ប្រទេសថៃ ៖ កាលពីវេលាម៉ោង៩ និង៣០នាទីព្រឹក ថ្ងៃទី២១ ខែមករា ឆ្នាំ២០២៦ ប្រធានសមាគមប្រឆាំងការឡើងកំដៅផែនដីនៅប្រទេសថៃ និងជាអ្នកតំណាងឱ្យពលរដ្ឋនៅទីក្រុងបាងកក បានដាក់ពាក្យបណ្តឹងទៅតុលាការដើម្បីឱ្យចេញដីកាទៅអភិបាលក្រុងបាងកក លោក Chadchart Sittipunt ទទួលខុសត្រូវខ្យល់ពុល PM 2.5 កើនឡើងយ៉ាងខ្លាំងគ្របដណ្តប់ពាសពេញទីក្រុងបាងកកតាំងពីឆ្នាំ២០២៥ ដោយដើមបណ្តឹងចោទប្រកាន់អភិបាលក្រុងបាងកកធ្វេសប្រហែសក្នុងការបំពេញតួនាទី ។

ប្រធានសមាគមប្រឆាំងការឡើងកំដៅផែនដី លោក Srisuwan Janya ដែលតំណាងឱ្យពលរដ្ឋនៅទីក្រុងបាងកក បានយកពាក្យបណ្តឹងមកដាក់នៅតុលាការពីបទអភិបាលក្រុងបាងកក លោក Chadchart Sittipunt ធ្វេសប្រហែសក្នុងការបំពេញតួនាទីតាមច្បាប់កំណត់ ឬបំពេញតួនាទីយឺតយ៉ាវបណ្តោយឱ្យខ្យល់ពុល PM 2.5 គ្របដណ្តប់ពាសពេញទីក្រុងបាងកកតាំងពីឆ្នាំ២០២៥ រហូតដល់បច្ចុប្បន្ន ។ ពលរដ្ឋទាមទារឱ្យអភិបាលក្រុងបាងកកទទួលខុសត្រូវ និងចាត់វិធានការកាត់បន្ថយខ្យល់ពុល ដើម្បីកុំឱ្យពលរដ្ឋរស់នៅទីក្រុងកាន់តែច្រើនធ្លាក់ខ្លួនឈឺជំងឺផ្លូវដង្ហើម ។

តាមការអះអាងរបស់លោក Srisuwan គឺតាំងពីចុងខែវិច្ឆិកា ឆ្នាំ២០២៥ រហូតដល់ខែមករា ឆ្នាំ២០២៦ ពលរដ្ឋបានរស់នៅជាមួយខ្យល់ពុលខ្លាំងដែលគ្របដណ្តប់ពេញទីក្រុងបាងកក ហើយខ្យល់ពុលកើនឡើងកាន់តែខ្លាំងបណ្តាលឱ្យពលរដ្ឋធ្លាក់ខ្លួនឈឺជាបន្តបន្ទាប់ ។ កន្លងមក ប្រធានគណៈកម្មការបរិស្ថានជាតិបានប្រកាសទីក្រុងបាងកកជាតំបន់គ្រប់គ្រងការបំពុលខ្យល់តាំងពីថ្ងៃទី១៧ ខែកញ្ញា ឆ្នាំ២០២៥ និងជាតួនាទីរបស់អភិបាលក្រុងបាងកក ដែលត្រូវធ្វើផែនការកាត់បន្ថយខ្យល់ពុល អនុវត្តគ្រប់យន្តការដើម្បីការពារ និងដោះស្រាយប្រភពខ្យល់ពុលឱ្យបានលឿនបំផុត កុំឱ្យខ្យល់ពុលកើនឡើងខ្លាំង ប៉ុន្តែខ្យល់ពុលនៅតែកើនឡើងរហូតមក ។

អភិបាលក្រុងបាងកក លោក Chadchart បានប្រកាសពីវិធានការរហូតដល់១០ចំណុចដើម្បីកាត់បន្ថយខ្យល់ពុលក្នុងទីក្រុង ប៉ុន្តែរហូតមកដល់ពេលនេះ គ្មានវិធានការណាមួយមានប្រសិទ្ធភាពអាចកាត់បន្ថយខ្យល់ពុលរយៈពេលខ្លី ឬវែងឡើយ ។ ប្រសិនបើមិនដោះស្រាយបញ្ហាខ្យល់ពុលទេ វានឹងកើនឡើងជារៀងរាល់ឆ្នាំ និងប៉ះពាល់សុខភាពពលរដ្ឋក្រុងបាងកក ព្រមទាំងប៉ះពាល់វិស័យទេសចរណ៍ និងសេដ្ឋកិច្ចផងដែរ ។

ហេតុនេះ ទើបពលរដ្ឋរងផលប៉ះពាល់ដោយសារខ្យល់ពុលនៅទីក្រុងបាងកកប្រគល់តួនាទីឱ្យសមាគមប្រឆាំងការឡើងកំដៅផែនដីដាក់ពាក្យប្តឹងនៅតុលាការ ដើម្បីឱ្យតុលាការចេញដីកាទៅកាន់អភិបាលក្រុងបាងកកពន្លឿនវិធានការការពារ និងដោះស្រាយបញ្ហាខ្យល់ពុលជាបន្ទាន់តាមផែនការកំណត់ ព្រមទាំងស្របតាមវិធានការគ្រប់គ្រង កាត់បន្ថយ និងកម្ចាត់ខ្យល់ពុលនៅទីក្រុងបាងកក តាមសេចក្តីប្រកាសរបស់គណៈកម្មការបរិស្ថានជាតិ ។

តុលាការត្រូវចេញដីកាទៅកាន់អភិបាលក្រុងបាងកកឱ្យកំណត់វិធានការហាមកាប់ដើមឈើនៅទីសាធារណៈ តំបន់ឯកជន ព្រមទាំងកំណត់ឱ្យដាំដើមឈើនៅតាមតំបន់ផ្សេងៗ និងថែទាំដើមឈើទាំងនោះឱ្យបានល្អ ។ ក្រៅពីនេះ ត្រូវមានវិធានការដាក់ទោសជនល្មើសច្បាប់ ដូចគ្នានឹងវិធានការរបស់ប្រទេសសិង្ហបុរី ។ នេះបើតាមការលើកឡើងរបស់ប្រធានសមាគមប្រឆាំងការឡើងកំដៅផែនដី លោក Srisuwan ។

គួរបញ្ជាក់ថា មិនមែនមានតែទីក្រុងបាងកកមួយទេដែលប្រឈមនឹងខ្យល់ពុលខ្លាំងបំផុត បណ្តាខេត្តជាច្រើនទៀតរបស់ថៃក៏ប្រឈមនឹងខ្យល់ពុលខ្លាំងដែរ រហូតធ្វើឱ្យពលរដ្ឋមានជំងឺផ្លូវដង្ហើម ។ អាជ្ញាធរអំពាវនាវឱ្យពលរដ្ឋពាក់ម៉ាស់ការពារខ្យល់ពុល PM 2.5 ថែទាំសុខភាព កាត់បន្ថយសកម្មភាពក្រោមកំដៅថ្ងៃ និងហាមដុតកាកសំណល់ ឬសំរាមក្នុងស្រែចម្ការដាច់ខាត ។

កន្លងមក កាសែតថៃ The Nation បានផ្សាយព័ត៌មានចោទប្រកាន់ដោយគ្មានមូលដ្ឋានថា ខ្យល់ពុលនៅទីក្រុងបាងកកមានប្រភពពីកម្ពុជា ប៉ុន្តែត្រូវក្រសួងបរិស្ថានកម្ពុជាច្រានចោល ។ ក្រសួងបរិស្ថានថា ការបំពុលខ្យល់នៅទីក្រុងបាងកកមិនពាក់ព័ន្ធជាមួយកម្ពុជាទេ គឺកើតឡើងដោយសារការបំភាយពីការដឹកជញ្ជូន ក្នុងនោះទីក្រុងបាងកកមានចំនួនយានយន្ត និងសកម្មភាពចរាចរណ៍មមាញឹកខ្លាំង, ការបំភាយពីសកម្មភាពឧស្សាហកម្ម, ធូលីការដ្ឋានសំណង់ និងការប្រើប្រាស់ថាមពលក្នុងទីក្រុង ។ ប្រភពទាំងនេះរួមផ្សំនឹងលក្ខខណ្ឌឧតុនិយមក្នុងស្រុកមិនអំណោយផល ដូចជា ៖ បាតុភូតបញ្ច្រាស់សីតុណ្ហភាព និងការធ្លាក់ចុះរយៈកម្ពស់បរិយាកាខាងក្រោម ដែលដើរតួនាទីសំខាន់ធ្វើឱ្យសារធាតុបំពុលដែលមានប្រភពក្នុងស្រុកប្រមូលផ្តុំ និងកើនឡើង បង្កការបំពុលបរិយាកាសនៅទីក្រុងបាងកក ៕

ប្រទេសថៃ ៖ នាយករដ្ឋមន្ត្រីថៃចាំផ្ទះ លោក Anutin Charnvirakul បានលើកដៃសំពះពលរដ្ឋខេត្តណាខនរ៉ាជសីម៉ា ដើម្បីសុំឱ្យបោះឆ្នោតគាំទ្រកាន់តំណែងបន្តទៀតដោយសន្យាថា បើជាប់ឆ្នោតនឹងកាន់កាប់ទឹកដីនៅព្រំដែនបន្ថែម, បន្តបិទព្រំដែនជាមួយកម្ពុជា, ចែកប្រាក់ឱ្យពលរដ្ឋក្នុងម្នាក់ចំនួន១ម៉ឺនបាត (ប្រមាណ ៣២២ដុល្លារ) និងទប់ស្កាត់ការនាំចូលដំឡូងមីពីប្រទេសជិតខាងដែលធ្វើឱ្យដំឡូងមីកសិករថៃឡើងថ្លៃ ។ នេះបើតាមការចុះផ្សាយរបស់សារព័ត៌មាន Thairath នៅថ្ងៃទី២២ ខែមករា ឆ្នាំ២០២៦ ។

នៅថ្ងៃទី២២ ខែមករា លោក Anutin នាយករដ្ឋមន្ត្រីចាំផ្ទះ និងជាប្រធានគណបក្សភូមិចៃថៃ បាននាំមន្ត្រីពាក់ព័ន្ធមករកសំឡេងឆ្នោតនៅឃុំណូនស៊ូង ខេត្តណាខនរ៉ាជសីម៉ា ហើយក្រៅពីសុំឱ្យពលរដ្ឋបោះឆ្នោតឱ្យ លោក Anutin ក៏បានសុំឱ្យពលរដ្ឋជួយគាំទ្រលោក ថាវីរ៉ាត់ រតនៈសេត បេក្ខភាពតំណាងរាស្ត្រ មណ្ឌល៥ ដើម្បីពង្រីកចំនួនអាសនៈឱ្យលើសពី១កៅអី ។

លោក Anutin បានប្រកាសពីគោលនយោបាយការបរទេស និងសន្តិសុខប្រទេសថៃថា រយៈពេល៤ខែកន្លងមក រដ្ឋាភិបាលថៃសហការជាមួយកងទ័ព បានដណ្តើមកាន់កាប់ទឹកដីកម្ពុជានៅព្រំដែនជាច្រើនកន្លែង ។ ក្រៅពីនេះ លោកបញ្ជាក់ពីគោលជំហរគណបក្សរបស់ខ្លួនថា នឹងមិនបើកព្រំដែនកម្ពុជា-ថៃដាច់ខាត ស្របតាមសំណូមពរពលរដ្ឋថៃនៅព្រំដែន ។

លោកថា ការបិទព្រំដែនកម្ពុជា-ថៃ គឺជាការទប់ស្កាត់ការនាំចូលដំឡូងមី និងអង្ករពីប្រទេសជិតខាងមកកាន់ប្រទេសថៃ ខណៈកន្លងមក វាធ្វើឱ្យតម្លៃដំឡូងមី និងអង្កររបស់កសិករថៃកើនឡើងខ្ពស់ ។ បើគណបក្សភូមិចៃថៃជាប់ឆ្នោតបង្កើតរដ្ឋាភិបាលបន្តទៀត លោកនឹងអនុវត្តគោលនយោបាយ (Co-pay) ជាគោលនយោបាយដែលរដ្ឋាភិបាល និងពលរដ្ឋ រួមគ្នាទូទាត់ថ្លៃទំនិញដើម្បីជំរុញសេដ្ឋកិច្ច ព្រមទាំងចែកប្រាក់ឱ្យពលរដ្ឋក្នុងម្នាក់ ចំនួន១ម៉ឺនបាត (ប្រមាណ ៣២២ដុល្លារ) សម្រាប់ឱ្យពលរដ្ឋសងបំណុលធនាគារ ។

លោក Anutin បានលើកដៃសំពះពលរដ្ឋខេត្តណាខនរ៉ាជសីម៉ា សូមជួយបោះឆ្នោតគាំទ្រគណបក្សភូមិចៃថៃ ដើម្បីឱ្យលោកកាន់ឡើងជានាយករដ្ឋមន្ត្រីបន្ត និងមានឱកាសមកដឹកនាំប្រទេសធ្វើតាមសំណូមពរពលរដ្ឋ ។

គួរបញ្ជាក់ថា ក្នុងការឃោនារកសំឡេងឆ្នោតនៅខេត្តណាខនរ៉ាជសីម៉ា ក៏មានវត្តមានលោក វីរ៉ាត់ រតនៈសេត អតីតអ្នកនយោបាយថៃជើងចាស់ផងដែរ ដែលមកជួយរកសំឡេងគាំទឱ្យកូនប្រុស គឺលោក ថាវីរ៉ាត់ រតនៈសេត បេក្ខភាពតំណាងរាស្ត្រ មណ្ឌល៥ ។ លោកថា គណបក្សផ្សេងព្យាយាមរកសំឡេងឆ្នោតតាមរយៈគោលនយោបាយសម្របសម្រួលជាមួយកម្ពុជា ប៉ុន្តែលោក Anutin សន្យាចាត់វិធានការម៉ឺងម៉ាត់រឿងព្រំដែនជាមួយកម្ពុជា ។

លោក Anutin បានបើកដៃឱ្យកងទ័ពធ្វើសង្គ្រាមឈ្លានពានកម្ពុជាជាថ្មីកាលពីខែធ្នូ ឆ្នាំ២០២៥ ដើម្បីស្តារប្រជាប្រិយភាពឡើងវិញ បន្ទាប់ពីរងការរិះគន់ពីពលរដ្ឋយ៉ាងខ្លាំងពីអសមត្ថភាពដោះស្រាយបញ្ហាទឹកជំនន់នៅភាគខាងត្បូងបណ្តោយឱ្យពលរដ្ឋស្លាប់រហូតដល់ជាង១,០០០នាក់ ព្រមទាំងរងការរិះគន់ពីទំនាក់ទំនងដ៏ជិតស្និទ្ធរវាងលោកជាមួយឧក្រិដ្ឋជនឆបោកអនឡាញលំដាប់ពិភពលោក ។

បន្ទាប់ពីបទឈប់បាញ់រវាងកម្ពុជា-ថៃចូលជាធរមានកាលពីថ្ងៃទី២៧ ខែធ្នូ ឆ្នាំ២០២៥ កងទ័ពថៃនៅតែបន្តតម្រៀបទូរកុងទឺន័រ និងរាយបន្លាលួសព័ទ្ធយកទឹកដីកម្ពុជានៅព្រំដែនដោយខុសច្បាប់ ។ កម្ពុជាទាមទារឱ្យថៃបញ្ឈប់ជាបន្ទាន់នូវរាល់សកម្មភាពកងទ័ពប្រកបដោយអរិភាពនៅតាមបណ្តោយព្រំដែនកម្ពុជា-ថៃ និងនៅក្នុងទឹកដីរបស់កម្ពុជា ដោយដកកងទ័ព និងសម្ភារៈកងទ័ពទាំងអស់ចេញពីទឹកដីកម្ពុជាទៅកាន់ទីតាំងព្រំប្រទល់ដែលទទួលស្គាល់ដោយច្បាប់ ៕

ប្រទេសចិន ៖ ចិនបានប្រកាសកាលពីថ្ងៃទី២១ ខែមករា ឆ្នាំ២០២៦ អំពីគោលជំហរការពារគោលការណ៍អង្គការសហប្រជាជាតិ (UN) និងបដិសេធការអញ្ជើញរបស់ប្រធានាធិបតីអាមេរិក លោក Donald Trump ឱ្យចូលរួមជាសមាជិកក្រុមប្រឹក្សាសន្តិភាព (Board of Peace) ។ គោលជំហររបស់ចិនស្របគ្នាជាមួយន័រវេស ខណៈប្រធានាធិបតីអាមេរិកចាត់ទុកក្រុមប្រឹក្សានេះនឹងអាចជំនួសអង្គការសហប្រជាជាតិ ដែលលោកបានរិះគ.ន់ថា បរាជ័យក្នុងការដោះស្រាយជម្លោះនានា ។

ចិនបានទទួលលិខិតអញ្ជើញរបស់លោកប្រធានាធិបតី Trump ឱ្យចូលរួមជាសមាជិកក្រុមប្រឹក្សាសន្តិភាព ដែលមានគោលដៅដោះស្រាយជម្លោះផ្សេងៗនៅទូទាំងពិភពលោក ហើយរហូតមកដល់ពេលនេះ ចិនមិនទាន់ឆ្លើយតបជាផ្លូវការនឹងចូលរួមឬក៏អត់ទេ ។

ប៉ុន្តែបើតាមការលើកឡើងរបស់អ្នកនាំពាក្យក្រសួងការបរទេសចិន លោក Guo Jiakun កាលពីថ្ងៃទី២១ ខែមករា រដ្ឋាភិបាលចិននឹងគាំទ្រសណ្តាប់ធ្នាប់ពិភពលោកដែលមានអង្គការសហប្រជាជាតិជាគោល និងមិនគិតពីការផ្លាស់ប្តូរណាមួយឡើយ ។ ទោះជាស្ថានការណ៍អន្តរជាតិផ្លាស់ប្តូរ ក៏ចិននៅតែប្រកាន់ខ្ជាប់នូវប្រព័ន្ធអន្តរជាតិតែមួយ និងទំនាក់ទំនងអន្តរជាតិផ្អែកលើគោលការណ៍អង្គការសហប្រជាជាតិ ។ សេដ្ឋកិច្ចចិនរីកចម្រើនលំដាប់ទី២លើពិភពលោក និងជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ដូច្នេះ ចិនប្រកាន់ជំហរការពារអង្គការនេះ ។

ដូចគ្នានេះ រដ្ឋាភិបាលន័រវេសបានប្រកាសកាលពីថ្ងៃទី២១ ខែមករា មិនចូលរួមជាសមាជិកក្រុមប្រឹក្សាសន្តិភាពដែលបង្កើតឡើងដោយលោកប្រធានាធិបតី Trump ទេ ប៉ុន្តែន័រវេសនឹងសហការជិតស្និទ្ធជាមួយអាមេរិកបន្តទៀត ខណៈលោកប្រធានាធិបតី Trump ធ្លាប់បង្ហាញការខកចិត្តចំពោះន័រវេស ដែលមិនផ្តល់ពានរង្វាន់ណូបែលសន្តិភាព ។

គោលបំណងដំបូងនៃការបង្កើតក្រុមប្រឹក្សាសន្តិភាព គឺលោកប្រធានាធិបតី Trump បានកំណត់ការស្តារសន្តិភាពនៅតំបន់កាហ្សា ប៉ុន្តែខ្លឹមសារលិខិតអញ្ជើញដែលផ្ញើទៅមេដឹកនាំប្រទេសនានា បានបញ្ជាក់ពីគោលដៅដោះស្រាយជម្លោះផ្សេងៗនៅទូទាំងពិភពលោក មិនមែនផ្តោតតែលើជម្លោះនៅតំបន់កាហ្សាទេ ។ អាមេរិកកំណត់ឱ្យប្រទេសនានាបង់ប្រាក់ ចំនួន១ពាន់លានដុល្លារ សម្រាប់ការចូលជាសមាជិកអចិន្ត្រៃយ៍នៃក្រុមប្រឹក្សានេះ ដែលមានលោកប្រធានាធិបតី Trump ជាប្រធាន ។

គួរបញ្ជាក់ថា ក្រុមប្រឹក្សាសន្តិភាព គឺជាស្ថាប័នអន្តរជាតិមួយមានគោលបំណងស្តារស្ថិរភាព អភិបាលកិច្ច និងសន្តិភាពយូរអង្វែងក្នុងតំបន់ងាយរងគ្រោះដោយសារជម្លោះ ហើយ ប្រទេសជាសមាជិកនឹងមានអាណត្តិរយៈពេល៣ឆ្នាំ ប៉ុន្តែសម្រាប់ប្រទេសដែលចូលរួមបង់ប្រាក់នឹងក្លាយជាសមាជិកអចិន្ត្រៃយ៍ ។ អារ៉ាប់រួម (UAE) ម៉ារ៉ុក វៀតណាម និងហុងគ្រី បានយល់ព្រមចូលរួមក្រុមប្រឹក្សានេះ ខណៈរុស្ស៊ី ថៃ និងប្រទេសមួយចំនួនទៀតកំពុងពិចារណា ។ រីឯកម្ពុជាត្រូវបានលោកប្រធានាធិបតី Trump អញ្ជើញឱ្យចូលរួមជារដ្ឋសមាជិកស្ថាបនិកនៃក្រុមប្រឹក្សាសន្តិភាព និងជាភាគីនៃធម្មនុញ្ញរបស់ក្រុមប្រឹក្សាសន្តិភាព ៕

សហរដ្ឋអាមេរិក ៖ កាលពីថ្ងៃទី២១ ខែមករា ឆ្នាំ២០២៦ ប្រធានាធិបតីអាមេរិក លោក Donald Trump បាននិយាយលើវេទិកាកិច្ចប្រជុំសេដ្ឋកិច្ចពិភពលោក (World Economic Forum) នៅទីក្រុង Davos ប្រទេសស្វីស ថា អាមេរិកមិនពាក់ព័ន្ធនឹងសង្គ្រា.មនៅអ៊ុយក្រែនទេ វាជាតួនាទីរបស់សហគមន៍អឺរ៉ុបដែលត្រូវរកវិធីបញ្ចប់សង្គ្រា.មរវាងអ៊ុយក្រែន និងរុស្ស៊ី ។ គោលជំហររបស់លោកត្រូវបានប្រទេសនានាចាត់ទុកថា ព្រងើយកន្តើយចំពោះសង្គ្រា.មនេះដែលអូសបន្លាយរយៈពេលជាច្រើនឆ្នាំ និងជាគោលជំហរផ្ទុយពីប្រធានាធិបតីអាមេរិកអាណត្តិមុន ។

ពេលថ្លែងសុន្ទរកថាលើវេទិកាកិច្ចប្រជុំសេដ្ឋកិច្ចពិភពលោក (World Economic Forum) នៅទីក្រុង Davos ប្រទេសស្វីស លោកប្រធានាធិបតី Trump បានលើកឡើងពីសង្គ្រាមរវាងអ៊ុយក្រែន និងរុស្ស៊ី ព្រមទាំងចោទប្រកាន់ពីទង្វើរបស់អង្គការ NATO ចំពោះអាមេរិក មិនយុត្តិធម៌យ៉ាងខ្លាំង ។ លោកថា សង្គ្រាមរវាងអ៊ុយក្រែន-រុស្ស៊ីនឹងមិនកើតឡើងទេ ប្រសិនបើពេលនោះ លោកកាន់តំណែងជាប្រធានាធិបតីអាមេរិក ការបោះឆ្នោតនៅអាមេរិកកាលពីឆ្នាំ២០២០ គ្មានភាពយុត្តិធម៌ ។

លោកប្រធានាធិបតី Trump បានសួរថា តើអាមេរិកទទួលបានអ្វីមកវិញពីការព្យាយាមបញ្ចប់សង្គ្រាមនៅអ៊ុយក្រែន ក្រៅពីធ្វើឱ្យមនុស្សស្លាប់ ការបំផ្លិចបំផ្លាញ និងត្រូវចំណាយប្រាក់យ៉ាងច្រើនសន្ធឹកសន្ធាប់ទៅឱ្យអ៊ុយក្រែនដែលមើលមិនឃើញតម្លៃរបស់អាមេរិក ។ លោកជំរុញឱ្យសហគមន៍អឺរ៉ុប និងអង្គការ NATO រកវិធីបញ្ចប់សង្គ្រាមនៅអ៊ុយក្រែន ពីព្រោះមិនមែនជាតួនាទីរបស់អាមេរិក អាមេរិកមិនពាក់ព័ន្ធទេ ។

គួរបញ្ជាក់ថា មុនពេលឡើងកាន់តំណែងជាប្រធានាធិបតីអាមេរិកអាណត្តិទី២ លោកប្រធានាធិបតី Trump ប្រកាសថា ចំណាយពេលត្រឹមតែ១ថ្ងៃប៉ុណ្ណោះក្នុងការបញ្ចប់សង្គ្រាមរវាងអ៊ុយក្រែន និងរុស្ស៊ី ប៉ុន្តែរហូតមកដល់ពេលនេះ សង្គ្រាមនៅតែបន្ត បើទោះជាលោកព្យាយាមប្រើប្រាស់គ្រប់វិធីសាស្ត្រដើម្បីឱ្យប្រធានាធិបតីរុស្ស៊ី លោក Vladimir Putin យល់ព្រមចរចាក្តី ។

ប្រធានាធិបតីអ៊ុយក្រែន លោក Volodymyr Zelenskyy ជំរុញឱ្យអាមេរិកដាក់សម្ពាធលើលោក Putin បន្ទាប់ពីរុស្ស៊ីវាយប្រហារតាមផ្លូវអាកាសលើកចុងក្រោយលើអ៊ុយក្រែនធ្វើឱ្យដាច់ចរន្តអគ្គិសនី ។ លោកថា អាមេរិកមិនទាន់មានកម្លាំងគ្រប់គ្រាន់ដើម្បីបញ្ឈប់រុស្ស៊ីនៅឡើយទេ រដ្ឋាភិបាលរបស់លោកប្រធានាធិបតី Trump អាចដាក់សម្ពាធលើប្រធានាធិបតីរុស្ស៊ី ប្រសិនបើអាមេរិកចង់ធ្វើ ។

ប្រធានាធិបតីអ៊ុយក្រែនបានត្រៀមខ្លួនរួចជាស្រេចដើម្បីធ្វើដំណើរទៅទីក្រុង Davos ជាកន្លែងមេដឹកនាំពិភពលោកជួបជុំគ្នាក្នុងកិច្ចប្រជុំសេដ្ឋកិច្ចពិភពលោក ប្រសិនបើអាមេរិកតម្រូវឱ្យចុះហត្ថលេខាលើឯកសារធានាសន្តិសុខសម្រាប់អ៊ុយក្រែន និងផែនការក្រោយសង្គ្រាម ៕