គ្រូជោគជ័យជាសហគ្រិនម្នាក់ទៀតចេញលិខិតសុំទោស ក្រោយនិយាយថា «ខ្លាចគ្រូបង្រៀនកូនឱ្យក្រ»

April 7, 2023

លោក ឌិន សុមេធារិទ្ធ មានតំណែងជាប្រធានសមាគមសណ្ឋាគារកម្ពុជា ជាអ្នកជំនួញ និងជាវាគ្មិនបណ្តុះបណ្តាលសហគ្រិនឱ្យជោគជ័យ បានចេញលិខិតសុំទោសជាសាធារណៈ ក្រោយមហាជនរិះគន់យ៉ាងខ្លាំងព្រោះលោកបានប្រើពាក្យមិនសមរម្យទៅលើគ្រូបង្រៀន។

ក្នុងលិខិតដែលបានបង្ហោះនៅថ្ងៃទី៧ ខែមេសា លោក ឌិន សុមេធារិទ្ធ ព្រមទទួលស្គាល់កំហុស និងសុំការអភ័យទោសពីសំណាក់មហាជនចំពោះពាក្យពេចន៍ដែលខ្លួនបាននិយាយលើសលស់កន្លងមកនាំឱ្យប៉ះពាល់អារម្មណ៍ ដល់គ្រូបង្រៀន និងបងប្អូនជនរួមជាតិ។ សហក្រិនជោគជ័យរូបនេះបានបញ្ជាក់ទៀតថា លោកមានដើមកំណើតពីត្រកូលកសិករ ហើយបានរៀនសូត្រចេះដឹងពី អ្នកគ្រូ លោកគ្រូ ហើយសម្ដីមិនទំនងកន្លងមកនេះ លោកពិតជាសូមអភ័យទោសដោយសុចិតនឹងព្យាយាមមិនឱ្យមានកំហុសបែបនេះកើតឡើងជាថ្មីឡើយ។

គួរបញ្ជាក់ថា លោក ឌិន សុមេធារិទ្ធ បាននិយាយនៅវគ្គបណ្តុះបណ្តាលមួយថា «ភាគច្រើនគ្រូៗ បង្រៀនសិស្សឱ្យស្អប់អ្នកមាន» , «កុំជឿគ្រូច្រើនពេក ខ្ញុំបារម្ភណាស់ បារម្ភខ្លាចគ្រូបង្រៀនកូនខ្ញុំឱ្យក្រ» ដែលពាក្យទាំងនេះអ្នកលេងបណ្តាញសង្គមចែករំលែកនិងរិះគន់ចាស់ដៃ បន្ទាប់ពីលោកជំទាវ តាំង ហ្គិចលៀង ៕

បរិយាកាស ខ្យល់ពុលដ៏កខ្វក់ខ្លាំងបំផុត នៅឈៀងម៉ៃ អភិបាលខេត្តប្រកាសឱ្យពលរដ្ឋធ្វើការពីផ្ទះ

admin

April 7, 2023

ប្រទេសថៃ ៖ កាលពីថ្ងៃទី៦ ខែមេសា កន្លងមក លោក Nirat Pongsitthaworn អភិបាលខេត្តឈៀងម៉ៃ បានចេញសេចក្តីប្រកាសមួយសុំកិច្ចសហការពីរដ្ឋាភិបាល និងផ្នែកឯកជនឱ្យបុគ្គលិកទាំងអស់ធ្វើការពីផ្ទះរបស់ខ្លួន (work from home) ដើម្បីកាត់បន្ថយផលប៉ះពាល់សុខភាព ខណៈខេត្តឈៀងម៉ៃមានបរិយាកាសកខ្វក់កាន់តែធ្ងន់ធ្ងរ ។ លើសពីនេះ លោកអភិបាលខេត្តក៏បានសំណូមពរទៅកាន់ពលរដ្ឋទាំងអស់ត្រូវពាក់ម៉ាស់ការពារធូលីផងដែរ នៅពេលចេញទៅក្រៅ ។

នៅក្នុងសេចក្តីប្រកាសនេះ លោក Nirat Pongsitthaworn បានថ្លែងថា ៖ «សូមមន្ត្រីរដ្ឋាភិបាលគ្រប់ស្ថាប័នទាំងអស់រៀបចំប្រព័ន្ធការងារធ្វើការពីផ្ទះ សម្រាប់ការងារណាមិនទាក់ទងនឹងការផ្តល់សេវាកម្មសាធារណៈ ហើយបើរៀបចំការប្រជុំ គឺត្រូវតែប្រជុំតាមប្រព័ន្ធអេឡិចត្រូនិក» ។

លោកអភិបាលខេត្តបន្តថា ៖ «សូមកិច្ចសហការជាមួយក្រុមហ៊ុន ហាង និងគ្រឹះស្ថាននានា ពិចារណាអនុញ្ញាតឱ្យបុគ្គលិករបស់ខ្លួនធ្វើការនៅផ្ទះ ឬធ្វើការតាមបណ្តាញអនឡាញសម្រាប់ផ្នែកមិនប៉ះពាល់ដល់អាជីវកម្មរបស់ក្រុមហ៊ុន ដើម្បីកាត់បន្ថយការចេញក្រៅផ្ទះ» ។

ក្នុងសេចក្តីប្រកាសនេះ ក៏មានវិធានការផ្សេងៗផងដែរ គឺការណែនាំឱ្យពលរដ្ឋពាក់ម៉ាស់ដើម្បីការពារធូលីកខ្វក់ និងស្នើឱ្យពលរដ្ឋងាយឆ្លងរោគ (មានមនុស្សចាស់ និងកុមារ) ត្រូវកាត់បន្ថយ ឬមិនចេញក្រៅផ្ទះ ។ ការស្នើសុំហាមចេញពីផ្ទះនេះមានរយៈពេល១ថ្ងៃ គឺថ្ងៃទី៧ ខែមេសា ហើយសេចក្តីប្រកាសនេះបញ្ជាក់ថា បើបរិយាកាសនៅតែកខ្វក់មិនធូរស្រាលទេ ខេត្តឈៀងម៉ៃនឹងចេញសេចក្តីប្រកាសបន្ថែមទៀត ។

នៅតាមបណ្តាខេត្តភាគខាងជើងប្រទេសថៃបានប្រឈមនឹងបរិយាកាសកខ្វក់អស់ជាច្រើនខែមកហើយ ហើយកាលពីពេលថ្មីៗនេះ បរិយាកាសកាន់តែអាក្រក់លើសដើមទៀត ។ បញ្ហាធូលីកខ្វក់បានធ្វើឱ្យពលរដ្ឋរស់នៅក្នុងខេត្តនេះប្រឈមនឹងការប៉ះពាល់សុខភាពជាខ្លាំង រីឯភ្ញៀវទេសចរបរទេស ក៏មិនចង់មកកម្សាន្តនៅខេត្តនេះដែរ ដោយពួកគេទៅកម្សាន្តនៅតំបន់មាត់សមុទ្រវិញ ៕ ប្រភព ៖ sanook

ទីក្រុងហូជីមិញកាប់ដើមឈើចោលជាង១០០០ដើមនិងផ្លាស់ប្តូរទីតាំងដាំថ្មី

admin

April 7, 2023

ដើមឈើជាង ១,៣០០ ដើមនៅលើផ្លូវ Mai Chi Tho ជិតព្រលានយន្តហោះ Tan Son Nhat ត្រូវបានកាប់បំផ្លាញ និងផ្លាស់ប្តូរទីតាំង ដើម្បីការងារសំខាន់ៗចំនួនពីរ។

កាលពីថ្ងៃទី៥ ខែមេសា តំណាងក្រុមហ៊ុន Ho Chi Minh City Green Park Company Limited បាននិយាយថា មានដើមឈើដួលរលំត្រូវកាប់ចោល និងត្រូវផ្លាស់ប្តូរទីតាំងជាង១ពាន់ដើមនៅកណ្តាលផ្លូវ និងចិញ្ចើមផ្លូវ Mai Chi Tho ហើយត្រូវបានគេរំពឹងថានឹងបញ្ចប់នៅចុងខែមេសា។

ដើមឈើដែលដួលរលំត្រូវកាប់ចោល និងផ្លាស់ប្តូរទីតាំងជាង១ពាន់ដើមនោះមាន១៤ ប្រភេទ ដែលមានអាយុកាល ១៣ឆ្នាំ ដល់ជាង ២០ឆ្នាំ ។ ដើមឈើដែលអាចប្រើការបាន ត្រូវបានកាត់មែក និងកាត់ឬស ដើម្បីយកទៅបណ្តុះកូន មើលថែទាំមុនពេលដាំនៅកន្លែងផ្សេង ចំណែកដើមឈើមានសភាពទ្រុឌទ្រោមជាង២០០ដើមត្រូវកាប់ចោល។

ការរុះរើ និងកាប់ចោលដើមឈើ នៅលើបណ្តោយផ្លូវ Mai Chi Tho គឺធ្វើឡើងដើម្បីបើកការដ្ឋានសាងសង់ផ្លូវប្រសព្វ An Phu កម្ពស់បីជាន់នៅច្រកទ្វារខាងកើតនៃទីក្រុងហូជីមិញ ជាមួយនឹងទុនវិនិយោគសរុបចំនួន ៣,៤០០ ពាន់លានដុង។ ការសាងសង់នេះរួមមានផ្លូវរូងក្រោមដី២ និងស្ពានអាកាសចំនួន២៕ ប្រភព៖ vnexpress

កម្ពុជា បង្ហាញសមិទ្ធផលវិស័យសុខាភិបាលក្នុងឱកាសទិវាសុខភាពពិភពលោក

admin

April 7, 2023

ក្រសួងសុខាភិបាល បានបង្ហាញពីសមិទ្ធផលជោគជ័យវិស័យសុខាភិបាលគួរឱ្យកត់សម្គាល់ជាច្រើនដែលសម្រេចបាននៅ កម្ពុជា នាឱកាសទិវាសុខភាពពិភពលោក ថ្ងៃសុក្រ ទី៧ ខែមេសា ឆ្នាំ២០២៣ ដើម្បីអបអរសាទរគម្រប់ខួបលើកទី៧៥ នៃការបង្កើតអង្គការសុខភាពពិភពលោក (WHO) នាឆ្នាំ១៩៤៨ ដោយកម្ពុជាបានចូលជាសមាជិកអង្គការនេះក្នុងឆ្នាំ១៩៥០ ។

ក្នុងសមិទ្ធផលដែលកម្ពុជាទទួលបានក្នុងវិស័យសុខាភិបាលរយៈពេលប៉ុន្មានទសវត្ស

ចុងក្រោយនេះរួមមាន៖

– អាយុវែងរំពឹងរស់សម្រាប់ប្រជាជនម្នាក់ៗ គឺ៧៦ឆ្នាំគិតត្រឹមឆ្នាំ២០២១-២០២២។

– ស្ត្រីកម្ពុជាជាង ៩៩% បានសម្រាលកូនដោយអ្នកផ្តល់សេវាសុខភាពជំនាញ បើធៀបនឹងឆ្នាំ២០០០ ដែលមានតែស្ត្រីតែម្នាក់ ក្នុងចំណោមស្ត្រី៣នាក់ ប៉ុណ្ណោះដែលសម្រាល កូនជាមួយនឹងអ្នកផ្តល់សេវាសុខភាពជំនាញ។

– អត្រាមរណភាពទារកទើបនឹងកើតបានធ្លាក់ចុះពី ៣៧នាក់ មកត្រឹម ៨នាក់ ក្នុងចំណោម ១០០០ កំណើតរស់ ។

– អត្រាមរណភាពកុមារអាយុក្រោមប្រាំឆ្នាំបានធ្លាក់ចុះ ១២៤នាក់ មកត្រឹម ១៦នាក់ ក្នុងចំណោម ១០០០ កំណើតរស់។

– លុបបំបាត់ជំងឺស្វិតដៃជើងដោយជោគជ័យនៅក្នុងឆ្នាំ១៩៩៧ ហើយក៏សម្រេចបាននូវវឌ្ឍនភាព គួរឱ្យកត់សម្គាល់ក្នុងការបង្ការ ការទប់ស្កាត់ និងការលុបបំបាត់ជំងឺឆ្លងផ្សេងៗផងដែរ។

– ជំងឺគ្រុនចាញ់គឺមានកម្រិតទាបបំផុតដែលមិនធ្លាប់មានពីមុនមក ហើយបានកើតមានឡើងរយៈពេល ប្រាំឆ្នាំចាប់តាំងពីពេលមានករណីកត់ត្រានៃការស្លាប់ដោយសារជំងឺគ្រុនចាញ់ចុងក្រោយ នៅឆ្នាំ២០១៨។

– អត្រាឆ្លង និង អត្រាមរណភាពដោយជំងឺរបេងបានថយចុះប្រមាណ ៥០% ចាប់ពីឆ្នាំ២០០០ ដល់ឆ្នាំ២០២១ ហើយកម្ពុជាសម្រេច បាននូវគោលដៅកាត់បន្ថយជំងឺអេដស៍ជាសកល មុនកាលកំណត់។

– កម្ពុជាសម្រេចបាននូវអត្រាគ្របដណ្ដប់នៃការចាក់វ៉ាក់សាំងបង្ការជំងឺកូវីដ-១៩ ក្នុងកម្រិតខ្ពស់ និងធានាបានការបន្តផ្តល់សេវាសុខភាពសារវ័ន្ត និងការផ្ដល់ជំនួយគាំពារសុខភាពផ្លូវចិត្ត និងចិត្ត-សង្គម ប្រកបដោយ ប្រសិទ្ធភាពខ្ពស់ ដែលត្រូវការជាចាំបាច់នៅក្នុងគ្រាមានភាពតានតឹងផ្លូវចិត្ត និងវិបត្តិកើតឡើង។

ការសម្រេចសមិទ្ធផលជោគជ័យគួរឱ្យកត់សម្គាល់ទាំងនេះលោកស្រីវេជ្ជបណ្ឌិត លី អាយឡែន តំណាងអង្គការសុខភាពពិភពលោកប្រចាំកម្ពុជា បានបង្ហាញអារម្មណ៍មោទកភាពដែលបានក្លាយជាដៃគូដ៏គួរឱ្យទុកចិត្តរបស់រាជរដ្ឋាភិបាលកម្ពុជា និងប្រជាជនកម្ពុជា ក្នុងកិច្ចការសម្រេចបាននូវភាពជោគជ័យនេះដើម្បីឆ្ពោះទៅសម្រេចនូវគោលដៅ “សុខភាព សម្រាប់ទាំងអស់គ្នា”៕

Muay Thai ពិភពលោកប្រកាសដកតំណែងជើងឯកកីឡាករប្រេស៊ីល ក្រោមហេតុផលគុនខ្មែរ

admin

April 7, 2023

ប្រទេសថៃ ៖ កាលពីថ្ងៃទី១ ខែមេសា អង្គការ Muay Thai ពិភពលោក (World Muay Thai Organization) បានចេញសេចក្តីថ្លែងការណ៍ពីការដកហូតតំណែងជើងឯកកីឡាករប្រេស៊ីលឈ្មោះ Thiago Teciara ជាម្ចាស់ខ្សែក្រវ៉ាត់ទម្ងន់មធ្យមរបស់អង្គការនេះ ក្នុងកម្មវិធី Apex Fight Series នៅប្រទេសអាល្លឺម៉ង់ ។ ការដកហូតសិទ្ធិនេះ គឺក្រោយពីកីឡាករប្រេស៊ីលនិយាយថា «គុនខ្មែរ» ជាប្រភពរបស់ «Muay Thai» ព្រមទាំងជួយលើកកម្ពស់កីឡាគុនខ្មែរទៅកាន់ពិភពលោក ។

ក្រោយពីកីឡាករ Thiago Teciara បញ្ចេញមតិរឿងកីឡាគុនខ្មែរជាក្បាច់គុនរបស់ប្រទេសកម្ពុជា និងជាដើមកំណើតរបស់ Muay Thai បានធ្វើឱ្យអ្នកលេងបណ្តាញសង្គមថៃរិះគន់ដូចព្យុះ ហើយសារព័ត៌មានរបស់ថៃស្ទើរទាំងអស់ ក៏បានចុះផ្សាយរិះគន់កីឡាកររូបនេះផងដែរ ។ ក្រោយមក ប្រទេសថៃប្រកាសថា ខ្លួននឹងមិនបញ្ជូនកីឡាករមកចូលរួមប្រកួតនៅកម្ពុជាទេ ដោយសារតែថៃមិនពេញចិត្តនឹងការដាក់ឈ្មោះកីឡា ។

ទំព័រហ្វេសប៊ុកឈ្មោះ World Muay Thai Organization ជាហ្វេសប៊ុសផ្លូវការរបស់អង្គការ Muay Thai ពិភពលោកចេញសេចក្តីថ្លែងការណ៍ថា អង្គការបានដកហូតសិទ្ធិកីឡាករ Thiago Teciara ចេញពីតំណែងម្ចាស់ខ្សែក្រវ៉ាត់ទម្ងន់មធ្យមរបស់អង្គការ Muay Thai ពិភពលោក ក្នុងកម្មវិធី Apex Fight Series ។ លើសពីនេះ កីឡាករ Thiago Teciara ក៏ត្រូវបានហាមឃាត់មិនឱ្យចូលរួមប្រកួតគ្រប់កម្មវិធីទាំងអស់របស់អង្គការនេះទៀតផង ។

ក្នុងសេចក្តីថ្លែងការណ៍នេះបានរៀបរាប់ពីមូលហេតុដែលអង្គការ Muay Thai ពិភពលោកដកតំណែងជើងឯករបស់កីឡាករប្រេស៊ីលថា កីឡាកររូបនេះមានអាកប្បកិរិយា និងមានចេតនាធ្វើឱ្យកីឡា Muay Thai ខូចកេរ្តិ៍ឈ្មោះ ដោយសារកីឡាករប្រេស៊ីលធ្វើទង្វើពាក់ព័ន្ធនឹងនយោបាយ គ្មានទឹកចិត្តជាកីឡាករ ហើយបង្កឱ្យមានការស្អប់ខ្ពើមគ្នា ។ ម្យ៉ាងទៀត រឿងនេះបានធ្វើឱ្យប៉ះពាល់ដល់ប្រធានអង្គការប្រដាល់ពិភពលោក-អាល្លឺម៉ង់ ដែលជាអ្នករៀបចំការប្រកួតផងដែរ ។

ចំណែកអ្នកគាំទ្រកីឡា Muay Thai បានរិះគន់យ៉ាងចាស់ដៃថា កីឡាករប្រេស៊ីលរូបនេះបានគាំទ្រគុនខ្មែរ តែសាក់ពាក្យថា Muay Thai ធំៗនៅលើខ្នងរបស់ខ្លួន រហូតដល់ពួកគេបានស្នើឱ្យលុបរូបសាក់នៅលើខ្នងចេញ ។ លើសពីនេះ ពលរដ្ឋថៃនិយាយថា កីឡាករ Thiago Teciara ក៏ធ្លាប់មកហ្វឹកហាត់ប្រកួតកីឡា Muay Thai នៅប្រទេសថៃ និងធ្លាប់បានថតរូបជាមួយកីឡាករ បួរ ខាវ ប៉ុន្តែបែរជានិយាយថា «Muay Thai» មានប្រភពកំណើតពី «គុនខ្មែរ» ទៅវិញ ។

គួរបញ្ជាក់ថា កីឡាករប្រេស៊ីលមានបេះដូងស្រឡាញ់ខ្មែររូបនេះធ្លាប់បានប្រកាសថា ខ្លួននឹងធ្វើជាអ្នកតំណាងឱ្យប្រទេសកម្ពុជា និងជំរុញកីឡាគុនខ្មែរនៅលើឆាកអន្តរជាតិ ។ នាពេលចុងក្រោយនេះ កីឡាករ Thiago Teciara អាយុ៣០ឆ្នាំ មានឱកាសធ្វើដំណើរទៅប្រកួតនៅក្រៅប្រទេស ដោយដណ្តើមបានជ័យជម្នះ និងយកទង់ជាតិរបស់កម្ពុជាទៅគ្រវីនៅលើឆាកអន្តរជាតិផងដែរ ៕ ប្រភព ៖ khaosod

និយ័តករមូលបត្រកម្ពុជានិងផ្សារមូលបត្រកម្ពុជាអនុញ្ញាតជាគោលការណ៍លើសំណើសុំបោះផ្សាយលក់មូលបត្រកម្មសិទ្ធិជាសាធារណៈរបស់ក្រុមហ៊ុនម៉េងលី ជេ. គួច អេឌ្យូខេសិន

admin

April 7, 2023

ភ្នំពេញ៖ ក្រុមហ៊ុន ម៉េងលី ជេ. គួច អេឌ្យូខេសិន បានបង្កើតឡើងក្នុងឆ្នាំ២០០៥ ជាស្ថាប័នអប់រំឯកជនឈានមុខមួយក្នុងប្រទេសកម្ពុជាទទួលបានការអនុញ្ញាតជាគោលការណ៍លើសំណើរសុំបោះផ្សាយលក់មូលបត្រកម្មសិទ្ធជាសាធារណៈពីនិយ័តករមូលបត្រកម្ពុជានិងផ្សារមូលបត្រកម្ពុជាកាលថ្មីៗនេះ។

យោងតាមក្រុមហ៊ុន ម៉េងលី ជេ. គួច អេឌ្យូខេសិនបានឱ្យដឹងថាដើម្បីដឹកនាំក្រុមហ៊ុនឱ្យកាន់តែមានវិសាលភាពក្នុងការបោះជំហានចូលក្នុងទីផ្សារមូលបត្រកម្ពុជា ទើបក្នុងឆ្នាំ២០១២អ្នកឧកញ៉ាវេជ្ជបណ្ឌិត គួច ម៉េងលី បានរៀបចំក្រុមហ៊ុនរួចជាស្រេចដើម្បីត្រៀមខ្លួនឈានចូលក្នុងទីផ្សារភាគហ៊ុននៅកម្ពុជា។

ស្របពេលនោះ អ្នកឧកញ៉ាក៏បានគ្រោងធ្វើសំណើស្នើសុំខាងនិយ័តករមូលបត្រកម្ពុជា ក្នុងការចុះបញ្ជីលក់មូលបត្រកម្មសិទ្ធិរបស់ក្រុមហ៊ុន ជាផ្លូវការ តែត្រូវបានពន្យារពេលសិន ដោយសារប្រទេសកម្ពុជាពេលនោះបានរងនូវវិបត្ដិខ្លាំងពីជំងឺកូវីដ ១៩។

លុះក្រោយមកក្នុងឆ្នាំ២០២៣ បន្ទាប់ពីវិបត្ដិកូវីដនៅប្រទេសកម្ពុជាត្រូវបានបញ្ចប់ អ្នកឧកញ៉ា វេជ្ជបណ្ឌិត គួច ម៉េងលី បានសម្រេចជាផ្លូវការក្នុងការស្នើសុំទៅខាងនិយ័តករមូលបត្រកម្ពុជា និងផ្សារមូលបត្រកម្ពុជា ក្នុងការចុះបញ្ជីលក់មូលបត្រកម្មសិទ្ធិរបស់ក្រុមហ៊ុន ម៉េងលី ជេ. គួច អេឌ្យូខេសិន ជាផ្លូវការ ខណៈពេលក្រុមហ៊ុនកំពុងតែសន្ទុះខ្លាំងក្នុងការរីកចម្រើនទៅមុខ។

នៅក្នុងដំណាក់កាលនេះដែរ ក្រុមហ៊ុន ម៉េងលី ជេ. គួច អេឌ្យូខេសិន នៅតែបន្ដភាពខ្លាំងក្លារបស់ខ្លួនក្នុងការឈរលើវិស័យអប់រំមួយនេះដដែលដោយបច្ចុប្បន្ន ក្រុមហ៊ុនមានសាខាសរុបចំនួន១៥ ក្នុងរាជធានីខេត្តក្រុង មានសិស្សជាង ២០.០០០នាក់ បុគ្គលិក ២.១៤៩នាក់ និងមានអតីតសិស្សជាង ៥០.០០០នាក់ កំពុងសិក្សា និងធ្វើការនៅជុំវិញពិភពលោក។ អ្វីដែលកាន់តែពិសេសទៀតនោះ ក្រុមហ៊ុននឹងបើកដំណើរការសាខាថ្មីសម្រាប់ឆ្នាំសិក្សា២០២៣-២០២៤ សាខាជាច្រើនបន្ថែមទៀតក្នុងនោះរួមមាន៖ សាខា សែនសុខ, សាខាច្បារអំពៅ, សាខា កំពង់ចាម, សាខា តាកែវ និងសាខាបាត់ដំបង។

បើតាមក្រុមហ៊ុន ម៉េងលី ជេ. គួច បញ្ជាក់ថាបន្ទាប់ពីនិយ័តករមូលបត្រកម្ពុបានធ្វើការពិនិត្យ និងសិក្សាច្បាស់លាស់ លើសំណើរស្នើសុំដាក់ពាក្យចូលក្នុងបញ្ជីលក់មូលបត្រកម្មសិទ្ធិរបស់ក្រុមហ៊ុន ម៉េងលី ជេ. គួច អេឌ្យូខេសិន និងបានឃើញពីវិសាលភាពការរីកចម្រើន និងការអភិវឌ្ឍរបស់ក្រុមហ៊ុន ទើបនៅថ្ងៃទី៧ ខែមីនា ឆ្នាំ២០២៣ ផ្សារមូលបត្រកម្ពុជាបានសម្រេចឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិ និងនៅថ្ងៃទី២០ ខែមីនា ឆ្នាំ២០២៣ ផ្សារមូលបត្រកម្ពុជាបានឯកភាពលើសំណើដាក់តម្លៃ ២០៨០ រៀលក្នុងមួយភាគ ហ៊ុន របស់ក្រុមហ៊ុន ម៉េងលី ជេ. គួច អេឌ្យូខេសិន។

ស្របពេលជាមួយគ្នានេះដែរ កាលពីរសៀលថ្ងៃទី៤ ខែមេសា ឆ្នាំ២០២៣នេះ ក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ) បានបើកកិច្ចប្រជុំ ក្រោមអធិបតីភាពដ៏ខ្ពង់ខ្ពស់របស់លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធាន អ. ស.ហ និងលោកស៊ូ សុជាតិ ប្រតិភូរាជរដ្ឋាភិបាលទទួលបន្ទុកជា អគ្គនាយក នៃនិយ័តករមូលបត្រកម្ពុជា និងជាសមាជិកក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ) តាមរយៈការប្រជុំដោយផ្ទាល់ និងតាមប្រព័ន្ធបញ្ជូនសាររូបភាពពីចម្ងាយ។ បន្ទាប់ពីការធ្វើបទបង្ហាញជាលទ្ធផល ក្រុមប្រឹក្សា អ. ស.ហ. បានផ្ដល់ការអនុញ្ញាតជាគោលការណ៍លើសំណើសុំបោះផ្សាយលក់មូលបត្រកម្មសិទ្ធិជាសាធារណៈរបស់ក្រុមហ៊ុន ម៉េងលី ជេ. គួច អេឌ្យូខេសិន ដោយក្រុមហ៊ុនត្រូវបន្តបំពេញនីតិវិធីជាផ្លូវការលើការបោះផ្សាយនេះ តាមសេចក្តីសម្រេចរបស់និយ័តករមូលបត្រកម្ពុជា៕សារេត

តើមនុស្សត្រូវចំណាយពេលប៉ុន្មានឆ្នាំដើម្បីធ្វើអាណានិគមលើភពផ្សេងទៀត?

admin

April 6, 2023

បរទេស៖ លោក Elon Musk នាយកប្រតិបត្តិក្រុមហ៊ុន SpaceX លោកបាននិយាយថា លោកចង់មានទីក្រុងដែលមានប្រជាជនមួយលាននាក់នៅលើភពអង្គារនៅឆ្នាំ ២០៥០។ គោលដៅនេះស្តាប់ទៅហាក់ដូចជាមានមហិច្ឆតាខ្លាំងណាស់ ព្រោះមនុស្សមិនដែលដើរលើផ្ទៃភពអង្គារទេ។ ដូច្នេះ តើមនុស្សត្រូវចំណាយពេលប៉ុន្មានដើម្បីធ្វើអាណានិគមលើភពផ្សេង? តើមនុស្សអាចធ្វើអាណានិគមលើសាកសពសេឡេស្ទាលនៅខាងក្រៅប្រព័ន្ធព្រះអាទិត្យបានទេ?

ចម្លើយចំពោះសំណួរទាំងនេះគឺអាស្រ័យលើទិសដៅ។ មនុស្សអាចទៅដល់ភពព្រះអង្គារបន្ទាប់ពី ពីរទៅបីឆ្នាំ ប៉ុន្តែត្រូវចំណាយពេលរាប់រយ រាប់ម៉ឺនឆ្នាំដើម្បីទៅដល់ភពក្រៅព្រះអាទិត្យ។ យោងតាមលោក Serkan Saydam នាយករងនៃមជ្ឈមណ្ឌលអូស្ត្រាលីសម្រាប់ការស្រាវជ្រាវវិស្វកម្មអវកាស និងជាសាស្រ្តាចារ្យនៅសាកលវិទ្យាល័យ New South Wales បាននិយាយថា ការធ្វើអាណានិគមលើភពអង្គារអាចកើតមានក្នុងរយៈពេលជាច្រើនទសវត្សរ៍។ គាត់បានបន្តទៀតថា “ខ្ញុំជឿថានៅឆ្នាំ ២០៥០ យើងនឹងមានអាណានិគមរបស់មនុស្សនៅលើភពអង្គារ” ។

យោងតាមលោក Saydam រឿងសំខាន់ដំបូងនៅពេលបង្កើតអាណានិគម Martian នៅលើភពអង្គារ គឺទឹក ហើយទឹកអាចទាញយកចេញពីទឹកកក និងសារធាតុរ៉ែដែលមានជាតិសំណើម។ លោកគិតថា ទឹកនឹងជួយលើកកម្ពស់វិស័យកសិកម្ម និងសមត្ថភាពដាំដុះអាហារនៅលើភពអង្គារ។ ទន្ទឹមនឹងនេះ អ៊ីដ្រូសែនពីទឹកកក និងសារធាតុរ៉ែអាចត្រូវបានគេប្រើប្រាស់ដើម្បីផ្តល់ថាមពលដល់គ្រាប់រ៉ុក្កែត។
ដូច្នេះហើយមនុស្សជាតិប្រហែលជានឹងទៅភពអង្គារក្នុងរយៈពេលពីរបីទសវត្សរ៍ទៀត។ ប្រទេសចិនគ្រោងនឹងចាប់ផ្តើមបញ្ជូននាវិកទៅកាន់ភពអង្គារនៅឆ្នាំ ២០៣៣ ខណៈដែលគោលដៅរបស់ NASA គឺចុងទសវត្សរ៍ឆ្នាំ ២០៣០ ឬដើមទសវត្សរ៍ឆ្នាំ ២០៤០។ បន្ទាប់ពីមនុស្សបានទៅដល់ភពក្រហម ជំហានបន្ទាប់អាចជាការសាងសង់អាណានិគម។
ទោះជាយ៉ាងណាក៏ដោយខណៈពេលដែលជម្រើសប្រាកដនិយមបំផុតសម្រាប់ការតាំងទីលំនៅក្រៅភពផែនដី ភពអង្គារមិនមែនជាភពដែលសមរម្យបំផុតសម្រាប់មនុស្សនោះទេ។ ជាង ៩៥% នៃបរិយាកាស Martian គឺ CO2 អាកាសធាតុត្រជាក់ខ្លាំង ជាមួយនឹងសីតុណ្ហភាពជាមធ្យមប្រហែល -៦០ អង្សាសេ វាត្រូវចំណាយពេលយានអវកាសពីផែនដីប្រហែល ៨.៥ខែដើម្បីទៅដល់ភពអង្គារ ហើយក៏ត្រូវបានវាយប្រហារដោយវិទ្យុសកម្មផងដែរ។ ប្រភព៖vnexpress

លោកជំទាវ ជា សិរី បញ្ជាក់មូលហេតុធនាគារមួយចំនួនតម្លើងអាត្រាការប្រាក់លើឥណទាន អតិថិជនទាំងឡាយគួរពិនិត្យកិច្ចសន្យាឱ្យបានច្បាស់មុនសម្រេចចិត្តចុះហត្ថលេខា។

admin

April 6, 2023

កន្លងមកមានប្រជាពលរដ្ឋមួយចំនួនមានចង្ងល់យ៉ាងខ្លាំង ដោយបានចោទសួរទៅខាងធនាគារជាតិជារឿយៗករណីតាមធនាគារមានការតំឡើងអាត្រាការប្រាក់។ បញ្ហានេះលោកជំទាវ ជា សិរី ទេសាភិបាលរងធនាគារជាតិនៃកម្ពុជា បានពន្យល់ថាការតម្លើងនេះគឺដោយសារអាត្រាការប្រាក់លើទីផ្សារអន្តរជាតិកើនឡើង ហើយធនាគារនៅកម្ពុជាក៏ត្រូវរងឥទ្ធិពលពីការកើនឡើងនេះដែរ ដែលធ្វើឱ្យតម្លៃដើមខ្ពស់ជាងមុន។

លោកជំទាវ បានបញ្ជាក់នៅល្ងាចថ្ងៃទី៦ ខែមេសា នេះទៀតថា ធនាគារដែលខ្ចីប្រាក់ពីបរទេសត្រូវបង់ការប្រាក់ខ្ពស់ជាងមុន ហើយធនាគារដែលប្រើប្រាស់ទុនក្នុងស្រុកក៏បានចំណាយការប្រាក់ខ្ពស់ជាងមុនឱ្យអ្នកដាក់ប្រាក់បញ្ញើរ ដែលអាត្រាប្រាក់បញ្ញើរគឺមានការកើនឡើងសឹងតែគ្រប់ធនាគារ ព្រោះអ្នកដាក់លុយចង់បានការប្រាក់ខ្ពស់ ឯអ្នកខ្ចីចង់បានការប្រាក់ទាប។ ដូចនេះធនាគារមួយចំនួនក៏បានសម្រេចចិត្តតម្លើងអាត្រាការប្រាក់លើឥទានអតិថិជនរបស់ខ្លួន។

បន្ថែមពីលើនេះ លោកជំទាវ ជា សិរី បានលើកឡើងថា ការធ្វើបែបនេះលោកជំទាវមិនអាចនិយាយថាខុសឬត្រូវទេវាអាស្រ័យលើការឯកភាពគ្នារវាងភាគីទាំងសងខាងទៅតាមកិច្ចសន្យា ដោយកិច្ចសន្យាខ្លះគឺផ្អែកលើអាត្រាអណ្តែតអន្តរជាតិ បើអាត្រាអន្តរជាតិឡើង អាត្រាឥណទានក៏ឡើង ហើយបានអាត្រាអន្តរជាតិធ្លាក់ថ្លៃ អាត្រាឥណទានក៏ត្រូវបន្ទាបតាមហ្នឹងដែរ។ ដូច្នេះអតិថិជនទាំងឡាយគួរពិនិត្យកិច្ចសន្យាឱ្យបានច្បាស់មុនសម្រេចចិត្តចុះហត្ថលេខា។ ចំណែកឥណទានខ្លះ អាត្រាការប្រាក់ត្រូវបានកំណត់ទុកជាមុនក្នុងរយៈពេលសរុបនៃការខ្ចី ធនាគារត្រូវចរចាឡើញវិញជាមួយអតិថិជន បើមានការប្រែប្រួលលក្ខខណ្ឌ ជៀសវាងមានជម្លោះណាមួយ៕

ប្រទេសក្បែខាងយើងជាប់ចំណាត់ថ្នាក់លេខ១ ដែលមានឆ្នេរខ្សាច់ស្អាតបំផុតនៅលើពិភពលោក! កោះក្រាដានឋានសួគ៌ាលើលោកិយ!

admin

April 6, 2023

កោះក្រាដានរបស់ថៃជាប់ចំណាត់ថ្នាក់លេខ១ មានឆ្នេរខ្សាច់ស្អាតបំផុតលើពិភពលោក

ប្រទេសថៃ ៖ វែបសាយមួយរបស់ប្រទេសអង់គ្លេសឈ្មោះ World Beach Guide បានចាត់ចំណាត់ថ្នាក់ឆ្នេរសមុទ្រស្រស់ស្អាតបំផុតនៅលើពិភពលោកចំនួន១០០កន្លែង ប្រចាំឆ្នាំ២០២៣ (Top 100 beaches on Earth 2023) ដើម្បីលើកកម្ពស់ផ្នែកទេសចរណ៍ និងឱ្យភ្ញៀវទេសចរអាចមកកម្សាន្តនៅឆ្នេរខ្សាច់ពណ៌ស ក្នុងនោះ កោះក្រាដាន ខេត្តត្រាង ប្រទេសថៃ បានជាប់ចំណាត់ថ្នាក់លេខ១ ដែលមានឆ្នេរខ្សាច់សស្អាតបំផុតលើពិភពលោក ។

គុណសម្បត្តិរបស់កោះនេះ គឺមានផ្ទៃទឹកសមុទ្រពណ៌ខៀវ មានពន្លឺព្រះអាទិត្យចែងចាំងគ្រប់ពេល និងមានខ្យល់តិចៗបក់នៅលើឆ្នេរ ។

លើសពីនេះ វែបសាយ World Beach Guide ក៏បានផ្តល់ចំណាត់ថ្នាក់ដល់ឆ្នេរសមុទ្រផ្សេងទៀតរបស់ប្រទេសថៃផងដែរ ដូចជា ៖
-ឆ្នេរសមុទ្រ Railay ខេត្តក្រាប៊ី ជាប់ចំណាត់ថ្នាក់ទី៩
-ឆ្នេរសមុទ្រ Freedom ខេត្តភូកេត ជាប់ចំណាត់ថ្នាក់ទី១៨
-ឆ្នេរសមុទ្រឡែមហាដ កោះយ៉ាវយ៉ៃ ខេត្តផាំងង៉ា ជាប់ចំណាត់ថ្នាក់ទី២១
-ឆ្នេរសមុទ្រតាណូត កោះតៅ ខេត្តស៊ូរ៉ាត់ថានី ជាប់ចំណាត់ថ្នាក់ទី៤៤

វែបសាយនេះបានបញ្ជាក់ថា ប្រទេសថៃត្រូវបានគេទទួលស្គាល់ច្រើនក្នុងរឿងឆ្នេរសមុទ្រស្រស់ស្អាត មានឆ្នេរខ្សាច់ពណ៌ស ដែលលាតសន្ធឹងនៅតាមឆ្នេរប្រៀបដូចជាឋានសួគ៌របស់ភ្ញៀវទេសចរ ។ ចំណែកកោះក្រាដាន គឺជាកោះមួយស្ថិតក្នុងចំណោមកោះតូចធំប្រមាណ៤០ និងជាផ្នែកសំខាន់នៃឧទ្យានជាតិ Hat Chao Mai ។

ក្នុងចំណោមកោះតូចធំទាំងនេះ កោះក្រាដាន គឺជាកោះស្រស់ស្អាតបំផុតតាមបែបធម្មជាតិ ដែលវាស្ថិតនៅមិនឆ្ងាយពីភាគខាងត្បូងខេត្តភូកេត ។ ដូច្នេះហើយ កោះនេះហ៊ុព័ទ្ធទៅដោយសម្រស់ធម្មជាតិ ដែលជាកន្លែងគ្មានហ្វូងមនុស្ស និងសំឡេងរំខាន ហើយអំណោយផលសម្រាប់អ្នកធ្វើកិច្ចការស្រាវជ្រាវ សម្រាកលំហែរកាយ និងអាំងថ្ងៃ ៕ ប្រភព ៖ khaosod

បទ «ខ្សែចង្កេះ» របស់តារាចម្រៀង តេវ រងពាក្យរិះគន់ពីអ្នកលេងបណ្តាញសង្គម

admin

April 6, 2023

បទ «ខ្សែចង្កេះ» របស់តារាចម្រៀង តេវ រងពាក្យរិះគន់ពីអ្នកលេងបណ្តាញសង្គម

ក្នុងឱកាសចូលឆ្នាំខ្មែរ ផលិតកម្មសាន់ដេ បានបញ្ចេញចម្រៀងជាបន្តបន្ទាប់ ក្នុងនោះបទចម្រៀងមួយបទមានចំណងជើងថា «ខ្សែចង្កេះ» ពីតារាចម្រៀង តេវ កំពុងរងពាក្យរិះគន់ពីអ្នកលេងបណ្តាញសង្គមហ្វេកប៊ុក។

ប្រិយមិត្តមួយចំនួនអាចស្គាល់ តេវ នៅក្នុងវីដេអូបែបកំប្លែង តែលោកក៏ជាតារាចម្រៀងមួយរូបជ្រកក្រោមដំបូលតែមួយជាមួយតារាចម្រៀង សុខ ពិសី , ឆាយ វីរៈយុទ្ធ រួមជាមួយតារាចម្រៀងផ្សេងទៀតនោះគឺជាផលិតកម្មសាន់ដេ។ ដ្បិតកន្លងមក តារាចម្រៀង តេវ បានបញ្ចេញបទផ្ទាល់ខ្លួនក្តី ប៉ុន្តែសន្ធឹកនៃការគាំទ្រនៅមានកម្រិតនៅឡើយ។

យ៉ាងណាមិញ នាយប់ថ្ងៃទី៥ ខែមេសា ផលិតកម្មសាន់ដេ បានបញ្ចេញបទចម្រៀងថ្មីមួយមានចំណងជើងថា «ខ្សែចង្កេះ» បកស្រាយដោយ តេវ ជាបទអបអរក្នុងឱកាសពិធីបុណ្យចូលឆ្នាំខ្មែរ។ អ្វីដែលនឹកស្មានមិនដល់នោះ បទចម្រៀងថ្មីរបស់ តេវ មួយបទនេះកំពុងរងពាក្យរិះគន់ពីអ្នកលេងបណ្តាញសង្គមហ្វេកប៊ុកដោយបានពួកគេបានចូលទៅខំមិនក្នុងផេកសាន់ដេយ៉ាងច្រើន។

អ្នកលើកបណ្តាញសង្គមបានលើកឡើងថា «មិនដឹងជាបទស្អីទេ ,បទចឹងលុបចោលទៅ អត់ចូលភ្លេង ភ្លេងលេងមិនស៊ីជាមួយតុងចម្រៀង, បទនេះស្តាប់ទៅដឹងពីរោះត្រង់ណាទេ ដូចគេច្រៀងលេងចឹងអត់ន័យ, ភ្លេងហើយសំឡេងទៅផ្សេងគ្នា,» អ្នកខ្លះទៀតបានលើកឡើងទៀតថា «ចប់ហើយ, រកកន្លែងឡូយអត់ឃើញ , សំឡេងតេវស្រាលនៅមានកម្រិត ធ្វើមិចបើគ្នាស្រលាញ់ខាងចម្រៀងគ្រាន់តែគ្នាច្រៀងមិនបានពីរោះ រួមទាំងការខំមិនជាច្រើនទៀត»។ ទន្ទឹមនឹងពាក្យរិះគន់នោះ ក៏មានអ្នកគាំទ្រមួយចំនួនបានលើកទឹកចិត្តទៅដល់ តេវ ផងដែរ។

គួរបញ្ជាក់ថា តេវ បានបញ្ចេញបទដូចជា «ស្ទាវទាត់ខ្យល់» ,«ចង់នាំអូនទៅនៅភពផ្កាយ» «មនុស្សប្រុសក៏ចេះយំ» ,«ជិះទូកទៅវត្ត» និងបទ« ធម្មជាតិ១០០%» ជាដើមនៅក្នុងផលិតកម្មសាន់ដេ៕