ប្រទេសថៃ ៖ នៅស្រុកសែងសាង ខេត្តនគររាជសីម៉ា គឺជាតំបន់ដាំដុះដំឡូងមីដ៏ធំមួយក្នុងខេត្តនេះ និងតំបន់ភាគខាងត្បូងឦសានផងដែរ ដែលមានផ្ទៃដីដាំដំឡូងមីសរុបចំនួន១សែន២ម៉ឺនរ៉ៃ ។ ប៉ុន្តែនៅឆ្នាំ២០២៣ កសិករប្រឈមនឹងបញ្ហាតម្លៃពូជដំឡូងមីឡើងថ្លៃ ដោយសារគ្រោះរាំងស្ងួត និងជំងឺស្លឹក ។ បច្ចុប្បន្ន កសិករបានកាត់បន្ថយបរិមាណដាំដុះមកនៅត្រឹមតែ៨ម៉ឺនរ៉ៃប៉ុណ្ណោះ ។

ចំណែកកសិករដែលបានដាំដុះដំឡូងមីរួចហើយ ពួកគេក៏ព្យាយាមការពារការឆ្លងរាតត្បាតនៃជំងឺស្លឹក ព្រោះធ្វើឱ្យខាតបង់ទិន្នផលផលិត ដោយពួកគេជ្រើសរើសពូជដំឡូងមីល្អៗ និងគ្មានជំងឺ ។ លោក ថាមីន ផុតចាប៉ុ ជាកសិករដាំដំឡូងមីនៅស្រុកសែងសាង ខេត្តនគររាជសីម៉ា និយាយថា ៖ «ខ្ញុំបានជ្រើសរើសតែដើមពូជណាល្អ និងគ្មានជំងឺស្លឹកយកមកដាំ» ។

ចំណែកអ្នកជំនាញផ្នែកកសិកម្មប្រចាំស្រុកសែងសាង បានព្យាយាមចុះត្រួតពិនិត្យនៅតាមតំបន់ជាប្រចាំ និងណែនាំកសិករពីបច្ចេកទេសថែទាំដំឡូងមី ដោយកសិករត្រូវសង្កេតមើលថា ដើមដំឡូងមីមានសភាពល្អ ឬមានជំងឺ ឬមានសត្វល្អិតបំផ្លាញដែរឬទេ ។ លោក ប្រាសុង តឺមក្រាថូក អ្នកជំនាញផ្នែកកសិកម្ម លើកឡើងថា ៖ «បើឃើញដើមវាមានជំងឺ យើងត្រូវដកចោល បន្ទាប់មក ច្រកដើមស្អុយនេះដាក់ក្នុងថង់ខ្មៅ និងចងមាត់ថង់យកមកហាលថ្ងៃឱ្យស្ងួតដើម្បីកម្ចាត់ជំងឺ និងកុំឱ្យវាឆ្លងរាលដាលទៅដើមផ្សេងទៀត ។ ចំណែកការជ្រើសរើសដើមពូជវិញ គឺត្រូវយកដើមណាគ្មានជំងឺស្លឹក» ។

នាយកដ្ឋានលើកកម្ពស់កសិកម្មបង្ហាញថា មានខេត្តចំនួន១០ នៅប្រទេសថៃ ដែលមានបញ្ហាជំងឺស្លឹកដំឡូងមីនៅលើផ្ទៃដីចំនួន៦ម៉ឺន១ពាន់រ៉ៃ ។ បើតាមទិន្នន័យការស្ទង់មតិ និងតាមដានការដាំដុះដំឡូងមី ចាប់ពីឆ្នាំ២០២៣ ដល់ឆ្នាំ២០២៤ របស់សមាគមចំនួន៤ គឺ ៖ សមាគមជួញដូរដំឡូងមីថៃ, សមាគមរោងចក្រផលិតផលដំឡូងមីថៃ, សមាគមចែករំលែកដំឡូងមីថៃ និងសមាគមរោងចក្រផលិតដំឡូងមីភាគឦសាន បានរំពឹងថា នឹងមានជំងឺរាតត្បាតខ្លាំងជាងនេះទៀត ។ សមាគមលើកឡើងថា ទិន្នផលផលិតដំឡូងមីក្នុងរដូវកាលថ្មីនេះ នឹងមានត្រឹមតែ២០លានតោនប៉ុណ្ណោះ ខណៈកសិករថៃធ្លាប់ដាំបានបរិមាណជាង៣០លានតោន ។ លើសពីនេះ វានឹងប៉ះពាល់ដល់ឧស្សាហកម្មផលិតម្សៅពីដំឡូងមីផងដែរ ខណៈការនាំចេញនៅឆ្នាំ២០២២ មានតម្លៃស្មើនឹង១សែន៧ម៉ឺនលានបាត ។

សមាគមទាំង៤ បានអំពាវនាវឱ្យនាយកដ្ឋានលើកកម្ពស់កសិកម្មដោះស្រាយបញ្ហាជំងឺស្លឹកដំឡូងមី និងត្រួតពិនិត្យការឆ្លងរាតត្បាតនៅឆ្នាំ២០២៣ ដើម្បីដោះស្រាយបញ្ហាឱ្យកសិករ មុនពេលវាប៉ះពាល់ដល់ផ្នែកឧស្សាហកម្ម និងការនាំចេញ ។ កសិករប្រមាណ៧សែនគ្រួសារដែលប្រកបមុខរបរដាំដំឡូងមីសង្ឃឹមថា ពួកគេនឹងអាចលក់ដំឡូងក្នុងអំឡុងពេលវាមានតម្លៃខ្ពស់ ៕ ប្រភព ៖ Thai PBS

ប្រទេសឥណ្ឌា ៖ អាជ្ញាធរអាកាសយានដ្ឋានប្រចាំទីក្រុងញូវដេលី ប្រទេសឥណ្ឌា បានបញ្ជាឱ្យជម្លៀសអ្នកដំណើរទាំងអស់ចេញពីយន្តហោះ ដែលមានគោលដៅទៅកាន់ទីក្រុង Pune ក្រោយពីមានការគំរាមកំហែងតាមទូរស័ព្ទថា ពួកគេនឹងដាក់គ្រាប់បែកផ្ទុះក្នុងយន្តហោះនេះ ។ ហេតុការណ៍គំរាមកំហែងបានធ្វើឱ្យប៉ះពាល់ដល់ការបំពេញការងាររបស់អាកាសយានដ្ឋានជាបណ្តោះអាសន្ន ។

តាមសេចក្តីរាយការណ៍បញ្ជាក់ថា ផ្នែក Call Center របស់អាកាសយានដ្ឋានអន្តរជាតិ Indira Gandhi បានទទួលទូរស័ព្ទគំរាមថា នឹងដាក់គ្រាប់បែកក្នុងយន្តហោះ ខណៈអ្នកដំណើរកំពុងត្រៀមខ្លួនឡើងលើយន្តហោះ ។ យន្តហោះដែលគេបម្រុងនឹងដាក់គ្រាប់បែក គឺជារបស់ក្រុមហ៊ុនអាកាសចរណ៍ Vistara ហើយត្រៀមចាកចេញពីទីក្រុងញូវដេលី ទៅកាន់ទីក្រុង Pune ។

ក្រោយពីមានទូរស័ព្ទគំរាមកំហែង អាជ្ញាធរអាកាសយានដ្ឋានប្រចាំទីក្រុងញូវដេលីបានបញ្ជាឱ្យជម្លៀសអ្នកដំណើរចេញភ្លាមៗ ដើម្បីឱ្យភ្នាក់ងារប្រឆាំងអំពើភេរវកម្មធ្វើការត្រួតពិនិត្យយន្តហោះនេះយ៉ាងលម្អិត ប៉ុន្តែពួកគេមិនបានរកឃើញចំណុចគួរឱ្យសង្ស័យទេ ។ ចំណែកមន្ត្រីសមត្ថកិច្ចបានធ្វើការស៊ើបអង្កេតហេតុការណ៍នេះ ដើម្បីដាក់ទោសជនល្មើសតាមផ្លូវច្បាប់ ៕ ប្រភព ៖ Mono News

ប្រទេសចិន៖ អ្នកបុរាណវត្ថុវិទូបានរកឃើញបំពង់បង្ហូរទឹកសេរ៉ាមិចជាច្រើននៅទីតាំងយុគថ្មនៃវប្បធម៌ Longshan ដែលមានអាយុកាលជាង ៤,០០០ ឆ្នាំមកហើយ។

ប្រព័ន្ធលូត្រូវបានគេជីកកកាយនៅប្រាសាទបុរាណ Pinliangtai ក្នុងខេត្ត Henan ភាគកណ្តាលនៃប្រទេសចិន។ អ្វីដែលគួរឱ្យចាប់អារម្មណ៍នោះ នៅពេលដែលអ្នកស្រាវជ្រាវកំពុងសម្លឹងមើលប្រព័ន្ធបង្ហូរទឹកបុរាណនេះ ពួកគេក៏បានរកឃើញភស្តុតាងថ្មីជាច្រើនទៀតនៃទិដ្ឋភាពរួមក្នុងវប្បធម៌ Neolithic ។

យោងតាមការស្រាវជ្រាវដែលចុះផ្សាយក្នុងទស្សនាវដ្ដី Nature Water នៅថ្ងៃទី១៥ ខែសីហា បានឱ្យដឹងថា ប្រាសាទបុរាណ Pingliangtai ត្រូវបានរៀបចំជារាងការ៉េ សាងសង់នៅលើវេទិកាកម្ពស់ ៥ ម៉ែត្រ ដែលមានផ្ទៃដីប្រហែល ៥០,០០០ ម៉ែត្រការ៉េ និងមានប្រវែង ១៨៥ ម៉ែត្រ។ លោក Zhuang Yijie អ្នកស្រាវជ្រាវនៅវិទ្យាស្ថាន UCL Institute of Archaeology (UK) បាននិយាយថា មុនពេលដែល Pingliangtai និងការតាំងទីលំនៅផ្សេងទៀតត្រូវបានសាងសង់ តំបន់ដីល្បាប់នេះមានរាងសំប៉ែត និងទាប ហើយត្រូវបានជន់លិចតាមកាលកំណត់។ លោក Zhuang ក៏បានបន្តទៀតថា ដើម្បីកាត់បន្ថយការជន់លិចក្នុងរដូវវស្សានេះ ប្រជាជនបុរាណនាសម័យនោះ ក៏បានបង្កើតប្រព័ន្ធលូពីរជាន់។

ប្រព័ន្ធលូពីរជាន់នេះ គឺជាការរួមផ្សំគ្នានៃប្រឡាយ និងលូ ដែលវាមានសមត្ថភាពជាពិសេសក្នុងការបង្វែរទឹកក្នុងអំឡុងពេលមានភ្លៀងធ្លាក់ខ្លាំង ដោយបង្ហូរទឹកជាបន្តបន្ទាប់ ដែលរត់ស្របទៅនឹងផ្ទះ និងជួយបង្វែរទឹកចេញពីតំបន់លំនៅដ្ឋាន។ ដូចនេះប្រជាជននាសម័យមុនពិតជាអស្ចារ្យណាស់ក្នុងការផលិតប្រព័ន្ធបង្ហូរទឹកបុរាណនេះ។
ប្រាសាទបុរាណ Pingliangtai ត្រូវបានរកឃើញក្នុងទសវត្សរ៍ឆ្នាំ ១៩៨០ និងជាទីក្រុងបុរេប្រវត្តិដែលបានគ្រោងទុកមុនគេបំផុតនៅក្នុងប្រទេសចិន។ ទីតាំងបុរាណវត្ថុ Pinliangtai ធ្លាប់ជាមជ្ឈមណ្ឌលក្នុងតំបន់នៅក្នុងវប្បធម៌ Longshan ។ វត្ថុបុរាណវប្បធម៌ជាច្រើន រួមទាំងគ្រឿងស្មូនល្អៗ និងត្បូងថ្ម ក៏ត្រូវបានជីករកឃើញនៅទីនោះផងដែរ៕ប្រភព៖cafef.com

យើងបានដឹងមកហើយថា ក្នុងការសិក្សាថ្នាក់កម្រិតឧត្តមសិក្សាគឺគេពុំគិតចំណាត់ថ្នាក់ដូចនៅកម្រិតវិទ្យាល័យឡើយ ព្រោះគេគិតទៅលើ GPA ឬព្រឹត្តិបត្រពិន្ទុជាសំខាន់។ តើ GPA ជាអ្វី? ហេតុអ្វីនិស្សិតគួរមានវា?

GPA (Grade Point Average) ឬព្រឹត្តបត្រពិន្ទុ គឺ​ជា​ពិន្ទុវាយ​តម្លៃ​ការ​សិក្សា​របស់​និស្សិត​ចាប់​ពីឆ្នាំ​មូលដ្ឋានរហូត​ដល់​ឆ្នាំ​ទី៤។  GPA មាន​សារៈ​សំខាន់​ណាស់ វាអាចធ្វើការវាយតម្លៃលើសមត្ថភាពនិស្សិត ប្រសិនបើនិស្សិតទទួលបាន GPAខ្ពស់ វាអាចលើកកិត្តិយសរបស់និស្សិតបាន។

លើសពីនេះទៅទៅទៀត GPA សំខាន់ពេល​ដាក់​ពាក្យធ្វើការ ក៏ដូចជាដាក់​អាហារូបករណ៍ទាំងក្នុងស្រុកនិងក្រៅស្រុក ។ តួយ៉ាងដូចជាអាហារូបករណ៍​ខ្លះ​ទាម​ទារ​ឱ្យ​មាន​ពិន្ទុ GPA​ ចាប់​ពី​ ៣.៥​ឡើង​ទៅ ទើប​អាច​ដាក់ពាក្យ​បាន៕

ប្រភព: jcu.edu

រដ្ឋធានីកៀវ៖ ក្រោយពេលសង្គ្រាមរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន បានផ្ទុះឡើង នៅក្នុងប្រទេសអ៊ុយក្រែន មិនបានប៉ុន្មានខែផង ក្រុងមូស្គូ បានបញ្ជាឲ្យកេណ្ឌកងទ័ព រាប់សែននាក់ ដើម្បីបញ្ជូនទៅកាន់សមរភូមិ ហើយឥឡូវនេះ រដ្ឋាភិបាលក្រុងកៀវ ក៏បានចាប់ផ្ដើមលើកទឹកចិត្ត ដល់ប្រជាជនរបស់ខ្លួន ឲ្យចុះឈ្មោះ ចូលបម្រើកងទ័ព។

សារព័ត៌មាន Al Jazeera បានចេញផ្សាយ នៅថ្ងៃសុក្រ ទី១៨ ខែសីហា ថា ក្រសួងការពារជាតិអ៊ុយក្រែន កំពុងតែលើកទឹកចិត្តដល់ប្រជាពលរដ្ឋរបស់ខ្លួន មានអាយុចូលបម្រើកងទ័ព ត្រូវតែទៅធ្វើបច្ចុប្បន្នភាពទិន្នន័យរបស់ខ្លួន នៅឯការិយាល័យចុះឈ្មោះកងទ័ព ហើយជម្នះលើការភ័យខ្លាចរបស់ពួកគេ ស្របពេលក្រុងកៀវ កំពុងតែបើកយុទ្ធនាការ វាយបករំដោះទឹកដីរបស់ខ្លួន ឈានដល់ខែទី៣។

លោកស្រី ហានណា ម៉ាលីយ៉ា (Hanna Maliar) អនុរដ្ឋមន្រ្ដី ក្រសួងការពារជាតិអ៊ុយក្រែន បានអះអាង ថា យុទ្ធនាការចុះឈ្មោះរបស់ប្រជាពលរដ្ឋ ចូលបម្រើកងទ័ពនេះ បានចាប់ផ្ដើម កាលពីថ្ងៃព្រហស្បតិ៍ (ទី១៧ ខែសីហា)។ សកម្មភាពទាំងនេះ បានបង្ហាញ នៅលើវីដេអូ និង រូបថតដែលជាសក្ខីកម្ម សម្រាប់ទាហានលេចធ្លោ ដោយបានពិពណ៌នា អំពីការភ័យខ្លាចរបស់ពួកគេ មានបំណងបំបែកឧបសគ្គដ៏ធំមួយ នៅក្នុងការជ្រើសរើសកងទ័ព។

លោកស្រី ហានណា ម៉ាលីយ៉ា បានសង្កត់ធ្ងន់ ថា «យើងទាំងអស់គ្នា កំពុងតែនៅមានជីវិត ហើយយើងទាំងអស់គ្នា ត្រូវតែយកឈ្នះ លើការភ័យខ្លាចទាំងនេះ ដើម្បីឈ្នះ។ ពលរដ្ឋដែលមានអាយុចូលបម្រើកងទ័ព មានកាតព្វកិច្ចរក្សាទិន្នន័យផ្ទាល់ខ្លួនរបស់ពួកគេ នៅក្នុងការិយាល័យជ្រើសរើសកងទ័ព។

យុទ្ធនាការជ្រើសរើសកងទ័ពនេះ បានកើតឡើង ស្របពេលអ៊ុយក្រែន ទំនងជាប្រឈមមុខនឹងបញ្ហាប្រឈម កាន់តែខ្លាំង នៅក្នុងការជ្រើសរើសទ័ព ស្របពេលក្រុងកៀវ កំពុងតែធ្វើសង្រ្គាមជាមួយរុស្ស៊ី។ ឥឡូវ សង្គ្រាមនេះ កំពុងតែឈានចូល នៅក្នុងដំណាក់កាលដ៏ឃោរឃៅ ចាប់តាំងពីលោកប្រធានាធិបតី វ៉្លាឌីមៀ ពូទីន បានបញ្ជាឲ្យកងទ័ពរបស់គាត់ បើកទ្វារព្រំដែន វាយលុកលុយ ចូលទៅក្នុងប្រទេសជិតខាងរបស់ខ្លួន កាលពីថ្ងៃទី២៤ ខែកុម្ភៈ ឆ្នាំ២០២២មក។

លោកស្រី អនុរដ្ឋមន្រ្ដី ក្រសួងការពារជាតិអ៊ុយក្រែន បាននិយាយ ដោយមានការប្រយ័ត្នប្រយែង ដោយបានគូសបញ្ជាក់ អំពីយុទ្ធការជ្រើសរើសកងទ័ព ថា ប្រជាពលរដ្ឋអ៊ុយក្រែន ទាំងអស់ ដែលមិនបានធ្វើបច្ចុប្បន្នភាពផ្ទាល់ខ្លួន នឹងអាចបញ្ចូលទៅក្នុងជួរកងទ័ព ដោយស្វ័យប្រវត្ដិ ហើយមិនថា ពួកគាត់ទាំងនោះ ត្រូវចល័ត នឹងជាប់ នៅក្នុងតំបន់ប្រយុទ្ធនោះឡើយ។

សកម្មភាពបែបនេះ ក៏ធ្លាប់ធ្វើរួចមកហើយ នៅក្នុងប្រទេសរុស្ស៊ី ក្រោយពេលលោកប្រធានាធិបតី វ៉្លាឌីមៀ ពូទីន បានចេញក្រឹត្យ ជំរុញឲ្យកេណ្ឌទ័ព នាំទៅសមរភូមិ ចាប់តាំងពីរដ្ឋាភិបាលក្រុងមូស្គូ បានលើកទ័ព ចូលឈ្លានពាន នៅក្នុងប្រទេសអ៊ុយក្រែន មិនបានប៉ុន្មានខែផង។ ការចេញក្រឹត្យរបស់មេដឹកនាំវិមានក្រឹមឡាំង បានធ្វើឲ្យយុវជនរុស្ស៊ី មានការភ័យខ្លាច រត់ចេញពីប្រទេសរបស់ខ្លួន គេចេញពីការកេណ្ឌទ័ពទៅច្បាំងនេះ។

ដោយឡែក អគ្គសេនាធិការកងទ័ពអ៊ុយក្រែន បានបង្ហោះ នៅលើបណ្ដាញសង្គមហ្វេសប៊ុក កាលពីថ្ងៃព្រហស្បតិ៍ ទី១៧ ខែសីហា ថា គិតចាប់តាំងពីថ្ងៃទី២៤ ខែកុម្ភៈ ឆ្នាំ២០២២ ដល់ថ្ងៃទី១៧ ខែសីហា ឆ្នាំ២០២៣ រុស្ស៊ី បានបាត់បង់កម្លាំងទាហាន នៅលើសមរភូមិរបស់អ៊ុយក្រែន ចំនួន ២៥៦ ០៥០នាក់។

បើទោះជាយ៉ាងណា នៅមិនទាន់មានប្រភពឯករាជ្យណាមួយ បញ្ជាក់នោះឡើយ។ រីឯការអះអាងទាំងនេះ គ្រាន់តែជាការចេញផ្សាយ ដោយភាគីអ៊ុយក្រែន តែប៉ុណ្ណោះ។ ជាការពិតណាស់ ទាំងរុស្ស៊ី និង អ៊ុយក្រែន តែងតែលាក់តួលេខ អំពីចំនួនទាហានរបស់ខ្លួន ស្លាប់ ឬ រងរបួស នៅលើសមរភូមិ៕

ប្រទេសថៃ ៖ សហករណ៍សាច់គោ ស្រ៊ីវិឆ័យ ខេត្តផាត់ថាលុង ប្រទេសថៃ បានសហការជាមួយផ្នែកឯកជនម៉ាឡេស៊ី ដើម្បីនាំចេញសត្វគោទៅប្រទេសម៉ាឡេស៊ី ដោយមិនឆ្លងកាត់ឈ្មួញកណ្តាល ។ ការសហការគ្នានេះដើម្បីដោះស្រាយបញ្ហាតម្លៃគោធ្លាក់ចុះ ហើយប្រទេសថៃនឹងឃុំទុកគោទាំងនេះរយៈពេល១ខែ មុននឹងបញ្ជូនទៅប្រទេសម៉ាឡេស៊ី បន្ទាប់មក ប្រទេសម៉ាឡេស៊ីនឹងឃុំវារយៈពេល១ខែទៀត មុននឹងលក់ឱ្យអតិថិជន ។

លោក Suphat Thammaphet អតីតសមាជិកសភាខេត្តផាត់ថាលុង និងជាប្រធានក្រុមប្រឹក្សាសហករណ៍សាច់គោ ស្រ៊ីវិឆ័យ ខេត្តផាត់ថាលុង លើកឡើងថា បច្ចុប្បន្ននេះ ការជួញដូរគោមានតម្លៃធ្លាក់ចុះជាបន្តបន្ទាប់ ដែលធ្វើឱ្យកសិករថៃប្រឈមនឹងបញ្ហាខាតបង់ដើមទុន ដោយសារគ្មានឈ្មួញកណ្តាលមកទិញ ហើយពួកគេមិនអាចលក់ទៅឱ្យប្រទេសម៉ាឡេស៊ី ។

លោក Suphat Thammaphet បន្តថា ការជួញដូរគោជាមួយប្រទេសម៉ាឡេស៊ី គ្មានភាពប្រាកដប្រជាទេ ព្រមទាំងមានបញ្ហាក្នុងការឃុំខ្លួនសត្វ មុននឹងលក់ចេញទៅប្រទេសម៉ាឡេស៊ីទៀតផង ។ ដូច្នេះ ដើម្បីដោះស្រាយបញ្ហានេះ សហករណ៍សាច់គោ ស្រ៊ីវិឆ័យ បានសហការគ្នាជាមួយអ្នកជំនួញម៉ាឡេស៊ី ក្នុងការលក់គោទាំងនេះទៅឱ្យអតិថិជន ។ ការអនុវត្តគម្រោងនេះ សហករណ៍សាច់គោ ស្រ៊ីវិឆ័យ នឹងទទួលទិញសាច់គោពីសមាជិកសហករណ៍ និងក្រុមបណ្តាញចំនួន៥០ ក្នុងតម្លៃខ្ពស់ជាងពេលបច្ចុប្បន្ន ។

លោកបន្ថែមថា យើងនឹងយកសត្វគោទាំងអស់មកឃុំទុកនៅសហករណ៍សាច់គោ ស្រ៊ីវិឆ័យ រយៈពេល១ខែ ហើយនៅពេលគ្រប់កំណត់ ខាងសហករណ៍នឹងបញ្ជូនគោទាំងអស់ទៅឃុំនៅប្រទេសម៉ាឡេស៊ីបន្តរយៈពេល១ខែទៀត ហើយចុងក្រោយ យើងនឹងលក់គោទៅឱ្យអតិថិជនម៉ាឡេស៊ី ។

លោកបញ្ជាក់ថា បច្ចុប្បន្ន ខាងសហករណ៍ និងក្រុមអ្នកជំនួញម៉ាឡេស៊ីបានជួលទីកន្លែងសម្រាប់ឃុំគោទាំងនេះរួចរាល់ហើយ ហើយទីកន្លែងទាំងពីរនេះនឹងមានអ្នកជំនាញផ្នែកសត្វមកថែទាំគោផងដែរ ។ ដូច្នេះ ការជួញដូរគោ នឹងមិនចាំបាច់ឆ្លងកាត់តាមរយៈឈ្មួញកណ្តាលទៀតទេ ហើយគម្រោងនេះនឹងអនុវត្តចាប់ពីខែកញ្ញា ឆ្នាំ២០២៣ តទៅ ។ យើងមានទំនុកចិត្តថា ការអនុវត្តគម្រោងខាងលើនឹងធ្វើឱ្យការជួញដូរគោមានតម្លៃខ្ពស់ជាងមុនមិនខាន ៕ ប្រភព ៖ Thairath