រដ្ឋធានីកៀវ៖ ក្រោយពេលមានសេចក្ដីរាយការណ៍ អំពីការវាយប្រហារដ៏ខ្លាំងក្លា អំពីកម្លាំងទាហានរបស់ក្រុងមូស្គូ ទៅលើទីក្រុងគ្រីវយីរី (Kryvyi Rih) ដោយបានសម្លាប់មនុស្សយ៉ាងតិច ចំនួន១១នាក់ និង រងរបួស ២៨នាក់នោះមក កងទ័ពការពារទឹកដីរបស់អ៊ុយក្រែន ក៏បានបាញ់ផ្លោង តបតទៅវិញ ធ្លាក់ចូលទៅលើទឹកដីរបស់រុស្ស៊ី បណ្ដាលឲ្យផ្ទះសម្បែងជាច្រើនខ្នង រងការខូចខាត និង រំខានដល់ការផ្គត់ផ្គង់ថាមពល និង ហ្គាស ផងដែរ។

សារព័ត៌មាន Al Jazeera បានចេញផ្សាយ កាលពីរាត្រី ថ្ងៃអង្គារ ទី១៣ ខែមិថុនា ថា ក្រុមមន្រ្ដីក្រុងកៀវ បានអះអាង ថា កងទ័ពរបស់ក្រុងមូស្គូ កាលពីរំលងអធ្រាត្រ ឈានចូលថ្ងៃអង្គារ បានវាយប្រហារដ៏ខ្លាំងក្លា មកលើទីក្រុងគ្រីវយីរី ស្ថិតនៅភាគកណ្ដាលរបស់ប្រទេសអ៊ុយក្រែន ដោយបានសម្លាប់មនុស្ស យ៉ាងតិចចំនួន១១នាក់ និង មនុស្សចំនួន២៨នាក់ផ្សេងទៀត បានរងរបួស។

អាជ្ញាធរយោធាអ៊ុយក្រែន បានបញ្ជាក់ ថា ប្រព័ន្ធការពារដែនអាកាសរបស់ក្រុងកៀវ កាលពីព្រឹកព្រលឹម ថ្ងៃអង្គារ បានធ្វើសកម្មភាព ទប់ស្កាត់នូវការវាយប្រហារតាមអាកាសរបស់រុស្ស៊ី មកលើតំបន់រដ្ឋធានីកៀវ។

ស្របគ្នានេះដែរ លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានថ្លែង ថា «ខ្ញុំសូមអរគុណដល់កងទ័ពរបស់យើង សម្រាប់ការនាំទង់ជាតិរបស់អ៊ុយក្រែន វិលត្រឡប់ទៅកាន់ភូមិឋាននានា ទើបនឹងរំដោះបាន ខណៈកងកម្លាំងរបស់ក្រុងកៀវ បានអះអាង អំពីការវាយដណ្តើមបានភូមិចំនួន៧ នៅក្នុងការវាយបក ប្រឆាំងនឹងកម្លាំងទាហានរបស់រុស្ស៊ី។

ដោយឡែក លោក រ៉ូម៉ាន់ ស្ដារ៉ូវ៉ូយ (Roman Starovoyt) អភិបាលតំបន់ឃើសខ៍ (Kursk) បានអះអាង ថា កងទ័ពរបស់ក្រុងកៀវ បានបាញ់ផ្លោង ដាក់មកលើភូមិជាច្រើន ហើយបានធ្វើឲ្យខូចខាតដល់ផ្ទះសម្បែងជាច្រើនខ្នង នៅក្នុងទីក្រុងឃើសខ៍ ប្រទេសរុស្ស៊ី ស្ថិតនៅជាប់ព្រំដែនជាមួយនឹងប្រទេសអ៊ុយក្រែន។ សកម្មភាពបែបនេះ បានរំខានដល់ការផ្គត់ផ្គង់ហ្គាស និង អគ្គិសនី នៅក្នុងភូមិទាំងនោះ។

ស្របពេលការវាយបករបស់កងទ័ពអ៊ុយក្រែន កំពុងតែចាប់ផ្ដើមដំណើរការ ប្រឆាំងនឹងទាហានរុស្ស៊ី នោះ ទីភ្នាក់ងារសារព័ត៌មាន គ្រប់គ្រងដោយរដ្ឋរុស្ស៊ី RIA Novosti បានរាយការណ៍ ថា លោកប្រធានាធិបតី វ៉្លាឌីមៀ ពូទីន (Vladimir Putin) បានបញ្ជាក់ ថា ក្រុងមូស្គូ កំពុងតែលុបចោលនូវកិច្ចព្រមព្រៀង លើកិច្ចសហប្រតិបត្តិការជាមួយនឹងអ៊ុយក្រែន ស្តីអំពីការប្រើប្រាស់សមុទ្រអាហ្សូវ (Azov) និង ច្រកសមុទ្រឃើច (Kerch)។ កិច្ចព្រមព្រៀងនោះ បានចុះហត្ថលេខា នៅក្នុងឆ្នាំ២០០៤ រវាងក្រុងកៀវ និង ក្រុងមូស្គូ ហើយបានព្យាយាមធានាឱ្យភាគីទាំងពីរ ទទួលបានកិច្ចសហការគ្នា លើការប្រើប្រាស់សមុទ្រអាហ្សូវ និង ច្រកសមុទ្រឃើច (Kerch) ដោយគ្មានជម្លោះណាមួយនោះឡើយ៕

ប្រទេសជប៉ុន ៖ អាជ្ញាធរមូលដ្ឋាន និងសមាគមទេសចរណ៍នៅប្រទេសជប៉ុនបានដាក់សំណើមួយទៅកាន់អាជ្ញាធរប្រចាំទីក្រុង Yamanashi ឱ្យចេញវិធានការគ្រប់គ្រងចំនួនភ្ញៀវទេសចរដែលមកកម្សាន្តនៅភ្នំហ្វូជិ ។ វិធានការគ្រប់គ្រងចំនួនភ្ញៀវទេសចរដែលធ្វើដំណើរមកកម្សាន្តនៅលើភ្នំក្នុងឆ្នាំ២០២៣ ដើម្បីធានាសុខសុវត្ថិភាពរបស់ភ្ញៀវទេសចរ និងសម្រួលដល់ការរកកន្លែងស្នាក់នៅឱ្យកាន់តែស្រួល ។

ការដាក់សំណើទៅកាន់អាជ្ញាធរប្រចាំទីក្រុង Yamanashi បានធ្វើឡើងកាលពីថ្ងៃទី១២ ខែមិថុនា កន្លងមក ក្រោយពីគេសង្កេតឃើញថា ចំនួនភ្ញៀវទេសចរមកកម្សាន្តនៅភ្នំហ្វូជិបានកើនឡើងជាបន្តបន្ទាប់ ចាប់តាំងពីប្រទេសជប៉ុនបានបន្ធូរបន្ថយវិធានការរឹតបន្តឹងការឆ្លងរាតត្បាតនៃជំងឺកូវីដ-១៩ ។ ប៉ុន្តែគេមិនបានបញ្ជាក់អំពីរយៈពេល ឬចំនួនភ្ញៀវទេសចរដែលអាចឡើងមកលើភ្នំហ្វូជិនៅឡើយទេ ។

នៅលើកំពូលភ្នំហ្វូជិគ្របដណ្តប់ទៅដោយព្រិលពេញមួយឆ្នាំ ហើយគេបានបើកឱ្យភ្ញៀវទេសចរឡើងមកកម្សាន្តលើភ្នំនេះ ចាប់ពីខែកក្កដា រហូតដល់ខែកញ្ញា ។ ហេតុនេះ ធ្វើឱ្យមានភ្ញៀវទេសចររាប់រយនាក់មកកម្សាន្តនៅតំបន់ព្រៃភ្នំ និងឡើងលើភ្នំហ្វូជិពេលយប់ ដើម្បីទស្សនាព្រះអាទិត្យនាពេលព្រឹក ។

ភ្ញៀវទេសចរឡើងមកលើភ្នំនេះ មិនអាចកក់បន្ទប់ស្នាក់នៅលើភ្នំបានទេ ហើយពួកគេត្រូវដើរឡើងភ្នំដោយគ្មានកន្លែងស្នាក់នៅក្នុងអំឡុងពេលធ្វើដំណើរ ។ ដូច្នេះ ភ្ញៀវទេសចរទាំងនោះអាចមានអាការៈវិលមុខ, ក្អួតចង្អោរ និងសីតុណ្ហភាពក្នុងរាងកាយធ្លាក់ចុះខុសពីធម្មតា ។ លើសពីនេះ បើមានភ្ញៀវទេសចរឡើងលើភ្នំច្រើនប៉ុនណា នឹងធ្វើឱ្យថ្មធ្លាក់ពីលើភ្នំកាន់តែច្រើន ដែលអាចធ្វើឱ្យភ្ញៀវទេសចរមានគ្រោះថ្នាក់ ៕ ប្រភព ៖ Mono News

បរទេស៖ យោងតាមការស្រាវជ្រាវដែលចេញផ្សាយដោយ British Antarctic Survey (BAS) កាលពីថ្ងៃទី១២ ខែមិថុនា បានឱ្យដឹងថា មហាសមុទ្រដ៏ជ្រៅ និងត្រជាក់បំផុត របស់អង់តាក់ទិកកំពុងឡើងកំដៅ និងរួមតូច ដែលធ្វើឱ្យមានផលវិបាកយ៉ាងខ្លាំងក្នុងការបម្រែបម្រួលអាកាសធាតុ និងប្រព័ន្ធអេកូឡូស៊ីនៃមហាសមុទ្រជ្រៅ។

មហាសមុទ្រអង់តាទិក គឺជាកន្លែងដែលមានទឹកត្រជាក់និងប្រៃបំផុតនៅលើភពផែនដី។ មហាសមុទ្រនេះដើរតួយ៉ាងសំខាន់ក្នុងការស្រូបយកកំដៅលើស និងការបំពុលកាបូន ហើយក៏ជួយចរាចរសារធាតុចិញ្ចឹមពាសពេញមហាសមុទ្រផងដែរ។ ប៉ុន្តែថ្មីៗនេះអ្នកស្រាវជ្រាវបានរកឃើញថា នៅក្នុងសមុទ្រ Weddell តាមបណ្តោយឆ្នេរសមុទ្រភាគខាងជើងនៃអង់តាក់ទិក តួទឹកដ៏សំខាន់នេះកំពុងធ្លាក់ចុះដោយសារតែការផ្លាស់ប្តូររយៈពេលវែងនៃខ្យល់ និងទឹកកកសមុទ្រ ដែលបណ្តាលឱ្យទឹកត្រជាក់ប្រែជាក្តៅ។

ក្រុមអ្នកវិទ្យាសាស្ត្របានប្រើប្រាស់ទិន្នន័យដែលប្រមូលបានដោយកប៉ាល់ និងផ្កាយរណបក្នុងរយៈពេលជាច្រើនទសវត្សរ៍ ដើម្បីវាយតម្លៃបរិមាណ សីតុណ្ហភាព និងទឹកប្រៃនៃបាតសមុទ្រអង់តាក់ទិក។ ដែលពួកគេបានរកឃើញថា បរិមាណទឹកត្រជាក់បានថយចុះជាង ២០ ភាគរយក្នុងរយៈពេល ៣ ទសវត្សរ៍កន្លងមកនេះ។ ហើយពួកគេក៏បានរកឃើញទៀតថា ទឹកនៃមហាសមុទ្រអង់តាទិកដែលមានជម្រៅជាង ២,០០០ ម៉ែត្រកំពុងឡើងកំដៅលឿនជាងមហាសមុទ្រផ្សេងទៀតនៅលើពិភពលោករហូតទៅដល់ ៤ ដងឯណោះ។

យោងតាមអ្នកជំនាញ Alessandro Silvano នៅសាកលវិទ្យាល័យ Southampton ដែលជាសហអ្នកនិពន្ធការសិក្សា បាននិយាយថា ការផ្លាស់ប្តូរនៅក្នុងទឹកជ្រៅទាំងនេះអាចមានផលវិបាកធំ។ ពួកវាជាសមាសធាតុសំខាន់នៃចរន្តទឹកសមុទ្រសកល ដោយដឹកជញ្ជូនកាបូនដែលបង្កើតដោយមនុស្សចូលទៅក្នុងទឹកជ្រៅ។ ប្រសិនបើវដ្តនេះចុះខ្សោយ សមុទ្រជ្រៅអាចស្រូបយកកាបូនតិច នេះមានន័យថាមហាសមុទ្រអង់តាទិក មិនអាចកាត់បន្ថយការឡើងកំដៅរបស់ផែនដីបានទៀតទេ៕

ប្រភព៖vnexpress

កាលពីថ្ងៃទី១២ ខែមិថុនា កន្លងមក ក្នុងឱកាសទិវាប្រឆាំងនឹងពលកម្មកុមារលើពិភពលោកប្រចាំឆ្នាំ អង្គការពលកម្មអន្តរជាតិ (ILO) បានអំពាវនាវឱ្យប្រទេសនានានៅទូទាំងពិភពលោក បញ្ឈប់ការប្រើប្រាស់កម្លាំងពលកម្មកុមារ ។ អង្គការពលកម្មអន្តរជាតិបានបង្កើតគណៈកម្មការជាន់ខ្ពស់មួយ ដើម្បីស្វែងរកភាពយុត្តិធម៌ក្នុងសង្គមសម្រាប់មនុស្សគ្រប់រូប និងបញ្ឈប់ការប្រើប្រាស់កម្លាំងពលកម្មកុមារ ។

គណៈកម្មការជាន់ខ្ពស់នេះនឹងធ្វើជាអ្នកតំណាងរបស់អ្នកធ្វើការ, នាយកក្រុមហ៊ុន និងរដ្ឋាភិបាលផងដែរ ហើយគណៈកម្មការនេះនឹងបង្ក្រាបការប្រើប្រាស់កម្លាំងពលកម្មកុមារ និងពិភាក្សាពីវិធីសាស្ត្រផ្សេងៗដើម្បីធ្វើឱ្យសង្គមមានភាពយុត្តិធម៌ ។ នាយកគ្រប់គ្រងអង្គការពលកម្មអន្តរជាតិបានថ្លែងថា វាជាលើកដំបូងក្នុងរយៈពេល២០ឆ្នាំ ដែលមានការប្រើប្រាស់កម្លាំងពលកម្មកុមារកើនឡើង ។ គេសង្កេតឃើញថា កុមារចំនួន១៦០លាននាក់ ឬកុមារម្នាក់ក្នុងចំណោម១០នាក់នៅទូទាំងពិភពលោក ត្រូវបានគេប្រើប្រាស់កម្លាំងពលកម្ម ។

ចាប់តាំងពីឆ្នាំ២០០០ មក ប្រទេសនានាបានចាត់វិធានការកាត់បន្ថយការប្រើប្រាស់កម្លាំងពលកម្មកុមារ ប៉ុន្តែក្នុងរយៈពេល២ឆ្នាំ ទៅ៣ឆ្នាំចុងក្រោយនេះ បញ្ហាជម្លោះ, វិបត្តិ និងការរាតត្បាតនៃជំងឺកូវីដ-១៩ បានធ្វើឱ្យក្រុមគ្រួសារជាច្រើនប្រឈមនឹងការបាត់បង់ប្រាក់ចំណូល និងធ្លាក់ក្នុងភាពក្រីក្រ ហើយក្រុមគ្រួសារទាំងនោះបានបង្ខំឱ្យកុមាររាប់លាននាក់ចេញទៅធ្វើការ ។ លើសពីនេះ សេដ្ឋកិច្ចប្រទេសនានាមិនទាន់រីកចម្រើនដើម្បីកាត់បន្ថយទុក្ខលំបាករបស់ពលរដ្ឋឡើយ ។

អង្គការពលកម្មអន្តរជាតិបានប្រកាសក្នុងទិវាប្រឆាំងនឹងពលកម្មកុមារលើពិភពលោក ជាលើកដំបូងនៅឆ្នាំ២០០២ ដើម្បីទប់ស្កាត់ការប្រើប្រាស់កម្លាំងពលកម្មកុមារ ។ មុននេះ អង្គការសហប្រជាជាតិក៏បានសន្យាលុបបំបាត់ការប្រើប្រាស់កម្លាំងពលកម្មកុមារគ្រប់រូបភាពនៅឆ្នាំ២០២៥ ផងដែរ ។ បើតាមទិន្នន័យរបស់អង្គការពលកម្មអន្តរជាតិបញ្ជាក់ថា បច្ចុប្បន្ន នៅតែមានការប្រើប្រាស់កម្លាំងពលកម្មកុមាររហូតដល់២លាននាក់នៅក្នុងប្រទេសមានប្រាក់ចំណូលខ្ពស់ គឺសហរដ្ឋអាមេរិក ៕ ប្រភព ៖ TNN World