ការដើរ គឺជាវិធីសាស្រ្តមួយនៃលំហាត់ប្រាណដែលរួមចំណែកដល់ ការសម្រកទម្ងន់ និងកាត់បន្ថយហានិភ័យនៃជំងឺផ្សេងៗ។ ពិតណាស់ ការដើរត្រឹមតែ ១០ នាទីក្នុងមួយថ្ងៃនឹងធ្វើឱ្យសុខភាពសរសៃឈាមបេះដូងរបស់អ្នកប្រសើរឡើងយ៉ាងខ្លាំង។ ប៉ុន្តែទោះជាយ៉ាងណាក៏ដោយ ប្រសិនបើអ្នកបន្ថែមបច្ចេកទេសទាំងនេះទៅក្នុងការដើររបស់អ្នក វានឹងជួយឱ្យការសម្រកទម្ងន់របស់អ្នកកាន់តែមានប្រសិទ្ធភាព ដែលបច្ចេកទេសនៃការដើរទាំងនោះមានដូចជា៖
១.ធ្វើទម្លាប់ ឬចលនាខ្លីៗមុនពេលដើរ៖ ការលាតសន្ធឹង ឬកាច់ដៃជើងតិចតួច អាចជំរុញសាច់ដុំរបស់អ្នកមុនពេលដើរ និងកាត់បន្ថយឱកាសនៃការរងរបួសអំឡុងពេលដើរ និងក្រោយពេលដើរ។
២.ស្ពាយកាបូបដែលមានទម្ងន់នៅពេលដើរ៖ ការបន្ថែមទម្ងន់ដល់ការដើររបស់អ្នកនឹងបង្កើនតម្រូវការ អាំងតង់ស៊ីតេលើរាងកាយអំឡុងពេលដើរ ។
៣.ប្រើកម្មវិធី ឬទូរស័ព្ទដើម្បីតាមដានជំហានរបស់អ្នក៖ ការតាមដានទិន្នន័យអាចជួយជំរុញឱ្យអ្នកឈានដល់គោលដៅមួយដើម្បីសម្រេចបាន។
៤.រត់តិចៗ៖ ការរត់តិចៗ ឬយឺតៗ ១០ វិនាទី បន្ទាប់មកដើររយៈពេល ២ នាទី ហើយធ្វើដដែលៗម្តងទៀត វាបង្កើនអាំងតង់ស៊ីតេនៃការហាត់ប្រាណដើររបស់អ្នក ដែលនឹងពន្លឿនការសម្រកទម្ងន់។
៥.ស្តាប់តន្ត្រី៖ ការស្តាប់តន្ត្រីដែលអ្នកចូលចិត្ត នឹងធ្វើឱ្យអ្នកមានថាមពលនៅលើម៉ាស៊ីនហាត់ប្រាណ ដែលអាចនាំឱ្យអ្នកហាត់ប្រាណបានយូរ។
៦.យកដបទឹកទៅជាមួយ៖ ការរក្សាជាតិទឹកបានត្រឹមត្រូវ គឺជាគន្លឹះនៃសុខភាពដ៏ប្រសើរបំផុត អ្នកកាន់តែមានសុខភាពល្អ និង កាន់តែសម្រកទម្ងន់បានល្អ។
៧.ឧស្សាហ៍ដើរ៖ ដើម្បីទទួលបានអត្ថប្រយោជន៍ពេញលេញ អ្នកត្រូវតែខិតខំដើរឱ្យទាន់ពេល មិនថាមួយថ្ងៃម្តង ឬម្តងក្នុងមួយសប្តាហ៍ទេ សុខភាពគឺជាផ្លូវនៃជីវិត។
៨.រៀបចំផែនការ៖ នៅពេលអ្នកដើរ អ្នកត្រូវតែដឹងច្បាស់ពីកន្លែងដែលអ្នកនឹងដើរ ត្រូវរៀបចំកាលវិភាគ ឱ្យបានត្រឹមត្រូវ ដែលនេះអាចធ្វើឱ្យអ្នកនឹងសម្រេចបានគោលដៅ។
៩.ការដើរមានគ្នា៖ ការដើរមានគ្នា គឺជាវិធីដ៏ល្អមួយដើម្បីរក្សាទំនាក់ទំនង ហើយវានឹងជួយអ្នកឱ្យដើរបានជាប់លាប់៕ ប្រភព៖ sanook
