ប្រទេសឡាវ ៖ ប្រទេសឡាវមានគម្រោងប្រើប្រាស់ QR Code ក្នុងមុខជំនួញជាមួយប្រទេសជិតខាងដូចជា កម្ពុជា ថៃ និងវៀតណាម គឺនឹងចាប់ផ្តើមអនុវត្តនៅត្រីមាសទី៤ ឆ្នាំ២០២៣ ។ ចំណែកភ្ញៀវទេសចរមកពីប្រទេសជិតខាងឡាវ ក៏អាចទូទាត់សាច់ប្រាក់តាមប្រព័ន្ធនេះនៅប្រទេសឡាវផងដែរ ។

លោក Boonlue Sinchaiworawong ទេសាភិបាលធនាគារកណ្តាលប្រទេសឡាវលើកឡើងថា ការប្រើប្រាស់ QR Code ក្នុងមុខជំនួញនឹងជួយបង្កលក្ខណៈងាយស្រួលដល់ការផ្ទេរប្រាក់ និងការទូទាត់ប្រាក់សម្រាប់កម្មករ និងភ្ញៀវទេសចរឡាវនៅប្រទេសផ្សេងៗ ហើយប្រទេសផ្សេងៗក៏ងាយស្រួលប្រកបមុខជំនួញនៅឡាវដែរ ។ ធនាគារកណ្តាលរបស់ប្រទេសនីមួយៗដែលមានការពាក់ព័ន្ធបានសហការជាមួយធនាគារពាណិជ្ជ ដើម្បីភ្ជាប់ប្រព័ន្ធទូទាត់សាច់ប្រាក់ជាមួយគ្នា ។

បច្ចុប្បន្ន មានពលរដ្ឋឡាវប្រមាណ៣០៣.៣៩១នាក់ទៅធ្វើការនៅក្រៅប្រទេស ហើយពួកគេបានផ្ញើប្រាក់មកប្រទេសឡាវវិញ ស្មើប្រមាណ៤២៦លានដុល្លារអាមេរិកក្នុង១ឆ្នាំ ។ ហេតុនេះ វាមានសារសំខាន់យ៉ាងខ្លាំងដល់សេដ្ឋកិច្ច និងប្រាក់ចំណូលជារូបិយប័ណ្ណបរទេសរបស់ឡាវ ។

នៅពេលប្រព័ន្ធទូទាត់ប្រាក់តាមរយៈ QR Code ទទួលបានជោគជ័យ វានឹងជួយឱ្យពលរដ្ឋឡាវដែលធ្វើការនៅក្រៅប្រទេសអាចផ្ញើប្រាក់តាមរយៈធនាគារ និងជួយសន្សំសំចៃការចំណាយប្រាក់លើសេវាកម្មផ្សេងៗ ហើយពួកគេក៏អាចចៀសវាងហានិភ័យដែលអាចកើតឡើងដោយសារការប្រើប្រព័ន្ធផ្សេង ។ ក្រៅពីនេះ កម្មវិធីទូទាត់ប្រាក់តាមរយៈ QR Code នឹងជួយបង្កលក្ខណៈងាយស្រួលដល់ភ្ញៀវទេសចរកម្ពុជា ថៃ និងវៀតណាម ក្នុងការទូទាត់ប្រាក់សម្រាប់សេវាកម្មនៅប្រទេសឡាវផងដែរ ។

គេសង្កេតឃើញថា ចាប់ពីឆ្នាំ២០១៨ ដល់ឆ្នាំ២០១៩ នៅមុនពេលជំងឺកូវីដ-១៩ ឆ្លងរាតត្បាត វិស័យទេសចរណ៍ឡាវអាចរកប្រាក់ចំណូលបានខ្ពស់ចូលប្រទេស ចាប់ពី៩០០លានដុល្លារ ដល់១.០០០លានដុល្លារអាមេរិកក្នុង១ឆ្នាំ ។ បើប្រទេសឡាវអាចទាក់ទាញភ្ញៀវទេសចរបរទេសបានយ៉ាងតិច៤លាននាក់ក្នុង១ឆ្នាំ វានឹងធ្វើឱ្យប្រាក់ចំណូលជារូបិយប័ណ្ណបរទេសរបស់ឡាវកើនឡើងវិញ ៕ ប្រភព ៖ AEC connect

ហុងកុង ៖ អ្នកលេងបណ្តាញសង្គមបាននាំគ្នាសម្តែងការសោកស្តាយ ក្រោយពីបុរសជនជាតិបារាំងម្នាក់ឈ្មោះ Remy Lucidi អាយុ៣០ឆ្នាំ ជាអ្នកឡើងអគារខ្ពស់ដោយដៃទទេដ៏ល្បីល្បាញលើពិភពលោក បានស្លា.ប់ដោយសារធ្លាក់ពីលើអគារកម្ពស់៦៨ជាន់នៅទីក្រុងហុងកុង ។ អាជ្ញាធរបញ្ជាក់ថា លោក Lucidi បានលួចឡើងទៅលើកំពូលអគារ ដូចដែលលោកធ្លាប់បានឡើងកន្លងមក ។

សារព័ត៌មានបរទេសរាយការណ៍ថា លោក Lucidi បានចូលមកកាន់អគារ Tregunter Tower និងប្រាប់ទៅកាន់ភ្នាក់ងារសន្តិសុខថា លោកទៅរកមិត្តភក្តិនៅជាន់ទី៤០ ។ បន្ទាប់មក លោកក៏បានលួចគាស់ទ្វារ និងឡើងតាមជណ្តើរទៅកាន់ដំបូល ។ កាមេរ៉ាសុវត្ថិភាពបានថតរូបភាពក្នុងអំឡុងពេលលោកស្ថិតនៅជាន់ទី៦៦-៦៨ ឃើញថា សោរទ្វារនៅជាន់ខាងលើត្រូវបានកាត់ ហើយគេបានឃើញលោកដេកស្លាប់នៅខាងក្រៅអគារ ។

តាមការស៊ើបអង្កេតបឋម ប៉ូលិសជឿថា លោក Lucidi អាចធ្លាក់ពីជាន់លើបំផុតនៃអគារ ហើយលោកក៏មិនបានបន្សល់ទុកនូវកំណត់ត្រាអាក្រក់អ្វីទេ ។ ប៉ូលិសបានរកឃើញឧបករណ៍ថតរូបនៅលើដំបូលអគារផងដែរ ។ ចំណែកសារព័ត៌មាន The Post ចុះផ្សាយថា បុគ្គលិកសម្អាតបានឡើងទៅសម្អាតនៅបន្ទប់នៃអគារជាន់ទី៦៨ និង ប្រទះឃើញលោក Lucidi ព្យាយាមគោះកញ្ចក់ដើម្បីសុំការជួយសង្គ្រោះ ប៉ុន្តែបុគ្គលិកសម្អាតភ័យខ្លាច ហើយប្រញាប់ទូរស័ព្ទប្តឹងប៉ូលិសឱ្យមកជួយ ។ ហេតុនេះ ទើបមិនអាចជួយលោក Lucidi បានទាន់ពេលវេលា ។

លោក Lucidi បានប្រើឈ្មោះក្លែងក្លាយក្នុងបណ្តាញសង្គមថា Lucidi Enigma ហើយលោកបានបង្ហោះរូបភាពចុងក្រោយក្នុង Instagram កាលពីចុងខែកក្កដា ឆ្នាំ២០២៣ ។ វាជារូបភាពទេសភាពនៅពេលយប់ក្នុងទីក្រុងហុងកុង ព្រមទាំងបានបញ្ជាក់ទីតាំងស្ថិតនៅ Times Square ជាកន្លែងលក់ទំនិញក្នុងតំបន់ Causeway Bay របស់ហុងកុង ។ ហេតុការណ៍គួរឱ្យតក់ស្លុតនេះធ្វើឱ្យអ្នកគាំទ្រ និងអ្នកលេងបណ្តាញសង្គមដែលតែងសរសើរលោក Lucidi នោះ បានសម្តែងការសោកស្តាយចំពោះការបាត់ប.ង់ជីវិ.តភ្លាមៗនេះ ៕ ប្រភព ៖ Thairath

ថ្មីៗនេះយើងបានកត់សម្គាល់ឃើញថាមេរោគអេដស៍ ឬជំងឺអេដស៍ កំពុងមានការរីករាលដាលម្តងទៀតនៅក្នុងប្រទេសកម្ពុជា ក៏ដូចជាទូទាំងពិភពលោកផងដែរ ដែលនេះធ្វើឱ្យប៉ះពាល់ដល់សេដកិច្ចសង្គម និងពិភពការងារ រួមទាំងវិស័យឯកជន និងរដ្ឋ។

អេដស៍ គឺជាប្រភេទវីរុសដែលធ្វើឱ្យប្រពន្ធ័ការពាររាងកាយមនុស្សចុះខ្សោយ។ មេរោគអេដស៏ មិនសម្លាប់មនុស្សដោយផ្ទាល់ទេ វាគ្រាន់តែធ្វើឱ្យប្រព័ន្ធការពារខ្លួនមនុស្សចុះខ្សោយ នឹងធ្វើឱ្យខ្លួនអ្នកជំងឺងាយទទួលរងនូវជំងឺកាចសាហាវផ្សេងៗ។

យោងតាមអង្គការសុខភាពពិភពលោក ទិន្នន័យចុងឆ្នាំ ២០១៤ បង្ហាញថាមានមនុស្ស ៣៧ លាននាក់កំពុងរស់នៅជាមួយវីរុសកំណាចនេះ ហើយ ១,២ លាននាក់ បានស្លាប់ ក្នុងនោះមានតែ ៥៤ភាគរយ ប៉ុណ្ណោះដែលដឹងខ្លួនថាមានជំងឺអេដស៍។

រោគសញ្ញាជំងឺអេដស៍មានដូចជា៖
១.ក្ដៅខ្លួន, ឈឺក្បាល, អស់កម្លាំងល្ហិតល្ហៃ, ឈឺសាច់ដុំ, ស្រកទម្ងន់, ហើមកូនកណ្ដុរនៅ ក, ក្លៀក, និងក្រលៀន។
២.រលាកអាងត្រគាក, ឆាប់ជាំពេលប៉ះទង្គិចហ្នឹងអ្វីមួយ, រាគជាប្រចាំ, និង ក្អកស្ងួតគ្មានមូលហេតុរយៈពេលយូរ។
៣.ដង្ហក់ និងពិបាកដកដង្ហើម, ឡើងពណ៌ស្វាយពេញមាត់ និងលើស្បែក, ហូរឈាមតាមមាត់, ច្រមុះ ,ទ្វារមាស, និងរន្ធគូទ។
៤.ឡើងកន្តួលរមាស់, វង្វេង ផ្លាស់ប្ដូរអាកប្បកិរិយា និងពិបាកប្រមូលអារម្មណ៍។
បើអ្នកមានរោគសញ្ញាទាំងបួនខាងលើនេះ សូមប្រញាប់ទៅជួបគ្រូពេទ្យជាបន្ទាន់ ព្រោះថាមនុស្សម្នាក់ៗអាចមានការឆ្លើយតបជាមួយវីរុសនេះផ្សេងៗគ្នា។

មូលហេតុដែលបង្កឱ្យមានជំងឺអេដស៍គឺ៖
១.ឆ្លងតាមរយៈរួមភេទដោយមិនបានការពារត្រឹមត្រូវ
២.ប្រើម្ជុល ឬថ្នាំ រួមគ្នា
៣.ចាក់សាក់ ចោះត្រចៀក
៤.ចម្លងពីម្ដាយទៅកូន ដោយការបំបៅដោះកូន
៥.ឆ្លងតាមរយៈធ្វើក្រចក ឬកាត់ក្រចកចេញឈាម
៦.ប្រឡាក់ឈាម ទឹកកាម ឬសារធាតុរាវចេញពីទ្វារមាស លិង្គ ទៅលើដំបៅចំហរ។

វិធីព្យាបាល និងវិធីការពារ៖
១.ប្រើប្រាស់ស្រោមអនាម័យឱ្យបានត្រឹមត្រូវ និងជាប់លាប់។
២.មិនត្រូវប្រើម្ជុល ឬសឺរ៉ាំងរួមគ្នា។
៣.គួរជ្រើសរើសថ្នាំពន្យារឱ្យបានរហ័សបំផុត។
៤.បើមានដៃគូរួមភេទច្រើន គួរប្រាប់ពួកគាត់ឱ្យធ្វើតេស្តរកមេរោគនេះផង។
៥.មិនត្រូវដើរប្រាប់គេពីលទ្ធផលឈាមទេ ព្រោះអាចនឹងទទួលការរើសអើង។
៦.ស្វែងរកការប្រឹក្សាលើកទឹកចិត្ត ពីគ្រូពេទ្យចិត្តសាស្ត្រ និងក្រុមផ្ដល់កំលាំងចិត្តតាមរយៈអង្គការ ឬតាមមន្ទីរពេទ្យ។
៧.កាត់បន្ថយការរួមភេទ។
៨.ហូបស្អាត ផឹកស្អាត ចៀសវាងជក់បារី ផឹកស្រា និងប្រើប្រាស់ថ្នាំញៀន។
៩.សម្រាកឱ្យបានគ្រប់គ្រាន់ និងធ្វើលំហាត់ប្រាណ៕

ប្រទេសចិន ៖ កាលពីខែចុងខែកក្កដា ឆ្នាំ២០២៣ សារព័ត៌មានចិនបានផ្សព្វផ្សាយវីដេអូពីការដេញថ្លៃទុរេនដែលបានដាំដុះនៅខេត្តហៃណានជាលើកដំបូង ហើយមានអ្នកចាប់អារម្មណ៍ប្រជែងគ្នាចំណាយប្រាក់ដ៏ច្រើនដើម្បីទិញទុរេន១ផ្លែ ។ កាលពីប្រមាណ៤ឆ្នាំមុន កសិករចិនបានចាប់ផ្តើមសាកល្បងដាំទុរេននៅទីក្រុង Sanya ខេត្តហៃណាន ហើយនៅឆ្នាំ២០២៣នេះ ទុរេនក៏ចាប់ផ្តើមផ្តល់ផលលើកដំបូង និងត្រូវបានគេលក់ទៅតាមទីផ្សារនានា ។

ក្រុមកសិករចិនក៏បានរៀបចំការដេញថ្លៃទុរេនដើម្បីអបអរសាទរឱកាសទុរេនចេញផ្លែលើកដំបូង ហើយមានការបង្ហោះវីដេអូក្នុងបណ្តាញសង្គម និងមានអ្នកចែកចាយច្រើននៅក្នុង TikTok ។ គេសង្កេតឃើញថា មានអ្នកចាប់អារម្មណ៍ប្រជែងគ្នាទិញទុរេន១ផ្លែដែលមានទម្ងន់៦,៩១គីឡូក្រាមក្នុងកម្មវិធីដេញថ្លៃមួយ គឺចាប់ពីតម្លៃដំបូងចំនួន៨៨៨យន់ រហូតដល់តម្លៃ៣០ម៉ឺនយន់ ។

ចុងក្រោយ សូម្បីតែអ្នករៀបចំការដេញថ្លៃ ក៏ស្រឡាំងកាំងដែរ ដោយសារមានអ្នកចាប់អារម្មណ៍ហ៊ានចំណាយប្រាក់ដ៏ច្រើនដើម្បីទិញទុរេន១ផ្លែ ។ ចុងក្រោយ ទុរេនខាងលើមានតម្លៃរហូតដល់៣៨៨.៨៨៨យន់ (ប្រមាណជាង៥ម៉ឺនដុល្លារអាមេរិក) ហើយនៅពេលគ្មានអ្នកណាហ៊ានឱ្យតម្លៃលើសនេះ អ្នករៀបចំការដេញថ្លៃ ក៏បានគោះតម្លៃចំនួន៣ដងដើម្បីបញ្ចប់ការដេញថ្លៃ ។ អ្នកដេញថ្លៃផ្សេងទៀត និងអ្នកមកចូលរួមកម្មវិធីក៏បានចូលរួមសម្តែងក្តីរីករាយជាមួយសេដ្ឋីចិន ដែលហ៊ានចំណាយប្រាក់ដ៏ច្រើនមហាសាលទិញទុរេននេះ ។

កាលពីខែមីនា ឆ្នាំ២០២៣ ស្ថានីយទូរទស្សន៍ចិន CCTV បានផ្សព្វផ្សាយថា ទុរេនដែលដាំនៅខេត្តហៃណាននឹងចេញផ្លែ ហើយអាចលក់នៅលើទីផ្សារនៅខែមិថុនា ឆ្នាំ២០២៣ ។ តាមទិន្នន័យនៅខែមីនា បង្ហាញថា ទីក្រុង Sanya មានផ្ទៃដីដាំទុរេនប្រមាណ៩៣ហិកតា ។

ស្ថានីយទូរទស្សន៍ CCTV ផ្សាយថា កសិករចិនបានព្យាយាមដាំទុរេនអស់រយៈពេលជាង៧០ឆ្នាំហើយ ប៉ុន្តែអត្រារស់រានរបស់ដើមទុរេននៅប្រទេសចិនមានកម្រិតទាបខ្លាំង រហូតដល់ប៉ុន្មានឆ្នាំចុងក្រោយនេះ កសិករចិនបានសហការជាមួយប្រទេសក្នុងតំបន់អាស៊ាន និងស្ថាប័នស្រាវជ្រាវជាច្រើនរបស់ចិន ដើម្បីដោះស្រាយបញ្ហានេះ ។ លទ្ធផលការសហការលើផ្នែកដាំដុះបានជួយឱ្យអត្រាការរស់រានរបស់ដើមទុរេននាពេលបច្ចុប្បន្ន កើនឡើងដល់៩៨% ។

ទោះយ៉ាងណា សារព័ត៌មាន South China Morning Post បានរាយការណ៍កាលពីខែមិថុនា ឆ្នាំ២០២៣ ថា ទិន្នផលទុរេនចិនទាបជាងការរំពឹងទុក ។ ចំណែកអ្នកជំនាញប៉ាន់ស្មានថា នៅឆ្នាំ២០២៣ ប្រទេសចិននឹងប្រមូលផលទុរេនបានប្រមាណ៥០តោន ខណៈអត្រាការទិញទុរេនរបស់ពលរដ្ឋចិននៅឆ្នាំនេះ នឹងកើនឡើងដល់១លានតោន ៕ ប្រភព ៖ MGRonline Live

រដ្ឋធានីនីយ៉ាមេ (NIAMEY)៖ ការវាយប្រហារ ទៅលើស្ថានទូតបារាំង ប្រចាំនៅប្រទេសណៃជឺរ (Niger) ក្រោយពេលពួកយោធា បានធ្វើរដ្ឋប្រហារ កាលពីប៉ុន្មានថ្ងៃនេះរួចមក ក្រុមបណ្ដាប្រទេសអាហ្វ្រិកខាងលិច បានព្រមាន អំពីការប្រើប្រាស់កម្លាំងទ័ព ប្រឆាំងនឹងក្រុមមេដឹកនាំរដ្ឋប្រហារយោធា និង ប្រកាសដាក់ទណ្ឌកម្មដ៏ធ្ងន់ធ្ងរ។

ទីភ្នាក់សារព័ត៌មានរបស់ចក្រភពអង់គ្លេស Reuters បានចេញផ្សាយ នៅថ្ងៃចន្ទ ទី៣១ ខែកក្កដា ថា បណ្ដាប្រទេសអាហ្វ្រិកខាងលិច កាលពីថ្ងៃអាទិត្យ បានដាក់ទណ្ឌកម្ម និង គំរាមប្រើប្រាស់កម្លាំងយោធា ប្រសិនបើក្រុមមេដឹកនាំរដ្ឋប្រហាររបស់ប្រទេសណៃជឺរ នៅសប្ដាហ៍នេះ ខកខាតប្រគល់តំណែងវិញ ជូនទៅលោកប្រធានាធិបតី ម៉ូហាមមេដ បាហ្ស៊ូម (Mohammed Bazoum) ដែលត្រូវបានបណ្ដេញចេញពីតំណែង។ ស្របគ្នានេះ ក្រុមអ្នកគាំទ្រពួកយោធា បានវាយប្រហារ ទៅលើស្ថានទូតបារាំង ប្រចាំនៅក្នុងរដ្ឋធានីនីយ៉ាមេ។

សហគមន៍សេដ្ឋកិច្ចរដ្ឋអាហ្រ្វិកខាងលិច ហៅកាត់ ECOWAS (អេកូវ៉ាស) ដែលមានចំនួន១៥ប្រទេស បានឆ្លើយតប ចំពោះការធ្វើរដ្ឋប្រហារលើកទី៧ នៅក្នុងតំបន់សាហែល (Sahel) នៅក្នុងរយៈពេលប៉ុន្មានឆ្នាំកន្លងទៅថ្មីៗនេះ ខណៈហ្វូងមនុស្ស នៅក្នុងរដ្ឋធានីនីយ៉ាមេ ប្រទេសណៃជឺរ បានដុតទង់ជាតិបារាំង និង គប់ដុំថ្មទៅលើបេសកកម្មរបស់អតីតអាណានិគម ដោយបានទាញយកបំពង់ឧស្ម័នបង្ហូរទឹកភ្នែក ពីប៉ូលិស មកបាញ់។ រូបភាពជាច្រើន បានបង្ហាញពីភ្លើងឆេះ នៅតាមជញ្ជាំងស្ថានទូត និង មានមនុស្សរបួសជើង ប្រឡាក់ដោយឈាម ត្រូវគេលើកដាក់ នៅក្នុងរថយន្ដសង្គ្រោះបន្ទាន់។

នៅក្នុងកិច្ចប្រជុំបន្ទាន់មួយ នៅក្នុងប្រទេសណៃជឺរ ត្រូវពិភាក្សា ផ្ដោតទៅលើរដ្ឋប្រហារយោធា កាលពីសប្ដាហ៍មុន។ បណ្ដាមេដឹកនាំសហគមន៍សេដ្ឋកិច្ចរដ្ឋអាហ្រ្វិកខាងលិច (ECOWAS) បានអំពាវនាវឲ្យមានការស្ដារច្បាប់រដ្ឋធម្មនុញ្ញឡើងវិញ ហើយថែមទាំងព្រមាន អំពីការសងសឹក ប្រសិនបើមិនអាចស្ដារស្ថានការណ៍នេះឡើងវិញទេនោះ។

បណ្ដាមេដឹកនាំ ECOWAS ទាំង១៥ប្រទេស បានសង្កត់ធ្ងន់ ថា «វិធានការនានា អាចនឹងត្រូវអនុវត្ដ ដោយរាប់បញ្ចូលទាំងការប្រើប្រាស់កម្លាំងទ័ពផងដែរ។ ទន្ទឹមគ្នានេះ ក្រុមមន្រ្ដីក្រសួងការពារជាតិរបស់ប្រទេសទាំងនេះ នឹងជួបប្រជុំគ្នា ដើម្បីធ្វើឲ្យកិច្ចការនេះ មានប្រសិទ្ធភាព»។

លោក ម៉ាហាម៉ាត់ អាឌ្រីស ដេប៊ី (Mahamat Idriss Deby) ប្រធានាធិបតីឆាត (Chad) ដែលបានឡើងកាន់អំណាច នៅក្នុងអំឡុងឆ្នាំ២០២១ ក្រោយអំពើរដ្ឋប្រហារដែរនោះ បានជួបជាមួយនឹងសមភាគីនីហ្សេរីយ៉ា (Nigeria) លោក ប៉ូឡា ទីនូប៊ូ (Bola Tinubu) នៅខាងក្រៅកិច្ចប្រជុំនេះ ដោយបានស្ម័គ្រចិត្ត និយាយទៅកាន់មេដឹកនាំរដ្ឋប្រហារយោធា នៅក្នុងប្រទេសណៃជឺរ (Niger)។ នេះបើតាមជំនួយការរបស់ប្រធានាធិបតីឆាត និង នីហ្សេរីយ៉ា បានប្រាប់ទៅដល់ទីភ្នាក់ងារសារព័ត៌មាន Reuters ដោយសុំលក្ខខណ្ឌ មិនបញ្ចេញអត្ដសញ្ញាណ។

បណ្ដាមេដឹកនាំ ECOWAS និង សហភាពសេដ្ឋកិច្ច-រូបិយវត្ថុអាហ្វ្រិកខាងលិច ដែលមានសមាជិក ចំនួន៨ប្រទេស បានអះអាង ថា ការអនុវត្ដឲ្យមានប្រសិទ្ធភាពភ្លាមៗ គឺនៅតាមព្រំដែន ជាប់ជាមួយនឹងប្រទេសណៃជឺរ នឹងត្រូវតែបិទ, ជើងហោះហើរពាណិជ្ជកម្ម ត្រូវតែហាមឃាត់, ប្រតិបត្តិការហិរញ្ញវត្ថុត្រូវតែបញ្ឈប់ដំណើរការ, ទ្រព្យសម្បត្តិជាតិរបស់ប្រទេសណៃជឺឬត្រូវតែបង្កក និង ជំនួយតែបញ្ចប់។ ទន្ទឹមគ្នានេះ ក្រុមមេដឹកនាំយោធា ពាក់ព័ន្ធនឹងអំពើរដ្ឋប្រហារនេះ ក៏នឹងត្រូវតែហាមឃាត់នូវការធ្វើដំណើរចេញពីប្រទេសណៃជឺរ ហើយទ្រព្យសម្បត្ដិរបស់ពួកគេ ក៏ត្រូវតែបង្កក៕

រដ្ឋាភិបាលកូរ៉េ​ខាង​ជើង​ បាន​កាត់​ទោសក្មេង​អាយុ​ពីរ​ឆ្នាំ​ម្នាក់ ឱ្យ​ជាប់​ពន្ធនាគារអស់មួយជីវិត បន្ទាប់​ពី​ក្រុមចារកម្ម បានរកឃើញថាឪពុកម្តាយក្មេងនេះ​ បានលាក់គម្ពីរ Bible នៅក្នុងផ្ទះ។

ករណីនេះកើតឡើងតាំងពីឆ្នាំ២០០៩ តែទើបតែបែកធ្លាយកាលពីខែឧសភា ឆ្នាំ២០២៣ ដោយក្រុមចារកម្មអាមេរិក ជាអ្នកបញ្ចេញព័ត៌មាន។

នៅក្នុងប្រទេសកូរ៉េខាងជើងមានអ្នកទោសប្រមាណជា៥មុឺននាក់ ទៅ៧មុឺននាក់ ត្រូវ​បានរដ្ឋាភិបាលកូរ៉េ​ខាង​ជើង​គេ​ចាប់​​ដាក់ពន្ធនាគារអស់មួយជីវិតពី​បទ”ជា​គ្រិស្តសាសនិក”។

រដ្ឋធម្មនុញ្ញរបស់លោក គីម ជុងអ៊ុន បានអះអាងធានានូវសេរីភាព និងបើកសិទ្ធខាងជំនឿសាសនា ក៏ប៉ុន្តែវាគ្រាន់តែជាការផ្សព្វផ្សាយឱ្យពិភពលោកខាងក្រៅបានឃើញតែប៉ុណ្ណោះ។ ជាក់ស្តែងការផ្សព្វផ្សាយសាសនា នៅក្នុងប្រទេសនេះ អាចប្រឈមមុខនឹងការជាប់ពន្ធនាគារ។

យោងតាមរបាយការណ៍២០២០ ប្រជាជនកូរ៉េខាងជើង៧១ភាគរយមិនមានជំនឿលើព្រះនោះទេ ខណៈ១១ភាគរយទៀតមានជំនឿលើសាសនាព្រះពុទ្ធ។

គួរបញ្ជាក់ផងដែរថា រដ្ឋាភិបាលប្រទេសនេះ​បានដាក់ចេញនូមនោគមវិជ្ជាមួយហៅថា “Kimilsungism-Kimjongilism” ដែលធ្វើយ៉ាងណាឱ្យប្រជាជនប្រទេសនេះ ចាត់ទុកមេដឹកនាំរបស់ខ្លួនដូចជាព្រះ វាប្រៀបនឹងប្រព័ន្ធគ្រប់គ្រង Propaganda ដូចគ្នាដែរ ដែលមនោគមវិជ្ជាបានដាក់ចេញតាំងពីជំនាន់ជីតារបស់លោកគីម ជុងអ៊ុន ឯណោះ គឺលោក គីម​ អុីល ស៊ុង៕

ប្រភព៖ economic times

ប្រទេសឥណ្ឌា ៖ ស្ថានីយទូរទស្សន៍របស់ប្រទេសឥណ្ឌាឈ្មោះ Odisha TV បានបង្ហាញខ្លួនអ្នករាយការណ៍ព័ត៌មាន AI ជាលើកដំបូង ដែលមានឈ្មោះថា «Lisa» ។ ការបង្ហាញខ្លួននេះបានធ្វើឱ្យមនុស្សមួយចំនួនសរសើរ និងខ្លះទៀតរិះគន់ថា អ្នករាយការណ៍ព័ត៌មាន AI ខ្វះខាតជំនាញ និងបទពិសោធន៍ ។

Jagi Mangat Panda ជាសហស្ថាបនិក និងនាយកគ្រប់គ្រងរបស់ស្ថានីយទូរទស្សន៍ Odisha បានលើកឡើងថា វាជាភាពជោគជ័យដ៏សំខាន់របស់ស្ថានីយទូរទស្សន៍ និងប្រព័ន្ធផ្សព្វផ្សាយឌីជីថល ។ គោលបំណងនៃការប្រើប្រាស់បច្ចេកវិទ្យា AI គឺដើម្បីជួយកាត់បន្ថយការងារដដែលៗ ហើយវាក៏ជួយឱ្យបុគ្គលិកមានពេលវេលាផ្តោតលើការងារ ដែលត្រូវប្រើគំនិតក្នុងការផ្សព្វផ្សាយព័ត៌មានឱ្យកាន់តែមានគុណភាព ។

ក្រៅពីអ្នករាយការណ៍ព័ត៌មាន AI មានសមត្ថភាពរាយការណ៍ព័ត៌មានបានចំនួន៣ភាសា គឺភាសាអង់គ្លេស ហិណ្ឌូ និងបេងហ្គាល់ វាក៏អាចរាយការណ៍ព័ត៌មានអាកាសធាតុ និងរាយការណ៍ព័ត៌មានបាន៧៥ភាសាទៀត ។ ដូច្នេះ វាមានសមត្ថភាពខ្ពស់ដែលមនុស្សធម្មតាពុំអាចធ្វើបាន ។

ជាមួយគ្នានេះ ក៏មានការជជែកគ្នាអំពីអនាគតនៃប្រព័ន្ធផ្សព្វផ្សាយក្នុងប្រទេសដែលមានពលរដ្ឋច្រើនបំផុតលើពិភពលោក ដូចជា ឥណ្ឌា ផងដែរ ដោយសារពលរដ្ឋក្នុងប្រទេសនេះបានទំនាក់ទំនងគ្នារាប់រយភាសា ហើយបច្ចេកវិទ្យា AI បានក្លាយជាកត្តាជំរុញដ៏សំខាន់ក្នុងប្រព័ន្ធផ្សព្វផ្សាយ ។ មុននេះ ក្រុមហ៊ុនផ្សព្វផ្សាយ India Today Group ក៏ធ្លាប់បានបង្ហាញអ្នករាយការណ៍ព័ត៌មាន AI ដំបូងគេផងដែរ ឈ្មោះ Sana ក្នុងប្រទេសឥណ្ឌា ។

ចំពោះបច្ចេកវិទ្យានៅពីក្រោយការបង្កើតអ្នករាយការណ៍ព័ត៌មាន AI គឺគេប្រើប្រាស់ Machine Learning ដើម្បីវិភាគទិន្នន័យពីអត្ថបទឱ្យក្លាយជាវីដេអូ ។ អ្នកធ្វើការផ្នែកទូរទស្សន៍យល់ឃើញថា បច្ចេកវិទ្យា AI នឹងក្លាយជាប្រយោជន៍ផ្នែកឧស្សាហកម្ម ពីព្រោះវានឹងជួយសន្សំសំចៃការចំណាយ, កាត់បន្ថយភាពលំបាកក្នុងការធ្វើការជាមួយមនុស្ស ហើយវាអាចរាយការណ៍ព័ត៌មានបានច្រើនភាសា ព្រមទាំងអាចធ្វើការជាមួយព័ត៌មានច្រើនក្នុងរយៈពេលខ្លី ។

មនុស្សមួយចំនួនមិនយល់ស្របនឹងការប្រើបច្ចេកវិទ្យា AI សម្រាប់រាយការណ៍ព័ត៌មានទេ ព្រោះហានិភ័យរបស់បច្ចេកវិទ្យានេះនឹងបំផ្លាញភាពជឿជាក់នៃប្រព័ន្ធផ្សព្វផ្សាយ ។ ពួកគេនិយាយថា មនុស្សយន្តខ្វះជំនាញសង្កេត និងខ្វះបទពិសោធន៍ ដែលខុសពីគ្នាពីអ្នករាយការណ៍ព័ត៌មានជាមនុស្ស ។ ម្យ៉ាងទៀត មនុស្សយន្ត AI គ្មានលក្ខណៈធម្មជាតិ និងមិនទាក់ទាញ ហើយចំណុចនេះ គឺជាមូលហេតុប៉ះពាល់ដល់ភាពជឿជាក់របស់អ្នកទស្សនា ៕ ប្រភព ៖ Thairath Money