ប្រទេសវៀតណាម ៖ ក្រុមស្រាវជ្រាវផ្នែកទីផ្សារ Counterpoint បានបញ្ជាក់ថា ចំនួនទូរស័ព្ទស្មាតហ្វូនដែលគេនាំចេញទៅកាន់ប្រទេសវៀតណាមបានធ្លាក់ចុះ៣០% នៅត្រីមាសដំបូងឆ្នាំ២០២៣ បើធៀបនឹងឆ្នាំ២០២២ ។ នេះចាត់ទុកថា ជាការធ្លាក់ចុះខ្លាំងបំផុតក្នុងបណ្តាទីផ្សារគោលដៅចំនួន៥ នៅតំបន់អាស៊ីអាគ្នេយ៍ ។ ចំណែកការនាំចេញទូរស័ព្ទស្មាតហ្វូនទៅប្រទេសម៉ាឡេស៊ីបានធ្លាក់ចុះ២៩% បើធៀបនឹងឆ្នាំ២០២២ រីឯប្រទេសថៃធ្លាក់ចុះ១% ។

ទីផ្សារគោលដៅចំនួន៥ ក្នុងតំបន់អាស៊ីអាគ្នេយ៍ រួមទាំងប្រទេសឥណ្ឌូណេស៊ី និងហ្វីលីពីន មានចំនួនការនាំចេញទូរស័ព្ទស្មាតហ្វូនជារួមធ្លាក់ចុះ១៣% ។ លោក Glen Cardoza អ្នកវិភាគរបស់ក្រុមស្រាវជ្រាវទីផ្សារ Counterpoint លើកឡើងថា អតិថិជននៅវៀតណាមមិនទាន់មានទំនុកចិត្តទាំងស្រុងទេ ។ ម្យ៉ាងទៀត អត្រាអតិផរណាក្នុងតំបន់បានធ្វើឱ្យប៉ះពាល់ដល់ទំនុកចិត្តអ្នកប្រើប្រាស់ និងធ្វើឱ្យតម្រូវការទិញទូរស័ព្ទថ្មីធ្លាក់ចុះ ។

ក្រៅពីនេះ មូលហេតុមួយទៀតនៃការធ្លាក់ចុះតម្រូវការទូរស័ព្ទស្មាតហ្វូននៅត្រីមាសដំបូងឆ្នាំ២០២៣ ដោយសារប្រទេសវៀតណាមបានទិញផលិតផលជាច្រើនមុខនៅត្រីមាសចុងក្រោយឆ្នាំ២០២២ ។ គេសង្កេតឃើញថា ចាប់ពីខែមករា ឆ្នាំ២០២៣ មក ពលរដ្ឋវៀតណាមភាគច្រើនចាប់ផ្តើមសន្សំសំចៃប្រាក់លើការចំណាយទិញផលិតផលផ្សេងៗ ។

ក្រុមស្រាវជ្រាវទីផ្សារ Counterpoint បានបង្ហាញឱ្យឃើញថា នៅត្រីមាសដំបូងឆ្នាំ២០២៣ ក្រុមហ៊ុន Samsung អាចលក់ទូរស័ព្ទស្មាតហ្វូនបានច្រើនជាងគេនៅប្រទេសវៀតណាម និងកាន់កាប់ចំណែកទីផ្សាររហូតដល់២១% បន្ទាប់មក គឺក្រុមហ៊ុន Oppo ស្មើ២០%, Vivo 14%, Xiaomi 14%, Realme 12% និង Apple 7% ។ ទោះយ៉ាងណា ចំនួនការលក់ទូរស័ព្ទស្មាតហ្វូនគ្រប់ម៉ូដបានធ្លាក់ចុះ បើធៀបនឹងរយៈពេលដូចគ្នានៅឆ្នាំ២០២២ លើកលែងតែក្រុមហ៊ុន Apple ដែលការលក់ទូរស័ព្ទស្មាតហ្វូនបានកើនឡើង១៨% ៕ ប្រភព ៖ AEC connect

យើងនឹងមិនឃើញផ្កាយនៅលើមេឃទេក្នុងរយៈពេល២០ឆ្នាំទៀត ដោយសារមានការបំពុលពន្លឺកើនឡើងយ៉ាងឆាប់រហ័ស ។ អ្នកវិទ្យាសាស្ត្របានអំពាវនាវឱ្យប្រទេសទាំងឡាយប្រញាប់ដោះស្រាយបញ្ហានេះ បើមិនដូច្នោះទេ វាមិនត្រឹមតែបាត់បង់ផ្កាយប៉ុណ្ណោះទេ ប៉ុន្តែនឹងប៉ះពាល់ដល់សុខភាពរបស់មនុស្ស និងសត្វទៀតផង ។ អ្នកស្រាវជ្រាវលើកឡើងថា ការបំពុលពន្លឺបានកើនឡើង១០% ក្នុង១ឆ្នាំនៅលើពិភពលោក ហើយធ្វើឱ្យក្មេងដែលកើតនាពេលបច្ចុប្បន្ននេះឃើញផ្កាយត្រឹមតែ២៥០ប្រភេទ ប៉ុណ្ណោះ ហើយនៅពេលពួកគេមានអាយុ១៨ឆ្នាំ ពួកគេនឹងឃើញផ្កាយត្រឹមតែ១០០ប្រភេទ ។

របាយការណ៍ថ្មីរបស់តារាវិទូមកពី Royal Astronomical Society ប្រទេសអង់គ្លេសបញ្ជាក់ថា បញ្ហាការបំពុលពន្លឺកំពុងកើនឡើងយ៉ាងឆាប់រហ័ស ជាពិសេស ចាប់ពីឆ្នាំ២០១៦ ដែលធ្វើឱ្យមនុស្ស១ផ្នែកក្នុងចំណោម៣ផ្នែកនៅលើពិភពលោក មើលមិនឃើញកាឡាក់ស៊ី។ អត្រាកើនឡើងនេះអាចធ្វើឱ្យផ្កាយនៅលើមេឃទាំងអស់នឹងបាត់បង់ក្នុងរយៈពេល២០ឆ្នាំខាងមុខ ។ បច្ចុប្បន្ន យើងចាប់ផ្តើមឃើញពពួកផ្កាយខ្លះមិនគ្រប់ចំនួន ហើយមានតែពេលមេឃងងិតប៉ុណ្ណោះ ទើបយើងអាចមើលឃើញផ្កាយទាំងនោះ ។ ការបំពុលពន្លឺបានកើនឡើង ហើយបើយើងមិនដោះស្រាយទេនោះ វានឹងក្លាយជាបញ្ហាសម្រាប់ក្មេងជំនាន់ក្រោយ ។

តារាវិទូមកពី Royal Astronomical Society លើកឡើងថា ៖ «ផ្ទៃមេឃនៅពេលយប់ជាផ្នែកមួយនៃបរិស្ថានរបស់យើង ហើយវានឹងក្លាយជាបញ្ហាធំ ខណៈក្មេងជំនាន់ក្រោយមិនសូវមើលឃើញផ្កាយ ដូចគ្នានឹងមនុស្សបច្ចុប្បន្នមិនធ្លាប់ឃើញសម្បុកបក្សីដែរ ។ យើងអាចចាប់អារម្មណ៍រឿងនេះបាន បើទោះជាយើងមិនមែនជាតារាវិទូក្តី» ។ ចំណែកតារាវិទូមកពីសាកលវិទ្យាល័យ Universidad Politécnica de Madrid លើកឡើងថា ការបំពុលពន្លឺ ជាបញ្ហាដែលគេចាប់អារម្មណ៍តិចតួច ព្រោះជារឿងនៅឆ្ងាយពីខ្លួន និងប៉ះពាល់មិនបាន ប៉ុន្តែវានឹងប៉ះពាល់ដល់បរិស្ថាន ។

តារាវិទូបន្ថែមថា មនុស្សភាគច្រើនមិនបានយល់ពីផលប៉ះពាល់អវិជ្ជមាននៃការបំពុលពន្លឺទេ វាដូចនឹងផលប៉ះពាល់ដោយសារការជក់បារីកាលពីឆ្នាំ១៩៨០ ដែរ ។ ដូច្នេះ គួរដោះស្រាយបញ្ហានេះជាបន្ទាន់ និងចាត់វិធានការដូចជា ដាក់បទបញ្ជាតឹងរ៉ឹងពាក់ព័ន្ធនឹងទិសដៅពន្លឺ និងបង្កើតតំបន់អនុរក្សផ្ទៃមេឃងងិតបន្ថែមទៀត ។

លើសពីនេះ ក្រៅពីមានផលប៉ះពាល់លើផ្កាយហើយ ការបំពុលពន្លឺក៏ប៉ះពាល់ដល់បរិស្ថានទៀតផង ព្រោះសត្វអណ្តើកសមុទ្រ និងសត្វស្លាបបានប្រើពន្លឺព្រះច័ន្ទដើម្បីមើលផ្លូវ ។ ដូច្នេះ ពន្លឺរបស់អំពូលភ្លើងធ្វើឱ្យសត្វវង្វេងផ្លូវ ហើយចុងក្រោយ វាអាចងា.ប់ ។ បើយើងចង់ជួយកាត់បន្ថយការបំពុលពន្លឺ យើងអាចធ្វើបានចាប់ពីពេលនេះទៅ គឺត្រូវបិទអំពូលភ្លើងនៅពេលយើងពុំបានប្រើប្រាស់វា ពីព្រោះនឹងជួយកាត់បន្ថយការសាយភាយពន្លឺទៅកាន់ផ្ទៃមេឃ ៕

ប្រភព ៖ environman

ក្នុងការគ្រប់គ្រងទឹកដី ដឹកនាំនយោបាយ ការពាររាជបល្ល័ង្កឱ្យមានភាពស្ថិតស្ថិរ គឺមិនមែនជារឿងងាយស្រួលឡើយសម្រាប់ព្រះមហាក្សត្រគ្រប់អង្គ ដែលក្នុងនោះមានតែព្រះមហាក្សត្រ ៦ អង្គប៉ុណ្ណោះ ដែលឡើងសោយរាជ្យយូរជាងគេក្នុងប្រវត្តិសាស្ត្រពិភពលោក។

១. ព្រះចៅអធិរាជល្វីទី១៤ (Louis XIV) ៖ ព្រះមហាក្សត្រដែលគ្រងរាជ្យបានយូរជាងគេបង្អស់ក្នុងកំណត់ត្រាប្រវត្តិសាស្រ្តពិភពលោក គឺព្រះចៅអធិរាជល្វីទី១៤ នៃចក្រភពបារាំង។ ព្រះអង្គបានឡើងសោយរាជ្យ នៅថ្ងៃទី១៤ ខែមេសា ឆ្នាំ១៦៤៣ រហូតដល់សោយទិវង្គតនៅថ្ងៃទី១ ខែកញ្ញា ឆ្នាំ១៧១៥ ដែលមានរយៈពេលសោយរាជ្យសរុប ៧២ ឆ្នាំ និង ១១០ ថ្ងៃ។

២.ព្រះមហាក្សត្រិយ៍អេលីហ្សាប៊ែតទី២ (Elizabeth II)៖ មហាក្សត្រិយ៍ចក្រភពអង់គ្លេស អេលីហ្សាបេតទី២ ទ្រង់បានឡើងសោយរាជ្យ នៅថ្ងៃទី ៦ ខែកុម្ភៈ ឆ្នាំ១៩៥២ ដល់ថ្ងៃទី៨ ខែកញ្ញា ឆ្នាំ២០២២ ដែលមានរយៈពេលជាង ៧០ ឆ្នាំ និង ២១៩ ថ្ងៃ។

៣.ព្រះចៅភូមិបុលអតុល្យតេជះ (Bhumibol Adulyadej)៖ អតីតព្រះមហាក្សត្រថៃ ភូមិបុលអតុល្យតេជះ បានឡើងសោយរាជ្យសម្បត្តិ នៅថ្ងៃទី ៩ ខែមិថុនា ឆ្នាំ១៩៦០ ដល់ថ្ងៃទី១៣ ខែតុលា ឆ្នាំ២០១៦ ដែលមានរយៈពេល ៧០ ឆ្នាំ និង ១២៦ ថ្ងៃ។

៤.ព្រះចៅយ៉ូហាន់ទី២ (Johann II)៖ ព្រះចៅយ៉ូហាន់ទី២ នៃប្រទេសលិចតិនស្តាញ បានឡើងសោយរាជ្យចាប់ពីថ្ងៃទី១២ ខែវិច្ឆិកា ឆ្នាំ១៨៥៨ ដល់ថ្ងៃទី១១ ខែកុម្ភៈ ឆ្នាំ១៩២៩ ដែលមានរយៈពេល ៧០ ឆ្នាំនិង ៩១ ថ្ងៃ។ លិចតិនស្តាញ ជាប្រទេសអឺរ៉ុបតូចមួយនៅតំបន់ជួរភ្នំអាល់ (Alps) ចន្លោះប្រទេសអូទ្រីស និងប្រទេសស្វីស។

៥.ព្រះចៅឃ្នីនីចចាណាអាប់ប៉ាកាល់ទី១ (K’inich Janaab’ Pakal l)៖ ព្រះចៅឃ្នីនីចចាណាអាប់ប៉ាកាល់ទី១ បានឡើងគ្រងរាជ្យនៅអាណាចក្រមួយនៃអរិយធម៌ម៉ាយ៉ា (Maya) បានរយៈពេល ៦៨ ឆ្នាំនិង ៣៣ ថ្ងៃ ចាប់ពីឆ្នាំ ៦១៥-៦៨៣ នៃគ្រិស្តសករាជ អតីតទឹកដីរបស់អាណាចក្របុរាណនេះ បច្ចុប្បន្នជាផ្នែកមួយនៃប្រទេសម៉ិកស៊ិក។

៦.ព្រះចៅហ្វ្រេនស៊ីចូសេប១ ( Francis Joseph I)៖ អតីតព្រះមហាក្សត្រចក្រភពអូទ្រីស ទ្រង់បានឡើងសោយរាជ្យសម្បត្តិ អស់រយៈពេល ៦៧ ឆ្នាំនិង ៣៥៥ ថ្ងៃ គឺចាប់ពីថ្ងៃទី២ ខែធ្នូ ឆ្នាំ១៨៤៨ ដល់ ថ្ងៃទី២១ ខែវិច្ឆិកា ឆ្នាំ១៩១៦ ៕

ប្រទេសថៃ ៖ បុរសម្នាក់ឈ្មោះ Xin You Chue ឬឈ្មោះ Xinba ជាស្តេចលក់ផលិតផលតាមអនឡាញមកពីប្រទេសចិន អាចឡាយលក់ទុរេនថៃបានរហូតដល់១,៦លានផ្លែ ដោយចំណាយពេលត្រឹមតែ១ថ្ងៃប៉ុណ្ណោះ ហើយទទួលបានប្រាក់ចំណូលរហូតដល់១.៥០០លានបាត ។ ក្រោយពីលោក Xinba អាចលក់ទុរេនដាច់ក្នុងចំនួនដ៏ច្រើនមក បានធ្វើឱ្យគេចាប់អារម្មណ៍ជាខ្លាំងទាំងនៅប្រទេសថៃ និងចិន ។

កាលពីថ្ងៃទី៧ ខែឧសភា កន្លងមក លោក Xinba ជាស្ថាបនិករបស់ Xinxuan Group ជាក្រុមហ៊ុនផ្សព្វផ្សាយពាណិជ្ជកម្មអេឡិចត្រូនិកឈានមុខគេនៅប្រទេសចិន បានជិះយន្តហោះមកឡាយលក់ផលិតផលអនឡាញនៅប្រទេសថៃ ព្រមទាំងជួយផ្សព្វផ្សាយផលិតផលរបស់ថៃជាច្រើនមុខ ដូចជា ទុរេន មង្ឃុត អង្ករផ្កាម្លិះ ផលិតផលថែរក្សាស្បែក និងផលិតផលធ្វើពីជ័រកៅស៊ូ ។ បន្ទាប់ពីលោក Xinba បានឡាយលក់ផលិតផលមិនយូរប៉ុន្មានឃើញថា បរិមាណការបញ្ជាទិញសរុបស្មើជាង៦,៧៨លាននាក់ ។ ថៃចាត់ទុកថា វាជារឿងអស្ចារ្យខ្លាំងណាស់សម្រាប់ប្រទេសរបស់ខ្លួន តាមរយៈការទិញផលិតផលអនឡាញរបស់ចិន ។

ចំណែកការលក់ផ្លែមង្ឃុតវិញ មានអ្នកកុម្មង់ទិញចំនួន១,២៦លាននាក់ក្នុង១វិនាទី និងទទួលបានប្រាក់ចំណូលចំនួន១០០លានយាន់ ឬប្រមាណ៤៨០លានបាត ។ រីឯទុរេនម៉ន់ថង មានអ្នកកុម្មង់ទិញសរុបចំនួន១,៦២លានផ្លែ ដែលមានទម្ងន់សរុប៤.៨០០តោន និងទទួលបានប្រាក់ចំណូលសរុបចំនួន៣០០លានយាន់ ឬប្រមាណ១.៥០០លានបាត ។

វាបានក្លាយជារឿងមួយគួរឱ្យចាប់អារម្មណ៍នៅប្រទេសចិន ខណៈអាជីវករលក់ទុរេននៅចិននិយាយថា ការឡាយលក់ផលិតផលរបស់លោក Xinba គឺជាដើមហេតុដែលធ្វើឱ្យតម្លៃទុរេននៅចិនកើនឡើងខ្ពស់ រហូតដល់ឈ្មួញតូចតាចគ្មានទុរេនលក់ និងធ្វើឱ្យខ្វះខាតទុរេនថៃនៅចិន ។ ក្នុងរយៈពេលប៉ុន្មានឆ្នាំកន្លងមកនេះ ទីផ្សារ e-commerce របស់ប្រទេសចិនបានរីកចម្រើនយ៉ាងឆាប់រហ័ស ហើយថៃត្រូវបានគេចាត់ទុកថា ជាប្រទេសធំផ្នែកកសិកម្ម និងការផលិតទំនិញ ក៏ដូចជាមានតួនាទីសំខាន់ក្នុងផ្នែកផ្គត់ផ្គង់ផងដែរ ។ ហេតុនេះ ប្រទេសថៃបានក្លាយជាគោលដៅទី១ ក្នុងការពង្រីកអាជីវកម្មនៅក្រៅប្រទេសរបស់ក្រុមហ៊ុន Xinxuan Group ។

លោក Xinba ជាស្ថាបនិកក្រុមហ៊ុន Xinxuan Group លើកឡើងថា លោកនឹងយកបទពិសោធន៍ និងធនធានសេដ្ឋកិច្ចឌីជីថលរបស់ចិនមកកាន់ប្រទេសថៃ ព្រមទាំងជួយប្រទេសថៃឱ្យហ្វឹកហាត់អ្នកជំនាញផ្នែកឌីជីថលផងដែរ ។ លោកបន្តថា លោកនឹងប្រើប្រាស់សេដ្ឋកិច្ចឌីជីថលដើម្បីជំរុញការផ្លាស់ប្តូរ និងធ្វើឱ្យប្រសើរឡើងនូវរចនាសម្ព័ន្ធឧស្សាហកម្មរបស់ប្រទេសនានានៅលើពិភពលោក ព្រមទាំងឆ្ពោះទៅរកផ្លូវពាណិជ្ជកម្មឌីជីថល ៕ ប្រភព ៖ khaosod

បរទេស៖ ក្រុមហ៊ុនដំបូងរបស់អង់គ្លេស Solar Botanic Trees គ្រោងបង្កើតដើមឈើសាកថ្មរថយន្តអគ្គិសនី ដែលមានសមត្ថភាពពិសេសប្រមូលថាមពលពីដំបូលដែលបំពាក់ដោយបន្ទះស្រូបពន្លឺព្រះអាទិត្យ ហើយរក្សាទុកថ្មនៅក្នុងប្រអប់។
យោងតាមប្រភពសារព័ត៌មាន CNN ដែលចេញផ្សាយនៅថ្ងៃទី២៩ ខែឧសភា បានឱ្យដឹងថា ក្រុមហ៊ុន Solar Botanic Trees បានចាប់ដៃគូជាមួយក្រុមហ៊ុន Raw Charging ដើម្បីដំឡើងរោងចក្រសាកថ្មរថយន្តអគ្គិសនីនៅចុងឆ្នាំនេះ។

ដោយបច្ចុប្បន្នក្រុមហ៊ុនកំពុងត្រៀមផលិតដើមឈើអគ្គិសនី និងសាកល្បងជាមួយកម្ពស់ ៤.៥ ម៉ែត្រ ដោយដំបូលមានទទឹង ៧ ម៉ែត្រ មុនពេលចាប់ផ្តើមការផលិតជាផ្លូវការនៅចុងឆ្នាំនេះ។ ដើមឈើថាមពលរបស់ Solar Botanic Trees ក៏បានផ្តល់នូវម្លប់ និងមានសោភ័ណភាព ដែលអាចដំឡើងបានយ៉ាងងាយស្រួលនៅកន្លែងសាធារណៈ។

យោងទៅតាម Energy Saving Trust (EST) ដែលជាអង្គការរបស់ចក្រភពអង់គ្លេសដែលមានឯកទេសក្នុងដំណោះស្រាយកាបូនទាប បានឱ្យដឹងថា តម្លៃនៃដើមឈើថាមពលអគ្គិសនីអាចស្ថិតនៅក្នុងចន្លោះពី ២២,០០០ ទៅ ៣០,០០០ ដុល្លារ។ដើមឈើថាមពលអគ្គិសនីនីមួយៗនឹងត្រូវបានបំពាក់ដោយប្រព័ន្ធផ្ទុក និងគ្រប់គ្រងថាមពលដោយ AI ដែលអាចភ្ជាប់ដើមឈើជាច្រើនដើម្បីបង្កើតជាបណ្តាញខ្នាតតូចក្នុងតំបន់ ឬភ្ជាប់ដើមឈើទៅបណ្តាញជាតិដើម្បីបំប្លែងថាមពលលើស។ ដើមឈើក៏អាចទាញអគ្គិសនីពីបណ្តាញ ដើម្បីសាករថយន្តនៅពេលយប់ ឬក្នុងរដូវរងាផងដែរ។

ទោះជាយ៉ាងណាក៏ដោយ ដើម្បីកាត់បន្ថយការពឹងផ្អែកលើបណ្តាញអគ្គិសនី Solar Botanic Trees គ្រោងនឹងបញ្ចូលថ្មនៅក្នុងធុងដែលជួយផ្ទុកថាមពលលើសនៅពេលថ្ងៃសម្រាប់ប្រើប្រាស់នៅពេលយប់។ នៅឆ្នាំ ២០២៥ ក្រុមហ៊ុន Solar នឹងសាងសង់ដើមឈើអគ្គិសនីយ៉ាងហោចណាស់ ១,០០០ ដើមក្នុងមួយឆ្នាំ។ ក្រុមហ៊ុន ក៏បាននិយាយថាខ្លួននឹងសាងសង់ដើមឈើដំបូងគេនៅក្នុងចក្រភពអង់គ្លេសមុនពេលពង្រីកពាណិជ្ជកម្មនៅទូទាំងទ្វីបអឺរ៉ុបនិងអាមេរិកខាងជើង៕

ប្រភព៖vnexpress

រដ្ឋធានីព្យុងយ៉ាង៖ កូរ៉េខាងជើង បានប្រកាស អំពីការបាញ់ផ្កាយរណចារកម្មរបស់ខ្លួន ធ្លាក់ចូលទៅក្នុងសមុទ្រ ស្របពេលក្រុងតូក្យូ បានព្រមានអំពីការដាក់ពង្រាយប្រព័ន្ធការពារដែនអាកាសរបស់ខ្លួន ឲ្យស្ថិតក្នុងការប្រុងជើងការ សម្រាប់ការបាញ់កម្ទេចមីស៊ីលណាមួយរបស់ក្រុងព្យុងយ៉ាង ហោះចូលមកលើដែនអាកាសរបស់ជប៉ុន។

សារព័ត៌មានរបស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃពុធ ទី៣១ ខែឧសភា ឆ្នាំ២០២៣ ថា កូរ៉េខាងជើង បានអះអាង ថា ឧបទ្ទវហេតុនេះ បានកើតឡើង ស្របពេលក្រុងព្យុងយ៉ាង គ្រោងនឹងបញ្ជូនផ្កាយរណបអវកាសចារកម្មរបស់ខ្លួន ជាដំបូង ទៅកាន់ទីអវកាស ប៉ុន្ដែរ៉ុក្កែតនោះ បានធ្លាក់ចូលទៅក្នុងសមុទ្រ។

ការបាញ់រ៉ុក្កែតរបស់កូរ៉េខាងជើង បានជំរុញឱ្យជប៉ុន ព្រមានដល់អ្នកស្រុករបស់ខ្លួន នៅទីក្រុងអូគីណាវ៉ា ឲ្យស្ថិតក្នុងការប្រុងប្រយ័ត្ន។ ប៉ុន្តែក្រោយមក ក៏មានសេចក្ដីរាយការណ៍ ថា ការបាញ់រ៉ុក្កែតនោះ មិនបានបង្កគ្រោះថ្នាក់ មកលើទឹកដីរបស់ជប៉ុន នោះឡើយ។

កូរ៉េខាងជើង បានប្រកាសមុននេះ ថា ក្រុងព្យុងយ៉ាង មានគម្រោងនឹងបាញ់បង្ហោះផ្កាយរណប នៅថ្ងៃទី១១ ខែមិថុនា សម្រាប់តាមដានសកម្មភាពយោធារបស់សហរដ្ឋអាមេរិក នៅលើឧបទ្វីកូរ៉េ។ ឥឡូវនេះ ក្រុងព្យុងយ៉ាង បានប្រកាស ថា កូរ៉េខាជើង នឹងមានគោលបំណង បាញ់បង្ហោះរ៉ុក្កែតចារកម្មជាលើកទី២ នៅក្នុងពេលខាងមុខដ៏ឆាប់ៗនេះ។

លោក ហ៊្វូមីអូ គីស៊ីដា (Fumio Kishida) នាយករដ្ឋមន្រ្ដីជប៉ុន បានបញ្ជាក់ ថា កូរ៉េខាងជើង ហាក់បី ដូចជា បាញ់មីស៊ីលផ្លោង ហើយក្រុងតូក្យូ កំពុងតែវិភាគព័ត៌មានលម្អិតបន្ថែមទៀត។ ឥឡូវនេះ នៅទាន់មិនមានសេចក្ដីរបាយការណ៍ អំពីការខូចខាត ក្រោយការបាញ់បង្ហោះរ៉ុក្កែតរបស់កូរ៉េខាងជើង នោះទេ។ ជប៉ុន បានអះអាង នៅមុននេះបន្ដិច ថា ក្រុងតូក្យូ បានត្រៀមខ្លួនរួចជាស្រេច ដើម្បីបាញ់ទម្លាក់រាល់មីស៊ីលណាមួយ បង្កនូវការគំរាមកំហែង មកលើទឹកដីរបស់ជប៉ុន។

ភាពវឹកវរ និង ការច្របូកច្របល់ នៅក្នុងទីក្រុងសេអ៊ូល រដ្ឋធានីរបស់កូរ៉េខាងត្បូង បានកើតឡើង កាលពីព្រឹក ថ្ងៃពុធ វេលាក្នុងស្រុក ខណៈមនុស្សបានភ្ញាក់ពីដំណេក ជាមួយនឹងការឮសំឡេងស៊ីរ៉ែនប្រកាសអាសន្ន ពីការវាយប្រហារតាមអាកាស និង សារបន្ទាន់មួយ បានប្រាប់ដល់ពួកគេ ឱ្យរៀបចំ សម្រាប់ការជម្លៀស ប៉ុន្ដែត្រឹមតែ២០នាទីក្រោយមក ក៏បានផ្ញើសារអំពីកំហុសឆ្គងនេះ។

ប្រទេសកូរ៉េ ត្រូវបានពុះហែកចែកគ្នាជា២ប្រទេស អស់រយៈពេល៧០ឆ្នាំកន្លងមកហើយ ក្រោមមនោគមន៍វិជ្ជាតាមបែបកុម្មុយនិស្ដ និង លោកសេរី។ ឥឡូវនេះ ភាពតានតឹង នៅលើឧបទ្វីបកូរ៉េ កំពុងតែកើនឡើង ខណៈមានការចោទប្រកាន់ ថា កូរ៉េខាងជើង កំពុងតែបង្កនូវការគំរាមកំហែង មកលើកូរ៉េខាងត្បូង។ ប៉ុន្ដែប្រសិនបើមានការប្រកាសអាសន្នណាមួយ នាពេលអនាគត នឹងនាំឲ្យមានសំណួរមួយចំនួន ចោទសួរថា តើនឹងត្រូវយកចិត្តទុកដាក់ ឬ ក៏ត្រូវលុបចោល អំពីកំហុសឆ្គងផ្សេងៗទៀត?

ទីភ្នាក់ងារសារព័ត៌មានរបស់កូរ៉េខាងត្បូង Yonhap (យ៉ុនហាប) បានរាយការណ៍ កាលពីព្រឹក ថ្ងៃពុធ ថា កងទ័ពកូរ៉េខាងត្បូង បានអះអាង ថា មីស៊ីលនោះ ប្រហែលជាបានបំផ្ទុះ នៅលើអាកាស ឬ ក៏អាចធ្លាក់មកក្នុងសមុទ្រវិញ ក្រោយពេលវាបានបាត់ ចេញពីពីប្រព័ន្ធរ៉ាដា។ ប៉ុន្ដែបើទោះជាយ៉ាងណាក្ដី ក៏កូរ៉េខាងត្បូង នឹងវិភាគលម្អិត លើបញ្ហានេះបន្ដទៀត។

ក្រុមអ្នកវិភាគ បានបញ្ជាក់ ថា ផ្ការណបនោះ ជាផ្នែកមួយ នៃកម្មវិធីបច្ចេកវិទ្យាឈ្លបយកការណ៍ ដោយរាប់បញ្ចូលទាំងដ្រូន ផងដែរ។ ក្រុងព្យុងយ៉ាង មានគោលបំណង ធ្វើឲ្យសមត្ថភាពអាវុធនុយក្លេអ៊ែររបស់កូរ៉េខាងជើង កាន់តែល្អប្រសើរឡើង សម្រាប់ការវាយប្រហារទៅលើគោលដៅនានា នៅក្នុងករណីមានសង្គ្រាមផ្ទុះឡើង។

ក្រសួងការពារជាតិជប៉ុន បានបញ្ជាក់ នៅក្នុងសេចក្ដីថ្លែងការណ៍មួយ កាលពីប៉ុន្មានថ្ងៃមុននេះ ថា «យើងនឹងចាត់វិធានការណ៍បំផ្លិចបំផ្លាញ ប្រឆាំងនឹងមីស៊ីលបាល្លិស្ទីក និង មីស៊ីលផ្សេងៗទៀត បាញ់បំពារបំពាន ចូលមកលើទឹកដីរបស់យើង។ ជប៉ុន អាចនឹងប្រើប្រាស់ប្រព័ន្ធការពារមីស៊ីល ប្រភេទ Standard Missile-3 (ស្ដែនដាដ មីស៊ីល-៣) ហៅកាត់ SM-3 ឬ មីស៊ីល Patriot PAC-3 (ប៉ាទ្រីយ៉ូត ភីអាស៊ី-3 ដើម្បីកម្ទេចមីស៊ីលរបស់កូរ៉េខាងជើង។

បណ្ដាញទូរទស្សន៍របស់ជប៉ុន NHK បានផ្សាយ កាលពីថ្ងៃចន្ទ ថា លោក ហ៊្វូមីអូ គីស៊ីដា (Fumio Kishida) នាយករដ្ឋមន្រ្ដីជប៉ុន បានសង្កត់ធ្ងន់ ថា គាត់ចង់ធ្វើការឲ្យកាន់តែជិតស្និទ្ធជាមួយសហរដ្ឋអាមេរិក និង ប្រទេសកូរ៉េខាងត្បូង ជុំវិញផែនការបាញ់បង្ហោះរបស់កូរ៉េខាងជើង តាមអ្វីដែលក្រុងព្យុងយ៉ាង ហៅថាជាផ្កាយរណបនោះ។ បើទោះជាទីក្រុងព្យុងយ៉ាង បាននិយាយសំដៅទៅលើមីស៊ីលនោះ ថា ជាការបាញ់បង្ហោះផ្កាយរណបយ៉ាងណាក៏ដោយ ក៏ការបាញ់បង្ហោះ ដោយប្រើប្រាស់បច្ចេកវិទ្យាមីស៊ីលផ្លោង បានរំលោភទៅលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ផងដែរ៕

ប្រទេសបារាំង ៖ ប្រទេសបារាំងបានហាមឃាត់ការហោះហើរក្នុងស្រុករយៈពេលខ្លី និងមិនលើសពី២ម៉ោងកន្លះ ដើម្បីកាត់បន្ថយការបញ្ចេញកាបូនឌីអុកស៊ីត ហើយផ្លាស់ប្តូរទៅធ្វើដំណើរតាមរថភ្លើងអាកាសជំនួសវិញ ។ ប៉ុន្តែអ្នកបរិស្ថានអះអាងថា បារាំងគួរតែចាប់អារម្មណ៍លើការដោះស្រាយបញ្ហាសំខាន់ៗ និងរកមូលហេតុពិតប្រាកដច្រើនជាង ។

កាលពីមុន រដ្ឋាភិបាលបារាំងបានចេញច្បាប់ហាមឃាត់ការហោះហើររយៈពេលខ្លី ដើម្បីទប់ស្កាត់បម្រែបម្រួលអាកាសធាតុ ខណៈនាយកដ្ឋានដឹកជញ្ជូន និងបរិស្ថានអឺរ៉ុបអះអាងថា យន្តហោះដែលមានអ្នកជិះតែម្នាក់បានបញ្ចេញកាបូនឌីអុកស៊ីតច្រើនជាងរថភ្លើងរហូតដល់៧៧ដង ។ ហេតុនេះ ទើបប្រទេសបារាំងបានហាមឃាត់ការហោះហើររយៈពេលខ្លីនៅប្រទេសរបស់ខ្លួន ហើយគេសង្កេតឃើញភាគច្រើនជាការធ្វើដំណើររវាងអាកាសយានដ្ឋាន Paris Orly និងតំបន់នានា ដូចជា Nantes, Lyon និង Bordeaux ។ បើសេវាកម្មធ្វើដំណើរតាមរថភ្លើងល្អប្រសើរឡើង គេរំពឹងថា ប្រទេសបារាំងនឹងហាមឃាត់ការហោះហើរក្នុងស្រុករយៈពេលខ្លីបន្ថែមទៀត ។

ការហាមឃាត់នេះ គឺជាផ្នែកមួយរបស់ច្បាប់ពាក់ព័ន្ធនឹងអាកាសធាតុនៅប្រទេសបារាំង ដែលទើបចេញថ្មីកាលពីឆ្នាំ២០២១ ។ ពលរដ្ឋអាចធ្វើដំណើរតាមរថភ្លើងជំនួសវិញ ដោយរដ្ឋាភិបាលបារាំងបានចេញច្បាប់បន្ថែមទៀតដើម្បីផ្តល់ភាពងាយស្រួលដល់ការធ្វើដំណើរ ។ ហេតុនេះ គេបានដាក់កំណត់ឱ្យសេវាកម្មរថភ្លើងត្រូវចេញដំណើរឱ្យទៀងទាត់ពេលវេលា និងមានរថភ្លើងគ្រប់គ្រាន់សម្រាប់ទទួលចំនួនអ្នកដំណើរកើនឡើង ។

រដ្ឋមន្ត្រីក្រសួងគមនាគមន៍ លោក Clément Beaune លើកឡើងថា ៖ «វាជាជំហានសំខាន់មួយរបស់គោលនយោបាយកាត់បន្ថយការបញ្ចេញឧស្ម័នផ្ទះកញ្ចក់ ហើយខ្ញុំមានមោទនភាពដែលប្រទេសបារាំងបានគិតគូរបញ្ហាបរិស្ថាន» ។ ចំណែកមន្ត្រីគ្រប់គ្រងផ្នែកដឹកជញ្ជូនរបស់ Greenpeace ប្រទេសបារាំងនិយាយថា ៖ «ការហាមឃាត់នេះបានដំណើរការក្នុងផ្លូវត្រឹមត្រូវ ហើយយើងត្រូវមានមហិច្ឆតា និងគោលដៅឱ្យវែងឆ្ងាយជាងនេះ» ។

ទោះយ៉ាងណា អ្នកបរិស្ថានជាច្រើននាក់និយាយថា ការហាមឃាត់ការធ្វើដំណើរតាមយន្តហោះរយៈពេលខ្លី គឺជាចំណុចចាប់ផ្តើមដ៏ល្អមួយ និងមានផលប៉ះពាល់តិចតួចលើការបញ្ចេញកាបូនឌីអុកស៊ីត ហើយចំណុចសំខាន់ គឺបារាំងត្រូវចាត់ការលើបញ្ហាប្រេងឥន្ធនៈហ្វូស៊ីល រួមទាំងការប្រមូលពន្ធលើការបំពុលបរិស្ថានពីក្រុមហ៊ុនអាកាសចរណ៍ផ្សេងៗ ៕ ប្រភព ៖ environman