ក្រោយពីមានការរិះគន់ពីអ្នកលេងបណ្តាញសង្គមខ្លាំងក្លាទៅការបង្ហោះបុរសម្នាក់លួចទំពាំង ពេលនេះម្ចាស់ចម្ការ និងជាម្ចាស់ទំពាំងបានចេញវីដេអូបញ្ចប់រឿងដោយមិនវែកញែករកអ្នកខុស អ្នកត្រូវ។ ក្នុងនោះអ្នកស្រីក៏បានបញ្ជាក់ថា ហេតុផលដែលមានការបង្ហោះនោះដោយសារតែសោកស្តាយរបស់ព្រោះអ្វីដែលខ្លួនខិតខំដាំចេញជាលទ្ធផលនិងសង្ឃឹមថាបានប្រាក់ត្រឡប់មកវិញត្រូវចោរលួចយកបាត់ទៅ។ អ្នកស្រីក៏បានបន្ថែមថា គាត់មិនចិត្តចង្អៀតអ្វីនោះដែរបើសិនជាសុំត្រឹមត្រូវនោះ។

រឿងទំពាំង ក្លាយជាប្រធានបទជជែកវែកយ៉ាងខ្លាំងនៅលើបណ្តាញសង្គម ដែលបានកើតឡើងនៅចម្ការមួយកន្លែងស្ថិតនៅភូមិបំពេញរាជ្យ ឃុំលាងដៃ ស្រុកអង្គរធំ ខេត្តសៀមរាប ដែលបុរសជាអ្នកលួចនោះមានអាយុ២៧ឆ្នាំ។ ដោយសារតែមានការរិះគន់ដល់ខ្លួនយ៉ាងច្រើនលើសលុប នៅថ្ងៃទី៩ ខែមិថុនា អ្នកស្រីជាម្ចាស់ចំការបានចេញវីដេអូមកបញ្ជាក់ជូនមហាជន និងមកបញ្ចប់រឿងនេះដោយមិនវែកញែករកអ្នកខុសអ្នកត្រូវ។

អ្នកស្រីជាម្ចាស់ចម្ការ បានឱ្យដឹងថា ខ្លួនបានដំណាំរយៈពេល៥ឆ្នាំមកហើយមិនទាន់បានផលនោះទេ ដោយសារតែបានផលហើយចោរលួចជាហូរហែ អ្វីដែលខ្លួនខំធ្វើព្រោះចង់បានចំណូលមកវិញដូចគ្នា ដោយសារតែមានចិត្តខឹងចិត្តក្តៅ គេមានកម្លាំងមាំមួនបែរជាលួចចូលធ្វើឱ្យខូចខាតរបងហើយត្រូវជុសជុលវិញខ្លួនឯងទៀតទើបមានការបង្ហោះ។

បន្ថែមពីលើនេះអ្នកស្រីបានបញ្ជាក់ទៀតថា បើសិនជាចូលចម្ការគាត់ហើយមានការសុំត្រឹមត្រូវនោះ អ្នកស្រីមិនចិត្តចង្អៀតនោះទេ ហើយរឿងនេះពួកគាត់ទាំងពីរនាក់ក៏បានសូមទោស និងធ្វើកិច្ចសន្យាបញ្ចប់រឿងរួចរាល់ហើយ៕

ស្ថាប័ន Miss Grand Cambodia 2023 បានប្រកាសជាសាធារណៈនៅល្ងាចថ្ងៃទី៨ ខែមិថុនា ឆ្នាំ២០២៣ ដកបេក្ខភាព កែវ ស្រីលីន តំណាងខេត្តកំពតព្រោះតែហេតុផលចំនួន២ធំៗ ខណៈស្ថាប័នកញ្ញាឯកដ៏អស្ចារ្យនៃកម្ពុជាបានព្យាយាមទុកឱកាសឱ្យជាច្រើនដង។

ចំពោះមូលហេតុនៃការដកបេក្ខភាព កែវ ស្រីលីន ទី១ ដោយសារតែបេក្ខនារីរូបនេះមិនគោរពតាមគោលការណ៍ និង លក្ខខណ្ឌកុងត្រារបស់ក្រុមហ៊ុន។ មូលហេតុទី២ កែវ ស្រីលីន មិនគោរពពេលវេលា ពិបាកក្នុងការទំនាក់ទំនង ហើយសា្ថប័ន Miss Grand នឹងរៀបចំធ្វើទៅតាមផ្លូវច្បាប់តាមការចែងក្នុងកុងត្រា។

ដំណឹងនៃការប្រកាសដកបេក្ខភាព កែវ ស្រីលីន ចេញពីកម្មវិធី Miss Grand Cambodia 2023 ក៏មានអ្នកគាំទ្រវិស័យនេះបង្ហាញការសោកស្តាយដែរព្រោះគេរំពឹងថានាងនឹងអាចចូលTop នៅក្នុងកម្មវិធីជាក់ជាមិនខាន ព្រោះនាងជាអតីតលំដាប់រងទី៣ កាលពី Miss Grand Cambodia 2022 ។

ជាមួយគ្នានឹងការដក កែវ ស្រីលីន ចេញពីកម្មវិធី ព្រោះមិនគោរពវិន័យ ពេលវេលា ទាំងដែលក្រុមហ៊ុនផ្តល់ឱកាសឱ្យជាច្រើនដងក៏មានពាក្យចចាមអារ៉ាមលើបណ្តញសង្គមថាមានការជំពាក់រហូតម្ចាស់បំណុលបង្ហោះនៅលើហ្វេកប៊ុកទៀតផង៕

កាលពីពេលថ្មីៗនេះ ​ឥណ្ឌាបានដាក់សម្ពោធជាផ្លូវការ នូវអគាររដ្ឋសភាជាតិថ្មីមួយកន្លែង ដោយមានការតុបតែងយ៉ាងស្រស់បំព្រង ដោយមានឆ្លាក់ចម្លាក់កូរសមុទ្រទឹកដោះ ដែលបានទទួលបានស្ងើចសរសើរមិនដាច់ពីមាត់នាយករដ្ឋមន្រ្តីឥណ្ឌា លោក Narendra Modi   ទៅលើស្នាដៃវិចិត្រករ ដែលបានគូររូបកូរសមុទ្រទឹកដោះនេះ ផងដែរ។

លោក Naresh Kumawat ដែលជាវិចិត្រករ និងអ្នកនៅពីក្រោយរូបចម្លាក់នេះ បានលើកឡើថា៖” ចម្លាក់កូរសមុទ្រទឹកដោះនេះ មានប្រវែង២២.៨ម៉ែត្រ និងកម្ពស់២.៧ម៉ែត្រ ដែលជាការបំផុសគំនិត និងយកគំរូតាមរូបចម្លាក់សមុទ្រទឹកដោះ នៅប្រាសាទអង្គរវត្តរបស់កម្ពុជា”។

លោកបានបន្ថែមទៀតថា៖” ខ្ញុំពិតជាសំណាងណាស់ ដែលបានឆ្លាក់រូបសំណាក សម្រាប់អាគាររដ្ឋសភាជាតិថ្មីនេះ​ ទាំងរូបចម្លាក់ព្រះដៃ៨ (amrit)  និងជាពិសេសរូបចម្លាក់កូរសមុទ្រទឹកដោះនេះតែម្តង។ សម្រាប់រូបគោសមុទ្រទឹកដោះនេះ យើងបានពិភាក្សាយ៉ាងយកចិត្តទុក្ខដាក់ជាមួយនឹងក្រសួងវប្បធម៌ និងមជ្ឈមណ្ឌលសិល្បៈរបស់យើង ព្រោះថាយើងមិនចង់ឱ្យមានការឆ្លាក់រូបខុសពី រូបដើមនៅប្រាសាទអង្គរវត្តនោះទេ”។

សូមបញ្ជាក់ផងដែរថា អគាររដ្ឋសភាថ្មីរបស់ឥណ្ឌានេះ ត្រូវបានសាងសង់ឡើង ចំណោយថវិការរយលានដុល្លារអាមេរិក ដែលអាចផ្ទុកសមាជិកចំនួន ៨៨៨រូប និងមានបំពាក់សម្ភារៈបរិក្ខារទំនើបៗជាច្រើនថែមទៀតផងដែរ៕

ប្រភព៖ News Room Post

តារាចម្រៀង ជី ដេវីត បានប្រកាសនៅលើបណ្តាញសង្គមថាលោកនឹងសម្តែងបទ មហានគរ ជាមួយផ្ទាំងទស្សនីយ៍ភាពដល់ទៅ៧ ក្នុងថ្ងៃប្រកួតបាល់ទាត់មិត្តភាពអន្តរជាតិកម្ពុជាប៉ះជាបង់ក្លាដេស នាពេលខាងមុខនេះ។ ហើយការបង្ហាញផ្ទាំងទស្សនីយ៍ភាពនេះ ក៏មានការប្រឹក្សាច្បាស់លាស់ពីលោកគ្រូ អ្នកគ្រូ សាស្ត្រាចារ្យនៅក្រសួងវប្បធម៌និងវិចិត្រសិល្បៈផងដែរ។

ដូចអ្នកគាំទ្រជ្រាបមកហើយថា កាលពីពេលថ្មីៗនេះតារាចម្រៀង ជី ដេវីត បានបញ្ជាក់ថាលោកនឹងសម្តែង «បទមហានគរ» នាថ្ងៃទី១៥ ខែមិថុនា ឆ្នាំ២០២៣ នៅពហុកីឡដ្ឋានជាតិអូឡាំពិកក្នុងជំនួបបាល់ទាត់មិត្តភាពអន្តរជាតិកម្ពុជានិងបង់ក្លាដេស ដែលធ្វើឱ្យមហាជនសាទរយ៉ាងខ្លាំងចំពោះដំណឹងនេះ ព្រោះជាអ្វីដែលពួកគេចង់ឃើញជាយូរមកហើយបន្ទាប់ពីបទចម្រៀងប្រកបដោយអត្ថន័យជ្រាលជ្រៅនេះអក់ខានក្នុងព្រឹត្តិការណ៍បើក-បិទ ស៊ីហ្គេម២០២៣។

អ្វីដែលកាន់តែរំភើប នៅល្ងាចថ្ងៃទី៨ ខែមិថុនា លោក ជី ដេវីត បានបញ្ជាក់ថា ការបង្ហាញផ្ទាំងទស្សនីយភាពនាថ្ងៃនោះមានចំនួន៧ រួមមាន១.កូរសមុទ្រទឹកដោះ ២.អប្សរា
៣.ម្ករ ៤.ល្ខោនខោល ៥.គុនល្បុក្កតោ ៦.ផ្កាយសំណាង កាន់ទង់ ៧.គ្រុឌ។

ជាមួយការផ្តល់ផ្ទាំងទស្សនីយភាពខាងលើនេះក៏មានការចូលរួមប្រឹក្សាពីលោកគ្រូ ព្រឿង ឈៀង និងអ្នកគ្រូ ប៉ែន សុខហួន សាស្ត្រាចារ្យ ទីប្រឹក្សា ក្រសួងវប្បធម៌និងវិចិត្រសិល្បៈផងដែរ។

គួរបញ្ជាក់ផងដែរ ពិធីបិទការប្រកួតកីឡាជាតិលើកទី៣ និងកីឡាជនពិការជាតិលើកទី១កាលពីថ្ងៃទី៣០ ខែវិចិ្ឆកា ឆ្នាំ២០២២ នៅពហុកីឡដ្ឋានជាតិមរតកតេជោ តារាចម្រៀង ជី ដេវីត បានជ្រើសបទ« វីរៈនារី »ជាមួយផ្ទាំងទស្សនីយភាពដ៏អស្ចារ្យមកបង្ហាញធ្វើឱ្យមហាជនពោលសរសើរលោកយ៉ាងខ្លាំង៕

លោកជំទាវឧកញ៉ា តាំង ហ្គិចលៀង និងស្វាមី ឧកញ៉ា អ៊ឹង លីហេង ត្រូវបានព្រះមហាក្សត្របានចេញព្រះរាជក្រឹត្យត្រាស់បង្គាប់ផ្តល់គោរមងារពី «ឧកញ៉ា»ទៅជា «អ្នកឧកញ៉ា»។ រឿងនេះដែរក៏ធ្វើឱ្យអ្នកលេងបណ្តាញសង្គមភ្ញាក់ផ្អើលយ៉ាងខ្លាំង ជាពិសេសទៅលើលោកជំទាវ តាំង ហ្គិចលៀង ។

គេចាំបានថាកាលពីចុងខែមីនា ដើមខែមេសា វីដេអូចាស់របស់លោកជំទាវ តាំង ហ្គិចលៀង ដែលជាអគ្គនាយិកាក្រុមហ៊ុន H&L គ្រុប និងជាប្រធានក្លឹបស្រ្តីកម្ពុជា រងការរិះគន់យ៉ាងខ្លាំងពីសំណាក់មហាជនអ្នកលេងបណ្តាញសង្គម ព្រោះតែពាក្យសម្តីប្រៀបធៀបរវាងអ្នកមាននិងអ្នកក្រ ខណៈលោកជំទាវបានចេញវីដេអូទទួលស្គាល់កំហុសនិងសូមទោសជាសាធារណៈផងដែរ។

យ៉ាងណាមិញ ក្រោយស្ងប់ស្ងាត់រឿងនេះមួយរយៈអ្នកលេងបណ្តាញសង្គមមានការភ្ញាក់ផ្អើលក្រោយពីឃើញលោកជំទាវ តាំង ហ្គិចលៀង និងស្វាមី ឧកញ៉ា អ៊ឹង លីហេង មានគោរមងារជា «អ្នកឧកញ៉ា» ដែលត្រាស់បង្គាប់ដោយព្រះមហាក្សត្រ។

ក្នុងព្រះរាជក្រឹត្យផ្តល់គោរងារលោកជំទាវ តាំង ហ្គិចលៀង ពីឧកញ៉ា ទៅជាអ្នកឧកញ៉ា គឺនៅថ្ងៃទី៦ ខែមិថុនា ឆ្នាំ២០២៣ ខណៈស្វាមីលោកជំទាវគឺនៅថ្ងៃទី២ ខែមិថុនា ឆ្នាំ២០២៣៕