រដ្ឋធានីបាដដាដ៖ ប្រជាជនអ៊ីរ៉ាក់ ចំនួន២គ្រួសារ បានរៀបចំពិធីមង្គលការ តាមបែបប្រពៃណីរបស់ពួកគេ ដោយមានភ្ញៀវទាំងសងខាង មកចូលរួមអបអរ និង ជូនពរជ័យដល់គូស្វាមីភរិយាថ្មោងថ្មី ប៉ុន្ដែជាអកុសល សម្រាប់តែផ្ទុះនូវគ្រោះអគ្គិភ័យឆាបឆេះឡើង បណ្ដាលឲ្យមនុស្សជាង១០០នាក់ បានបាត់បង់ជីវិត និង ១៥០នាក់ផ្សេងទៀត រងរបួស កាលពីវេលារំលងអធ្រាត្រ ឈានចូលថ្ងៃពុធ ទី២៧ ខែកញ្ញា នៅក្នុងស្រុកហាមដានីយ៉ា (Hamdaniya) ខេត្តនីណេវេ (Nineveh) នាភាគខាងជើង ប្រទេសអ៊ីរ៉ាក់។
បណ្ដាញទូរទស្សន៍អារ៉ាប់អន្ដរជាតិ Al Arabiya News បានផ្សាយ កាលពីព្រឹក ថ្ងៃពុធ ទី២៧ ខែកញ្ញា ដោយដកស្រង់ប្រភព ពីអាជ្ញាធរ បានអះអាង ថា មានមនុស្ស ជាង១០០នាក់បានបាត់បង់ជីវិត និង ១៥០នាក់ផ្សេងទៀត រងរបួស នៅក្នុងហេតុការណ៍គ្រោះអគ្គិភ័យ នៅក្នុងពិធីមង្គលការមួយ នៅក្នុងស្រុក Hamdaniya។
លោក ហាសសាន់ អាល-អាល់ឡាក់ (Hassan al-Allaq) អភិបាលរងខេត្ត Nineveh បានប្រាប់ដល់ទីភ្នាក់ងារសារព័ត៌មានរបស់ចក្រភពអង់គ្លេស Reuters ថា មនុស្ស ចំនួន១១៣នាក់ បានស្លាប់ និង ១៥០នាក់ផ្សេងទៀត បានរងរបួស។ រីឯចំនួនអ្នកស្លាប់ អាចនឹងកើនឡើង បន្ថែមទៀត។
បើទោះយ៉ាងណា អាជ្ញាធរខេត្ត Nineveh នៅមិនទាន់ បានបញ្ជាក់ អំពីមូលហេតុនាំឲ្យកើតគ្រោះអគ្គិភ័យ រហូតបង្កឲ្យកើតមានសោកនាដកម្មបែបនេះឡើយ៕
