រដ្ឋធានីកៀវ៖ នៅក្នុងការវាយប្រហារទៅលើរដ្ឋធានីកៀវ កាលពីយប់ថ្ងៃចន្ទ ឈានចូល ថ្ងៃអង្គារនោះ ក្រុងមូស្គូ បានអួតអាង អំពីការវាយប្រហារ កម្ទេចខែលការពារដ៏ទំនើបផលិតដោយអាមេរិករបស់អ៊ុយក្រែន ខណៈក្រុងកៀវ បានអះអាង អំពីការបាញ់ទម្លាក់មីស៊ីលរបស់រុស្ស៊ី ចំនួន១៨គ្រឿង ហើយក្នុងនោះមានទាំងមីស៊ីល មានល្បឿនលឿនជាងសំឡេង ចំនួន៦គ្រឿងផងដែរ។

សារព័ត៌មាន Alarabiya News បានចេញផ្សាយ កាលពីព្រឹក ថ្ងៃពុធ ទី១៧ ខែឧសភា ថា មន្រ្ដីសហរដ្ឋអាមេរិក ចំនួន២រូប បានអះអាង ថា ខែលការពារមីស៊ីលផាទ្រីយ៉ូត ផលិតដោយសហរដ្ឋអាមេរិក ហើយត្រូវបានប្រើប្រាស់ ដោយកងទ័ពអ៊ុយក្រែន ទំនងជារងការខូចខាត ពីការវាយប្រហាររបស់រុស្ស៊ី។ ប៉ុន្ដែប្រព័ន្ធការពារនោះ មិនបានបង្ហាញ ថា វាត្រូវបានកម្ទេចនោះឡើយ។

ប្រព័ន្ធការពារ Patriot ផលិតដោយអាមេរិក ក្លាយជាអង្គភាពការពារដែនអាកាសដ៏ទំនើបមួយ ផ្គត់ផ្គង់ដោយលោកខាងលិច សម្រាប់ជួយដល់ប្រទេសអ៊ុយក្រែន ទប់ទល់នឹងយុទ្ធនាការវាយប្រហារតាមផ្លូវអាកាស ពីកម្លាំងទាហានរុស្ស៊ី ដោយបានកំណត់គោលដៅ លើហេដ្ឋារចនាសម្ព័ន្ធសំខាន់ៗ កន្លែងថាមពល និង ទីតាំងផ្សេងៗទៀត។

មន្ត្រីអាមេរិកមួយរូប បាននិយាយ ដោយសុំលក្ខខណ្ឌមិនបញ្ចេញឈ្មោះ និង ដកស្រង់ព័ត៌មានបឋម អះអាង ថា រដ្ឋាភិបាលក្រុងវ៉ាស៊ីនតោន និង ក្រុងកៀវ កំពុងតែនិយាយអំពីវិធីល្អបំផុត នៅក្នុងការជួសជុលប្រព័ន្ធការពារនោះ ហើយត្រង់ចំណុច មិនបានបង្ហាញ ថា ខែលការពារនោះ នឹងត្រូវដកចេញពីអ៊ុយក្រែន នោះទេ។

ប្រព័ន្ធការពារ Patriot ត្រូវបានគេចាត់ទុក ថា ជាខែលការពារដែនអាកាសដ៏ទំនើបបំផុតមួយរបស់សហរដ្ឋអាមេរិក ដោយវាយអាចទប់ទល់នឹងយន្តហោះ កាំជ្រួចគ្រូស និង មីស៊ីលផ្លោងបាល្លីស្ទិក ផងដែរ។ បើតាមធម្មតា ខែលការពារនេះ នឹងរាប់បញ្ចូលទាំងឧបករណ៍បាញ់បង្ហោះ រួមជាមួយនឹងរ៉ាដា ហើយរថយន្តជំនួយផ្សេងៗទៀត។

ក្រសួងការពារជាតិរុស្ស៊ី កាលពីថ្ងៃអង្គារ បានបញ្ជាក់ ថា កម្លាំងទាហានរុស្ស៊ី បានប្រើប្រាស់មីស៊ីលមានល្បឿនលឿនជាងសំឡេង ប្រភេទឃិនហ្សាល់ (Kinzhal)វាយប្រហារទៅលើអ៊ុយក្រែន កាលពីរំលងអធ្រាត្រ ឈានចូលថ្ងៃអង្គារ ដោយបានកម្ទេចប្រព័ន្ធការពារ Patriot ផលិតដោយសហរដ្ឋអាមេរិក បាញ់ពីដីទៅលើអាកាស។

ដោយឡែក អ៊ុយក្រែន ក៏បានបញ្ជាក់ កាលពីព្រឹក ថ្ងៃអង្គារ ថា ប្រព័ន្ធការពារដែនអាកាសរបស់ក្រុងកៀវ បានបាញ់ទម្លាក់មីស៊ីលរបស់រុស្ស៊ី ចំនួន១៨គ្រឿង ហើយក្នុងនោះមានបញ្ចូលទាំងមីស៊ីល មានល្បឿនលឿនជាងសំឡេង ប្រភេទឃិនហ្សាល់ (Kinzhal) ចំនួន៦គ្រឿង កាលពីរំលងអធ្រាត្រ ឈានចូលថ្ងៃអង្គារ ផងដែរ។ ប៉ុន្ដែលោក ស៊ើរហ្គេ សយហ្គូ (Sergei Shoigu) រដ្ឋមន្រ្ដី ក្រសួងការពារជាតិរុស្ស៊ី បានបដិសេធនូវការអះអាងរបស់ក្រុងកៀវ។

ថ្វីបើមានការអះអាងបែបនេះក្ដី ក៏មន្ទីរបញ្ចកោណ នៃក្រសួងការពារជាតិសហរដ្ឋអាមេរិក មិនទាន់បានធ្វើអត្ថាធិប្បាយ ឆ្លើយតបវិញភ្លាមៗនោះឡើយ ហើយគេមិនទាន់ដឹងច្បាស់អាវុធរបស់លោកខាងលិចប្រភេទណា ត្រូវបានអ៊ុយក្រែន ប្រើប្រាស់នោះដែរ៕

ប្រទេសហូឡង់៖ រថយន្តអ៊ីដ្រូសែន Eco-Runner XIII ដែលបង្កើតដោយក្រុមនិស្សិតនៅសាកលវិទ្យាល័យ Delft University of Technology មានគោលបំណងចង់បង្កើតកំណត់ត្រាពិភពលោកសម្រាប់ការរត់ចម្ងាយឆ្ងាយបំផុតរបស់រថយន្តអ៊ីដ្រូសែនដោយមិនចាំបាច់ចាក់សាំងនៅក្នុងខែមិថុនា ឆ្នាំ ២០២៣។

ក្រុម Eco-Runner Team Delft បាននិយាយថា ពួកគេកំពុងព្យាយាមធ្វើឱ្យមានតុល្យភាពរវាងការអនុវត្ត ថាមពល និងភាពរឹងរបស់រថយន្តតាមពេលវេលាក្នុងចម្ងាយជាង ២,០៥៥ គីឡូម៉ែត្រដើម្បីបង្កើតកំណត់ត្រាពិភពលោក។ ដូចនេះហើយដើម្បីបង្កើតរថយន្តដែលមានកម្លាំងខ្លាំងដោយមិនចាំបាច់ចាក់សាំង ក្រុមអ្នករចនាបានប្រើប្រាស់កាបូនហ្វាយប័រនៅក្នុងផ្នែកជាច្រើននៃរថយន្ត ដែលជាធម្មតាត្រូវបានផលិតពីដែក ដូចជាកំណាត់ propeller នៅក្នុងប្រព័ន្ធចង្កូត ឬធ្នឹមព្យួរ។ ជាមួយនឹងសម្ភារៈនេះរថយន្តអ៊ីដ្រូសែន Eco-Runner XIII អាចលោតទៅមុខបានយ៉ាងងាយស្រួលជាមួយនឹងទម្ងន់តិច និងអូស។

យោងតាមក្រុម Eco-Runner Team Delft បានឱ្យដឹងថា ដំណើរការនៃការបំប្លែងអ៊ីដ្រូសែនទៅជាឥន្ធនៈរថយន្តបង្ហាញពីសក្តានុពលក្នុងការក្លាយជាជម្រើសដ៏មានប្រសិទ្ធភាពចំពោះធាតុនៅក្នុងឧស្សាហកម្មដឹកជញ្ជូន។ នៅក្នុងរថយន្តអ៊ីដ្រូសែន Eco-Runner XIII អ៊ីដ្រូសែនត្រូវបានបំប្លែងទៅជាថាមពលអគ្គិសនី ដោយបង្កើតបានតែចំហាយទឹក និងកំដៅប៉ុណ្ណោះ។ និស្សិតកំពុងស្វែងរកការកែលម្អ Eco-Runner XIII នៅក្នុង Dream Hall ដែលជាកន្លែងពិសេសមួយនៅលើទីធ្លានៃសាកលវិទ្យាល័យ Delft University of Technology ។ ការរចនារថយន្តដែលទើបនឹងប្រកាសកាលពីថ្ងៃទី ២ ខែឧសភា ហើយគូរដោយស្ទូឌីយោ Enshape Design នឹងក្លាយជារូបរាងចុងក្រោយនៃរថយន្តដែលចូលរួមក្នុងកំណត់ត្រាដែលបានកំណត់ក្នុងខែមិថុនា៕

ប្រភព៖ vnexpress

នៅយប់ថ្ងៃទី១៦ ខែឧសភា ឆ្នាំ២០២៣ ការប្រកួតវគ្គផ្តាច់ព្រ័ត្របោះទាត់ជម្រើសជាតិអាយុក្រោម២២ឆ្នាំ នាព្រឹត្តិការណ៍ស៊ីហ្គេមបានរកឃើញម្ចាស់មេដាយមាសហើយគឺបានទៅលើក្រុមជម្រើសជាតិឥណ្ឌូនេស៊ី ដោយលទ្ធផល៥ទល់២លត់ជើងខ្លាំងក្រុមជម្រើសជាតិថៃយ៉ាងដំណំ ខណៈការប្រកួតនេះក្រុមទាំងពីរបានប្រទូសរ៉ាយគ្នាផ្អើលពេញទីលានពហុដ្ឋានជាតិអូឡាំពិក ជារូបភាពមួយដែលម្ចាស់ផ្ទះកម្ពុជា និងអ្នកស្នេហាកីឡាមិនចង់ឃើញបែបនេះ។

ក្នុងវគ្គផ្តាច់ព្រ័ត្រដណ្តើមមេដាយមាស ក្រុមជម្រើសជាតិឥណ្ឌូនេស៊ី ត្រូវ ប៉ះជាមួយក្រុមជម្រើសជាតិថៃ ក្នុងព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ខណៈក្រុមទាំងពីរនេះសុទ្ធតែជាជើងខ្លាំងអាចដណ្តើមមេដាយមាសក្នុងប្រវត្តិសាស្រ្តព្រឹត្តិការណ៍ស៊ីហ្គេម។ ជាលទ្ធផលនៃការប្រកួតក្នុងតង់ទី១ ឥណ្ឌូនេស៊ី បាននាំមុខ ថៃ ក្នុងលទ្ធផល២ទល់០ ខណៈក្នុងតង់ទី២ ក្រុមជម្រើសជាតិថៃ បានបំប៉ោងសំណាញ់នៅនាទី៦៥ បានចំនួន១គ្រាប់ និងនាទី៩០ បានចំនួន១គ្រាប់ទៀតដែលនាំឱ្យក្រុមទាំងពីរមានលទ្ធផលស្មើគ្នា រហូតត្រូវបន្ថែម ១៥ នាទីចំនួន២ដង។

អ្វីដែលកាន់តែភ្ញាក់ផ្អើល នៅនាទី៩២ ក្រុមជម្រើសជាតិអាយុក្រោម២២ឆ្នាំឥណ្ឌូនេស៊ី បានទាត់ចូលក្រុមថៃមួយ១គ្រាប់ទៀតដោយកីឡាករ Irfan នាំឱ្យលទ្ធផលមានការប្រែប្រួលយ៉ាងលឿន ៣ទល់២ ។ យ៉ាងណាការបាន១គ្រាប់នេះ បានធ្វើឱ្យក្រុមទាំងពីរមានការប្រទូសរ៉ាយពេញទីលាន រួមទាំងគ្រូបង្វឹករបស់ក្រុមទាំងពីរផងរហូតអជ្ញាធរសម្ថកិច្ចកម្ពុជាជួយសម្រួបសម្រួលស្ថានភាព ខណៈអជ្ញាកណ្តាលការប្រកួតបាល់ទាត់នេះផ្តល់កាតលឿង និងក្រហម ដល់គ្រូបង្វឹកថៃ និងកីឡាករជម្រើសជាតិទាំងពីរផងដែរ។ បន្ទាប់ពីស្រុះស្រួលគ្នាវិញ ឥណ្ឌូនេស៊ី បានបំប៉ោងសំណាញ់ថៃចំនួន២គ្រាប់ទៀតនៅនាទី១០៦និងនាទី១២០ ដោយបញ្ចប់ការប្រកួតក្រុមជម្រើសជាតិឥណ្ឌូនេស៊ីយកឈ្នះថៃក្នុងលទ្ធផល៥ទល់២ ដណ្តើមមេដាយមាសព្រឹត្តិការណ៍ស៊ីហ្គេមលើកទី៣២ ក្រោយពីខកខានគ្រងជើងឯកអស់រយៈពេល៣២ឆ្នាំមកហើយតាំងពីឆ្នាំ១៩៩១។

ការប្រកួតបាល់ទាត់នេះ បញ្ចប់ដោយភាពចម្រូងចម្រាស់ ក្នុងរូបភាពបែបនេះក្នុងនាមជាម្ចាស់ផ្ទះមិនចង់ឃើញឡើយ រួមទាំងអ្នកស្នេហាកីឡាផង ព្រោះការប្រកួតមានចាញ់មានឈ្នះជារឿងធម្មតា ត្រូវទទួលស្គាល់ការពិត និងព្រមទទួលយកលទ្ធផល ព្រោះការបញ្ចេញឥរិយាបថហិង្សាបង្ករឿងចម្រូងចម្រាស់ គ្មានអ្វីក្រៅពីអាប់ឱនកិត្តិយសខ្លួនឯងនិងប្រទេសជាតិខ្លួនឯងទេ ដែលសាងកេរ្តិ៍ឈ្មោះមិនល្អនៅលើទីលានប្រកួត។

គួរបញ្ជាក់ផងដែរថា ការប្រកួតបាល់ទាត់ជម្រើសជាតិអាយុក្រោម២២ឆ្នាំក្នុងព្រឹត្តិការណ៍ស៊ីហ្គេម ក្រុមជម្រើសជាតិ ឥណ្ឌូនេស៊ី ទទួលបានមេដាយមាស ក្រុមជម្រើសជាតិថៃទទួលបានមេដាយប្រាក់ និងក្រុមជម្រើសជាតិវៀតណាមទទួលបានមេដាយសំរឹទ្ធ៕

លោក Keisuke Honda បានបង្ហោះសារនៅលើបណ្តាញសង្គមរបស់ខ្លួនថា ខ្លួនមានចំណាប់អារម្មណ៍ក្នុងការដឹកនាំក្រុមជម្រើសជាតិ ជាពិសេសក្រុមណាដែលចង់ទៅលេងក្នុងជុំចុងក្រោយនៃព្រឹត្តិការណ៍ World Cup ឆ្នាំ 2026។

លោកហុងថា បានបង្ហោះសារថា៖” ក្នុងនាមជាគ្រូបង្វឹក ខ្ញុំចាប់អារម្មណ៍លើការគ្រប់គ្រងប្រទេសអូម៉ង់ នូវែលហ្សេឡង់ អារ៉ាប់រួម ថៃ និងប្រទេសមួយចំនួនដែលចង់លេងក្នុងការប្រកួតបាល់ទាត់ពិភពលោកឆ្នាំ 2026″។

អតីត​ខ្សែបម្រើ​ជម្រើសជាតិ​ជប៉ុន​ទើបតែ​លា​ឈប់​ពី​តំណែង​គ្រូបង្វឹក​ជម្រើសជាតិ​កម្ពុជា​ជា​ផ្លូវការ ក្រោយពីមិនអាចជួយឱ្យកម្ពុជាឡើងទៅកាន់វគ្គផ្តាច់ពាក់កណ្តាលផ្តាច់ព្រ័ត្របាន នៅក្នុងព្រឹត្តិការណ៍សុីហ្គេម ដែលកម្ពុជាធ្វើជាម្ចាស់ផ្ទះ។

ទន្ទឹមគ្នានេះដែរ ម៉ាដាម ប៉ាង ដែលគេគ្រប់គ្នាស្គាល់ថាជាអ្នកដែលនៅពីក្រោយភាពជោគជ័យនៃបាល់ទាត់ថៃនាពេលបច្ចុប្បន្ន ក៏បានបង្ហាញចំណាប់អារម្មណ៍ចង់នាំយកលោកហុងដា មកដឹកនាំក្រុមដំរីសឹកថៃផងដែរ។

ខណៈ​បច្ចុប្បន្ន​ក្រុម​ជម្រើស​ជាតិ​ថៃ​មាន​លោក Mano Polking ជា​គ្រូ​បង្វឹក ដែលទើបតែបន្តកុងត្រាថ្មីក្នុងរយៈពេលខ្លី ត្រឹម៣ខែប៉ុណ្ណោះ។

សូមជម្រាបផងដែរថា ម៉ាដាម ប៉ាង ធ្លាប់បានសរសើរពីការដឹកនាំរបស់លោកហុងដា ដោយគាត់ពេញចិត្តនៅបច្ចេកទេស និងយុត្តិសាស្ត្រសម្រាប់ ដឹកនាំជម្រើស ជាតិ ថៃ ដែលហៅថា Japan Way៕

ប្រភព៖ Thairath

ប្រទេសថៃ ៖ ប្រទេសថៃបានសម្រេចជ្រើសរើសយកទីក្រុងបាងកក, ខេត្តឈុនបុរី និងខេត្តសុងខ្លា ជាម្ចាស់ផ្ទះការប្រកួតកីឡាស៊ីហ្គេមលើកទី៣៣ ចាប់ពីថ្ងៃទី៩-២០ ខែធ្នូ ឆ្នាំ២០២៥ ហើយខេត្តនគរាជសីមា នឹងក្លាយជាម្ចាស់ផ្ទះកីឡាអាស៊ានប៉ារ៉ាហ្គេម (Asean Para Games) លើកទី១៣ ចាប់ពីថ្ងៃទី២០-២៦ ខែមករា ឆ្នាំ២០២៦ ។

អ្នកនាំពាក្យប្រចាំការិយាល័យនាយករដ្ឋមន្ត្រី អ្នកនាង Traisulee Traisoranakul បានថ្លែងថា ក្នុងកិច្ចប្រជុំគណៈរដ្ឋមន្ត្រីកាលពីថ្ងៃទី១៦ ខែឧសភា កន្លងមក យើងបានរៀបចំខេត្តរបស់ប្រទេសថៃសម្រាប់ធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣៣ និងកីឡាអាស៊ានប៉ារ៉ាហ្គេម លើកទី១៣ តាមការស្នើសុំរបស់ក្រសួងទេសចរណ៍ និងកីឡា ។
សម្រាប់ការធ្វើជាម្ចាស់ផ្ទះរៀបចំប្រកួតកីឡាទាំង២ប្រភេទនេះ គឺស្របតាមសេចក្តីសម្រេចរបស់គណៈរដ្ឋមន្ត្រី កាលពីថ្ងៃទី២៧ ខែកញ្ញា ឆ្នាំ២០២២ ដែលបានឯកភាពឱ្យប្រទេសថៃធ្វើជាម្ចាស់ផ្ទះការប្រកួតកីឡាទាំង២ប្រភេទ ។ អនុគណៈកម្មការបានពិចារណាលើខេត្តដែលនឹងធ្វើជាម្ចាស់ផ្ទះការប្រកួតកីឡា ក្រោមគំនិតការលើកកម្ពស់កិច្ចសហប្រតិបត្តិការរវាងរដ្ឋ ក្រុមហ៊ុនឯកជន និងសហគមន៍ ។ កិច្ចសហការនេះក្នុងគោលបំណងត្រៀមខ្លួនគ្រប់គ្រងការងារទូទៅ, ផែនការអភិវឌ្ឍតំបន់ជាបន្តបន្ទាប់ និងបង្កើនសមត្ថភាពគាំទ្រវិស័យទេសចរណ៍ ដែលកត្តាសំខាន់ផ្តោតលើទីលានប្រកួតកីឡា និងកន្លែងហ្វឹកហាត់ ។

លើសពីនេះ ប្រទេសថៃនឹងគិតគូរពីកន្លែងស្នាក់នៅរបស់កីឡាករ, ម្ហូបអាហារ, កន្លែងព្យាបាល, គមនាគមន៍, បុគ្គលិករៀបចំការប្រកួត, ក្រុមយុវជនស្ម័គ្រចិត្ត, សេវាសាធារណៈ, បច្ចេកវិទ្យាព័ត៌មាន, ថវិកា និងការមានចំណែករួមរបស់ពលរដ្ឋផងដែរ ៕ ប្រភព ៖ Bangkok biznews

កាលពីយប់មិញ ការប្រកួតបាល់ទាត់នៅក្នុងព្រឹត្តិការណ៍សុីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ បានបញ្ចប់ទៅហើយ ដោយឥណ្ឌូនេសុីបានគ្រងមេដាយមាស ក្រោយបំបាក់ថៃក្នុងលទ្ធផល៥-២។

នៅក្នុងការប្រកួតដ៏ចម្រូងចម្រាស់នេះ មានការប៉ះទង្គិចគ្នាជាខ្លាំង រវាងកីឡាករនិងគ្រូបង្វឹករបស់ក្រុមទាំងពីរ ដែលបានបង្កជាអំពើហិង្សានៅក្នុងទីលាន។ ក្នុងនោះកីឡាករថៃ២នាក់បានទទួលកាតក្រហម ខណៈឥណ្ឌូនេសុីទទួលបានកាតតែក្រហមតែប៉ុណ្ណោះ ដែលជាហេតុធ្វើឱ្យឥណ្ឌូនេសុី អាចយកឈ្នះថៃបានយ៉ាងងាយស្រួល និងក្តោបបានមេដាយមាស។

ក្រោយពីបញ្ចប់ការប្រកួត នៅក្នុងពិធីបំពាក់មេដាយ កីឡាករថៃម្នាក់បានគប់មេដាយប្រាក់ចោល ទៅកាន់អ្នកគាំទ្រ ដោយទឹកមុខខឹងសម្បារជាខ្លាំង។ លើសពីនេះទៅទៀតកីឡាករថៃរូបនេះ ក៏បានគប់ចោលតុក្កតា(Mascot)  ដែលជារូបតំណាងឱ្យព្រឹត្តិការណ៍សុីហ្គេមនៅកម្ពុជា ដែលវាហាក់បង្ហាញអំពើមិនគោរពដល់ម្ចាស់ផ្ទះ។

ទន្ទឹមគ្នានេះដែរ អ្នកគាំទ្រកម្ពុជាបានបញ្ចេញមតិជាច្រើនទៅលើទង្វើកីឡាកររូបនេះ ដោយអ្នកខ្លះបានលើកឡើងថា៖”ទង្វើរបស់អ្នកបញ្ចាក់ពីចរិករបស់អ្នក រួមទាំងប្រទេសរបស់អ្នកផងដែរ #thailand #U22Thailand

អ្នកខ្លះទៀតលើកឡើងថា “ប្រទេសអសីលធម៌ ទើបសម្បូរមនុស្ស អសីលធម៌ ប្រទេសនេះរីកចម្រើនបានដោយ​ ការឈ្នានីស​ ចង់បានតែលទ្ធភាពទៅមិនដល់ #thailand

តែយ៉ាងណាមិញ ទាក់ទងនឹងរឿងនេះ គេមិនទាន់ដឹងនៅឡើយនោះទេថា តើកីឡាថៃនោះ មានគោលបំណងអ្វីបានជាគប់ទាំងមេដាយប្រា់ក់ និងរូបតុក្កតា(Mascot) ចោលយ៉ាងនេះ៕

ប្រទេសចិន ៖ ប្រទេសចិនបានសួរទៅកាន់អាមេរិកថា តើប្រទេសណាឱ្យប្រាកដដែលបានគំរាមកំហែងសេដ្ឋកិច្ចប្រទេសផ្សេងៗ ? ខណៈកាលពីពេលថ្មីៗនេះ លោកស្រី Janet Yellen រដ្ឋមន្ត្រីក្រសួងហិរញ្ញវត្ថុអាមេរិកបានចូលរួមកិច្ចប្រជុំថ្នាក់រដ្ឋមន្ត្រីក្រសួងហិរញ្ញវត្ថុ ព្រមទាំងនាយកធនាគារកណ្តាលមកពីក្រុមប្រទេស G7 ។ លោកស្រី Janet Yellen បានអំពាវនាវឱ្យប្រទេសផ្សេងៗសហការគ្នា ដើម្បីទប់ទល់នឹងការគំរាមកំហែងសេដ្ឋកិច្ចរបស់ប្រទេសចិន ។

នៅពេលនិយាយអំពីការគំរាមកំហែងក្នុងទំនាក់ទំនងអន្តរជាតិ គឺអាមេរិកជាអ្នកចាប់ផ្តើមប្រើពាក្យនេះមុន ហើយអាមេរិកក៏បានប្រើពាក្យនេះរហូតមក ។ ខ្លឹមសារសំខាន់របស់ពាក្យគំរាមកំហែង គឺអាមេរិកប្រើប្រាស់សំដៅដល់ការគំរាមផ្នែកអាវុធ, ការបង្កើតភាពឯកោផ្នែកនយោបាយ, ការដាក់ទារុណកម្មសេដ្ឋកិច្ច និងការទប់ស្កាត់បច្ចេកវិទ្យា ដែលបង្ខំឱ្យប្រទេសផ្សេងៗផ្លាស់ប្តូរតាមតម្រូវការរបស់អាមេរិក ដើម្បីឱ្យអាមេរិកក្លាយជាប្រទេសមហាអំណាចលើពិភពលោកយ៉ាងពេញលេញ ។

កាលពីពេលថ្មីៗនេះ សារព័ត៌មានអាមេរិកបានចុះផ្សាយព័ត៌មានជាញឹកញាប់ថា នៅមុន និងក្រោយពេលកិច្ចប្រជុំកំពូលប្រទេស G7 អាមេរិកនឹងប្រកាសពីការរឹតបន្តឹងការវិនិយោគក្នុងប្រទេសចិន ដែលមិនធ្លាប់មានក្នុងប្រវត្តិសាស្ត្រ ហើយពាក់ព័ន្ធនឹងបច្ចេកវិទ្យាទំនើបផ្សេងៗដូចជា Semiconductor បញ្ញាសិប្បនិម្មិត និងកុំព្យូទ័រជាដើម ។ បើពិតមែននោះ វានឹងក្លាយជាហេតុការណ៍ថ្មីមួយដែលអាមេរិកបានគំរាមចិនផ្នែកសេដ្ឋកិច្ច និងរារាំងការអភិវឌ្ឍរបស់ចិន ។

ការទប់ស្កាត់បច្ចេកវិទ្យា គឺជាវិធីគំរាមផ្នែកសេដ្ឋកិច្ចដែលអាមេរិកប្រើប្រាស់ជាញឹកញាប់ ហើយក្រៅពីនេះ ការដាក់ទណ្ឌកម្មសេដ្ឋកិច្ច ក៏ជាការគំរាមផ្នែកសេដ្ឋកិច្ចផងដែរ ដែលអាមេរិកប្រើញឹកញាប់ដូចគ្នា ។ លើសពីនេះ ទោះជាប្រទេសជាសម្ព័ន្ធមិត្តជាមួយអាមេរិក ក៏មិនរួចខ្លួនដែរ ។ ជាក់ស្តែង តាំងពី១៩៨០ រហូតមក អាមេរិកបានដាក់ទណ្ឌកម្មសេដ្ឋកិច្ចជាច្រើនលើកលើប្រទេសជប៉ុន ដើម្បីបង្ក្រាបឧស្សាហកម្មផលិតកម្ម ដោយសារជប៉ុនមានភាពជឿនលឿនជាងអាមេរិក ដូចជា Semiconductor ។ ដូចគ្នានេះ អាមេរិកបានបង្ខំឱ្យជប៉ុនរៀបចំរចនាសម្ព័ន្ធសេដ្ឋកិច្ចខ្នាតធំឡើងវិញទៀតផង គឺចំណុចទាំងអស់នេះហើយគេហៅថា ជាការគំរាមសេដ្ឋកិច្ច ។

កិច្ចប្រជុំកំពូលក្រុមប្រទេស G7 នឹងចាប់ផ្តើមនាពេលឆាប់ៗនេះ ហើយក្នុងចំណោមនេះមានប្រទេសសមាជិកជាច្រើន ដែលធ្លាប់ត្រូវបានអាមេរិកគំរាម ។ បើអាមេរិកចង់ដាក់របៀបវារៈ «ដោះស្រាយការគំរាមកំហែងផ្នែកសេដ្ឋកិច្ច» ចូលក្នុងកិច្ចប្រជុំនេះ ពួកគេគួរពិនិត្យមើលបទពិសោធន៍កន្លងមក និងបញ្ជាក់ពីការថ្កោលទោសសកម្មភាពរបស់អាមេរិក ដែលចង់ប្រែពណ៌ពីសទៅខ្មៅ ៕ ប្រភព ៖ China Face

ប្រទេសថៃ ៖ ក្រោយការបោះឆ្នោតជ្រើសរើសសភាតំណាងរាស្ត្រនៅប្រទេសថៃ អាជីវករលក់ម្ហូបអាហារនៅខេត្តឧប៊ុនថានីរំពឹងថា គណបក្សនយោបាយដែលនឹងបង្កើតរដ្ឋាភិបាលថ្មី នឹងផ្តោតជាសំខាន់លើការអភិវឌ្ឍសេដ្ឋកិច្ចជាតិ និងគិតគូរពីការប្រកបមុខរបររបស់ពលរដ្ឋផងដែរ ។ លើសពីនេះ រដ្ឋាភិបាលថ្មីនឹងធ្វើឱ្យប្រទេសថៃមានសុខសន្តិភាព ហើយបើគណបក្សនយោបាយធ្វើតាមអ្វីដូចដែលធ្លាប់បានសន្យាក្នុងយុទ្ធនាការឃោសនាបោះឆ្នោត ពលរដ្ឋនឹងជ្រើសរើសគណបក្សនេះឱ្យដឹកនាំប្រទេសបន្តទៀត ។

លោក Suwit Sitthitrai ជាម្ចាស់ហាងលក់ម្ហូបអាហារមួយកន្លែងនៅខេត្តឧប៊ុនថានី បាននិយាយកាលពីថ្ងៃទី១៥ ខែឧសភា ថា ពេលនេះ ការលក់ដូរផ្សេងៗនៅប្រទេសថៃបានងើបឡើងវិញហើយក្រោយពីការឆ្លងរាតត្បាតនៃជំងឺកូវីដ-១៩ ថយចុះ ហើយអាជីវករទាំងឡាយបានលក់ដូរដាច់ជាងពេលមុន ។ លោកបន្តថា លោកចង់ឱ្យរដ្ឋាភិបាលថ្មីផ្តោតខ្លាំងលើការរកស៊ីរបស់ពលរដ្ឋជាសំខាន់ និងធ្វើឱ្យប្រទេសជាតិស្ងប់សុខ ។

លោក Suwit Sitthitrai បន្តទៀតថា បើពលរដ្ឋមើលឃើញថា រដ្ឋាភិបាលថ្មីបានធ្វើតាមការសន្យារបស់ខ្លួនក្នុងអំឡុងមុនពេលបោះឆ្នោតនោះ ការបោះឆ្នោតនៅអាណត្តិក្រោយ ពលរដ្ឋនឹងជ្រើសរើសគណបក្សនេះឱ្យដឹកនាំប្រទេសរយៈពេល៤ឆ្នាំទៀត ។ ចំណែកបញ្ហានយោបាយផ្សេងៗ រដ្ឋាភិបាលថ្មីគួរគិតគូរនៅពេលក្រោយ ពីព្រោះពេលនេះ ពលរដ្ឋភាគច្រើនរំពឹងទៅលើរដ្ឋាភិបាលថ្មី ។

អាជីវករលក់ម្ហូបអាហាររូបនេះបន្ថែមថា ពលរដ្ឋត្រូវតែផ្តល់ឱកាសឱ្យគណបក្សនយោបាយឈ្នះឆ្នោតធ្វើការរបស់ពួកគេមួយរយៈសិន ចំណែកពលរដ្ឋនឹងរង់ចាំតាមដានមើលថា តើគណបក្សនេះនឹងរក្សាតាមពាក្យសន្យាឬអត់ ? ខណៈពួកគេបានសន្យាថា នឹងពន្លឿនការងើបឡើងវិញនៃសេដ្ឋកិច្ចថៃ ឱ្យដូចក្នុងអំឡុងពេលមិនទាន់មានជំងឺកូវីដ ៕ ប្រភព ៖ mgronline