ប្រទេសរុស្ស៊ី ៖ រុស្ស៊ីបានធ្វើសេចក្តីថ្លែងការណ៍លើកដំបូង ក្រោយពីប្រទេសនេះក្លាយជាប្រធានក្រុមប្រឹក្សាសន្តិសុខអង្គការសហប្រជាជាតិ ប្រចាំខែមេសា ឆ្នាំ២០២៣ ។ រុស្ស៊ីបញ្ជាក់ថា ខ្លួនមិនបានគំរាមធ្វើសង្គ្រាមនុយក្លេអ៊ែរទេ ហើយការប្រើប្រាស់អាវុធនុយក្លេអ៊ែរ មិនមែនជាគោលការណ៍របស់កងទ័ពរុស្ស៊ីទេ ។

លោក Wassili Nebenzia ឯកអគ្គរាជទូតរុស្ស៊ីប្រចាំអង្គការសហប្រជាជាតិ (United Nations) បានធ្វើសេចក្តីថ្លែងការណ៍ជាលើកដំបូងកាលពីថ្ងៃទី៣ ខែមេសា កន្លងមកថា ក្រោយពីរុស្ស៊ីធ្វើជាប្រធានក្រុមប្រឹក្សាសន្តិសុខអង្គការសហប្រជាជាតិប្រចាំខែមេសា នៅថ្ងៃទី១ ខែមេសា លោកសូមបញ្ជាក់ថា រុស្ស៊ីមិនបានគំរាមធ្វើសង្គ្រាមនុយក្លេអ៊ែរដូចការចោទប្រកាន់ទេ ។

លោកបន្តថា ការចោទប្រកាន់មកលើរុស្ស៊ីនេះ គឺគ្រាន់តែជាពាក្យឃោសនាប៉ុណ្ណោះ ហើយការប្រើប្រាស់អាវុធនុយក្លេអ៊ែរមិនមែនជាគោលការណ៍របស់កងទ័ពរុស្ស៊ី ដូចការចោទប្រកាន់ទេ ។ ដរាបណា មានការរៀបចំសណ្តាប់ធ្នាប់នៅលើពិភពលោកបច្ចុប្បន្នរបស់អង្គការសហប្រជាជាតិ គឺនឹងគ្មានការកែប្រែច្បាប់ ឬការអនុវត្តផ្សេងៗទេ ។ ជាមួយគ្នានេះ រុស្ស៊ីបានផ្ញើលិខិតអញ្ជើញប្រទេសជាសមាជិកក្រុមប្រឹក្សាសន្តិសុខ ដើម្បីធ្វើការប្រជុំមិនផ្លូវការមួយនៅថ្ងៃទី៥ ខែមេសា អំពីប្រធានបទការជម្លៀសកុមារចេញពីតំបន់ជម្លោះ ។

មុននេះ រុស្ស៊ីបានបដិសេធថា ខ្លួនមិនបាននិរទេសកុមារចេញពីប្រទេសអ៊ុយក្រែនទេ ប៉ុន្តែរុស្ស៊ីគ្រាន់តែជួយជម្លៀសកុមារចេញពីតំបន់ជម្លោះប៉ុណ្ណោះ ខណៈតុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនប្រធានាធិបតីរុស្ស៊ី លោក វ៉្លាឌីមៀរ ពូទីន នៅខែមីនា ឆ្នាំ២០២៣ ។ តុលាការនេះចោទប្រកាន់ថា រុស្ស៊ីបាននិរទេសកុមារចេញពីអ៊ុយក្រែន ។

គួរបញ្ជាក់ថា ប្រទេសរុស្ស៊ីបានធ្វើជាប្រធានក្រុមប្រឹក្សាសន្តិសុខអង្គការសហប្រជាជាតិប្រចាំខែលើកចុងក្រោយបង្អស់ គឺនៅខែកុម្ភៈ ឆ្នាំ២០២២ ហើយនៅខែកុម្ភៈនេះដែរ គឺជាពេលដែលរុស្ស៊ីបញ្ជូនកងទ័ពទៅវាយប្រហារអ៊ុយក្រែន ។

ក្រុមប្រឹក្សាសន្តិសុខអង្គការសហប្រជាជាតិមានតួនាទីទទួលខុសត្រូវថែរក្សាសន្តិភាព ហើយប្រឆាំងនឹងការឈ្លានពាននានានៅលើពិភពលោក ។ ប្រធានក្រុមប្រឹក្សាសន្តិសុខ គឺជាតំណែងដែលប្រទេសនីមួយៗផ្លាស់ប្តូរគ្នាធ្វើជាប្រធាន១ខែម្តង ក្នុងចំណោមប្រទេសជាសមាជិកអចិន្ត្រៃយ៍ និងមិនអចិន្ត្រៃយ៍ សរុបចំនួន១៥ប្រទេស ដែលចាត់ឡើងតាមលេខរៀងតួអក្សរ ។ ម្យ៉ាងទៀត ប្រធានក្រុមប្រឹក្សាសន្តិសុខនេះ គ្រាន់តែជាតំណែងតាមបទប្បញ្ញត្តិប៉ុណ្ណោះ ហើយគ្មានអំណាចពិសេសអ្វីទេ ៕ ប្រភព ៖ TNN World

សហរដ្ឋអាមេរិក ៖ កាលពីថ្ងៃទី៥ ខែមេសា លោក Kevin McCarthy ប្រធានសភាតំណាងរាស្ត្រអាមេរិកបានទទួលស្វាគមន៍ និងពិភាក្សាជាមួយប្រធានាធិបតីតៃវ៉ាន់ លោកស្រី Tsai Ing-wen នៅរដ្ឋកាលីហ្វ័រញ៉ា បើទោះជាការជួបគ្នានេះមានការគំរាមកំហែងពីចិនក្តី ខណៈចិនលើកឡើងថា តៃវ៉ាន់ជាទឹកដីរបស់ខ្លួន ។ លោក Kevin McCarthy បានក្លាយជាមន្ត្រីកំពូលរបស់រដ្ឋាភិបាលអាមេរិក ដែលបានជជែកពិភាក្សាជាមួយមេដឹកនាំតៃវ៉ាន់នៅលើទឹកដីអាមេរិកក្នុងរយៈពេល៤៤ឆ្នាំ គិតចាប់ពីឆ្នាំ១៩៧៩ មក ។

លោក Kevin McCarthy ជាសមាជិកសភាមកពីគណបក្សសាធារណរដ្ឋ ហើយបើតាមតួនាទីរបស់លោកក្នុងសភាតំណាងរាស្ត្រ គឺលោកជាមេដឹកនាំលេខ៣ ក្នុងចំណោមមេដឹកនាំរបស់អាមេរិក បានទទួលស្វាគមន៍លោកស្រី Tsai Ing-wen កាលពីព្រឹកថ្ងៃទី៥ ខែមេសា នៅបណ្ណាល័យរបស់អតីតប្រធានាធិបតីអាមេរិក លោក Ronald Reagan នៅ Simi Valley រដ្ឋកាលីហ្វ័រញ៉ា ជិតទីក្រុង Los Angeles ។ គេសង្កេតឃើញថា មានក្រុមអ្នកគាំទ្រតៃវ៉ាន់ជាច្រើននាក់បានមកប្រមូលផ្តុំគ្នានៅខាងក្រៅបណ្ណាល័យដើម្បីបង្ហាញការគាំទ្រ និងលើកទង់ជាតិតៃវ៉ាន់ផងដែរ ។

លោកស្រី Tsai Ing-wen បានថ្លែងអំណរគុណអាមេរិកដែលប្រកាន់ជំហរនៅខាងតៃវ៉ាន់រហូតមក និងនៅពេលប្រជាធិបតេយ្យត្រូវបានគេគំរាមកំហែង ។ លោកស្រីក៏បានជជែកជាមួយមន្ត្រីមកពីគណបក្សប្រជាធិបតេយ្យ និងសាធារណរដ្ឋផងដែរអំពីភាពជឿជាក់របស់លោកស្រី និងសំដៅលើអតីតប្រធានាធិបតីអាមេរិក លោក Ronald Reagan ដែលបានថ្លែងថា ៖ «ដើម្បីរក្សាសន្តិសុខប្រទេសជាតិ យើងត្រូវតែមានភាពរឹងមាំ» ។

ចំណែកលោក Kevin McCarthy បានថ្លែងទៅកាន់មេដឹកនាំតៃវ៉ាន់ថា មិត្តភាពរវាងពលរដ្ឋតៃវ៉ាន់ និងអាមេរិក គឺជារឿងសំខាន់ចំពោះពិភពលោកសេរី និងសំខាន់ចំពោះការរក្សាសេរីភាពសេដ្ឋកិច្ច សន្តិភាព និងស្ថេរភាពក្នុងតំបន់ ។

គួរបញ្ជាក់ថា កាលពីខែសីហា ឆ្នាំ២០២២ ប្រទេសចិនបានធ្វើសមយុទ្ធយោធានៅជុំវិញកោះតៃវ៉ាន់ ក្រោយពីលោកស្រី Nancy Pelosi ដែលជាប្រធានសភាតំណាងរាស្ត្រអាមេរិកនៅពេលនោះ បានធ្វើដំណើរទស្សនកិច្ចមកកាន់តៃវ៉ាន់ ។

ក្រសួងការពារជាតិតៃវ៉ាន់ថ្លែងថា មាននាវា១គ្រឿងដែលផ្ទុកយន្តហោះអាមេរិកស្ថិតនៅក្នុងដែនទឹកនៃឆ្នេរសមុទ្រភាគអាគ្នេយ៍កោះតៃវ៉ាន់ មុនពេលការជួបពិភាក្សាគ្នារវាងលោកស្រី Tsai Ing-wen និងលោក Kevin McCarthy នៅរដ្ឋកាលីហ្វ័រញ៉ា ។

ទោះយ៉ាងណា បណ្តាអ្នកវិភាគគិតថា ការជួបគ្នារវាងមេដឹកនាំតៃវ៉ាន់ និងអាមេរិកលើកនេះ ប្រទេសចិននឹងតបតវិញខ្លាំងក្លាជាងពេលដែលលោកស្រី Nancy Pelosi មកកាន់តៃប៉ិទៅទៀត ៕ ប្រភព ៖ TNN World

ប្រទេសថៃ ៖ នៅថ្ងៃទី៦ ខែមេសា ស្ថានីយឧតុនិយមខេត្តនគរាជសីមាបានព្យាករណ៍អាកាសធាតុថា នៅថ្ងៃទី៧ ខែមេសា ខេត្តនេះមានអាកាសធាតុក្តៅខ្លាំង និងចុះអ័ព្ទនៅពេលថ្ងៃ ខណៈកាលពីថ្ងៃទី៥ ខែមេសា កន្លងមក សីតុណ្ហភាពកើនឡើងខ្ពស់បំផុត គឺស្មើនឹង៣៩អង្សារសេ ។ គេសង្ឃឹមថា សីតុណ្ហភាពនឹងធ្លាក់ចុះមកត្រឹម៣៨អង្សារសេនៅថ្ងៃទី៦ ខែមេសា ដោយសារមានខ្យល់ព្យុះ និងផ្គររន្ទះនៅតាមតំបន់ខ្លះ ដែលធ្វើឱ្យអាកាសធាតុក្តៅធ្លាក់ចុះ ។

ទោះយ៉ាងណា មួយរយៈនេះ អាកាសធាតុនៅប្រទេសថៃក្តៅខ្លាំងណាស់ គឺនៅពេលថ្ងៃ សីតុណ្ហភាពឡើងដល់៤០អង្សារសេឯណោះ ។ ដូច្នេះ គេឃើញឪពុកម្តាយសិស្សជាច្រើនបាននាំកូនចៅរបស់ខ្លួន និងមនុស្សចាស់នៅក្នុងផ្ទះទៅដើរកម្សាន្តតាមហាងទំនើបៗ ដើម្បីអង្គុយនៅកន្លែងមានម៉ាស៊ីនត្រជាក់ ក៏ដូចជាគេចពីអាកាសធាតុក្តៅផងដែរ ។ លើសពីនេះ មានក្រុមគ្រួសារជាច្រើនបានផ្លាស់ប្តូរគម្រោងដើរកម្សាន្តពេលក្មេងវ៉ាកង ហើយនាំគ្នាមកដើរលេងក្នុងហាងទំនើបវិញ ជាជាងទៅកម្សាន្តនៅតាមតំបន់ទេសចរណ៍នានា ។

គេសង្កេតឃើញថា នៅតាមសួនកម្សាន្ត កន្លែងលេងទឹក និងភោជនីយដ្ឋាននានាក្នុងហាងលក់ទំនិញ ឬមជ្ឈមណ្ឌលពាណិជ្ជកម្ម រហូតដល់កន្លែង check in ក្នុងបន្ទប់ម៉ាស៊ីនត្រជាក់ ទទួលបានការពេញនិយមជាខ្លាំងពីសំណាក់ភ្ញៀវ ហើយមានភ្ញៀវជាច្រើននាក់បានមករកសេវាកម្មនានាក្នុងផ្សារទំនើបជាបន្តបន្ទាប់ ដែលធ្វើឱ្យអាជីវកម្មទាំងនោះកាក់កបក្នុងរដូវក្តៅនេះ ។

ផ្សារទំនើបមួយឈ្មោះ The mall នៅខេត្តនគរាជសីមា គឺមានពលរដ្ឋរស់នៅក្នុងខេត្តនេះ និងមកពីខេត្តផ្សេងនាំគ្នាមករង់ចាំនៅមុខផ្សារទំនើបតាំងពីផ្សារនេះមិនទាន់បើកទ្វារ ក្នុងនោះមានអ្នកធ្វើការ និងមនុស្សចាស់ផងដែរ ។ លើសពីនេះ អ្នកខ្លះមកជាក្រុមគ្រួសារ និងក្រុមយុវវ័យនាំគ្នាមកទិញទំនិញ បរិភោគអាហារ និងសម្រាកលំហែរយកខ្យល់ត្រជាក់ក្នុងផ្សារទៀតផង ។

កញ្ញា សុផាន់សា គីងណុក អាយុ១៦ឆ្នាំ និយាយថា នាងបានមកលេងទីនេះជាមួយបងស្រី និងក្មួយអាយុ៦ឆ្នាំ ហើយនាងមកអង្គុយចាំតាំងពីផ្សារមិនទាន់បើកទ្វារម៉្លេះ ។ អាកាសធាតុខាងក្រៅក្តៅណាស់ នាងនៅផ្ទះមិនបានទេ ព្រោះខ្លាចក្មួយតូចរបស់នាងឈឺ ។ នាងបន្តថា បើនាងបើកម៉ាស៊ីនត្រជាក់ ឬកង្ហារនៅផ្ទះវាអស់ភ្លើង ដូច្នេះហើយនាងនាំគ្នាមកផ្សារទំនើបដើម្បីគេចពីអាកាសធាតុក្តៅ ដែលទីនេះមានម៉ាស៊ីនត្រជាក់ ហើយមានសេវាកម្មជាច្រើនទៀតងាយស្រួលដល់នាងអាចអង្គុយលេងនៅទីនេះពេញមួយថ្ងៃ ។

ចំណែកអ្នកនាង ផាតឆារ៉ាផន គង់ឆឺនជីត អាយុ៣៣ឆ្នាំ និយាយថា នាងបានធ្វើដំណើរមកពីខេត្តបុរីរាំ ដើម្បីមកលេងសាច់ញាតិនៅខេត្តនគរាជសីមា ។ ពីដំបូង នាងបានដាក់ផែនការថា នឹងនាំគ្រួសារមកលេងនៅទីនេះ ប៉ុន្តែអាកាសធាតុខាងក្រៅក្តៅពេក នាងមិនដឹងទៅលេងនៅកន្លែងណាទេ ។ នាងថា បើនៅផ្ទះ តម្លៃភ្លើងក៏ថ្លៃ ដូច្នេះ នាងបាននាំបងស្រី និងក្មួយៗមកលេងក្នុងផ្សារទំនើបនេះ ព្រោះមានអាកាសធាតុត្រជាក់ជាងខាងក្រៅ និងបានសប្បាយរីករាយផងដែរ ៕ ប្រភព ៖ khaosod

ប្រទេសថៃ ៖ វាបានក្លាយជាវីដេអូឃ្លីបល្បីល្បាញមួយនៅប្រទេសថៃ ក្រោយពីអ្នកប្រើប្រាស់កម្មវិធី TikTok ម្នាក់ឈ្មោះ @pakorn.tee ជាម្ចាស់ចម្ការទុរេនមួយកន្លែងនៅខេត្តត្រាត បានបង្ហោះវីដេអូមួយដែលខ្លួនបានដាំទុរេនពូជក្រៈឌុមថង អស់រយៈពេល៤ឆ្នាំ ប៉ុន្តែនៅពេលប្រមូលផលឃើញថា ផ្លែទុរេនទាំងអស់ដែលម្ចាស់ចម្ការបេះមក គ្មានគ្រាប់ និងគ្មានសាច់សូម្បីតែបន្តិច ហើយក៏គ្មានក្លិនឈ្ងុយដែរ ។

ម្ចាស់ចម្ការទុរេននិយាយថា ៖ «សូមការណែនាំពីអ្នកទាំងអស់គ្នាផង ខ្ញុំបានដាំទុរេនពូជក្រៈឌុមថងអស់រយៈពេល៤ឆ្នាំហើយ ប៉ុន្តែហេតុអ្វីបានជាវាគ្មានសាច់អីចឹង? ហើយមិនត្រឹមតែគ្មានសាច់ទេ សូម្បីតែក្លិនឈ្ងុយ ក៏គ្មានដែរ» ។

បន្ទាប់ពីវីដេអូនេះបង្ហោះរួច មានមនុស្សជាច្រើនបានចូលមកបញ្ចេញមតិថា ខ្លួនក៏ធ្លាប់ដាំទុរេនពូជនេះដូចគ្នាដែរ វាជារឿងធម្មតាទេ ដែលទុរេនពូជក្រៈឌុមថងចេញផ្លែដំបូងគ្មានសាច់ ប៉ុន្តែនៅពេលវាចេញផ្លែឆ្នាំក្រោយ វានឹងមានសាច់ដូចធម្មតា ហើយម្ចាស់ចម្ការទុរេនដឹងតែត្រៀមខ្លួនប្រមូលប្រាក់ឱ្យហើយទៅ ។

យោងតាមទិន្នន័យរបស់ភ្នាក់ងារផ្សព្វផ្សាយផលិតផលកសិកម្ម អំពីការប្រមូលផលទុរេនបង្ហាញថា ទុរេននឹងផ្តល់ទិន្នផលក្រោយពីបានដាំដុះរយៈពេល៥ឆ្នាំ ។ ការចេញផ្លែតិចឬច្រើន វាអាស្រ័យលើការលូតលាស់របស់ដើមផងដែរ ប៉ុន្តែបើកសិករចង់បានទុរេនមានគុណភាពល្អ គឺត្រូវតែអនុវត្តតាម៣ចំណុចនេះ ៖

១-រៀបចំផ្ទៃដីដាំដុះឱ្យបានសមស្រប
២-ធ្វើប្រព័ន្ធបង្ហូរទឹកស្រោចទុរេន
៣-មានបច្ចេកទេសដាំដុះត្រឹមត្រូវ

ប្រភព ៖ sanook