀត។ ជាមួយគ្នានេះ លោក ស៊ី ជិនពីង ប្រធានាធិបតីចិន បានធានា ដល់សមភាគីរុស្ស៊ី លោក ពូទីន ថា ចិននឹងបន្តដើរតួនាទីស្ថាបនា នៅក្នុងការលើកកម្ពស់នូវយន្ដការដោះស្រាយខាងនយោបាយ ជុំវិញវិបត្ដិ នៅអ៊ុយក្រែន។

ដោយឡែក សារព័ត៌មាន Channel News Asia បានចេញផ្សាយ កាលពីព្រឹក ថ្ងៃអង្គារ ទី២១ ខែមីនា ថា លោក វ៉្លាឌីមៀ ពូទីន (Vladimir Putin) បានប្រាប់ដល់ប្រធានាធិបតីចិន លោក ស៊ី ជិនពីង កាលពីថ្ងៃចន្ទ ថា រុស្ស៊ី បានបើកចំហ ដល់កិច្ចពិភាក្សា តាមសំណើរបស់ចិន សម្រាប់ការបញ្ចប់នូវការវាយប្រយុទ្ធគ្នា នៅក្នុងប្រទេសអ៊ុយក្រែន។

ជំនួបកំពូលនេះ បានធ្វើឡើង ខណៈចិន តែងតែព្យាយាមបង្ហាញខ្លួនឯង ជាភាគីអព្យាក្រឹត នៅក្នុងជម្លោះ នៅអ៊ុយក្រែន។ ដោយឡែក ក្រុងវ៉ាស៊ីនតោន បានព្រមាន ដល់ពិភពលោក ទាមទារឲ្យមានការប្រយ័ត្នប្រយែង ចំពោះសកម្មភាពរបស់ក្រុងប៉េកាំង។

ដំណើរបំពេញទស្សនកិច្ចរបស់លោកប្រធានាធិបតីចិន រយៈពេល៣ថ្ងៃ នៅក្នុងរដ្ឋធានីមូស្គូ កំពុងតែបង្ហាញនូវការគាំទ្រដល់លោក ពូទីន ខណៈគាត់កំពុងតែស្ថិតក្នុងភាពឯកោជាអន្តរជាតិ។ ស្របគ្នានេះដែរ កាលពីប៉ុន្មានថ្ងៃមុន តុលាការឧក្រិដ្ឋកម្មអន្ដរជាតិ (ICC) ក៏បានចេញដីកាចាប់ខ្លួនលោក ពូទីន ជុំវិញការចោទប្រកាន់ ពីបទនិរទេសកុមាររបស់អ៊ុយក្រែន ដោយខុសច្បាប់ ចេញពីតំបន់កាន់កាន់របស់ខ្លួន នាំទៅកាន់ប្រទេសរុស្ស៊ី។

ប្រធានាធិបតីរុស្ស៊ី លោក វ៉្លាឌីមៀ ពូទីន (Vladimir Putin) បានប្រាប់ដល់មេដឹកនាំចិន ដែលកំពុងតែធ្វើដំណើរទស្សនកិច្ច ជាលើកដំបូង នៅក្នុងរដ្ឋធានីមូស្គូ ចាប់តាំងពីការអន្ដរាគមន៍យោធារបស់រុស្ស៊ី នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ ថា «យើងតែងតែបើកចំហ ដល់ការចរចា»។

សហរដ្ឋអាមេរិក បានចោទប្រកាន់ ដល់ក្រុងប៉េកាំង អំពីការនាំចេញគ្រឿងសព្វាវុធ ទៅជួយដល់ក្រុងមូស្គូ ដែលកំពុងតែធ្វើសង្គ្រាម ប្រឆាំងនឹងក្រុងកៀវ នៅលើទឹកដីរបស់អ៊ុយក្រែន។ ប៉ុន្ដែការអះអាងរបស់ក្រុងវ៉ាស៊ីនតោន ត្រូវបានចិន បដិសេធយ៉ាងដាច់អហង្ការ។

រដ្ឋមន្រ្ដី ក្រសួងការបរទេស សហរដ្ឋអាមេរិក លោក អេនតូនី ប្ល៊ីនខេន (Antony Blinken) បានបង្ហាញនូវការសង័្សយ ជុំវិញសំណើរបស់មេដឹកនាំចិន ចំពោះវិបត្ដិនៅអ៊ុយក្រែន។ បន្ថែមពីលើនេះ លោករដ្ឋមន្រ្ដី បានព្រមាន ថា ពួកគេអាចនឹងបង្កើតយុទ្ធសាស្រ្ដ សម្រាប់ជួយដល់រុស្ស៊ី។

លោក អេនតូនី ប្ល៊ីនខេន (Antony Blinken) បានបញ្ជាក់ នៅក្នុងសេចក្ដីថ្លែងការណ៍មួយ ថា «មានរុស្ស៊ីតែម្នាក់ឯងគត់ អាចបញ្ចប់សង្រ្គាមរបស់ខ្លួន នៅថ្ងៃនេះ។ ល្គឹកណា រុស្ស៊ីនៅតែធ្វើ យើងនឹងឈរដោយរួបរួមជាមួយអ៊ុយក្រែន ឱ្យបានយូរតាមតែអាចធ្វើទៅបាន»។

ប្រធានាធិបតីចិន លោក ស៊ី ជិនពីង និង លោក ពូទីន បានជួបជុំគ្នា ដើម្បីពិភាក្សា លើឯកសារគោលជំហរ១២ចំណុចរបស់ចិន ស្តីពីជម្លោះនៅអ៊ុយក្រែន ដោយអំពាវនាវឱ្យមានការពិភាក្សា និង ការគោរព ចំពោះអធិបតេយ្យភាពដែនដីរបស់ប្រទេសទាំងអស់។ នៅក្នុងជំនួបនោះ មេដឹកនាំចិន បានសាទរ ចំពោះទំនាក់ទំនងយ៉ាងជិតស្និទ្ធ ជាមួយនឹងរុស្ស៊ី ហើយមេដឹកនាំរុស្ស៊ី ក៏បាននិយាយថា ប្រទេសទាំងពីរ មាន«គោលបំណង និង ភារកិច្ចរួមជាច្រើនទៀត»។

លោក អូឡែគ នីកូឡែនកូ (Oleg Nikolenko) អ្នកនាំពាក្យ ក្រសួងការបរទេសអ៊ុយក្រែន បានបញ្ជាក់ នៅក្នុងសេចក្តីអត្ថាធិប្បាយមួយ ផ្ញើទៅកាន់ទីភ្នាក់ងារសារព័ត៌មាន AFP ថា «យើងរំពឹង ថា ក្រុងប៉េកាំង នឹងប្រើប្រាស់ឥទ្ធិពលរបស់ខ្លួន ទៅលើក្រុងម៉ូស្គូ ដើម្បីជំរុញឱ្យរុស្ស៊ី បញ្ចប់សង្គ្រាមឈ្លានពាន ប្រឆាំងនឹងអ៊ុយក្រែន។ រុស្ស៊ី ត្រូវតែដកកងទ័ពរបស់ខ្លួនទាំងអស់ ចេញពីប្រទេសអ៊ុយក្រែន ទើបមានការចរចាសន្ដិភាពកើតឡើង»៕

ប្រទេសថៃ ៖ លោក Thitinai Patikabut នាយកពន្ធនាគារក្នុងស្រុកថាម៉ៃ បាននាំអ្នកទោសចំនួន៣០នាក់មកជួយធ្វើការឱ្យក្រុមហ៊ុននាំចេញផ្លែឈើមួយកន្លែងស្ថិតនៅស្រុកមឿង ខេត្តចន្ទបុរី ប្រទេសថៃ ។ អ្នកទោសទាំងនេះត្រូវជួយរៀបចំផ្លែមង្ឈុតសម្រាប់លក់ចេញ ក្រោយពីក្រុមហ៊ុននេះខ្វះខាតកម្មករធ្វើការផ្នែកកសិកម្ម ជាពិសេស កម្មកររៀបចំផ្លែឈើសម្រាប់នាំចេញ ។

នាយកគ្រប់គ្រងក្រុមហ៊ុន Orasa Fruit Co., Ltd. លោក Monthon Pariwat បាននាំមន្ត្រីពន្ធនាគារដើរពិនិត្យមើលការរៀបចំផ្លែមង្ឃុតសម្រាប់នាំចេញ ។ លោកលើកឡើងថា បច្ចុប្បន្ន ផ្លែមង្ឃុតរបស់ប្រទេសថៃបានផ្តល់ទិន្នផលដើមរដូវ ហើយក្រុមហ៊ុនត្រូវការនាំចេញផ្លែមង្ឃុតជាច្រើនទៅកាន់ទីក្រុងក្វាងចូវ និងផ្សារ Giang Nan ដែលជាផ្សារធំបំផុតនៅប្រទេសចិន ។

លោក Monthon Pariwat បន្តថា មន្ត្រីពន្ធនាគារបានបញ្ជូនអ្នកទោសមកជួយជាកម្លាំងធ្វើការក្នុងក្រុមហ៊ុនរបស់លោក គឺនឹងអាចជួយដោះស្រាយបញ្ហាខ្វះខាតកម្លាំងកម្មករក្នុងក្រុមហ៊ុន ។ លើសពីនេះ អ្នកទោសនឹងជួយបញ្ជូនទិន្នផលកសិកម្មទៅកាន់ទីផ្សារ ជាពិសេស ក្នុងអំឡុងពេលទិន្នផលកសិកម្មត្រូវលក់ទៅកាន់ទីផ្សារក្នុងពេលតែមួយ ។

ចំណែកលោក Thitinai Patikabut នាយកពន្ធនាគារបានថ្លែងថា ពន្ធនាគារ និងក្រុមហ៊ុននាំចេញផ្លែឈើខេត្តចន្ទបុរី បានចុះកិច្ចព្រមព្រៀងសហការគ្នា ដោយខាងពន្ធនាគារបានផ្តល់កម្លាំងអ្នកទោសចំនួន៣០នាក់មកជួយរៀបចំផ្លែឈើក្នុងក្រុមហ៊ុន ខណៈពួកគេរង់ចាំការលើកលែងទោស ។ លោកបន្តថា បើក្រុមហ៊ុនត្រូវការកម្លាំងអ្នកទោសមកជួយការងារបន្ថែមទៀតនៅថ្ងៃក្រោយ ខាងពន្ធនាគាររីករាយនឹងបញ្ជូនអ្នកទោសមកជួយការងារនៅទីនេះ ។

នាយកពន្ធនាគារបន្តថា ពន្ធនាគារនឹងបញ្ជូនឆ្មាំគុកមកយាមអ្នកទោសនៅក្រុមហ៊ុនជារៀងរាល់ថ្ងៃផងដែរ ។ ការផ្តល់កម្លាំងអ្នកទោសមកជួយរៀបចំផ្លែឈើនេះ ដោយសារតែមើលឃើញថា ក្រុមហ៊ុនខ្វះខាតកម្លាំងពលកម្មជាខ្លាំង ជាពិសេស ខ្វះកម្មករមកពីប្រទេសមីយ៉ាន់ម៉ា ឡាវ និងកម្ពុជា ។

ជាមួយគ្នានេះ អ្នកទោសទាំង៣០នាក់កំពុងរង់ចាំការលើកលែងទោស ពួកគេអាចទទួលបានប្រាក់ចំណូល និងមានជំនាញរៀបចំផ្លែឈើ ។ ដូច្នេះ ពួកគេអាចទៅបង្កើតមុខរបរនៅថ្ងៃក្រោយបានបន្ទាប់ពីចេញពីគុក ៕ប្រភព ៖ khaosod

ទីក្រុងតៃប៉ិ៖ ដោយសារតែការភ័យខ្លាចនឹងឥទ្ធិពលយោធារបស់ចិន កំពុងតែកើនឡើង នៅក្នុងតំបន់ ធ្វើឲ្យគណបក្សគ្រប់គ្រងអំណាច នៅកោះតៃវ៉ាន់ និង ជប៉ុន គ្រោងនឹងជួបចរចាគ្នា ជារូបវន្ដ ជាលើកដំបូង នៅក្នុងទីក្រុងតៃប៉ិ ដោយផ្ដោតទៅលើបញ្ហាសន្ដិសុខ និង ការថែរក្សាសន្ដិភាព នៅច្រកសមុទ្រតៃវ៉ាន់ ហើយតំបន់ឥណ្ឌូ-ប៉ាស៊ីហ្វិក។

សារព័ត៌មាន Taiwan News បានចេញផ្សាយ កាលពីព្រឹក ថ្ងៃអង្គារ ទី២១ ខែមីនា ឆ្នាំ២០២៣ ថា គណបក្សវឌ្ឍនភាពប្រជាធិបតេយ្យ (DPP) ដែលកំពុងតែគ្រប់គ្រងអំណាចនៅតៃវ៉ាន់ នឹងជួបចរចាគ្នា នៅថ្ងៃអង្គារ ដោយផ្ដោតកិច្ចការយ៉ាងសំខាន់ លើការទូត និង ការពារជាតិ ២+២ ជាមួយនឹងសមាជិក គណបក្សប្រជាធិបតេយ្យសេរី (LDP) ដែលកំពុងតែគ្រប់គ្រងអំណាច នៅក្នុងប្រទេសជប៉ុន។

សារព័ត៌មាន Channel News Asia មានមូលដ្ឋាន នៅក្នុងប្រទេសសិង្ហបុរី បានរាយការណ៍ ថា កិច្ចប្រជុំបិទទ្វារនេះ នឹងផ្តោតលើឯកសារយុទ្ធសាស្ត្រសន្តិសុខជាតិរបស់ជប៉ុន កំណែទម្រង់វិស័យការពារជាតិ និង យោធារបស់តៃវ៉ាន់ វឌ្ឍនភាពសម្រាប់កិច្ចសហប្រតិបត្តិការយោធារបស់តៃវ៉ាន់ ជាមួយសហរដ្ឋអាមេរិក ហើយស្ថានភាព នៅតំបន់ឥណ្ឌូ-ប៉ាស៊ីហ្វិក និង ច្រកសមុទ្រតៃវ៉ាន់។

លោក ឡូ ជី-ចេង (Lo Chih-cheng) និង លោក គួ គួ-វ៉ិន (Kuo Kuo-wen) តំណាងរាស្រ្ដរបស់តៃវ៉ាន់ មកពីគណបក្ស DPP នឹងជួបចរចាគ្នា ជាមួយនឹងលោក ហូរី អ៊ីវ៉ាវ (Horii Iwao) និង លោក កូគូបា កូណូស៊ូកេ (Kokuba Konosuke) តំណាងរាស្រ្ដរបស់ជប៉ុន មកពីគណបក្ស LDP ដែលបានមកដល់តៃវ៉ាន់ រួចហើយ។ គណបក្សទាំងពីរ ធ្លាប់រៀបចំព្រឹត្តិការណ៍ស្រដៀងគ្នា ដែរ នៅក្នុងខែសីហា និង ខែធ្នូ ឆ្នាំ២០២១។ ប៉ុន្តែជំនួប នាពេលនេះ នឹងក្លាយជាការជជែកគ្នា ផ្ទាល់មុខគ្នា លើកដំបូង រវាងគណបក្សទាំងពីរ។

លោក ឡាយ ជីង-តេ (Lai Ching-te) ប្រធានគណបក្ស DPP បានបញ្ជាក់ ថា គាត់ចង់ទៅចរចា នៅក្នុងប្រទេសជប៉ុន នាពេលខាងមុខ និង ជំរុញឱ្យកិច្ចពិភាក្សាទាំងនេះ ក្លាយជាសកម្មភាព ជាទៀងទាត់។

រហូតមកដល់ពេលនេះ ជប៉ុន មានការព្រួយបារម្ភ កាន់តែខ្លាំងឡើង អំពីការពង្រីកអំណាចយោធារបស់ចិន នៅក្នុងតំបន់។ ជាមួយគ្នានេះដែរ ក្រុងតូក្យូ បានសង្កត់ធ្ងន់ម្តងហើយម្តងទៀត អំពីសារៈសំខាន់ ដល់ការថែរក្សាសន្តិភាព និង ស្ថិរភាព នៅច្រកសមុទ្រតៃវ៉ាន់។

ដោយសារតែចិន កំពុងតែបង្កើនសម្ពាធកាន់តែខ្លាំងទៅលើតៃវ៉ាន់ រុស្ស៊ី កំពុងតែបន្ដធ្វើសង្គ្រាម នៅអ៊ុយក្រែន និង កូរ៉េខាង បាញ់មីស៊ីលមិនឈប់ឈរនោះ ទើបជប៉ុន បានដាក់ចេញផ្សាយនូវរបាយការណ៍យុទ្ធសាស្ត្រសន្តិសុខជាតិ និង ផែនការការពារជាតិថ្មីរបស់ខ្លួន កាលពីខែធ្នូ ឆ្នាំ២០២២ រហូតនាំឲ្យមានការរិះគន់ ពីចិន និង រុស្ស៊ី។

ការផ្លាស់ប្ដូរឥរិយាបថ្មីដ៏គួរឲ្យកត់សម្គាល់បំផុតរបស់ក្រុងតូក្យូ នឹងអនុញ្ញាតឲ្យកងទ័ពជប៉ុន មានសមត្ថភាព វាយប្រហារប្រឆាំងនឹងហេដ្ឋារចនាសម្ព័ន្ធមីស៊ីលរបស់ប្រទេសផ្សេងៗជាអមិត្ត ប្រសិនបើវាយប្រហារមកលើទឹកដីរបស់ជប៉ុន។ លើសពីនេះទៅទៀត ឯកសារទាំងនោះ បានកំណត់ អំពីការគំរាមកំហែងពីយោធារបស់ចិន ថា ជា«ការប្រឈមមុខ ជាយុទ្ធសាស្ត្រ ដែលមិនធ្លាប់មានពីមុនមក ហើយវាជាបញ្ហាប្រឈមមុខ ជាយុទ្ធសាស្ត្រដ៏ធំបំផុត នៅក្នុងការធានាសន្តិភាព និង សន្តិសុខរបស់ប្រទេសជប៉ុន ហើយសន្តិភាព និង ស្ថិរភាព សម្រាប់សហគមន៍អន្តរជាតិ»។

ការដាក់ចេញនូវយុទ្ធសាស្ត្រសន្តិសុខជាតិ និង ផែនការការពារជាតិថ្មីដ៏ធំសម្បើមរបស់ជប៉ុន បានជំរុញឲ្យរដ្ឋាភិបាលក្រុងតូក្យូ ក្រោមការដឹកនាំរបស់លោក ហ្វូមីអូ គីស៊ីដា (Fumio Kishida) នាយករដ្ឋមន្រ្ដីជប៉ុន បាន បែងចែកថវិកា ចំនួន៤៣ពាន់ពាន់លានយ៉េន (លុយជប៉ុន) ឬស្មើនឹង ៣២៣,៤ពាន់លានដុល្លារសហរដ្ឋអាមេរិក សម្រាប់ការចំណាយ លើវិស័យការពារជាតិ ចន្លោះពីឆ្នាំ២០២៣ ដល់២០២៧ ដោយកើនឡើង រហូតដល់៥០ភាគរយ លើសពីថវិកា រយៈពេលប្រាំឆ្នាំមុននេះ។

ជាមួយនឹងការសម្រេចចិត្តបែបនេះ ជប៉ុន នឹងបង្កើននូវការទិញគ្រឿងយុទ្ធោបករណ៍ទំនើបៗ អាចវាយប្រហារ រហូតដល់ចម្ងាយ ជាង២០០០គីឡូម៉ែត្រ សម្រាប់បំពាក់ដល់កងទ័ពរបស់ខ្លួន ដើម្បីប្រឈមមុខនឹងបច្ចាមិត្ដ។ ការបង្កើតយុទ្ធសាស្រ្ដសន្ដិសុខជាតិថ្មីបែបនេះរបស់ក្រុងតូក្យូ បានកើតឡើង ចំពេលចិនកំពុងតែគំរាមកំហែង ទៅលើកោះតៃវ៉ាន់ ខណៈរុស្ស៊ី កំពុងតែបន្ដឈ្លានពាន ទៅលើអ៊ុយក្រែន និង កូរ៉េខាងជើង កំពុងតែបង្កើនមហិច្ឆតា លើអាវុធមហាប្រល័យលោក ហើយបាញ់ផ្លោងមីស៊ីលឥតឈប់ឈរ បង្កឲ្យប៉ះពាល់ដល់សន្ដិសុខ ទាំងនៅក្នុងតំបន់ និង ពិភពលោក។

កូរ៉េខាងជើង កាលពីឆ្នាំ២០២២ បានបាញ់មីស៊ីលផ្លោង ចំនួន១គ្រាប់ ហោះរំលងប្រទេសជប៉ុន ខណៈចិន បានធ្វើសមយុទ្ធយោធា ឡោមព័ទ្ធកោះតៃវ៉ាន់ ហើយបានបាញ់មីស៊ីល ចំនួន១គ្រាប់ ធ្លាក់ចូលទៅក្នុងទឹកដីរបស់ជប៉ុន ក្រោយពេលក្រុងប៉េកាំង បានខឹងសម្បា ប្រឆាំងនឹងដំណើរទស្សនកិច្ចរបស់លោកស្រី ណាន់ស៊ី ផេឡូស៊ី ខណៈនៅធ្វើជាប្រធានសភាអាមេរិក បានទៅធ្វើ ទស្សនកិច្ច នៅ តៃវ៉ាន់ ចន្លោះពីថ្ងៃទី២-៣ ខែសីហា ឆ្នាំ២០២២៕

ប្រទេសថៃ ៖ TasteAtlas ជាគេហទំព័រល្បីឈ្មោះមួយខាងម្ហូបអាហារ និងភេសជ្ជៈនៅលើពិភពលោក បានប្រកាសលទ្ធផលការចាត់ចំណាត់ថ្នាក់ «ម្ហូបអាហារឆ្ងាញ់បំផុតនៅលើពិភពលោក» ឃើញថា «សម្លផាកនែង» ជាសម្លរបស់ប្រទេសថៃ បានជាប់ចំណាត់ថ្នាក់ទី១ ជាសម្លឆ្ងាញ់ជាងគេនៅលើពិភពលោក ។

គេហទំព័រនេះក៏បានផ្តល់ហេតុផលនៃការចាត់ចំណាត់ថ្នាក់ថា សម្លផាក់នែង ជាសម្លរបស់ប្រទេសថៃមួយប្រភេទដែលមានទឹកសម្លខាប់ និងមានរសជាតិប្រៃលាយផ្អែមរបស់សណ្តែកដី ។ សម្លនេះបានដាក់បញ្ចូលគ្រឿងផ្សំជាច្រើនមុខដូចជា សាច់សត្វ ម្ទេសស្ងួត ស្លឹកក្រូចសើច ខ្ទិះដូង ជីវ៉ាន់ស៊ុយ ខ្ទឹមស ខ្ទឹមក្រហម ស្លឹកគ្រៃ ត្រប់ពុធញ៉ង និងសណ្តែកដី ។ ចំណែកសាច់សត្វដែលគេយកមកស្ល គឺគេតែងយកសាច់គោ សាច់មាន់ សាច់ទា ហើយជាទូទៅ សម្លប្រភេទនេះ គេមិនដាក់បន្លែច្រើនមុខទេ ។

លើសពីនេះ សម្លរបស់ប្រទេសថៃមួយប្រភេទទៀត ក៏បានជាប់ចំណាត់ថ្នាក់ទី៨ ជាសម្លឆ្ងាញ់ជាងគេនៅលើពិភពលោកផងដែរ គឺ «សម្លម៉ាស់ម៉ាន់» ។ គេហទំព័រ TasteAtlas បានអធិប្បាយថា ក្នុងចំណោមសម្លរបស់ថៃទាំងអស់ សម្លម៉ាស់ម៉ាន់ល្បីល្បាញបំផុត ដោយសារវាមានលក្ខណៈពិសេសដូចជា មានក្លិនឈ្ងុយខ្លាំង និងប្លែកពីគេ ។ សម្លនេះធ្វើឡើងពីគ្រឿងផ្សំដូចជា ខ្ទិះដូង សាច់សត្វ ដំឡូងបារាំង និងគ្រឿងទេសដែលគេយកទៅកូរបញ្ចូលគ្នាឱ្យឈ្ងុយ ហើយខ្ទិះដូង គឺជាគ្រឿងផ្សំសំខាន់ជាងគេ ដែលសម្លប្រភេទនេះមិនអាចខ្វះបាន ។

ខាងក្រោមនេះ គឺជាសម្លបានជាប់ចំណាត់ថ្នាក់នៅលើពិភពលោក រួមមាន ៖
១-សម្លផាកនែង ប្រទេសថៃ
២-សម្លការីបែបជប៉ុន ប្រទេសជប៉ុន
៣-សម្លម៉ាឡា ប្រទេសចិន
៤-stew សាច់គោ ប្រទេសវៀតណាម
៥-Shahi Paneer ប្រទេសឥណ្ឌា
៦-Legim ប្រទេសហៃទី
៧-សម្លការី ប្រទេសជប៉ុន
៨-សម្លម៉ាស់ម៉ាន់ ប្រទេសថៃ
៩-Keema ប្រទេសឥណ្ឌា
១០-Hunkar begendi ប្រទេសតួកគី

ប្រភព ៖ Starvingtime

ប្រទេសវៀតណាម ៖ វៀតណាមបានដាក់គោលដៅក្លាយជាប្រទេសឧស្សាហកម្មទំនើបមួយ ដែលនឹងមានសមត្ថភាពអាចប្រកួតប្រជែងក្នុងផ្នែកឧស្សាហកម្ម និងសម្រេចបាននូវតម្លៃឧស្សាហកម្មខ្ពស់នៅលើពិភពលោកក្នុងឆ្នាំ២០៣០ ខាងមុខ ។ ប្រទេសវៀតណាមបានគោលដៅនេះក្នុងផែនការមេរបស់ខ្លួន ស្តីពីការរៀបចំរចនាសម្ព័ន្ធឧស្សាហកម្ម និងពាណិជ្ជកម្ម ដែលទទួលបានការអនុម័តពីលោកនាយករដ្ឋមន្ត្រី ។

តាមរយៈផែនការមេនេះ ប្រទេសវៀតណាមសង្ឃឹមថា នឹងមានការរីកលូតលាស់ជាមធ្យមក្នុងតម្លៃបន្ថែមឧស្សាហកម្មស្មើនឹង៨,៥% ជារៀងរាល់ឆ្នាំ ហើយឧស្សាហកម្មផលិតកម្ម និងកែច្នៃស្មើប្រមាណ៣០% របស់ផលិតផលក្នុងស្រុកសរុប (GDP) នៅត្រឹមឆ្នាំ២០៣០ ។ ចំណែកកំណើនការនាំចេញប្រចាំឆ្នាំវិញ វៀតណាមបានដាក់គោលដៅពី៦% ទៅ៨% ខណៈការលក់រាយសរុបនឹងកើនឡើងពី១៣% ទៅ១៣,៥% ក្នុងមួយឆ្នាំផងដែរ ។

ក្រៅពីនេះ ប្រទេសវៀតណាមក៏មានគោលដៅសម្រេចបាននូវកំណើនផលិតកម្មប្រចាំឆ្នាំ នៅក្នុងសហគ្រាសឧស្សាហកម្មស្មើប្រមាណ៧,៥% និងមានសន្ទស្សន៍ផលិតកម្មកើនឡើងពី៨,៥% ទៅ៩% ក្នុងមួយឆ្នាំ ។ លើសពីនេះ វៀតណាមបានដាក់គោលដៅការរៀបចំរចនាសម្ព័ន្ធឧស្សាហកម្ម និងថាមពល រហូតដល់ទីផ្សារក្នុងប្រទេស រួមទាំងការបង្កើនសមាហរណកម្មនៅលើពិភពលោក ៕ ប្រភព ៖ AEC Connect