ក្រោយពីប្រកាសបើកការដ្ឋានសាងសង់ផ្លូវល្បឿនលឿន ភ្នំពេញ-បាវិត កន្លងទៅហើយនោះ ប្រមុខរាជរដ្ឋាភិបាលកម្ពុជា ក៏ទើបតែចុះកិច្ចព្រមព្រៀងសាងសង់ផ្លូវល្បឿលឿនមួយខ្សែទៀត ជាមួយក្រុមហ៊ុនចិន គឺផ្លូវល្បឿនលឿនភ្នំពេញ-សៀមរាប-ប៉ោយប៉ែត។

គម្រោងសាងសង់ផ្លូវល្បឿនលឿនទី៣ ភ្នំពេញ-សៀមរាប-ប៉ោយប៉ែត គ្រោងនឹងចំណាយទឹកប្រាក់ ៤០០០លានដុល្លារ ដែលមាន២ដំណាក់កាល គឺដំណាក់កាលទី១ ភ្នំពេញ-សៀមរាប ប្រវែង២៥០គីឡីម៉ែត្រ ដំណាក់កាលទី២ សៀមរាប-ប៉ោយប៉ែត ប្រវែង១៥០គីឡូម៉ែត្រ។

ដោយដំណាក់កាលទី១ ភ្នំពេញ-សៀមរាប មានប្រវែង២៥០គីឡីម៉ែត្រ និងដំណាក់កាលទី២ សៀមរាប-ប៉ោយប៉ែត មានប្រវែង១៥០គីឡូម៉ែត្រ ទាំងអស់៤០០គីឡូម៉ែត្រ។

ដូច្នេះ ចំពោះការចំណាយវិញ គឺប្រហែល ១០លានដុល្លារ ក្នុង១គីឡូម៉ែត្រ ដូច្នេះ ៤០០គីឡូម៉ែត្រ ស្មើនឹង៤០០០លានដុល្លារ។ ប៉ុន្តែ ប្រវែង និងទំហំទឹកប្រាក់ក្នុងការសាងសង់នេះ គឺមិនទាន់ច្បាស់លាស់នោះទេ អាចមានការប្រែប្រួលណាមួយតាមស្ថានភាពជាក់ស្តែងនាថ្ងៃអនាគត។

លោកទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា ក្នុងការចុះកិច្ចព្រមព្រៀងនេះ គឺដើម្បីផ្តល់ពេលវេលា ១២ខែ ដើម្បីឱ្យក្រុមហ៊ុនចិនសិក្សាលើគម្រោងនេះ ក៏ប៉ុន្តែខាងភាគីចិនសូមពេលត្រឹមតែ៦ខែប៉ុណ្ណោះ ព្រោះក្រុមហ៊ុនបានសិក្សារយៈពេល៥ខែរួចមកហើយ។

បើមិនមែនការប្រែប្រួលអ្វីនោះទេ ផ្លូវល្បឿនលឿនទី៣ ភ្នំពេញ-សៀមរាប-ប៉ោយប៉ែត នឹងបើកការដ្ឋានសាងសង់នៅឆ្នាំ២០២៤ ខាងមុខនេះ៕

បើយោងតាមការលើកឡើងរបស់រដ្ឋមន្ត្រីក្រសួងសាធារណការនិងដឹកជញ្ជូន ឯកឧត្តម ស៊ុន ចាន់ថុល បានថ្លែងឱ្យដឹងថា៖”គម្រោងសាងសង់ផ្លូវល្បឿនលឿនភ្នំពេញ-ក្រុងបាវិត មានប្រវែងសរុប ១៣៥,១០គីឡូម៉ែត្រ មានចំណុចចាប់ផ្តើមពីឃុំថ្មគរ ស្រុកល្វាឯម ខេត្តកណ្តាល ទៅដល់សង្កាត់ច្រកម្ទេស ក្រុងបាវិត ខេត្តស្វាយរៀង។ ផ្លូវនេះ មានខ្សែផ្លូវឆ្លងកាត់ខេត្តកណ្តាល ប្រវែង ៤,១គីឡូម៉ែត្រ ខេត្តព្រៃវែង ប្រវែង ៧០,៩គីឡូម៉ែត្រ និងខេត្តស្វាយរៀង ប្រវែង ៦០,១គីឡូម៉ែត្រ”។

ផ្លូវល្បឿនលឿនភ្នំពេញ-ក្រុងបាវិត គ្រោងចំណាយថវិកាវិនិយោគសរុបប្រមាណ ១,៣៥ពាន់លានដុល្លារអាមេរិក ក្រោមទម្រង់វិនិយោគសាងសង់-ប្រតិបត្តិការ-ផ្ទេរ ដែលមានរយៈពេលប្រតិបត្តិការចំនួន ៥០ឆ្នាំ ក្នុងនោះ ២០ភាគរយ ជាទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន និង ៨០ភាគរយ ជាប្រាក់កម្ចីរបស់ក្រុមហ៊ុន។

គម្រោងនេះនឹងត្រូវអនុវត្តការងារបច្ចេកទេសសាងសង់ ដូចជា៖

• សាងសង់ស្ពានធំ និងស្ពានមធ្យមចំនួន ២៦កន្លែង ប្រវែងសរុប ២.២៦៦ម៉ែត្រ ស្ពានតូចចំនួន ១៦កន្លែង ប្រវែង សរុប ២៥៦ម៉ែត្រ និងដាក់លូគ្រប់ប្រភេទចំនួន ១៩៧កន្លែង
• គម្រោងនេះ នឹងរួមបញ្ចូលការសាងសង់ហេដ្ឋារចនាសម្ព័ន្ធឆ្លងកាត់ព្រំដែន ដោយ រាជរដ្ឋាភិបាល ទទួលបន្ទុកកិច្ចលទ្ធកម្មដីសម្រាប់ទីតាំង និងសាងសង់ហេដ្ឋារចនា សម្ព័ន្ធឆ្លងកាត់ព្រំដែននេះ
• សាងសង់ផ្លូវប្តូរទិសចរាចរណ៍ចំនួន ៥កន្លែង ផ្លូវរូងក្រោមដីទំហំធំ និងទំហំតូច ចំនួន ២០៤កន្លែង
• ផ្លូវល្បឿនលឿននេះ អនុញ្ញាតឱ្យយានយន្តគ្រប់ប្រភេទអាចបើកបរ ក្នុងល្បឿន រហូតដល់ ១០០ និង ១២០គីឡូម៉ែត្រក្នុងមួយម៉ោង
• សាងសង់តំបន់សេវាកម្ម ឬចំណតឈប់សម្រាក ចំនួន ២កន្លែង, ចំណតរថយន្តចំនួន ១កន្លែង, មណ្ឌលប្រតិបត្តិការនិងថែទាំផ្លូវចំនួន៣កន្លែង និងបញ្ជរបង់ប្រាក់ចំនួន ៦កន្លែង
• រៀបចំបំពាក់សម្ភារបរិក្ខារផ្លូវថ្នល់រួមមាន ផ្លាកសញ្ញាចរាចរណ៍ ភ្លើងសញ្ញា គំនូសសញ្ញា បង្គោលគីឡូម៉ែត្រ និងរបាំងសុវត្ថិភាពទៅតាមបទដ្ឋានបច្ចេកទេសរបស់ផ្លូវល្បឿនលឿន៕

ពិតជាមានមោទភភាពណាស់សម្រាប់ប្រជាជនកម្ពុជានៅពេលឃើញកីឡាការិនីប៉ារ៉ាហ្គេមរបស់កម្ពុជា២រូបរួមមាន កីឡាការិនី វិត ចន្ថា និង កីឡាការិនី ងួន រតនា អាចរកមេដាយច្រើនជូនជាតិមាតុភូមិ។

កីឡាប៉ារ៉ាហ្គេមលើកទី១២ ឆ្នាំ២០២៣ កំពុងប្រកួតយ៉ាងស្វិតស្វាញនៅរាជធានីភ្នំពេញ ប្រកបដោយឆន្ទៈមោះមុតដោយអត្តពលិកមានពិការភាពបេ្តជ្ញាប្រឹងប្រែងឱ្យអស់ពីសមត្ថភាពដើម្បីស្វែងរកមេដាយជូនជាតិ។ ក្នុងនោះកីឡាការិនីកម្ពុជា២រូបធ្វើឱ្យប្រជាជនទាំងមូលសម្តែងនូវអារម្មណ៍មោទនភាពយ៉ាងក្រៃលែងដោយពួកគេប្រឹងប្រែងប្រកួតយ៉ាងខ្លាំងដែលអាចដណ្តើមបានមេដាយច្រើនក្នុងព្រឹត្តិការណ៍នេះផងដែរ។

កីឡាការិនី ងួន រតនា រកបានមេដាយ៣គ្រឿង ក្នុងវិញ្ញាសារត់ចម្ងាយ ក្នុងនោះបានឈ្នះមេដាយមាស១គ្រឿងលើវិញ្ញាសា រត់ចម្ងាយ ១៥០០ម៉ែត្រ T64 និងឈ្នះមេដាយប្រាក់ ២ ក្នុងវិញ្ញាសា រត់ចម្ងាយ៤០០ម៉ែត្រ T64 និង៨០០ម៉ែត្រ T64 សរុបទាំងអស់ទទួលបានមេដាយ៣គ្រឿងតែម្នាក់ឯង។

ចំណែកឯ កីឡាការិនី វិត ចន្ថា វិញបានឈ្នះមេដាយមាស៣គ្រឿងតែម្នាក់លើវិញ្ញាសា លោតចម្ងាយT64 , រត់ចម្ងាយ៤០០ម៉ែត្រ T64 និងរត់ចម្ងាយ២០០ម៉ែត្រ T64 ។

គួរបញ្ជាក់ផងដែរថា គិតត្រឹមវេលាម៉ោង៤ល្ងាចថ្ងៃទី៦ ខែមិថុនា ឆ្នាំ២០២៣ កម្ពុជា ស្ថិតនៅលេខរៀងទី៨ក្នុងចំណោម១១ប្រទេស រកបានមេដាយសរុប៥៤គ្រឿង ក្នុងនោះមានមេដាយមាស៨គ្រឿង ប្រាក់១៦គ្រឿង និងសំរឹទ្ធ៣០គ្រឿង ខណៈប្រទេសឥណ្ឌូនេស៊ីឈរលេខរៀងទី១ រកបានមេដាយសរុបចំនួន២៨៣គ្រឿង៕

ក្រសួងវប្បធម៌ និង វិចិត្រសិល្បៈនៅថ្ងៃទី៦ ខែមិថុនា ឆ្នាំ២០២៣ លោក ភិន ភក្តី អនុប្រធាននាយកដ្ឋាននៃនាយកដ្ឋានអភិរក្ស និងបុរាណវិទ្យាប្រចាំរមណីយដ្ឋានប្រាសាទកោះកេរ បានដឹកនាំមន្រ្តីបច្ចេកទេសរៀបចំពិធីសែនព្រេនបើកការដ្ឋានគម្រោងអភិរក្សបដិមាព្រះព្រហ្មរកឃើញនៅប្រាសាទបន្ទាយពីរជាន់។

បដិមាព្រះព្រហ្មនៅប្រាសាទខាងលើនេះគឺបានរកឃើញកាលពីឆ្នាំ២០១៩ នៅពេលអាជ្ញាធរជាតិព្រះវិហារបានអនុវត្តន៍គម្រោងផ្លាស់ប្តូរបង្គុំទល់ទ្រឈើអស់គុណភាព មកប្រើប្រាស់គ្រឿងបង្គុំទល់ទ្រដោយដែកវិញ។ ក្នុងពេលរៀបចំកំណាយដាក់ជើងតាងគ្រឿងបង្គុំដែក ក្រុមការងារបានរកឃើញបំណែកដងខ្លួនបដិមាព្រះព្រហ្ម និងបល្ល័ង្កមានទម្រង់មូល លម្អដោយក្បាច់ដ៏វិចិត្រ។

វត្ថុសិល្បៈទាំងនោះ ត្រូវបានរៀបចំទុកដាក់ និងអភិរក្សឱ្យបានគង់វង្សសម្រាប់ការជួសជុលនាពេលអនាគត ទើបអាជ្ញាធរជាតិព្រះវិហារចាត់តាំងមន្ត្រីបច្ចេកទេសអនុវត្តន៍គម្រោងនេះបន្ថែមក្នុងគោលបំណង អភិរក្សបំណែកបដិមាព្រះព្រហ្ម បំណែកបល្ល័ង្ក និងបំណែកហង្ស ដែលនៅរាយប៉ាយខាងមុខតួប៉មកណ្តាល ដោយនាំយកមកសម្អាត ចុះបញ្ជី រក្សាទុកឱ្យបានត្រឹមត្រូវនៅទីតាំងមានសុវត្ថិភាព និងធ្វើការសាងសង់ដំបូលគ្របពីខាងលើតួប៉មកណ្តាលដើម្បីការពារបល្ល័ង្កនៃបដិមាព្រះព្រហ្ម៕

កាលពីពេលថ្មីៗនេះ សារព័ត៌មានអូស្ត្រាលីមួយបានចេញផ្សាយថា  អាម៉ុកត្រីរបស់កម្ពុជា គឺជានំឆ្ងាញ់ជាងគេ នៅប្រទេសអូស្ត្រាលី ប្រចាំឆ្នាំ២០២៣។

អ្នកដុតនំទាំងពីរនាក់ ដែលជាជនជាតិអូស្ត្រាលី គឺChan និង Ryanជាម្ចាស់ហាងនំ Country Cob Bakery នៅរដ្ឋ Victoria បានចែករំលែកនៅលើបណ្តាញទំនាក់ទំនងសង្គម  Instagram ថា ទីបំផុតយើងបានធ្វើវា។ យើងទើបតែបានឈ្នះពានរង្វាន់ 2023 Australia’s Best Pie ។ បន្ទាប់ពីការប្រកួតប្រជែងរយៈពេល ៣ ថ្ងៃដ៏ស្វិតស្វាញក្នុងចំណោមហាងនំប៉័ង ចំនួន ៣៤០ ផ្សេងទៀត ទូទាំងប្រទេស នំដុតនំដុតស្នូលអាម៉ុកត្រី «Fish Amok Pie» របស់យើងបានយកតំណែងកំពូលសម្រាប់ការប្រកួតឆ្នាំនេះ”។

សូមបញ្ជាក់ផងដែរថា ឧស្សាហកម្មដុតនំ បានដើរតួយ៉ាងសំខាន់នៅក្នុងប្រទេសអូស្រ្តាលី ដោយមួយឆ្នាំៗសមាគមនំដុតរបស់អូស្ត្រាលី តែងតែបង្កើតកម្មវិធីប្រកួតប្រជែងនំដុត ដែលមានរសជាតិឆ្ងាញ់ និងប្លែកមាត់ ដើម្បីមកធ្វើលក់ ឬធ្វើទទួលទាន នៅក្នុងសហគមន៍របស់ពួកគេ៕

ប្រភព៖ Pedestrian

អ្នកលេងបណ្តាញសង្គមជាច្រើនបានជជែកវែក មានទាំងមានការរិះគន់និងស្នើដល់ Coach កម្មវិធីលំដាប់ពិភពលោក The Voice Cambodia រដូវកាលទី៣ កុំអាលឆាប់គោះប៊ូតុងពេក ព្រោះគ្រាន់តែបង្ហើរសំនៀងបានមួយម៉ាត់មិនទាន់បានស្តាប់ស្រួលបួលផងគោះបាត់ទៅហើយ។ ការលើកឡើងនេះបន្ទាប់ពីមានបេក្ខជនម្នាក់បង្ហើរសំឡេងបន្តិចគណៈកម្មការគោះប៊ូតុងតែម្តង ខណៈមានការខំមិនថាសំឡេងបេក្ខជនរូបនោះនៅមានកម្រិតនៅឡើយ។

សប្តាហ៍ទី១ វគ្គ Blind Auditions កម្មវិធី The Voice Cambodia រដូវកាលទី៣ បានចាក់ផ្សាយកាលពីថ្ងៃទី៤ ខែមិថុនា ឆ្នាំ២០២៣ ថ្មីៗនេះដែលកម្មវីធីប្រកួតនេះទទួលបានការគាំទ្រខ្លាំងពីមហាជន។ ចំណែកឯបេក្ខភាពចូលរួមវិញសុទ្ធសឹងតែមានសមត្ថភាពនិងភាពទាក់ទាញម្យ៉ាងម្នាក់ ហើយគណៈកម្មការទាំង៤វិញរួមមាន ឱក សុគន្ធកញ្ញា , ណុប ប៉ាយ៉ារិទ្ធ, ពេជ្រ សោភា និង ឆន សុវណ្ណរាជ នៅបន្តបេកកម្មភាពយ៉ាងស្វិតស្វាញក្នុងការដណ្តើមបេក្ខជនមកចូលរួមធ្វើជាកូនក្រុមរបស់ខ្លួន។

យ៉ាងណាមិញ នៅក្នុងសប្តាហ៍ដំបូងនេះអ្នកលេងបណ្តាញសង្គមមានការរិះគន់ទៅ Coach កម្មវិធីនេះផងដែរថាគ្រាន់តែបេក្ខជនច្រៀងមួយម៉ាត់គោះប៊ូតុងបាត់ទាំងមិនទាន់បានស្តាប់ស្រួលបួលផង។
អ្នកលេងបណ្តាញសង្គមបានលើកឡើងថា «ហាមួយម៉ាត់សោះចុចបាត់អត់ទាន់បានច្រៀង១ឃ្លាផងសុំមិនយល់ទេ, បើនិយាយទៅគាត់ច្រៀងមិនបានល្អទេ ចូលខុស និងសំឡេងៗញ័រ តែនេះជាការជោគជ័យនូវជំហានដំបូងរបស់គាត់ក្នុងកម្មវិធីនេះ សង្ឃឹមថាគាត់ហ្វឹកហាត់បន្ថែម និងបំពេញនូវចំណុចខ្វះខាតសម្រាប់ជោគជ័យនាវគ្គបន្ទាប់ៗទៀត, សំឡេងល្អតែ ដូចច្រៀងអត់សូវត្រូវ, និយាយត្រង់សំឡេងអត់ពីរោះទេ»។

អ្នកផ្សេងទៀតបានលើកឡើងទៀតថា «ស្រលាញ់សំឡេង(No) ស្រលាញ់ភ្លេង (Yes) មិនមែនចង់រិះគន់ទេ គាត់ច្រៀងពីរោះហើយ ប៉ុន្តែ គ្រាន់តែចេញភ្លេងហាម៉ាត់តែ១ពាក្យចុចប៊ូតុងយកហើយ ប៉ះចំអ្នកខ្លះច្រៀងពីរោះតែ១ឃ្លាដំបូងហើយ ភ្លាវឡើងតុងមិនចប់ហើយទេអី.. អ្នកខ្លះនឹងដូចខ្ញុំចេះគ្រប់បទច្រៀងបានគ្រប់បទតែពីរោះតែឃ្លាៗដំបូងទេ, មិនទាន់បានច្រៀងផងចុចបាត់។

ពួកគេលើកឡើងទៀតថា «គ្រាន់តែចង់ឱ្យខាង The voice បកស្រាយថាហេតុអីអ្នកច្រៀងពពីរោះៗច្រើន តែមិនជាប់ដល់វគ្គនេះតែអ្នកដែលច្រៀងល្មមៗបែរជាជាប់វិញ សង្ឃឹមថានឹងមានចម្លើយ , គ្រាន់ចង់ឱ្យ coach នីមួយៗ កុំប្រញាប់គោះពេក គួព្យាយាមស្តាប់ឱ្យបានយូរ, Unfair ពេកហើយច្រៀងអត់ដល់ពាក់កណ្ដាលបទផងចុចប៊ូតុងខ្ញុំដឹងថាcoachទាំងបួនមានសិទ្ធិសម្រេចចុចលឿនរឺយឺតតែនេះដូចជ្រុលពេកវាមិនដែល ច្រៀងត្រឹមឃ្លា( ពេលវេលាមានន័យ )ចុចប៊ូតុងយកតែម្ដងដូចអត់សមសោះច្រៀងបាន១មាត់ចុចបាត់,ទាន់បានច្រៀងផង គោះបាត់»៕