ពិតជាមិនធម្មតាមែន កំពូលតារាចម្រៀង វណ្ណដា បានបង្ហើបដំណឹងល្អមួយសម្រាប់អ្នកគាំទ្រដោយនឹងមានការសម្តែងនៅទីក្រុងតូក្យូ ថែមទាំងប៉ះជាមួយកំពូលតារាចម្រៀងរ៉េបស្រីល្បីឈ្មោះរបស់ជប៉ុន Awich ទៀតផងដែលធ្វើឱ្យមហាជនពិតជាកោតសរសើរ និងស្ងប់ស្ងែងឥទ្ធិពលរបស់តារាចម្រៀងរូបនេះយ៉ាងខ្លាំងដែលរះខ្ពស់កាន់តែឆ្ងាយ។
នៅលើផេកផ្លូវការរបស់តារាចម្រៀងរូបនេះនៅថ្ងៃទី១២ ខែមិថុនា ឆ្នាំ២០២៣ថា «
I’m going to see you guys in Japan! ខ្ញុំនឹងឡើងសម្តែងនៅ RAISE Club ក្នុងទីក្រុង Tokyo នាថ្ងៃ ទី ១៦ ខែ កក្កដា ឆ្នាំ២០២៣ ខាងមុខនេះ ដោយនឹងមានវត្តមានរបស់ កំពូលតារាចម្រៀងរ៉េប Awich ផងដែរ នេះជាលើកដំបូងដែលខ្ញុំចេញទៅសម្តែងនៅកម្មវិធីនៅប្រទេស ជប៉ុន
ខ្ញុំពិតជាមានអារម្មណ៍រំភើបមែនទែន ដែលត្រូវបានអញ្ជើញទៅសម្តែង និងមានឱកាសបានជួបអ្នកគាំទ្រនៅក្រៅប្រទេស ក៏ដូចជាបងប្អូនខ្មែរយើងដែលរស់នៅទីនោះ!» ។
គួរបញ្ជាក់ផងដែរថា វណ្ណដា គឺជាកំពូលតារាចម្រៀងកម្ពុជាម្នាក់ដែលបណ្តាប្រទេសដទៃទៀតជាច្រើនទទួលស្គាល់ពីភាពល្បីល្បាញរបស់តារាចម្រៀងរូបនេះ។ ជាក់ស្តែងកន្លងមកលោកត្រូវបានអញ្ជើញឱ្យទៅសម្តែងនៅប្រទេសសឹង្ហបុរី និងប្រទេសថៃជាដើម ជាពិសេសបានឱកាសបានសម្តែងក្នុងកម្មវិធីប្រគំតន្រ្តីឆាក rolling loud ដែលជាព្រឹត្តិការណ៍ប្រគំតន្រ្តីដ៏ធំមួយដែលតារាចម្រៀងមានសមត្ថភាពល្មមៗមិនអាចមានឱកាសឡើងលើឆាកនេះទេ។
បន្ថែមពីលើនេះ វណ្ណដា ក៏មានតារាក្រៅស្រុកសុំសហការចេញបទចម្រៀងជាមួយគ្នាផងដែរ ដែលពិតជាកម្រកើតមានណាស់ មិនត្រឹមតែប៉ុណ្ណោះលោក ក៏ត្រូវសារព័ត៌មានដ៏ល្បីរបស់អាម៉េរិកចុះផ្សាយជាតារាចម្រៀងដ៏មានឥទ្ធិពលបំផុតនៅអាស៊ីប៉ាស៊ីហ្វិកអាយុក្រោម៣០ឆ្នាំ ផងដែរ រួមទាំងតារាចម្រៀងរូបនេះជាតារាចម្រៀងម្នាក់មានអ្នកចូលទស្សនាវីដេអូលោកបានចំនួន១០០០លានដងនៅលើឆាណែលយូធូបផ្ទាល់ខ្លួន។
ភាពអស្ចារ្យនេះហើយ ទើប វណ្ណដា ទទួលបានឱកាសជាច្រើនដែលតារាចម្រៀងកម្ពុជាពុំសូវទទួលបាន តែលោកតែងតែបង្កើតប្រវត្តិសាស្រ្តថ្មីៗឱ្យវិស័យចម្រៀងកម្ពុជាកាន់តែរីកមុខរីកមាត់នៅលើឆាកអន្តរជាតិកើតចេញពីសមត្ថភាពរបស់ខ្លួនពិតៗ៕
