ប្រទេសចិន៖ យោងតាមសាជីវកម្មទំនាក់ទំនងក្វាងទុងកាលពីថ្ងៃទី១១ ខែមិថុនា បានកត់សម្គាល់ការបញ្ចប់ការដំឡើងផ្លូវរូងក្រោមសមុទ្រប្រវែង ៦,៨៤៥ ម៉ែត្រ និងផ្ទុកទម្ងន់បាន ៨០,០០០ តោន ក្នុងតំបន់ Greater Bay ខេត្ត Guangdong នៃប្រទេសចិន។
ផ្លូវរូងក្រោមសមុទ្រដែលវែងជាងគេ និងធំទូលាយបំផុតរបស់ពិភពលោក បានអនុញ្ញាតឱ្យយានជំនិះរត់ក្នុងទិសដៅពីរជាមួយនឹងផ្លូវចំនួនប្រាំបី និងជាផ្នែកមួយនៃគម្រោងការតភ្ជាប់ឆ្លងកាត់សមុទ្រ Shenzhen-Zhongshan ប្រវែង ២៤ គីឡូម៉ែត្រ ។
លោក Zhong Huihong នាយករងនៃមជ្ឈមណ្ឌលគ្រប់គ្រងតំណ Shenzhen-Zhongshan បាននិយាយថា គោលបំណងនៃការដំឡើងផ្លូវរូងក្រោមសមុទ្រនេះ គឺដើម្បីអភិវឌ្ឍន៍តំបន់ខ្លះៗរបស់ប្រទេសចិនដូចជា Guangdong – Hong Kong – Macau Greater Bay Area។ ស្ពាន កោះសិប្បនិមិត្ត និងផ្លូវរូងក្រោមសមុទ្ររបស់គម្រោងត្រូវបានបង្កើតជាប្រព័ន្ធដឹកជញ្ជូនខាងលើ និងក្រោមទឹក ដែលត្រូវបានចាត់ទុកថាជាគម្រោងឆ្លងកាត់សមុទ្រដ៏លំបាកបំផុតមួយរបស់ពិភពលោក។
Yihangjinan-1 គឺជានាវាដ៏ធំ និងទំនើបបំផុតនាពេលបច្ចុប្បន្នរបស់ពិភពលោកសម្រាប់ការដឹកជញ្ជូន និងការដំឡើងបំពង់ក្រោមបាតសមុទ្រ ដែលមានសមត្ថភាពដំឡើងខ្ពស់បំផុត មានភាពត្រឹមត្រូវនៃទីតាំងល្អ និងប្រតិបត្តិការប្រកបដោយប្រសិទ្ធភាព។
គួរបញ្ជាក់ដែរថា ផ្លូវនេះត្រូវបានគេរំពឹងថានឹងបើកឱ្យធ្វើចរាចរណ៍នៅឆ្នាំ ២០២៤ ដោយកាត់បន្ថយពេលវេលាធ្វើដំណើរប្រហែល ២ ម៉ោងមកត្រឹម ៣០ នាទី៕
ប្រភព ៖vnexpress
