ប្រទេសថៃ ៖ នៅថ្ងៃទី២ ខែសីហា ឆ្នាំ២០២៣ ទំព័រហ្វេសប៊ុករបស់ស្ថានទូតចិនប្រចាំប្រទេសថៃ Chinese Embassy Bangkok បានចុះផ្សាយអត្ថបទមួយ ដែលជាការឆ្លើយតបសំណួររបស់អ្នកនាំពាក្យស្ថានទូតចិនប្រចាំប្រទេសថៃ ករណីជនជាតិថៃបារម្ភពីជនជាតិចិនបើកហាង និងដណ្តើមការងារពួកគេ ។

សំណួរ ៖ កាលពីពេលថ្មីៗនេះ ប្រព័ន្ធផ្សព្វផ្សាយព័ត៌មានតាមអនឡាញនៅប្រទេសថៃចុះផ្សាយថា មានអ្នកជំនួញ និងមគ្គុទ្ទេសក៍ចិនបានចូលមកធ្វើការនៅប្រទេសថៃ ហើយពួកគេបានដណ្តើមការងារជនជាតិថៃ ។ ហេតុនេះ អ្នកលេងបណ្តាញសង្គមថៃមួយចំនួនបានស្នើឱ្យរដ្ឋាភិបាលថៃត្រួតពិនិត្យ និងបិទហាងលក់ទំនិញខុសច្បាប់របស់ចិន ហើយស្ថានទូតចិនយល់ឃើញយ៉ាងណាដែរចំពោះរឿងនេះ ?

ចម្លើយ ៖ ប្រទេសចិន និងថៃ មានទំនាក់ទំនងមិត្តភាពជាមួយគ្នាលើផ្នែកសេដ្ឋកិច្ច និងពាណិជ្ជកម្មរវាងប្រទេសទាំងពីរយ៉ាងរឹងមាំ ។ ប្រទេសចិន គឺជាទីផ្សារនាំចេញចម្បងរបស់ថៃ ចិនជាប្រទេសដែលថៃបានវិនិយោគច្រើន ហើយចិនក៏ជាប្រភពភ្ញៀវទេសចរដ៏ច្រើនសម្រាប់ថៃផងដែរ ។ ទំនាក់ទំនងផ្នែកពាណិជ្ជកម្ម ការវិនិយោគ និងការទៅមករកគ្នារវាងប្រទេសទាំងពីរបានរួមចំណែកបង្កើតផលប្រយោជន៍ដល់ចិន និងថៃ ហើយវាក៏ជាប្រយោជន៍សម្រាប់ការអភិវឌ្ឍ និងជាក្តីសុខសានរបស់ពលរដ្ឋប្រទេសទាំងពីរ ។

នាពេលកន្លងមក ស្ថានទូតចិនបានតាមដានមតិរិះគន់នានានៅលើប្រព័ន្ធផ្សព្វផ្សាយអនឡាញរបស់ថៃ ហើយយើងយល់ឃើញថា គួរតែសម្លឹងមើលបញ្ហាជាក់លាក់ដែលកើតឡើងដោយសារជនជាតិចិនមួយចំនួន និងក្នុងលក្ខណៈអព្យាក្រឹតយ៉ាងសមហេតុផល ហើយមិនគួរយកការប្រព្រឹត្តរបស់មនុស្សខ្លះមកវាយតម្លៃលើជនជាតិចិន និងក្រុមហ៊ុនចិនទាំងអស់នៅប្រទេសថៃនោះទេ ។

អ្វីគួរប្រុងប្រយ័ត្ន គឺមានក្រុមខ្លះនៅខាងក្រៅមានចេតនាមិនល្អ ដោយព្យាយាមប្រើប្រាស់ប្រព័ន្ធអ៊ីនធើរណេតញុះញ៉ង់ និងបំផុសព័ត៌មានជាបន្តបន្ទាប់ ដើម្បីបង្ខូចកេរ្តិ៍ឈ្មោះ បំផ្លាញមុខមាត់ចិន និងបំផ្លាញកិច្ចសហការរវាងប្រទេសចិន និងថៃ ។ ហេតុនេះ ប្រទេសចិននឹងប្រឆាំងដាច់ខាត ហើយចិននឹងធ្វើការជាមួយគ្រប់ផ្នែកទាំងអស់របស់ថៃ ដើម្បីរក្សាបាននូវការអភិវឌ្ឍល្អរវាងទំនាក់ទំនងប្រទេសទាំងពីរ ៕ ប្រភព ៖ sanook

ប្រទេសចិន ៖ អ្នកលេងបណ្តាញសង្គមនៅប្រទេសចិនបាននាំគ្នាចែកចាយវីដេអូខ្លាឃ្មុំ១ក្បាលនៅក្នុងសួនសត្វហាំងចូវ (Hangzhou) ដោយសារខ្លាឃ្មុំនេះបានធ្វើសកម្មភាពជាច្រើនយ៉ាងដូចមនុស្ស ។ មនុស្សជាច្រើននិយាយថា វាមិនមែនជាខ្លាឃ្មុំពិតប្រាកដទេ ប៉ុន្តែវាជាមនុស្សបន្លំខ្លួន ព្រោះស្បែកជ្រួញរបស់វាដូចគ្នានឹងសាច់ក្រណាត់បេះបិទ ។

មូលហេតុធ្វើឱ្យភ្ញៀវទេសចរ និងអ្នកលេងបណ្តាញសង្គមចិនសង្ស័យលើខ្លាឃ្មុំ១ក្បាលនេះ ពីព្រោះគេសង្កេតឃើញថា នៅពេលមួយ ខ្លាឃ្មុំនេះបានឈរជើង២ ហើយបានលើកជើងឡើងមក ហាក់ដូចជាចង់ស្វាគមន៍ភ្ញៀវទេសចរ ។ ក្រៅពីនេះ ស្បែករបស់វាមានសភាពជ្រីវជ្រួញដូចគ្នានឹងសម្លៀកបំពាក់ដែរ ។ សារព័ត៌មាន Hangzhou Deli ចុះផ្សាយថា អ្នកលេងបណ្តាញសង្គមមួយចំនួននិយាយថា តាមលក្ខណៈការឈររបស់វា តើវាជាមនុស្សស្លៀកពាក់ឈុតខ្លាឃ្មុំមកបន្លំខ្លួនមែនទេ ?

បុគ្គលិករបស់សួនសត្វបានបដិសេធនឹងការចោទប្រកាន់នេះ ហើយនិយាយថា ខាងសួនសត្វបានរៀបចំឱ្យអ្នកសារព័ត៌មានមកមើលខ្លាឃ្មុំ កាលពីថ្ងៃទី៣១ ខែកក្កដា កន្លងមក ។ ដូច្នេះ ក្រោយពីមានការផ្សព្វផ្សាយរូបខ្លាឃ្មុំ១ក្បាលដែលឈរត្រង់ខ្លួនបង្ហាញជើងវែងរបស់វា ទើបធ្វើឱ្យអ្នកលេងបណ្តាញសង្គមជាច្រើនសង្ស័យថា ខ្លាឃ្មុំនៅសួនសត្វនេះ តើសត្វពិតប្រាកដឬក៏អត់ ?

លោក Jiang Zhi នាយករងសួនសត្វហាំងចូវ និយាយថា ៖ «ខ្លាឃ្មុំ១ក្បាលដែលបានល្បីល្បាញក្នុងបណ្តាញសង្គម គឺជាខ្លាឃ្មុំពិតប្រាកដ ហើយវាមិនមែនជាមនុស្សដូចអ្នកលេងបណ្តាញសង្គមលើកឡើងទេ ព្រោះតាមធម្មតា ខ្លាឃ្មុំភាគច្រើនអាចឈរដោយប្រើជើងខាងក្រោយបាន ។ ម្យ៉ាងទៀត នៅពេលមានសីតុណ្ហភាព៤០អង្សារសេបែបនេះ គ្មានអ្នកណាចង់ស្លៀកឈុតខ្លាឃ្មុំ ហើយចេញមកឈរនៅក្រោមកំដៅថ្ងៃក្តៅខ្លាំងទេ» ។

លោកបន្តថា ខ្លាឃ្មុំ១ក្បាលនេះរួសរាយរាក់ទាក់ជាមួយមនុស្ស វាធ្លាប់ល្បីល្បាញក្នុងបណ្តាញសង្គមនាពេលកន្លងមក ហើយវាចង់មានទំនាក់ទំនងជាមួយភ្ញៀវទេសចរក៏ថាបាន ។ បើយើងឱ្យអ្នកណាម្នាក់ស្លៀកឈុតមានរោមក្រាស់ៗបែបនេះក្នុងរដូវក្តៅ ពួកគេអាចស្លៀកឈុតនេះមិនលើសពី២នាទី ទៅ៣នាទីទេ គឺត្រូវដោះចេញ ហើយខាងសួនសត្វរបស់យើងស្ថិតក្រោមការគ្រប់គ្រងរបស់រដ្ឋាភិបាល ដូច្នេះ នឹងគ្មានរឿងបែបនេះកើតឡើងទេ ៕ ប្រភព ៖ khaochaobaan

បរទេស៖ ក្រុមអ្នកជំនាញរបស់អាមេរិកបានរកឃើញភាគល្អិតដែលទំនងជាមេរោគយក្សថ្មីមួយនៅក្នុងព្រៃនៃទីក្រុង Harvard រដ្ឋ Massachusetts ជាមួយនឹងលក្ខណៈដែលមិនធ្លាប់មានពីមុនមក។
យោងតាមប្រភពព័ត៌មាន Live Science ដែលបានរាយការណ៍នៅថ្ងៃទី ៣១ ខែកក្កដាថា ការរកឃើញរូបរាងសម្បូរបែបនេះ ភាគច្រើនគឺជាមេរោគថ្មីទាំងស្រុង ហើយក៏ត្រូវបានគេសង្កេតឃើញជាលើកដំបូងផងដែរ គ្រាប់ពូជមេរោគមួយចំនួនមានសំបកខាងក្រៅដូចផ្កាយ និងខ្លះទៀតមានចុងបំពង់ចម្លែក។

លោក Matthias Fischer អ្នកនិពន្ធ និងជាអ្នកជំនាញខាងមេរោគនៅវិទ្យាស្ថាន Max Planck សម្រាប់ការស្រាវជ្រាវវេជ្ជសាស្រ្តបាននិយាយថា មេរោគយក្សដែលបានរកឃើញក្នុងព្រៃនេះ មានទំហំពី ០.២ ទៅ ១.៥ មីក្រូម៉ែត្រ ហើយមានហ្សែនស្មុគស្មាញដែលអាចផ្ទុក DNA ដល់ទៅ ២.៥ លានគូ។ ចំនួននេះធំជាងមេរោគភាគច្រើនដូចជាមេរោគគ្រុនផ្ដាសាយដែលមានអង្កត់ផ្ចិតត្រឹមតែ ០.០៨ – ០.១២ មីក្រូម៉ែត្រប៉ុណ្ណោះ។

បច្ចុប្បន្នអ្នកជំនាញបានរកឃើញថា មេរោគយក្សច្រើនតែឆ្លងទៅសារពាង្គកាយកោសិកាតែមួយ ដូចជា អាមីបា ជាជាងសត្វ ឬមនុស្ស។ ក្រុមនៃមេរោគនេះត្រូវបានគេរកឃើញនៅក្នុងប្រព័ន្ធអេកូឡូស៊ីជុំវិញពិភពលោក រួមទាំងមហាសមុទ្រ និងបឹងអាកទិក។
លោក Fischer បានកត់សម្គាល់ឃើញថាគ្រាប់ពូជមេរោគយក្សទាំងនេះប្រហែលជាមិនមែនជាការគំរាមកំហែងដល់មនុស្សទេ ប៉ុន្តែវាអាចជាកត្តាសំខាន់មួយនៅក្នុងប្រព័ន្ធអេកូឡូស៊ី។ ការស្រាវជ្រាវបានបង្ហាញថាមេរោគដីគឺជាធាតុសំខាន់នៃវដ្តកាបូន ដំណើរការដែលកាបូនផ្លាស់ទីរវាងសារពាង្គកាយ សារធាតុរ៉ែ និងបរិយាកាស ព្រោះវាជួយគ្រប់គ្រងភាពសម្បូរបែបនៃមីក្រូសរីរាង្គដែលជះឥទ្ធិពលដោយផ្ទាល់ទៅដល់ចរន្តកាបូននៅក្នុងដី៕ ប្រភព៖vnexpress

ផ្សារកូនដំរី ដែលអ្នកនៅខេត្តបន្ទាយមានជ័យ គេតែងតែឃើញ និងទទួលស្គាល់ថា ផ្សារនេះមានដាក់លក់សត្វព្រៃជាច្រើនប្រភេទ ជាប្រចាំថ្ងៃ ហាក់មិនសូវមានការអើពើពីអាជ្ញាធរ ខណៈដែលការលក់សត្វព្រៃនេះ គឺក្បែរនឹងសាលាសង្កាត់រដ្ឋបាលព្រៃឈើអូរជ្រៅតែម្តង។

ជាក់ស្តែង គេឃើញមានការលក់សត្វពស់រស់ដែលដាក់ថង់ស្បៃលក់ ដែលមានប្រភេទពស់សាំងសឿ និងពស់ពឹសមានពស់វែកមានទម្ងន២ទៅ៣គីឡូក្រាម ខ្លះមានទម្ងន់ដល់៤ទៅ៥គីឡូក្រាមមានភាគតិចដែលកំពុងដាក់លក់ដែលពស់សាំងសឿដែលមានម្ងន់២ទៅ៣គីឡូក្រាមក្នុង១គីឡូក្រាមតំលៃ៥០.០០០ម៉ឺនរៀល និងពស់សាំងសឿទម្ងន់ជាង១គីឡូក្រាមលក់តំលៃ៣០.០០០រៀល។

ដោយឃើញមានការចរាចរណ៍យ៉ាងអណាធិបេតយ្យ ប្រពលរដ្ឋសុំអោយមន្ត្រីខ័ណ្ឌរដ្ឋបាលព្រៃឈើខេត្តបន្ទាយមានជ័យ និងសង្កាត់រដ្ឋព្រៃឈើស្រុក/ក្រុងត្រូវបានវិធានបង្ក្រាបអ្នកលក់សត្វព្រៃចំណុចផ្សារកូដំរី ក្រុងប៉ោយប៉ែត ដើម្បីទប់ស្កាត់បទល្មើសសត្វព្រៃ និងអភិរក្សាទុក និងត្រូវអោយបញ្ឈប់សកម្មភាពលក់សត្វព្រៃ៕

ប្រទេសថៃ ៖ វាបានក្លាយជារឿងមួយដែលត្រូវបានគេចែកចាយនៅក្នុងបណ្តាញសង្គមទាំងពលរដ្ឋថៃ និងជប៉ុន នៅពេលជនជាតិជប៉ុនម្នាក់បានបង្ហោះរូបភាពរថភ្លើង KIHA 183 ដែលប្រទេសជប៉ុនបានបរិច្ចាគឱ្យថៃ ប៉ុន្តែរថភ្លើងនេះបានរត់នៅលើផ្លូវដែលពោរពេញទៅដោយសំរាមនៅសងខាង ។ ក្រោយពីមានការរិះគន់មក លោកអភិបាលក្រុងបាងកកបានណែនាំឱ្យមន្ត្រីនៅក្រោមបង្គាប់ចាត់ការសំរាមនេះ ដើម្បីឱ្យបរិយាកាសនៅសងខាងផ្លូវរថភ្លើងស្អាត ។

បរិវេណមានសំរាម គឺស្ថិតនៅត្រង់ទីប្រជុំជនឌែងបុង៉ា, បុណរុំសៃ និងសហគមន៍ផ្លូវដែកយមរ៉ាជ តំបន់រ៉ាជថេវី ឃ្វែងថុម ផាយ៉ាថៃ ទីក្រុងបាងកក ។ បន្ទាប់ពីរូបភាពរថភ្លើងបានបង្ហោះផ្សព្វផ្សាយនៅក្នុងបណ្តាញសង្គម គេក៏បានឃើញអាជ្ញាធរប្រចាំក្រុងបាងកករួមគ្នាមកប្រមូលសំរាមនៅជិតស្ថានីយរថភ្លើងផាយ៉ាថៃ និងបរិវេណនៅក្បែរគ្នា ។

លោក Chatchart Sittipunt អភិបាលក្រុងបាងកកបានចុះមកពិនិត្យមើលបរិវេណតាមផ្លូវរថភ្លើងដោយខ្លួនឯង ហើយលោកបានណែនាំឱ្យមន្ត្រីប្រមូលសំរាមនេះឱ្យឆាប់រហ័ស មុនពេលប្រគល់បរិវេណនេះទៅឱ្យខាងផ្លូវដែក ។ លោកលើកឡើងថា លោកចុះមកតាមដានផ្ទាល់ និងមើលការសម្អាតបរិវេណនេះឱ្យរួចរាល់ ។ វាជាតំបន់ទទួលខុសត្រូវរបស់ស្ថាប័នជាច្រើន ហើយលោកបានជជែកជាមួយពលរដ្ឋរស់នៅទីនេះ ដើម្បីដោះស្រាយបញ្ហាជាមួយពួកគេផងដែរ ។

លោក Chatchart Sittipunt បន្ថែមថា មុននេះ មានពលរដ្ឋធ្វើផ្ទះរស់នៅសងខាងផ្លូវរថភ្លើង ហើយខាងរថភ្លើងបានឱ្យពលរដ្ឋរស់នៅសងខាងផ្លូវនេះរើផ្ទះចេញ ព្រោះត្រូវធ្វើជាតំបន់សាងសង់រថភ្លើងល្បឿនលឿន ។ ពលរដ្ឋក៏បានរើផ្ទះចេញ ប៉ុន្តែពួកគេមិនបានយកកម្ទេចកម្ទីចេញទេ ដូចជា ឈើ ស៊ីម៉ងត៍ និងសីង្កសី ដោយពួកគេគ្រាន់តែគរទុកនៅក្បែរនេះ ទើបវាក្លាយជាគំនរសំរាមតូចៗ ។ ក្រោយមក ពលរដ្ឋរស់នៅតំបន់នេះក៏ចាប់ផ្តើមយកសំរាមមកបោះចោលលើគំនរសំរាមទាំងនេះ ទើបធ្វើឱ្យគំនរសំរាមកាន់តែធំ ។

ហេតុនេះ សំរាមនៅតាមផ្លូវដែក មិនមែនជាសំរាមធម្មតាទេ ប៉ុន្តែវាជាសំរាមកើតឡើងដោយសារការផ្លាស់ទីលំនៅរបស់ពលរដ្ឋ ។ វាជាតំបន់ទីប្រជុំជនចាស់ដែលមានផ្ទះពលរដ្ឋប្រមាណ៤៨ខ្នង ។ បច្ចុប្បន្ន ទីប្រជុំជននេះមានការពិភាក្សាជាមួយស្ថាប័នផ្សេងៗដើម្បីឱ្យពលរដ្ឋមានទីលំនៅបណ្តោះអាសន្ន ហើយផ្នែករថភ្លើងក៏បានជួយដោះស្រាយបញ្ហាផ្ទះស្នាក់នៅរបស់ពលរដ្ឋផងដែរ ៕

ប្រភព ៖ sanook