ក្រុមហ៊ុនអេឡិចត្រូនិកជប៉ុន Meiko គ្រោងនឹងសាងសង់រោងចក្រ ផលិតបន្ទះសៀគ្វី នៅភាគខាងជើងខេត្ត Hoa Binh ដោយចំណាយទុនវិនិយោគ២០០លានដុល្លារអាមេរិក។

ក្រុមហ៊ុន Meiko គ្រោងនឹងជួលដីទំហំ ៩.២​ហិកតា  សម្រាប់រោងចក្រទី៤ របស់ខ្លួននៅក្នុងប្រទេសវៀតណាម។បច្ចុប្បន្ននេះ Meiko មានរោងចក្របន្ទះសៀគ្វីបោះពុម្ពចំនួន ៣ នៅក្នុងប្រទេសវៀតណាម ដែលមានតម្លៃ ៥០០លានដុល្លារ និងផ្តល់ការងារដល់មនុស្ស ៧,០០០នាក់។

សូមរំលឹងផងដែរថា ក្រុមហ៊ុននេះបាន​វិនិយោគ​ដំបូង​នៅ​ប្រទេស​វៀតណាម​ក្នុង​ឆ្នាំ២០០៦ ដោយ​បាន​សាងសង់​រោងចក្រ​នៅ​ជាយក្រុង​ Thach That ក្នុង​ទីក្រុង​ហាណូយ។

ក្រៅតែពីមានរោងចក្រនៅប្រទេសវៀតណាម ក្រុមហ៊ុនអេឡិចត្រូនិក ដ៏ឈានមុខគេមួយរបស់ប្រទេសជប៉ុននេះ ក៏មានរោងចក្រចំនួនប្រាំនៅក្នុងប្រទេសកំណើតរបស់ខ្លួន និងពីរនៅក្នុងប្រទេសចិនផងដែរ៕

ប្រភព៖ VN express

ប្រទេសថៃ៖ ដំណឹងល្អសម្រាប់ភ្ញៀវទេសចរ ដែលមានគម្រោងធ្វើដំណើរទៅក្រៅប្រទេស ក្រុមហ៊ុន អ៊ែរ អាស៊ី បានធ្វើការប្រូម៉ូសិនសំបុត្រយន្តហោះដោយឥតគិតថ្លៃ ទាំងជើងហោះហើរក្នុងប្រទេស និងក្រៅប្រទេស ដោយមានកៅទំនេរជាង ៨ ម៉ឺនកៅអី គឺចាប់ពីការផ្សព្វផ្សាយនេះតទៅ។

ដែលក្រុមហ៊ុនបើកឱ្យកក់ចាប់ពីថ្ងៃទី ១២ ខែមិថុនា ឆ្នាំ ២០២៣ រហូតដល់ថ្ងៃទី ១៨ ខែមិថុនា ឆ្នាំ ២០២៣ សម្រាប់តែជើងហោះហើរ FD ហើយអាចធ្វើដំណើរបានក្នុងអំឡុងថ្ងៃទី ១ ខែកញ្ញា ឆ្នាំ ២០២៣ ដល់ថ្ងៃទី ៨ ខែតុលា ឆ្នាំ ២០២៤។
តម្លៃសំបុត្ររបស់ Air Asia មិនរាប់បញ្ចូលពន្ធព្រលានយន្តហោះទេ។ ពន្ធប្រេងឥន្ធនៈ សេវាបន្ថែម និងថ្លៃសេវាផ្សេងៗទៀត តម្លៃប្រូម៉ូសិនចាប់ផ្តើមពី ០ បាត មួយជើងអាចកក់បានតាមរយៈ airasia.com និង airasia superapp តែប៉ុណ្ណោះ យោងទៅតាមលក្ខខណ្ឌរបស់ក្រុមហ៊ុន។

គួរបញ្ជាក់ដែរថា តម្លៃមួយជើងចាប់ផ្តើមពី ០ បាតសម្រាប់តែជើងហោះហើរត្រង់ពីបាងកក ទៅ ឈៀងម៉ៃ ឈៀងរ៉ៃ ភីតសានូឡុក អ៊ូប៊ុន រ៉ាត់ថានី អ៊ូដនថានី ខនខេន បុរីរ៉ាម ស៊ូរ៉ាត់ថានី ភូកេត ញ៉ាត្រាង ហូជីមិញ សៀមរាប ភ្នំពេញ យ៉ាំងហ្គោន ឆុងឈីង ម៉ាកាវ និងឆាងសា សម្រាប់តែប្រទេសវៀតណាម កម្ពុជា មីយ៉ាន់ម៉ា និងចិនតែប៉ុណ្ណោះ។

របៀបកក់សំបុត្រប្រូម៉ូសិនដោយឥតគិតថ្លៃពី អ៊ែរ អាស៊ី (Air Asia)
• ការកក់ទុកអាចធ្វើឡើងចាប់ពីថ្ងៃទី ១២ ខែមិថុនា ឆ្នាំ ២០២៣ វេលាម៉ោង ៩:០០ ព្រឹក ដល់ថ្ងៃទី ១៨ ខែមិថុនា ឆ្នាំ ២០២៣ វេលាម៉ោង ១១:០០ យប់។
• Pro Route ០ បាត អ្នកដំណើរបង់តែសម្រាប់ពន្ធប៉ុណ្ណោះ។
• កាលបរិច្ឆេទធ្វើដំណើរចាប់ពីថ្ងៃទី ១ ខែកញ្ញា ឆ្នាំ ២០២៣ ដល់ថ្ងៃទី ៨ ខែតុលា ឆ្នាំ ២០២៤៕ ប្រភព៖sanook

ជាទូទៅ យើងដឹងហើយថារដូវវស្សា ជារដូវភ្លៀងធ្លាក់ ក្នុងស្ថានភាពខ្លះ ក៏មានព្យុះ និងទឹកជំនន់ផងដែរ ដូច្នេះវាមិនសូវមានអំណោយផលក្នុងការធ្វើដំណើរកំសាន្តនោះទេ។ ប៉ុន្តែបើអ្នកពិតជាមានចំណូលចិត្តចង់ដើរលេងក្នុងរដូវវស្សារមែន អ្នកគួរតែអនុវត្តគន្លឹះទាំងនេះដើម្បីជួយដល់ការធ្វើដំណើរកម្សាន្តរបស់អ្នកកាន់តែល្អប្រសើរ ដែលគន្លឹះទាំង ៥ នោះមានដូចជា៖

១.ការជ្រើសរើសទីតាំង៖ នៅក្នុងរដូវវស្សាបែបនេះ យើងនៅតែមានសិទ្ធិជ្រើសរើសកន្លែងដែលយើងចង់ធ្វើដំណើរដូចជា ទៅវាលស្មៅ ឡើងភ្នំ ដើរចូលព្រៃ ទៅសមុទ្រ ទៅទឹកជ្រោះ ឬទៅក្រៅប្រទេសជាដើម។ ប៉ុន្តែទោះជាយ៉ាងណាក៏ដោយ អ្នកត្រូវជ្រើសរើសទីតាំងមួយដែលស្ថិតនៅជិតហាងកាហ្វេ ភោជនីយដ្ឋាន ឬនៅជិតតំបន់ទីប្រជុំជន ជៀសវាងការដើរព្រៃឆ្ងាយ ឬដាច់ស្រយាល ព្រោះរដូវធ្លាក់ភ្លៀងអាចនាំឱ្យអ្នកមានគ្រោះថ្នាក់បាន។

២.ការមើលឧតុនិយម៖ បើអ្នកពិតជាមានបំណងចង់ដើរកំសាន្តក្នុងរដូវវស្សានេះមែន អ្នកគួរតែតាមដានឧតុនិយមឱ្យបានដិតដល់ ព្រោះវាក៏អាចជួយដល់ការធ្វើដំណើរបស់អ្នកប្រកបដោយសុវត្ថិភាព។

៣.ពិនិត្យស្ថានភាពរថយន្ត៖ វាជារឿងសំខាន់ណាស់ ដែលអ្នកចាំបាច់ត្រូវតែពិនិត្យមើលស្ថានភាពរថយន្តគ្រប់ផ្នែកទាំងអស់មុនពេលធ្វើដំណើរ ជៀសវាងហានិភ័យនៃការអស់សាំង ខូចសំបកកង់ឡានជាដើម…។

៤.ត្រូវចេះបត់បែន៖ ក្រៅពីត្រូវប្រុងប្រយ័ត្ន អ្នកក៏គួរយកចិត្តទុកដាក់ជាពិសេសលើការបត់បែន ព្រោះអាកាសធាតុអាចប្រែប្រួលយ៉ាងលឿនដែលយើងមិនអាចកំណត់បាន ដូច្នេះបើអ្នកមើលទៅស្ថានភាពហាក់ដូចជាមានគ្រោះថ្នាក់ សូមត្រឡប់មកផ្ទះវិញភ្លាមៗមក។

៥ .ឥវ៉ាន់ដែលត្រូវយក៖ សម្ភារៈដែលមិនអាចខ្វះបានក្នុងរដូវវស្សាមានដូចជា តង់, ឆ័ត្រ, អាវភ្លៀង, មួក, កាបូបដែលមិនជ្រាបទឹក, ជ្រើសរើសសំលៀកបំពាក់ និងស្បែកជើងដែលស្រួលពាក់, ភ្លើងពិល, ទូរស័ព្ទ, Power Bank, ថង់ផ្លាស្ទិក សំខាន់កុំភ្លេចថ្នាំក្នុងផ្ទះទូទៅដូចជា ថ្នាំសំលាប់សត្វល្អិត ថ្នាំផ្ទាល់ខ្លួន និងឧបករណ៍សង្គ្រោះបឋម ត្រូវតែរៀបចំ…៕ ប្រភព៖sanook

ប្រទេសឡាវ ៖ បច្ចុប្បន្ន វិស័យទេសចរណ៍របស់ប្រទេសឡាវបានងើបឡើងវិញជាបណ្តើរៗ ហើយរដ្ឋាភិបាលឡាវសង្ឃឹមថា ការត្រឡប់មកវិញរបស់ភ្ញៀវទេសចរចិន នឹងជាកម្លាំងជំរុញសំខាន់សម្រាប់ប្រទេសផ្សេងៗនៅតំបន់អាស៊ាន ដែលពឹងផ្អែកលើវិស័យទេសចរណ៍ជាចម្បង ។ ចំណែកប្រទេសឡាវនឹងបង្កលក្ខណៈងាយស្រួលក្នុងផ្នែកទេសចរណ៍ដើម្បីទាក់ទាញភ្ញៀវទេសចរចិន ។

ក្នុងរយៈពេល៣ខែដំបូងនៃឆ្នាំ២០២៣ ប្រទេសឡាវបានទទួលភ្ញៀវទេសចរអន្តរជាតិចំនួន៨៣១.០០០នាក់ និងខុសគ្នាពីរយៈពេល៦ឆ្នាំនៃឆ្នាំ២០២២ ដែលឡាវមានភ្ញៀវទេសចរបរទេសត្រឹមតែ២១១.៨៩៨នាក់ប៉ុណ្ណោះ ។ បើតាមស្ថិតិរបស់ក្រសួងព័ត៌មាន វប្បធម៌ និងទេសចរណ៍បង្ហាញថា មានភ្ញៀវទេសចរបរទេសធ្វើដំណើរមកប្រទេសឡាវ ក្នុងនោះ ភ្ញៀវទេសចរថៃ ចំនួន៣៤៤.៤០៥នាក់, ភ្ញៀវទេសចរវៀតណាម ចំនួន១៨០.០០០នាក់, ភ្ញៀវទេសចរចិន ចំនួន១៤៣.៣១២នាក់ និងភ្ញៀវទេសចរកូរ៉េខាងត្បូង ចំនួន៤៥.៧៥៦នាក់ ។

ជាមួយគ្នានេះ រដ្ឋាភិបាល និងផ្នែកឯកជនរបស់ឡាវបានត្រៀមខ្លួនទទួលភ្ញៀវទេសចរជាច្រើននាក់មកពីចិន ក្រោយពីចិនអនុញ្ញាតឱ្យក្រុមហ៊ុនទេសចរណ៍អាចមកកម្សាន្តនៅប្រទេសឡាវ ។ មន្ត្រីជាន់ខ្ពស់នៃក្រសួងព័ត៌មាន វប្បធម៌ និងទេសចរណ៍ឡាវថ្លែងថា ទីផ្សារទេសចរណ៍របស់ចិន ត្រូវបានចាត់ទុកជាប្រភពចំណូលដ៏សំខាន់របស់ប្រទេសឡាវ ហើយរថភ្លើងតភ្ជាប់ប្រទេសចិន និងឡាវ បានបង្កលក្ខណៈងាយស្រួល និងឆាប់រហ័សសម្រាប់ការធ្វើដំណើររវាងប្រទេសទាំងពីរផងដែរ ។ លើសពី មានការបើកជើងហោះហើរចេញពីទីក្រុងវៀងចន្ទន៍ទៅកាន់ទីក្រុងផ្សេងៗរបស់ចិន គឺវានឹងជួយគាំទ្រវិស័យទេសចរណ៍ឡាវបន្តទៀត ។

រថភ្លើងតភ្ជាប់ប្រទេសចិន និងឡាវបានផ្តល់សេវាកម្មសម្រាប់ការដើរកម្សាន្តឆ្លងប្រទេសចំនួន១៣.៣១០ជើង បើគិតចាប់ពីផ្លូវរថភ្លើងនេះផ្តល់សេវាកម្មធ្វើដំណើរដល់អ្នកដំណើរទូទៅ ។ នៅឆ្នាំ២០២៣ មន្ត្រីឡាវរំពឹងថា នឹងមានភ្ញៀវទេសចរចិនចំនួន៣៦៨.០០០នាក់ធ្វើដំណើរមកកាន់ប្រទេសឡាវ កើនឡើង២១% បើធៀបនឹងឆ្នាំ២០២២ ។ ដូច្នេះ ប្រទេសឡាវកំពុងត្រៀមបង្កលក្ខណៈងាយស្រួល និងផ្តល់សេវាកម្មផ្សេងៗ រួមទាំងកែលម្អផលិតផលទេសចរណ៍ និងអភិវឌ្ឍន៍ឧស្សាហកម្មទេសចរណ៍ឱ្យទំនើបផងដែរដើម្បីទាក់ទាញភ្ញៀវទេសចរចិន ៕ ប្រភព ៖ AEC Connect

ប្រទេសចិន ៖ គម្រោងសាងសង់ស្ពានឆ្លងសមុទ្រតភ្ជាប់ទីក្រុង Shenzhen និងទីក្រុង Zhongshan ខេត្តក្វាងទុង នឹងសាងសង់រួចរាល់នៅខែវិច្ឆិកា ឆ្នាំ២០២៣ ។ ស្ពានឆ្លងសមុទ្រនេះនឹងបើកឱ្យប្រើប្រាស់នៅឆ្នាំ២០២៤ ហើយការធ្វើដំណើររវាងទីក្រុងទាំងពីរនឹងចំណាយពេលត្រឹមតែ៣០នាទីប៉ុណ្ណោះ ។ គម្រោងនេះ ក៏មានការកសាងផ្លូវរូងក្រោមទឹកមានប្រវែង៦,៨០គីឡូម៉ែត្រផងដែរ ។ប្រធានផ្នែកបច្ចេកវិទ្យាវិស្វកម្មលើកឡើងថា ស្ថិតនៅក្រោមគម្រោងនេះ គេបានកសាងកោះមួយនៅភាគខាងលិច ដែលមានទំហំស្មើនឹងទីលានប្រកួតបាល់ទាត់ចំនួន១៩ទីលាន ហើយកោះនេះគឺជាផ្នែកសំខាន់សម្រាប់តភ្ជាប់ស្ពាន និងផ្លូវក្រោមទឹក ។

គម្រោងនេះនឹងជំរុញនូវហេដ្ឋារចនាសម្ព័ន្ធរបស់តំបន់សេដ្ឋកិច្ចខេត្តក្វាងទុង ហុងកុង និងម៉ាកាវ ។ អ្នកគ្រប់គ្រងគម្រោងនេះលើកឡើងថា ស្ពាននេះអាចឱ្យរថយន្តបើកឆ្លងកាត់ប្រមាណ១សែនគ្រឿងក្នុង១ថ្ងៃ ក្នុងនោះមានរថយន្តដឹកទំនិញ៤០% ។ ហេតុនេះ វានឹងជួយអភិវឌ្ឍន៍សេដ្ឋកិច្ចប្រទេសចិនយ៉ាងខ្លាំង ។

ប្រទេសចិនមានគម្រោងអភិវឌ្ឍន៍តំបន់សេដ្ឋកិច្ចខេត្តក្វាងទុង ហុងកុង និងម៉ាកាវ ឱ្យក្លាយជាតំបន់ឈូងសមុទ្រលំដាប់ពិភពលោក ព្រមទាំងក្លាយជាទីក្រុងអន្តរជាតិឈានមុខគេដើម្បីជំរុញសេដ្ឋកិច្ចចិន ៕ ប្រភព ៖ China Face

បរទេស៖ ប្រធានក្រុមអាហ្សង់ទីនចាត់ទុកការប្រកួតបាល់ទាត់ពិភពលោក World Cup ២០២២ ជាសមាជពិភពលោកចុងក្រោយក្នុងអាជីពរបស់គាត់។

យោងតាមប្រភពព័ត៌មាន Titan Sports កាលពីថ្ងៃទី១៣ ខែមិថុនា បានឱ្យដឹងថា កំពូលតារាបាល់ទាត់ពិភពលោក Leo Messi បានប្រាប់សារព័ត៌មានរបស់ប្រទេសចិនមួយថា ខ្លួននឹងមិនចូលរួមប្រកួតបាល់ទាត់ពិភពលោក World Cup ២០២៦ ទៀតទេ ព្រោះដោយសារការព្រួយបារម្ភអំពីអាយុរបស់គាត់ និងទម្រង់លេងដែលអាចធ្វើឱ្យប៉ះពាល់យ៉ាងធ្ងន់ធ្ងរដល់ក្រុម។

កាលពីខែវិច្ឆិកាកន្លងទៅក្នុងប្រទេសកាតា Messi បានចូលរួមចំណែកចំនួន ៧ គ្រាប់ និង assists ៣ ដង នាំក្រុមឡើងទៅកាន់ជើងឯក ហើយក៏បានឈ្នះពានរង្វាន់កីឡាករល្អបំផុតប្រចាំការប្រកួតផងដែរ។ ដោយបច្ចុប្បន្ន Messi គឺជាម្ចាស់កំណត់ត្រាឈ្នះបាល់មាសចំនួនប្រាំពីរ នៅឆ្នាំនេះ។ ទោះជាយ៉ាងណាក៏ដោយខ្សែប្រយុទ្ធវ័យ ៣៥ ឆ្នាំរូបនេះ បាននិយាយថា ពានឯកត្តជនមិនសំខាន់ដូចពានរួមនោះទេ ហើយពានដែលសំខាន់បំផុតគឺពាន World Cup ២០២២ ព្រោះវាជាពានដ៏មានតម្លៃសម្រាប់ខ្ញុំ និងជាពានចុងក្រោយរបស់ខ្ញុំផងដែរ។
គួរបញ្ជាក់ដែរថា ការប្រកួតបាល់ទាត់ពិភពលោក World Cup ២០២៦ នឹងប្រព្រឹត្តទៅនៅសហរដ្ឋអាមេរិក ម៉ិកស៊ិក និងកាណាដា ដែលទៅដល់ពេលនោះ Messi មានអាយុ ៣៨ ឆ្នាំហើយ៕ ប្រភព៖vnexpress