ប្រទេសកូរ៉េខាងជើង ត្រៀមបញ្ជូនអត្តពលិកខ្លួនជាច្រើន ដើម្បីចូលរួមព្រឹត្តិការណ៍កីឡា​អាស៊ី​លើក​ទី​១៩ ឆ្នាំ២០២២ (Asian Games 2022) ដែលប្រព្រឹត្តិទៅនៅទីក្រុង Hangzhou ប្រទេសចិន។

សម្រាប់ព្រឹត្តិការណ៍កីឡានេះ ​កូរ៉េខាងជើង បាន​ចុះ​ឈ្មោះ​អត្តពលិក គ្រូ​បង្វឹក និង​ប្រតិភូ ប្រមាណ​២០០នាក់  នៅលើ៤០ប្រភេទកីឡា។

នេះជាលើកទីមួយហើយ ក្នុងរយៈពេល៣ឆ្នាំ​ចុងក្រោយ ដែល​កូរ៉េខាងជើង សម្រេចចិត្ត​បញ្ជូន​​អត្តពលិក​គ្រប់​ប្រភេទ​កីឡា​​របស់​ខ្លួន​ទៅ​ប្រកួត​លើ​ឆាក​អន្តរជាតិ។ ៣ឆ្នាំកន្លងទៅ ពួកគេមិនបានបញ្ជូនអត្តពលិកទៅប្រកួតក្រៅប្រទេសនោះទេ ដោយពួកគេខ្លាចអត្តពលិកទាំងនោះ នាំយកជំងឺកូវីដ១៩ ចូលមកប្រកាន់ប្រទេសខ្លួន។

តែយ៉ាងណាមិញ ការដែលកូរ៉េខាងជើងបញ្ជូនអត្តពលិកមកចូលរួមព្រឹត្តិការណ៍កីឡា​អាស៊ី​លើក​ទី​១៩ នេះ​ ក៏ដោយសារតែ ចិនជាផ្ទះ។ ជាទូទៅ វត្តមានរបស់អត្តពលិកកូរ៉េខាងជើង នៅលើឆាកអន្តរជាតិ ភាគច្រើនដោយសារតែរុស្សុី ឬក៏ចិនជាម្ចាស់ផ្ទះតែប៉ុណ្ណោះ៕

ប្រភព៖ Reuters 

បរទេស៖ ប្រជាជនអេហ្ស៊ីបបុរាណ បានសាងសង់បណ្តាញទំនប់ទឹកយ៉ាងទូលំទូលាយនៅទូទាំងទន្លេនីល និងដាំដំណាំនៅលើដីដោយមិនចាំបាច់ត្រូវការប្រព័ន្ធធារាសាស្រ្ត។

យោងតាមប្រភពព័ត៌មាន Phys.org កាលពីថ្ងៃទី ១៣ ខែមិថុនា បានឱ្យដឹងថា ក្រុមអ្នកស្រាវជ្រាវរបស់អង់គ្លេសបានរកឃើញបណ្តាញដ៏ធំនៃទំនប់ថ្មនៅតាមដងទន្លេ Nile ក្នុងប្រទេសអេហ្ស៊ីប និងស៊ូដង់ ដែលបង្ហាញពីទម្រង់វិស្វកម្មធារាសាស្ត្រដ៏អស្ចារ្យនៅក្នុងជ្រលងទន្លេ Nile និងទំនាក់ទំនងរវាង Nubians និងអេហ្ស៊ីបបុរាណ។

ដោយអ្នកស្រាវជ្រាវបានប្រើរូបភាពផ្កាយរណប យន្តហោះគ្មានមនុស្សបើក និងការស្ទង់មតិលើដី ក៏ដូចជាប្រភពប្រវត្តិសាស្ត្រ ដើម្បីកំណត់អត្តសញ្ញាណទំនប់ទឹកជិត ១,៣០០ រវាងភាគខាងត្បូងនៃប្រទេសអេហ្ស៊ីប និងស៊ូដង់ ។ ដែលបង្ហាញថាទំនប់ទឹកទន្លេទាំងនេះស្ថិតនៅក្នុងវាលខ្សាច់ ខាងក្នុងប្រឡាយស្ងួត ដោយពួកវារក្សាដីល្បាប់ដែលមានជីជាតិក្នុងរដូវទឹកជំនន់ប្រចាំឆ្នាំនៅលើទន្លេនីល ដែលអនុញ្ញាតឱ្យដំណាំត្រូវបានដាំដុះនៅលើដីដោយមិនចាំបាច់ស្រោចស្រព។

ក្រុមស្រាវជ្រាវនេះក៏បានរកឃើញទំនប់ថ្មធំៗជាច្រើននៅទន្លេនីល ដែលខ្លះមានកម្រាស់ដល់ទៅ ៥ ម៉ែត្រ និងបណ្តោយ ២០០ ម៉ែត្រ ទាំងនេះគឺជាទំនប់ទឹកទាបដែលដឹកនាំលំហូរ និងជួយទូកក្នុងការឆ្លងកាត់ទន្លេដែលមានចលនាលឿន។ យោងតាមលោក Dalton អ្នកស្រាវជ្រាវនៅសាកលវិទ្យាល័យ Western Australia បាននិយាយថា រចនាសម្ព័ន្ធនេះបានដើរតួនាទីយ៉ាងសំខាន់ក្នុងការជួយសហគមន៍ឱ្យរីកចម្រើន និងបង្កើនអាហារនៅក្នុងបរិយាកាសដ៏អស្ចារ្យបំផុតកាលពីរាប់ពាន់ឆ្នាំមុន៕ ប្រភព៖vnexpress

រដ្ឋធានីសូហ្វៀ (Sofia) ៖ សាធារណរដ្ឋប៊ូលហ្ការី (Bulgaria) បានស្ដីបន្ទោសខ្លាំង មកដល់ឯកអគ្គរដ្ឋទូតរុស្ស៊ី ប្រចាំនៅរដ្ឋធានីសូហ្វៀ ជុំវិញការពង្រីកព័ត៌មានមិនពិត អំពីប្រទេសជាសមាជិកអង្គការណាតូមួយនេះ បញ្ជូនកងទ័ពរបស់ខ្លួន ទៅជួយដល់អ៊ុយក្រែន ទប់ទល់នឹងសង្គ្រាមឈ្លានពានរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី១៥ ខែមិថុនា ថា ក្រសួងការបរទេសប៊ូលហ្ការី បានបញ្ជាក់ ថា «រដ្ឋាភិបាលក្រុងសូហ្វៀ បានផ្ដល់នូវការគាំទ្ររបស់ខ្លួន ជួយដល់ប្រទេសអ៊ុយក្រែន ដោយអនុលោមទៅលើច្បាប់ និង បទដ្ឋាននានា ហើយការប៉ុនប៉ងណាមួយ នៅក្នុងការឃោសនា និង ការផ្ដល់ព័ត៌មានក្លែងក្លាយ គឺជាការមិនសមស្របនឹងតម្លៃប្រជាធិបតេយ្យ ហើយវាជាសកម្មភាព មិនអាចទទួលយកបាននោះឡើយ»។

ក្រសួងការបរទេសប៊ូលហ្ការី បានស្ដីបន្ទោសទៀត ថា «យើងមានភាពស៊ីសង្វាក់គ្នា នៅក្នុងសាមគ្គីភាពរបស់យើង ជាមួយនឹងប្រជាជនអ៊ុយក្រែន ហើយយើងនឹងគាំទ្រដោយគ្មានលក្ខខណ្ឌរបស់យើង សម្រាប់ឯករាជភាព អធិបតេយ្យភាព និង បូរណភាពទឹកដីរបស់អ៊ុយក្រែន នៅក្នុងព្រំដែន ត្រូវបានទទួលស្គាល់ជាអន្តរជាតិ រួមទាំងដែនទឹកផងដែរ»។

ការស្ដីបន្ទោសរបស់ប៊ូលហ្ការី ប្រឆាំងនឹងប្រេសិតរបស់ក្រុងមូស្គូ បានកើតឡើង ក្រោយពេលឯកអគ្គរដ្ឋទូតរុស្សី លោកស្រី អេលៀណូរ៉ា មីត្រូវហ្វាណូវ៉ា (Eleonora Mitrofanova) បានសរសេរ បង្ហោះ នៅលើប្រព័ន្ធផ្សព្វផ្សាយសង្គម ថា ប៊ូលហ្ការី នឹងបញ្ជូនកងទ័ពរបស់ខ្លួន ទៅជួយដល់ប្រទេសអ៊ុយក្រែន។ ការអះអាងបែបនេះ ត្រូវបានរដ្ឋាភិបាលសូហ្វៀ ច្រានចោលម្ដងជាពីរដង រួចមកហើយ ថា ប៊ូលហ្ការី នឹងមិនធ្វើសកម្មភាពបែបនេះទេ។

លោក ទូឌ័រ តាហ្ការេវ (Toodor Tagarev) រដ្ឋមន្ត្រីក្រសួងការពារជាតិប៊ូលហ្ការី បានបញ្ជាក់ ថា ប៊ូលហ្ការី នឹងបន្តគាំទ្រ ជួយដល់ប្រទេសអ៊ុយក្រែន ដើម្បីការពារសេរីភាព បូរណភាពទឹកដី និង ឯករាជភាពរបស់ពួកគេ។ ប៉ុន្ដែរដ្ឋាភិបាលក្រុងសូហ្វៀ នឹងមិនមានគោលបំណងដាក់ពង្រាយកងទ័ពរបស់ខ្លួន នៅលើប្រទេសកំពុងតែហែកហួរ ដោយសារសង្គ្រាមឈ្លានពានមួយនេះឡើយ៕

រាជធានីបាងកក៖ ការបោះឆ្នោតសកលរបស់ប្រទេសថៃ កាលពីថ្ងៃទី១៤ ខែឧសភា ថ្វីបើគណបក្សឆ្ពោះទៅមុខ (Move Forward Party) ហៅកាត់ MFP បានទទួលអាសនៈច្រើនជាងគេ ក៏ពិតមែន ប៉ុន្ដែគណបក្សឈ្នះឆ្នោតមួយនេះ នៅតែមិនមានសំឡេងគ្រប់គ្រាន់ សម្រាប់ការបង្កើតរដ្ឋាភិបាល ហើយមានឧបសគ្គ កាន់តែច្រើនឡើង នៅចំពោះមុខ ខណៈឧបនាយករដ្ឋមន្រ្ដី នៃរដ្ឋាភិបាលចាំផ្ទះ អះអាង ថា ប្រធានសភា នឹងរ៉ែកពុនការងារដ៏ធ្ងន់ធ្ងរ ប្រសិនបើព្យួរតំណែងនាយករដ្ឋមន្រ្ដី។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃព្រហស្បតិ៍ ទី១៥ ខែមិថុនា ឆ្នាំ២០២៣ ថា លោក វីសសានូ ក្រាង៉ាម (Wissanu Krea-ngam) ឧបនាយករដ្ឋមន្រ្ដី នៃរដ្ឋាភិបាលចាំផ្ទះថៃ បានបញ្ជាក់ ថា ប្រធានសភា នឹងទទួលខុសត្រូវការងារទាំងអស់ ប្រសិនបើបុគ្គលដែលសភាស្នើឱ្យមានការយល់ព្រម ពីព្រះមហាក្សត្រ ដោយសារតែនាយករដ្ឋមន្ត្រីបន្ទាប់ មិនអាចបំពេញភារកិច្ចរបស់ខ្លួនបាន ខណៈតុលាការធម្មនុញ្ញ ព្យួរតួនាទី។

លោក វីសសានូ ក្រាង៉ាម បានឆ្លើយតបនឹងសំណួរជាច្រើន លើកឡើង ជុំវិញសេណារីយ៉ូជាក់លាក់មួយ ដោយការស្រមៃ ពីអ្នកឆ្លើយឆ្លងព័ត៌មាននយោបាយមួយចំនួន ដោយយោងទៅលើស្ថានភាពនយោបាយជាក់ស្តែងរបស់លោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ (MFP) ។

លោកឧបនាយករដ្ឋមន្រ្ដី វីសសានូ ក្រាង៉ាម បានសង្កត់ធ្ងន់ ថា មានតែតុលាការធម្មនុញ្ញប៉ុណ្ណោះ ទើបមានសិទ្ធិអំណាចព្យួរលោក ភីថា អំពីកាតព្វកិច្ច ប្រសិនបើស្ថាប័នកំពូលមួយនេះ សម្រេចចិត្តស្តាប់ញត្តិ ប្រឆាំងនឹងមេបក្សប្រឆាំងឈ្នះឆ្នោតរូបនេះ។ ចំណែកលទ្ធផលនៃការព្យួរកាតព្វកិច្ចនេះ នឹងអាស្រ័យទៅលើលក្ខណៈ នៃញត្តិនោះ។

បើទោះជាយ៉ាងណាក៏ដោយ លោកឧបនាយករដ្ឋមន្រ្ដីថៃ រូបនេះ មិនបានផ្ដល់ព័ត៌មានលម្អិត ស្ដីអំពីប្រភេទញត្តិ និង ផលវិបាក នៃញត្ដិនោះ ប្រសិនបើតុលាការទទួលយក។

លោកឧបនាយករដ្ឋមន្រ្ដី វីសសានូ ក្រាង៉ាម បានបន្ថែម ថា «នៅក្នុងសេណារីយូរដ៏អាក្រក់បំផុត ប្រសិនបើលោក ភីថា ក្រោយពេលព្យួរតួនាទី ពីនាយករដ្ឋមន្ត្រី ក្រោយការតែងតាំង ជានាយករដ្ឋមន្ត្រីថ្មី របស់ប្រទេសថៃ ត្រូវតែទទួលការគាំទ្រ ពីព្រះមហាក្សត្រ។ បញ្ហាថ្មីនេះ នឹងកើតឡើង ដោយសារតែនាយករដ្ឋមន្ត្រី ជាអ្នកមានសិទ្ធិ នៅក្នុងការប្រឆាំងនឹងព្រះរាជបញ្ជា អនុម័តបញ្ជីគណៈរដ្ឋមន្ត្រី។ ប្រធានសភា ដើរតួនាទីយ៉ាងសំខាន់បំផុត នៅក្នុងស្ថានភាពបែបនេះ ដោយសារពួកគេទទួលខុសត្រូវ នៅក្នុងការចុះហត្ថលេខា និង អនុម័តនូវការតែងតាំងនាយករដ្ឋមន្ត្រីមុននឹងបញ្ជូនកិច្ចការទាំងនោះ សម្រាប់ទទួលការយល់ព្រមពីព្រះមហាក្សត្រ»។

សមាជិកសភា ទាំងអស់៥០០នាក់ និង ព្រឹទ្ធសភា សរុបទាំង២៥០នាក់ មានសិទ្ធិអំណាច ចូលរួមបោះឆ្នោត ជ្រើសរើសនាយករដ្ឋមន្រ្ដីថ្មី ហើយពួកគេមិនត្រឹមតែជាអ្នកទទួលខុសត្រូវ ចំពោះផលវិបាកនយោបាយតែប៉ុណ្ណោះ ប្រសិនបើការតែងតាំងនេះ មានការខុសឆ្គង ក៏នឹងត្រូវប្រឈមមុខនឹងការទទួលខុសត្រូវ តាមផ្លូវច្បាប់ផងដែរ។

លោកឧបនាយករដ្ឋមន្រ្ដីថៃ រូបនេះ បានទទួលស្គាល់ ថា ចាប់តាំងពីមិនធ្លាប់មានសេចក្តីសម្រេចពីមុនមក លើបញ្ហាសិទ្ធិ ក្លាយជាបេក្ខជននាយករដ្ឋមន្ត្រីនោះ វាមិនមានអ្វីដែលត្រូវយោង ទៅលើករណីញត្តិថ្មី ត្រូវបានដាក់ទៅតុលាការធម្មនុញ្ញ សម្រាប់ការបកស្រាយ អំពីសិទ្ធិរបស់អ្នកណាម្នាក់នោះឡើយ។

លោកអតីតចៅក្រមតុលាការធម្មនុញ្ញ ចារុន ភូកឌីតាណាគូល (Jarun Pukditanakul) បានពន្យល់ ថា ការចោទប្រកាន់ ប្រឆាំងនឹងលោក ភីថា អំពីការរំលោភ លើមាត្រាទី១៥១ នៃអង្គច្បាប់ ស្តីអំពីការបោះឆ្នោតជ្រើសរើសសមាជិកសភា មិនមានអ្វីពាក់ព័ន្ធនឹងតុលាការធម្មនុញ្ញនោះដែរ។

ដោយឡែក ប្រភពមួយ បានអះអាង ថា លទ្ធផលនៃការបោះឆ្នោត នៅតាមខេត្តចំនួន៣៧ ឥឡូវនេះកំពុងតែរង់ចាំនូវការស៊ើបអង្កេត លើការប្រព្រឹត្តខុសឆ្គង អាចបណ្តាលឱ្យសមាជិកសភា ចំនួន ៧១រូប ដោយភាគច្រើន មកពីគណបក្សភូមិចៃថៃ (Bhumjaithai) មិនទទួលបានការគាំទ្រ ពីគណៈកម្មាធិការរៀបចំការបោះឆ្នោត៕

បរទេស៖ យោងតាមប្រភព SpaceX កាលពីថ្ងៃទី ១៣ ខែមិថុនា បានឱ្យដឹងថា ក្រុមហ៊ុន Varda Space Industries ដែលមានមូលដ្ឋាននៅរដ្ឋកាលីហ្វ័រញ៉ា បានប្រកាសពីការដាក់ពង្រាយផ្កាយរណប W-Series1 ជាលើកដំបូងដោយជោគជ័យនៅក្នុងគន្លងតារាវិថី។ ក្រុមហ៊ុនក៏ចាប់ផ្តើមមានគោលបំណងផលិតឱសថ និងសម្ភារៈជាច្រើនផ្សេងទៀតនៅក្នុងលំហ តាមរយៈកន្សោមតូចមួយដែលភ្ជាប់ទៅនឹងផ្កាយរណប។

ផ្កាយរណប W-Series1 ផ្ទុកកន្សោមតូច ៩០ គីឡូក្រាម ដែលត្រូវបានរចនាឡើងសម្រាប់ការស្រាវជ្រាវគ្រឿងញៀន។ យោងតាមក្រុមហ៊ុន Varda Space បាននិយាយថា កន្សោមនេះនឹងផ្តាច់ចេញពីផ្កាយរណប ហើយក៏ចាប់ផ្តើមហោះហើរក្នុងលំហ ខណៈពេលដែលផ្កាយរណបនៅតែភ្ជាប់ទៅនឹងរចនាសម្ព័ន្ធដែលផ្តល់ថាមពល ការជំរុញ និងទំនាក់ទំនងដែលត្រូវការដើម្បីរុករកក្នុងចន្លោះទំនេរ។

Varda Space ក៏បាននិយាយទៀតថា គោលបំណងដ៏ធំរបស់ក្រុមហ៊ុនក្នុងការបង្កើតរោងចក្រដំបូងបង្អស់នៅក្នុងលំហនេះ គឺដើម្បីស្រាវជ្រាវវិទ្យាសាស្ត្រ និងផលិតថ្នាំជាច្រើនប្រភេទដើម្បីទប់ស្កាត់ជំងឺកាចសាហាវផ្សេងៗរបស់ផែនដី។
គួរបញ្ជាក់ដែរថា ឱសថសង្គ្រោះជីវិតសំខាន់ៗដែលមាននៅលើផែនដី សុទ្ធតែជាឱសថដែលផលិតបានតែក្នុងលំហប៉ុណ្ណោះ៕ ប្រភព៖vnexpress

ប្រទេសចិន ៖ បច្ចុប្បន្ន គេសង្កេតឃើញថា មុខម្ហូបប្លែកមួយឈ្មោះ «ឆាដុំថ្ម» ត្រូវបានគេមកលក់នៅផ្សាររាត្រីមួយកន្លែងនៅខេត្តហ៊ូណាន ប្រទេសចិន គឺតម្លៃ១៦យាន់ក្នុង១ចាន ។ ភោជនីយដ្ឋានចិនឱ្យដឹងថា មុខម្ហូបនេះលក់ដាច់ណាស់ ហើយភោជនីយដ្ឋានអាចយកដុំថ្មដដែលមកឆាឡើងវិញលក់ឱ្យអតិថិជន ដោយគ្រាន់តែផ្សំគ្រឿងថ្មីប៉ុណ្ណោះ ។

ចំណែកការចម្អិនម្ហូបនេះ គឺគេបានយកដុំថ្មពីទន្លេមកឆាជាមួយគ្រឿងផ្សេងៗដើម្បីឱ្យវាមានរសជាតិឆ្ងាញ់ ។ ជនជាតិចិនហៅឈ្មោះម្ហូបនេះថា «ស៊ូទៀវ» មានន័យថា អ្នកបរិភោគអាចជញ្ជក់ដុំថ្ម រួចខ្ជាក់វាចេញមកក្រៅវិញ ។ ជនជាតិចិនប្រាប់ថា ការបរិភោគម្ហូបឆាដុំថ្ម គឺវាមានរសជាតិស្រដៀងគ្នានឹងការបរិភោគសាច់ត្រីដែរ ។

ភោជនីយដ្ឋាននៅប្រទេសចិនឱ្យដឹងថា ដុំថ្មដែលគេយកមកធ្វើម្ហូបនេះ មិនមែនសម្រាប់បរិភោគទេ ប៉ុន្តែទុកសម្រាប់ជញ្ជក់តែប៉ុណ្ណោះ ដើម្បីទទួលបាននូវរសជាតិគ្រឿងផ្សំផ្សេងៗដែលគេយកមកឆាបញ្ចូលគ្នា បន្ទាប់មក អ្នកបរិភោគត្រូវខ្ជាក់ដុំថ្មចេញវិញ ។ ចំណែកដុំថ្មដែលអតិថិជនបរិភោគរួចហើយ ខាងភោជនីយដ្ឋានបានយកវាមកលាងសម្អាតឱ្យស្អាត រួចយកទៅឆាលក់ម្តងទៀត ។

ម្ចាស់ភោជនីយដ្ឋានបញ្ជាក់ថា វាមិនមែនជាមុខម្ហូបថ្មីប្លែកទេ ប៉ុន្តែវាជាម្ហូបបុរាណរបស់ចិនរាប់រយឆ្នាំមកហើយ ។ គេជឿថា ម្ហូបនេះមានប្រភពពីអ្នកជិះទូកនៅសម័យមុនខ្វះខាតអាហារក្នុងអំឡុងពេលពួកគេជិះទូកតាមទន្លេយ៉ង់សេ ដូច្នេះ ពួកគេក៏រើសដុំថ្មយកមកឆា ។ ក្រោយមក វាបានក្លាយជាម្ហូបពេញនិយមនៅខេត្តយូណាន ក្នុងអំឡុងពេលសង្គ្រាមរវាងប្រទេសចិន និងជប៉ុន ចាប់ពីឆ្នាំ១៩៣៧ ដល់ឆ្នាំ១៩៤៥ ។ សព្វថ្ងៃនេះ មនុស្សភាគច្រើនគិតថា វាជាម្ហូបថ្មីប្លែក ប៉ុន្តែការពិត គេបានលក់ម្ហូបឆាដុំថ្មជាច្រើនកន្លែងនៅប្រទេសចិន ៕

ប្រភព ៖ Mono News