រដ្ឋធានីម៉ានីល៖ ស្របពេលស្ថានការណ៍ នៅក្នុងតំបន់ កាន់តែមានភាពតានតឹងខ្លាំងឡើង សហរដ្ឋអាមេរិក បានចាប់ដៃគ្នា ជាមួយនឹងប្រទេសហ្វីលីពីន ធ្វើសមយុទ្ធយោធាទ្រង់ទ្រាយធំមួយ ដោយបាញ់គ្រាប់រ៉ុក្កែត ទៅលើកប៉ាល់មួយគ្រឿង ក្លែងធ្វើជាគោលដៅរបស់សត្រូវ កំពុងតែចូលឈ្លានពាន មកលើដែនអធិបតេយ្យភាពរបស់ប្រទេសអាស៊ានមួយនេះ។

បណ្ដាញទូរទស្សន៍អារ៉ាប់អន្ដរជាតិ Alarabiya News បានចេញផ្សាយ កាលពីព្រឹក ថ្ងៃពុធ ទី២៦ ខែមេសា ឆ្នាំ២០២៣ ថា កងទ័ពសហរដ្ឋអាមេរិក និង ហ្វីលីពីន កាលពីថ្ងៃពុធ បានបាញ់គ្រាប់រ៉ុក្កែត សំដៅទៅកាន់នាវាចម្បាំងមួយគ្រឿង តំណាងឱ្យនាវារបស់សត្រូវ នៅក្នុងសមុទ្រចិនខាងត្បូង ដែលកំពុងតែមានជម្លោះ។ នេះជាការធ្វើសមយុទ្ធយោធាទ្រង់ទ្រាយធំចុងក្រោយបង្អស់ មិនធ្លាប់មានពីមុនមក រវាងប្រទេសមហាអំណាចយោធា និង សេដ្ឋកិច្ចរបស់លោកខាងលិច និង សម្ពន្ធមិត្ត នៅក្នុងតំបន់អាស៊ានមួយនេះ។

ក្រុងប៉េកាំង តែងតែអះអាង អំពីដែនសមុទ្រចិនខាងត្បូង មានទំហំ៣,៥លានគីឡូម៉ែត្រការ៉េ ស្ទើរតែទាំងអស់ ជាដែនអធិបតេយ្យភាពរបស់ចិន។ បញ្ហានេះ នាំឲ្យមានជម្លោះជាមួយនឹងប្រទេសវៀតណាម ហ្វីលីពីន ប៊្រុយណេ ម៉ាឡេស៊ី និង តៃវ៉ាន់។ ជាមួយគ្នានេះ សហរដ្ឋអាមេរិក និង ហ្វីលីពីន បានធ្វើសមយុទ្ធយោធាទ្រង់ទ្រាយធំរួមគ្នា ជាលើកដំបូង បាញ់គ្រាប់ពិត តវ៉ាប្រឆាំងនឹងការអះអាងរបស់ចិន។

លោក ហ្វ័រឌីណង់ដ៍ ម៉ាកូស (Ferdinand Marcos) ប្រធានាធិបតីហ្វីលីពីន ដែលកំពុងតែស្វែងរកនូវទំនាក់ទំនងការពារជាតិ ឲ្យកាន់តែរឹងមាំ ជាមួយសហរដ្ឋអាមេរិក បានអង្គុយ នៅក្នុងប៉មជាមួយក្រុមមន្ត្រីសហរដ្ឋអាមេរិក និង ក្រុងម៉ានីល សម្លឹងមើលព្រឹត្តិការណ៍នេះ នៅភាគខាងជើង រដ្ឋធានីរបស់ហ្វីលីពីន។

ការបាញ់គ្រាប់ពិតនេះ បានចាប់ផ្តើមជាមួយនឹងប្រព័ន្ធបាញ់គ្រាប់រ៉ុក្កែតដ៏ជាក់លាក់ហាយម៉ាស់ (HIMARS) របស់សហរដ្ឋអាមេរិក ដោយបានបាញ់ជាបន្តបន្ទាប់ ចេញពីនាវាចម្បាំងរបស់របស់កងទ័ពជើងទឹកហ្វីលីពីន ដែលបោះយុថ្កា មានចម្ងាយប្រហែល២២គីឡូម៉ែត្រ ពីឆ្នេរសមុទ្រ។ រីឯគោលដៅ ត្រូវតែបាញ់ពន្លិចនាវាចាស់ មានអាយុកាលរាប់ទសវត្សរ៍ ដែលធ្វើជាតំណាងឲ្យនាវាចម្បាំងរបស់សត្រូវ កំពុងតែចូល មកកាន់ឆ្នេរសមុទ្ររបស់ហ្វីលីពីន។ បន្ទាប់មក កងកាំភ្លើងធំ បានបាញ់ទៅលើគោលដៅ ដែលត្រូវកំណត់បណ្ដែត នៅលើទឹក មានចម្ងាយប្រហែល ១០គីឡូម៉ែត្រ ពីឆ្នេរសមុទ្រ។

ការធ្វើសមយុទ្ធយោធានេះ មានគោលបំណងបង្កើនសមត្ថភាពយោធារបស់ហ្វីលីពីន និង ក៏ជាការបង្ហាញ អំពីការគាំទ្ររបស់សហរដ្ឋអាមេរិក សម្រាប់សម្ពន្ធមិត្តរបស់ក្រុងវ៉ាស៊ីនតោន នៅតំបន់អាស៊ី ចំពេលមានការអះអាងកាន់តែខ្លាំងឡើងរបស់ចិន នៅក្នុងតំបន់។ កងទ័ពប្រហែលជិត ១៨ ០០០នាក់ បានចូលរួមធ្វើសមយុទ្ធ ប្រចាំឆ្នាំ ឈ្មោះ បាលីកាតាន់ (Balikatan) ឬ មានន័យជាភាសារបស់ហ្វីលីពីន «ស្មាកៀកស្មា»។

សមយុទ្ធនេះ បានចាប់ផ្តើម កាលពីថ្ងៃទី១១ ខែមេសា មានការរចូលរួមពីឧទ្ធម្ភាគចក្រ ចុះចតនៅលើកោះមួយរបស់ហ្វីលីពីន ស្ថិតនៅភាគខាងជើង កោះលូហ្សូន (Luzon) មានចម្ងាយជិត ៣០០ គីឡូម៉ែត្រ ពីកោះតៃវ៉ាន់។ ជាមួយគ្នានេះ កងទ័ពសហរដ្ឋអាមេរិក ក៏បានបង្ហាញ អំពីកាំជ្រួចផាទ្រីយ៉ូត (Patriot) របស់ពួកគេ ដែលត្រូវគេចាត់ទុក ជាប្រព័ន្ធខែលការពារដែនអាកាសដ៏ល្អបំផុតមួយ នៅក្នុងពិភពលោក។

សមយុទ្ធយោធាស្មាកៀកស្មា នៅឆ្នាំនេះ បានធ្វើឡើង តាមកិច្ចព្រមព្រៀង ត្រូវបានប្រកាសកាលពីដើមខែមេសា សម្រាប់កងទ័ពសហរដ្ឋអាមេរិក ចូលមកប្រើប្រាស់មូលដ្ឋានយោធាមួយចំនួន នៅក្នុងប្រទេសហ្វីលីពីន រួមទាំងមូលដ្ឋាន នៅជិតកោះតៃវ៉ាន់ ដែលក្រុងប៉េកាំង តែងតែចាត់ទុក ជាផ្នែកមួយ នៃទឹកដីរបស់ចិន។ ដោយឡែក ការធ្វើសមយុទ្ធយោធា និង ការបង្កើនកម្លាំងកងទ័ពរបស់សហរដ្ឋអាមេរិក ចូលមកប្រើប្រាស់មូលដ្ឋានយោធារបស់ហ្វីលីពីន កំពុងតែអុជបញ្ឆេះកំហឹងចិន ឲ្យកាន់តែផ្ទុះការខឹងសម្បាយ៉ាងខ្លាំង។

ជាមួយនឹងសកម្មភាពបែបនេះ ក្រុងប៉េកាំង បានចោទប្រកាន់ដល់សហរដ្ឋអាមេរិក អំពីការបង្កគ្រោះថ្នាក់ ដល់សន្តិភាព នៅក្នុងតំបន់ ហើយព្យាយាមជំរុញឱ្យមានជម្លោះកាន់តែខ្លាំងឡើង រវាងក្រុងម៉ានីល និង ក្រុងប៉េកាំង។ ក្រុងប៉េកាំង តែងតែទាមទារដែនអធិបតេយ្យភាពរបស់ខ្លួន ស្ទើរតែទាំងស្រុង នៅក្នុងសមុទ្រចិនខាងត្បូង រួមទាំងប្រជុំកោះស្រ្ប៉ាតលី (Spratly) ដោយចិន មិនបានអើពើនឹងសេចក្តីសម្រេចរបស់អន្តរជាតិ ចាត់ទុក ថា ការអះអាងរបស់ចិន មិនមានមូលដ្ឋានច្បាប់។

ដោយឡែក ទំនាក់ទំនងការទូត រវាងក្រុងវ៉ាស៊ីនតោន និង ក្រុងម៉ានីល ក្រោមរដ្ឋការមុនរបស់លោក រ៉ូឌ្រីហ្គោ ឌូទើរតេ (Rodrigo Duterte) ប្រធានាធិបតីហ្វីលីពីន បានធ្លាក់ចុះខ្លាំង ដោយសារតែគាត់បានអនុគ្រោះដល់ប្រទេសចិន ច្រើនជាងអតីតចៅហ្វាយនាយអាណានិគមរបស់ប្រទេសគាត់ គឺសហរដ្ឋអាមេរិក។ ប៉ុន្ដែលោក ម៉ាកូស ប្រធានាធិបតីហ្វីលីពីន នាពេលបច្ចុប្បន្ន កំពុងតែពង្រឹងនូវកិច្ចការពារ ពីសហរដ្ឋអាមេរិក។

លោកប្រធានាធិបតី ម៉ាកូស គ្រោងនឹងជួបជាមួយប្រធានាធិបតីសហរដ្ឋអាមេរិក លោក ចូ បៃដិន (Joe Biden) នៅក្នុងសេតវិមាន នាសប្តាហ៍ក្រោយ។ មេដឹកនាំទាំង២ នឹងពិភាក្សាគ្នា អំពីបញ្ហាជាច្រើន ដោយរួមទាំង បញ្ហាតានតឹង កំពុងតែកើតឡើង នៅក្នុងសមុទ្រចិនខាងត្បូង និង កោះតៃវ៉ាន់ ផងដែរ៕

តារាសម្តែងជនជាតិកាណាដាម្នាក់ឈ្មោះ Saint Von Colucci ត្រូវបានគេរាយការណ៍ថាបានស្លាប់បន្ទាប់ពីការវះកាត់កែសម្ផស្សចំនួន១២ដង ក្នុងវ័យ២២ឆ្នាំដើម្បីមានមុខមាត់ស្រដៀងនឹងតារាចម្រៀង Jimin សមាជិក BTS ។

យោងតាមរបាយការណ៍កាលពីយប់ថ្ងៃសៅរ៍ ទី២២ ខែមេសា តារាសម្តែងរូបនេះបានធ្វើការវះកាត់នៅមន្ទីរពេទ្យកូរ៉េខាងត្បូងដើម្បីដកចេញនូវថ្គាមដែលបានវះកាត់បញ្ចូលកាលពីខែវិច្ឆិកា ដោយមានហានិភ័យខ្ពស់ប្រឈមនឹងគ្រោះថ្នាក់ ខណៈ Colucci ត្រូវបានគេនិយាយថាលោកបានស្លាប់ដោយសារ ការឆ្លងមេរោគពីការវះកាត់។

គួរបញ្ជាក់ថា Colucci បានវះកាត់ចំនួន១២ដង ដែលចំណាយថវិកាប្រមាណ២២ម៉ឺនដុល្លារ ដែលមានដូចជា កែមុខ ច្រមុះ ការលើកភ្នែក ចិញ្ចើម និងការកាត់បបូរមាត់ ដើម្បីមានមុខស្រដៀងទៅនឹង Jimin សមាជិក BTS ។

បន្ថែមពីលើនេះ កាលពីឆ្នាំមុន តារាសម្តែងវ័យក្មេងរូបនេះត្រូវបានគេរាយការណ៍ថាបានសម្ដែងក្នុងរឿងភាគកូរ៉េ «Pretty Lies (Cogimar) »ដែលថតពីខែមិថុនាដល់ខែធ្នូ ហើយគ្រោងនឹងចាក់ផ្សាយនៅលើសេវាផ្សាយរបស់សហរដ្ឋអាម៉រិកនៅចុងឆ្នាំនេះ៕

ប្រភព៖ Daily Mail

ប្រទេសថៃ ៖ កាលពីថ្ងៃទី២៤ ខែមេសា កន្លងមក សារព័ត៌មានប្រទេសថៃរាយការណ៍ថា ខេត្តអ៊ូប៊ុនរ៉ាជថានីមានអាកាសធាតុក្តៅខ្លាំង និងមានសីតុណ្ហភាពជាមធ្យមពី៣៧ ទៅ៣៩អង្សារសេ ។ លើសពីនេះ មានព្យុះរដូវក្តៅបក់បោកមកលើប្រទេសថៃ បានធ្វើឱ្យមានភ្លៀងធ្លាក់ខ្លាំងបណ្តាលឱ្យត្រីធម្មជាតិជាច្រើនក្បាលក្នុងបឹងនៅភូមិថាខងឡិក ឃុំខាំណាមសែប ស្រុកវ៉ារិនឆាំរ៉ាប ដែលស្ថិតនៅជាប់ទន្លេមូន ងាប់និងអណ្តែតពាសពេញផ្ទៃទឹក ។ អ្នកភូមិបាននាំគ្នាចាប់ត្រីទាំងនេះចេញពីបឹងដើម្បីកុំឱ្យទឹកស្អុយ ។

លោកស្រី Noochan Boonprachaum ជាមេភូមិថាខងឡិក ឃុំខាំណាមសែប និយាយថា កាលពីថ្ងៃទី២៣ ដល់២៤ ខែមេសា ក្នុងភូមិមានខ្យល់ព្យុះរដូវក្តៅបក់បោកជាប់គ្នាចំនួន២ថ្ងៃ ដែលធ្វើឱ្យអាកាសធាតុធ្លាប់តែក្តៅខ្លាំង និងមានសីតុណ្ហភាពពី៣៧ ទៅ៣៩អង្សារសេអស់រាប់ខែមកហើយ បែរជាមានអាកាសធាតុត្រជាក់ ហើយមានទឹកត្រជាក់ហូរចូលក្នុងបឹងនៅភូមិនេះ ។

លោកស្រីបន្តថា អាកាសធាតុផ្លាស់ប្តូរភ្លាមៗបានធ្វើឱ្យត្រីទាំងនេះខ្វះអុកស៊ីសែន ហើយងាប់អស់រាប់ម៉ឺនក្បាល ។ ហេតុនេះ ត្រូវប្រមូលកម្លាំងក្នុងភូមិ និងឃុំខាំណាមសែប មកជួយគ្នាចាប់ត្រីចេញពីទឹក ព្រោះនឹងធ្វើឱ្យទឹកស្អុយ ហើយប៉ះពាល់ដល់ការផលិតទឹកស្អាតសម្រាប់ប្រើប្រាស់ក្នុងភូមិផងដែរ ។ ចំណែកត្រីប្រមូលបានពីក្នុងទឹក នឹងឱ្យអ្នកភូមិយកទៅធ្វើប្រហុកទុកហូប ព្រោះត្រីទាំងនេះងាប់ដោយសារអាកាសធាតុផ្លាស់ប្តូរ មិនមែនងាប់ដោយសារជាតិពុលទេ ។ ដូច្នេះ គេអាចយកទៅហូបបាន បន្ទាប់មក ត្រូវស្តារប្រភពទឹកឡើងវិញ ព្រោះវាជាកន្លែងអភិរក្សពូជត្រីធម្មជាតិ ។

គួរបញ្ជាក់ថា កាលពីថ្ងៃទី២៣ ដល់២៤ ខែមេសា ផ្ទះសម្បែងពលរដ្ឋចំនួន២៨០ខ្នងក្នុងស្រុកចំនួន៨ របស់ខេត្តអ៊ូប៊ុនរ៉ាជថានី ត្រូវបានខ្យល់ព្យុះបំផ្លាញ ។ ពេលនេះ មានក្រុមស្ម័គ្រចិត្ត និងកម្លាំងយោធាចុះមកជួយដល់ផ្ទះពលរដ្ឋដែលរងខូចខាតដោយសារព្យុះរដូវក្តៅ ។ លើសពីនេះ ខាងខេត្តបានបញ្ជាទៅកាន់ស្រុកចំនួន២៥ ត្រូវការពារទ្រព្យសម្បត្តិ ចៀសវាងការខូចខាតដោយសារខ្យល់ព្យុះរដូវក្តៅម្តងទៀត ៕ ប្រភព ៖ khaosod

ប្រទេសចិន ៖ កាលពីថ្ងៃទី២២ ខែមេសា កន្លងមក មានអ្នកបើករថយន្តទំនើប១គ្រឿងបានចតរថយន្តរបស់ខ្លួននៅកណ្តាលផ្លូវ និងបង្កការលំបាកដល់រថយន្តផ្សេងទៀត ។ លើសពីនេះ រថយន្តនេះបានចតនៅចំណុចសម្រាប់គេចពីគ្រោះអគ្គិភ័យក្នុងទីប្រជុំជនទៀតផង ហើយម្ចាស់រថយន្តបានដកស្លាកលេខរថយន្តចេញ ដើម្បីកុំឱ្យប៉ូលិសផាកពិន័យបាន ។

បន្តិចក្រោយមក អ្នកនៅក្បែរនោះបានទូរស័ព្ទបឹ្តងប៉ូលិស ប៉ុន្តែប៉ូលិសមិនអាចទំនាក់ទំនងទៅកាន់ម្ចាស់រថយន្តបានទេ ទើបធ្វើឱ្យអ្នកនៅក្បែរនោះខឹងសម្បារជាខ្លាំង ហើយដោយមើលឃើញថា រថយន្តនេះចតនៅក្បែរកន្លែងចោលសំរាមផងនោះ ក៏នាំគ្នាបង្រៀនអ្នកបើកបររថយន្ត ដើម្បីកុំឱ្យធ្វើបែបនេះទៀតនៅថ្ងៃក្រោយ គឺពួកគេបានយកសំរាមម្នាក់១ថង់មកបោះលើរថយន្ត ។ ប៉ុន្តែមនុស្សម្នាក់មិនអាចបោះសំរាមលើរថយន្តនេះលើសពី១ថង់បានទេ ព្រោះគេចាត់ទុកថាខុសច្បាប់ និងបំផ្លាញទ្រព្យសម្បត្តិរបស់អ្នកដទៃ ។

គេរាយការណ៍ថា នៅពេលម្ចាស់រថយន្តខាងលើត្រឡប់មកវិញឃើញសំរាមជាច្រើនគរនៅលើរថយន្តក៏ភ្ញាក់ផ្អើលជាខ្លាំង ហើយបានជួលគេមកលាងសំអាតរថយន្ត ។ ទោះយ៉ាងណា គេមិនដឹងថា តើប៉ូលិសបានដាក់ទោសតាមច្បាប់ទៅលើអ្នកបើកបរខាងលើនេះឬអត់ ប៉ុន្តែបន្ទាប់ពីបានសំអាតហើយ រថយន្តគ្មានការខូចខាតអ្វីទេ ។

ហេតុការណ៍នេះត្រូវបានគេបង្ហោះនៅក្នុងបណ្តាញសង្គមប្រទេសចិន និងទទួលបានការគាំទ្រពីអ្នកលេងបណ្តាញសង្គមសរសើរថា ធ្វើបានល្អណាស់ដើម្បីកុំឱ្យពួកគេធ្វើបែបនេះទៀតនៅថ្ងៃក្រោយ ព្រោះអ្នកបើកបររថយន្តភាគច្រើនមិនខ្វល់នឹងអ្នកបើកបរផ្សេងទៀតទេ ៕ ប្រភព ៖ World Forum

បរទេស៖ ហាង KFC នៅក្នុងប្រទេសរុស្ស៊ីនឹងបើកឡើងវិញនៅថ្ងៃទី 25 ខែមេសា ប៉ុន្តែជាមួយនឹងឈ្មោះថ្មីទាំងស្រុង។
បន្ទាប់ពីរុស្ស៊ីបានចាប់ផ្តើមយុទ្ធនាការយោធានៅអ៊ុយក្រែនក្នុងខែកុម្ភៈឆ្នាំ 2023 អាជីវកម្មលោកខាងលិចជាបន្តបន្ទាប់បានដកខ្លួនចេញពីទីនោះ។
ក្រុមហ៊ុនធំរបស់សហរដ្ឋអាមេរិកនៃខ្សែសង្វាក់អាហាររហ័ស KFC ក៏បានបញ្ចប់ការដកខ្លួនចេញពីប្រទេសរុស្ស៊ីផងដែរ។ នៅខែតុលា ឆ្នាំ 2022 ពួកគេបានប្រកាសលក់គ្រឿងបរិក្ខារនៅទីនេះទៅឱ្យក្រុមហ៊ុន Smart Service ដែលជាក្រុមហ៊ុនរុស្ស៊ីដែលដំណើរការដោយសហគ្រិនពីរនាក់គឺលោក Konstantin Kotov និង Andrey Oskolkov ។អាជីវកម្មរុស្ស៊ីជាច្រើនបានចាប់ផ្តើមផលិតភេសជ្ជៈកូកាកូឡាភ្លាមៗនៅពេលដែលកូកាកូឡារបស់អាមេរិកប្រកាសចាកចេញ។ អវត្ដមានរបស់ Starbucks ក៏ត្រូវបានជំនួសដោយខ្សែសង្វាក់ Stars Coffee របស់តារារ៉េបជនជាតិរុស្សីផងដែរ។

ប្រទេសរុស្សីបានប្តូរឈ្មោះ KFC ទៅជាឈ្មោះ Rostic’s គឺជាម៉ាកដែលត្រូវបានបង្កើតឡើងក្នុងឆ្នាំ 1993។ មុននឹងប្រកាសដកខ្លួនចេញពីទីផ្សាររុស្ស៊ី KFC មានហាងជាង 1,000 នៅទីនោះ។ កិច្ចព្រមព្រៀងនេះរួមបញ្ចូលហាងទាំងអស់របស់ KFC ប្រព័ន្ធគ្រប់គ្រង និងពាណិជ្ជសញ្ញាសម្រាប់ម៉ាក Rostic ដែលជាឈ្មោះថ្មីរបស់ខ្សែសង្វាក់ តម្លៃនៃកិច្ចព្រមព្រៀងមិនត្រូវបានបង្ហាញឱ្យដឹងទេ។ Rostic’s នៅតែប្រើពណ៌ក្រហម និងសនៅលើឡូហ្គោរបស់វាដូចជា KFC។

ទោះបីជាយ៉ាងណាក៏ដោយ ខណៈពេលដែល McDonald’s បានដាក់កំហិតយ៉ាងតឹងរ៉ឹងលើការប្រើប្រាស់ម៉ាកយីហោ និងផលិតផលរបស់ខ្លួន លក្ខខណ្ឌរបស់ KFC គឺមានភាពធូរស្រាលជាងមុន។ លោក Kotov បាននិយាយថា ហាង Franchise ដែលនៅតែស្ថិតក្រោមកិច្ចសន្យាអាចបន្តបើកបាន ចំណែកម៉ឺនុយក៏ស្ទើរតែមិនផ្លាស់ប្តូរដែរ។
លោក Kotov បានប្រាប់ TASS ក្នុងខែវិច្ឆិកា ឆ្នាំ 2022 ថា យើងបានឈានដល់កិច្ចព្រមព្រៀងមួយដើម្បីរក្សាមុខម្ហូបទាំងមូល និងផ្លាស់ប្តូរឈ្មោះមុខម្ហូបចំនួន 4 ប៉ុណ្ណោះ ប៉ុន្តែសម្រាប់រសជាតិ និងគុណភាពនៃចានគឺនៅតែដដែល៕ប្រភព៖vnexpress

ប្រទេសកូរ៉េខាងត្បូង ៖ ពលរដ្ឋកូរ៉េខាងត្បូងរាប់រយនាក់បាននាំគ្នាលេងកម្មវិធីមួយលើទូរស័ព្ទដៃឈ្មោះថា Toss នាបរិវេណខាងមុខសារមន្ទីរនៅកណ្តាលទីក្រុងសេអ៊ូល ។ គេបង្កើតកម្មវិធីនេះឡើងក្នុងគោលបំណងជួយផ្តល់ប្រាក់ដល់ពលរដ្ឋ ក្នុងអំឡុងពេលប្រទេសកូរ៉េខាងត្បូងមានសេដ្ឋកិច្ចមិនល្អ ។

Toss គឺជាកម្មវិធីមួយអភិវឌ្ឍន៍ឡើងដោយ Viva Republic ជាការចាប់ផ្តើមអាជីវកម្មរបស់ប្រទេសកូរ៉េខាងត្បូង ។ គេបានកំណត់ឱ្យអ្នកលេងកម្មវិធីនេះត្រូវធ្វើសកម្មភាពផ្សេងៗឱ្យបានរួចរាល់ដើម្បីទទួលបានប្រាក់រង្វាន់ ហើយពួកគេអាចយកប្រាក់នេះមកចាយវាយក្នុងជីវភាពប្រចាំថ្ងៃ ។ សកម្មភាពដែលពលរដ្ឋកូរ៉េខាងត្បូងត្រូវធ្វើ គឺដើរឱ្យគ្រប់១ម៉ឺនជំហាន ឬការប៉ះអេក្រង់ទូរស័ព្ទនៅពេលមានអ្នកប្រើផ្សេងទៀតនៅក្បែរ គឺអាចរកប្រាក់ពីការលេងកម្មវិធីនេះចំនួន១០សេនក្នុង១លើក ។

តាមការស្ទង់មតិរបស់ Incruit ជាគេហទំព័រស្វែងរកការងារនៅកូរ៉េខាងត្បូងបង្ហាញថា តាំងពីគេបើកឱ្យប្រើប្រាស់កម្មវិធី Toss កាលពីខែមករា រហូតដល់ខែមេសា ឆ្នាំ២០២៣ គឺមានអ្នកប្រើប្រាស់កម្មវិធីនេះចំនួន៤៤០ម៉ឺននាក់ ហើយមនុស្ស៣នាក់ក្នុងចំណោម៤នាក់ ទទួលបានប្រាក់ចំណូលបន្ថែមពីការលេង Toss ។

អ្នកនាង Baek Na-young អាយុ២៧ឆ្នាំ ជាបុគ្គលិកការិយាល័យម្នាក់និយាយថា ៖ «រហូតមកដល់ពេលនេះ ខ្ញុំរកប្រាក់បានត្រឹមតែ១៥០វ៉ុនប៉ុណ្ណោះ តែខ្ញុំដាក់ផែនការរួចហើយថា នឹងលេងវាបន្តទៀត ។ រីឯប្រាក់ដែលទទួលបាន ខ្ញុំនឹងសន្សំសម្រាប់ទិញកាហ្វេ» ។ ចំណែកលោក Han Sun-jae អាយុ៧៧ឆ្នាំ និងបានចូលនិវត្តន៍ពីការងារហើយបញ្ជាក់ថា លោករកប្រាក់បានប្រមាណ៥ម៉ឺនវ៉ុន ដោយសារលោកលេង Toss ។

អ្នកជំនាញកូរ៉េខាងត្បូងនិយាយថា ការអនុញ្ញាតឱ្យពលរដ្ឋលេង Toss បង្ហាញឱ្យឃើញថា គេកំពុងតែជួយគ្នាដើម្បីយកឈ្នះលើសេដ្ឋកិច្ចជាតិកាន់តែមិនល្អ ក្រោយពីប្រទេសកូរ៉េខាងត្បូងជួបនឹងបញ្ហាអតិផរណាអ្នកប្រើប្រាស់ស្មើ៥,១% នៅឆ្នាំ២០២២ ។ គេចាត់ទុកថា តួលេខនេះខ្ពស់បំផុតគិតចាប់ពីឆ្នាំ១៩៩៨ មក ខណៈតម្លៃម្ហូបអាហារ និងការដឹកជញ្ជូន កើនឡើងដល់៥,៩% និង៩,៧% តាមលំដាប់ ។ លើសពីនេះ ប្រទេសកូរ៉េខាងត្បូងក៏ប្រឈមនឹងពលរដ្ឋគ្មានការងារធ្វើផងដែរកាលពីខែកុម្ភៈ ឆ្នាំ២០២៣ គឺស្មើចំនួន៤៩ម៉ឺន៧ពាន់នាក់ ។ នេះជាចំនួនខ្ពស់បំផុតចាប់តាំងពីគេបានកត់ត្រានៅឆ្នាំ២០០៣ ។

សាស្ត្រាចារ្យម្នាក់ផ្នែកការសិក្សាពីអ្នកប្រើប្រាស់នៅសាកលវិទ្យាល័យ Inha បានសម្តែងការបារម្ភថា ៖ «បើទោះជាគេព្យាយាមរកប្រាក់ដាក់ហោប៉ៅ និងគួរឱ្យសរសើរក្តី ប៉ុន្តែវាអាចធ្វើឱ្យពួកគេប្រឈមនឹងគ្រោះថ្នាក់ផងដែរ ដោយសារការប្រើប្រាស់ទិន្នន័យផ្ទាល់ខ្លួន» ៕ ប្រភព ៖ beartai BRIEF

សហរដ្ឋអាមេរិក៖ អវកាសយានិក NASA បួននាក់ របស់សហរដ្ឋអាមេរិក នឹងហោះហើរក្នុងបេសកកម្ម Artemis II ដើម្បីដឹកមនុស្សទៅកាន់ឋានព្រះច័ន្ទជាលើកដំបូងក្នុងរយៈពេល ៥០ ឆ្នាំ ដែលគ្រោងនឹងធ្វើឡើងនៅខែវិច្ឆិកា ឆ្នាំ ២០២៤ ។ នៅលើបេសកកម្ម Artemis II កំពុងរៀបចំហោះហើរឆ្ងាយបំផុតក្នុងប្រវត្តិសាស្ត្រ ដែលជាយានបាញ់បង្ហោះរបស់ពួកគេក៏ស្ថិតក្នុងដំណាក់កាលដំឡើងផងដែរ។
យោងតាម Space ដែលបានរាយការណ៍នៅថ្ងៃទី ២៤ ខែមេសាមជ្ឈមណ្ឌល Marshall Space Flight Center របស់ NASA ដំណាក់កាលស្នូលនៃប្រព័ន្ធបាញ់បង្ហោះអវកាស (SLS) ដែលប្រើសម្រាប់បេសកកម្ម Artemis II កំពុងត្រូវបានសាងសង់នៅឯកន្លែង Michoud Assembly Facility របស់ NASA ក្នុងទីក្រុង New Orleans ។

តាមវីដេអូ វិស្វករអាចត្រូវបានគេមើលឃើញថាកំពុងធ្វើការដើម្បីតម្រឹម និងពត់ផ្នែកខាងក្រោមនៃ SLS ដែលផ្នែកទាំងប្រាំនៃតួរ៉ុក្កែតប្រវែង ៦៥ ម៉ែត្រត្រូវបានតភ្ជាប់ ហើយប្លុកម៉ាស៊ីនផ្នែកចុងក្រោយ។ នៅពេលដែលបានបញ្ចប់ ស្នូល SLS នឹងត្រូវដឹកជញ្ជូនឆ្លងកាត់ឈូងសមុទ្រម៉ិកស៊ិកទៅកាន់រដ្ឋផ្លរីដា ដែលនៅទីនោះ យានដែលបើកដំណើរការពេញលេញនឹងចេញរូបរាង។
ការហោះហើរដែលត្រូវបានគេរំពឹងថានឹងមានរយៈពេលប្រហែល ១០ ថ្ងៃនឹងនាំក្រុមនាវិកពីលើឋានព្រះច័ន្ទដែលប្រហែលជាឆ្ងាយជាងអវកាសយានិកដទៃទៀតនៅក្នុងប្រវត្តិសាស្ត្រប៉ុន្តែចម្ងាយពិតប្រាកដមិនទាន់ត្រូវបានកំណត់នៅឡើយទេ។ ទោះបីជាយ៉ាងណាក៏ដោយ បច្ចេកវិទ្យាជាច្រើនត្រូវបានប្រើសម្រាប់បេសកកម្ម ដូចជាយានរុករកតាមច័ន្ទគតិ និងស្ថានីយ៍ចុះចត។

ប្រសិនបើអ្វីៗដំណើរការទៅតាមកាលវិភាគ អង្គការ NASA នឹងចាប់ផ្តើមបេសកកម្ម Artemis នៅខែវិច្ឆិកា ឆ្នាំ ២០២៤។ បេសកកម្មនេះនឹងដឹកអ្នកអវកាសយានិកបួននាក់លើការហោះហើរសាកល្បងជុំវិញព្រះច័ន្ទ មុនពេលត្រឡប់មកផែនដីវិញ ដើម្បីសាកល្បង និងវាយតម្លៃប្រព័ន្ធ និងដំណើរការជាច្រើននៅលើយាន Orion។ ទិន្នន័យដែលប្រមូលបានក្នុងអំឡុងពេលហោះហើរនឹងជូនដំណឹងអំពីបេសកកម្មបន្ថែមទៀតនៅក្នុងកម្មវិធី Artemis ។ នាវិក Artemis II នឹងរួមបញ្ចូលអវកាសយានិក NASA ៤នាក់ គឺមេបញ្ជាការ Reid Wiseman អ្នកបើកយន្តហោះ Victor Glover អ្នកឯកទេសបេសកកម្ម Christina Koch និងអវកាសយានិកទីភ្នាក់ងារអវកាសកាណាដា Jeremy Hansen៕ ប្រភព៖vnexpress