កំពូលតារាចម្រៀងជួរមុខ៤រូបក្នុងផលិតកម្មហ្គាឡាក់ស៊ី រួមមាន ឧកញ៉ា ព្រាប សុវត្ថិ , ឧកញ៉ា ខេមរៈ សិរីមន្ត កញ្ញា តន់ ចន្ទសីម៉ា និងលោក ខេម បានពួតដៃគ្នាជាលើកដំបូង ក្នុងបទចម្រៀងមានចំណងជើងថា «ស្រឡាញ់អ្វីដែលខ្មែរមាន» ដើម្បីអបអរសាទរព្រឹត្តិការណ៍ស៊ីហ្គេមលើកទី៣២ និង អាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះ។
ក្នុងនោះតារាចម្រៀងខាងលើបានបង្ហាញចំណាប់អារម្មណ៍របស់ខ្លួនថាសិល្បៈរស់នៅក្នុងសម័យសន្តិភាព ការសាមគ្គីនិងការបង្រួបបង្រួមជាធ្លុងមួយសម្រាប់ការអភិវឌ្ឍន៍គ្រប់វិស័យ រួមទាំងវិស័យសិល្បៈក៏មានការអភិវឌ្ឍន៍រីកចម្រើន ដែលរូបភាពនេះគឺជាភស្តុតាងសម្រាប់ទៅអនាគត បង្ហាញពីរូបភាពរីកចម្រើន អភិវឌ្ឍន៍ក្នុងពេលបច្ចុប្បន្ន ក្រោមម្លប់សន្តិភាព និងការអភិវឌ្ឍន៍គ្រប់វិស័យ។ ជាមួយគ្នានេះ ផលិតកម្ម ហ្គាឡាក់ស៊ី ណាវ៉ាត្រា បានបង្វែរផ្នត់គំនិតថ្មីដែលមិនមានបទចម្លងពីបរទេស និងបង្កើតបទ original song បានជិត១០០០បទហើយ។
សូមបញ្ជាក់ថា នេះជាលើកទី១ហើយដែលកំពូលតារាចម្រៀង ឧកញ៉ា ព្រាប សុវត្ថិ , ឧកញ៉ា ខេមរៈ សិរីមន្ត កញ្ញា តន់ ចន្ទសីម៉ា និងលោក ខេម មានបទចម្រៀងរួមគ្នា។ មិនត្រឹមតែប៉ុណ្ណោះ បទចម្រៀង «ស្រឡាញ់អ្វីដែលខ្មែរមាន» ដែលអ្នកទាំង៤ច្រៀងរួមគ្នានេះមានអ្នករាំជានារីប្រមាណ១ពាន់នាក់៕
