ឧទ្យានជាតិគីរីរម្យ គឺជាតំបន់ធម្មជាតិដ៏មានភាពទាក់ទាញពីប្រជាជនខ្មែរ ព្រោះនៅទីនោះសម្បូរដោយកន្លែងធម្មជាតិស្អាតៗ សម្រាប់មនុស្សដែលចូលចិត្តផ្សងព្រេង និងបោះតង់ជាដើម។

ឧទ្យានជាតិណេះយស្ថិតនៅក្នុង ភូមិដំរីផុង ឃុំគិរីរម្យ ស្រុកភ្នំស្រួច ខេត្តកំពង់ស្ពឺ ដែលមានចម្ងាយ១១២គីឡូម៉ែត្រ ពីរាជធានីភ្នំពេញ ដោយភ្ញៀវទេសចរណ៍ត្រូវធ្វើដំណើរតាមបណ្តោយផ្លូវជាតិលេខ៤ ទៅកាន់ក្រុងព្រះសីហនុ។

ឧទ្យានជាតិគីរីរម្យ ត្រូវបានគេទទួលស្គាល់ថាជាកន្លែងសម្រាប់លេងកម្សាន្ត និងជាទីកន្លែងបោះតង់ដ៏ពេញនិយមបំផុតមួយនៅក្នុងប្រទេសយើងផងដែរ។

បឹងចំការតែគីរីរម្យ គឺជាកន្លែងដ៏ស្រស់ស្អាតបំផុតមួយនៃឧទ្យានជាតិគីរីរម្យ ដែលសម្បូរភ្ញៀវទេសចរណ៍ទៅបោះតង់ និងផ្សងព្រេងនៅទីនោះ។ បឹងចំការតែ ស្ថិតនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ មានចម្ងាយប្រហែល ៦៤គីឡូម៉ែត្រពីវិមានឯករាជ្យកំពង់ស្ពឺ។ បើនិយាយពីទេសភាពវិញ គឺមានទាំងភ្នំ បឹង នៅជុំវិញដែលមានខ្យល់អាកាសបរិសុទ្ធអាចឱ្យលោកអ្នករំសាយទុក្ខសោក និងភាពហត់នឿយពីការងារបានមួយចំនួនធំដែរ។ នៅបឹងចំការតែ លោកអ្នកអាចស្ទួចត្រី ឡើងភ្នំ លេងទឹក ជិះទូកយ៉ាងសប្បាយរីករាយ។ ម្យ៉ាងទៀត វា មានភាពងាយស្រួលសម្រាប់អ្នកបោះតង់ ព្រោះនៅជិតប្រភពទឹកស្រាប់។

ក្រៅពីបឹងចំការតែ នៅលើភ្នំគីរីរម្យនេះ ក៏មានកន្លែងសម្រាប់សម្រាកកម្សាន្ត បោះតង់ និងលេងទឹកជ្រោះជាច្រើនកន្លែងថែមទៀតផងដែរ ដូចជា៖ ថ្មលយ ជ្រោះផ្តាច់ព្រលឹង និងឧទ្យានបោះតង់គីរីរម្យជាដើម៕

ប្រទេសចិន៖ សាជីវកម្ម Sinopec បានចាប់ផ្តើមខួងអណ្តូងប្រេង Yuejin ៣-៣ ជម្រៅ ៩,៤៧២ ម៉ែត្រនៅក្នុងអាង Tarim តំបន់ស្វយ័ត Xinjiang កាលពីថ្ងៃទី ១ ខែឧសភា។
អណ្តូង Yuejin ៣-៣ នឹងក្លាយជារបកគំហើញដ៏សំខាន់មួយក្នុងការរុករកប្រេង និងឧស្ម័នដ៏ជ្រៅបំផុត ដែលជួយឱ្យចិនជំរុញការផលិតប្រេងឆៅ។ ក្រុមហ៊ុនថាមពលចិន Sinopec រំពឹងថានឹងបញ្ចប់ដំណើរការខួងយករ៉ែក្នុងរយៈពេល ១៧០ ថ្ងៃ។

Yuejin ៣-៣ គឺជាអាងស្តុកប្រេងដ៏ធំបំផុតរបស់ប្រទេសចិន ដែលស្មើនឹងជាង ៦០% នៃធនធានប្រេង និងឧស្ម័នដ៏ជ្រៅបំផុតរបស់ប្រទេសនេះ។ ទោះជាយ៉ាងណាក៏ដោយ នេះក៏ជាកន្លែងពិបាកបំផុតមួយក្នុងការរុករកនៅក្នុងប្រទេសចិនផងដែរ ដោយសារតែទុនបម្រុងប្រេង និងឧស្ម័នស្ថិតនៅជម្រៅពី ៦,០០០ ទៅ ១០,០០០ ម៉ែត្រក្រោមដី។

ដើម្បីជម្នះលក្ខខណ្ឌសីតុណ្ហភាពខ្ពស់ និងសម្ពាធក្នុងជម្រៅជាង ៩,០០០ ម៉ែត្រ ក្រុមហ៊ុន Sinopec បានអភិវឌ្ឍបច្ចេកវិទ្យាខួងរបស់ខ្លួន ដែលធ្វើឱ្យប្រទេសចិនក្លាយជាប្រទេសទីពីរនៅលើពិភពលោកដែលមានសមត្ថភាពខួងអណ្តូងជម្រៅ ១០,០០០ ម៉ែត្រ។ គួរបញ្ជាក់ដែរថា អណ្តូងប្រេងដ៏ជ្រៅបំផុតមួយក្នុងពិភពលោក Z-៤៤ របស់រុស្ស៊ី មានជម្រៅជាង ១២,០០០ ម៉ែត្រក្រោមដី។

លោក Wang Long អ្នកជំនាញនៅវិទ្យាស្ថានស្រាវជ្រាវវិស្វកម្មប្រេង Sinopec បាននិយាយថា តាមរយៈការច្នៃប្រឌិត និងការបំផុសគំនិត យើងបានបង្កើតបច្ចេកវិទ្យាទំនើបដើម្បីរចនាប្រព័ន្ធខួងយករ៉ែ ប្រតិបត្តិការ និងគាំទ្រពួកវានៅក្នុងបរិយាកាសដ៏ស៊ីជម្រៅ និងស្មុគ្រស្មាញ ដោយកត់សម្គាល់ពីរបកគំហើញនៃបច្ចេកវិទ្យាគន្លឹះ ។
លោក Wang បានបន្ថែមថា ពេលវេលាខួងកាលពី ៣ ឆ្នាំមុនគឺ ២៨០ ថ្ងៃ ឥឡូវនេះវាត្រូវបានកាត់បន្ថយមកត្រឹម ៩៧ ថ្ងៃ ទន្ទឹមនឹងនោះ ភាពត្រឹមត្រូវនៃការខួងក៏បានកើនឡើងពី ៦០% ទៅ ៩០%> ប្រភព៖vnexpress

ប្រទេស ចិន ៖ អាជីវកម្មលក់ផ្កាកំពុងតែទទួលបានការពេញនិយមនៅប្រទេសចិន ដែលធ្វើឱ្យមន្ត្រីថ្នាក់ខេត្តស្វែងរកវិធីអភិវឌ្ឍន៍ ដើម្បីបន្ថែមតម្លៃផ្កា និងអភិវឌ្ឍន៍ វិស័យទេសចរណ៍ពាក់ព័ន្ធនឹងផ្កាផងដែរ។

ក្នុងពេលឈប់សម្រាកថ្ងៃទិវាពលកម្មរយៈពេល៥ ថ្ងៃចាប់ពីថ្ងៃទី២៩ ខែ មេសា រហូតដល់ថ្ងៃទី៣ខែ ឧសភា ផ្សារលក់ផ្កានៅ Dounan ខេត្ត យូណាន ដែល ជាទីកន្លែង ទិញ-លក់ផ្កាស្រស់ដ៏ធំបំផុតនៅតំបន់អាស៊ានគេសង្កេតឃើញថាមានអ្នកមកទិញផ្កាក្នុងផ្សារនេះយ៉ាងច្រើនកុះករ។

នៅ ទីក្រុង Yangcheng ផ្កា ទុលីប ជាង៣០លានដើមកំពុងតែលក់ដាច់ជាខ្លាំង។ ទីក្រុងនេះបាន ក្លាយ ជា កន្លែងលក់ផ្កាដែលទាក់ទាញភ្ញៀវទេសចរ ប្រមាណ១០ម៉ឺននាក់ក្នុង១ថ្ងៃឱ្យមកទស្សនានិងទិញផលិតផលពីផ្កាជាច្រើនប្រភេទផងដែរ ។

មន្ត្រីរដ្ឋាភិបាលក្នុងទីក្រុង Nanniao បានថ្លែងថាវិស័យទេសចរណ៍ បានជំរុញដល់ផ្នែកកសិកម្ម ក្នុងតំបន់ហើយអាចបង្កើតប្រាក់ចំណូលជាច្រើន និងជួយឱ្យពលរដ្ឋរស់នៅក្នុងតំបន់មានការងារធ្វើ ជាង ៣.០០០ នាក់ ។

កាលពីខែវិច្ឆិកាឆ្នាំ២០២២កន្លង មកការិយាល័យព្រៃឈើជាតិ និងក្រសួងកសិកម្មនិងកិច្ចការជនបទ បានរួមសហការគ្នាដាក់ផែនការអភិវឌ្ឍន៍មានគុណភាពខ្ពស់របស់អាជីវកម្មលក់ផ្កា ។

គេបានស្នើឱ្យមានការប្រើប្រាស់បច្ចេកវិទ្យា ក្នុងមុខរបរលក់ផ្កានេះ ដើម្បីបង្កើនប្រាក់ចំណូលបន្ថែមទៀត ។ ដូច្នេះនៅឆ្នាំ២០២៥ អាជីវកម្មលក់ផ្កាអាចផ្តល់ប្រាក់ចំណូលជា ច្រើនមកកាន់ប្រទេសចិនក៏ដូចជាពលរដ្ឋរស់នៅក្នុងតំបន់ផងដែរ ៕

ប្រភព ៖ China Face

រដ្ឋធានីវ៉ាស៊ីនតោន៖ ការផ្ដើមចេញពីឧក្រិដ្ឋកម្មរបស់ក្រុមហ៊ុនទាហានស៊ីឈ្នួលរបស់រុស្ស៊ី Wagner និង លេសក្លែងក្លាយ ចំពោះភាពអសកម្មរបស់អង្គការសហប្រជាជាតិ ទើបការឈ្លានពាននៅអ៊ីរ៉ាក់ បានផ្តល់នូវការមើលទុកជាមុន សម្រាប់សង្រ្គាមរបស់ក្រុងមូស្គូ នៅក្នុងប្រទេសអ៊ុយក្រែន ប៉ុន្តែអ្វីៗទាំងអស់ មិនមែនសុទ្ធតែ ធ្វើទៅបានដោយរលូនដូចគ្នានោះទេ។

សារព័ត៌មាន Al Jazeera បានចេញផ្សាយ កាលពីថ្ងៃចន្ទ ទី១ ខែឧសភា ឆ្នាំ២០២៣ ថា កាលពី២០ឆ្នាំមុន គឺនៅថ្ងៃទី១ ខែឧសភា ឆ្នាំ២០០៣ ប្រធានាធិបតីមុនរបស់សហរដ្ឋអាមេរិក លោក ចច ដាប់ប៊ែល្យូប៊ូស (George W Bush) បានប្រកាសអំពីបញ្ចប់នូវប្រតិបត្តិការប្រយុទ្ធដ៏ខ្លាំងក្លា នៅក្នុងប្រទេសអ៊ីរ៉ាក់ ខណៈបដាដ៏ធំមួយ នៅពីក្រោយគាត់ ដោយបានសរសេរ អំពីជ័យជម្នះ ថា «បេសកកម្មបានសម្រេច»។

សហរដ្ឋអាមេរិក បានឈ្លានពាននៅក្នុងប្រទេសមជ្ឈិមបូព៌ា ដោយខុសច្បាប់។ ប៉ុន្ដែស្របពេលគ្រឿងយុទ្ធោបករណ៍ទំនើបៗរបស់សហរដ្ឋអាមេរិក កំពុងតែហូរចូលទៅកាន់ទីក្រុងនានារបស់អ៊ីរ៉ាក់ នោះ បណ្ដាញសារព័ត៌មានអន្ដរជាតិជាច្រើន បានចាក់ផ្សាយនូវទិដ្ឋភាពឡើងវិញជាដដែលៗ ចាប់តាំងពីថ្ងៃទី៩ ខែមេសា នៅក្នុងឆ្នាំដដែលនោះ មើលទៅហាក់ដូចជាមានការហួសចិត្តយ៉ាងខ្លាំង។

ដោយឡែក ការផ្តួលរំលំរូបសំណាករបស់លោក សាដដាម ហ៊ូសសេន (Saddam Hussein) មេដឹកនាំអ៊ីរ៉ាក់ នៅទីលានហ្វ័រដូស (Firdos) ស្ថិតក្នុងរដ្ឋធានីបាគដាដ (Baghdad) ជាព្រឹត្តិការណ៍មួយ បង្ហាញអំពីនិមិត្តរូបរំដោះប្រជាជនអ៊ីរ៉ាក់ និង ការបញ្ចប់នូវរបបគ្រប់គ្រង របស់គណបក្សបាអាស (Ba’ath) នៅអ៊ីរ៉ាក់ អស់រយៈពេល៣៥ឆ្នាំ។ ប៉ុន្ដែសកម្មភាពទាំងនេះ មិនមែនជាការផ្តាច់ព្រ័ត្រដ៏ធំ សម្រាប់ការលុកលុយរបស់សហរដ្ឋអាមេរិក នោះឡើយ ហើយផ្ទុយទៅវិញ វាជាការចាប់ផ្តើមនូវចលនាបះបោរដ៏យូរ និង ការបង្ហូរឈាម ហើយសកម្មភាពប៉ះបោរប្រដាប់អាវុធ។

ការកាន់កាប់របស់សហរដ្ឋអាមេរិក នៅលើទឹកដីរបស់អ៊ីរ៉ាក់ បានចំណាយពេលវេលា៨ឆ្នាំ ដោយបានបង្កើតឱ្យមានការភ្ញាក់ផ្អើល ជុំវិញអស្ថិរភាព នៅក្នុងតំបន់ និង បានធ្វើឱ្យប្រជាជនអ៊ីរ៉ាក់ រាប់សែននាក់ បានបាត់បង់ជីវិត។ ប៉ុន្ដែមនុស្សភាគច្រើន គ្មានអ្នកណាម្នាក់ បានដឹង អំពីចំនួនពិតប្រាកដនោះឡើយ។

ដោយឡែក រដ្ឋាភិបាលរុស្ស៊ី បានរំពឹងទុកទៅលើសកម្មភាពយោធារបស់ខ្លួន ដូចទៅនឹងការលុកលុយរបស់កម្លាំងសម្ពន្ធមិត្ដ ដឹកនាំដោយសហរដ្ឋអាមេរិក បានធ្វើ នៅក្នុងប្រទេសអ៊ីរ៉ាក់ ថា ការឈ្លានពានដោយខុសច្បាប់របស់ក្រុងមូស្គូ ទៅលើប្រទេសអ៊ុយក្រែន កាលពីថ្ងៃទី២៤ ខែកុម្ភៈឆ្នាំ២០២២ នឹងត្រូវបញ្ចប់ ដោយជោគជ័យយ៉ាងឆាប់រហ័ស និង សម្រេចបានតាមផែនការ។

ផ្ទុយទៅវិញ ទាហានរុស្ស៊ី បានចូលឈ្លានពាន ទៅក្នុងប្រទេសអ៊ុយក្រែន ដូចជា ពួកគេកំពុងតែធ្វើព្យុហយាត្រា នៅក្នុងជួរកងទ័ពដ៏វែង។ ក្បួនទ័ពរបស់រុស្ស៊ី បានក្លាយជាគោលដៅ ងាយស្រួលបំផុត សម្រាប់ការវាយប្រហារពីមីស៊ីលប្រឆាំងនឹងរថក្រោះចាវេលីន (Javelin) របស់អ៊ុយក្រែន ផលិត និង ផ្គត់ផ្គង់ ដោយអាមេរិក។

ទាហានរុស្ស៊ី បានរំពឹងទុក ថា ពួកគេនឹងដើរពាសពេញរដ្ឋធានីកៀវ ក្រោយការប្រយុទ្ធ ចំណាយត្រឹមតែរយៈពេលប៉ុន្មានថ្ងៃប៉ុណ្ណោះ។ ប៉ុន្ដែសង្គ្រាមនេះ បានអូសបន្លាយ អស់រយៈពេលជាង១ឆ្នាំកន្លងមកហើយ នៅតែធ្វើទាហានរុស្ស៊ី នៅតែជាប់គាំង នៅក្នុងការវាយប្រយុទ្ធគ្នាយ៉ាងបង្ហូរឈាមដដែល ។ដូច្នេះតើប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ចប់នូវការនិយាយ អំពីកំហុសឆ្គងរបស់ខ្លួនឡើងវិញហើយនៅ សម្រាប់បទឧក្រិដ្ឋជាច្រើនរបស់លោក ប៊ូស បានប្រព្រឹត្ដ នៅក្នុងប្រទេសអ៊ីរ៉ាក់ កាលពី២០ឆ្នាំមុន? តើការឈ្លានពានដែលកំណត់សម័យទាំងពីរនេះ មានភាពដូចគ្នាដែរឬទេ? តើវាមានភាពខុសគ្នាអ្វីខ្លះដែរ?

ក្រុមប្រវត្ដិវិទូយោធា និង អ្នកវិភាគ ជាច្រើន បានអះអាង ថា បើឆ្លើយយ៉ាងខ្លី បង្ហាញ អំពីភាពស្របគ្នា កំពុងតែដំណើរការយ៉ាងស៊ីជម្រៅ កើតចេញពីលេសមិនពិត ដោយសារតែពួកគេបានចាប់ផ្តើម និង បរាជ័យ សម្រាប់ប្រព័ន្ធរបស់អង្គការសហប្រជាជាតិ ព្រោះសង្រ្គាមបានបង្ហាញឡើង រហូតដល់មានការប្រើប្រាស់ក្រុមហ៊ុនម៉ៅការយោធាឯកជន។ ប៉ុន្តែអ្វីដែលខុសប្លែកគ្នាខ្លាំងបំផុតនោះ គឺការជំរុញទឹកចិត្ត ឲ្យកាន់តែខ្លាំង បង្កឱ្យមានសង្រ្គាម។ ចំណែកយោធាអាមេរិក បានបង្ហាញ អំពីប្រសិទ្ធភាព នៅក្នុងការប្រយុទ្ធនៅក្នុងសង្រ្គាមធម្មតា នៅអ៊ីរ៉ាក់ មានសភាពខ្លាំងក្លាជាងទាហានរុស្ស៊ី ធ្វើសង្គ្រាម នៅអ៊ុយក្រែន។

លោក អ៊ីប្រាហ៊ីម អាល់ម៉ារ៉ាស៊ី (Ibrahim al-Marashi) សាស្រ្ដាចារ្យ ផ្នែកប្រវត្ដិសាស្រ្ដរបស់អ៊ីរ៉ាក់ នៅសាកលវិទ្យាល័យរដ្ឋកាលីហ្វ័រញ៉ា បានបញ្ជាក់ ថា ទាំងកងទ័ពសម្ពន្ធមិត្ដ ដឹកនាំដោយសហរដ្ឋអាមេរិក បានវាយប្រយុទ្ធ នៅក្នុងប្រទេសអ៊ីរ៉ាក់ និង ទាហានរុស្ស៊ី កំពុងតែធ្វើសកម្មភាពយោធា នៅក្នុងប្រទេសអ៊ុយក្រែន រហូតឈានដល់ការធ្វើសង្គ្រាម ដោយសារតែមានមេដឹកនាំទាំងនេះ ស្រវឹងនឹងអំនួតហួសហេតុ និង ទំនុកចិត្ត នៅក្នុងការវាយលុកទៅលើប្រទេសដទៃ។ ប្រទេសមហាអំណាចទាំង២នេះ គិតថា វានឹងមានភាពងាយស្រួលខ្លាំង សម្រាប់ការវាយប្រហារកាត់ក្បាលមេដឹកនាំរបបគ្រប់គ្រងចាស់ និង លើបន្ដុបរដ្ឋាភិបាលថ្មី នៅក្នុងប្រទេសណា ដែលពួកគេកំពុងតែលុកលុយ ជាមួយនឹងរបបគ្រប់គ្រងជាមិត្ត ដែលគ្រាន់តែបម្រើឲ្យផលប្រយោជន៍របស់ពួកគេ។

លោកសាស្រ្ដាចារ្យ ផ្នែកប្រវត្ដិសាស្រ្ដរបស់អ៊ីរ៉ាក់ នៃសាកលវិទ្យាល័យរដ្ឋកាលីហ្វ័រញ៉ា រូបនេះ បានបន្ថែម ថា «នៅក្នុងករណីនេះ សហរដ្ឋអាមេរិក បានទទួលជោគជ័យ នៅក្នុងការផ្ដួលរំលំរបបគ្រប់គ្រង នៅអ៊ីរ៉ាក់ និង បានកាត់ទោសព្យួរកលោក សាដដាម ហ៊ូសសេន។ ប៉ុន្ដែពួកគេពិតជាយល់ខុស ចំពោះជនជាតិអ៊ីរ៉ាក់ ដោយសារតែអាមេរិក បានគិតថា ពួកគេនឹងទទួលបានការស្វាគមន៍ពីពលរដ្ឋរបស់ប្រទេនេះ ខណៈបានផ្តួលរំលំរបបគ្រប់គ្រងរបស់លោក សាដដាម ហ៊ូសសេន ហើយអ្វីៗមិនបានកើតឡើងដូច្នោះឡើយ។ តើរុស្ស៊ីគិតយ៉ាងណាដែរ? ថាតើប្រជាជនអ៊ុយក្រែន នឹងស្វាគមន៍ពួកគេ នៅក្នុងនាមជាអ្នករំដោះ សម្រាប់ការផ្ដួលរំលំរបបគ្រប់គ្រងរបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី តាមអ្វីដែលលោក ពូទីន អ្វីរបបហ្វាស៊ីសនោះដែរឬទេ?»។

រហូតមកដល់ពេលនេះ រុស្ស៊ី កំពុងតែជាប់ផុង នៅក្នុងសង្គ្រាម ហើយក៏នៅតែរកមិនទាន់ឃើញពន្លឺចរចាសន្ដិភាពនៅឡើយ ដោយសារភាគីជម្លោះនីមួយៗ បានដាក់តម្លៃចរចាខ្ពស់ហួសហេតុពេក។ សង្គ្រាមរបស់ក្រុងមូស្គូ បានធ្វើឲ្យទាហានរុស្ស៊ី ស្លាប់ និង របួស រាប់សែននាក់ ខណៈការវាយប្រយុទ្ធគ្នាកំពុងតែបន្ដ៕