ប្រទេសស្វីស ៖ ត្រីយន្តឈ្មោះថា «Belle» ត្រូវបានអភិវឌ្ឍន៍ឡើង និងច្នៃម៉ូដដោយក្រុមនិស្សិតវិស្វកម្មមេកានិចនៅ ETH Zurich ជាវិទ្យាស្ថានបច្ចេកវិទ្យាសហព័ន្ធស្វីស ។ ការបង្កើតត្រីយន្តនេះឡើង ក្នុងគោលបំណងជួយឱ្យអ្នកស្រាវជ្រាវផ្នែកសមុទ្រអាចប្រមូលទិន្នន័យនៅក្រោមទឹក ដោយការចុះទៅក្នុងសមុទ្រ ឬរំខានធម្មជាតិនៅបាតសមុទ្រឱ្យតិចបំផុត ។ បើតាមសង្កេតឃើញថា រូបរាង និងការបម្លាស់ទីរបស់វា ស្ទើរមិនខុសប្លែកគ្នាពីត្រីពិតប្រាកដឡើយ ។

សមាជិកម្នាក់ក្នុងក្រុមផលិតត្រីយន្តលើកឡើងថា ខាងក្រុមការងារត្រូវការថតរូបភាព និងសិក្សាពីប្រព័ន្ធអេកូឡូស៊ីនៅបាតសមុទ្រ ។ ហេតុនេះ ត្រីយន្តដែលគេបញ្ជូនឱ្យទៅត្រួតពិនិត្យនៅបាតសមុទ្រ គឺត្រូវស្ងៀមស្ងាត់ គ្មានសំឡេងរំខាន ហើយវាមានលក្ខណៈឱ្យដូចត្រីបំផុត ដើម្បីឱ្យសត្វមានជីវិតនៅបាតសមុទ្រទទួលស្គាល់ថា វាជាពពួកសត្វមានជីវិតដូចគ្នា ។

គេបានប្រើប្រាស់បញ្ញាសិប្បនិម្មិត (AI) ដើម្បីឱ្យវាអាចបម្លាស់ទីដោយខ្លួនឯង ខណៈគេប្រើខ្លីបស៊ីលីក្លូន ។ ខ្លីបស៊ីលីក្លូននឹងមានច្រកចំនួន២ សម្រាប់ការស្រូបទឹកចេញ-ចូល ដើម្បីឱ្យវាអាចបម្លាស់ទីទៅមកបានជាមួយកន្ទុយ ។ ហេតុនេះ នៅពេលត្រីយន្តហែលទឹក វានឹងគ្មានរលកនៅបាតសមុទ្រទេ ។ ត្រីយន្តនេះមានប្រវែង១ម៉ែត្រ និងទម្ងន់១០គីឡូក្រាម ។

ក្រៅពីត្រីយន្តអាចថតរូបភាពនៅបាតសមុទ្របានច្បាស់ហើយ វាក៏អាចប្រមូលវត្ថុផ្សេងៗ ឬស្លាកស្នាមផ្នែក DNA ដើម្បីបង្ហាញថា តើមានសត្វប្រភេទណាខ្លះរស់នៅក្នុងតំបន់នេះ ? ក្រុមការងារនឹងបញ្ជូនត្រីយន្តទៅបាតសមុទ្ររយៈពេល២ម៉ោង បន្ទាប់មក ពួកគេត្រូវយកវាឡើងមកលើសិន ដើម្បីផ្លាស់ប្តូរថ្ម និងដោះកាមេរ៉ាថតរូបចេញ ។ នៅពេលត្រីយន្តឡើងមកលើទឹក វានឹងបញ្ជូនសញ្ញា GPS ជូនដំណឹងមកកាន់ក្រុមការងារឱ្យដឹងថា ពេលនេះ វាកំពុងនៅត្រង់ចំណុចណា ។

ក្រុមការងារលើកឡើងថា ត្រីយន្តនេះនឹងជួយឱ្យអ្នកវិទ្យាសាស្ត្រផ្នែកសមុទ្រអាចសិក្សាពីស្ថានភាព និងភាពសម្បូរបែបរបស់ប្រព័ន្ធអេកូឡូស៊ីនៅបាតសមុទ្រ ដែលទទួលផលប៉ះពាល់ពីការនេសាទខ្លាំងពេក រួមទាំងបញ្ហាជាតិពុល និងបម្រែបម្រួលអាកាសធាតុផងដែរ ៕ ប្រភព ៖ Thai PBS

ប្រទេសឥណ្ឌា ៖ សារមន្ទីរ គឺជាទីកន្លែងផ្តល់ចំណេះដឹងសំខាន់មួយ និងបង្ហាញពីភាពសំខាន់ផ្នែកប្រវត្តិសាស្ត្រ សិល្បៈ និងវប្បធម៌ផងដែរ ដើម្បីធ្វើជាប្រយោជន៍ដល់ការសិក្សា ជាពិសេស ចំពោះកុមារ ប៉ុន្តែនៅប្រទេសឥណ្ឌា មានកូនសិស្សជាច្រើននាក់ដែលរស់នៅតាមតំបន់ជនបទឆ្ងាយៗ ពួកគេគ្មានឱកាសបានចូលទស្សនាក្នុងសារមន្ទីរទេ ។ ហេតុនេះហើយ ទើបគេមានគំនិតបង្កើតសារមន្ទីរចល័ត ដើម្បីធ្វើដំណើរទៅរកកុមារទាំងនេះដល់កន្លែង ។

សារមន្ទីរចល័តកើតឡើងពីគំនិតរបស់បុគ្គលិកសារមន្ទីរឈ្មោះ ឆាត្រាប៉ាទី ស៊ីវ៉ាជី ម៉ារ៉ារ៉ាជ ដែលជាសារមន្ទីរល្បីឈ្មោះមួយនៅទីក្រុងម៉ុមបៃ ។ គេបានបង្កើតសារមន្ទីរក្នុងរថយន្តក្រុងដែលតុបតែងដោយសម្ភារៈផ្សេងៗ ដើម្បីផ្តល់ចំណេះដឹងដល់កុមារនៅជនបទ ដូចគ្នានឹងសារមន្ទីរទូទៅដែរ ។

តាំងពីចាប់ផ្តើមគម្រោងនេះនៅឆ្នាំ២០១៥ សារមន្ទីរចល័តបានធ្វើដំណើរទៅកាន់តំបន់ជនបទក្នុងរដ្ឋជាច្រើនទូទាំងប្រទេសឥណ្ឌា ដែលមានចម្ងាយផ្លូវសរុប៨ម៉ឺនគីឡូម៉ែត្រ ។ សារមន្ទីរនេះបានផ្តល់ចំណេះដឹងដល់កូនសិស្សជាច្រើននាក់ ដូចជា ផ្នែកប្រវតិ្តសាស្ត្រប្រទេសឥណ្ឌា រហូតដល់សត្វដាយណូសឺរ ។

នាយកសារមន្ទីរចល័តលើកឡើងថា ៖ «ពលរដ្ឋឥណ្ឌារស់នៅតំបន់ជនបទ ជាពិសេស ក្មេងៗមិនបានគិតថា សារមន្ទីរនេះជួយក្នុងការសិក្សារបស់ពួកគេទេ ពីព្រោះនៅទីក្រុងជាច្រើនគ្មានសារមន្ទីរសម្រាប់ឱ្យកូនសិស្សចូលទស្សនា ហើយកូនសិស្សនៅតាមសាលារៀនជាច្រើនកន្លែងមិនស្គាល់ថា សារមន្ទីរជាអ្វី ។ ដូច្នេះ ការបង្កើតសារមន្ទីរចល័តឡើងក្នុងគោលបំណងផ្តល់ចំណេះដឹងដល់ពួកគេ» ។

ចំណែកខ្លឹមសារ និងចំណេះដឹងដែលត្រូវយកមកបង្ហាញក្នុងសារមន្ទីរចល័ត គឺគេផ្លាស់ប្តូររៀងរាល់៦ខែម្តង ដោយផ្អែកតាមការឆ្លើយតប និងតម្រូវការពីសាស្ត្រាចារ្យនៅតាមទីក្រុងផ្សេងៗដែលធ្លាប់មកកាន់សារមន្ទីរចល័ត ។ សារមន្ទីរចល័តទទួលបានជោគជ័យក្នុងការងាររបស់ខ្លួនជាបន្តបន្ទាប់ និងមានការគាំទ្រពីរដ្ឋាភិបាលឥណ្ឌាផងដែរ ៕ ប្រភព ៖ World Pulse

បរទេស៖ យោងតាមប្រភពព័ត៌មាន Business Today កាលពីថ្ងៃទី៣០ ខែមិថុនា បានឱ្យដឹងថា កម្មវិធីផ្ញើសារ Telegram នឹងអាចបញ្ចូលមុខងារ Stories ទៅក្នុងវេទិកានៅដើមខែកក្កដា ឆ្នាំ ២០២៣ បន្ទាប់ពីមានការស្នើសុំអស់ជាច្រើនឆ្នាំពីអ្នកប្រើប្រាស់។
Telegram Stories គឺជាមុខងារថ្មីមួយនៅក្នុងកម្មវិធីផ្ញើសារ Telegram ដែលអនុញ្ញាតឱ្យអ្នកប្រើប្រាស់ចែករំលែកនូវពេលវេលានៃជីវិតបានយ៉ាងរហ័ស និងងាយស្រួល។
ជាមួយនឹង Telegram Stories នេះដែរ អ្នកប្រើប្រាស់អាចចែករំលែកនូវរូបថត និងវីដេអូខ្លីៗ បន្ថែមចំណងជើង និងដាក់ស្ទីគ័រ ដើម្បីបង្កើតរឿងគួរឱ្យចាប់អារម្មណ៍ និងប្លែកពីគេ។ មុខងារនេះក៏អនុញ្ញាតឱ្យអ្នកប្រើប្រាស់ពិនិត្យមើលរឿងដែលបានបង្ហោះពីមុន និងតាមដានរឿងរបស់មិត្តភក្តិផងដែរ។

ដូចនេះនៅក្នុង Stories នឹងមានជម្រើសចំនួន ៥ សម្រាប់អ្នកប្រើប្រាស់ដើម្បីកំណត់ភាពឯកជនគឺទីមួយ មើលដោយអ្នកគ្រប់គ្នា, ទីពីរ មើលបានចំពោះតែអ្នកដែលមាននៅក្នុងបញ្ជីទំនាក់ទំនង, រីឯទីបីវិញ មើលបានតែមនុស្សជាក់លាក់មួយចំនួនប៉ុណ្ណោះ, និងទីបួន ទីប្រាំ មើលបានតែបញ្ជីមិត្តភក្តិជិតស្និទ្ធ ឬបញ្ជីមនុស្សដែលមិនត្រូវបានអនុញ្ញាត ជាដើម។ ហើយអ្វីដែលពិសេសសម្រាប់មុខងារថ្មីរបស់ Telegram នោះគឺអ្នកប្រើប្រាស់អាចកំណត់រយៈពេលនៃ Stories: ៦, ១២, ២៤ ឬ ៤៨ ម៉ោង ជំនួសឱ្យការត្រឹមតែ ២៤ ម៉ោងដូចជា Instagram ឬ Facebook ។ លើសពីនេះ Stories ក៏អាចស្ថិតស្ថេរជារៀងរហូត ស្រដៀងទៅនឹងមុខងារ “Highlights” របស់ Instagram ផងដែរ។

ជាមួយនឹងការបើកដំណើរការមុខងារ Stories នាយកប្រតិបត្តិ Pavel Durov សង្ឃឹមថា Telegram នឹងក្លាយទៅជាមានភាពចម្រុះ សម្បូរបែប និងផ្តល់ព័ត៌មានមានប្រយោជន៍ជាច្រើនសម្រាប់អ្នកប្រើប្រាស់៕ ប្រភព៖cafefcom

ប្រទេសកូរ៉េខាងត្បូង ៖ ពលរដ្ឋកូរ៉េខាងត្បូងបាននាំគ្នាទិញអំបិល និងទំនិញចាំបាច់ផ្សេងៗមកស្តុកទុក ដោយសារពួកគេបារម្ភពីផលប៉ះពាល់សុខភាព ខណៈប្រទេសជប៉ុននឹងបង្ហូរទឹកកខ្វក់ដ៏ច្រើនចេញពីរោងចក្រថាមពលនុយក្លេអ៊ែរ Fukushima ចូលក្នុងសមុទ្រប៉ាស៊ីហ្វិក នាពេលឆាប់ៗនេះ ។

ការប្រមូលទិញអំបិលមកស្តុកទុកបានធ្វើឱ្យផលិតផលអំបិលលក់នៅតាមផ្សារទំនើប និងតម្លៃអំបិលកើនឡើងខ្ពស់ជិត២៧% នៅខែមិថុនា ឆ្នាំ២០២៣ បើធៀបនឹងរយៈពេល២ខែមុននេះ ។ មន្ត្រីកូរ៉េខាងត្បូងជូនដំណឹងថា បញ្ហាអាកាសធាតុ និងការផលិតអំបិលធ្លាក់ចុះ គឺជាមូលហេតុមួយដែលធ្វើឱ្យតម្លៃអំបិលកើនឡើងផងដែរ ។

រដ្ឋាភិបាលកូរ៉េខាងត្បូងបានដោះស្រាយបញ្ហានេះ ដោយការបញ្ចេញអំបិលទៅកាន់ទីផ្សារចំនួន៤៥តោនក្នុង១ថ្ងៃ ។ អំបិលរបស់រដ្ឋាភិបាលនឹងលក់ក្នុងតម្លៃថោកជាងអំបិលទូទៅ២០% រហូតដល់ថ្ងៃទី១១ ខែកក្កដា ឆ្នាំ២០២៣ ។ ក្រៅពីនេះ ភ្នាក់ងារជលផលកូរ៉េខាងត្បូងនឹងត្រួតពិនិត្យចម្ការអំបិលថា តើមានលាយឡំជាមួយធាតុវិទ្យុសកម្មដែរឬទេ ? ហើយគេក៏បានហាមនាំចូលអាហារសមុទ្រពីតំបន់នៅក្បែរ Fukushima នៅឆ្នេរសមុទ្រភាគខាងកើតរបស់ជប៉ុន ។

ចំណែកប្រទេសជប៉ុនបានជូនដំណឹងយ៉ាងលម្អិតទៅកាន់ប្រទេសជិតខាង ដែលមានព័ត៌មានវិទ្យាសាស្ត្រគាំទ្រគម្រោងការបង្ហូរទឹកកខ្វក់ចេញពីរោងចក្រថាមពលនុយក្លេអ៊ែរ Fukushima ចូលក្នុងសមុទ្រ ។ ជប៉ុនជូនដំណឹងថា ទឹកប្រើប្រាស់សម្រាប់ធ្វើឱ្យគ្រឿងម៉ាស៊ីននុយក្លេអ៊ែរត្រជាក់ គឺបានឆ្លងកាត់ការពិនិត្យរួចអស់ហើយ និងមានសុវត្ថិភាព ។

ទោះយ៉ាងណា បើតាមការស្ទង់មតិមួយធ្វើឡើងដោយក្រុម Research View របស់កូរ៉េខាងត្បូង កាលពីខែឧសភា ឆ្នាំ២០២៣ បង្ហាញថា អ្នកឆ្លើយសំណួរនៅកូរ៉េខាងត្បូងជាង៨៥% ប្រឆាំងនឹងគម្រោងរបស់ជប៉ុន ហើយមនុស្ស៧នាក់ក្នុងចំណោម១០នាក់ប្រាប់ថា ពួកគេនឹងបរិភោគអាហារសមុទ្រតិចជាងមុន បើមានការបង្ហូរទឹកកខ្វក់ចូលសមុទ្រតាមគម្រោងមែននោះ ៕ ប្រភព ៖ Nation World

ប្រទេសឡាវ ៖ ប្រទេសឡាវបានត្រៀមធ្វើយុទ្ធនាការ «ទស្សនាប្រទេសឡាវ ឆ្នាំ២០២៤» ដើម្បីជំរុញផ្នែកទេសចរណ៍ និងទាក់ទាញភ្ញៀវទេសចរឱ្យបានច្រើន ។ យុទ្ធនាការនេះ គឺជាការសហការគ្នារវាងភ្នាក់ងារទីផ្សារទេសចរណ៍ ផ្នែកអភិវឌ្ឍន៍ទេសចរណ៍ និងក្រុមហ៊ុនឯកជនដែលធ្វើការពាក់ព័ន្ធនឹងវិស័យទេសចរណ៍ ។

អ្នកនាង Phonemaly Inthaphome ប្រធាននាយកដ្ឋានអភិវឌ្ឍន៍ទេសចរណ៍លើកឡើងថា ចក្ខុវិស័យទេសចរណ៍ចាប់ពីឆ្នាំ២០២១ ដល់ឆ្នាំ២០២៥ មានគោលដៅចម្បងចំនួន៦ចំណុច រួមទាំងការកែលម្អសមត្ថភាពរបស់បុគ្គលិកទេសចរណ៍ ហេដ្ឋារចនាសម្ព័ន្ធ និងកន្លែងទេសចរណ៍ផ្សេងៗ ។ អ្នកនាងសង្កត់ធ្ងន់ថា ឡាវត្រូវកែលម្អតំបន់ទេសចរណ៍ ផលិតផល និងសេវាកម្មឱ្យមានគុណភាពល្អដើម្បីទាក់ទាញភ្ញៀវទេសចរបរទេស ។

ក្នុងកិច្ចប្រជុំរបស់ RDK Group ជាភ្នាក់ងារព័ត៌មាន និងទីផ្សារ បានលើកឡើងពីយុទ្ធសាស្ត្រទីផ្សារ និងការផ្សព្វផ្សាយពាណិជ្ជកម្ម ដើម្បីកែលម្អទីផ្សារទេសចរណ៍នៅប្រទេសឡាវ រួមទាំងទីផ្សារអនឡាញ និងសហការជាមួយអ្នកមានឥទ្ធិពលក្នុងបណ្តាញសង្គមផងដែរ ។ តាមរបាយការណ៍របស់នាយកដ្ឋានទីផ្សារទេសចរណ៍បញ្ជាក់ថា រដ្ឋាភិបាលបានត្រៀមធ្វើយុទ្ធនាការ «ទស្សនាប្រទេសឡាវ» ជាលើកដំបូងនៅឆ្នាំ១៩៩៩ និងនៅឆ្នាំ២០០០, ឆ្នាំ២០១២ និងឆ្នាំ២០១៨ តាមលេខរៀង ។

ក្រៅពីនេះ ប្រទេសឡាវនឹងធ្វើជាម្ចាស់ផ្ទះរៀបចំកិច្ចប្រជុំទេសចរណ៍អាស៊ានប្រចាំឆ្នាំ២០២៤ និងកិច្ចប្រជុំកំពូលអាស៊ាន ។ ហេតុនេះ ឡាវនឹងមានអ្នកដំណើរចូលមកប្រទេសរបស់ខ្លួនច្រើន ហើយឡាវនឹងអាចបង្ហាញពីតំបន់ទេសចរណ៍នានាទៅកាន់ភ្ញៀវទេសចរទាំងនោះ ។ គិតចាប់ពីខែមករា ដល់ខែមេសា ឆ្នាំ២០២៣ ប្រទេសឡាវបានទទួលភ្ញៀវទេសចរបរទេសជាង១លាននាក់ ខណៈឡាវបានដាក់គោលដៅទទួលភ្ញៀវទេសចរបរទេសចំនួន១,៣លាននាក់ក្នុង១ឆ្នាំ ៕ ប្រភព ៖ AEC connect

ត្រី គឺជាសត្វឆ្អឹងកងដែលរស់នៅក្នុងទឹក ប៉ុន្តែក៏មានប្រភេទត្រីមួយចំនួនតូច ដែលអាចផ្លាស់ទីលើគោកបានយ៉ាងល្អផងដែរ។ ដូច្នេះហើយខាងក្រោមនេះគឺជាប្រភេទត្រីទាំង ៧ ដែលអាចផ្លាស់ទីនៅលើគោកបានយ៉ាងងាយស្រួល ដូចជា៖

១. Mudskipper៖ គឺជាត្រីដែលស្ថិតនៅតំបន់អាហ្រ្វិក ប៉ូលីណេស៊ី និងអូស្រ្តាលី ពពួកត្រីនេះអាចនឹងងាប់ ប្រសិនបើពួកវាចំណាយពេលយូរពេកនៅក្នុងទឹក។

២. Snakehead៖ មានឈ្មោះវិទ្យាសាស្រ្តហៅថា Channidae នឹងមានប្រភពដើមនៅអាស៊ី និងអាហ្រ្វិក ដោយពួកវាអាចនៅរស់បានរយៈពេល ៧ ថ្ងៃនៅលើដីគោក។

៣. Epaulette Shark៖ គឺជាប្រភេទត្រីដែលស្ថិតនៅប្រទេសអូស្រ្តាលី និងកោះនូវែលហ្គីណេ ជារឿយៗពេលនៅក្នុងទឹក ពពួកត្រីនេះចូលចិត្តដើរនៅលើខ្សាច់ជាជាងហែល។

៤. Climbing Gourami៖ ប្រភពកំណើតរបស់ត្រី Climbing Gourami គឺស្ថិតនៅប្រទេសចិន តំបន់អាស៊ីអាគ្នេយ៍ និងអាហ្រ្វិក។ នៅពេលស្ថានភាពកន្លែងរស់នៅបច្ចុប្បន្នរបស់វា លែងអំណោយផលតទៅទៀត ពួកវានឹងផ្លាស់ទីនៅលើដីគោក ដើម្បីតស៊ូរកទីតាំងទឹកថ្មី ដែលសមស្របសម្រាប់ពួកគេ។ ប្រភេទត្រីនេះដែរក៏ត្រូវគេអះអាងថា មានសមត្ថភាពពិសេសអាចឡើងដើមឈើបានផងដែរ។

៥. Walking Catfish៖ ត្រី Walking Catfish មានដើមកំណើតនៅតំបន់អាស៊ីអាគ្នេយ៍ ត្រីទឹកសាបនេះ អាចនៅក្រៅទឹកបានដល់ខ្ទង់៣០ម៉ោង ប្រសិនបើពួកវាត្រូវស្វែងរកទីជម្រកថ្មី។

៦.Mangrove Rivulus៖ គឺជាត្រីដែលមានវត្តមាននៅគឺអាមេរិកខាងជើង អាមេរិកកណ្តាល និងអាមេរិកខាងត្បូង ពពួកត្រីនេះជាប្រភេទត្រីទំហំតូច ដែលមានប្រវែងចន្លោះ ២.៥ ទៅ ៦ សង់ទីម៉ែត្រ ប៉ុន្តែអាចរស់នៅលើដីគោកបានរហូតដល់ ៦៦ ថ្ងៃឯណោះ។

៧.Bichir៖ ត្រី Bichir ច្រើនមានវត្តមាននៅទ្វីបអាហ្រ្វិក ដែលពួកវាមានសួតមួយគូ នឹងស្ថិតនៅលើគោកក៏បាន លើទឹកក៏បាន៕

ប្រទេសវៀតណាម ៖ ប្រទេសវៀតណាមជាមជ្ឈមណ្ឌលផលិតសម្លៀកបំពាក់ ស្បែកជើង និងឧបករណ៍អេឡិចត្រូនិកនៅលើពិភពលោក ។ ចាប់ពីខែមករា ដល់ខែមិថុនា ឆ្នាំ២០២៣ ការផលិតទំនិញកើនឡើងស្មើ៣,៧២% ប៉ុន្តែវាបានធ្លាក់ចុះពីអត្រា៦,៤២% ក្នុងរយៈពេលដូចគ្នានៅឆ្នាំ២០២២ ។

ការិយាល័យស្ថិតិជាតិលើកឡើងថា ការរីកលូតលាស់ផ្នែកសេដ្ឋកិច្ចរបស់វៀតណាមមិនខ្ពស់ប៉ុន្មានទេ ដោយសារឧបសគ្គក្នុងប្រទេស និងក្រៅប្រទេស ។ បើទោះជានិន្នាការការជួលកម្លាំងពលកម្មនៅវៀតណាមកើនឡើងក្តី ប៉ុន្តែទីផ្សារការងារបានប្រឈមនឹងឧបសគ្គ ខណៈរោងចក្រនៅវៀតណាមខ្វះការបញ្ជាទិញទំនិញពីក្រៅប្រទេស ។

ការិយាល័យស្ថិតិជាតិបន្តថា ក្នុងឆមាសទី១ ឆ្នាំ២០២៣ មានកម្មករចំនួន២៤ម៉ឺននាក់ត្រូវបានគេបញ្ឈប់ពីការងារ ហើយ៨០% នៃកម្មករទាំងនេះបានធ្វើការក្នុងរោងចក្រវិនិយោគដោយជនបរទេស ហើយកម្មករ២នាក់ក្នុងចំណោម៣នាក់ ត្រូវបានគេបញ្ឈប់ពីការងារផ្នែកឧស្សាហកម្មស្បែក និងស្បែកជើង ដោយរោងចក្រទាំងនេះបានផ្លាស់ទៅធ្វើការផ្នែកសេវាកម្មវិញ ។ ប្រទេសវៀតណាមទទួលបានប្រាក់ចំណូលពីការនាំចេញជាង១៦ម៉ឺន៤ពាន់លានដុល្លារអាមេរិកក្នុងឆមាសទី១ ឆ្នាំ២០២៣ ដែលធ្លាក់ចុះ១២% បើធៀបនឹងរយៈពេលដូចគ្នានៅឆ្នាំ២០២២ ។

លើសពីនេះ ទីផ្សារអចលនទ្រព្យនៅវៀតណាមក៏បានធ្លាក់ចុះខ្លាំងផងដែរ ដោយសារដីមានតម្លៃខ្ពស់ ការពន្យារពេលអនុម័តគម្រោង និងបញ្ហាការស្វែងរកប្រាក់វិនិយោគបានបង្កើនភាពលំបាកផ្នែកសេដ្ឋកិច្ច ។ ចំនួនក្រុមហ៊ុនដែលមកប្រកបអាជីវកម្មអចលនទ្រព្យបានធ្លាក់ចុះ៦៣% នៅត្រីមាសទី១ ឆ្នាំ២០២៣ បើធៀបនឹងរយៈពេលដូចគ្នានៅឆ្នាំ២០២២ ហើយក្រុមហ៊ុនអចលនទ្រព្យ១ ក្នុងចំណោម៣ បានផ្អាកដំណើរការ ។ ធនាគារពិភពលោករំពឹងថា ការលូតលាស់នៃសេដ្ឋកិច្ចវៀតណាមនៅឆ្នាំ២០២៣ នឹងស្មើ៦,៣% ខណៈនៅឆ្នាំ២០២២ ស្មើ៨% ។

រដ្ឋាភិបាលវៀតណាមបានដាក់គោលដៅការលូតលាស់នៃសេដ្ឋកិច្ចស្មើ៦,៥% ប៉ុន្តែការិយាល័យស្ថិតិជាតិទទួលស្គាល់ថា ការសម្រេចតាមគោលដៅនេះបាន គឺត្រូវមានការប្តេជ្ញាចិត្ត និងការព្យាយាមខ្លាំងទាំងផ្នែកនយោបាយ អាជីវកម្ម និងពលរដ្ឋ ។ សេដ្ឋកិច្ចវៀតណាមនៅត្រីមាសទី២ ឆ្នាំ២០២៣ បានកើនឡើង៤,១៤% ដែលអត្រានេះជាការកើនឡើងបន្តិចបន្តួចពីចំនួន៣,៣២% នៅត្រីមាសទី១ ឆ្នាំ២០២៣ ៕ ប្រភព ៖ mgronline