កូរ៉េខាងត្បូង៖ យោងតាមប្រភពព័ត៌មាន The Korea Times កាលពីថ្ងៃទី៨ ខែសីហា បានឱ្យដឹងថា Baekhyun សមាជិកក្រុមចម្រៀង K-pop EXO គ្រោងនឹងបង្កើតក្រុមហ៊ុនផ្ទាល់ខ្លួន ទោះបីជាបច្ចុប្បន្នគាត់កំពុងស្ថិតនៅក្រោមផលិតកម្ម SM Entertainment ក៏ដោយ។
Baekhyun បានបង្ហាញផែនការនេះក្នុងអំឡុងពេលផ្សាយផ្ទាល់នៅលើ Instagram ដោយគាត់បាននិយាយថា “ខ្ញុំគ្រោងនឹងដំណើរការក្រុមហ៊ុនផ្ទាល់ខ្លួនរបស់ខ្ញុំ ហើយ SM ក៏បានយល់ព្រមជាវិជ្ជមានចំពោះផែនការរបស់ខ្ញុំផងដែរ។ នៅពេលដំណើរការក្រុមហ៊ុន ខ្ញុំនឹងនៅជាមួយ SM និងបន្តសកម្មភាពជាមួយសមាជិក EXO របស់ខ្ញុំដដែលទេ” ។ តារាចម្រៀងវ័យ ៣១ឆ្នាំរូបនេះក៏បានបន្តទៀតថា ខ្ញុំបានយកប្រាក់កម្ចីចំនួន ១៣ ពាន់លានវ៉ុន (ជាង ៩ លានដុល្លារ) ដើម្បីចាប់ផ្តើមក្រុមហ៊ុនថ្មី។
លោកក៏បានបន្ថែមទៀតថា ខ្ញុំនិងខាងផលិតកម្ម SM កំពុងគាំទ្រគ្នាទៅវិញទៅមកតាមរយៈកិច្ចព្រមព្រៀង និងការសម្របសម្រួលប្រកបដោយមិត្តភាព។
គួររំលឹកដែរថា កាលពីខែមិថុនា Baekhyun, Xiumin និង Chen បានដាក់ពាក្យបណ្តឹងប្រឆាំងនឹងការទុកចិត្តជាមួយគណៈកម្មការ Fair Trade ជុំវិញលក្ខខណ្ឌនៃកិច្ចសន្យាមិនយុត្តិធម៌ ប៉ុន្តែពួកគេក៏បានបញ្ចប់ជម្លោះដោយយល់ព្រមបន្តនៅជាមួយ SM និង EXO វិញ។
បន្ទាប់ពីចុះកិច្ចព្រមព្រៀងរួចរាល់ EXO បានចេញអាល់ប៊ុម “Exist” ទីប្រាំពីររបស់ខ្លួននៅក្នុងខែកក្កដា ដោយលក់បានជាង ១០ លានកូពីនៅថ្ងៃដំបូងនៃការចេញផ្សាយរបស់ខ្លួន។ បច្ចុប្បន្ន Baekhyun និងសមាជិក EXO ដទៃទៀតកំពុងមមារញឹកនឹងការងារសិល្បៈរបស់គាត់រៀងៗខ្លួន ខណៈដែល D.O EXO ក៏កំពុងថតរឿងថ្មីរបស់គាត់ផងដែរ៕
