ទោះបីជាមិនបានអបអរប្អូនស្រីដោយផ្ទាល់នៅថ្ងៃទទួលសញ្ញាប័ត្របញ្ចប់ការសិក្សា តារាចម្រៀងជី ដេវីត បានអបអរប្អូនស្រី ងួន ចាន់ដារីយ៉ា ពីចម្ងាយនិងបង្ហាញអារម្មណ៍មានមោទកភាពចំពោះប្អូនដែលធ្វើឱ្យក្តីស្រមៃរបស់លោករយៈពេល១២ឆ្នាំមកនេះក្លាយជាការពិត។
ក្រោយពីមមាញឹកជាមួយការងារសិល្បៈមួយក្ឌាំង តារាចម្រៀង ជី ដេវីត និងគូស្នេហ៍ អ្នកនាង ទេព បូព្រឹក្ស បានឆ្លៀតពេលទៅកម្សាន្តនៅលើទឹកដីបែបអឺរ៉ុបសាងភាពផ្អែមល្ហែមជាមួយគ្នាយ៉ាងខ្លាំងធ្វើឱ្យអ្នកគាំទ្រច្រណែនមិនតិចនោះទេ រួមទាំងការដើរទិញរបស់ប្រេនៗជាច្រើនទុកជាកាដូសម្រាប់ខ្លួនឯង។ ជាមួយគ្នានេះដោយសារតែខ្លួននៅក្រៅប្រទេសមិនបានចូលរួមអបអរប្អូនស្រីក្នុងថ្ងៃទទួលសញ្ញាបត្រដោយផ្ទាល់លោកបានបង្ហោះសារអបអរប្អូនស្រីពីចម្ងាយផងដែរ។
នៅយប់ថ្ងៃទី២៤ ខែឧសភា ម៉ោងនៅប្រទេសកម្ពុជា តារាចម្រៀង ជី ដេវីត បានបង្ហោះសារអបអរប្អូនយ៉ាងដូច្នេះថា «ក្នុងថ្ងៃនេះ ប្អូនស្រីរបស់ខ្ញុំបានទទួលសញ្ញាបត្របញ្ចប់ថ្នាក់បរិញ្ញាបត្រនៅមហាវិទ្យាល័យបុរាណវិទ្យា ឯកទេស បុរាណវិទ្យា នៃសាកលវិទ្យាល័យភូមិន្ទវិចិត្រសិល្បៈ ក្តីស្រមៃរបស់ខ្ញុំកាលពី ១២ឆ្នាំមុន ត្រូវបានសម្រេចជាច្រើននៅក្នុងឆ្នាំនេះ ។ ខ្ញុំត្រូវកំណត់គោលដៅថ្មីទៀតសម្រាប់ជំនាន់ក្រោយ ក្នុងនាមខ្ញុំ ជាបងប្រុស ជាឳពុកជាម្តាយផង I’m so Proud of you My Dariya»។
ងាកទៅកាន់តារាចម្រៀង ទេព បូព្រឹក្ស វិញក៏បានបង្ហាញរំភើបយ៉ាងខ្លាំងចំពោះប្អូនថ្លៃក្នុងថ្ងៃទទួលសញ្ញាបត្រ ព្រមទាំងមានបំណងចង់ឱ្យប្អូនថ្លៃបន្តការសិក្សាថ្នាក់អនុបណ្ឌិតផងដែរ៕