នៅមិនទាន់បញ្ចប់ទាំងស្រុងនោះទេចំពោះរឿងបេក្ខនារី The Voice Cambodia រដូវកាលទី៣ សុខុម រចនា ដែលមិនបន្ទន់ឥរិយាបថរបស់ខ្លួន រហូតមានរៀមច្បមជាច្រើនរូបដូចជាអ្នកនាង ខាត់ សុឃីម, សាយ , ចិត្ត កញ្ចនា បានបង្ហោះសារឱ្យអ្នកចម្រៀង Cover រូបនេះបន្ទន់ឥរិយាបថរបស់ខ្លួនបន្តិចនិងកុំភ្លេចម្ចាស់ដើមផឹកទឹកឱ្យនឹកឃើញប្រភព ក៏ដូចជាសុភាសិតមួយឡើងលើកថា «ងើយស្កក ឱនដាក់គ្រាប់»ជាដើម។
ជាមួយគ្នានោះសារតែ សុខុម រចនា បានបង្ហោះក្នុងន័យផ្លែផ្កាអរគុណដល់អ្នកបញ្ចេញមតិ ជាន់ពន្លិចនោះ បន្ទាប់ពីមហាជនរិះគន់កាន់តែខ្លាំងអ្នកបាត់ដំបងរូបនេះបានកែប្រែ Caption របស់ខ្លួនឡើងវិញដោយបញ្ជាក់ថា ជី ដេវីត ជាម្ចាស់ដើមបទ «How about Now?» ហើយនាងជាអ្នកCover បទនេះ និងសូមអធ្យាស្រ័យពីសំណាក់មហាជនថាខ្លួនមិនបានតាំងចិត្តធ្វើជាម្ចាស់បទឡើយ និងប្តូរពីពាក្យជាន់ពន្លិចទៅជាអរគុណសម្រាប់ការបញ្ចេញមតិរបស់មហាជនផងដែរ។
យ៉ាងណារឿងរបស់ សុខុម រចនា អរគុណ៣០M Views អ្នកលេងបណ្តាញសង្គមធ្លាយដល់តារាចម្រៀង ពៅ ស្រីមាស ឬ មាស នីតា ដែលជាអតីតបេក្ខនារីលេចធ្លោក្នុងកម្មវិធី Cambodian Idol រដូវកាលទី៤។ ក្នុងវគ្គ Judge Audition នៅពេលគណៈកម្មការ ណុប ប៉ារ៉ារិទ្ធ បានចោទសួរថា មាស នីតា មានសមិទ្ធិផលអ្វីទេដែលមហាជនស្គាល់មុនពេលចូលរួមប្រកួត។ នៅពេលនោះ មាស នីតា បានឆ្លើយដោយមិនស្ទាក់ស្ទើរថាមហាជនបានស្គាល់នាងតាមរយៈការ Cover បទ «ផ្លូវណាទៅផ្ទះម៉ែក្មេក» បើទោះជាបទនេះត្រូវម្ចាស់ដើមកញ្ញា ថាន់ នឿថង ស្នើឱ្យលុបបទដែលនាង Cover ចេញក្តីបន្ទាប់ពីបទនេះមានសន្ទុះខ្លាំងជាងម្ចាស់ដើម។
នៅពេលមានរឿងហេតុស្រដៀងគ្នានេះ អ្នកលេងបណ្តាញសង្គមបានសរសើរទៅដល់ទឹកចិត្ត ជី ដេវីត ដូចគ្នាដែលបានបើកចិត្ត បើកបេះដូងធំទូលាយទោះអ្នកយកទៅ Cover បទលោកមានអ្នកទស្សនាច្រើនជាងម្ចាស់ដើមយ៉ាងណាលោកមិនដែលរករឿងឡើយ មានតែប្រាប់លោកប្រសិនជាយកទៅ Cover មានបញ្ហាជាប់ Copy Right អីអាចទាក់ទងទៅលោក លោកនឹងឱ្យក្រុមការងារជួយសម្រួល។
រឿងអាស្រូវរបស់ សុខុម រចនា នេះទៀតសោតក៏ជាមេរៀនសម្រាប់អ្នក Cover ឯទៀតកុំភ្លេចដល់ម្ចាស់ដើមមិនត្រូវធ្វើចរិតខ្មើតឡើយទោះបីជាឈានដល់កម្រិតណាក៏ដោយ ព្រមទទួលស្គាល់កំហុស និងទទួលយកការរិះគន់ពីមហាជនដើម្បីកែលម្អ។ ការគាំទ្រ និងការមិនគាំទ្រគឺអាស្រ័យលើទង្វើនិងឥរិយាបថរបស់បុគ្គលនោះហើយជាមេរៀនដែល សុខុម រចនា ត្រូវរៀនសូត្រនិងកែប្រែកំហុសរបស់ខ្លួនទើបទទួលលទ្ធផលល្អទៅថ្ងៃមុខ៕
https://www.tiktok.com/@the.voice.cambodia/video/7244073374069116162
