ប្រទេសចិន៖ ដើមត្របែកយក្សដែលមានកម្ពស់ ១០២ ម៉ែត្រ ត្រូវបានគេរកឃើញនៅក្នុងព្រៃដ៏ជ្រៅបំផុតមួយ នឹងជាដើមឈើខ្ពស់បំផុតទីពីរនៅលើពិភពលោកផងដែរ។

យោងតាមប្រភពព័ត៌មានរបស់ប្រទេសចិនកាលពីថ្ងៃទី២០ ខែមិថុនា បានឱ្យដឹងថា ក្រុមស្រាវជ្រាវដែលមកពីសាកលវិទ្យាល័យ Peking University បានរកឃើញដើមត្របែកយក្សមួយនៅក្នុងតំបន់អភិរក្សធម្មជាតិជ្រលង Nha Lo Tang Bo ក្នុងស្រុក Ba Mat នៃតំបន់ស្វយ័តទីបេ ប្រទេសចិន។ ដែលតំបន់នេះត្រូវបានគេស្គាល់ថា ជាជ្រលងជ្រៅបំផុតនៅលើពិភពលោកនឹងមានជម្រៅអតិបរមា ៦,០០៩ ម៉ែត្រ។

គួររំលឹកដែរថា នៅខែឧសភា ឆ្នាំ២០២២ អ្នកស្រាវជ្រាវមួយក្រុមបានរកឃើញដើម cypress ដ៏អស្ចារ្យ ដែលមានអង្កត់ផ្ចិត ២.៩ ម៉ែត្រ និងមានកម្ពស់ខ្ពស់ជាងគេនៅអាស៊ីគឺ ១០១ ម៉ែត្រ នឹងមានទីតាំងនៅតំបន់បម្រុងជ្រលង Danum ក្នុងរដ្ឋ Sabah ប្រទេសម៉ាឡេស៊ី។ ប៉ុន្តែថ្មីៗនេះដើមត្របែកយក្សដែលមានដើមកំណើតនៅទីបេ បានក្លាយទៅជាដើមឈើដែលខ្ពស់បំផុតទីមួយនៅអាស៊ី និងទីពីរនៅលើពិភពលោក។

គួរបញ្ជាក់ដែរថា បច្ចុប្បន្ននេះ ដើមឈើដែលខ្ពស់ជាងគេបំផុតទីមួយនៅលើពិភពលោកគឺដើមស្រល់ដែលស្ថិតនៅក្បែរឆ្នេរសមុទ្រក្នុងឧទ្យានជាតិ Redwoods នៃរដ្ឋកាលីហ្វ័រញ៉ា នឹងមានកម្ពស់ ១១៦ ម៉ែត្រ។ ដើមស្រល់នេះដែរ ត្រូវបានគេប៉ាន់ប្រមាណថាមានអាយុកាលប្រហែល ៦០០-៨០០ ឆ្នាំ ហើយត្រូវបានគេដាក់ឈ្មោះហៅក្រៅថា Hyperion មានន័យថា រុក្ខជាតិយក្សនៅក្នុងទេវកថាក្រិក ដែលត្រូវបានគេរកឃើញក្នុងឆ្នាំ ២០០៦៕ ប្រភព៖vnexpress

មនុស្សគ្រប់គ្នាមិនធ្លាប់បានជ្រាបទេថា ការងារជាអ្នកភ្លក្សចំណីសត្វ ទទួលបានប្រាក់ចំណូលខ្ពស់ជាងការងារផ្សេងទៀត ។ គេហទំព័រមួយឈ្មោះ careermatch បានបង្ហាញការងារមិនធម្មតាមួយ ប៉ុន្តែទទួលបានប្រាក់ខែច្រើន គឺអ្នកភ្លក្សចំណីសត្វ ។

ការភ្លក្សចំណីសត្វ មុននឹងលក់ចែកចាយទៅតាមទីផ្សារផ្សេងៗ គឺដើម្បីឱ្យប្រាកដចិត្តថា ចំណីសត្វទាំងនេះមិនត្រឹមតែមានគុណសម្បត្តិផ្នែកអាហារូបត្ថម្ភប៉ុណ្ណោះទេ ប៉ុន្តែចំណីសត្វត្រូវតែមានរសជាតិឆ្ងាញ់ផងដែរ ។

គេហទំព័រឈ្មោះ careermatch បានបញ្ជាក់ទៀតថា គុណសម្បត្តិរបស់ការងារអ្នកភ្លក្សចំណីសត្វ គឺពួកគេត្រូវឆ្លងកាត់វគ្គបណ្តុះបណ្តាលផ្នែកម្ហូបអាហារយ៉ាងមានជំនាញ ។ អ្នកបម្រើការងារផ្នែកនេះត្រូវហិតក្លិន និងភ្លក្សចំណីសត្វ ហើយនៅពេលធ្វើតេស្តគ្រប់យ៉ាងរួចរាល់ហើយ ពួកគេត្រូវលាងមាត់ចេញ ហើយត្រៀមខ្លួនភ្លក្សចំណីសត្វបន្តទៀត ។

លើសពីនេះ ពួកគេត្រូវភ្លក្សចំណីសត្វជាង១ម៉ឺនរសជាតិ ហើយអ្នកដែលអាចបំពេញការងារនេះបាន ចាំបាច់ត្រូវបញ្ចប់ការសិក្សាថ្នាក់បរិញ្ញាបត្រផ្នែកវិទ្យាសាស្ត្រអាហារ ឬសិល្បៈការចម្អិនម្ហូបអាហារផងដែរ ។ ចំណែកប្រាក់ខែយ៉ាងតិច គឺស្មើចាប់ពី១លានបាតក្នុង១ឆ្នាំ រហូតដល់៣,៤លានបាតក្នុង១ឆ្នាំ ៕ ប្រភព ៖ Chiangmai News

រដ្ឋធានីជេរូសាឡឹម (Jerusalem)៖ ស្របពេលបណ្ដាប្រទេសមហាអំណាចលោកខាងលិច កំពុងតែបង្កើននូវការផ្គត់ផ្គង់គ្រឿងសព្វាវុធ ជួយទៅដល់ប្រទេសអ៊ុយក្រែន សម្រាប់ធ្វើសង្គ្រាមទប់ទល់នឹងការឈ្លានពានរបស់រុស្ស៊ី នោះ មេដឹកនាំអ៊ីស្រាអែល ក៏កំពុងតែព្រួយបារម្ភយ៉ាងខ្លាំង ដោយសារតែមានការភ័យខ្លាចអាវុធរបស់ខ្លួន ត្រូវធ្លាក់ទៅលើដៃអឺរ៉ុង់ យកមកវាយប្រហារដល់ម្ចាស់ដើមវិញ។

ទីភ្នាក់ងារសារព័ត៌មាន គ្រប់គ្រងដោយរដ្ឋរុស្ស៊ី Tass បានចេញផ្សាយ កាលពីព្រឹក ថ្ងៃសុក្រ ទី២៣ ខែមិថុនា ថា លោក បេនចាមីន ណេតាន់យ៉ាហ៊ូ (Benjamin Netanyahu) នាយករដ្ឋមន្រ្ដីអ៊ីស្រាអែល បានថ្លែង ថា ការបញ្ជូនគ្រឿងសព្វាវុធរបស់បណ្ដាប្រទេសបស្ចិមលោក កំពុងតែធ្វើសកម្មភាព នៅជិតព្រំដែនរបស់អ៊ីស្រាអែល ខណៈប្រទេសរបស់គាត់ កំពុងតែស្ថិតក្នុងស្ថានភាពដ៏ពិសេសមួយ។

លោកនាយករដ្ឋមន្រ្ដី ណេតាន់យ៉ាហ៊ូ បានបញ្ជាក់ ថា «យើងមានព្រំដែនយោធា ជាប់ជាមួយរុស្ស៉ី ខណៈអាកាសយានិករបស់យើង កំពុងតែហោះហើរ នៅក្បែរគ្នាជាមួយនឹងកងទ័ពអាកាសរបស់រុស្ស៉ី ស្ថិតនៅលើដែនអាកាសរបស់ស៊ីរី។ បញ្ហានេះ ខ្ញុំគិត ថា វាជារឿងដ៏សំខាន់បំផុត យើងថែរក្សាពីសេរីភាពរបស់យើង នៅក្នុងការធ្វើសកម្មភាព ប្រឆាំងនឹងអ៊ីរ៉ង់ ព្យាយាមធ្វើសកម្មភាព នៅក្នុងព្រំដែន នាភាគខាងជើងប្រទេសរបស់យើង»។

ជាមួយគ្នានេះ លោកនាយករដ្ឋមន្រ្ដី បានសង្កត់ធ្ងន់ ថា «បច្ចុប្បន្ន យើងនៅតែមានការព្រួយបារម្ភយ៉ាងខ្លាំង ដោយសារតែការភ័យខ្លាច ពីប្រព័ន្ធអាវុធណាមួយ ដែលយើងបានផ្តល់ទៅឲ្យប្រទេសអ៊ុយក្រែន បែរជាធ្លាក់ទៅដល់ដៃរបស់អឺរ៉ង់ ហើយប្រើប្រាស់ សម្រាប់វាយប្រហារ មកលើយើងវិញ។ ឥឡូវ យើងមើលឃើញអាវុធប្រឆាំងនឹងរថក្រោះរបស់បណ្ដាប្រទេសបស្ចិមលោក ផ្គត់ផ្គង់ទៅអ៊ុយក្រែន កំពុងតែនៅជាប់នឹងព្រំដែនរបស់យើង។ បញ្ហានេះ យើងត្រូវតែមានការប្រុងប្រយ័ត្នខ្ពស់បំផុត»។

រដ្ឋាភិបាលក្រុងកៀវ បានទទួលស្នើសុំជំនួយគ្រឿងសព្វាវុធទំនើបៗ ពីប្រទេសអ៊ីស្រាអែល ជាញឹកញាប់ រួមទាំង ប្រព័ន្ធការពារដែនអាកាស Iron Dome ។ ប៉ុន្តែរដ្ឋាភិបាលជេរូសាឡឹម តែងតែបដិសេធ ពីព្រោះអ៊ីស្រាអែល មានការភ័យខ្លាចគ្រឿងចម្បាំងរបស់ខ្លួន នឹងត្រូវយកមកប្រើប្រាស់ សម្រាប់ប្រឆាំងអ៊ីស្រាអែលវិញ៕

មហាសេដ្ឋីបច្ចេកវិទ្យាល្បីបំផុតរបស់ពិភពលោកពីរនាក់គឺ Elon Musk និង Mark Zuckerberg បានយល់ព្រមវាយគ្នាក្នុងការប្រកួតក្នុងទ្រុងមួយ ដែលប្រៀបដូចជាទ្រុង UFC នៅទីក្រុង Las Vegas។

ថ្មីៗនេះ ម្ចាស់ Twitter និងនាយកប្រតិបត្តិក្រុមហ៊ុន Tesla (TSLA) លោក Elon Musk បានបង្ហោះសារថា៖” គាត់ចង់ប្រយុទ្ធក្នុងទ្រុងជាមួយ Zuckerberg ដែលជានាយកប្រតិបត្តិនៃ Meta”។

មិនបានយូរប៉ុន្មាន ស្ថាបនិកក្រុមហ៊ុន Meta លោក Mark  Zuckerberg បានScreenshot ការបង្ហោះរបស់ Elon Musk ដាក់ក្នុង Story Instagram ដោយនិយាយថា៖”ទម្លាក់ទីតាំងមក”។

តែយ៉ាងណាមិញ ការប្រកួតនេះ មិនទាន់បញ្ជាក់កាលបរិច្ឆេទច្បាស់លាស់នៅឡើយនោះទេ ដោយអ្នកលេងបណ្តាងសង្គមភាគច្រើន លើកឡើងថា៖”វាគ្រាន់តែជារឿងកំប្លែង ធ្វើឱ្យតែល្អមើលរបស់មហាសេដ្ឋីទាំងពីរនាក់នេះតែប៉ុណ្ណោះ”។

សូមបញ្ជាក់ផងដែរថា ប្រសិនបើការប្រកួតនេះកើតឡើងពិតប្រាកដនោះ លោក Musk ប្រហែលជាពិបាកទៅរួចជាមួយ លោក Mark ណាស់ ដោយសារតែបច្ចុប្បន្ននេះលោក Mark កំពុងហ្វឹកហាត់ក្បាច់គុនចម្រុះ (MMA) និងទើបតែបានឈ្នះការប្រកួត jiu-jitsu ថែមទៀត៕

ប្រភព៖ CNN

ប្រទេសប្រេស៊ីល ៖ មន្ត្រីការពារបរិស្ថានប្រេស៊ីលបានចាប់ព្រុយត្រីឆ្លាមខុសច្បាប់ចំនួន២៨,៧តោនពីក្រុមហ៊ុននាំចេញចំនួន២ ដោយក្រុមហ៊ុនទី១ នៅរដ្ឋ Santa Catarina និងក្រុមហ៊ុនទី២ នៅរដ្ឋ Sao Paulo ។ មន្ត្រីការពារបរិស្ថានប្រេស៊ីលលើកឡើងថា វាជាការជួញដូរព្រុយត្រីឆ្លាមខុសច្បាប់ដែលរឹបអូសបានច្រើនបំផុតនៅលើពិភពលោក ។

សម្រាប់គោលដៅនាំចេញព្រុយត្រីឆ្លាមទាំងនេះ គឺជាទីផ្សារនៅតំបន់អាស៊ី ដោយគេអាចលក់ព្រុយត្រីឆ្លាមក្នុងតម្លៃខ្ពស់បំផុត ប្រមាណ១.០០០ដុល្លារអាមេរិកក្នុង១គីឡូក្រាម ។ គេសង្កេតឃើញថា ក្នុង១ឆ្នាំៗ ការជួញដូរព្រុយត្រីឆ្លាមដោយខុសច្បាប់មានបរិមាណច្រើននៅប្រទេសប្រេស៊ីល ។ ការិយាល័យការពារបរិស្ថានប្រេស៊ីលបង្ហាញថា គេត្រូវសម្លា.ប់ត្រីឆ្លាមរាប់ម៉ឺនក្បាលឯណោះដើម្បីកាត់យកព្រុយរបស់វា ហើយបោះចោលផ្នែកនៅសល់ទាំងអស់ចូលក្នុងទឹកសមុទ្រ ។ ដូច្នេះហើយ ទើបគេអាចប្រមូលព្រុយត្រីឆ្លាមក្នុងបរិមាណច្រើនបែបនេះ ។ លើសពីនេះ គេរកឃើញថា ត្រីឆ្លាមទាំងនេះគឺជាពូជដែលបានចុះបញ្ជីការពារការបាត់បង់ផងដែរ ។

ក្រៅពីក្រុមហ៊ុនទាំងពីរខាងលើ មន្ត្រីការពារបរិស្ថានជឿជាក់ថា នឹងមានអ្នកផ្សេងទៀតពាក់ព័ន្ធក្នុងការជួញដូរព្រុយត្រីឆ្លាមខុសច្បាប់ ហើយបច្ចុប្បន្ន គេកំពុងស៊ើបអង្កេតបន្ត ពីព្រោះវាជាបញ្ហាមួយដោះស្រាយមិនចេញនៅប្រទេសប្រេស៊ីល ។ រយៈពេលជាច្រើនឆ្នាំកន្លងមក ការិយាល័យការពារបរិស្ថានប្រេស៊ីល ក៏ធ្លាប់បានរឹបអូសព្រុយត្រីឆ្លាមចំនួន៨តោនផងដែរ ។

គួរបញ្ជាក់ថា ប្រធានាធិបតីប្រេស៊ីល លោក Luiz Inacio Lula Da Silva ដែលទើបចូលកាន់តំណែងកាលពីដើមឆ្នាំ២០២៣ បានចេញគោលនយោបាយបង្ក្រាបការជួញដូរសត្វព្រៃ និងគ្រាប់ធញ្ញជាតិ ក្រោយពីរដ្ឋាភិបាលចាស់ធ្វេសប្រហែស និងបន្ថយសិទ្ធិអំណាចរបស់ភ្នាក់ងារពាក់ព័ន្ធ ៕ ប្រភព ៖ TNN World

បច្ចុប្បន្ននំ ឬបង្អែម ជាច្រើនប្រភេទដែលមាននៅក្នុងប្រទេសកម្ពុជាភាគច្រើនសុទ្ធជារបស់អ្នកជិតខាង ឬសាយភាយពីបរទេសដែលជះឥទ្ធិពលយ៉ាងខ្លាំងក្លាដល់ប្រជាជនខ្មែរ។ ដូច្នេះហើយតើអ្នកដឹងទេ? តើនំប្រភេទណាខ្លះដែលមានអត្តសញ្ញាណជាតិខ្មែរ?

១.នំអន្សម៖ នំអន្សម គឺជានំប្រពៃណីរបស់ជនជាតិខ្មែរ ដែលមានប្រវត្តិយូរលង់ណាស់មកហើយ។ ប្រជាពលរដ្ឋខ្មែរស្ទើរគ្រប់ក្រុមគ្រួសារ តែងតែរៀបចំវេចនំអន្សម ជារៀងរាល់ឆ្នាំ មិនដែលខានក្នុងរដូវបុណ្យចូលឆ្នាំខ្មែរ និងបុណ្យភ្ជុំបិណ្ឌ ក្រៅពីពិធីបុណ្យទាំងពីរនេះ នៅក្នុងពិធីមង្គលការក៏គេតែងឃើញមានវេចនំអន្សមផងដែរ។

២.នំអាកោត្នោត៖ នំនេះមានប្រភពកំណើតមកពីប្រទេសកម្ពុជា ដោយគេយកម្សៅអង្ករខ្សាយចាក់ក្នុងកន្ទោងស្លឹកចារឬស្លឹកចេក រួចចំហុយជាការស្រេច។ នំអាកោត្នោត ពិតជាពេញនិយមខ្លាំងណាស់សម្រាប់ប្រជាជនខ្មែរ នាសម័យមុនរហូតមកដល់បច្ចុប្បន្ន។

៣.សង់ខ្យាល្ពៅ៖ សង់ខ្យាល្ពៅ គឺជាបង្អែមដែលមានដើមកំណើតនៅក្នុងប្រទេសកម្ពុជា ដែលទទួលឥទ្ធិពលពីប្រទេសឥណ្ឌាបុរាណ និងកាលពីសម័យអាណាចក្រខ្មែរ។

៤.នំកង៖ នំកង ជានំបុរាណខ្មែរដែលមានលក់ស្ទើរគ្រប់ទីកន្លែងនៃប្រទេសកម្ពុជា។ នំនេះ ធ្វើឡើងដោយម្សៅអង្ករដំណើបធ្វើឱ្យទៅជារាងកងដៃ និងយកទៅបំពង នៅពេលវាឆ្អិន គេយកវាទៅប្រឡាក់ស្ករតាំងម៉ែពីក្រៅជាការស្រេច ។

៥.នំគម និងនំបត់៖ នំគម និងនំបត់ មានដើមកំណើតក្នុងសម័យកាលបុរាណខ្មែរ ដែលគោរពព្រហ្មញសាសនា ពោលគឺការគោរពអង្គកាយព្រះសេវៈ ដែលតំណាងដោយនំអន្សម, គោរពអង្គកាយនាងឧមា តំណាងដោយនំគម, និងការគោរពផែនដី តំណាងដោយនំបត់។

៦.ក្រឡាន៖ ក្រឡាន គឺជាអាហារបស់ខ្មែរយើង ដែលមានប្រវត្តិយូរលង់ណាស់មកហើយ ដែលប្រជាជនខ្មែរសម័យមុនភាគច្រើនតែងយកនំនេះទៅហូបជាលក្ខណៈគ្រួសារ ឬហូបជំនួសបាយជាដើម។

៧.ចំពោះនំផ្សេងៗទៀតដូចជា នំជាល, នំចាំង, នំគ្រក់, នំកន្តំ, ទ្រៀបបាយ, ផ្លែអាយ, ពពាយ,នំក្រូច, នំពងអន្សង, នំលម្អងចេក, នំក្រៀប, នំចាក់ចុល, និងតាប៉ែ សុទ្ធតែជាបង្អែមខ្មែរនាសម័យបច្ចុប្បន្ន ដែលធ្វើដោយស្នាដៃកូនខ្មែរ៕

នៅពេលបានឮថា «កាហ្វេផលិតពីលាមកបក្សី» អ្នកនឹងមានចម្ងល់ថា តើគេបានដាក់លាមកបក្សីចូលក្នុងកាហ្វេមែនទេ ? ចម្លើយ គឺជាកាហ្វេផ្សំពីលាមកសត្វផ្សេងៗ និងបានឆ្លងកាត់ដំណាក់កាលផលិតខុសប្លែកពីគេ ។ កាហ្វេនេះមានរសជាតិឆ្ងាញ់ជាងកាហ្វេទូទៅ និងជួយកាត់បន្ថយជាតិអាស៊ីត កាត់បន្ថយរសជាតិល្វីង ហើយធ្វើឱ្យការផឹកកាហ្វេកាន់តែងាយស្រួល ។ កាហ្វេផ្សំពីលាមកសត្វ ទទួលបានការពេញនិយមច្រើន គឺកាហ្វេលាមកបក្សី, កាហ្វេលាមកស្វា, កាហ្វេលាមកដំរី និងកាហ្វេលាមកប្រជៀវ ។ កាហ្វេផ្សំពីលាមកសត្វទាំងនេះស្ថិតក្នុងចំណោមកាហ្វេមានតម្លៃថ្លៃ និងមានតម្រូវការច្រើននៅលើពិភពលោក ។

លោក Henrique Sloper ជាម្ចាស់ចម្ការកាហ្វេម្នាក់នៅរដ្ឋ Espirito Santo ប្រទេសប្រេស៊ីល និយាយថា កាលពីឆ្នាំ២០០៩ បក្សីមួយប្រភេទឈ្មោះចាគូ (Jacu Bird) បានមកយាយីចម្កាកាហ្វេរបស់លោក ហើយលោកមិនដឹងថា នៅថ្ងៃអនាគត បក្សីប្រភេទនេះនឹងមានចំណែករួមក្នុងអាជីវកម្មកាហ្វេទេ ។

លោក Henrique Sloper បានទូរស័ព្ទទៅភ្នាក់ងារការពារបរិស្ថានឱ្យមកជួយអន្តរាគមន៍ផងដែរ ប៉ុន្តែពួកគេមិនដឹងធ្វើបែបណា ទើបណែនាំឱ្យលោកធ្វើជារូបបក្សីធំៗដើម្បីដេញបក្សីចាគូ ។ លោកបន្តថា លោកបានអង្គុយមើលចម្ការកាហ្វេទាំងសោកស្តាយ ខណៈបក្សីទាំងនេះស៊ីគ្រាប់កាហ្វេអស់ ។ ក្រោយមក លោកគិតថា បើមិនអាចយកឈ្នះបក្សីទាំងនេះបានទេ លោកត្រូវតែរស់នៅជាមួយពួកវា ។

បក្សីឈ្មោះចាគូ បានស៊ីគ្រាប់កាហ្វេ បន្ទាប់មក វាក៏ជុះអាចម៍ជាគ្រាប់កាហ្វេចេញមក ។ ហេតុនេះ អ្នកធ្វើការក្នុងចម្ការកាហ្វេបាននាំគ្នាប្រមូលលាមកសត្វជំនួសគ្រាប់កាហ្វេ ។ បន្ទាប់មក គេត្រូវយកលាមកបក្សីទៅហាលថ្ងៃឱ្យស្ងួត និងលាងសម្អាត រួចយកវាទៅក្លាហ្សេឱ្យរឹង មុននឹងផលិតជាកាហ្វេ ។

រដ្ឋ Espirito Santo ប្រទេសប្រេស៊ីលបានផលិតកាហ្វេលំដាប់ទី៤ នៅលើពិភពលោក និងមានចម្ការកាហ្វេខាម៉ូស៊ីមតែមួយគត់ដែលបានយកលាមកបក្សីចាគូ មកផលិតជាកាហ្វេ ដោយគេបានលក់កាហ្វេប្រភេទនេះអស់រយៈពេល១០ឆ្នាំមកហើយ ។ វាជាកាហ្វេដ៏ថ្លៃបំផុតមួយនាពេលបច្ចុប្បន្ន គឺ១គីឡូក្រាមមានតម្លៃជិត២០០ដុល្លារអាមេរិក និងពេញនិយមខ្លាំងនៅប្រទេសបារាំង ជប៉ុន និងអង់គ្លេស ៕ ប្រភព ៖ khaosod

រដ្ឋធានីវ៉ាស៊ីនតោន៖ ក្រោយពេលប្រមុខការទូតសហរដ្ឋអាមេរិក បានទៅបំពេញទស្សនកិច្ច នៅក្នុងរដ្ឋធានីប៉េកាំង ដើម្បីបន្ធូរបន្ថយនូវភាពតានតឹងផ្នែកការទូត ដែលកំពុងតែធ្លាក់ចុះខ្លាំង ចាប់តាំងពីឆ្នាំចុងអាណត្ដិ នៃប្រធានាធិបតីមុនរបស់សហរដ្ឋអាមេរិក លោក ដូណាល់ ត្រាំ (Donald Trump) នោះមក ឥឡូវនេះ លោកប្រធានាធិបតី បៃដិន នៅតែការពារនូវការហៅមេដឹកនាំចិន ជាជនផ្ដាច់ការ រហូតធ្វើឲ្យមានប្រតិកម្មយ៉ាងខ្លាំង ពីប្រទេសមហាយក្សនៅអាស៊ីមួយនេះ។

សារព័ត៌មានរបស់ចក្រភអង់គ្លេស Daily Mail បានចេញផ្សាយ នៅថ្ងៃសុក្រ ទី២៣ ខែមិថុនា ថា លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានហៅសមភាគីចិន លោក ស៊ី ជិនពីង (Xi Jinping) ជាជនផ្ដាច់ការ ហើយថែមទាំងបានលើកឡើង ថា ការហៅបែបនេះ នឹងមិនធ្វើឲ្យខូចខាតដល់ទំនាក់ទំនង រវាងរដ្ឋាភិបាលក្រុងវ៉ាស៊ីនតោន និង ក្រុងប៉េកាំង នោះឡើយ។

ដោយឡែក រដ្ឋាភិបាលក្រុងប៉េកាំង បានស្ដីបន្ទោស សំដៅទៅលើប្រធានាធិបតីសហរដ្ឋអាមេរិក ដោយចាត់ទុក ថា ការអត្ថាធិប្បាយបែបនេះ ជាការមិនសមហេតុផល និង គ្មានការទទួលខុសត្រូវ ហើយវាជាសកម្មភាពញុះញង់ខាងនយោបាយ ដោយឥតលាក់លៀម។

លោកប្រធានាធិបតី ចូ បៃដិន កាលពីថ្ងៃព្រហស្បតិ៍ បានថ្លែង នៅក្នុងពិធីរៃអង្គាសប្រាក់បិទទ្វារមួយ ថា លោក ស៊ី ជិនពីង ជាជនផ្ដាច់ការ។ គាត់រំពឹង ថា គាត់នឹងជួបជាមួយលោកប្រធានាធិបតី ស៊ី នៅក្នុងពេលណាមួយ នាពេលខាងមុខនេះ។

លោកប្រធានាធិបតី បៃដិន នៅតែការពារនូវការហៅមេដឹកនាំចិន លោក ស៊ី ជិនពីង ជាជនផ្ដាច់ការ។ គាត់បានលើកឡើង ថា ការហៅបែបនេះ នឹងមិនមានផលវិបាកណាមួយកើតឡើងនោះឡើយ ថ្វីបើក្រុងប៉េកាំង បានចោទប្រកាន់ មកលើគាត់ ជាអ្នកបង្កនូវការញុះញង់ខាងនយោបាយយ៉ាងណាក្ដី។

លោក បៃដិន ក្លាយជាប្រធានាធិបតីលើកទី១ នៅក្នុងប្រវត្ដិសាស្រ្ដថ្មីៗនេះ បានប្រើប្រាស់វោហារស័ព្ទ វាយប្រហារសំដៅលើមេដឹកនាំចិន ថា ជា«ជនផ្តាច់ការ»។ ការធ្វើអត្ថាធិប្បាយរបស់លោកប្រធានាធិបតី បៃដិន បានកើតឡើង នៅក្នុងកម្មវិធីរៃអង្គាសប្រាក់បិទទ្វារមួយ ស្ថិតក្នុងរដ្ឋកាលីហ្វ័រញ៉ា សហរដ្ឋអាមេរិក។

នៅពេលសួរ ថា តើពាក្យសម្ដីរបស់គាត់ នឹងធ្វើឱ្យមានភាពស្មុគស្មាញ ដល់ទំនាក់ទំនងជាមួយប្រទេសចិន ដែរឬទេ ខណៈលរដ្ឋបាលរបស់គាត់ កំពុងតែព្យាយាមបន្ធូរបន្ថយនូវភាពតានតឹងនោះ? ប៉ុន្ដែភ្លាៗមនោះ លោកប្រធានាធិបតី បៃដិន បានឆ្លើយយ៉ាងរហ័ស ថា «ទេ»។

ទំនាក់ទំនងការទូត រវាងសហរដ្ឋអាមេរិក និង ចិន បានចាប់ផ្ដើមតានតឹង កាន់តែខ្លាំងឡើង ក្រោយពេលលោកប្រធានាធិបតី ដូណាល់ ត្រាំ បានបង្កើតសង្គ្រាមពាណិជ្ជកម្មជាមួយនឹងក្រុងប៉េកាំង។ បន្ថែមពីលើភាពតានតឹងដែលមានស្រាប់នោះ កាលពីចុងឆ្នាំ២០២២ លោកប្រធានាធិបតី ចូ បៃដិន បានថ្លែង អំពីកងទ័ពសហរដ្ឋអាមេរិក នឹងចូលទៅជួយការពារតៃវ៉ាន់ នៅក្នុងព្រឹត្ដិការណ៍លុកលុយ ពីកម្លាំងកងទ័ពរំដោះប្រជាជនចិន និង ការបាញ់ទម្លាក់បាឡុងរបស់ចិន ដោយចោទប្រកាន់ អំពីការហោះឈ្លបយកការណ៍ នៅពីលើតំបន់ហាមឃាត់នុយក្លេអ៊ែរដ៏រស៊ើបរបស់សហរដ្ឋអាមេរិក។ ប៉ុន្ដែនៅក្នុងដំណើរទស្សនកិច្ចរបស់លោក អេនតូនី ប្ល៊ីនខេន រដ្ឋមន្រ្ដីក្រសួងការបរទេសសហរដ្ឋអាមេរិក ទៅកាន់ប្រទេសចិន ក៏ជាការត្រួសត្រាយផ្លូវមួយ សម្រាប់ការបន្ធូរបន្ថយនូវភាពតានតឹងផងដែរ។ ប្រទេសមហាអំណាចទាំង២នេះ ក៏បានប្ដេជ្ញារក្សាស្ថិរភាព លើទំនាក់ទំនងការទូតរបស់ខ្លួន៕