សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា ព្រឹត្តិការណ៍ស៊ីហ្គេម ប្រជាជនបានផ្លាស់ប្តូរឥរិយាបថពីការពង្រាយសំរាមទៅជាការបោសសំរាមដើម្បីស្អាតទាំងអស់គ្នា។ សម្តេចថ្លែងបែបនេះ នៅក្នុងពិធីប្រគល់សញ្ញាបត្រជូនដល់និស្សិតជ័យលាភី នៃសាកលវិទ្យាល័យភូមិន្ទកសិកម្ម,វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាមនាថ្ងៃទី១៥ ខែឧសភា ឆ្នាំ២០២៣។
សម្តេចបានគូសបញ្ជាក់ថា «យុវជនស្ម័គ្រចិត្តរាប់ពាន់នាក់បានជួយធ្វើការសំអាតយ៉ាងភ្លឹង ហើយប្រជាជននៅភ្នំពេញក៏ដូចជាទីកន្លែងប្រកួតទាំងអស់ ប្រជាជនបានផ្លាស់ប្តូរឥរិយាបថពីការពង្រាយសំរាមទៅជាការបោសសំរាមដើម្បីស្អាតទាំងអស់គ្នា កម្ពុជាស្អាត កម្ពុជាទទួលភ្ញៀវបានល្អ ចឹងទេពិតជាធ្វើឱ្យខ្ញុំសប្បាយរីករាយ…»។
បន្ថែមពីលើនេះ សម្តេច តេជោ បានថ្លែងទៀតថា ប្រជាជនទូទៅចេះមើលកីឡា មានអ្នកមកពីតាមបណ្តាខេត្តចេញពីមើលកន្លែងមួយចូលកន្លែងមួយដោយសារទីតាំងប្រកួតនៅភ្នំពេញមានច្រើនកន្លែង ក្រៅពីនេះ ប្រជាជនបានមើលតាមការរៀបចំរបស់អជ្ញាធរ និងបណ្តាញផ្សព្វផ្សាយនានាដែលជាចំណុចល្អប្រសើរ៕
