ប្រទេសថៃ ៖ World of Statistics បានចាត់ចំណាត់ថ្នាក់ប្រទេសនានានៅលើពិភពលោក ដែលមានប្រព័ន្ធសុខាភិបាលល្អបំផុត ក្នុងនោះ World of Statistics បានចាត់ឱ្យប្រទេសថៃជាប់ចំណាត់ថ្នាក់ទី៧ ក្នុងចំណោមប្រទេសជាប់ចំណាត់ថ្នាក់ចំនួន១០ ។ ប្រទេសថៃលើកឡើងថា ការជាប់ចំណាត់ថ្នាក់នេះ ដោយសាររដ្ឋាភិបាលថៃបានយកចិត្តទុកដាក់លើការថែទាំសុខភាពពលរដ្ឋក្នុងប្រទេស ដើម្បីឱ្យការរស់នៅរបស់ពលរដ្ឋមានលក្ខណៈងាយស្រួល និងមានប្រសិទ្ធភាព ជាពិសេស ប្រទេសថៃផ្តោតលើអត្ថប្រយោជន៍ផ្នែកសុខភាព ។

World of Statistics បានបង្ហាញឈ្មោះប្រទេសដែលមានប្រព័ន្ធសុខាភិបាលល្អបំផុតនៅលើពិភពលោក ប្រចាំឆ្នាំ២០២៣ ដោយផ្អែកតាមការស្ទង់មតិប្រទេសចំនួន៩៤ ហើយក្នុងនោះប្រទេសថៃបានជាប់ចំណាត់ថ្នាក់ទី៧ ។ ចំណែកប្រទេសទទួលបានចំណាត់ថ្នាក់ទី១ គឺតៃវ៉ាន់ បន្ទាប់មក គឺប្រទេសកូរ៉េខាងត្បូង និងជប៉ុន ។

ការចាត់ចំណាត់ថ្នាក់ប្រព័ន្ធសុខាភិបាលល្អ គឺគេបានពិចារណាទៅលើគុណភាពជារួមនៃប្រព័ន្ធសុខាភិបាល ថែរក្សាសុខភាព និងពលរដ្ឋងាយស្រួលទទួលបានសេវាសុខភាពសំខាន់ៗ រួមទាំងកត្តាផ្សេងៗដូចជា គ្រូពេទ្យ ឧបករណ៍ពេទ្យ និងការចំណាយលើថ្លៃព្យាបាល ជាដើម ។

នៅក្នុងតំបន់អាស៊ាន ក្រៅពីប្រទេសថៃហើយ នៅមានប្រទេសចំនួន៣ ទៀត ដែលបានជាប់ចំណាត់ថ្នាក់ផងដែរ រួមមាន ប្រទេសសិង្ហបុរី ជាប់ចំណាត់ថ្នាក់ទី២៨, ប្រទេសឥណ្ឌូណេស៊ី ជាប់ចំណាត់ថ្នាក់ទី៥៦ និងប្រទេសវៀតណាម ជាប់ចំណាត់ថ្នាក់ទី៦២ ។ ចំណែកប្រទេសជាប់ចំណាត់ថ្នាក់ពីលេខ១ ដល់១០ រួមមាន ៖
១-តៃវ៉ាន់
២-កូរ៉េខាងត្បូង
៣-ជប៉ុន
៤-បារាំង
៥-ដាណឺម៉ាក
៦-អេស្ប៉ាញ
៧-ថៃ
៨-អូទ្រីស
៩-ហូឡង់
១០-ហ្វាំងឡង់
ប្រភព ៖ AEC connect

ប្រទេសហៃទី ៖ អាជ្ញាធរនៅប្រទេសហៃទីលើកឡើងថា តំបន់ជាច្រើនបានរងគ្រោះដោយសារទឹកជំនន់ ខណៈនៅប្រទេសហៃទីមានភ្លៀងធ្លាក់យ៉ាងខ្លាំងក្លា ។ គ្រោះទឹកជំនន់បានឆ.ក់យកអា.យុជីវិ.តពលរដ្ឋយ៉ាងតិចចំនួន៤២នាក់នាពេលកន្លងមក ហើយក៏មានពលរដ្ឋរងរបួស និងបាត់ខ្លួនជាច្រើននាក់ទៀត ។ លើសពីនេះ ផ្ទះសម្បែងរបស់ពលរដ្ឋប្រមាណ១៣.៦០០ខ្នងត្រូវបានទឹកជន់លិច ។

ទីក្រុងនៅជាប់ឆ្នេរសមុទ្រ Leogane ស្ថិតនៅទិសខាងលិចរបស់ទីក្រុងប៉រតូប្រែនមានបញ្ហាក្នុងការធ្វើដំណើរ ដោយសារទឹកលិចផ្លូវជាច្រើនខ្សែ ។ បើតាមស្ត្រីម្នាក់រស់នៅក្នុងទីក្រុងនេះប្រាប់ថា ទឹកជំនន់បានបំផ្លាញផ្ទះរបស់គាត់ខ្ទេចខ្ទីអស់ ហើយគាត់បានបាត់បង់កូនដែលមានអាយុត្រឹមតែ៥ឆ្នាំទៀតផង ។ ចំណែកនៅមន្ទីរពេទ្យមួយឈ្មោះ សេនក្រយ ពលរដ្ឋបាននាំគ្នាមកជួយសម្អាតបន្ទប់ និងគ្រែរបស់អ្នកជំងឺ ក្រោយពីមានទឹកជំនន់នៅមន្ទីរពេទ្យនេះ ។

ការិយាល័យការពារជនស៊ីវិលបានបង្ហោះសារនៅក្នុង Twitter ថា ចំនួនអ្នកស្លា.ប់បា.ត់ប.ង់ជីវិ.តបានកើនឡើង បើគិតចាប់ពីយប់ថ្ងៃទី៤ ខែមិថុនា កន្លងមក ក្រោយពីទឹកទំនន់បានវាយលុកតំបន់ជាច្រើននៅប្រទេសហៃទី រួមទាំងនៅជិតទីក្រុងប៉រតូប្រែនផងដែរ ។ ទឹកជំនន់បានវាយលុកប្រទេសហៃទី ស្របពេលប្រទេសនេះកំពុងតែជួបនឹងស្ថានការណ៍លំបាក និងអសន្តិសុខស្រាប់ទៅហើយ ។

ភ្នាក់ងារសង្គ្រោះបានបញ្ជូនម្ហូបអាហារ និងរបស់របរផ្សេងៗទៅឱ្យពលរដ្ឋជាច្រើនគ្រួសារដែលគ្មានទីលំនៅ ។ ចំណែកមន្ត្រីការិយាល័យការពារជនស៊ីវិលដាស់តឿនថា ផ្ទៃដីកសិកម្មក្នុងតំបន់ជាច្រើនបានរងផលប៉ះពាល់យ៉ាងខ្លាំង ដោយសារជំនន់ទឹកភ្លៀងលើកនេះ ។ គួរបញ្ជាក់ថា គ្រោះទឹកជំនន់បានកើតឡើងស្របពេលប្រទេសហៃទីទទួលរងឥទ្ធិពលខ្យល់ព្យុះឈ្មោះ hurricane ដែលតែងបោកបក់មកលើប្រទេសនេះ ចាប់ពីខែមិថុនា ដល់ខែវិច្ឆិកា ៕ ប្រភព ៖ TNN World

រាជធានីបាងកក៖ ក្រោមរដ្ឋាភិបាលចាំផ្ទះ ក្រោមការដឹកនាំរបស់លោកឧត្តមសេនីយ៍ ប្រាយុទ្ធ ចាន់អូចា បានផ្ដល់ឋានៈស្របច្បាប់ ដល់ពលករបរទេសខុសច្បាប់ រាប់លាននាក់ ហើយរហូតមកដល់ពេលនេះ ក៏គ្មានគណបក្សនយោបាយណាមួយ មានគោលនយោបាយ បណ្ដេញកម្មករចំណាកស្រុក មកពីប្រទេសជិតខាង ចេញពីប្រទេសរបស់ខ្លួននោះដែរ។

សារព័ត៌មានថៃ Bangkok Post បានចេញផ្សាយ កាលពីរសៀល ថ្ងៃអង្គារ ទី៦ ខែមិថុនា ថា ការបោះឆ្នោតសកល នៅក្នុងប្រទេសថៃ កាលពីថ្ងៃទី ១៤ ខែឧសភា មិនមានគណបក្សនយោបាយណាមួយ បានធ្វើយុទ្ធនាការ អំពីគោលនយោបាយ ធ្វើមាតុភូមិនិវត្តន៍ពលករចំណាកស្រុក ចេញពីប្រទេសថៃ នោះឡើយ។ វាជាការពិតណាស់ សេដ្ឋកិច្ចរបស់ប្រទេសអាស៊ានមួយនេះ ទើបនឹងងើបឡើងវិញ ហើយនៅតែបន្តប្រឈមមុខនឹងកង្វះខាតកម្លាំងពលកម្ម នៅក្នុងវិស័យជាច្រើន រួមមាន វិស័យទេសចរណ៍ និង សំណង់…ជាដើម។

រដ្ឋាភិបាលបន្ទាប់ នឹងចាត់វិធានការជាច្រើន ដើម្បីធានាឲ្យបានយ៉ាងរលូន សម្រាប់ការធ្វើចំណាកស្រុក ដោយស្របច្បាប់ និង សិទ្ធិការងារជាមូលដ្ឋាន ដោយធ្វើការងារជាមួយនឹងប្រទេសជិតខាង សម្រាប់ពលករណាម្នាក់ ចង់មកកាន់ប្រទេសថៃ។ ដោយឡែក ក្រុមជួយពលករខ្មែរ ឡាវ និង មីយ៉ាន់ម៉ា ឬ ភូមា នៅក្នុងប្រទេសថៃ បានទទួលស្គាល់ ថា ពួកគេមានការព្រួយបារម្ភ អំពីស្ថានភាពរបស់ពួកគេ ខណៈមានពាក្យចចាមអារ៉ាម ថា ពួកគេនឹងមិនអាចធ្វើការងារ នៅក្នុងប្រទេសថៃ បានបន្ដទៀត។

លោក រី ឆាយ (Ry Chay) អនុប្រធានទី១ នៃសមាគមសប្បុរសធម៌កម្ពុជា បានអះអាង ថា មានជនជាតិថៃមួយក្រុមតូច បាន និង កំពុងតែផ្សព្វផ្សាយព័ត៌មានក្លែងក្លាយ ដោយបង្ហាញ ថា ពលករ មកពីប្រទេសជិតខាង រួមមាន ខ្មែរ ភូមា និង ឡាវ ត្រូវតែឡប់ទៅប្រទេសកំណើតវិញ ដោយសារពលករទាំងនោះលែងចង់ នៅក្នុងប្រទេសថៃ។ ពួកគេបានបំភ្លៃព័ត៌មានផ្លូវការ ជុំវិញការនិយាយ ថា អាជ្ញាធរថៃ នឹងមិនត្រូវការពលករចំណាកស្រុកខ្មែរ និងឡាវ បន្ដទៀត នោះឡើយ ហើយបានផ្សព្វផ្សាយពាសពេញប្រទេសថែមទៀតផង»។

លោកអនុប្រធានទី១ នៃសមាគមសប្បុរសធម៌កម្ពុជា បានបន្ដ ថា «ខ្ញុំបានទទួលការហៅទូរស័ព្ទជាច្រើនថ្ងៃមកហើយ ពីពលករខ្មែរ នៅក្នុងប្រទេសថៃ ខណៈមានការព្រួយបារម្ភ ជុំវិញព័ត៌មាននេះ ព្រោះពួកគេនៅតែចង់ធ្វើការ នៅក្នុងប្រទេសថៃ។ ជាមួយគ្នានេះដែរ ខ្ញុំបានពន្យល់ដល់ពួកគេតាមទូរស័ព្ទ និង នៅលើទំព័រហ្វេសប៊ុករបស់ខ្ញុំ ហើយឥឡូវនេះ ពលករប្រហែលជា៦០ភាគរយ នៅក្នុងចំណោមពួកគេ បានយល់ព័ត៌មាននេះ ពីអាជ្ញាធរថៃ រួចរាល់អស់ហើយ»។

លោក រី ឆាយ បានសង្កត់ធ្ងន់ ថា ការយល់ច្រឡំមួយចំនួន បានកើតឡើង ក្រោយពេលអាជ្ញាធរថៃ បានជូនដំណឹងដល់និយោជក ថា ពួកគេលែងត្រូវការចុះបញ្ជីកូតាកម្មករ នៅក្នុងមន្ទីរការងារ នៅក្នុងទីក្រុងបាងកក បន្ដទៀតហើយ។ ឥឡូវនេះ ពួកគេអាចចុះបញ្ជីបាន នៅតាមមន្ទីរនានា នៅក្នុងខេត្ត ដែលពួកគេប្រកបអាជីវកម្ម។

លោក រី ឆាយ (Ry Chay) អនុប្រធានទី១ នៃសមាគមសប្បុរសធម៌កម្ពុជា បានបន្ថែម ថា «ឥឡូវនេះ អាជ្ញាធរថៃ អនុញ្ញាតឲ្យនិយោជក ដែលត្រូវការពលករចំណាកស្រុកខ្មែរ និង ឡាវ មកដាក់ពាក្យ នៅតាមខេត្តរៀងៗខ្លួន ព្រោះវាមានភាពងាយស្រួល សម្រាប់ពួកគេ»។

គណៈរដ្ឋមន្ត្រីថៃ កាលពីសប្តាហ៍មុន បានអនុម័ត លើការបន្តកិច្ចសន្យាការងារ ដោយបានអនុញ្ញាតឱ្យកម្មករចំណាកស្រុក ជាង ២០០ ០០០នាក់ នៅតែរក្សាការងាររបស់ពួកគេដដែល។ ចំណែកការបន្តកិច្ចសន្យានេះ នឹងធ្វើឡើង ក្រោមលក្ខខណ្ឌ នៃអនុស្សរណៈនៃការយោគយល់គ្នាដ៏ទូលំទូលាយមួយ គ្រប់គ្រងពលកម្មចំណាកស្រុក នឹងមានរយៈពេលដរាបណារដ្ឋាភិបាលបច្ចុប្បន្ន នៅតែស្ថិតក្នុងដែនសមត្ថភាពថែទាំរបស់ខ្លួន។ ប៉ុន្ដែវិធានការនេះ នឹងត្រូវពិនិត្យឡើងវិញ ក្រោយពេលរដ្ឋាភិបាលថ្មី បង្កើតឡើង។

បើតាមឧបនាយករដ្ឋមន្ត្រី លោក វីសសានូ ក្រាង៉ាម (Wissanu Krea-ngam) បានឲ្យដឹង ថា បើគ្មានការបន្ថែមការងារទេនោះ ពលករចំណាកស្រុក ត្រូវតែវិលត្រឡប់ទៅប្រទេសវិញ ហើយរង់ចាំរហូតដល់មានរដ្ឋាភិបាលថ្មី ចូលកាន់អំណាច ទើបពួកគេអាចត្រឡប់មកធ្វើការ នៅក្នុងប្រទេសថៃ វិញបាន៕

រដ្ឋធានីកៀវ៖ ការបំផ្ទុះទំនប់ទឹកដ៏ធំបំផុត ឆ្លងកាន់ដងទន្លេនីប្រូ ធ្វើឲ្យទឹកហូរជន់លិច នៅក្នុងតំបន់សង្គ្រាមទាំងមូល ហើយអាជ្ញាធរក្នុងតំបន់ បានអះអាង ថា មនុស្សរាប់ម៉ឺននាក់ ត្រូវបានជម្លៀសចេញ ក្រោយទឹកជន់លិចទីក្រុងនានារបស់ពួកគេ ខណៈក្រុងកៀវ និង ក្រុងមូស្គូ កំពុងតែចោទប្រកាន់ដាក់គ្នាទៅវិញទៅមក ជាអ្នកនៅពីក្រោយការបំផ្លិចបំផ្លាញទំនប់វារីអគ្គិសនីមួយនេះ

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃពុធ ទី៧ ខែមិថុនា ថា ការវាយប្រហារកម្ទេចសំណង់ នៅចុងខាងត្បូង នៃអាងស្តុកទឹកកាខូវកា (Kakhovka) ដ៏ធំសម្បើម កាលពីថ្ងៃអង្គារ បានធ្វើឲ្យធារទឹក ហូរបុកយ៉ាងខ្លាំង។ សកម្មភាពបែបនេះ រឹតតែបន្ថែមនូវទុក្ខវេទនា កាន់តែធ្ងន់ធ្ងរឡើង ដល់មនុស្សរាប់ពាន់នាក់ ដែលកំពុងតែជាប់នៅក្នុងតំបន់សមរភូមិ នៃសង្រ្គាមរបស់រុស្ស៊ី នាភាគខាងត្បូង នៃប្រទេសអ៊ុយក្រែន។

ជាមួយគ្នានេះដែរ រដ្ឋាភិបាលក្រុងកៀវ បានចោទប្រកាន់ដល់កម្លាំងទាហានរបស់រុស្ស៊ី ជាអ្នកបំផ្ទុះទំនប់វារីអគ្គិសនី និង ស្ថានីយវារីអគ្គិសនី នៅតំបន់ភាគខាងត្បូងរបស់ប្រទេសអ៊ុយក្រែន ដែលស្ថិតក្រោមការកាន់កាប់របស់ក្រុងម៉ូស្គូ នៅក្នុងសង្គ្រាម អស់រយៈពេលជាងមួយឆ្នាំកន្លងមកនេះ។ ចំណែក ក្រុមមន្ត្រីរុស្ស៊ី ក៏បានស្តីបន្ទោសទៅវិញ អំពីការទម្លាក់គ្រាប់បែករបស់អ៊ុយក្រែន ទើបបង្កឲ្យកើតមានគ្រោះមហន្ដរាយ ដល់ទំនប់វារីអគ្គិសនីដ៏ធំមួយនេះ។ បើទោះជាយ៉ាងណា គេនៅតែមិនទាន់ដឹង ថា ភាគីណាមួយជាអ្នកបង្កនោះឡើយ។

លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានបញ្ជាក់ ថា «ការបំផ្លិចបំផ្លាញទំនប់វារីអគ្គិសនីដ៏ធំមួយនេះ កំពុងតែបង្កឲ្យកើតមានគ្រោះមហន្តរាយដ៏ធំបំផុត ដល់បរិស្ថាន ខណៈទំនប់ដ៏ធំបំផុតមួយនេះ ត្រូវបានបង្កើតឡើង ដោយមនុស្ស នៅតំបន់អឺរ៉ុប មានអាយុកាលជាច្រើនទសវត្សរ៍កន្លងមកហើយ»។

លោកប្រធានាធិបតី ហ្សេឡែនស្គី បានថ្លែង នៅក្នុងសុន្ទរកថាជាវីដេអូ ទៅកាន់កិច្ចប្រជុំកំពូលរបស់បណ្តាប្រទេសអឺរ៉ុប នៅក្នុងអង្គការ Bucharest Nine (ប៊ូចារ៉េស ណាញ) ថា «ការបាក់ទំនប់ទឹកដ៏ធំណូវ៉ាកាខូវកា (Nova Kakhovka) មិនអាចកើតឡើង ដោយការបំផ្ទុះ មកពីខាងក្រៅ តាមរយៈការបាញ់ផ្លោងនោះទេ។ ទំនប់នេះ ត្រូវបានកាន់កាប់ ដោយរុស្ស៊ី ហើយពួកគេជាអ្នកបំផ្ទុះបំផ្លាញវា»។

ទំនប់ទឹកដ៏ធំណូវ៉ាកាខូវកានេះ មានកម្ពស់៣០ម៉ែត្រ និង ប្រវែង៣,២គីឡូម៉ែត្រ ហើយវាអាចស្ដុកទឹក ស្មើទៅនឹងប្រហែលទំហំបឹងទឹកប្រៃដ៏ធំ (Great Salt Lake) ស្ថិតក្នុងរដ្ឋយូថា (Utah) របស់សហរដ្ឋអាមេរិក។ សំណង់ទំនប់វារីអគ្គិសនីដ៏មហិមាមួយនេះ ត្រូវបានសាងសង់ឡើង នៅក្នុងឆ្នាំ១៩៥៦ នាសម័យសហភាពសូវៀត ដោយឆ្លងកាត់ដងទន្លេនីប្រូ (Dnipro)។ ទំនប់ទឹកដ៏ធំមួយនេះ ក្លាយជាផ្នែកមួយ សម្រាប់ការផ្គត់ផ្គង់ទឹក ដល់រោងចក្រវារីអគ្គិសនីណូវ៉ាកាខូវកា (Nova Kakhovka)។

ទំបន់ទឹកវារីអគ្គិសនីនេះ តែងតែផ្គត់ផ្គង់ទឹកសាបយ៉ាងសំខាន់ ទៅកាន់ឧបទ្វីបគ្រីមៀ (Crimea) របស់អ៊ុយក្រែន ដែលត្រូវបានរុស្ស៊ី រឹបអូសយក នៅក្នុងឆ្នាំ២០១៤ ហើយវាបានផ្គត់ផ្គង់ទឹកដល់រោងចក្រនុយក្លេអ៊ែរហ្សាប៉ូរីសហ្សា (Zaporizhzhia) ដែលស្ថិតនៅក្រោមការគ្រប់គ្រងរបស់ទាហានរុស្ស៊ី ចាប់តាំងពីសង្គ្រាមបានផ្ទុះឡើង កាលពីថ្ងៃទី២៤ ខែកុម្ភៈ ឆ្នាំ២០២២ រហូតមក។

ស្របគ្នានេះ ការិយាល័យរបស់ប្រធានាធិបតីអ៊ុយក្រែន បានបញ្ជាក់ ថា ប្រេងប្រហែល ១៥០តោន បានហូរចេញពីគ្រឿងចក្ររបស់ទំនប់ទឹកនេះ ហើយថា ប្រេងចំនួន៣០០តោនផ្សេងទៀត នៅតែអាចលេចធ្លាយចេញមកផងដែរ។

លោកស្រី ម៉ារី ស្ទ្រូដឺស (Marie Struthers) នាយកអង្គការអឺរ៉ុបខាងកើត និង អាស៊ីកណ្តាល បានអះអាង ថា «ការចំណាយលើកម្លាំងមនុស្ស និង បរិស្ថាន សម្រាប់ការបំផ្លិចបំផ្លាញទំនប់ណូវ៉ាកាកូវកា នេះ នឹងក្លាយជាគ្រោះមហន្តរាយដ៏ធំមួយ សម្រាប់កិច្ចការមនុស្សធម៌។ ការបំផ្លាញទំនប់ទឹកនេះ កំពុងតែបង្កគ្រោះថ្នាក់យ៉ាងធ្ងន់ធ្ងរដល់អាយុជីវិត សុវត្ថិភាព និង សុខុមាលភាពរបស់មនុស្សរាប់ម៉ឺននាក់»។

ទំនប់ដ៏ធំនេះ តែងតែផ្គត់ផ្គង់ទឹកដល់ដីស្រែចម្ការ នៅតំបន់ភាគខាងត្បូងរបស់ប្រទេសអ៊ុយក្រែន និង ឧបទ្វីបគ្រីមៀ ហើយវាក៏ជាប្រភពផ្គត់ផ្គង់ទឹកដ៏សំខាន់ សម្រាប់រោងចក្រនុយក្លេអ៊ែរហ្សាប៉ូរីសហ្សា (Zaporizhzhia) គ្រប់គ្រងដោយរុស្ស៊ី ផងដែរ។

ជាមួយគ្នានេះដែរ អង្គការឃ្លាំមើលនុយក្លេអ៊ែររបស់អង្គការសហប្រជាជាតិ បានបញ្ជាក់ ថា រោងចក្រថាមពលនុយក្លេអ៊ែរដ៏ធំបំផុតរបស់អឺរ៉ុបមួយនេះ គួរតែមានទឹកគ្រប់គ្រាន់ សម្រាប់ធ្វើឱ្យត្រជាក់ដល់ម៉ាស៊ីនរ៉េអាក់ទ័ររបស់រោងចក្រនុយក្លេអ៊ែរនេះ សម្រាប់រយៈពេលច្រើន ដោយដាច់ដោយឡែកមួយ បើទោះជាមានអាងស្តុកទឹកហូរចេញក៏ដោយ។ បន្ថែមពីនេះ អង្គការមួយនេះ ក៏បានអំពាវនាវឱ្យមានការសង្គ្រោះដល់អាងស្ដុកទឹកផងដែរ៕