ប្រទេសទួរគី៖ យោងតាមប្រភពព័ត៌មាន Global Times ដែលបានរាយការណ៍កាលពីថ្ងៃទី៩ ខែមិថុនា បានឱ្យដឹងថា គម្រោងផលិតរថភ្លើងក្រោមដីល្បឿនលឿនដំបូងគេរបស់ប្រទេសតួកគី ដែលមានល្បឿនអតិបរមា ១២០ គីឡូម៉ែត្រក្នុងមួយម៉ោង ត្រូវបានចាប់ផ្តើមអនុវត្តហើយ។
ថ្មីៗនេះក្រុមហ៊ុនរបស់ប្រទេសទួរគីចំនួន ១៣ បានសហការជាមួយក្រុមហ៊ុនចិន CRRC ដើម្បីសាងសង់ក្បាលរថភ្លើងចំនួន ៦០ ដំបូង។ រថភ្លើងត្រូវបានគេរំពឹងថានឹងដំណើរការក្នុងអាកាសយានដ្ឋានអ៊ីស្តង់ប៊ុល ហើយអាចដឹកអ្នកដំណើរបានដល់ទៅ ១,១០០ នាក់។ ដោយរថភ្លើងនេះបានប្រើប្រព័ន្ធបច្ចេកវិទ្យាប្រតិបត្តិការ GoA៤ យ៉ាងពេញលេញដែលមានសមត្ថភាពពិសេសអាចបើកបរបានដោយស្វ័យប្រវត្តិ។
ខ្សែរថភ្លើងក្រោមដីនៃអាកាសយានដ្ឋានអ៊ីស្តង់ប៊ុល គឺជាខ្សែរថភ្លើងក្រោមដីល្បឿនលឿនដំបូងគេបង្អស់របស់ប្រទេសទួរគី ដែលត្រូវបានរចនាឡើងសម្រាប់ដំណើរការខ្ពស់ និងជាបណ្តាញដឹកជញ្ជូនដ៏សំខាន់ដែលតភ្ជាប់អាកាសយានដ្ឋានជាមួយកណ្តាលទីក្រុង ដោយដឹកអ្នកដំណើរជាមធ្យម ៨០០,០០០ នាក់ក្នុងមួយថ្ងៃ។ លើសពីនេះ ប្រព័ន្ធគ្រប់គ្រងការអូសទាញដែលបានអភិវឌ្ឍថ្មីក៏អាចសម្របខ្លួនបានយ៉ាងល្អទៅនឹងតម្រូវការឡើងភ្នំក្នុងតំបន់ផងដែរ។ ការអនុវត្តបច្ចេកវិទ្យារថភ្លើងក្រោមដីល្បឿនលឿនគ្មានអ្នកបើកបរនេះ នឹងនាំមកនូវអត្ថប្រយោជន៍ដ៏អស្ចារ្យដល់ការធ្វើដំណើររបស់ប្រជាជនក្នុងតំបន់។
យោងតាមលោក Li Yangyang អ្នកគ្រប់គ្រងទូទៅនៃ CRRC Zhuzhou Locomotive ដែលជាក្រុមហ៊ុនបុត្រសម្ព័ន្ធរបស់ CRRC បាននិយាយថា ក្រុមហ៊ុនបានប្តេជ្ញាចិត្តក្នុងការសហការលើគោលការណ៍នៃផលប្រយោជន៍ទៅវិញទៅមកជាមួយក្រុមហ៊ុនទួរគីក្នុងដំណើរការលទ្ធកម្ម ការផលិត ប្រតិបត្តិការ និងការថែទាំ។ អត្រានៃការធ្វើមូលដ្ឋានីយកម្មនៃគម្រោងផលិតរថភ្លើងបានឈានដល់ ៦០% បង្កើតការងារជាង ២០០ ដែលរួមចំណែកដល់ការអភិវឌ្ឍន៍ឧស្សាហកម្មដឹកជញ្ជូនផ្លូវដែកក្នុងស្រុក៕
ប្រភព៖vnexpress
