រាជធានីតូក្យូ៖ បច្ចប្បន្នថ្វីបើ ជប៉ុន ជាប្រទេសដ៏ជឿនលឿនបំផុតមួយ ហើយក្លាយជាប្រទេសមហាសេដ្ឋកិច្ចលំដាប់លេខ៣របស់ពិភពលោក បន្ទាប់ពីសហរដ្ឋអាមេរិក និង ចិន ក៏ពិតមែន ប៉ុន្ដែប្រទេសជាសម្ពន្ធមិត្តដ៏ជិតស្និទ្ធរបស់ក្រុងវ៉ាស៊ីនតោន នៅតំបន់អាស៊ីបូព៌ាមួយនេះ កំពុងតែកើតក្ដីកង្វល់យ៉ាងខ្លាំងបំផុត ក្រោយពេលកំណើនប្រជាជនរបស់ខ្លួន បានធ្លាក់ចុះយ៉ាងខ្លាំង នៅក្នុងរយៈពេល១៤ឆ្នាំជាប់ៗគ្នាមកនេះ។

ទីភ្នាក់ងារសារព័ត៌មានរបស់សហរដ្ឋអាមេរិក AP បានចេញផ្សាយ កាលពីព្រឹក ថ្ងៃព្រហស្បតិ៍ ទី២៧ ខែកក្កដា ថា បើតាមទិន្នន័យរបស់រដ្ឋាភិបាល កាលពីថ្ងៃពុធ បានបង្ហាញ ថា ជប៉ុន បានជួបប្រទះនឹងកំណើនប្រជាជន ធ្លាក់ចុះយ៉ាងខ្លាំងបំផុត នៅក្នុងខេត្តទាំង៤៧របស់ខ្លួន កាលពីឆ្នាំ២០២២ ដែលមើលឃើញ អំពីចំនួនថយចុះជាលើកដំបូងបង្អស់។ បើទោះជាយ៉ាងនេះក្ដី ប៉ុន្ដែចំនួនជនបរទេសជាអ្នករស់នៅក្នុងប្រទេសជប៉ុន បានកើនឡើង ដល់កម្រិតខ្ពស់។

ក្រសួងកិច្ចការផ្ទៃក្នុង និង ទំនាក់ទំនងរបស់ប្រទេសជប៉ុន បានបញ្ចេញទិន្នន័យរបស់ខ្លួន កាលពីថ្ងៃពុធ ដោយផ្អែកលើការចុះបញ្ជីស្នាក់នៅ គិតត្រឹមថ្ងៃទី១ ខែមករា ឆ្នាំ២០២៣ បង្ហាញ ថា ប្រជាជនជប៉ុន បានធ្លាក់ចុះ ប្រហែលចំនួន ៨០០ ០០០នាក់ ឬស្មើនឹងប្រហែល 0,៦៥ភាគរយ ដោយមានចំនួនប្រជាជនសរុប មកនៅត្រឹមតែ ១២២,៤លាននាក់ នៅក្នុងឆ្នាំ២០២២ បើធៀបនឹងឆ្នាំមុន គឺបានធ្លាក់ចុះ រយៈពេល១៤ឆ្នាំជាប់ៗគ្នា។

ក្រសួងកិច្ចការផ្ទៃក្នុង បានបន្ដ ថា ប្រទេសជប៉ុន មានប្រជាជនសរុប ១២៥,៤១លាននាក់ ប៉ុន្ដែចំនួននេះ បានធ្លាក់ចុះជាងកន្លះលាននាក់ បើធៀបនឹងឆ្នាំមុន ប៉ុន្ដែមានការកើនឡើង ប្រហែល១០,៧ភាគរយ សម្រាប់ជនបរទេស បានចុះបញ្ជីស្នាក់នៅក្នុងប្រទេសជប៉ុន។

លោក យូ កូរេកាវ៉ា (Yu Korekawa) នាយកវិទ្យាស្ថានជាតិប្រជាជន និង ស្រាវជ្រាវសន្ដិសុខសង្គម (IPSS) បានអះអាង ថា គាត់មិនភ្ញាក់ផ្អើល ចំពោះការបន្ដថយចុះចំនួនប្រជាជនរបស់ជប៉ុន នោះឡើយ។ ប៉ុន្ដែគាត់បានកត់សម្គាល់ឃើញ ថា វាមានសារៈសំខាន់ខ្លាំង នៅក្នុងការយកចិត្តទុកដាក់ ចំពោះការកើនឡើង នៃចំនួនប្រជាជនបរទេស រស់នៅក្នុងប្រទេសជប៉ុន។

កំណើនប្រជាជនបរទេស រស់នៅក្នុងប្រទេសជប៉ុន បានកើនឡើងដ៏ច្រើនបំផុត ពីមួយឆ្នាំទៅមួយឆ្នាំ ចាប់តាំងពីក្រសួងកិច្ចការផ្ទៃក្នុង និង ទំនាក់ទំនង បានចាប់ផ្តើមធ្វើស្ថិតិ នៅក្នុងឆ្នាំ២០១៣។ បច្ចុប្បន្ន ប្រជាជនបរទេសរបស់ជប៉ុន មានចំនួនប្រហែល ២,៤ភាគរយ នៃចំនួនប្រជាជនជប៉ុនសរុប។

បច្ចុប្បន្ន ឥណ្ឌា ក្លាយជាប្រទេស មានប្រជាជនច្រើនជាងគេបំផុត នៅលើពិភពលោក ដោយមានប្រជាជនសរុប ១ ៤២៨ ៦២៧ ៦៦៣នាក់ (ជាង ១,៤២៨ពាន់លាននាក់) ខណៈចិន បានធ្លាក់មកលំដាប់លេខ២ ដោយមានប្រជាជនសរុប ១ ៤១១ ៧៥០ ០០០នាក់ (ជាង១,៤១១ពាន់លាននាក់)។

ប្រទេសហ្វីលីពីន ៖ ហ្វីលីពីន គឺជាប្រទេសទេសចរណ៍មួយដែលភ្ញៀវទេសចរជាច្រើននាក់ចង់ទៅកម្សាន្ត ។ បើទោះជាប្រទេសនេះស្ថិតក្នុងតំបន់អាស៊ានដូចកម្ពុជាក្តី ប៉ុន្តែហ្វីលីពីនមានវប្បធម៌ និងទំនៀមទម្លាប់ប្រពៃណីខុសគ្នាពីកម្ពុជា ។ ដូច្នេះ យើងគួរតែឈ្វេងយល់ពីចំណុចទាំងនេះសិន មុននឹងទៅកម្សាន្តនៅទីនោះ ។

១-ពលរដ្ឋរស់នៅក្នុងប្រទេសហ្វីលីពីនអាចទំនាក់ទំនងគ្នាជាភាសាអង់គ្លេសបានយ៉ាងល្អ ។ ហេតុនេះ យើងគួរតែនាំមិត្តភក្តិម្នាក់ ឬអ្នកដែលអាចនិយាយភាសាអង់គ្លេសបាន មកកម្សាន្តជាមួយយើងដែរ ។

២-ងាយស្រួលគ្រប់គ្រងការចំណាយលើការធ្វើដំណើរតាមរយៈ Grab Taxi ជាពិសេស ពេលត្រូវធ្វើដំណើរក្នុងទីក្រុងធំៗ ដូចជា ទីក្រុងម៉ានីល ។ ប៉ុន្តែបើត្រូវធ្វើដំណើរទៅកាន់ទីក្រុងផ្សេងទៀត គួរតែសិក្សាអំពីពេលវេលា និងការចាយវាយផ្សេងៗផងដែរ ។

៣-ពលរដ្ឋហ្វីលីពីនមានភាពរួសរាយរាក់ទាក់ និងចូលចិត្តរាប់អានមិត្តភក្តិ ។ ពួកគេនឹងស្វាគមន៍មិត្តភក្តិដោយការញញឹម និងញាក់ចិញ្ចើមដាក់គ្នា ហើយនៅពេលពួកគេគ្រវីដៃស្វាគមន៍ យើងគួរតែគ្រវីដៃតបវិញដើម្បីសម្តែងការរាប់អាន ។

៤-ហ្វីលីពីនសម្បូរដោយប្រជុំកោះជាច្រើន ដែលធ្វើឱ្យប្រទេសនេះមានបរិយាកាសក្តៅ និងមានភ្លៀងធ្លាក់ ហើយងាយនឹងកើតខ្យល់ព្យុះច្រើនជាងប្រទេសផ្សេងៗ ប៉ុន្តែវាជាកត្តាធ្វើឱ្យប្រទេសនេះមានធនធានធម្មជាតិដ៏ស្រស់ស្អាត ជាពិសេស សមុទ្រ ។ ប៉ុន្តែគួរចៀសវាងកុំទៅកម្សាន្តនៅហ្វីលីពីន ចាប់ពីខែមិថុនា ដល់ខែតុលា ។

៥-ហ្វីលីពីនជាឋានសួគ៌សម្រាប់អ្នកចូលចិត្តអាហារសមុទ្រ ដោយសារប្រទេសនេះសម្បូរដោយប្រជុំកោះ ទើបធ្វើឱ្យហ្វីលីពីនសម្បូរអាហារសមុទ្រមិនចាញ់ប្រទេសណាឡើយ ។ ដូច្នេះ ភ្ញៀវទេសចរអាចមកទិញចំណីអាហារឆ្ងាញ់ៗនៅទីនេះ ហើយធានាថា វានឹងឆ្ងាញ់ត្រូវមាត់អ្នកបរិភោគមិនខាន ។ ភ្ញៀវទេសចរជាច្រើននាក់បាននិយាយដូចៗគ្នាថា អាហារហ្វីលីពីនឆ្ងាញ់ខ្លាំងណាស់ ។

៦-យើងគួរតែងខ្លួនឱ្យសុភាពរៀបរយ និងសមស្របតាមកាលៈទេសៈ ព្រោះពលរដ្ឋហ្វីលីពីននឹងវាយតម្លៃមនុស្សតាមរយៈការតែងខ្លួន ។ ម្យ៉ាងទៀត បើពួកគេអញ្ជើញយើងឱ្យបរិភោគអាហារជុំគ្នា យើងគួរតែមាននំចំណី ឬផ្កាទៅផ្ញើម្ចាស់កម្មវិធីផង ។

*មិនគួរប្រព្រឹត្តចំណុចទាំងនេះនៅហ្វីលីពីន ៖
-មិនគួរហៅភរិយារបស់ម្ចាស់ផ្ទះថា «មេផ្ទះ» ព្រោះពួកគេចាត់ទុកថា វាជាពាក្យមើលងាយ
-ពេលទទួលបានកាដូពីពលរដ្ឋហ្វីលីពីន យើងមិនគួរបើកមើលកាដូនៅចំពោះមុខអ្នកផ្តល់ឱ្យទេ
-មិនបរិភោគអាហារ ឬដួសអាហារមុនម្ចាស់កម្មវិធី
-មិនយកដៃចង្អុលទៅកាន់អ្នកណាម្នាក់ ឬរបស់របរផ្សេងៗទេ ព្រោះមិនសុភាព ប៉ុន្តែពលរដ្ឋហ្វីលីពីននិយមប្រើមាត់ជំនួសវិញ
-មិននិយាយខ្លាំងៗ បង្ហាញការខឹងសម្បារ ឬមិនគោរព រួមទាំងរិះគន់អ្នកណាម្នាក់នៅចំពោះមុខ
-មិនគួរធ្វើការណាត់ជួបពលរដ្ឋហ្វីលីពីននៅថ្ងៃអាទិត្យទេ ព្រោះវាជាថ្ងៃដែលពួកគេទៅព្រះវិហារ និងជាថ្ងៃគ្រួសារ ៕ ប្រភព ៖ lapak teaw

សហរដ្ឋអាមេរិក៖ យោងតាម ទីភ្នាក់ងារព័ត៌មាន AFP កាលពីថ្ងៃទី២៤ ខែកក្កដា បានឱ្យដឹងថា សីតុណ្ហភាពខ្ពស់បំផុតរបស់ឆ្នេរសមុទ្ររដ្ឋផ្លរីដាគឺ ៣៧.៨ អង្សាសេ ឡើងដល់ ៣៨.៤ អង្សាសេក្នុងរយៈពេលពីរបីម៉ោងដែលជាសក្តានុពលបង្កើតកំណត់ត្រាពិភពលោកសម្រាប់កំដៅក្តៅបំផុតនៅក្នុងទឹកសមុទ្រ។ ទិន្នន័យខាងលើត្រូវបានគេយកចេញពីទុយយោនៅឈូងសមុទ្រ Manatee ចម្ងាយប្រហែល ៦០ គីឡូម៉ែត្រភាគនិរតីនៃទីក្រុង Miami ក្នុងជម្រៅ ១.៥ ម៉ែត្រ។

លោក Jeff Masters អ្នកជំនាញឧតុនិយមដែលធ្វើការឱ្យរដ្ឋាភិបាលបាននិយាយថា កាលពីថ្ងៃទី ២៣ ខែសីហា ឆ្នាំ ២០០៣ សមុទ្រមេឌីទែរ៉ាណេបានឡើងដល់សីតុណ្ហភាពខ្ពស់បំផុតជាមួយនឹង ២៨.៣ អង្សាសេ។ ប៉ុន្តែបច្ចុប្បន្នទឹកសមុទ្រក្នុងរដ្ឋផ្លរីដាបានបង្កើតកំណត់ត្រាថ្មីជាមួយនឹងសីតុណ្ហភាពខ្ពស់បំផុតគឺ ៣៨.៤ អង្សាសេ ដែលជាភពក្តៅបំផុតក្នុងប្រវត្តិសាស្ត្រ ក៏ដូចជាក្តៅបំផុតក្នុងរយៈពេលរាប់ពាន់ឆ្នាំ នេះបើយោងតាមអ្នកឧតុនិយម Gavin Schmidt នៃអង្គការណាសា។

កំដៅខ្លាំងកំពុងបំផ្លាញប្រព័ន្ធអេកូឡូស៊ីនៃថ្មប៉ប្រះទឹក ផ្កាថ្ម និងប្រភេទសត្វសមុទ្រមួយចំនួន។ មូលនិធិស្តារផ្កាថ្មមិនរកប្រាក់ចំណេញ (CRF) បាននិយាយថា ថ្មប៉ប្រះទឹកមួយឈ្មោះថា Sombrero នៅភាគខាងត្បូងរដ្ឋផ្លរីដា ដែលវាត្រូវបានស្ដារឡើងវិញអស់រយៈពេលជាងមួយទសវត្សរ៍ ឥឡូវនេះវាត្រូវបានបំផ្លាញដោយសារកំដៅ។ ប្រហែល ២៥% នៃសត្វសមុទ្ររស់នៅជុំវិញថ្មប៉ប្រះទឹក ដែលជាគូប្រជែងនឹងព្រៃត្រូពិចសម្រាប់ជីវចម្រុះក៏ត្រូវបានបំផ្លាញដោយសារកំដៅផងដែរ៕ប្រភព៖vnexpress

ប្រទេសចិន ៖ កាលពីថ្ងៃទី២៥ ខែកក្កដា កន្លងមក នៅទីក្រុងសាន់យ៉ា ខេត្តហៃណាន ប្រទេសចិន គេបានរៀបចំកិច្ចប្រជុំមួយដែលនិយាយអំពីឧស្សាហកម្មទុរេនចិន ដែលដាំដុះជាលើកដំបូង ។ ក្នុងកិច្ចប្រជុំនេះ មានអាជីវករជាច្រើននាក់បានមកចូលរួមស្តាប់ និងនាំគ្នាបរិភោគទុរេនផងដែរ ។

ប្រទេសចិនបានដាំទុរេនលើកដំបូងនៅលើផ្ទៃដីប្រមាណ៧០០រ៉ៃ នៅទីក្រុងសាន់យ៉ា ខេត្តហៃណាន ហើយពួកគេបានទុកឱ្យទុរេនទុំនៅលើដើម ទើបធ្វើការប្រមូលផល ។ នៅខែកក្កដា ឆ្នាំ២០២៣ គឺជាពេលប្រមូលផលទុរេននៅប្រទេសនេះ ហើយគេសង្ឃឹមថា នឹងអាចប្រមូលផលបានប្រមាណ៤០តោន ។

លោក Lang Haipo នាយកសមាគមទុរេនទីក្រុងសាន់យ៉ានិយាយថា ៖ «យើងបានបើកហាងទុរេននៅតាមបណ្តាទីក្រុងធំៗជាច្រើនដូចជា ទីក្រុងប៉េកាំង, សៀងហៃ, ក្វាងចូវ និងស៊ីនចូវ ហើយយើងនឹងយកទុរេនមានគុណភាពល្អបំផុតទៅលក់ឱ្យអតិថិជន ។ បច្ចុប្បន្ន មានក្រុមអាជីវករមកទំនាក់ទំនងរួចហើយ រហូតដល់ទុរេនរបស់យើងមិនគ្រប់គ្រាន់តាមតម្រូវការ» ។

ចាប់ពីឆ្នាំ២០១៨ ខេត្តយូណានបានចាប់ផ្តើមយកគ្រាប់ពូជទុរេនមកសាកល្បងដាំដុះនៅលើផ្ទៃដីមានទំហំធំ ។ នៅឆ្នាំ២០២៣នេះ ប្រទេសចិនបានដាំទុរេននៅទីក្រុងសាន់យ៉ា, ឡេតង, ប៉ៅធីង និងលីងស៊ុយ ដែលមានផ្ទៃដីសរុបជាង១ម៉ឺនរ៉ៃ ។

សារព័ត៌មានចិនចុះផ្សាយថា ទុរេនដែលដាក់លក់នៅទីផ្សារប្រទេសចិនភាគច្រើន គឺបាននាំចូលពីប្រទេសក្នុងតំបន់អាស៊ាន ហើយទុរេនទាំងនេះពុំទាន់ទុំពេញលេញទេ គឺទុំចាប់ពី៧០% ទៅ៨០% ។ ចំណែកទុរេនដាំនៅប្រទេសចិនវិញ គេបេះផ្លែវានៅពេលយប់ ហើយក្នុង១ដើមមានទុរេន៣ផ្លែ ៕ ប្រភព ៖ China Face