ហាក់មិនអស់ចិត្តនូវការលើកឡើងថាការប្រើពុម្ពអក្សរដែលនាំមានការយល់ច្រលំទៅអក្សរប្រទេសដទៃដែលជាល្បិចធ្វើដើម្បីប្រូម៉ូតរឿង តារាចម្រៀងនិងសម្តែង ព្រីន បាននិយាយថាសមត្ថភាពសម្តែងរបស់លោកអន់ខ្លាំងឬដល់ថ្នាក់ឱ្យតួកំប្លែងមកជួយប្រូម៉ូតរឿង «មួយលានបែកមួយលានជួប»។
កាលពីដើមខែសីហា កន្លងមកនេះមហាជនអ្នកលេងបណ្តាញសង្គម រួមទាំងតារាកំប្លែងនាយ ពាក់មី បានចេញមកប្រតិកម្មនិងមិនគាំទ្រប្រើពុម្ពអក្សរលើ Poster រឿងថ្មីរបស់ផលិតកម្ម សាស្រ្តាហ្វៀមមានចំណងជើងថា «មួយលានបែកមួយលានជួប» ដែលមានតួឯកស្រីកញ្ញា រចនា រ៉ាវ៉ាឌី និងតួឯកប្រុសលោក ព្រីន។ ខណៈខាងផលិតក៏បានចេញមកសុំការអភ័យទោសចំពោះការប្រើពុម្ពអក្សរនាំឱ្យមានការយល់ខុស ដោយបានបញ្ជាក់ថាការប្រើប្រាស់ពុម្ពនេះ គឺមិនមានគោលបំណងក្នុងការធ្វើឱ្យស្រដៀងនឹងវប្បធម៌ប្រទេសណាមួយនោះទេ រួមទាំងនឹងធ្វើការផ្លាស់ប្តូរពុម្ពអក្សរខ្មែរផ្សេងដែរដើម្បីកុំឱ្យមានការយល់ច្រលំ។
ទោះបីជាយ៉ាងនេះក្តីនៅលើផេករបស់ ព្រីន ឈានចូលថ្ងៃទី៨ សីហា លោកបាន add Story មួយដោយភ្ជាប់ជាមួយការលើកឡើងថា «ខ្ញុំសូមមិនគាំទ្រ ការសរសេអក្សរខ្មែរបែបនេះ
តែបើវាជាល្បិចគេធ្វើដើម្បីប្រូម៉ូតរឿង នោះខ្ញុំចាញ់បោកគេហើយ ព្រោះជួយប្រូម៉ូតឱ្យគេ សុំទោសរួច លក់……» ដែលសំណេរមួយនេះត្រូវបានគេដឹងថាជាការលើកឡើងរបស់ លោក ចែម ចាន់រ៉ា ហៅ នាយពាក់មី ដែលជាតារាកំប្លែងជួរមុខក្នុងប្រទេសអំឡុងពេលលោកប្រតិកម្មលើកដំបូងនៃការប្រើពុម្ពអក្សរក្នុងរឿង «មួយលានបែកមួយលានជួប»។
តួឯកប្រុសក្នុងភាពយន្តខាងលើនេះបានសរសេរដែរថា «និយាយត្រង់ខ្ញុំមិនទាន់អស់ចិត្តនឹងពាក្យមួយឃ្លានេះនៅឡើយទេ! សមត្ថភាពសម្តែងរបស់ខ្ញុំអន់ដល់ថ្នាក់ឱ្យតួកំប្លែងមកជួយ Promote?»។
ទោះបីជាយ៉ាងនេះក្តីមកទល់ពេលនេះលោក ព្រីន បានលុបការបង្ហោះរបស់លោកហើយបន្ទាប់ពីសម្តែងនៅអារម្មណ៍អន់ចិត្តរបស់ខ្លួនដែលមានការលើកឡើងទាក់ទងនឹងល្បិចធ្វើឱ្យមានកំហុសដើម្បីមានភាពទាក់ទាញក្នុងការប្រូម៉ូតរឿង៕
