កាលពីថ្ងៃទី២៥ ខែមេសា ឆ្នាំ​២០២៣ គំរូផែនទី​នៃគម្រោង​ផ្លូវល្បឿនលឿន​ភ្នំពេញ-សៀមរាប ត្រូវបានបង្ហាញ​ចេញ​ក្នុងកិច្ចប្រជុំ​ស្តីពីការ​ចូលរួម​ផ្តល់ព័ត៌មាន​បច្ចេកទេស​លើគម្រោង​សិក្សា​ផ្លូវល្បឿនលឿន​នេះ។

គម្រោង​ផ្លូវល្បឿនលឿនទី៣នេះ នឹង​ចាប់ផ្តើម​ចេញពីរាជធានីភ្នំពេញ ឆ្លងកាត់​ខេត្តកណ្តាល កំពង់ចាម កំពង់ធំ និងសៀមរាប។ នេះបើយោងតាម​លិខិត​ជូនដំណឹង​របស់​ក្រសួងសាធារណការ និង​ដឹកជញ្ជូន ផ្ញើទៅកាន់​អភិបាល​រាជធានី-ខេត្ត​ទាំង៥ កាលពីពេលថ្មីៗនេះ។

ក្រសួង​បាន​ស្នើឱ្យ​អភិបាលរាជធានី-ខេត្ត​ទាំង៥ ​ជួយអន្តរាគមន៍ សម្របសម្រួល​ដល់អង្គភាពពាក់ព័ន្ធ និងអាជ្ញាធរ​មូលដ្ឋាន​ក្នុងដែន​សមត្ថកិច្ច ដើម្បី​ចូលរួម​សហការ​ជាមួយ​ក្រុមហ៊ុន​សាជីវកម្មស្ពាន និង​ថ្នល់​ចិន ក្នុងការសិក្សា​លើគម្រោងផ្លូវល្បឿនលឿននេះ ឱ្យ​បានរលូន។

សូមជម្រាបផងដែរថា នៅថ្ងៃទី៧ ខែមិថុនា ឆ្នាំ​២០២៣ខាងមុខនេះ កម្ពុជា​នឹង​បើកការដ្ឋាន​សាងសង់​ផ្លូវល្បឿនលឿនទី២ ភ្នំពេញ-បាវិត ក្រោមអធិបតីភាព​សម្តេចតេជោ ហ៊ុន សែន៕

នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានបញ្ជាឲ្យកម្លាំងអាវុធហត្ថ បើកប្រតិបត្តិការបង្ក្រាបបទល្មើសព្រៃឈើ ហើយបើវាបាញ់ត បាញ់វាកម្ទេចចោលតែម្តងទៅ។ អីក៏សម្បើមម្ល៉េះ។

តាមរយៈសារសំឡេងនៃបទបញ្ជា នៅថ្ងៃទី២៦ ខែមេសា ឆ្នាំ២០២៣ នាយឧត្តមសេនីយ៍ សៅ សុខា បានបញ្ជាក់ថា “ខ្ញុំបញ្ជាឱ្យរៀបកម្លាំង ១៥០នាក់ បំពាក់កាំភ្លើងគ្រប់ដៃ មធ្យោបាយរបស់យើង បើចាំបាច់ប្រើរថពាសដែកក៏បានដែរ ទៅកន្ទ្រប់ពួកអស់ហ្នឹងឱ្យអស់មើ មានប៉ុន្មាននាក់ពួកអាបំផ្លាញព្រៃឈើហ្នឹង។ វ៉ៃខ្នោះ ចងហ្អែងមើរ៍។ មានប៉ុន្មាននាក់ (បានជាបំផ្លាញព្រៃឈើ) មិនចេះឈប់សោះអញ្ចឹង។ ឱ្យនរណាសិក្សាផ្លូវឲ្យច្បាស់។ វ៉ៃខ្នោះទាំងអស់ នរណាខ្លះចេញមុខមកការពារបទល្មើសហ្នឹង ហើយហៅមន្ត្រីរដ្ឋបាលព្រៃឈើទៅ ចាប់ហើយ ហៅសួរនាំនរណាខុសនរណាត្រូវ។ ឥឡូវ បើស្រុក និងខេត្តមិនធ្វើទេ យើងធ្វើ។ បើមានកាំភ្លើងតដៃទេ មិនបាច់និយាយច្រើនទេ បាញ់យកតែម្តងទៅ។ យក PKM ទៅបំពាក់តែម្តងទៅ ១០ដើម។ បើវាបាញ់ត បាញ់វាកម្ទេចចោលតែម្តងទៅ។ អីក៏សម្បើមម្ល៉េះ មិនស្តាប់នាយករដ្ឋមន្ត្រីទេហ្អី”៕

ស្របតាមប្រសាសន៍សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នាថ្ងៃទី២៥ ខែមេសា ឆ្នាំ២០២៣ និងដើម្បីចូលរួមអបអរ សាទរព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ក្នុងឱកាសដែលកម្ពុជាធ្វើជាម្ចាស់ផ្ទះ រដ្ឋបាលរាជធានីភ្នំពេញនឹងសហការជាមួយសហភាពសហព័ន្ធយុវជនកម្ពុជា (ស.ស.យ.ក) រៀបចំផ្សាយបន្តផ្ទាល់ការប្រកួតបាល់ទាត់របស់ក្រុមជម្រើសជាតិកម្ពុជាក្នុងព្រឹត្តិការណ៍ប្រកួត កីឡាអាស៊ីអាគ្នេយ៍លើកទី៣២ ចាប់ពីថ្ងៃទី២៩ ខែមេសា ដល់ថ្ងៃទី១៦ ខែឧសភា ឆ្នាំ ២០២៣ ចំនួន៧ទីតាំង។

ទីតាំងទាំង៧រួមមាន៖
១- សួនច្បារមុខវត្តបទុមវតី ស្ថិតនៅក្នុងសង្កាត់ចតុមុខ ខណ្ឌដូនពេញ
២- សួនច្បារមាត់ទន្លេទល់មុខភោជនីយដ្ឋានមេត្រូ ស្ថិតនៅក្នុងសង្កាត់ផ្សារកណ្តាលទី១ ខណ្ឌដូនពេញ
៣- ក្នុងបុរីប៉េងហួតបឹងស្នួរ ស្ថិតនៅក្នុងសង្កាត់និរោធ ខណ្ឌច្បារអំពៅ
៤- ស្ងួនច្បារមិត្តភាពក្បែរក្រសួងការពារជាតិ ស្ថិតនៅក្នុងសង្កាត់មិត្តភាព ខណ្ឌ៧មករា
៥- សួនច្បារទល់វិទ្យាស្ថានស្រាវជ្រាវ និងអភិវឌ្ឍន៍ព្រៃឈើ-សត្វព្រៃ ស្ថិតនៅក្នុងសង្កាត់ គោកឃ្លាង ខណ្ឌសែនសុខ
៦- សូនច្បារព្រះនាងប្រាជ្ញាបារមី ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ
៧-ទីលានប្រជាធិបតេយ្យ ក្បែរស្ពានអាកាសឫស្សីកែវ ស្ថិតនៅក្នុងសង្កាត់ឫស្សីកែវ ខណ្ឌឫស្សីកែវ។

សូមជម្រាបផងដែរថា ក្រុមជម្រើសជាតិកម្ពុជា U22 នឹងត្រៀមប្រកួតបើកឆាកប៉ះជាមួយក្រុមជម្រើសជាតិទីម័រខាងកើត នៅថ្ងៃទី២៩ ខែមេសា វេលាម៉ោង ៧:០០ នាទីយប់ នៅពហុកីឡដ្ឋានជាតិ ក្នុងព្រឹត្តិការណ៍កីឡាស៊ីហ្គេម វិញ្ញាសារបាល់ទាត់ផ្នែកបុរស ខណៈក្រុមជម្រើសជាតិឥណ្ឌូណេស៊ី ក៏នឹងត្រូវជួបជាមួយក្រុមជម្រើសជាតិហ្វីលីពីន វេលាម៉ោង ៤:០០នាទីរសៀល ពូល A វគ្គសន្សំពិន្ទុ៕

ក្រសួងកសិកម្ម រុក្ខាប្រមាញ់ និងនេសាទ បានប្រកាសជូនដំណឹងដល់កសិករឱ្យត្រៀមរក្សាទឹកទុកឱ្យបានច្រើន ដើម្បីបង្ការបញ្ហាធាតុអាកាសក្ដៅ ខណៈដែលក្រសួងធនធានទឹកបាន ព្យាករណ៍ថា រដូវវស្សាឆ្នាំ២០២៣នេះ នឹងចូលមកដល់យឺតនៅ សប្ដាហ៍ទី២ នៃខែឧសភា ជាមួយនឹងបរិមាណទឹកភ្លៀងពីតិចទៅមធ្យម និងមានកូនរដូវប្រាំងដែលអាចកើតឡើង ហើយអូសបន្លាយចាប់ពីដើមខែកក្កដា រហូតដល់ដើមខែសីហា ដែលអាចបង្កផលប៉ះពាល់ ដល់ផលិតកម្មដំណាំកសិកម្ម។

សេចក្តីជូនដំណឹងនៅថ្ងៃទី២៦ ខែមេសា បានឱ្យដឹងថា កសិករត្រូវត្រៀមបង្ការនិងឆ្លើយតប តាមរយៈការលើកទប់និងថែទាំភ្លឺស្រែឱ្យបានល្អ ដើម្បីរក្សាទឹកទុក ព្រមទាំងរៀបចំម៉ាស៊ីនបូមទឹកសម្រាប់បូមទឹកសង្គ្រោះនៅពេលចាំបាច់។ សម្រាប់ការដាំដុះស្រូវដើមរដូវវស្សា (ប្រភេទពូជស្រូវស្រាល) កសិករមិនគួរប្រថុយប្រថានដាំដុះ ដោយពឹងលើប្រភពទឹកតិចតួចឡើយ ព្រោះអាចប្រឈមនឹងការខូចខាតដោយសាររាំងស្ងួត។

ដោយឡែក តំបន់ដែលមានប្រភពទឹកគ្រប់គ្រាន់ កសិករគួរប្រញាប់ប្រញាល់ដាំដុះនៅចុងខែមេសា ឬដើមខែឧសភានេះ ដើម្បីអាចប្រមូលផលស្រូវនៅចុងខែកក្កដា ឬខែសីហា។ សម្រាប់តំបន់ដាំដុះស្រូវអាស្រ័យទឹកភ្លៀង កសិករគួររូតរះភ្ជួរដាស់ដី ដើម្បីត្រៀមដាំដុះក្នុងខែមិថុនា ឬខែកក្កដា ដោយប្រើប្រាស់ប្រភេទពូជស្រូវកណ្ដាលប្រកាន់រដូវ ដូចជា៖ ពូជស្រូវផ្ការំដួល និង ប្រភេទពូជស្រូវផ្សេងៗទៀត ដែលនឹងត្រូវប្រមូលផលក្នុងខែវិច្ឆិកា។
កសិករដែលដាំដុះដំណាំបន្លែ គួរប្រើប្រាស់ប្រព័ន្ធស្រោចស្រពសន្សំសំចៃទឹក ប្រក់សំណាញ់ ដើម្បីទប់កម្តៅ និងប្រើសារធាតុគម្របដីពីចំបើង ឬកាកសំណល់ដំណាំស្ងួត ឬគម្របប្លាស្ទិក ដើម្បីរក្សាសំណើមដីឱ្យបានយូរ។

ចំពោះកសិករដែលស្ថិតនៅតំបន់ឆ្ងាយពីប្រភពទឹក ដូចជា ទន្លេ ស្ទឹង បឹង ឬអាងទឹក ត្រូវត្រៀមលក្ខណៈ រក្សាទឹកទុកឱ្យបានច្រើននៅក្នុងត្រពាំង ឬអាងស្តុកទឹកនៅតាមគ្រួសារ ឬសហគមន៍ សម្រាប់ទុក ស្រោចស្រពក្នុងពេលរាំងស្ងួត៕

សាលាគណរាជធានីភ្នំពេញ ស្នើគ្រប់វត្តអារាមក្នុងរាជធានីភ្នំពេញ វាយជួង រគាំង និងទូងស្គរ ឱ្យបានកងរំពង ដើម្បីអបអរសាទរក្នុងពិធីទទួល និងដង្ហែព្រះអគ្គិជ័យកីឡាប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣។ ការទូងស្គរនេះនឹងប្រព្រឹត្តទៅនៅថ្ងៃសុក្រ ទី២៨ ខែមេសា ឆ្នាំ២០២៣ វេលាម៉ោង ១៧ : ២០ នាទី។

គួរបញ្ជាក់ថា រដ្ឋបាលរាជធានីភ្នំពេញ នឹងរៀបចំពិធីដង្ហែព្រះអគ្គិជ័យកីឡា ពីតំបន់អាស៊ានចូលមកព្រះរាជាណាចក្រកម្ពុជា តាមច្រកទ្វារព្រំដែនអន្តរជាតិ ត្រពាំងគៀល-ណងណុក ឃឿន ខេត្តស្ទឹងត្រែង នៅថ្ងៃទី២៨ ខែមេសា ឆ្នាំ២០២៣ និងដង្ហែបន្តឆ្ពោះទៅតាមបណ្តាខេត្តជុំវិញបឹងទន្លេសាប និងដង្ហែព្រះអគ្គិជ័យកីឡា ពីត្រង់ចំណុចផ្សារព្រែកអញ្ចាញ ស្ពានទី១២ ព្រំ ប្រទល់ខេត្តកណ្តាល-រាជធានីភ្នំពេញ បន្តឆ្ពោះទៅចំណុចរមណីយដ្ឋានវត្តភ្នំ នឹងទៅតម្កល់រក្សាទុកនៅ វត្តលង្កាព្រះកុសុមារាម រហូតដល់ចប់ក្បួនដង្ហែ។

សូមរម្លឹកថា ព្រះអគ្គិជ័យកីឡា នឹងវិលត្រឡប់មកកម្ពុជាវិញ ក្រោយពីដង្ហែវិលជុំប្រទេសសមាជិកអាស៊ានចំនួន ៩ប្រទេស គឺ ប្រទេស វៀតណាម ហ្វីលីពីន ឥណ្ឌូណេស៊ី ទីម័រខាងកើត ម៉ាឡេស៊ី សិង្ហបុរី ថៃ មីយ៉ាន់ម៉ា និង ឡាវ ៕

កាលពីពេលថ្មីៗនេះ មានព័ត៌មានចរចាមអារ៉ាមថា  លោក ជឿន ប៊ុនចក់ ឬគេស្គាល់ថា Admin ជីកចក់ នឹងធ្វើជាពិធីការអត្ថាធិប្បាយបាល់ទាត់សុីហ្គេមឱ្យគេហទំព័រផ្លូវការរបស់ក្រសួងព័ត៌មាន ដែលដំណឹងនេះបានធ្វើឱ្យមហាជនសម្តែងការមិនពេញចិត្តជាខ្លាំង ដោយរិះគន់ចំៗថាក្រសួងយកមនុស្សគ្មានវិជ្ជាជីវៈ មកធ្វើពិធីករនៅក្នុងព្រឹត្តិការណ៍ដ៏ធំមួយសម្រាប់ប្រទេសកម្ពុជា។

ដំណឹងនេះបានលេចចេញកាលពីព្រឹកនេះ ដោយមានការបង្ហោះព្រោងព្រៀតនៅលើបណ្តាញសង្គមហ្វេកប៊ុក ដែលធ្វើឱ្យមហាជាជននាំគ្នា ចូលទៅបញ្ចេញមតិស្រដៀងៗគ្នាថា៖” បេីជាការពិតមែន​ សូមសហព័ន្ធនិងមន្ត្រីពាក់ព័ន្ធមេត្តាពិចារណាឡេីងវិញ។ កុំយកកិត្តិយសជាតិផ្ញេីនឹងមនុស្សគ្មានវិជ្ជាជីវៈ។ កុំយកIdolធំជាងទង់ជាតិកម្ពុជា។ កុំយកព្រឹត្តិការណ៍ជាតិជាប្រវត្តិសាស្រ្តធ្វេីជាបទពិសោធន៍របស់មនុស្ស២ឬ៣នាក់។”

ហើយអ្នកខ្លះទៀតបានលើកឡើងចំៗតែម្តងថា៖”អស់អាម្មរណ៍លែងចង់មេីលបាល់ហេីយ​ លឺថាពូចក់មកធ្វេីពិធីករ​ មុខមាត់ជាតិគួរតែយកពិធីករដែលអាជីពច្បាស់វិញទៅ​ ថ្លៃថ្នូរជាង”។

តែយ៉ាងណាមិញទាក់ទងនឹងរឿងនេះ មិនទាន់មានការបញ្ជាក់ច្បាស់លាស់ណាមួយអំពីក្រសួងជាប់ពាក់ព័ន្ធដែលថា Admin ជីងចក់នឹងធ្វើជាអ្នកអត្ថាធិប្បាយក្នុងព្រឹត្តិការណ៍សុីហ្គេមនៅឡើយនោះទេ។

បើយោងតាមប្រភពមិនច្បាស់ការមួយទៀតក៏បានបង្ហើបថា Admin ជីងចក់​ទំនងជាធ្វើជាអ្នកអត្ថាធិប្បាយ លើ៣ប្រភេទវិញ្ញាសាឯណោះ ក្នុងនោះរួមមាន៖ បាល់ទាត់ បាល់ទះ និងគុនខ្មែរ។

សូមជម្រាបផងដែរថា  Admin ជីងចង់គឺជាពិធីការនិយាយបាល់ដ៏ល្បីមួយរូបនៅតាមបណ្តាញសង្គនៅស្រុកខ្មែរ ក៏ប៉ុន្តែលោកច្រើនតែពាក្យមិនសមរម្យ អំឡុងពេលផ្សាយផ្ទាល់ ដែលជាហេតុធ្វើឱ្យមហាជនមិនមានទំនុកចិត្តក្នុងការឱ្យលោកធ្វើជាអ្នកអត្ថាធិប្បាយ នៅក្នុងព្រឹត្តិការណ៍សុីហ្គេម២០២៣នេះ៕