ប្រទេសឡាវ ៖ គេហទំព័រផ្សព្វផ្សាយព័ត៌មានអាជីវកម្ម និងហិរញ្ញវត្ថុ Business News Asia បានធ្វើការវិភាគ និងបញ្ចេញយោបល់ពាក់ព័ន្ធនឹងក្រុមហ៊ុនឧស្សាហកម្ម និងប្រព័ន្ធសេដ្ឋកិច្ចរបស់ប្រទេសផ្សេងៗនៅតំបន់អាស៊ី ។ គេហទំព័រនេះបានចាត់ចំណាត់ថ្នាក់ប្រាក់គីបរបស់ឡាវ ស្ថិតក្នុងចំណោមប្រាក់ដែលមានតម្លៃទាបបំផុតនៅលើពិភពលោក ។

ការចាត់ចំណាត់ថ្នាក់នេះ គឺមកពីប្រទេសឡាវមានសេដ្ឋកិច្ចធ្លាក់ចុះ ហើយត្រូវពឹងផ្អែកលើទំនិញនាំចូលយ៉ាងខ្លាំង ជំនួសឱ្យទំនិញផលិតនៅក្នុងស្រុក និងធ្វើឱ្យទុនបម្រុងអន្តរជាតិធ្លាក់ចុះជាលំដាប់ ។ ដូចគ្នានេះ ប្រាក់របស់ប្រទេសផ្សេងទៀតក៏មានតម្លៃទាបដែរ ដូចជា ប្រាក់ដុងរបស់វៀតណាម និងប្រាក់របស់អ៊ូសបេគីស្ថាន ហើយប្រាក់គីបរបស់ឡាវត្រូវបានគេចាត់ចំណាត់ថ្នាក់ជារូបិយប័ណ្ណមានតម្លៃទាបខ្លាំង ដោយសារហេតុផលជាច្រើន ។

ក្នុងអត្ថបទចេញផ្សាយកាលពីដើមខែសីហា ឆ្នាំ២០២៣ បង្ហាញថា ឡាវគឺជាប្រទេសតូចមួយដែលមានរបបសេដ្ឋកិច្ចចម្រុះតិចតួច ។ ដូច្នេះ នេះជាកត្តាសំខាន់ដែលប៉ះពាល់ដល់ការធ្លាក់ថ្លៃប្រាក់គីប ហើយវាបានជះឥទ្ធិពលយ៉ាងខ្លាំងដល់ទំនុកចិត្តរបស់វិនិយោគិនបរទេសដែលមានសក្តានុពលទៀតផង ។ ប្រសិនបើគ្មានការចាត់វិធានការណាមួយដើម្បីពង្រឹងប្រាក់គីបទេនោះ វាអាចគំរាមកំហែងដល់ស្ថិរភាពសេដ្ឋកិច្ចឡាវ និងធ្វើឱ្យប៉ះពាល់ដល់ការវិនិយោគទុនពីក្រៅប្រទេស និងការធ្វើពាណិជ្ជកម្ម ។

ក្រៅពីនេះ ប្រទេសឡាវបានពឹងផ្អែកយ៉ាងខ្លាំងលើការនាំចេញទិន្នផលកសិកម្មទៅក្រៅប្រទេស និងត្រូវពឹងផ្អែកលើពលករឡាវដែលទៅធ្វើការនៅក្រៅប្រទេស ។ បើតម្លៃទិន្នផលកសិកម្មរបស់ឡាវធ្លាក់ចុះ វានឹងធ្វើឱ្យប្រទេសនេះទទួលបានប្រាក់ចំណូលតិចជាងមុនពីការនាំចេញ ។ ដូចគ្នានេះដែរ បើចំនួនការផ្ញើប្រាក់មកប្រទេសឡាវរបស់ពលករឡាវធ្លាក់ចុះ ប្រាក់គីបនឹងរងផលប៉ះពាល់ដូចគ្នា ។

ទោះយ៉ាងណា ដើម្បីបង្កើនការផ្គត់ផ្គង់រូបិយប័ណ្ណបរទេសផ្សេងៗ និងតម្រូវការប្រាក់គីប កាលពីខែកក្កដា ឆ្នាំ២០២៣ នាយករដ្ឋមន្ត្រីឡាវ លោក សនឆ័យ ស៊ីផាន់ដន បានចេញលិខិត១ច្បាប់ទៅកាន់ធនាគារឡាវ និងក្រសួងឧស្សាហកម្ម និងពាណិជ្ជកម្ម ដើម្បីឱ្យប្រាកដចិត្តថា អត្រាប្តូរប្រាក់បរទេសដែលទទួលបានតាមរយៈការនាំចេញផលិតផលទៅក្រៅប្រទេស និងការវិនិយោគពីក្រៅប្រទេស អាចចូលមកប្រទេសឡាវតាមរយៈប្រព័ន្ធធនាគារ ។ លើសពីនេះ ប្រទេសឡាវត្រូវបង្កើនការព្យាយាមគ្រប់ផ្នែកផងដែរ ដើម្បីពង្រឹងរូបិយប័ណ្ណជាតិរបស់ខ្លួន ៕ ប្រភព ៖ AEC connect

ប្រទេសចិន ៖ សារព័ត៌មានចិនឈ្មោះ Nale Business Delhi បានចុះផ្សាយតួលេខរបស់មជ្ឈមណ្ឌលស្រាវជ្រាវ និងអភិវឌ្ឍន៍ប្រជាជនចិនថា អត្រាកំណើតថ្មីរបស់ចិននៅឆ្នាំ២០២២ បានធ្លាក់ចុះមកកម្រិតទាបបំផុតក្នុងចំណោមប្រទេសដែលមានពលរដ្ឋលើសពី១០០លាននាក់ ។ អត្រាកំណើតថ្មីធ្លាក់ចុះនៅប្រទេសចិន គឺដូចគ្នានឹងប្រទេសផ្សេងទៀតដូចជា កូរ៉េខាងត្បូង តៃវ៉ាន់ ហុងកុង និងសិង្ហបុរី ។

ការបារម្ភពីបញ្ហាពលរដ្ឋចិនធ្លាក់ចុះជាលើកដំបូងក្នុងរយៈពេល៦ទសវត្សរ៍ និងចំនួនពលរដ្ឋវ័យចំណាស់កើនឡើងយ៉ាងឆាប់រហ័សបានធ្វើឱ្យរដ្ឋាភិបាលក្រុងប៉េកាំងចាត់វិធានការជំរុញអត្រាកំណើតថ្មី ដូចជា ការលើកទឹកចិត្តផ្នែកហិរញ្ញវត្ថុ និងលើកកម្ពស់ការថែទាំកុមារជាដើម ។

កាលពីខែឧសភា ឆ្នាំ២០២៣ ប្រធានាធិបតីចិន លោក ស៊ី ជិនពីង បានធ្វើជាប្រធានកិច្ចប្រជុំការសិក្សាអំពីអត្រាកំណើតថ្មី ដោយប្រទេសចិននឹងផ្តោតលើការសិក្សាផ្នែកវិទ្យាសាស្ត្រ និងបច្ចេកវិទ្យា ។ ប្រទេសចិនបានលើកកម្ពស់គុណភាពពលរដ្ឋ និងព្យាយាមរក្សាការមានកូនកម្រិតមធ្យម ក្នុងគោលបំណងគាំទ្រការរីកចម្រើនសេដ្ឋកិច្ចនាថ្ងៃអនាគត ។

គេសង្កេតឃើញថា ពលរដ្ឋចិនត្រូវចំណាយប្រាក់យ៉ាងច្រើនដើម្បីចិញ្ចឹមកូន ហើយពួកគេត្រូវឈប់ធ្វើការនៅក្រៅផ្ទះផងដែរ ។ ហេតុនេះ វាជាកត្តាមួយធ្វើឱ្យនារីភាគច្រើនសម្រេចចិត្តពន្យារពេលមានកូន ឬគ្មានកូន ។ លើសពីនេះ ស្ទើរគ្រប់ទីកន្លែងនៅប្រទេសចិនមានទំនៀមទម្លាប់ឱ្យស្ត្រីជាអ្នកមើលថែទាំកូនទៀតផង ។ ក្នុងរយៈពេលប៉ុន្មានខែកន្លងមក ប្រទេសចិនមានគោលការណ៍ឱ្យបុរសជួយសម្រាលបន្ទុកភរិយាក្នុងការចិញ្ចឹមកូន ប៉ុន្តែមានតែតំបន់មួយចំនួនប៉ុណ្ណោះដែលអនុញ្ញាតឱ្យបុរសអាចសុំច្បាប់ការងារមកថែទាំកូននៅផ្ទះ ។

សមាគមផែនការគ្រួសារប្រចាំទីក្រុងហុងកុងបញ្ជាក់ថា ចំនួនស្ត្រីគ្មានកូននៅទីក្រុងហុងកុងបានកើនឡើងទ្វេដង បើធៀបនឹងរយៈពេល៥ឆ្នាំមុន គឺស្ត្រីគ្មានកូននៅហុងកុងបានកើនឡើងដល់៤៣,២% នៅឆ្នាំ២០២២ ។ ចំណែកអត្រាភាគរយនៃគូស្វាមី-ភរិយាដែលមានកូនម្នាក់ ឬ២នាក់ ក៏បានធ្លាក់ចុះផងដែរ ៕ ប្រភព ៖ Bangkok biznews

ជាទូទៅពេលនៅក្នុងលំហដោយមិនពាក់ឧបករណ៍ការពារ មនុស្សអាចឆ្លងផុតពីកង្វះអុកស៊ីសែនត្រឹមតែ ១០-១៥ វិនាទីប៉ុណ្ណោះ ហើយក៏ដាច់ខ្យល់ស្លាប់ភ្លាមៗ។
យោងតាមលោក Stefaan de Mey មន្ត្រីយុទ្ធសាស្ត្រនៅទីភ្នាក់ងារអវកាសអឺរ៉ុប (ESA) បាននិយាយថា ក្នុងរយៈពេលដ៏ខ្លីបំផុតប្រហែល ១០-១៥ វិនាទី មនុស្សនឹងបាត់បង់ស្មារតីដោយសារតែខ្វះអុកស៊ីសែន នៅក្នុងភាពងងឹតនៃសកលលោក។ អុកស៊ីសែនក្លាយជាបញ្ហាធ្ងន់ធ្ងរ ដែលបណ្តាលឱ្យស្ទះសរសៃឈាមភ្លាមៗ និងប៉ះពាល់ដល់រាងកាយមនុស្សយ៉ាងរហ័ស។

ការហោះហើរក្នុងលំហត្រូវបានផ្សារភ្ជាប់ជាមួយនឹងបញ្ហាប្រឈមជាច្រើន និងបរិយាកាសខ្លាំង ដូច្នេះការបង្កើតលក្ខខណ្ឌដូចផែនដីសម្រាប់ជីវិតដើម្បីវិវត្ត និងអភិវឌ្ឍគឺមានសារៈសំខាន់។ ឈុតអវកាសអនុញ្ញាតឱ្យអ្នកអវកាសយានិកចេញទៅក្រៅយានអវកាសក្នុងរយៈពេលខ្លី ដោយផ្តល់ខ្យល់ ទឹក សម្ពាធ និងការការពាររាងកាយ។

បន្ថែមពីលើការផ្តល់អុកស៊ីសែន និងសម្ពាធសំខាន់ៗ អាវអវកាសនេះក៏ការពារអវកាសយានិកពីការគំរាមកំហែង និងគ្រោះថ្នាក់ផងដែរ។ ឈុតអវកាសត្រូវបានរចនាឡើងដើម្បីការពាររាងកាយរបស់អវកាសយានិកនៅក្នុងលំហ មិនថាអវកាសយានិកស្ថិតនៅក្នុងព្រះអាទិត្យ ឬនៅក្នុងម្លប់នោះទេ ពួកគេនឹងជួបប្រទះនូវសីតុណ្ហភាពខ្លាំងចាប់ពី ១២០ ទៅ ១៥០ អង្សាសេនៅក្នុងគន្លងផែនដីទាប ដែលស្ថានភាពនេះនឹងបណ្តាលឱ្យរលាកឬត្រជាក់។

ឈុតយានអវកាសក៏ទប់ស្កាត់ប្រភេទផ្សេងៗនៃវិទ្យុសកម្មផងដែរ។ ពួកគេធ្វើដំណើរក្នុងល្បឿនរាប់សិបគីឡូម៉ែត្រក្នុងមួយវិនាទី ហើយបង្កការគំរាមកំហែងដល់ផ្កាយរណប យានអវកាស និងការដើរលើលំហ។ ដូចនេះ ឈុតការពារត្រូវបានរចនាឡើងដោយមានស្រទាប់ជាច្រើនដើម្បីការពារអវកាសយានិកពីមីក្រូម៉េតេអ័រ ឬកំទេចកំទីអវកាសដែលកំពុងធ្វើដំណើរជុំវិញគន្លងផែនដី៕ ប្រភព៖vnxepress

បរទេស៖ ប្រទេសចិនមានព្រៃឈើសិប្បនិមិត្តចំនួន ៨៧.៦ លានហិចតា ហើយបានសំរេចនៅសមិទ្ធិផលជាច្រើនក្នុងការការពារ និងការស្តារអេកូឡូស៊ី។
យោងតាមរបាយការណ៍របស់រដ្ឋបាលព្រៃឈើ និងវាលស្មៅជាតិនៃប្រទេសចិន (NFGA) ដែលបានប្រកាសកាលពីថ្ងៃទី ១៥ ខែសីហាថា ចិនគឺជាប្រទេសដែលបានរក្សាទុកព្រៃឈើបង្កើតឡើងដោយមនុស្សចំនួន ៨៧.៦ លានហិចតា ដែលជាប់ចំណាត់ថ្នាក់លេខ ១ នៅលើពិភពលោក។ ប្រទេសនេះក៏បានកែលម្អគុណភាពប្រព័ន្ធអេកូឡូស៊ីជាបន្តបន្ទាប់ជាមួយនឹងការរួមចំណែកដ៏ធំបំផុតចំពោះការកើនឡើងនៃតំបន់បៃតងសកល ដោយធ្វើឱ្យមានសមិទ្ធិផលលេចធ្លោក្នុងការគ្រប់គ្រងវាលខ្សាច់ និងការសាងសង់ឧទ្យានជាតិ។ NFGA ក៏បានកំណត់ថ្ងៃទី១៥ ខែសីហា នេះគឺជាទិវាជាតិអេកូលើកដំបូងរបស់ប្រទេសផងដែរ។

បច្ចុប្បន្ន ប្រទេសចិនកំពុងសាងសង់ប្រព័ន្ធឧទ្យានជាតិដ៏ធំបំផុតរបស់ពិភពលោកទាក់ទងនឹងតំបន់ការពារ រួមទាំងតំបន់សក្តានុពលចំនួន ៤៩ ដែលមានផ្ទៃដីសរុបជាង ១ លានគីឡូម៉ែត្រការ៉េដែលស្មើនឹងប្រហែល ១០% នៃផ្ទៃដីរបស់ប្រទេសចិន។ វានឹងក្លាយជាជម្រករបស់សត្វឆ្អឹងខ្នងលើដីជាង ៥,០០០ ប្រភេទ និងរុក្ខជាតិជាង ២៩,០០០ ប្រភេទ។ ប្រទេសចិនក៏ការពារប្រព័ន្ធអេកូឡូស៊ីដោយបង្កើតបទប្បញ្ញត្តិជាច្រើនលើព្រៃឈើ វាលស្មៅ ដីសើម វាលខ្សាច់ និងតំបន់ផ្សេងៗទៀត។ ជាលទ្ធផល អត្រានៃការខូចខាតដោយសារភ្លើងឆេះព្រៃគឺទាបជាងមធ្យមភាគសកល នេះបើយោងតាម NFGA។

ប្រទេសនេះក៏បានរួមចំណែកប្រហែលមួយភាគបួននៃការកើនឡើងនៅក្នុងតំបន់បៃតងជាសកល ដែលនាំមុខគេលើពិភពលោក។ តំបន់វាលស្មៅឈានដល់ជាង ២៦៤.៥ លានហិកតា ដែលជាទំហំធំជាងគេបំផុតនៅលើពិភពលោក ជាមួយនឹងគម្របបន្លែសរុប ៥០.៣២% ។ ដីសើមគ្របដណ្តប់លើផ្ទៃដីជាង ៥៦.៣ លានហិកតា ជាប់ចំណាត់ថ្នាក់ទី ៤ លើពិភពលោក។ ដូចនេះ បច្ចុប្បន្នការអនុវត្តគម្រោងអេកូឡូស៊ីសំខាន់ៗដូចជាគម្រោងដាំដើមឈើ TSFP ប្រទេសចិនក៏សម្រេចបាននូវតំបន់គ្រប់គ្រងវាលខ្សាច់ជាង ២០ លានហិកតា និងឧទ្យានជាតិចំនួន ៥ ដំបូងក្នុងប្រព័ន្ធទទួលបានលទ្ធផលវិជ្ជមាន៕ប្រភព៖vnexpress

ប្រទេសកូរ៉េខាងត្បូង ៖ ក្នុងសង្គមប្រទេសកូរ៉េខាងត្បូងនាពេលបច្ចុប្បន្ននេះ មានហាងលក់ទំនិញ ហាងលក់ម្ហូបអាហារ និងហាងកាហ្វេប្រមាណជាង៤០០កន្លែងបានចាប់ផ្តើមបិទស្លាកសញ្ញានៅមាត់ទ្វារថា «ហាមនាំក្មេងចូល» ឬ «តំបន់គ្មានក្មេង» ។ ការបិទស្លាកសញ្ញានេះ គឺដូចគ្នានឹងការបិទស្លាកសញ្ញា «ហាមសត្វចិញ្ចឹម» ឬ «ហាមជក់បារី» ផងដែរ ។

មនុស្សភាគច្រើនអាចគិតថា ការប្រកាសហាមឃាត់នេះជាការរើសអើង ប៉ុន្តែការពិត ការធ្វើបែបនេះកំពុងក្លាយជារឿងធម្មតានៅប្រទេសកូរ៉េខាងត្បូង ។ កន្លងមក មានម្តាយជាច្រើននាក់មិនបានមើលការខុសត្រូវកូន ឬក្មួយរបស់ខ្លួនឱ្យល្អទេ នៅពេលពួកគេនាំក្មេងតូចមកកាន់ទីកន្លែងសាធារណៈ រហូតរំខានដល់អ្នកដទៃ និងធ្វើឱ្យប៉ះពាល់ដល់ហាងផងដែរ ។

ជាក់ស្តែង កាលពីឆ្នាំ២០២១ មានក្មេងម្នាក់បានរលាកខ្លួនដោយសារទឹកស៊ុប ហើយស្ត្រីជាម្តាយបានទាមទារឱ្យហាងទទួលខុសត្រូវថ្លៃព្យាបាលកូនរបស់ខ្លួនទៀតផង ដោយប្រើប្រាស់បណ្តាញសង្គមដាក់សម្ពាធមកលើហាង ។ ប៉ុន្តែក្រោយមក ករណីនេះត្រូវបានគេរិះគន់ស្ត្រីជាម្តាយវិញ នៅពេលមានភស្តុតាងពីកាមេរ៉ាសុវត្ថិភាពបង្ហាញថា នាងបានបណ្តោយឱ្យកូនរត់លេងពេញបរិវេណហាង រហូតរត់ទៅបុកបុគ្គលិករត់តុ ដែលកំពុងលើកម្ហូបឱ្យភ្ញៀវ និងធ្វើឱ្យទឹកសម្លកំពប់លើខ្លួនប្រាណក្មេង ។

តាមការស្ទង់មតិរបស់សារព័ត៌មានកូរ៉េខាងត្បូងបង្ហាញថា ឪពុកម្តាយ ឬមនុស្សពេញវ័យទាំងអស់ដែលចង់ចូលក្នុងហាងកាហ្វេណាមួយ ពួកគេត្រូវតែពិនិត្យមើលស្លាកសញ្ញានៅមុខហាងសិន មុននឹងសម្រេចចិត្តនាំក្មេងចូល ។ អ្នកឆ្លើយតបការស្ទង់មតិប្រមាណ៧០% បានយល់ស្របចំពោះការបិទស្លាកសញ្ញា «ហាមនាំក្មេងចូល» ។

ការប្រកាសហាមនាំក្មេងចូលក្នុងហាង មិនមែនជារឿងថ្មី ឬប្លែកទេសម្រាប់ពលរដ្ឋកូរ៉េខាងត្បូង ព្រោះកន្លងមក ហាងខ្លះបានបិទស្លាកសញ្ញា «ហាមមនុស្សចាស់» មកប្រើប្រាស់សេវាកម្មក្នុងហាងផងដែរ ។ ចំពោះហេតុផល គឺអតិថិជនដែលមានអាយុចាប់ពី៤៩ឆ្នាំឡើងទៅ ពួកគេតែងតែរំខានបុគ្គលិកក្នុងហាងជានិច្ច ។ បើទោះជាប្រទេសផ្សេងៗមិនយល់ស្របជាមួយបម្រាមនេះ ប៉ុន្តែនៅប្រទេសកូរ៉េខាងត្បូងចាត់ទុកថា វាមិនមែនជារឿងខុសច្បាប់ទេ ៕ ប្រភព ៖ chiangmai news

រាជធានីបាងកក៖ ក្រោយពេលមានញត្ដិតវ៉ា ជុំវិញសភាបានច្រានចោលនូវការឈរឈ្មោះជាថ្មីរបស់មេដឹកនាំគណបក្សឆ្ពោះទៅមុខ (Move Forward Party) ហៅកាត់ MFP រួចមក ឥឡូវ តុលាការធម្មនុញ្ញរបស់ប្រទេសថៃ បានសម្រេចបដិសេធញត្ដិទាំងនោះ ហើយសកម្មភាពបែបនេះ បានធ្វើឲ្យក្ដីសង្ឃឹមរបស់គណបក្សឈ្នះឆ្នោតមួយនេះ ឆ្ពោះទៅកាន់តំណែងនាយករដ្ឋមន្រ្ដី ត្រូវរលាយអស់។

សារព័ត៌មានរបស់ថៃ Bangkok Post បានចេញផ្សាយ កាលពីល្ងាច ថ្ងៃពុធ ទី១៦ ខែសីហា ថា តុលាការធម្មនុញ្ញ កាលពីថ្ងៃពុធ បានសម្រេចចិត្តជាឯកច្ឆន្ទ ច្រានចោល ចំពោះសំណើការពារសិទ្ធិរបស់មេដឹកនាំគណបក្សឆ្ពោះទៅមុខ (Move Forward) លោក ភីថា លីមចារឿនរ៉ាត (Pita Limjaroenrat) នៅក្នុងការតែងតាំងជាថ្មី ដើម្បីឲ្យសមាជិកសភា បោះឆ្នោត ជានាយករដ្ឋមន្ត្រី។

ការសម្រេចរបស់តុលាការធម្មនុញ្ញ បានបង្ហាញផ្លូវយ៉ាងច្បាស់ សម្រាប់ការបោះឆ្នោតជាថ្មីដើម្បីជ្រើសរើសនាយករដ្ឋមន្ត្រី ខណៈលោក វ៉ាន់ មូហាមេដ ណ័រ ម៉ាថា (Wan Muhamad Noor Matha) ប្រធារដ្ឋសភា បានអះអាង ថា ប្រហែលជានឹងត្រូវបោះឆ្នោត នៅថ្ងៃអង្គារ ទី២២ ខែសីហា។

តុលាការធម្មនុញ្ញរបស់ប្រទេសថៃ បានបញ្ជាក់ ថា សំណើទាំងនេះ បានស្នើមកពីក្រុមមនុស្ស ចំនួន១៨នាក់ ដែលបានបោះឆ្នោត គាំទ្រដល់គណបក្សឆ្ពោះទៅមុខ (MFP) នៅក្នុងការបោះឆ្នោតសកល កាលពីថ្ងៃទី១៤ ខែឧសភា និង អ្នកបោះឆ្នោត ចំនួន១៣នាក់ផ្សេងទៀត នៅក្នុងការបោះឆ្នោតសកល ហើយសមាជិកសភា របស់គណបក្ស MFP គឺលោក ផានយ៉ារ៉ាត ណានថាហ៊្វូស៊ីថាណុន (Panyarat Nanthaphusitanont)។

អ្នកគាំទ្រដល់គណបក្សឆ្ពោះទៅមុខ បានស្នើសុំដល់តុលាការធម្មនុញ្ញ សម្រេចលើសេចក្តីសម្រេចរបស់សភា កាលពីថ្ងៃទី១៩ ខែកក្កដា ដោយបដិសេធ ចំពោះការតែងតាំងជាថ្មីរបស់លោក ភីថា ប្រធានគណបក្សឆ្ពោះទៅមុខ ជានាយករដ្ឋមន្ត្រី ដោយសារតែពួកគេចាត់ទុក ថា ដំណោះស្រាយរបស់សភា រំលោភសិទ្ធិរបស់ពួកគេ ស្របតាមច្បាប់រដ្ឋធម្មនុញ្ញ។

តុលាការធម្មនុញ្ញ កាលពីថ្ងៃពុធ បានសម្រេច ថា ញត្តិដែលតុលាការ នឹងពិចារណា ត្រូវតែស្នើមកពីប្រជាជន ដែលសិទ្ធិ ឬ សេរីភាព ត្រូវបានរំលោភ ដោយផ្ទាល់ តាមការអនុវត្តសិទ្ធិអំណាចរបស់រដ្ឋ។ នៅក្នុងករណីនេះ អ្នកដាក់ញត្តិ មិនត្រូវបានតែងតាំង ជាបេក្ខជននាយករដ្ឋមន្ត្រី នោះឡើយ។ សិទ្ធិ ឬសេរីភាពរបស់ពួកគេ មិនត្រូវបានរំលោភ ដោយផ្ទាល់នោះទេ។ ដូច្នេះ តុលាការ បានសម្រេចជាឯកច្ឆន្ទ ថា មិនទទួលយកញត្តិ សម្រាប់ការពិចារណានោះដែរ ហើយតុលាការ ក៏បានបញ្ជាក់នៅក្នុងសេចក្តីសម្រេចរបស់ខ្លួន។

សភា កាលពីថ្ងៃទី១៩ ខែកក្កដា បានច្រានចោលនូវការតែងតាំងជាថ្មីដល់លោក ភីថា សម្រាប់សភាបោះឆ្នោតជ្រើសរើសនាយករដ្ឋមន្ត្រី ដោយការបោះឆ្នោត ភាគច្រើន ធ្វើតាមនីតិវិធី។ រីឯសមាជិកសភា មកពីគណបក្សជាគូប្រជែងរបស់គាត់ បានប្រកែក ថា បទប្បញ្ញត្តិរបស់សភា ត្រង់មាត្រា៤១ ហាមឃាត់នូវការបញ្ជូនមកវិញ ចំពោះសំណើដែលបានបរាជ័យ នៅក្នុងសម័យប្រជុំដូចគ្នា ហើយករណីនេះ ក៏រួមបញ្ចូល ទាំងការតែងតាំងជាថ្មីរបស់លោក ភីថា ផងដែរ។

លោក ភីថា មេដឹកនាំគណបក្សឆ្ពោះទៅមុខ ត្រូវបានតែងតាំងជាថ្មី ក្រោយការប៉ុនប៉ងជាលើកដំបូងរបស់គាត់ ដើម្បីក្លាយជានាយករដ្ឋមន្ត្រី មិនទទួលបានការគាំទ្រពីសភា កាលពីថ្ងៃទី១៣ ខែកក្កដា។

ដោយសារតែផ្លូវសម្រាប់លោក ភីថា ឆ្ពោះទៅកាន់តំណែងនាយករដ្ឋមន្ត្រី ត្រូវបានរារាំងហើយនោះ គណបក្សភឿថៃ បានដកខ្លួនចេញពីក្រុមសម្ពន្ធភាពចម្រុះចំនួន៨គណបក្ស ដឹកនាំដោយគណបក្សឆ្ពោះទៅមុខ ហើយជំនួសមកវិញ កំពុងតែព្យាយាមបង្កើតរដ្ឋាភិបាលថ្មី ជាមួយនឹងបេក្ខជននាយករដ្ឋមន្ត្រីរបស់ខ្លួន គឺលោក ស្រេតថា ថាវីស៊ីន (Srettha Thavisin)។

គណបក្សឆ្ពោះទៅមុខ (MFP) ជាអ្នកឈ្នះ នៅក្នុងការបោះឆ្នោតសកលរបស់ប្រទេសថៃ កាលពីថ្ងៃទី១៤ ខែសឧសភា ដោយទទួលបានអាសនៈសភា ចំនួន១៥១ ខណៈគណបក្សភឿថៃ ជាប់លំដាប់លេខ២ ដោយទទួលបានអាសនៈចំនួន១៤១។

តុលាការធម្មនុញ្ញ កាលពីថ្ងៃទី១៩ ខែកក្កដា បានព្យួរលោក ភីថា ពីការងារជាសមាជិកសភា ដោយរង់ចាំការសម្រេចលើឋានៈសភារបស់គាត់ ទាក់ទងនឹងការកាន់កាប់ភាគហ៊ុនពីមុនរបស់គាត់ នៅក្នុង iTV Plc ។ រដ្ឋធម្មនុញ្ញ ហាមម្ចាស់ភាគហ៊ុនរបស់អង្គភាពប្រព័ន្ធផ្សព្វផ្សាយ មិនឱ្យឈរឈ្មោះ នៅក្នុងការបោះឆ្នោតសកល។ ទន្ទឹមគ្នានេះ គណៈកម្មការរៀបចំការបោះឆ្នោត ដែលបានស៊ើបអង្កេតលើបណ្តឹងនេះ ត្រូវបានរាយការណ៍ កាលពីថ្ងៃអង្គារ ថា ស្ថាប័នបោះឆ្នោតមួយនេះ បានផ្តល់អនុសាសន៍ឱ្យទម្លាក់ចោលនូវការចោទប្រកាន់នេះ៕