ចុងសប្តាហ៍ ក្រោយសម្រាកពីការងារ ចង់ទៅស្រូបយកខ្យល់អាកាស ឬទៅកម្សាន្តនាៗ ក៏ប៉ុន្តែមិនចង់ទៅឆ្ងាយនៅត្រឹមជាយៗភ្នំពេញ ៣រមណីយដ្ឋាននេះ ពិតជាស័ក្កសមខ្លាំងណាស់៖

១.រមណីយដ្ឋានវត្ដកៀនស្វាយក្រៅ ជា​រម​ណីយ​ដ្ឋាន​បែប​ធម្ម​ជាតិ​មាន​លក្ខណៈ​ប្រ​ជា​ប្រិយ៍​តាំង​ពី​សម័យ​មុនៗ​ ។ នៅ​ចំ​ពី​មុខ​វត្ដ​មាន​រាន​លក់​អា​ហារ​ដូច​ជា​បង្កង​ដុត ខ្យង​ស្ងោរ ត្រី​អាំង​និង​មាន​ផ្លែ​ឈើ​ស្រស់ៗ​ដែល​អ្នក​ស្រុក​ទើប​បេះ ពី​ដើម​ថ្មីៗ ។​ល​។ រៀង​រាល់​ចុង​សប្ដាហ៍​តែង​តែ​មាន​ភ្ញៀវ​ជាតិ និង​អន្ដរ​ជាតិ​ទៅ​កំ​សាន្ដ​សប្បាយ​នៅ​ទី​នោះ ។

២.ភ្នំឧត្តុង្គ ឬក៏គេច្រើនហៅថា ភ្នំព្រះរាជទ្រព្យ, ភ្នំអដ្ឋរស្ស មានទីតាំងស្ថិតនៅ ឃុំផ្សារដែក និងឃុំភ្នំបាត ស្រុកពញាឮ ខេត្តកណ្តាល និងមានចម្ងាយប្រហែល ៥១គីឡូម៉ែត្រ ពីរង្វង់មូលតាខ្មៅ។ ភ្នំឧត្តុង្គជារមណីយដ្ឋាន​បែបប្រវត្តិសាស្ត្រមួយ ​ព្រោះ ទីនោះ ធ្លាប់ជារាជវាំងចាស់អំឡុងឆ្នាំ ១៦១៨ និង១៨៦៦។ លើសពីនេះទៅទៀត នៅលើកំពូល​ភ្នំ​ក៏មានសំណង់ ប្រវត្តិសាស្ត្រ​មួយចំនួន​ ហើយនៅលើព្រះវិហារនោះក៏​មានពុទ្ធបដិ​មាករ ធំហំដល់ទៅ ១៨ ហត្ត។

នៅភ្នំរាបឬប្រាសាទវិហារសួគ៌ មានប្រាសាទ យ៉ាងស្អាត អាកាសធាតុបក់មកយ៉ាងត្រជាក់ ជាកន្លែងលម្ហែអារម្មណ៍មួយដែលបានបម្រើដល់ការកម្សាន្ត របស់អ្នកទេសចរជាតិ និងអន្តរជាតិ ជិតឆ្ងាយមកទស្សនាកម្សាន្ដជាច្រើនឆ្នាំមកហើយ ហើយវាបានផ្តល់ ផលពីវិស័យទេសចរណ៍មួយនេះ ដល់ប្រជាពលរដ្ឋនៅក្នុងមូលដ្ឋាននេះជាច្រើនផងដែរ៕

រដ្ឋធានីមីនស្ក៍ (Minsk)៖ បណ្ដាប្រទេសមហាអំណាចលោកខាងលិច បានប្រឆាំងនឹងសង្គ្រាមរបស់មេដឹកនាំវិមានក្រឹមឡាំង នៅលើទឹកដីរបស់អ៊ុយក្រែន ហើយបង្កើនការដាក់ទណ្ឌកម្មប្រឆាំងនឹងក្រុងមូស្គូ និង ក្រុងមីនស្ក៍ ជាសម្ពន្ធភាពដ៏រឹងមាំរបស់រុស្ស៊ី ប៉ុន្ដែសកម្មភាពបែបនេះ បានជំរុញឲ្យបេឡារុស ក៏ប្រកាស អំពីការគ្មានជម្រើសអ្វីក្រៅតែអំពីការដាក់ពង្រាយអាវុធមហាប្រល័យលោក។

សារព័ត៌មានអារ៉ាប់អន្ដរជាតិ Alarabiya News បានចេញផ្សាយ កាលពីព្រឹក ថ្ងៃចន្ទ ទី២៩ ខែឧសភា ថា មន្រ្ដីជាន់ខ្ពស់មួយរូបរបស់បេឡារុស បានអះអាង កាលពីថ្ងៃអាទិត្យ ថា បណ្ដាប្រទេសលោកខាងលិច បានរុញច្រានបេឡារុស រហូតដល់គ្មានជម្រើសអ្វីក្រៅតែអំពីការដាក់ពង្រាយអាវុធនុយក្លេអ៊ែរតាក់ទិករបស់រុស្ស៊ី។ ដូច្នេះ រដ្ឋាភិបាលក្រុងមីនស្ក៍ (Minsk) ត្រូវតែយកចិត្តទុកដាក់ឱ្យកាន់តែប្រសើរជាងមុនបន្ថែមទៀត នៅក្នុង«ការឆ្លងកាត់បន្ទាត់ក្រហម» លើបញ្ហាយុទ្ធសាស្ត្រសំខាន់ៗ។

លោក អាឡិចសាន់ដឺរ វ៉ូលហ្វូវិច (Alexander Volfovich) រដ្ឋលេខាធិការ នៃក្រុមប្រឹក្សាសន្ដិសុខបេឡារុស បានអះអាង ថា ការដកអាវុធនុយក្លេអ៊ែរ ចេញពីប្រទេសបេឡារុស ក្រោយការដួលរលំ នៃសហភាពសូវៀត នៅក្នុងឆ្នាំ១៩៩១ ក៏ដោយសារតែសហរដ្ឋអាមេរិក បានធានាដល់សន្តិសុខរបស់ប្រទេសបេឡារុស ហើយមិនដាក់ទណ្ឌកម្ម ប្រឆាំងនឹងក្រុងមីនស្ក៍។ ប៉ុន្ដែការសន្យានោះបានរលាយបាត់ ហើយថ្ងៃនេះ ត្រូវតែរុះរើចោលនូវកិច្ចព្រមព្រៀងនោះ។

ទីភ្នាក់ងារសារព័ត៌មាន Belta News (បែលតា) គ្រប់គ្រងដោយរដ្ឋបែលឡារុស បានដកស្រង់សម្ដីរបស់លោក វ៉ូលហ្វូវិច ប្រាប់ដល់អ្នកធ្វើកិច្ចសម្ភាសន៍ នៅតាមកញ្ចក់ទូរទស្សន៍ ថា «ការសន្យាទាំងអស់ បានផុតរលត់ជារៀងរហូតហើយ។ រីឯការដាក់ពង្រាយអាវុធនុយក្លេអ៊ែរតាក់ទិក នៅលើទឹកដីរបស់បេឡារុស ក៏ជាការបោះជំហានមួយ សម្រាប់ការរារាំង ជាយុទ្ធសាស្ត្រផងដែរ។ ប្រសិនបើសិននៅតែមានហេតុផលណាមួយ នៅក្នុងខួរក្បាលរបស់អ្នកនយោបាយលោកខាងលិច ប្រាកដណាស់ ពួកគេ នឹងមិនអាចឆ្លងកាត់ខ្សែក្រហមនេះបានឡើយ។ ចំណែកការប្រើប្រាស់អាវុធមហាប្រល័យលោក មានផលវិបាកអាក្រក់ខ្លាំងណាស់ សូម្បីតែអាវុធនុយក្លេអ៊ែរតាក់ទិក»។

លោក អាឡិចសាន់ដឺរ លូកាសែនកូ (Alexander Lukashenko) បានដឹកនាំប្រទេសបេឡារុស ចាប់តាំងពីឆ្នាំ១៩៩៤ រហូតមក។ បច្ចុប្បន្ន បេឡារុស ក្លាយជាសម្ពន្ធមិត្តដ៏រឹងមាំបំផុត នៅក្នុងចំណោមអតីតរដ្ឋទាំង១៥របស់សហភាពសូវៀត។

ជាមួយគា្ននេះដែរ លោកប្រធានាធិបតី លូកាសែនកូ បានអនុញ្ញាតឲ្យទាហានរបស់រុស្ស៊ី ប្រើប្រាស់ទឹកដីរបស់បេឡារុស សម្រាប់ការបើកឆាកសង្គ្រាមវាយលុកពេញទំហឹងរបស់មេដឹកនាំវិមានក្រឹមឡាំង នៅថ្ងៃទី២៤ ខែកុម្ភៈ ឆ្នាំ២០២២។ រុស្ស៊ី បានលុកលុយទៅលើប្រទេសជិតខាង នាថ្ងៃដំបូង ព្រមគ្នា ដោយបានចាប់ផ្ដើម ចេញពីភាគខាងជើងរបស់ប្រទេសអ៊ុយក្រែន ដោយចេញពីប្រទេសបេឡារុស ហើយបានចេញពីប្រទេសរុស្ស៊ី នៅភាគខាងកើត និង ភាគខាងខាងត្បូងរបស់ប្រទេសអ៊ុយក្រែន។

ប្រធានាធិបតីរុស្ស៊ី កាលពីសប្ដាហ៍មុន បានសម្រេចចិត្ត ដាក់ពង្រាយអាវុធនុយក្លេអ៊ែរតាក់ទិក នៅលើទឹកដីរបស់បេឡារុស នៅក្នុងគោលបំណងសម្រេចបាននូវផលចំណេញដ៏ជាក់លាក់មួយ នៅលើសមរភូមិ។

ក្រុងមូស្គូ បានបញ្ជាក់ ថា «ប្រតិបត្តិការយោធាពិសេស» របស់ខ្លួន នៅលើទឹកដីរបស់អ៊ុយក្រែន មានគោលដៅ ប្រឆាំងនឹងអ្វីដែលរុស្ស៊ី អះអាង ថា វាជាការជំរុញ ដោយ«សម្ពន្ធភាពរួមរបស់បស្ចិមលោក» សម្រាប់ធ្វើសង្គ្រាមប្រុកស៊ី និង ធ្វើឱ្យក្រុងម៉ូស្គូ ទទួលបរាជ័យ នៅក្នុងសកម្មភាពយោធារបស់ខ្លួន។

សហរដ្ឋអាមេរិក បានថ្កោលទោសដល់ការដាក់ពង្រាយអាវុធនុយក្លេអ៊ែរ នៅក្នុងប្រទេសបេឡារុស ប៉ុន្តែក្រុងវ៉ាស៊ីនតោន បានអះអាង ថា ជំហររបស់ខ្លួន លើការប្រើប្រាស់អាវុធបែបនេះ នឹងមិនបានកែប្រែនោះឡើយ។

បណ្ដាបស្ចិមលោក បានដាក់ទណ្ឌកម្ម ប្រឆាំងនឹងប្រទេសបេឡារុស អស់រយៈពេលជាយូរមកហើយ ជុំវិញអ្វីដែលបស្ចិមលោក បានហៅជាការគាបសង្កត់របស់លោក លូកាសែនកូ ប្រឆាំងនឹងសិទ្ធិមនុស្ស ជាពិសេស ការគាបសង្កត់ ប្រឆាំងនឹងការតវ៉ាទ្រង់ទ្រាយធំ នៅក្នុងការបោះឆ្នោតជាថ្មីរបស់គាត់ នៅឆ្នាំក្នុងឆ្នាំ២០២០។

ក្រោយពេលទទួលបានឯករាជភាព រួចផុតពីការគ្រប់គ្រងរបស់សហភាពសូវៀត បន្ទាប់ពីបានដួលរលំនោះមក ប្រទេសបេឡារុស អ៊ុយក្រែន និង កាហ្សាក់ស្ថាន ធ្លាប់ជារដ្ឋចំណុះ បានយល់ព្រមឱ្យប្រគល់អាវុធនុយក្លេអ៊ែររបស់ពួកគេ វិលត្រឡប់ទៅកាន់ប្រទេសរុស្ស៊ី វិញ ក្រោមកិច្ចខិតខំប្រឹងប្រែងរបស់អន្តរជាតិ ដើម្បីទប់ស្កាត់នូវការរីកសាយអាវុធមហាប្រល័យលោក៕

សហរដ្ឋអាមេរិក ៖ កីឡាករប្រដាល់ បួ ខាវ និងត្រូវបានពលរដ្ឋថៃចាត់ទុកថាជាស្តេចប្រដាល់នោះ បានធ្វើដំណើរទៅចូលរួមក្នុងកម្មវិធីមួយឈ្មោះ «Songkran Festival 2023» នៅរដ្ឋមីនីសូតា សហរដ្ឋអាមេរិក ដើម្បីធ្វើជាអ្នកតំណាងឱ្យប្រទេសថៃ ។ កម្មវិធីនេះរៀបចំឡើងដោយក្រុមប្រឹក្សាវប្បធម៌ថៃប្រចាំរដ្ឋមីនីសូតា សហរដ្ឋអាមេរិក សហការជាមួយអង្គការបណ្តាញដៃគូ ចាប់ពីថ្ងៃទី២៧ ដល់ថ្ងៃទី២៨ ខែឧសភា ។

កំពូលកីឡាករប្រដាល់ថៃវ័យ៤១ឆ្នាំរូបនេះបានបង្ហាញពីការសំពះគ្រូ Muay Thai នៅមុខអគាររដ្ឋសភា Dome St. Paul រដ្ឋមីនីសូតា នៅចំពោះមុខអ្នកទស្សនាជាច្រើននាក់ ។ ប្រទេសថៃប្រកាសថា ការធ្វើពិធីសំពះគ្រូ Muay Thai នៅអាមេរិកនេះ គឺដើម្បីបង្ហាញពីសិល្បៈការតស៊ូរបស់ខ្លួនទៅកាន់ពិភពលោកឱ្យបានស្គាល់ ។

ប្រទេសថៃបានរៀបចំការបង្ហាញពីសិល្បៈវប្បធម៌របស់ខ្លួន ដោយមានការចូលរួមពីគ្រូបង្រៀនស្ម័គ្រចិត្តមកពីរដ្ឋផ្សេងៗរបស់សហរដ្ឋអាមេរិក ។ លើសពីនេះ ក៏មានការតាំងបង្ហាញម្ហូបអាហារថៃ, ផលិតផល និងវត្ថុអនុស្សាវរីយ៍ផ្សេងៗ ។ ក្នុងកម្មវិធីនេះ ក្រៅពីកីឡាករប្រដាល់ បួ ខាវ ក៏មានអ្នកនាង Anna Sueangam-iam ជាបរវកញ្ញាចក្រវាឡថៃប្រចាំឆ្នាំ២០២២ និងអ្នកនាង Chonnikan Supittayaphon ជាបវរកញ្ញាថៃប្រចាំឆ្នាំ២០២៣ ព្រមទាំងអ្នករួមដំណើរជាច្រើនទៀត ។

គួរបញ្ជាក់ថា ប្រទេសថៃបានព្យាយាមបង្ហាញពី Muay Thai ទៅកាន់ពិភពលោកឱ្យបានស្គាល់ និងជួយគាំទ្រកីឡារបស់ខ្លួនផងដែរ ។ ជាក់ស្តែង កាលពីថ្ងៃទី៤-៦ ខែកុម្ភៈ កន្លងមក កីឡាករ បួ ខាវ និងកងទ័ពជើងគោកចំនួន៣.៦៦០នាក់បានរួមគ្នាធ្វើកម្មវិធី «Amazing Muay Thai Festival 2023» សំពះគ្រូ Muay Thai ដើម្បីបំបែកកំណត់ត្រាលើពិភពលោក (Guinness world records) នៅឧទ្យានជាតិរ៉ាចឆៈផាក់ ស្រុកហួរហ៊ិន ខេត្តប្រាជួបស៊ីរីខាន់ ។

ក្នុងពិធីកាលពីខែកុម្ភៈ កន្លងមក ប្រទេសថៃបានបង្ហាញពីកីឡា Muay Thai ចំនួន៤ប្រភេទ និងការសម្តែងក្បាច់ Muay Thai ក្នុង៤តំបន់ ដែលបន្តពីក្បាច់គុនបុរាណថៃ ហើយចែកចេញជាក្បាច់ផ្សេងៗនៅតាមតំបន់ ដូចជា Muay កូរ៉ាត ពីភាគឦសាន, Muay លុបបុរី ពីភាគកណ្តាល, Muay ឆៃយ៉ា ពីភាគខាងត្បូង និង Muay ថាសៅ ពីភាគខាងជើង ហើយនិយាយពាក្យថា ៖ «កណ្តាប់ដៃធ្ងន់ កូរ៉ាត, ឆ្លាត លុបបុរី, ក្បាច់ល្អ ឆៃយ៉ា និងដៃរហ័ស ថាសៅ» ។

ប្រទេសថៃចាត់ទុកថា Muay Thai គឺជាការរួមកម្លាំងកីឡាករដ៏ធំមួយរបស់ខ្លួន និងធ្វើឱ្យទូទាំងពិភពលោកទទួលស្គាល់ថា Muay Thai គឺជាមរតករបស់ប្រទេសថៃ និងមរតកពិភពលោក ៕

ប្រភព ៖ sanook

រដ្ឋធានីអង់ការ៉ា (Ankara)៖ ក្រោយការរាប់សន្លឹកឆ្នោត នៅក្នុងការបោះឆ្នោតជុំទី២ស្ទើរតែអស់ទាំងស្រុងនោះ គេបានមើលឃើញ ថា លទ្ធផល នៃការបោះឆ្នោត នឹងធ្វើឲ្យលោក តាយយីប អេដូហ្គេន (Tayyip Erdogan) ទទួលបានជ័យជម្ន បន្ដកាន់តំណែងជាប្រធានាធិបតី ឈានដល់ទសវត្សរ៍ទី៣។

សារព័ត៌មាន Al Jazeera បានចេញផ្សាយ កាលពីថ្ងៃចន្ទ ទី២៩ ខែឧសភា ថា បើតាមឧត្ដមក្រុមប្រឹក្សាជាតិរៀបចំការបោះឆ្នោត នៃប្រទេសតួកគី និង ទិន្នន័យក្រៅផ្លូវការ ត្រូវបានចេញផ្សាយ ដោយទីភ្នាក់ងារសារព័ត៌មាន អេណាដូលូ (Anadolu) គ្រប់គ្រងដោយរដ្ឋតួកគី បានរាយការណ៍ ថា លោក តាយយីប អេដូហ្គេន ប្រធានាធិបតីតួកគី បានឈ្នះ នៅក្នុងការបោះឆ្នោតជាថ្មី នៅក្នុងការប្រកួតជម្រុះដ៏តានតឹង នៅជុំវិញទី២ ក្រោយពេលគាត់មិនទទួលបានសំឡេងលើសពីជាង៥០ភាគរយ សម្រាប់ជ័យជម្នះ នៅក្នុងការបោះឆ្នោតជុំទី១ កាលពីថ្ងៃទី១៤ ខែឧសភា ឆ្នាំ២០២៣។ឧត្ដមក្រុប្រឹក្សារៀបចំការបោះឆ្នោត នៃប្រទេសតួកគី បានឲ្យដឹង ថា ការរាប់សន្លឹកឆ្នោត ស្ទើរតែរួចរាល់អស់ទាំងស្រុង ហើយលោក អេដូហ្គេន ទទួលបានសំឡេងគាំទ្រ ចំនួន៥២,១៤ភាគរយ នៅក្នុងការបោះឆ្នោត នៅជុំទី២ កាលពីថ្ងៃអាទិត្យ ទី២៨ ខែឧសភា ខណៈគូប្រជែងរបស់គាត់ គឺលោក កេម៉ាល់ គីលីកដារ៉ូហ្គ្លូ (Kemal Kilicdaroglu) ទទួលបានសំឡេង ត្រឹមតែ៤៧,៨៦ភាគរយប៉ុណ្ណោះ។

លទ្ធផល នៃការបោះឆ្នោតប្រធានាធិបតី នៃប្រទេសតួកគី គេរំពឹង ថា នឹងត្រូវប្រកាស នៅក្នុងរយៈពេលប៉ុន្មានថ្ងៃខាងមុខនេះ។ ជ័យជម្នះនេះ នឹងធ្វើឲ្យលោក អេដូហ្គេន កសាងប្រវត្ដិសាស្រ្ដថ្មី ព្រោះគាត់នឹងពង្រីកអំណាចគ្រប់គ្រងរបស់គាត់ អស់រយៈពេល២០ឆ្នាំកន្លងមកនេះ បន្ដទៅកាន់អាណត្ដិថ្មីមួយបន្ថែមទៀត ដោយមានរយៈពេល៥ឆ្នាំ។

លោកប្រធានាធិបតី តាយយីប អេដូហ្គេន បានបញ្ជាក់ ថា «យើងបានទទួលជ័យជម្នះ នៅក្នុងការបោះឆ្នោតប្រធានាធិបតី នៅជុំទី២ ជាមួយនឹងការពេញចិត្ត ពីប្រជាជនរបស់យើង។ ព្រះជាម្ចាស់សព្វព្រះហឫទ័យ យើងនឹងមានភាពស័ក្ដិសម សម្រាប់ទំនុកចិត្តរបស់ប្រជាជនទាំងអស់គ្នា ដូចអ្វីដែលយើងមានសម្រាប់ សម្រាប់រយៈពេល២១ឆ្នាំចុងក្រោយនេះ។ ប្រជាពលរដ្ឋតួកគី ជាង៨៥លាននាក់ បានទទួលជ័យជម្នះទាំងអស់គ្នា សម្រាប់ការបោះឆ្នោតទាំង២ជុំ គឺនៅថ្ងៃទី១៤ ខែឧសភា និង នៅថ្ងៃទី២៨ ខែឧសភា»។

បើទោះជាឧត្ដមក្រុមប្រឹក្សារៀបចំការបោះឆ្នោត នៃប្រទេសតួកគី នៅមិនទាន់ប្រកាសលទ្ធផលជាផ្លូវការយ៉ាងណាក្ដី ប៉ុន្ដែលទ្ធផលជ័យជម្នះបណ្ដោះអាសន្ននេះ បានធ្វើឲ្យមេដឹកនាំជាច្រើន នៅលើពិភពលោក កំពុងតែអបអរដល់លោកប្រធានាធិបតី អេដូហ្គេន ជាពិសេស ប្រធានាធិបតីរុស្ស៊ី លោក វ៉្លាឌីមៀ ពូទីន។

លោក តាយយីប អេដូហ្គេន (កើតនៅថ្ងៃទី២៦ ខែកុម្ភៈ ឆ្នាំ១៩៥៤) ជាអ្នកនយោបាយមួយរូបរបស់តួកគី បានក្លាយជាប្រធានាធិបតីទី១២ និង ប្រធានាធិបតីបច្ចុប្បន្ន នៃប្រទេសសមាជិករបស់អង្គការណាតូមួយនេះ ចាប់តាំងពីឆ្នាំ២០១៤ រហូតមក។ មុនពេលឡើងកាន់តំណែងកំពូលមួយនេះ លោក អេដូហ្គេន ធ្លាប់ធ្វើជាអភិបាលទីក្រុងអ៊ីស្ដាន់ប៊ូល (Istanbul) ចន្លោះពីឆ្នាំ១៩៩៤ដល់១៩៩៨ ហើយក្រោយមកក៏បានក្លាយជាសហស្ថាបនិកគណបក្សយុត្ដិធម៌និងអភិវឌ្ឍន៍ (AKP) នៅក្នុងឆ្នាំ២០០១ និង ធ្លាប់ធ្វើជានាយករដ្ឋមន្រ្ដី ចន្លោះពីឆ្នាំ២០០៣ដល់២០១៤ មុននឹងជាប់ឆ្នោតក្លាយជាប្រធានាធិបតីតួកគី៕

រដ្ឋាភិបាលខេត្តរបស់កោះបាលី ព្រមានចាត់វិធានការយ៉ាងម៉ឺងម៉ាត់លើអ្នកទេសចរបរទេសទាំងឡាយណា ដែលប្រើប្រាស់រូបិយប័ណ្ណផ្សេង និងជាពិសេសរូបិយប័ណ្ណគ្រីបតូ សម្រាប់ជាមធ្យោបាយទូទាត់នៅក្នុងសណ្ឋាគារ ភោជនីយដ្ឋាន កន្លែងទេសចរណ៍ មជ្ឈមណ្ឌលទិញទំនិញ និងកន្លែងផ្សេងៗទៀត។

អភិបាលកោះបាលី លោក វ៉ាយ៉ាន ខូស្ទឺ (Wayan Koster) បានលើកឡើងថា៖”ការប្រើប្រាស់រូបិយប័ណ្ណគ្រីបតូជាមធ្យោបាយទូទាត់ប្រាក់ គឹជាការរំលោភបំពានលើបទប្បញ្ញត្តិនៅក្នុងប្រទេសឥណ្ឌូនេសុី ដែលតម្រូវឱ្យចាត់វិធានការទៅលើភ្ញៀវទេសចរណ៍ទាំងនោះ”។

លោក អភិបាលកោះបាលីរូបនោះ បានសង្កត់ធ្ងន់ទៀតថា៖”  ចំណាត់ការ ដែលយើងគ្រោងនឹងអនុវត្តទៅលើភ្ញៀវទេសចរណ៍ណាដដែលប្រព្រឹត្តិខុសរួមាន៖

• ការនិរទេសចេញពីប្រទេសឥណ្ឌូនេសុី
• ការដាក់ទណ្ឌកម្មផ្នែករដ្ឋបាល
• និងការដាក់ទណ្ឌកម្មព្រហ្មទណ្ឌ ជាដើម។

សូមជម្រាបផងដែរថា បើយោងតាមច្បាប់របស់ប្រទេសឥណ្ឌូនេស៊ី បានចែងថា ប្រសិនបើនរណាម្នាក់ប្រើប្រាស់រូបិយប័ណ្ណផ្សេងទៀតក្រៅពីប្រាក់រូពីរបស់ឥណ្ឌូនេសុី ពួកគេអាចប្រឈមមុខនឹងការជាប់ពន្ធនាគាររហូតដល់មួយឆ្នាំ និងពិន័យជាប្រាក់អតិបរមាចំនួន ២០០លានរូពី ឬប្រហែល ១៣,៣០០ដុល្លារអាមេរិក៕

ប្រភព៖ CNA