រដ្ឋធានីកៀវ៖ ស្របពេលប្រធានាធិបតីចិន បានចុះហត្ថលេខាលើភាពជាដៃគូយុទ្ធសាស្ត្រថ្មីជាមួយនឹងមេដឹកនាំវិមានក្រឹមឡាំង ហើយនាយករដ្ឋមន្រ្ដីជប៉ុន បានអញ្ជើញទៅកាន់រដ្ឋធានីកៀវ ដើម្បីបង្ហាញនូវការគាំទ្រ ដល់អ៊ុយក្រែន នោះ ចក្រភពអង់គ្លេស ក៏ប្រកាស ពីការបញ្ជូនរថក្រោះប្រយុទ្ធធុនធ្ងន់របស់ខ្លួន មានផ្ទុកកាកសំណល់អ៊ុយរ៉ានីញ៉ូម ទៅជួយក្រុងកៀវ រហូតធ្វើឲ្យលោក ពូទីន ផ្ទុះកំហឹង។

ទីភ្នាក់ងារសារព័ត៌មាន AFP ក៏ដូចជាបណ្ដាផ្សព្វផ្សាយធំៗ នៅលើពិភពលោក បានរាយការណ៍ កាលពីព្រឹក ថ្ងៃពុធ ទី២២ ខែមីនា ឆ្នាំ២០២៣ ថា លោក វ្ល៉ាឌីមៀ ពូទីន ប្រធានាធិបតីរុស្ស៊ី បានថ្កោលទោសយ៉ាងខ្លាំង ដល់ចក្រភពអង់គ្លេស ជុំវិញផែនការបញ្ជូនគ្រាប់រំសេវ មានផ្ទុកកាកសារធាតុអ៊ុយរ៉ាញ៉ូម ទៅជួយដល់ប្រទេសអ៊ុយក្រែន។ សកម្មភាពបែបនេះ នឹងធ្វើឲ្យក្រុងមូស្គូ ត្រូវតែបង្ខំចិត្ត ចាត់វិធានការឆ្លើយតបឱ្យសមាមាត្រ បកត្រឡប់ទៅវិញ។

ការព្រមានពីមេដឹកនាំវិមានក្រឹមឡាំង រូបនេះ បានកើតឡើង ក្រោយពេលលោកស្រី អានណាបែល ហ្គោលឌី (Annabel Goldie) ជាមន្ត្រីជាន់ខ្ពស់ ក្រសួងការពារជាតិអង់គ្លេស បានបញ្ជាក់ ថា គ្រាប់រំសេវមួយចំនួន សម្រាប់រថក្រោះ Challenger 2 របស់ចក្រភពអង់គ្លេស កំពុងតែត្រៀមរៀបចំ បញ្ជូនទៅកាន់ប្រទេសអ៊ុយក្រែន។ ប៉ុន្ដែនៅក្នុងចំណោមគ្រាប់រំសេវទាំងនោះ ក៏មានគ្រាប់រំសេវមួយចំនួន មានផ្ទុកកាកសារធាតុអ៊ុយរ៉ាញ៉ូម អាចបាញ់ទម្លុះរថក្រោះ ឬ រថពាសដែក យ៉ាងមានប្រសិទ្ធភាពបំផុតថែមទៀតផង។

លោកប្រធានាធិបតី ពូទីន បានថ្លែង ក្រោយជំនួបកំពូលជាមួយសមភាគីចិន លោក ស៊ី ជិនពីង កាលពីអង្គារ ថា «ប្រសិនបើវាជាការពិតមែន រុស្ស៉ី នឹងចាត់វិធានការ ឆ្លើយតបនឹងលោកខាងលិច ដែលចាប់ផ្ដើមបញ្ជូនអាវុធ មានសមាសធាតុនុយក្លេអ៊ែរ»។

ដោយឡែក ក្រសួងការពារជាតិអាមេរិក បានបញ្ជាក់ ថា មន្ទីរបញ្ចកោណ កំពុងតែពន្លឿននូវការបញ្ជូនរថក្រោះ Abrams របស់ខ្លួន ទៅកាន់ប្រទេសអ៊ុយក្រែន ដោយជ្រើសរើសយករថក្រោះស៊េរីចាស់ ប្រភេទ M1A1 ដែលត្រូវបានកែលម្អឡើងវិញ ហើយអាចនឹងត្រៀមខ្លួនឲ្យបានលឿនជាងមុន បញ្ជូនទៅកាន់តំបន់សមរភូមិ នៅក្នុងរយៈពេលពី៨ ទៅ ១០ ខែខាងមុខនេះ។ សហរដ្ឋអាមេរិក បានបង្ហាញនូវផែនការមុនដំបូង បញ្ជូនរថក្រោះ ប្រភេទ M1A2 Abrams ចំនួន៣១គ្រឿង ទៅកាន់អ៊ុយក្រែន។ ប៉ុន្តែសកម្មភាពទាំងនេះ នឹងត្រូវការចំណាយពេលវេលា រហូតដល់ទៅ១ឆ្នាំ ឬ ២ឆ្នាំ ដើម្បីផលិត និង ដឹកជញ្ជូន។

អង់គ្លេស គ្រោងនឹងបញ្ជូនគ្រាប់រថក្រោះប្រយុទ្ធធុនធ្ងន់ ប្រភេទ Challenger 2 របស់ខ្លួន មានផ្ទុកកាកសារធាតុអ៊ុយរ៉ាញ៉ូម ទៅកាន់ប្រទេសអ៊ុយក្រែន ដើម្បីបាញ់ទម្លុះរថក្រោះរបស់រុស្ស៊ី។ ការប្រកាសរបស់ចក្រភពអង់គ្លេស បាននាំឲ្យមានការថ្កោលទោសពី លោកពូទីន និង រដ្ឋមន្ត្រីការពារជាតិរបស់គាត់ គឺលោក ស៊ើរហ្គេ សយហ្គូ (Sergei Shoigu) ដោយចាត់ទុកថា ការសម្រេចចិត្តរបស់ក្រុងឡុងដ៍ កំពុងតែបោះជំហានបន្តិចម្តងៗ ឆ្ពោះទៅរកការប៉ះទង្គិចគ្នាដោយផ្ទាល់ជាមួយនឹងរុស្ស៊ី។

ស្របគ្នានឹងការប្រកាសពីការបញ្ជូនរថចម្បាំង ពីមហាអំណាចលោកខាងលិចនោះ អ៊ុយក្រែន ក៏បានបញ្ជូនរថក្រោះបន្ថែម ទៅជួយការពារទីក្រុងបាកមូត (Bakhmut) ខណៈកំពុងតែប្រយុទ្ធនឹងទាហានរុស្ស៊ី យ៉ាងក្រាញននៀល នៅលើសមរភូមិដ៏ក្ដៅគគុកនោះ។

ដោយសារតែសង្គ្រាមរបស់ក្រុងមូស្គូ កំពុងតែឆាបឆេះយ៉ាងសន្ធោសន្ធៅ នៅលើទឹកដីរបស់អ៊ុយក្រែន នោះ លោក ស៊ី ជិនពីង ប្រធានាធិបតីចិន កាលពីថ្ងៃចន្ទ បានធ្វើដំណើរទៅជួបលោក ពូទីន ទំនងជាចង់គាំទ្រដល់មេដឹកនាំវិមានក្រឹមឡាំង ដែលរងនូវការចោទប្រកាន់ពីបទឧក្រិដ្ឋកម្មសង្គ្រាម ចេញដោយតុលាការឧក្រិដ្ឋកម្មអន្ដរជាតិ (ICC)។ នៅក្នុងជំនួបកំពូលនោះ ប្រមុខរដ្ឋទាំង២ កាលពីថ្ងៃអង្គារ ក៏បានចុះហត្ថលេខាលើភាពជាដៃគូយុទ្ធសាស្ត្រថ្មី រវាងប្រទេសទាំងពីរ។ ទន្ទឹមគ្នានេះ មេដឹកនាំចិន បានអំពាវនាវឱ្យមានដំណោះស្រាយការទូត ជុំវិញសង្គ្រាមរបស់ក្រុងមូស្គូ ប្រឆាំងនឹងអ៊ុយក្រែន។

ស្របគ្នានេះ លោក ហ៊្វូមីអូ គីស៊ីដា (Fumio Kishida) នាយករដ្ឋមន្រ្ដីជប៉ុន កាលពីថ្ងៃអង្គារ ក៏បានធ្វើដំណើរជួបលោក វ៉ូឡូឌីមៀរ ហ្សេឡែនស្គី (Volodymyr Zelenskyy) នៅក្នុងរដ្ឋធានីកៀវ ដើម្បីបង្ហាញនូវការគាំទ្ររបស់ក្រុងតូក្យូ ប្រឆាំងនឹងសង្គ្រាមលុកលុយរបស់រុស្ស៊ី៕

រដ្ឋធានីវ៉ាស៊ីនតោន៖ ជាមួយនឹងការរីកចម្រើនផ្នែកបច្ចេកវិទ្យា កាន់តែខ្លាំងឡើង នាពេលបច្ចុប្បន្ននេះ នៅលើពិភពលោក ពិតជាមានតម្រូវការយ៉ាងខ្លាំង លើបន្ទះឈីប ទាំងការផលិតជាឧបករណ៍ប្រើប្រាស់ប្រចាំថ្ងៃ មានដូចជារថយន្ដជាដើម និង វិស័យយោធា ហើយសហរដ្ឋអាមេរិក មានចេតនាមិនឲ្យក្រុងប៉េកាំង មានការជឿនលឿនខ្លាំងលើវិស័យយោធា ទើបរារាំង ដល់ប្រទេសចិន មិនឲ្យទទួលបានផលប្រយោជន៍ ពីមូលនិធិឈីបរបស់ខ្លួន។

សារព័ត៌មាន BRecorder បានចេញផ្សាយ កាលពីព្រឹក ថ្ងៃពុធ ទី២២ ខែមីនា ឆ្នាំ២០២៣ ថា ក្រសួងពាណិជ្ជកម្ម សហរដ្ឋអាមេរិក កាលពីថ្ងៃអង្គារ បានចេញផ្សាយនូវច្បាប់ជាច្រើន ដែលត្រូវបានស្នើឲ្យការពារដល់មូលនិធិ មានទំហំទឹកប្រាក់ ៥២ពាន់លានដុល្លារ នៅក្នុងការផលិត និង ស្រាវជ្រាវ Semiconductor ដោយមិនឲ្យប្រទេសចិន និង ប្រទេសដទៃទៀត ប្រើប្រាស់បាន ព្រោះតែការព្រួយបារម្ភរបស់ក្រុងវ៉ាស៊ីនតោន។

លោកស្រី ហ្គីណា រ៉េម៉ុនដូ (Gina Raimondo) រដ្ឋមន្រ្ដី ក្រសួងពាណិជ្ជកម្ម សហរដ្ឋអាមេរិក បានបញ្ជាក់ ថា «ផ្លូវការពារទាំងនេះ នឹងជួយធានា ថា យើងនឹងនៅតែនាំមុខសត្រូវ នៅក្នុងរយៈពេលជាច្រើនទសវត្សរ៍ទៅមុខបន្ដទៀត»។

ក្រសួងពាណិជ្ជកម្ម សហរដ្ឋអាមេរិក គ្រោងនឹងចាប់ផ្តើមទទួលយកពាក្យសុំ នៅចុងខែមិថុនា សម្រាប់កម្មវិធីឧបត្ថម្ភធន លើការផលិត Semiconductor មានតម្លៃ ៣៩ពាន់លានដុល្លារ។ ច្បាប់នេះ ក៏បង្កើតឥណទានពន្ធ ទៅលើការវិនិយោគ រហូតដល់២៥ភាគរយ សម្រាប់ការសាងសង់រោងចក្រផលិតបន្ទះឈីប ដោយការប៉ាន់ស្មាន មានតម្លៃ២៤ពាន់លានដុល្លារ។

សំណើនេះ បានកំណត់លើអ្នកទទួលបានពីមូលនិធិរបស់សហរដ្ឋអាមេរិក សម្រាប់ការវិនិយោគ លើការពង្រីកការផលិត Semiconductor នៅក្រៅប្រទេស ជាមួយនឹងការព្រួយបារម្ភ ដូចជា ចិន និង រុស្ស៊ី។ ការកំណត់ លើអ្នកទទួលមូលនិធិនេះ នឹងលើកទឹកចិត្ត ដល់ការចូលរួម នៅក្នុងការស្រាវជ្រាវរួមគ្នា ឬ កិច្ចខិតខំប្រឹងប្រែង ផ្តល់អាជ្ញាប័ណ្ណបច្ចេកវិទ្យា ជាមួយអង្គភាពបរទេស ជុំវិញការព្រួយបារម្ភទាំងនេះ។

កាលពីខែតុលា ឆ្នាំ២០២២ ក្រសួងពាណិជ្ជកម្ម សហរដ្ឋអាមេរិក បានត្រួតពិនិត្យនូវការនាំចេញថ្មី ដើម្បីកាត់ផ្តាច់ប្រទេសចិន ចេញពីបន្ទះឈីប Semiconductor មួយចំនួន ផលិត នៅគ្រប់ទីកន្លែង នៅលើពិភពលោក ជាមួយនឹងឧបករណ៍របស់សហរដ្ឋអាមេរិក ដោយពង្រីកនូវការកាត់បន្ថយនូវភាពជឿនលឿនផ្នែកបច្ចេកវិទ្យា និង វិស័យយោធារបស់ក្រុងប៉េកាំង។

ក្រសួងពាណិជ្ជកម្ម សហរដ្ឋអាមេរិក កាលពីថ្ងៃអង្គារ បានបញ្ជាក់ថា ក្រសួងនឹងពង្រឹងនូវការគ្រប់គ្រងទាំងនោះ ដោយការតម្រឹមកម្រិតបច្ចេកវិទ្យាហាមឃាត់ សម្រាប់បន្ទះឈីប និង អង្គចងចាំ រវាងការគ្រប់គ្រងនូវការនាំចេញ និង ការការពារសន្តិសុខជាតិរបស់បន្ទះឈីប (CHIP) ហើយរួមបញ្ចូលទាំងកម្រិតរឹតត្បិត ដល់ការត្រួតពិនិត្យការនាំចេញបន្ទះឈីប៕

ប្រទេសអង់គ្លេស ៖ BBC ជាសារព័ត៌មានល្បីឈ្មោះមួយនៅប្រទេសអង់គ្លេស បានអំពាវនាវឱ្យបុគ្គលិករបស់ខ្លួនលុបកម្មវិធីល្បីឈ្មោះ TikTok របស់ប្រទេសចិន ចេញពីទូរស័ព្ទដៃរបស់ក្រុមហ៊ុននេះ ។ កាលពីពេលមុន រដ្ឋាភិបាលប្រទេសអង់គ្លេស ក៏បានហាមឃាត់មន្ត្រីរដ្ឋាភិបាលទាំងអស់ប្រើប្រាស់ TikTok ដូចគ្នាដែរ ដោយសារខ្លាចថា អាចត្រូវបានរដ្ឋាភិបាលចិនលួចយកទិន្នន័យសំខាន់ៗពីអ្នកប្រើប្រាស់ ។

បុគ្គលិករបស់សារព័ត៌មាន BBC និយាយថា BBC បានបញ្ជាទៅកាន់បុគ្គលិករបស់ខ្លួនហាមប្រើប្រាស់ TikTok នៅក្នុងឧបករណ៍សម្រាប់ធ្វើការងាររបស់សារព័ត៌មាននេះ លើកលែងតែពួកគេមានហេតុផលធ្វើអាជីវកម្មសមហេតុផល ដូចជា លេង TikTok ដើម្បីផ្សព្វផ្សាយព័ត៌មាន និងទីផ្សារ ។ ប៉ុន្តែបើមិនប្រើប្រាស់កម្មវិធីនេះក្នុងការប្រកបអាជីវកម្មទេនោះ គឺបុគ្គលិកទាំងអស់ត្រូវតែលុបកម្មវិធីនេះចេញ ហើយសារព័ត៌មាន BBC នឹងតាមដានស្ថានការណ៍បន្តទៀត ។ ចំណែកទូរស័ព្ទផ្ទាល់ខ្លួនរបស់បុគ្គលម្នាក់ៗ ពួកគេនៅតែអាចប្រើប្រាស់ TikTok បានដូចដើម ប៉ុន្តែទូរស័ព្ទទាំងនេះហាមមានទិន្នន័យផ្សេងៗពាក់ព័ន្ធនឹងការងាររបស់សារព័ត៌មាន BBC ។

សារព័ត៌មាន BBC បានហាមឃាត់បុគ្គលិកខ្លួនប្រើប្រាស់កម្មវិធី TikTok របស់ប្រទេសចិន គឺជាការផ្លាស់ប្តូរយ៉ាងឆាប់រហ័សរបស់សារព័ត៌មាននេះ ខណៈសារព័ត៌មាន BBC បានប្រើប្រាស់ TikTok សម្រាប់តភ្ជាប់ទៅកាន់ក្រុមគោលដៅថ្មីរបស់ខ្លួន ។ លើសពីនេះ សារព័ត៌មាន BBC ថែមទាំងបានរៀបចំក្រុមការងារដើម្បីគ្រប់គ្រងការងារក្នុងកម្មវិធី TikTok ទៀតផង ។ បច្ចុប្បន្ន សារព័ត៌មាន BBC News នៅក្នុងកម្មវិធី TikTok មានអ្នកតាមដានចំនួន១,២លាននាក់ ចំណែកសារព័ត៌មាន BBC មានអ្នកតាមដានចំនួន៤,៤លាននាក់ ៕ ប្រភព ៖ beartai BRIEF

អង្គការសហប្រជាជាតិ (UN) បានដាស់តឿនទៅកាន់ពិភពលោកឱ្យរួមគ្នាទប់ស្កាត់បម្រែបម្រួលអាកាសធាតុ ដោយគ្រប់គ្រងសីតុណ្ហភាពមិនឱ្យលើសពី១,៥អង្សារសេ បើមិនដូច្នោះទេ ពិភពលោកអាចប្រឈមនឹងការបំផ្លិចបំផ្លាញដោយសារការប្រែប្រួលអាកាសធាតុ (Climate Time Bomb) ។

កាលពីថ្ងៃទី២០ ខែមីនា កន្លងមក អ្នកវិទ្យាសាស្ត្រមកពីអង្គការសហប្រជាជាតិបានដាស់តឿនទៅកាន់ពិភពលោកថា ត្រូវតែនាំគ្នាបញ្ឈប់សកម្មភាពនានាដែលធ្វើឱ្យប៉ះពាល់បរិស្ថាន ដើម្បីទប់ស្កាត់ការបំផ្លិចបំផ្លាញដោយសារការប្រែប្រួលអាកាសធាតុ ។

អ្នកវិទ្យាសាស្ត្របានសំណូមពរទៅកាន់ប្រទេសនានានៅលើពិភពលោកថា ត្រូវរួមគ្នាកាត់បន្ថយការបញ្ចេញកាបូនឌីអុកស៊ីតជាសកល និងទប់ស្កាត់បម្រែបម្រួលអាកាសធាតុយ៉ាងឆាប់រហ័ស ច្បាស់លាស់ និងភ្លាមៗ ។ អ្នកវិទ្យាសាស្ត្រអះអាងថា ឧស្ម័នផ្ទះកញ្ចក់មានឥទ្ធិពលខ្លាំងបំផុតចំពោះការផ្លាស់ប្តូរអាកាសធាតុ ដែលកើតឡើងពីសកម្មភាពរបស់មនុស្ស ។

ក្រុមប្រឹក្សាអន្តរដ្ឋាភិបាលរបស់អង្គការសហប្រជាជាតិ ស្តីពីការប្រែប្រួលអាកាសធាតុបានលើកឡើងថា ប្រទេសនានានៅលើពិភពលោកត្រូវរួមគ្នាកាត់បន្ថយកាបូនឌីអុកស៊ីត និងទប់ស្កាត់គ្រប់ឧស្សាហកម្មទាំងអស់ ហើយពួកគេត្រូវគ្រប់គ្រងសីតុណ្ហភាពមិនឱ្យលើសពី១,៥អង្សារសេ ។

អ្នកវិទ្យាសាស្ត្រដាស់តឿនដែរថា បើសីតុណ្ហភាពឡើងលើសពី១,៥អង្សារសេនោះ វានឹងធ្វើឱ្យពិភពលោកកាន់តែមានគ្រោះថ្នាក់ខ្លាំង ហើយប្រឈមនឹងអាកាសធាតុមិនអាចត្រឡប់មកដូចដើមវិញបានទេ ដូចជា ផ្ទាំងទឹកកករលាយនៅប្រទេស Greenland និងតំបន់អង់តាកទិកខាងលិច ព្រមទាំងមានរលកកំដៅខ្លាំងដែលមិនធ្លាប់កើតឡើងពីមុន, គ្រោះរាំងស្ងួតកាន់តែខ្លាំង រួមទាំងការបំពុលក្នុងទឹក ក៏ដូចជាអាកាសធាតុក្តៅខ្លាំងនៅតាមតំបន់ជាច្រើនលើពិភពលោក ។ លើសពីនេះ គេសង្កេតឃើញថា ប្រជាជនពាក់កណ្តាលនៅក្នុងពិភពលោក មានហានិភ័យខ្ពស់ចំពោះវិបត្តិអាកាសធាតុ ៕ ប្រភព ៖ TNN Earth

ពេលមានផ្ទៃពោះ ស្ត្រីត្រូវការការយកចិត្តទុកដាក់ខ្លាំងបំផុត ទាំងសុខភាពផ្លូវកាយ និងផ្លូវចិត្ត ជាពិសេសរបបអាហារប្រចាំថ្ងៃ។ ព្រោះការទទួលទានរបបអាហារមិនបានត្រឹមត្រូវ អាចប៉ះពាល់ដល់ទារកក្នុងផ្ទៃ ហើយបើធ្ងន់ធ្ងរកូនអាចរលូតបាន។ ដូច្នេះហើយអាហារទាំង៦ខាងក្រោមនេះស្ត្រីដែលមានផ្ទៃពោះហាមទទួលទានជាដាច់ខាត ព្រោះអាចប៉ះពាល់ដល់សុខភាព ដែលអាហារទាំងអស់នេះមានដូចជា៖

១.អាហារមានខ្លាញ់ច្រើន៖ កាត់បន្ថយអាហារមានជាតិខ្លាញ់ច្រើន! ការទទួលទានសារធាតុចិញ្ចឹមគ្រប់គ្រាន់នៅពេលមានផ្ទៃពោះវាជារឿងល្អ។ ប៉ុន្តែមិនគួរទទួលទានអាហារដែលមានជាតិខ្លាញ់ច្រើន ពិសេសអាហារចៀន វានឹងជះផលមិនល្អចំពោះសុខភាពម៉ាក់ៗ ដោយសារអាហារប្រភេទនេះវាផ្ទុកជាតិខ្លាញ់ច្រើន វាងាយស្រួលបង្កឱ្យឡើងទម្ងន់ និងប្រឈមការកើតជំងឺទឹកនោមផ្អែមចំពោះស្ត្រីមានផ្ទៃពោះ។២.ត្រីឆ្អើរ និងគ្រឿងសមុទ្រក្លាសេ ៖ ត្រីឆ្អើរ ជាប្រភេទអាហារចម្អិនដោយផ្សែងភ្លើង ដែលបណ្តាលឲ្យមេរោគរាប់លានតោងជាប់នឹងស្រកាត្រី។ រីឯគ្រឿងសមុទ្រក្លាសេទុកយូរ ក៏មានផ្ទុកមេរោគជាច្រើន ដែលអាចធ្វើស្រ្តីមានផ្ទៃពោះរលូតកូនដែរ។៣.អាហារឆៅ៖ ស្ត្រីមានផ្ទៃពោះ មិនគួរទទួលទានអាហារឆៅ ដូចជាទឹកដោះគោឆៅ ស៊ុត សាច់ និងបន្លែដែលមិនបានចម្អិនត្រឹមត្រូវនោះទេ ព្រោះអាហារទាំងនោះអាចនឹងមានជាតិពុល ដែលអ្នកមិនដឹង។៤.ថ្លើមសត្វ៖ ថ្លើមសត្វដូចជា ថ្លើមជ្រូក ថ្លើមគោ ជាដើម សុទ្ធតែជាអាហារដែលសម្បូរជាតិពុល និងខ្លាញ់ ដែលអាចបង្ករផលប៉ះពាល់ដល់កូនក្នុងផ្ទៃ។៥.ល្ហុងខ្ចី៖ ល្ហុងខ្ចី ជាអាហារដែលអាចធ្វើឲ្យរលូតកូនបាន ព្រោះវាមានផ្ទុកអង់ស៊ីមម្យ៉ាងដែលបណ្តោលឲ្យស្បូនរបស់ស្ត្រីមានផ្ទៃពោះជួបបញ្ហាធ្ងន់ធ្ងរ។៦.ម្លាស់៖ ផ្លែម្នាស់ត្រូវបានគេប្រើ ចំពោះស្រ្តីមានផ្ទៃពោះ នៅដំណាក់កាលជិតឆ្លងទន្លេ ព្រោះវាផ្ទុកសារធាតុសំខាន់ៗមួយចំនួនអាចជួយជំរុញដល់សាច់ដុំស្បូនរបស់ស្រ្តី ឲ្យសម្រាលកូនបានស្រួល។ ផ្ទុយទៅវិញ បើអ្នកទទួលទានម្នាស់ នៅដំណាក់កាលដំបូង កូនក្នុងផ្ទៃអាចប្រឈមនឹងការរលូតគ្រប់ពេល៕ ប្រភព៖sanook