ប្រទេសថៃ ៖ សារព័ត៌មាន Bloomberg រាយការណ៍ថា លទ្ធផលការបោះឆ្នោតនៅប្រទេសថៃ កាលពីថ្ងៃទី១៤ ខែឧសភា ឆ្នាំ២០២៣ កន្លងមកបង្ហាញថា គណបក្សនយោបាយដែលគាំទ្រប្រជាធិបតេយ្យបានទទួលសំឡេងយ៉ាងច្រើនលើសលប់ក្នុងការបោះឆ្នោត ។ គេចាត់ទុកថា ការទទួលបានជ័យជម្នះនេះ ជាបញ្ហាប្រឈមដ៏ធំសម្រាប់គណបក្សនយោបាយបច្ចុប្បន្ន ដែលគាំទ្រដោយកម្លាំងយោធាធ្វើរដ្ឋប្រហារទម្លាក់រដ្ឋាភិបាលកាលពី១០ឆ្នាំមុន ។

សារព័ត៌មាននេះចុះផ្សាយថា ការរាប់សំឡេងឆ្នោតទទួលបានសំឡេង៩៧% ទាំងគណបក្សកាវក្លៃ និងគណបក្សភឿថៃ អាចទទួលបានសំឡេងឆ្នោតយ៉ាងច្រើនលើសលប់ពីពលរដ្ឋនៅទូទាំងប្រទេសថៃ ។ បើគណបក្សទាំងពីរសហការគ្នាបង្កើតរដ្ឋាភិបាលថ្មី គឺនឹងមានអាសនៈជាង២៨០ ខណៈអាសនៈទាំងអស់ស្មើ៥០០ ក្នុងសភាតំណាងរាស្ត្រ ។

មេដឹកនាំគណបក្សកាវក្លៃ លោក Pita Limjaroenrat លើកឡើងថា បើតាមសំឡេងឆ្នោតបង្ហាញថា គណបក្សកាវក្លៃ, គណបក្សភឿថៃ និងគណបក្សប្រឆាំងផ្សេងទៀតអាចបង្កើតរដ្ឋាភិបាលចម្រុះបាន ប៉ុន្តែពេលនេះ គណបក្សរបស់លោកមិនទាន់បានចរចាដើម្បីបង្កើតរដ្ឋាភិបាលចម្រុះទេ ។ លោកបន្តថា លទ្ធផលការបោះឆ្នោតនេះបញ្ជាក់យ៉ាងច្បាស់ថា ពលរដ្ឋថៃត្រូវការអ្វី ហើយគណបក្សកាវក្លៃនឹងប្រកាន់ភ្ជាប់នូវអ្វីដែលធ្លាប់បានសន្យាជាមួយពលរដ្ឋ ។

សារព័ត៌មាន Bloomberg រាយការណ៍បន្តថា ជ័យជម្នះរបស់គណបក្សកាវក្លៃ គឺជាការផ្លាស់ប្តូរយ៉ាងឆាប់រហ័សទៅលើគណបក្សនយោបាយបច្ចុប្បន្ន ដែលកាន់អំណាចអស់រយៈពេល២ទសវត្សរ៍ ។ លោក Pita Limjaroenrat មេដឹកនាំគណបក្សកាវក្លៃ បានសន្យាថា នឹងធ្វើវិសោធនកម្មច្បាប់ដែលការពាររាជានិយម ខណៈមានការរិះគន់ជាច្រើន ។ ចំណែកមេដឹកនាំគណបក្សភឿថៃ អ្នកនាង Paethongthan Shinawatra ជាកូនស្រីរបស់អតីតនាយករដ្ឋមន្ត្រីថៃ លោក Thaksin Shinawatra និងលោក Srettha Thavisin មកពីគណបក្សភឿថៃ ដែលអ្នកទាំងពីររូបបានស្ម័គ្រធ្វើជានាយករដ្ឋមន្ត្រីថៃ បាននិយាយដូចគ្នាថា នឹងផ្តោតលើការជជែកជាមួយគណបក្សនយោបាយដែលគាំទ្រលទ្ធិប្រជាធិបតេយ្យ ។

ក្រៅពីនេះ អ្វីដែលត្រូវតាមដានក្នុងការបោះឆ្នោតលើកនេះ គឺផែនការត្រឡប់មកប្រទេសថៃរបស់អតីតនាយករដ្ឋមន្ត្រីថៃ លោក Thaksin Shinawatra នៅខែកក្កដា ឆ្នាំ២០២៣ តើនឹងបង្កើតភាពតានតឹងសម្រាប់មន្ត្រីកំពូលក្នុងជួរយោធាដែរឬអត់ ? លោក Thaksin Shinawatra បានទៅរស់នៅក្រៅប្រទេសដើម្បីគេចពីការជាប់ពន្ធនាគារ ដែលគេបានចោទប្រកាន់លោកពីបទពុករលួយ បន្ទាប់ពីគេធ្វើរដ្ឋប្រហារទម្លាក់រដ្ឋាភិបាលរបស់លោកកាលពីឆ្នាំ២០០៦ ។

លើសពីនេះ ការបោះឆ្នោតនៅឆ្នាំ២០២៣ គណបក្សកាវក្លៃមានគោលនយោបាយខុសពីគណបក្សភាគច្រើន ព្រោះគណបក្សកាវក្លៃ គឺជាគណបក្សតែមួយគត់ដែលអំពាវនាវឱ្យធ្វើវិសោធនកម្មមាត្រា១១២ ដើម្បីឱ្យមានសេរីភាពច្រើនជាងមុនក្នុងការជជែកពាក់ព័ន្ធនឹងរាជវង្ស ។

សាស្ត្រាចារ្យនៅសាកលវិទ្យាល័យជូឡាឡុងកន នាទីក្រុងបាងកក លោក Thitinan Pongsudhirak និយាយថា ការបោះឆ្នោតលើកនេះ គឺជាគ្រោះរញ្ជួយដីផ្នែកនយោបាយ ហើយលទ្ធផលបោះឆ្នោតបង្ហាញឱ្យឃើញថា ពលរដ្ឋថៃចង់បានការផ្លាស់ប្តូរ ។ ទោះយ៉ាងណា កាលពីពេលថ្មីៗនេះ មេបញ្ជាការកងទ័ពថៃបានលើកឡើងថា ប្រទេសថៃនឹងមិនកើតហេតុការណ៍រដ្ឋប្រហារទៀតទេ ។

សារព័ត៌មាន Bloomberg បន្ថែមថា មិនថាអ្នកណានឹងឡើងធ្វើជានាយករដ្ឋមន្ត្រីថ្មីនៅប្រទេសថៃ គឺត្រូវបំពេញតួនាទីធ្វើឱ្យសេដ្ឋកិច្ចថៃរីកចម្រើន ខណៈបច្ចុប្បន្ន ការអភិវឌ្ឍសេដ្ឋកិច្ចរបស់ថៃ គឺយឺតជាងប្រទេសជិតខាងក្នុងតំបន់អាស៊ាន ហើយពលរដ្ឋថៃត្រូវរង់ចាំការឆ្លងផុតពីផលប៉ះពាល់នៃអតិផរណា និងបំណុលគ្រួសារខ្ពស់ ។

លើសពីនេះ មេដឹកនាំប្រទេសថៃថ្មីត្រូវប្រឈមនឹងបញ្ហាបរិស្ថានដោយសារបម្រែបម្រួលអាកាសធាតុដែលអាចបំផ្លាញទិន្នផលស្រូវរបស់កសិករ ខណៈអង្ករជាផលិតផលនាំចេញទៅក្រៅប្រទេសដ៏សំខាន់របស់ថៃ ។ ការបោះឆ្នោតនៅប្រទេសថៃ កាលពីថ្ងៃទី១៤ ខែឧសភា បានដំណើរការទៅដោយរលូន និងគ្មានអ្វីខុសប្រក្រតីទេ ហើយមានពលរដ្ឋថៃប្រមាណ៥២លាននាក់បានមកចូលរួមបោះឆ្នោត ៕

ប្រភព ៖ The standard wealth

ប្រទេសចិន ៖ ចំនួនការផលិត និងលក់រថយន្តអគ្គិសនីថ្មីរបស់ប្រទេសចិនទទួលបានចំណាត់ថ្នាក់ទី១ អស់រយៈពេល៨ឆ្នាំជាប់ៗគ្នានៅលើពិភពលោក ។ កាលពីពេលថ្មីៗនេះ គណៈកម្មាធិការមជ្ឈិមបក្សកុម្មុយនិស្តចិនបានរៀបចំការប្រជុំពិភាក្សាមួយដើម្បីសិក្សាពីស្ថានភាពសេដ្ឋកិច្ច និងការអនុវត្តផ្នែកសេដ្ឋកិច្ច ។ កិច្ចប្រជុំនេះបានឯកភាពគ្នាថា ត្រូវតែសង្កត់ធ្ងន់ និងពង្រីកការមានប្រៀបផ្នែកអភិវឌ្ឍន៍រថយន្តអគ្គិសនីថ្មី ។

បើតាមព័ត៌មានចុងក្រោយពីសហព័ន្ធឧស្សាហកម្មរថយន្តចិនបញ្ជាក់ថា ក្នុងរយៈពេល៤ខែដំបូងឆ្នាំ២០២៣ ចំនួនការផលិតរថយន្តអគ្គិសនីថ្មីរបស់ប្រទេសចិន ស្មើនឹង២.២៩១លានគ្រឿង ខណៈចំនួនការលក់សរុបស្មើ២.២២២លានគ្រឿង ។ គេសង្កេតឃើញថា ទាំងការផលិត និងការលក់បានកើនឡើង៤២,៨% បើធៀបនឹងរយៈពេលដូចគ្នានៅឆ្នាំ២០២២ ។

ចំនួនការផលិត និងការលក់រថយន្តអគ្គិសនីថ្មីនៅប្រទេសចិនទទួលបានចំណាត់ថ្នាក់ទី១ អស់រយៈពេល៨ឆ្នាំជាប់ៗគ្នានៅលើពិភពលោកទាំងផ្នែកអាជីវកម្ម និងសហគ្រាស ខណៈក្រុមផលិតរថយន្តនានាមានទំនុកចិត្តខ្ពស់ក្នុងឧស្សាហកម្មនេះ និងមានគំនិតបង្កើតថ្មីផងដែរ ។

តាមទិន្នន័យចុងក្រោយរបស់នាយកដ្ឋានថាមពលជាតិចិនបញ្ជាក់ថា នៅឆ្នាំ២០២២ គេបានដំឡើងស្ថានីយសាកថ្មរថយន្តអគ្គិសនីបន្ថែមទៀតប្រមាណ២,៦០លានគ្រឿងនៅប្រទេសចិន ។ ការដំឡើងស្ថានីយសាកថ្មរថយន្តអគ្គិសនីនេះ បានធ្វើឱ្យទូទាំងប្រទេសចិនមានស្ថានីយសាកថ្មរថយន្តអគ្គិសនីចំនួន៥,២០លានគ្រឿង ។ ប្រទេសចិនបាននាំមុខគេផ្នែកប្រព័ន្ធសាកថ្មរថយន្តអគ្គិសនីដើម្បីសម្រួលដល់ការទិញ និងការប្រើប្រាស់រថយន្តប្រភេទនេះ ព្រមទាំងបង្ហាញពីសក្តានុពលក្នុងការប្រើប្រាស់រថយន្តអគ្គិសនីនៅលើពិភពលោកផងដែរ ៕ ប្រភព ៖ China face

លោកស្រី Linda Jacarino បានចេញសេចក្តីថ្លែងការណ៍មួយតាមប្រព័ន្ធ Twitter ជាលើកដំបូង ក្រោយពីលោកស្រីត្រូវបានគេតែងតាំងជានាយកប្រតិបត្តិថ្មីរបស់ក្រុមហ៊ុន Twitter ។ លោកស្រីនិយាយថា លោកស្រីមានការជំរុញលើកទឹកចិត្តពីលោក Elon Musk ហើយលោកស្រីនឹងដឹកនាំក្រុមហ៊ុននេះឱ្យកាន់តែល្អឡើងនាថ្ងៃអនាគត ។

សារព័ត៌មានរ៉យទ័ររាយការណ៍ថា លោកស្រី Linda Jacarino បាននិយាយក្នុងសារព័ត៌មានលើកដំបូង ក្រោយពីមានព័ត៌មានថា លោកស្រីត្រូវបានគេឱ្យកាន់តំណែងជានាយកប្រតិបត្តិថ្មីរបស់ក្រុមហ៊ុន Twitter ។ លោកស្រីនិយាយថា ៖ «ខ្ញុំមានការជំរុញ និងលើកទឹកចិត្តពីលោក Elon Musk ថា ត្រូវតែបង្កើតអនាគតដ៏ស្រស់ថ្លាបន្ថែមទៀតសម្រាប់ក្រុមហ៊ុន Twitter ។ ខ្ញុំមានអារម្មណ៍ភ្ញាក់ផ្អើលជាខ្លាំងដែលមានឱកាសបានធ្វើជានាយកប្រតិបត្តិក្រុមហ៊ុននេះ ហើយខ្ញុំសន្យាថា នឹងកែលម្អអាជីវកម្មនេះឱ្យកាន់តែល្អប្រសើរឡើងផងដែរ» ។

លោកស្រី Linda Jacarino អតីតប្រធានផ្នែកផ្សាយពាណិជ្ជកម្មរបស់ NBC Universal ក្នុងក្រុមហ៊ុន Comcast Corp. និងជាអ្នកដែលបានចំណាយពេលវេលាជាច្រើនក្នុងការកែលម្អអាជីវកម្មផ្សាយពាណិជ្ជកម្មឱ្យមានភាពទំនើបប្រាប់ថា លោកស្រីនឹងប្តេជ្ញាចិត្តបំពេញការងារនេះដើម្បីអនាគតក្រុមហ៊ុន Twitter និងបំពេញតម្រូវការរបស់អ្នកប្រើប្រាស់ ដែលមានភាពសំខាន់សម្រាប់ការកែលម្អក្រុមហ៊ុន ។

មុននេះ លោក Elon Musk ធ្លាប់បាននិយាយថា ក្រុមហ៊ុន Twitter នឹងមានការគ្រប់គ្រងច្រើនវិធី ដូចជា សេវាផ្ទេរប្រាក់ ហើយលោកស្រី Linda Jacarino នឹងជួយអភិវឌ្ឍន៍ការងារទាំងអស់នេះ ។ នាយកប្រតិបត្តិថ្មីដែលមានបទពិសោធន៍ច្រើនផ្នែកផ្សព្វផ្សាយពាណិជ្ជកម្ម ដែលលោក Elon Musk បានជ្រើសរើសមកនេះ បានចង្អុលបង្ហាញថា ការផ្សាយពាណិជ្ជកម្មឌីជីថលអាចជាការងារដ៏សំខាន់សម្រាប់ដំណើរការអាជីវកម្មបន្តទៅមុខទៀត ។

លោក Elon Musk ក៏បានកាន់តំណែងជា CEO របស់ក្រុមហ៊ុនផលិតរថយន្តអគ្គិសនី Tesla ផងដែរ បានប្រកាសកាលពីថ្ងៃទី១២ ខែឧសភា ថា ការតែងតាំងលោកស្រី Linda Jacarino ជានាយកប្រតិបត្តិថ្មីរបស់ក្រុមហ៊ុន Twitter គឺជួយឱ្យលោកមានពេលវេលាគ្រប់គ្រងក្រុមហ៊ុន Tesla កាន់តែច្រើនជាងមុន ៕ ប្រភព ៖ bangkokbiznews

មន្ទីរពេទ្យមិត្តភាពខ្មែរសូវៀត (ពេទ្យរុស្សី) បានធ្វើការជូនដំណឹងដល់សាធារណជនថា ផ្នែកចក្ខុរោគ នៃមន្ទីរពេទ្យមិត្តភាពខ្មែរ-សូវៀត បានសហការជាមួយកម្មវិធីជាតិសុខភាពភ្នែក និងក្រុមគ្រូពេទ្យមកពីប្រទេសអូស្ត្រាលី នឹងផ្ដល់ជូនការពិនិត្យ និងព្យាបាលជំងឺទឹកដក់ក្នុងភ្នែករយៈពេល៥ថ្ងៃដោយឥតគិតថ្លៃចាប់ពីថ្ងៃទី២២ រហូតដល់ថ្ងៃទី២៦ ខែឧសភា ឆ្នាំ២០២៣។ ការជូនដំណឹងនេះធ្វើឡើងនៅថ្ងៃទី១១ ខែឧសភា ឆ្នាំ២០២៣។

គួរជម្រាបជូនថា តាមការឱ្យដឹងពីមន្ទីរពេទ្យកាល់ម៉ែត ទឹកដក់ក្នុងភ្នែក គឺជាជំងឺមួយក្នុងចំណោមជំងឺភ្នែកដទៃទៀតជាច្រើន ដែលបណ្ដាលឱ្យខូចសរសៃបាតភ្នែក បាត់បង់ដែនគំហើញ និងវិវត្តទៅរកពិការភ្នែកបើយើងមិនបានព្យាបាលត្រឹមត្រូវ និងទាន់ពេល។

ជំងឺនេះបណ្ដាលមកពីការកើនឡើងនៃអាយុ ទឹកនោមផ្អែម ឈាមបាតភ្នែក ស្ត្រីកើតច្រើនជាងបុរស និងការមានរបួសភ្នែក។ ដោយឡែក សម្រាប់រោគសញ្ញាវិញមានដូចជា ឈឺក្បាលខ្លាំង ក្អួតចង្អោរ ឈឺចាប់ក្នុងភ្នែកខ្លាំង គំហើញថយចុះ បាត់បង់ដែនគំហើញ ភ្នែកក្រហម កូនក្រមុំរីក និងសម្ពាធទឹកនៅក្នុងភ្នែកកើនឡើង និងមានរោគសញ្ញាផ្សេងៗទៀត៕

ប្រទេសចិន ៖ វិធានការហាមឃាត់ការនេសាទប្រចាំឆ្នាំរបស់ប្រទេសចិន បានចាប់ផ្តើមអនុវត្តតាំងពីថ្ងៃទី១ ខែឧសភា ឆ្នាំ២០២៣ មកម៉្លេះ ។ ប្រទេសនេះបានហាមឃាត់ការនេសាទនៅសមុទ្រភាគខាងជើង, ភាគខាងកើត និងភាគខាងត្បូង ហើយវិធានការហាមឃាត់នេះបានគ្របដណ្តប់លើសមុទ្របូហៃ, សមុទ្រលឿង, សមុទ្រចិនខាងកើត និងផ្នែកខ្លះរបស់សមុទ្រចិនខាងត្បូង ។ ប្រទេសចិនមានទូកនេសាទប្រមាណ១២ម៉ឺនគ្រឿង និងអ្នកនេសាទជាង១លាននាក់ ។

មន្ត្រីការិយាល័យជលផលនៃក្រសួងកសិកម្ម និងកិច្ចការជនបទ បានថ្លែងថា នៅរដូវផ្ការីក និងរដូវក្តៅ គឺជាអំឡុងពេលនៃការបង្កាត់ពូជ និងការលូតលាស់របស់សត្វរស់នៅក្នុងទឹកសមុទ្រ ។ វិធានការហាមឃាត់ការនេសាទនៅរដូវក្តៅ វានឹងជួយការពារសត្វរស់នៅក្នុងទឹក ក៏ដូចជាជួយស្តារប្រព័ន្ធអេកូឡូស៊ីផងដែរ ។

នៅរដូវក្តៅឆ្នាំ២០២៣នេះ ក្រសួងកសិកម្ម និងកិច្ចការជនបទបានកែលម្អវិធានការមួយចំនួន ក្នុងនោះក្រសួងអនុញ្ញាតឱ្យទូកនេសាទ និងទូកប្រើប្រាស់ឧបករណ៍បុរាណអាចចាប់ត្រីនៅសមុទ្របានធម្មតា ។

ក្នុងអំឡុងពេលហាមឃាត់ការនេសាទនេះ ការស្វែងរកអាហារតាមសមុទ្រភាគច្រើនជាប្រភេទអាហារក្លាស្សេ និងអាហារសមុទ្រដែលគេចិញ្ចឹម ។ បច្ចុប្បន្ន ការផ្គត់ផ្គង់អាហារសមុទ្រនៅតាមទីផ្សារនៅទូទាំងប្រទេសចិន គឺគ្រប់គ្រាន់ជាមួយនឹងតម្លៃនៅដដែល ៕ ប្រភព ៖ China Face

ប្រទេសថៃ ៖ អនុសេនីយ៍ឯក Sombat Banchamek ឬ បួ ខាវ គឺជាកំពូលកីឡាករប្រដាល់ល្បីល្បាញមួយរូបប្រចាំប្រទេសថៃ បានខឹងសម្បារជាខ្លាំង និងទទួលយកមិនបាន ដោយសារវែបសាយភ្នាល់អនឡាញមួយបានយករូបភាពរបស់ខ្លួនទៅបបួលឱ្យពលរដ្ឋ និងយុវវ័យថៃឱ្យងាកមកលេងភ្នាល់តាមអនឡាញយ៉ាងបើកចំហ ។

បួ ខាវ មានអាយុ៤១ឆ្នាំ ជាកីឡាករប្រដាល់ដែលមានការស្រឡាញ់ចូលចិត្តពីពលរដ្ឋថៃគ្រប់ស្រទាប់ បានត្រៀមខ្លួនដាក់ពាក្យបណ្តឹងវែបសាយភ្នាល់តាមអនឡាយមួយ ដែលយករូបភាពរបស់ខ្លួនទៅផ្សព្វផ្សាយពាណិជ្ជកម្ម ។ បួ ខាវ បញ្ជាក់ថា ខ្លួនបានមិនជាប់ពាក់ព័ន្ធនឹងវែបសាយភ្នាល់ណាមួយទេ ។

អ្នកគាំទ្រ Muay Thai និងជនបរទេសបានស្គាល់ពីកេរ្តិ៍ឈ្មោះរបស់កីឡាករ បួ ខាវ តាំងពីកីឡាកររូបនេះបានទទួលជើងឯក K-1 World MAX ចំនួន២ដង កាលពីឆ្នាំ២០០៤ និងឆ្នាំ២០០៦ ។ លើសពីនេះ រូបគេបានទៅប្រដាល់ក្នុងសង្វៀនប្រដាល់ជាច្រើននៅប្រទេសនានាលើពិភពលោក ហើយបានធ្វើឱ្យវែបសាយភ្នាល់យករូបភាពរបស់កំពូលកីឡាករប្រដាល់រូបនេះទៅផ្សព្វផ្សាយ ក្នុងគោលបំណងទាក់ទាញឱ្យពលរដ្ឋ និងយុវវ័យថៃជឿតាម ហើយងាកមកលេងល្បែងភ្នាល់តាមអនឡាញ ។ ដូច្នេះ គេចាត់ទុកថា ការប្រព្រឹត្តរបស់វែបសាយភ្នាល់នឹងបង្កគ្រោះថ្នាក់ដល់ក្មេងជំនាន់ក្រោយ ក៏ដូចជាប៉ះពាល់ដល់សន្តិសុខជាតិផងដែរ ។

បួ ខាវ ក្រៅពីមានតួនាទីជាកីឡាករហើយ រូបគេក៏ជាប្រធានដឹកនាំការផ្សព្វផ្សាយសិល្បៈ Muay Thai ទៅដល់កងទ័ពផងដែរ ។ បួ ខាវ ធ្លាប់ជាគ្រូបង្វឹកដល់កងទ័ពអាមេរិកក្នុងកម្មវិធីបណ្តុះបណ្តាល Cobra Gold 2023 រវាងកងទ័ពអាមេរិក និងកងទ័ពថៃ កាលពីដើមឆ្នាំ២០២៣ ហើយ បួ ខាវ ក៏ជាប្រធានគ្រប់គ្រងក្រុមប្រដាល់ជម្រើសជាតិថៃ ក្នុងការប្រកួតកីឡាស៊ីហ្គេម លើកទី៣២ នៅប្រទេសកម្ពុជា ៕

ប្រភព ៖ MGR Sport