ប្រទេសចិន ៖ អ្នកនាំពាក្យក្រសួងការបរទេសប្រទេសចិនបានថ្លែងថា រដ្ឋាភិបាលចិនមិនធ្លាប់កំណត់ឱ្យក្រុមហ៊ុននានា ឬបុគ្គលណាម្នាក់ប្រមូលព័ត៌មានពីក្រៅប្រទេស ក្នុងលក្ខណៈរំលោភច្បាប់របស់ប្រទេសទាំងនោះមកឱ្យរដ្ឋាភិបាលចិនទេ សូម្បីតែម្តង ។

អ្នកនាំពាក្យក្រសួងការបរទេសចិនបញ្ជាក់ថា រដ្ឋាភិបាលចិនបានប្រកាន់ខ្ជាប់ និងយកចិត្តទុកដាក់យ៉ាងខ្លាំងចំពោះការការពារទិន្នន័យផ្ទាល់ខ្លួនរបស់អ្នកប្រើប្រាស់ TikTok ។ ប្រទេសចិនបានបញ្ជាក់បែបនេះ ក្រោយពីកម្មវិធីល្បីល្បាញឈ្មោះ TikTok កំពុងត្រូវបានរដ្ឋាភិបាលអាមេរិកហាមឃាត់ពលរដ្ឋរបស់ខ្លួនប្រើប្រាស់កម្មវិធីនេះនៅអាមេរិក ដោយអាមេរិកអះអាងថា កម្មវិធីនេះបានប្រមូលយកទិន្នន័យផ្ទាល់ខ្លួនពីអ្នកប្រើប្រាស់ រួចបញ្ជូនទៅឱ្យរដ្ឋាភិបាលចិន ដែលនាំឱ្យប៉ះពាល់ដល់សន្តិសុខជាតិរបស់អាមេរិក ។

រហូតមកដល់ពេលនេះ រដ្ឋាភិបាលអាមេរិកនៅតែមិនអាចរកភស្តុតាងមកបញ្ជាក់ពីការចោទប្រកាន់នេះទេ ហើយកាលពីថ្ងៃទី២៤ ខែមីនា កន្លងមក លោក Soo Zhi Zhou ជនជាតិសិង្ហបុរី មានអាយុ៤០ឆ្នាំ ជានាយកគ្រប់គ្រងក្រុមហ៊ុន TikTok បានចូលមកស្រាយបំភ្លឺនៅរដ្ឋសភាអាមេរិក ។ ក្នុងរយៈពេល៥ម៉ោងនៃការបកស្រាយរបស់លោក Soo Zhi Zhou នោះ សមាជិកសភាតំណាងរាស្ត្រអាមេរិកបានសួរសំណួរជាច្រើនពាក់ព័ន្ធនឹងទំនាក់ទំនងរវាងក្រុមហ៊ុនលោកជាមួយប្រទេសចិន និងគ្រោះថ្នាក់នឹងកើតមានចំពោះកុមារ និងយុវវ័យ ។

លោក Soo Zhi Zhou នៅតែបញ្ជាក់យ៉ាងច្បាស់លាស់ថា ក្រុមហ៊ុន ByteDance ដែលជាក្រុមហ៊ុនមេរបស់ TikTok មិនស្ថិតនៅក្រោមការគ្រប់គ្រងរបស់រដ្ឋាភិបាលចិនឡើយ ដោយសារតែ TikTok គឺជាក្រុមហ៊ុនឯកជន ៕ ប្រភព ៖ Mono News

ប្រទេសលុចសំបួរ ៖ ប្រទេសលុចសំបួរបានអំពាវនាវឱ្យប្រធានាធិបតីអាមេរិក លោក ចូ បៃដិន និងប្រធានាធិបតីចិន លោក ស៊ី ជិនពីង គួរតែជួបគ្នាហើយបង្កើតផែនការសន្តិភាពនៅប្រទេសអ៊ុយក្រែនរួមគ្នា ។ ដូច្នេះ វានឹងធ្វើឱ្យផែនការសន្តិភាពនៅអ៊ុយក្រែនមានការទទួលស្គាល់ពីគ្រប់ភាគីទាំងអស់ ជាជាងប្រទេសចិនធ្វើតែឯង ។

នាយករដ្ឋមន្ត្រីប្រទេសលុចសំបួរ លោក Javier Bethel បានថ្លែងបែបនេះមុនពេលកិច្ចប្រជុំកំពូលមេដឹកនាំសហភាពអឺរ៉ុប (EU) នៅទីក្រុងប្រ៊ុចសែល ប្រទេសបែលហ្សិក កាលពីថ្ងៃទី២៣ ខែមីនា កន្លងមក ។ លោកបានអំពាវនាវឱ្យលោក ចូ បៃដិន និងលោក ស៊ី ជិនពីង គួរតែជួបមុខគ្នាម្តងដើម្បីពិភាក្សាពីការធ្វើផែនការសន្តិភាពនៅអ៊ុយក្រែនរួមគ្នា ។ បើមេដឹកនាំប្រទេសទាំងពីរអាចធ្វើបែបនេះបាន វានឹងធ្វើឱ្យផែនការសន្តិភាពអ៊ុយក្រែនមានការទទួលស្គាល់ច្រើនពីគ្រប់ប្រទេស ជាពិសេស ប្រទេសរុស្ស៊ី និងអ៊ុយក្រែន ដែលជាតួឯកក្នុងរឿងនេះ ។

លោក Javier Bethel ចង្អុលបង្ហាញថា បើអាចធ្វើឱ្យប្រទេសផ្សេងទៀតចូលរួមធ្វើផែនការសន្តិភាពនេះជាមួយអាមេរិក និងចិននោះវារឹតតែប្រសើរ និងអាចឱ្យភាគីទាំងអស់យល់ស្របកាន់តែច្រើន ព្រោះបើប្រទេសចិនធ្វើផែនការសន្តិភាពតែឯងនោះ ប្រទេសនៅអឺរ៉ុប និងប្រទេសផ្សេងទៀតនឹងនិយាយថា ផែនការសន្តិភាពនេះមានបញ្ហា ហើយបើជាផែនការសន្តិភាពរបស់អាមេរិកវិញ ប្រទេសផ្សេងៗនិយាយថា មានបញ្ហាដូចគ្នា ។ ហេតុនេះហើយទើបលោកស្នើឱ្យទាំងអាមេរិក និងចិន គួរតែប្រជុំជាមួយគ្នាម្តងដើម្បីបង្កើតផែនការសន្តិភាពរួមគ្នា ដែលនេះជាវិធីល្អបំផុតសម្រាប់ប្រទេសទាំងអស់ទទួលស្គាល់ ។

ចំណែកកិច្ចប្រជុំកំពូលរបស់មេដឹកនាំសហភាពអឺរ៉ុប (EU) កាលពីថ្ងៃទី២៣ ខែមីនា មានលោក Antonio Guterres អគ្គលេខាធិការអង្គការសហប្រជាជាតិបានចូលរួមប្រជុំផងដែរ ។ កិច្ចប្រជុំនេះបានអនុម័តផែនការផ្គត់ផ្គង់គ្រាប់កាំភ្លើងធំបន្ថែមទៀតដល់អ៊ុយក្រែននៅឆ្នាំ២០២៤ ព្រមទាំងពិភាក្សាគ្នាពីបញ្ហាសន្តិសុខស្បៀង និងវិធានការទាក់ទណ្ឌកម្មប្រទេសរុស្ស៊ី និងបេឡារុស ៕ ប្រភព ៖ TNN World

រដ្ឋាករទឹកស្វយ័តក្រុងភ្នំពេញបានចេញសេចក្តីជូនដំណឹងនៅថ្ងៃទី២៤ ខែមីនា ឆ្នាំ២០២៣នេះថា ប្រជាពលរដ្ឋដែលមានលំនៅដ្ឋាន ស្ថិតនៅក្នុងភូមិសាស្ត្រ សង្កាត់ទឹកថ្លា ខណ្ឌសែនសុខ និងសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ នឹងដាច់ទឹកប្រើប្រាស់ពេលយប់រយៈពេលខ្លីចំនួន៨ម៉ោងនៅយប់ ថ្ងៃពុធ ទី២៩ ខែមីនា ឆ្នាំ២០២៣ ដោយសារក្រុមការងាររដ្ឋាករទឹក នឹងធ្វើការជីកកាត់តភ្ជាប់បំពង់មេនាំទឹក។

ក្នុងសេចក្តីជូនដំណឹងដដែលបានឱ្យដឹងទៀតថា ការផ្អាកការផ្គត់ផ្គង់ទឹកមួយរយៈពេលប្រមាណជា០៨ម៉ោង គឺចាប់ពី ម៉ោង២០:០០ នាទីយប់ ដល់ម៉ោង ០៤:០០នាទីទៀបភ្លឺ នឹងអាចធ្វើឱ្យគុណភាពទឹកមានភាពល្អក់កករបន្តិច បន្តិចក្រោយពេលធ្វើការកាត់ភ្ជាប់បំពង់មេនេះរួច។ ក្នុងនោះដែរ រដ្ឋាករទឹកសូមឱ្យពលរដ្ឋនៅទីតាំងខាងលើ ត្រៀមបម្រុងទឹកសម្រាប់ប្រើប្រាស់ក្នុងរយៈពេលដែលផ្អាកការផ្តត់ផ្គង់។

គួរបញ្ជាក់បន្ថែមផងដែរថា នៅយប់ថ្ងៃសុក្រ ទី២៤ ខែមីនា ឆ្នាំ២០២៣ រដ្ឋាករទឹកគ្រោងកាត់ភ្ជាប់បំពង់មេនាំទឹកស្អាតទំហំ ៨០០មម ទៅ ២៥០មម នៅលើផ្លូវលេខ៥៥P នៅសង្កាត់គោកឃ្លាង ខណ្ឌសែនសុខ រាជធានីភ្នំពេញ។
-យប់ថ្ងៃសុក្រ ទី៣១ ខែមីនា ឆ្នាំ២០២៣ គ្រោងកាត់ភ្ជាប់បំពង់ចែកចាយទឹកស្អាតថ្មីទំហំ ១៦០មម នៅលើផ្ឡុវលេខ៦០ D សង្កាត់ព្រៃស ខណ្ឌដង្កោ រាជធានីភ្នំពេញ។
-យប់ថ្ងៃពុធ ទី២៩ ខែមីនា ឆ្នាំ២០២៣ គ្រោងកាត់ភ្ជាប់បំពង់ចែកចាយទឹកស្អាតថ្មីទំហំ ៦៣មម នៅលើផ្លូវលេខ៣៦៩ សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។
-យប់ថ្ងៃព្រហស្បតិ៍ ទី៣០ ខែមីនា ឆ្នាំ២០២៣ គ្រោងកាត់ភ្ជាប់បំពង់ចែកចាយទឹកស្អាតថ្មីទំហំ ១៦០មម នៅលើផ្ឡុវលេខ២៩CC កែងនឹងផ្លូវលេខ១៤២CC សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។

-យប់ថ្ងៃពុធ ទី២៩ ខែមីនា ឆ្នាំ២០២៣ គ្រោងកាត់ភ្ជាប់បំពង់ចែកចាយទឹកស្អាតថ្មីទំហំ ៦០០មម នៅលើផ្ឡុវលេខ១១០ កែងនឹងផ្លូវលេខ៥៥P សង្កាត់ទឹកថ្លា ខណ្ឌសែនសុខ រាជធានីភ្នំពេញ៕

សហរដ្ឋអាមេរិក ៖ មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិកបង្ហាញថា អាមេរិកបានប្រទះឃើញជំងឺមួយប្រភេទឈ្មោះ Candida auris ដែលវាបានឆ្លងរាលដាលយ៉ាងខ្លាំងក្លា និងឆាប់រហ័សនៅអាមេរិក ។ ជាក់ស្តែង កាលពីឆ្នាំ២០២១ កន្លងមក គេបានរកឃើញអ្នកឆ្លងជំងឺនេះកើនឡើង២ដងឯណោះ គឺពីចំនួន៧៥៦នាក់ រហូតដល់១.៤៧១នាក់ ។

គេរកឃើញអ្នកឆ្លងជំងឺ Candida auris នៅអាមេរិកជាលើកដំបូងកាលពីឆ្នាំ២០១៦ ហើយអ្នកមានសុខភាពរឹងមាំនឹងមិនឆ្លងជំងឺនេះទេ ប៉ុន្តែសម្រាប់អ្នកមានសុខភាពខ្សោយ ឬអ្នកជំងឺសម្រាកនៅលើគ្រែ ដែលត្រូវប្រើប្រាស់ឧបករណ៍ជំនួយក្នុងការដកដង្ហើម ឬប្រើទុយោបញ្ចូលក្នុងរាងកាយ គឺពួកគេងាយនឹងឆ្លងជំងឺនេះណាស់ ហើយធ្វើឱ្យពួកគេកាន់តែមានអាការៈធ្ងន់ធ្ងរ រហូតដល់ស្លាប់បាន ។ ដូច្នេះ វានឹងធ្វើឱ្យជំងឺនេះឆ្លងទៅក្នុងសរសៃឈាម ប្រព័ន្ធដកដង្ហើម និងប្រព័ន្ធប្រសាទ ។

មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិកបានអំពាវនាវទៅកាន់មជ្ឈមណ្ឌលថែទាំមនុស្សចាស់នានា ត្រូវរួមគ្នាការពារ និងទប់ស្កាត់ការឆ្លងរាលដាលនៃជំងឺ Candida auris ដោយសារវាអាចឆ្លងរាលដាលកាន់តែខ្លាំងក្នុងអំឡុងពេលជំងឺកូវីដ-១៩ រាតត្បាត និងពិបាកព្យាបាល ៕ ប្រភព ៖ Mono News

ប្រទេសកូរ៉េខាងជើង ៖ សារព័ត៌មានកូរ៉េខាងជើង KCNA បានរាយការណ៍នៅថ្ងៃទី២៤ ខែមីនាថា ប្រទេសកូរ៉េខាងជើងបានសាកល្បងដ្រូនបំពាក់ក្បាលគ្រាប់នុយក្លេអ៊ែរថ្មីមួយទៀត ដែលវាអាចវាយប្រហារក្រោមទឹកបាន ។ ការសាកល្បងដ្រូននេះក្រោមការណែនាំរបស់មេដឹកនាំកំពូលកូរ៉េខាងជើង លោក គឹម ជុងអ៊ុន ខណៈនាវាវាយប្រហារតាមផ្លូវទឹករបស់អាមេរិកបានធ្វើដំណើរមកដល់ប្រទេសកូរ៉េខាងត្បូង ដើម្បីធ្វើសមយុទ្ធរួមគ្នាជាមួយកូរ៉េខាងត្បូង ។

សារព័ត៌មាន KCNA បានរាយការណ៍ទៀតថា កូរ៉េខាងជើងបានបាញ់មីស៊ីលក្នុងអំឡុងពេលសាកល្បងអាវុធ និងហ្វឹកហាត់បាញ់អាវុធ ដែលធ្វើឡើងចាប់ពីថ្ងៃទី២១ ដល់ថ្ងៃទី២៣ ខែមីនា ។ ក្នុងការហ្វឹកហាត់លើកនេះ ដ្រូនរបស់កូរ៉េខាងជើងអាចនៅក្នុងទឹកបានរយៈពេលជាង៥៩ម៉ោង ហើយវាបានផ្ទុះនៅក្នុងដែនទឹកនៅឆ្នេរសមុទ្រភាគខាងកើតកាលពីថ្ងៃទី២៣ ខែមីនា កន្លងមក ប៉ុន្តែ សារព័ត៌មាន KCNA មិនបានផ្តល់ព័ត៌មានលម្អិតអំពីសមត្ថភាពផ្នែកនុយក្លេអ៊ែររបស់ដ្រូននេះទេ ។

សារព័ត៌មាន KCNA បញ្ជាក់ថា ការបង្កើតដ្រូនវាយប្រហារក្រោមទឹក គឺកូរ៉េខាងជើងមានគោលបំណងដើម្បីទប់ទល់នឹងការវាយប្រហារតាមដែនទឹករបស់សត្រូវ ហើយវាអាចកំទេចកងនាវា និងកំពង់ផែផ្សេងៗបាន ។ ដ្រូននេះនឹងប្រើប្រាស់ជាជំនួយក្នុងការប្រតិបត្តិការជាចម្បង ហើយវាអាចប្រចាំការនៅឆ្នេរសមុទ្រ និងកំពង់ផែណាមួយ ឬអូសដោយកប៉ាល់នៅលើផ្ទៃទឹកដើម្បីបើកការប្រយុទ្ធគ្នាក៏បាន ។

កូរ៉េខាងជើងបានបញ្ជាក់ដែរថា ខ្លួនបានបាញ់មីស៊ីលចំនួន៤គ្រាប់កាលពីថ្ងៃទី២២ ខែមីនា ដើម្បីអនុវត្តបេសកកម្មវាយប្រហារនុយក្លេអ៊ែរជាយុទ្ធសាស្ត្រ ។ មីស៊ីលនេះភ្ជាប់ជាមួយក្បាលគ្រាប់នុយក្លេអ៊ែរ ហើយអាចហោះបានក្នុងចម្ងាយពី១.៥០០គីឡូម៉ែត្រ ទៅ១.៨០០គីឡូម៉ែត្រ ។ កូរ៉េខាងជើងលើកឡើងថា ការសាកល្បងអាវុធ និងការហ្វឹកហាត់ជាលើកចុងក្រោយនេះមិនបានធ្វើឱ្យប៉ះពាល់ដល់សន្តិសុខរបស់ប្រទេសជិតខាងទេ ។ ចំណែកប្រទេសកូរ៉េខាងត្បូងវិញបាននិយាយថា កូរ៉េខាងជើងបានបាញ់មីស៊ីលចំនួន៤គ្រាប់ពីឆ្នេរសមុទ្រភាគខាងកើត កាលពីថ្ងៃទី២២ ខែមីនា កន្លងមក ៕ ប្រភព ៖ TNN World

នាយកប្រតិបត្តិថ្មីរបស់ Starbucks លោក Laxman Narasimhan បានឡើងដំណែងជា CEO កាលពីថ្ងៃចន្ទកន្លងទៅ ដោយជំនួសលោក Howard Schultz។

លោក Laxman Narasimhan បានចូលរួមជាបេក្ខភាព CEO បណ្តោះសន្ន តាំងពីខែតុលាឆ្នាំ ២០២២មកម្ល៉េះ មកទល់ពេលនេះដល់ពេលដែលលោកត្រូវចំណាយពេល៤០ម៉ោង ធ្វើជាអ្នករត់តុនៅក្នុងហាងកាហ្វេនៅសាខា Starbuck ណាមួយ ដើម្បីត្រួតពិនិត្យដំណើរការធ្វើការរបស់បុគ្គលិក និងស្វែងយល់ឱ្យកាន់តែច្បាស់ពីតម្រូវការរបស់អតិថិជន។

នៅក្នុងអំឡុងពេលធ្វើការនេះ លោកត្រូវបានឃ្លាំមើល ដោយគណកម្មការធិការរបស់ក្រុមហ៊ុន Starbuck ដែលត្រូវឱ្យពិន្ទុ វាយតម្លៃ ក្នុងការធ្វើការរបស់លោក រយៈពេល៤០ម៉ោងកន្លងទៅនេះ៕

ប្រភព៖ BBC