ប្រទេសរុស្ស៊ី ៖ កាលពីដើមខែមេសានេះ ប្រធានាធិបតីរុស្ស៊ី លោក វ៉្លាឌីមៀរ ពូទីន បានប្រជុំពិភាក្សាពីបញ្ហាសន្តិសុខជាមួយមេដឹកនាំប្រទេសបេឡារុស ហើយមេដឹកនាំរុស្ស៊ីចោទប្រកាន់អាមេរិកថា អាមេរិកគាំទ្រការតវ៉ាប្រឆាំងនៅប្រទេសអ៊ុយក្រែនកាលពីឆ្នាំ២០១៤ រហូតដល់ធ្វើឱ្យមានជម្លោះកើតឡើងនាពេលបច្ចុប្បន្ននេះ ។

ប្រធានាធិបតីរុស្ស៊ី លោក ពូទីន បានបើកវិមានប្រធានាធិបតី ដើម្បីទទួលស្វាគមន៍ការមកកាន់ប្រទេសរុស្ស៊ីរបស់ប្រធានាធិបតីបេឡារុស លោក Alexander Lukashenko តាមការអញ្ជើញរបស់លោក ពូទីន ។

កាលពីសប្តាហ៍មុន អ្នកនាំពាក្យរដ្ឋាភិបាលរុស្ស៊ី លោក Dmitry Peskov បានថ្លែងថា មេដឹកនាំរុស្ស៊ី និងមេដឹកនាំបេឡារុសនឹងពិភាក្សាគ្នា ដោយស្នើឱ្យភាគីទាំងអស់ឈប់បាញ់គ្នានៅអ៊ុយក្រែន ក្រោយពីលោក ពូទីន ប្រកាសថា នឹងបញ្ជូនអាវុធនុយក្លេអ៊ែរទៅប្រចាំការនៅបេឡារុស កាលពីខែកុម្ភៈ ឆ្នាំ២០២៣ ។

លោក ពូទីន បានថ្លែងទៅកាន់មេដឹកនាំបេឡារុសថា លោកសង្ឃឹមថា ប្រទេសទាំងពីរនឹងពិភាក្សាជាច្រើនប្រធានបទ ខណៈរុស្ស៊ី និងបេឡារុស នឹងត្រូវសហការធ្វើការរួមគ្នា មិនថាកិច្ចសហការនៅលើឆាកអន្តរជាតិ និងសន្តិសុខរបស់ប្រទេសទាំងពីរ ។ មុននេះ មេដឹកនាំរុស្ស៊ីបានថ្លែងក្នុងពិធីទទួលស្វាគមន៍មន្ត្រីទូតបរទេសថ្មី ដែលនឹងមកបំពេញភារកិច្ចនៅប្រទេសរុស្ស៊ី រួមទាំងលោកស្រី Lynn Tracy មន្ត្រីទូតអាមេរិកប្រចាំរុស្ស៊ីថា រុស្ស៊ីបើកចំហសម្រាប់ភាពជាដៃគូស្ថាបនាជាមួយប្រទេសទាំងអស់ដែលរាប់អានរុស្ស៊ី បើទោះជាស្ថានការណ៍ក្នុងពិភពលោកតឹងតែងក្តី ។

លើសពីនេះ មេដឹកនាំរុស្ស៊ី លោក ពូទីន បញ្ជាក់ថា សម្ព័ន្ធភាពរវាងប្រទេសរុស្ស៊ី និងអាមេរិកបានធ្វើឱ្យប៉ះពាល់ដោយផ្ទាល់ទៅលើស្ថេរភាព និងសន្តិសុខពិភពលោក ហើយស្ថិតក្នុងវិបត្តិដ៏ជ្រៅមួយ ។ លោក ពូទីន ក៏បានរិះគន់អាមេរិកផងដែរថា អាមេរិកគាំទ្រការប្រឆាំងតវ៉ាបណ្តេញអតីតប្រធានាធិបតីនៅប្រទេសអ៊ុយក្រែនកាលពីឆ្នាំ២០១៤ រហូតធ្វើឱ្យមានជម្លោះកើតឡើងនាពេលបច្ចុប្បន្ន ៕ ប្រភព ៖ TNN World

ប្រទេសចិន ៖ ចិនបានបញ្ជូននាវាផ្ទុកយន្តហោះរបស់ខ្លួនត្រៀមធ្វើសមយុទ្ធនៅក្បែរកោះតៃវ៉ាន់ ខណៈស្ថានការណ៍បច្ចុប្បន្នកាន់តែតានតឹង ក្រោយពីប្រធានាធិបតីតៃវ៉ាន់ លោកស្រី Tsai Ing-wen បានជួបជាមួយលោក Kevin McCarthy ប្រធានសភាតំណាងរាស្ត្រអាមេរិក កាលពីថ្ងៃទី៥ ខែមេសា ។ ការជួបគ្នារវាងមេដឹកនាំតៃវ៉ាន់ និងអាមេរិក បានធ្វើឱ្យប្រទេសចិនមិនពេញចិត្តយ៉ាងខ្លាំង ។

រដ្ឋមន្ត្រីក្រសួងការពារជាតិតៃវ៉ាន់លើកឡើងថា នាវាផ្ទុកយន្តហោះ Shandong របស់ចិន ស្ថិតនៅឆ្ងាយពីឆ្នេរសមុទ្រតៃវ៉ាន់ប្រមាណ៣៧០គីឡូម៉ែត្រ ហើយនាវាផ្ទុកយន្តហោះ Shandong ជានាវាមួយគ្រឿងដែលធ្វើឡើងដំបូងគេនៅប្រទេសចិន ។ កាលពីថ្ងៃទី៤ ខែមេសា នាវានេះបានធ្វើដំណើរឆ្លងកាត់ច្រកសមុទ្រ Bashi ស្ថិតនៅភាគខាងត្បូងតៃវ៉ាន់ ហើយធ្វើដំណើរមកកាន់មហាសមុទ្រប៉ាស៊ីហ្វិក អមដោយនាវាជាច្រើនគ្រឿងទៀតរបស់កងទ័ពជើងទឹកចិន ។

សារព័ត៌មាន Global Times បញ្ជាក់ថា ការចល័តកងទ័ពជើងទឹករបស់ចិននេះឆ្លុះបញ្ចាំងឱ្យឃើញថា ចិនបានត្រៀមខ្លួនរួចជាស្រចសម្រាប់ធ្វើប្រតិបត្តិការនៅតាមសមុទ្រឆ្ងាយៗ ដើម្បីការពារអធិបតេយ្យភាពជាតិ និងបូរណភាពទឹកដីរបស់ខ្លួន ។ នាពេលថ្មីៗនេះ កងទ័ពចិនទទួលបានបទបញ្ជាឱ្យធ្វើសមយុទ្ធយ៉ាងខ្លាំងក្លាទាំងផ្លូវគោក ផ្លូវទឹក និងផ្លូវអាកាស ។

ការជួបពិភាក្សាគ្នាជាប្រវត្តិសាស្ត្ររវាងមេដឹកនាំតៃវ៉ាន់ និងមន្ត្រីជាន់ខ្ពស់អាមេរិក លោក Kevin McCarthy បានបញ្ជាក់ថា លោកស្រី Tsai Ing-wen ជាមិត្តភក្តិម្នាក់ក្នុងចំណោមមិត្តភក្តិជិតស្និទ្ធរបស់អាមេរិក ។ ចំណែកលោកស្រី Tsai Ing-wen ក៏បានថ្លែងអំណរគុណអាមេរិកថា ៖ «ការគាំទ្រតៃវ៉ាន់មិនប្រែប្រួលរបស់អាមេរិក គឺបានជួយបង្កើតទំនុកចិត្តដល់ពលរដ្ឋតៃវ៉ាន់ ។ ពួកយើងមិនមែននៅតែឯង និងឯកោទេ ប៉ុន្តែពួកយើងនឹងកាន់តែរឹងមាំនៅពេលបានសហការគ្នាជាមួយអាមេរិក» ។

ចំណែកប្រទេសចិនវិញបានចេញសេចក្តីថ្លែងការណ៍ថ្កោលទោសភ្លាមៗថា តៃវ៉ាន់គឺជាខ្សែបន្ទាត់ក្រហមដែលអាមេរិកគ្មានសិទ្ធិឆ្លងកាត់ ហើយចិនដាស់តឿនថា ខ្លួននឹងចាត់វិធានការយ៉ាងខ្លាំងក្លាវិញ ដើម្បីឆ្លើយតបនឹងការជួបគ្នារវាងលោកស្រី Tsai Ing-wen និងលោក Kevin McCarthy លើកនេះ ។ រីឯក្រសួងការពារជាតិតៃវ៉ាន់នឹងរង់ចាំតាមដានស្ថានការណ៍ខុសប្រក្រតីនៅច្រកសមុទ្រតៃវ៉ាន់ ៕ ប្រភព ៖ The standardth

សារព័ត៌មាន Reuters បានចុះផ្សាយព័ត៌មានមួយគួរឱ្យភ្ញាក់ផ្អើលថា បុគ្គលិករបស់ក្រុមហ៊ុននេះអាចមើលឃើញវីដេអូ និងរូបភាពទាំងអស់របស់អតិថិជន ដែលកាមេរ៉ាបំពាក់ក្នុងរថយន្តថតបាន ហើយថែមទាំងចែកចាយរូបភាពទាំងនេះក្នុងក្រុមហ៊ុនទៀតផង ។

សារព័ត៌មាន Reuters បានសម្ភាសន៍ជាមួយអតីតបុគ្គលិកក្រុមហ៊ុន Tesla ជាច្រើននាក់ ដោយពួកគេរៀបរាប់ថា ព័ត៌មានដែលត្រូវគេចែកចាយជាច្រើន គឺជាវីដេអូ និងរូបភាពថតបានដោយកាមេរ៉ាបំពាក់ក្នុងរថយន្តអតិថិជន ចាប់ពីឆ្នាំ២០១៩-២០២២ ។ ក្នុងនោះគេឃើញមានរូបភាពផ្ទាល់ខ្លួន រូបភាពគ្រោះថ្នាក់ចរាចរណ៍ និងវីដេអូមិនសមរម្យជាច្រើនទៀត ហើយក៏មានរូបភាពអតិថិជនម្នាក់ដោះសម្លៀកបំពាក់ក្នុងរថយន្តផងដែរ ។

អតីតបុគ្គលិកក្រុមហ៊ុន Tesla បន្តថា ជាញឹកញាប់ វីដេអូគ្រោះថ្នាក់ចរាចរណ៍នានានៅតាមផ្លូវ និងវីដេអូផ្ទាល់ខ្លួនរបស់អតិថិជនជាច្រើនទៀត ត្រូវបានគេចែកចាយក្នុងចំណោមបុគ្គលិកក្រុមហ៊ុន Tesla ។ លើសពីនេះ វីដេអូមួយចំនួនត្រូវបានគេចែកចាយទៅខាងក្រៅទៀតផង ។

អតីតបុគ្គលិកក្រុមហ៊ុន Tesla បានរៀបរាប់ឱ្យសារព័ត៌មាន Reuters ស្តាប់ថា កម្មវិធីកុំព្យូទ័ររបស់បុគ្គលិកធ្វើការក្នុងក្រុមហ៊ុន វាអាចប្រាប់បានថា គេថតវីដេអូនេះនៅកន្លែងណា ។ ការលួចមើលវីដេអូផ្ទាល់ខ្លួនតាមកាមេរ៉ាបំពាក់ក្នុងរថយន្តអតិថិជន គឺវាខុសពីគោលការណ៍ក្រុមហ៊ុន ខណៈក្រុមហ៊ុន Tesla ប្រកាសថា ការថតវីដេអូ ឬរូបភាពរបស់កាមេរ៉ាបំពាក់ក្នុងរថយន្ត នឹងមិនផ្សព្វផ្សាយជាសាធារណៈ និងមិនបញ្ចេញឈ្មោះអតិថិជនទេ ។

អ្វីគួរឱ្យភ្ញាក់ផ្អើលជាងនេះទៀត គឺអតីតបុគ្គលិកក្រុមហ៊ុន Tesla មិនបញ្ចេញឈ្មោះម្នាក់និយាយថា បើទោះជារថយន្តពន្លត់ម៉ាស៊ីនអស់ក៏ដោយ ក៏កាមេរ៉ាបំពាក់ក្នុងរថយន្តអាចថតវីដេអូបានទាំងអស់ ហើយត្រូវបានបុគ្គលិកក្រុមហ៊ុនយកមកចែកចាយតៗគ្នា ។

ចំណែកក្រុមហ៊ុន Tesla មិនទាន់បានបកស្រាយអ្វីទេ ហើយគេនឹងតាមដានបន្តថា ខាងក្រុមហ៊ុន និងមហាសេដ្ឋីជាម្ចាស់ក្រុមហ៊ុននេះ លោក Elon Musk នឹងឆ្លើយតបថាម៉េចវិញ ចំពោះការចុះផ្សាយរបស់សារព័ត៌មាន Reuters ៕ ប្រភព ៖ The standardth