ប្រទេសអង់គ្លេស ៖ សារព័ត៌មានអង់គ្លេសចុះផ្សាយថា នាយករដ្ឋមន្ត្រីអង់គ្លេស លោក Richie Sunak កំពុងពិចារណាចេញវិធានការហាមលក់បារីឱ្យយុវជនជំនាន់ថ្មី ។ ប្រសិនបើការហាមឃាត់នេះទទួលបានជោគជ័យ អង់គ្លេសនឹងក្លាយជាប្រទេសទី២ នៅលើពិភពលោក បន្ទាប់ពីប្រទេសនូវែលសេឡង់ ដែលហាមពលរដ្ឋជក់បារី ។

អ្នកនាំពាក្យរដ្ឋាភិបាលអង់គ្លេសបានផ្តល់សម្ភាសន៍ជាមួយសារព័ត៌មានរ៉យទ័រថា រដ្ឋាភិបាលមានគោលបំណងឱ្យពលរដ្ឋអង់គ្លេសទាំងអស់កាត់បន្ថយ ឬបញ្ឈប់ការជក់បារីកាន់តែច្រើន ហើយរដ្ឋាភិបាលសង្ឃឹមថា នឹងអាចសម្រេចគោលដៅនៅឆ្នាំ២០៣០ ។ ក្រៅពីការហាមលក់បារីឱ្យយុវជនជំនាន់ថ្មីហើយ វិធានការនេះបានរួមបញ្ចូលទាំងការចែកឧបករណ៍ឈប់ជក់បារីដោយឥតគិតថ្លៃផងដែរ ។ លើសពីនេះ នឹងមានការផ្តល់រង្វាន់លើកទឹកចិត្តដល់ស្ត្រីមានផ្ទៃពោះឱ្យឈប់ជក់បារីទៀតផង ។

សារព័ត៌មាន The Guardian ចុះផ្សាយថា វិធានការរបស់អង់គ្លេសស្រដៀងគ្នានឹងច្បាប់របស់នូវែលសេឡង់ ដែលបានប្រកាសកាលពីឆ្នាំ២០២២ គឺហាមលក់បារីគ្រប់ប្រភេទឱ្យពលរដ្ឋ ដែលកើតក្រោយថ្ងៃទី១ ខែមករា ឆ្នាំ២០០៩ ។ ក្រៅពីនេះ នូវែលសេឡង់បានកាត់បន្ថយហាងលក់បារីពីចំនួន៦.០០០កន្លែង មកស្មើត្រឹម៦០០កន្លែងប៉ុណ្ណោះ រួមទាំងកាត់បន្ថយបរិមាណសារធាតុនីកូទីនក្នុងការផលិតបារីផងដែរ ។

ការចេញវិធានការហាមលក់បារីឱ្យយុវជនជំនាន់ថ្មី គឺក្នុងគោលបំណងកាត់បន្ថយចំនួនអ្នកជំងឺផ្សេងៗដែលបណ្តាលមកពីការជក់បារី ដូចជា ជំងឺមហារីក និងជំងឺគាំងបេះដូងជាដើម ។ ហេតុនេះ ប្រទេសអង់គ្លេសត្រូវចំណាយថវិកាផ្នែកសុខភាពសាធារណៈរាប់លានដុល្លារអាមេរិកក្នុង១ឆ្នាំ សម្រាប់ការព្យាបាលជំងឺ ៕ ប្រភព ៖ TNN Health

បរទេស៖ យោងតាមស្ថិតិពីក្រុមហ៊ុនស្រាវជ្រាវទីផ្សារ TrendForce កាលពីថ្ងៃទី២៥ ខែកញ្ញា បានឱ្យដឹងថា ក្រុមហ៊ុន Nvidia ទទួលបានប្រាក់ចំណូល ១១,៣៣២ ពាន់លានដុល្លារក្នុងត្រីមាសចុងក្រោយនេះ ដែលវាកើនឡើង ៦៨.៣% បើធៀបនឹងត្រីមាសទីមួយនៃឆ្នាំ ២០២៣។ ក្នុងអំឡុងពេលដូចគ្នា ប្រាក់ចំណូលរបស់ក្រុមហ៊ុន Qualcomm បានថយចុះ ៩.៧% មកនៅត្រឹម ៧,១៧៤ ពាន់លានដុល្លារ។ ដូច្នេះ បច្ចុប្បន្ននេះក្រុមហ៊ុន Nvidia ក៏បានវ៉ាដាច់ដៃគូប្រកួតប្រជែងរបស់ខ្លួនជាច្រើនដូចជា Broadcom, AMD និង MediaTek ដើម្បីក្លាយជាក្រុមហ៊ុនរចនាបន្ទះឈីបដែលមានប្រាក់ចំណូលខ្ពស់បំផុតក្នុងពិភពលោក។

មូលហេតុដែល Nvidia បានក្លាយជាក្រុមហ៊ុនរចនាបន្ទះឈីបដ៏ធំបំផុតរបស់ពិភពលោក គឺដោយសារការនាំចេញដ៏ធំនៃប្រព័ន្ធ HGX ដែលមានប្រសិទ្ធភាពខ្ពស់។ លើសពីនេះ ផ្នែកគាំទ្រហ្គេម និងរូបភាពរបស់ក្រុមហ៊ុនក៏បានអភិវឌ្ឍយ៉ាងខ្លាំងផងដែរ បន្ទាប់ពីបានចេញលក់ផលិតផលថ្មីៗជាបន្តបន្ទាប់ បច្ចុប្បន្នក្រុមហ៊ុននេះមានចំណែកទីផ្សាររហូតដល់ ២៩.៧%។ ទន្ទឹមនឹងនេះដែរក្រុមហ៊ុន Qualcomm ដែលជាគូប្រជែងដ៏ធំរបស់ Nvidia បានកាត់បន្ថយប្រាក់ចំណូល ដោយសារតែតម្រូវការសម្រាប់ស្មាតហ្វូន Android មានការថយចុះ។ បើទោះបីជាមាន Apple ចុះហត្ថលេខាលើកិច្ចសន្យាទិញបន្ទះឈីបបណ្តាញវិជ្ជមានក៏ដោយ ក៏វាមិនអាចជួយកែលម្អស្ថានភាពអាជីវកម្មរបស់ក្រុមហ៊ុន Qualcomm នោះទេ។

ទោះជាយ៉ាងណាក៏ដោយ ថ្មីៗនេះក្រុមហ៊ុន Nvidia គ្រោងនឹងដឹកជញ្ជូនបន្ទះឈីប H១០០ ចំនួន ១.៥ ទៅ ២ លានបន្ទះនៅឆ្នាំ ២០២៤ ដែលខ្ពស់ជាងគោលដៅក្នុងឆ្នាំនេះ ៥០០,០០០ ដង។ ក្រុមហ៊ុនក៏បានព្យាករណ៍ផងដែរថាតម្រូវការសម្រាប់បន្ទះឈីបម៉ាស៊ីនមេ AI នឹងកើនឡើងជិត ៥០% ក្នុងរយៈពេល ៥ ឆ្នាំខាងមុខ។ នៅសហរដ្ឋអាមេរិក ក្រុមហ៊ុនផ្តល់សេវាកុំព្យូទ័រលើពពកដូចជា Microsoft, Amazon និង Google ក៏កំពុងផ្លាស់ប្តូរការផ្តោតអារម្មណ៍លើការអភិវឌ្ឍន៍របស់ពួកគេទៅការកសាង ហេដ្ឋារចនាសម្ព័ន្ធ AI ផងដែរ៕
ប្រភព៖vnexpress

ស្នាដៃ “Paulette Jourdain” ដែលគូរដោយវិចិត្រករ Amedeo Modigliani ជនជាតិអ៊ីតាលីពណ៌នានារីម្នាក់ដែលមានឈ្មោះដូចគ្នានឹងខ្លួនត្រូវបានគេរំពឹងថានឹងឈានដល់ ៤៥ លានដែលជាតម្លៃខ្ពស់បំផុតក្នុងការដេញថ្លៃ។ The Value បាននិយាយថា រូបបញ្ឈរនេះគឺស្ថិតនៅក្នុងការដេញថ្លៃរបស់គូស្នេហ៍មហាសេដ្ឋីចិន Liu Yiqian និង Wang Wei ដែលធ្វើឡើងនៅដើមខែតុលានៅ កន្លែងលក់ និងដេញថ្លៃស្នាដៃសិល្បៈ Sotheby’s ទីក្រុងហុងកុង ។

គំនូរនេះត្រូវបានគូរក្នុងឆ្នាំ ១៩១៩ ជាមួយនឹងថ្នាំផ្ទាំងក្រណាត់ទំហំ 100.3×65.4 សង់ទីម៉ែត្រ។ រូបគំនូរនេះធ្លាប់ជាផ្នែកមួយនៃបណ្តុំផ្ទាល់ខ្លួនរបស់ A. Alfred Taubman ត្រូវបានលក់ទៅឱ្យគូស្នេហ៍មហាសេដ្ឋីចិនខាងលើនៅ Sotheby’s ទីក្រុងញ៉ូញ៉ក ក្នុងឆ្នាំ២០១៥ ក្នុងតម្លៃ ៤២.៨លានដុល្លារ។

Paulette Jourdain គឺជាគំនូរចុងក្រោយរបស់វិចិត្រករ Modigliani ។ គំរូប្រភេទ Paulette កើតនៅទីក្រុងឆ្នេរសមុទ្រតូចមួយនៃភាគពាយព្យប្រទេសបារាំង ហើយបានមកទីក្រុងប៉ារីសនៅដើមឆ្នាំ ១៩១៩ ។ នារីក្នុងគំនូរនេះបានរស់នៅក្នុងផ្ទះល្វែងរបស់បុរសម្នាក់ឈ្មោះ Zborowski ហើយបានជួប Modigliani នៅទីនេះ។

Amedeo Modigliani (១៨៨៤ -១៩២០) គឺជាវិចិត្រករ និងជាងចម្លាក់ជនជាតិអ៊ីតាលី ដែលធ្វើការភាគច្រើននៅប្រទេសបារាំង។ គាត់ធ្លាប់មានការតាំងពិព័រណ៍អន្តរជាតិជាច្រើននៅទីក្រុងប៉ារីស ទីក្រុងឡុងដ៍ ហ្សូរីច និងញូវយ៉ក។ កេរ្តិ៍ឈ្មោះរបស់ Modigliani ត្រូវបានបង្កើតឡើងនៅពេលបង្កើតគំនូរ Paulette Jourdain ។

វិចិត្រកររូបនេះបានស្លាប់នៅអាយុ ៣៥ឆ្នាំនៅទីក្រុងប៉ារីសដោយសារជំងឺរលាកស្រោមខួររបេងដោយបន្សល់ទុកស្នាដៃប្រហែល ៣៥០ ដែលភាគច្រើនត្រូវបានបង្ហាញនៅសារមន្ទីរសិល្បៈ Dallas និង London។ គំនូររបស់វិចិត្រកររូបនេះពេលនៅរស់រានមានជីវិតគ្រាន់តែគូរដើម្បីដូរបាយប៉ុណ្ណោះ។ ប៉ុន្តែបន្ទាប់ពីមរណភាពរបស់លោកស្នាដៃរបស់គាត់ច្រើនតែស្ថិតក្នុងចំណោមគំនូរដែលមានតម្លៃថ្លៃបំផុត និងមានតម្លៃបំផុតគ្រប់ពេលវេលា។ ជាក់ស្តែង នៅឯ Sotheby’s ទីក្រុងញ៉ូយ៉ក ក្នុងឆ្នាំ២០១៨ រូបគំនូរស្ត្រីអាក្រាតកាយលើគ្រែដែលគូរដោយវិចិត្រករអ៊ីតាលីរូបនេះបានក្លាយជាផ្ទាំងគំនូរដែលមានតម្លៃថ្លៃបំផុតមួយនៅក្នុងប្រវត្តិសាស្ត្រ ដោយលក់នៅក្នុងការដេញថ្លៃបានចំនួន ១៥៧,២លានដុល្លារ៕

រដ្ឋធានីវ៉ាស៊ីនតោន៖ ជាមួយនឹងការពង្រីកឥទ្ធិពលរបស់ក្រុងប៉េកាំង នៅក្នុងតំបន់នោះ ប្រធានាធិបតីសហរដ្ឋអាមេរិក ក៏បានទទួលស្គាល់ដល់ប្រទេសដែនកោះចំនួន២ នៅក្នុងតំបន់ប៉ាស៊ីហ្វិកខាងត្បូង កំពុងតែប្រឈមមុខ ជាមួយនឹងប្រទេសចិន។

សារព័ត៌មាន Channel News Asia បានចេញផ្សាយ កាលពីរាត្រី ថ្ងៃច្ទ ទី២៥ ខែកញ្ញា ថា លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានបញ្ជាក់ ថា រដ្ឋាភិបាលក្រុងវ៉ាស៊ីនតោន បានទទួលស្គាល់ជាផ្លូវការ ចំពោះប្រជាជាតិប៉ាស៊ីហ្វិក ចំនួន២ រួមមាន ប្រទេសដែនកោះឃុក (Cook Island) និង កោះនីយូ (Niue) កាលពីថ្ងៃចន្ទ (ថ្ងៃទី 25 ខែកញ្ញា) ស្របពេលលោកប្រធានាធិបតី បានរៀបចំធ្វើជាម្ចាស់ផ្ទះ ទទួលមេដឹកនាំនានា នៅក្នុងតំបន់ ដោយគោលបំណង ដើម្បីដណ្តើមឥទ្ធិពល ពីប្រទេសចិន។

ការប្រកាសរបស់លោកប្រធានាធិបតី ចូ បៃដិន បានកើតឡើង ចំពេលកិច្ចប្រជុំកំពូល នៃវេទិការបស់ប្រទេសដែនកោះប៉ាស៊ីហ្វិក ចំនួន១៨។ ទន្ទឹមគ្នានេះ ក្រុមមន្រ្ដីសហរដ្ឋអាមេរិក បានបញ្ជាក់ ថា លោកប្រធានាធិបតី បៃដិន កំពុងតែប្រកាស អំពីគោលជំហររបស់សហរដ្ឋអាមេរិក នៅក្នុងការការពារដល់បណ្ដាប្រទេសនានា នៅក្នុងតំបន់។

ប្រទេសដែនកោះឃុក (Cook Island) ស្ថិតនៅភាគខាងត្បូង មហាសមុទ្រប៉ាស៊ីហ្វិក ហើយមានទំនាក់ទំនងនយោបាយជាមួយនឹងប្រទេសនូវែលហ្សេឡង់ដ៍ និង មានប្រជាជនប្រហែល ១៥ ០០០នាក់។ រីឯប្រទេសដែនកោះនីយូ (Niue) ក៏ស្ថិតនៅប៉ាស៊ីហ្វិកខាងត្បូង ផងដែរ ដោយមានប្រជាជន ប្រហែលជាជិត២០០០នាក់។ ប្រទេសដែនកោះទាំង២នេះ គ្រប់គ្រងអំណាច តាមរបបរាជានិយមអាស្រ័យរដ្ឋធម្មនុញ្ញ ក្រោមការសោយរបស់ព្រះមហាក្សត្រ ឆាលស៍ ទី៣ (Charles III) ដែលជាស្ដេច នៃចក្រភពអង់គ្លេស និង ប្រទេសខមម៉ែនវែល ចំនួន១៤ផ្សេងទៀត។ ថ្វីបើប្រទេសដែនកោះទាំង២នេះ មានប្រជាជន សរុបមិនដល់២០០០០នាក់ ក៏ពិតមែន ប៉ុន្ដែប្រទេសទាំង២នេះ កំពុងតែក្លាយជាតំបន់សេដ្ឋកិច្ចដ៏ទូលំទូលាយ នៅតំបន់មហាសមុទ្រប៉ាស៊ីហ្វិកខាងត្បូង។

ដែនកោះទាំង២នេះ ក្លាយជាប្រទេស គ្រប់គ្រងដោយខ្លួនឯង នៅក្នុង«សមាគមសេរី»ជាមួយប្រទេសនូវែលហ្សេឡង់ដ៍។ នេះមានន័យ ថា គោលនយោបាយការបរទេស និង ការពារជាតិរបស់ប្រទេសទាំង២នេះ ស្ថិតក្នុងកម្រិតផ្សេងៗគ្នា ដោយមានការភ្ជាប់ទំនាក់ទំនងជាមួយនឹងរដ្ឋាភិបាលក្រុងវ៉ែលលីងតុន (Wellington ប្រទេសនូវែលហ្សេឡង់ដ៍។) ។

អស់រយៈពេលជាច្រើនទសវត្សរ៍ កន្លងមកហើយ ការចាត់ទុកប្រភពទឹកទាក់ទងគ្នានេះ ទើបធ្វើឲ្យតំបន់ប៉ាស៊ីហ្វិកខាងត្បូង កំពុងតែក្លាយជាសង្វៀនដ៏សំខាន់មួយ សម្រាប់ការប្រជែងអំណាចគ្នា រវាងសហរដ្ឋអាមេរិក និង ប្រទេសចិន ដែលបានបង្កើនឥទ្ធិពលកាន់តែខ្លាំងឡើង។ រីឯរដ្ឋាភិបាលក្រុងប៉េកាំង បានបោះជំហានចូលយ៉ាងជ្រៅ នៅក្នុងតំបន់មហាសមុទ្រជាយុទ្ធសាស្ត្រ ទាំងសេដ្ឋកិច្ច នយោបាយ និង យោធា។

មន្រ្ដីសហរដ្ឋអាមេរិក បានបញ្ជាក់ ថា ការអះអាង និង ឥទ្ធិពលរបស់ចិន រួមទាំង នៅក្នុងតំបន់ទាំងនេះ ក្លាយជាកត្តាមួយ ជំរុញឲ្យយើង ផ្តោតលើយុទ្ធសាស្ត្ររបស់យើង នៅតំបន់ប៉ាស៊ីហ្វិកខាងត្បូង។ រីឯវេទិកានេះ បានប្រមូលផ្តុំរដ្ឋ និង ដែនដី ដែលនៅរាយប៉ាយពាសពេញមហាសមុទ្រប៉ាស៊ីហ្វិក ចាប់ពីប្រទេសអូស្ត្រាលី រហូតទៅដល់រដ្ឋ ជាដែនកោះតូចៗ និង ប្រជុំកោះ ដែលមានប្រជាជនតិចតួច។ ប៉ុន្តែឥទ្ធិពលរបស់ចិន នឹងត្រូវដឹង តាមរយៈអវត្តមានរបស់នាយករដ្ឋមន្ត្រី នៃប្រទេសប្រជុំដែនកោះសូឡូម៉ុង (Solomon) ខណៈរដ្ឋាភិបាលរបស់គាត់ ឥឡូវនេះមានទំនាក់ទំនងយ៉ាងជិតស្និទ្ធ ជាមួយនឹងរដ្ឋាភិបាលក្រុងប៉េកាំង៕

ប្រទេសឡាវ ៖ សារព័ត៌មាន Vientiane Times បានចុះផ្សាយពីលទ្ធផលស្ទង់មតិរបស់ធនាគារពិភពលោក ចាប់ពីខែមិថុនា រហូតដល់ខែកក្កដា ឆ្នាំ២០២៣ បង្ហាញថា ពលរដ្ឋឡាវប្រមាណ៨៧% ដែលឆ្លើយតបការស្ទង់មតិ គឺពួកគេរងផលប៉ះពាល់រឿងការទិញម្ហូបអាហារ ដោយសារបញ្ហាអតិផរណាខ្ពស់នៅប្រទេសឡាវ ។ ហេតុនេះ ធ្វើឱ្យពលរដ្ឋឡាវនាំគ្នាទិញអាហារមានតម្លៃថោក និងកាត់បន្ថយបរិមាណការបរិភោគអាហារប្រចាំថ្ងៃ ។

ចំណែកអ្នកមានជីវភាពក្រីក្របានលក់ទ្រព្យសម្បត្តិដែលពួកគេមានដើម្បីទ្រទ្រង់ជីវិត ឬទៅខ្ចីប្រាក់គេមកដោះស្រាយជីវភាពប្រចាំថ្ងៃ ។ លើសពីនេះ ពួកគេបានកាត់បន្ថយការចំណាយផ្នែកការសិក្សារបស់កូនៗទៀតផង ។ បច្ចុប្បន្ន ពលរដ្ឋមានជីវភាពក្រីក្រប្រមាណ១៤% គ្មានលទ្ធភាពបញ្ជូនកូនទៅសិក្សាបន្តទេ ។

លោក អាឡិច គ្រេមម័រ (Alex Kramer) នាយកគ្រប់គ្រងធនាគារពិភពលោក សាខាប្រទេសឡាវលើកឡើងថា វាបានប៉ះពាល់ដល់សេដ្ឋកិច្ចប្រទេសឡាវយ៉ាងខ្លាំង ជាពិសេស ប៉ះពាល់ដល់ពលរដ្ឋ ។ បើពលរដ្ឋឡាវគ្មានលទ្ធភាពទិញម្ហូបអាហារឱ្យបានគ្រប់គ្រាន់ ឬមិនអាចបញ្ជូនកូនចៅទៅសិក្សាបន្ត វានឹងប៉ះពាល់ដល់ការអភិវឌ្ឍសេដ្ឋកិច្ចឡាវក្នុងរយៈពេលយូរ ។

បើទោះជារដ្ឋាភិបាលឡាវចេញវិធានការជាច្រើនសម្រាប់ដោះស្រាយបញ្ហាអតិផរណា ដូចជា កាត់បន្ថយការនាំចូលទំនិញច្រើន, ជំរុញការផលិតទំនិញសំខាន់ៗក្នុងប្រទេស, ជំរុញវិស័យទេសចរណ៍ និងការនាំចេញទំនិញទៅក្រៅប្រទេស ដែលបានជួយបង្កើនប្រាក់ចំណូលជាមធ្យមរបស់ពលរដ្ឋ ស្មើនឹង១១,៥% ប៉ុន្តែនៅតែមិនអាចទប់ទល់នឹងអតិផរណាក្នុងកម្រិត៣៦% បានទេ ។

ធនាគារពិភពលោកណែនាំថា រដ្ឋាភិបាលឡាវចាំបាច់ត្រូវតែអនុវត្តគោលនយោបាយពន្ធលើតម្លៃបន្ថែម១០%, លុបចោលការកាត់បន្ថយពន្ធ, កែលម្អគុណភាពការវិនិយោគសាធារណៈ និងការផ្តល់សម្បទាន, បង្កើនវិធានការត្រួតពិនិត្យធនាគារ, ចរចារៀបចំរចនាសម្ព័ន្ធបំណុល និងធ្វើឱ្យច្បាប់វិនិយោគរបស់ផ្នែកឯកជនកាន់តែងាយស្រួល ៕ ប្រភព ៖ TNN LIVE

ប្រទេសចិន ៖ ចាប់ពីឆ្កែយន្ត រហូតដល់ទូរលក់ម្ហូបអាហារស្វ័យប្រវត្តិ បានធ្វើឱ្យគ្រឿងយន្តដើរតួនាទីសំខាន់ក្នុងតំបន់ផ្សេងៗនៅលើពិភពលោក មិនលើកលែងសូម្បីតែទីក្រុងហាំងចូវ ដែលជាទីកន្លែងរៀបចំការប្រកួតកីឡា Asian Games លើកទី១៩ នៅខេត្ត Zhejiang ដែលស្ថិតនៅភាគខាងកើតប្រទេសចិន ។

លោក ឈៀន សៀវយូ នាយកគ្រប់គ្រងប្រេន DEEP Robotics និយាយថា ៖ «បើតាមទស្សនៈផ្ទាល់ខ្លួន ខ្ញុំមិននិយាយថា គ្រឿងយន្តនឹងមកធ្វើការជំនួសមនុស្សទេ ប៉ុន្តែវាគឺជាឧបករណ៍សម្រាប់ជួយមនុស្ស ។ នៅពេលសមត្ថភាពរបស់គ្រឿងយន្តអភិវឌ្ឍន៍កាន់តែច្រើន ពួកវានឹងមានចំណែករួមនៅក្នុងស្ថានការណ៍ផ្សេងៗកាន់តែច្រើន និងពុំចាំបាច់សង្ស័យ» ។

ទីក្រុងហាំងចូវមានពលរដ្ឋរស់នៅចំនួន១២លាននាក់ ហើយវាជាទីក្រុងយុទ្ធសាស្ត្រផ្នែកបច្ចេកវិទ្យាដ៏សំខាន់បំផុតរបស់ប្រទេសចិន ។ ទីក្រុងនេះបានកសាងកេរ្តិ៍ឈ្មោះជាកន្លែងចាប់ផ្តើមអភិវឌ្ឍន៍បច្ចេកវិទ្យា រួមទាំងផ្នែកឧស្សាហកម្មមនុស្សយន្ត ដែលសំដៅកាត់បន្ថយភាពចន្លោះប្រហោងរវាងគូប្រជែងក្នុងឧស្សាហកម្ម ដូចជា សហរដ្ឋអាមេរិក និងជប៉ុន ។

អ្នកទាំងអស់គ្នាបានឃើញទូរលក់ម្ហូបអាហារស្វ័យប្រវត្តិ ដែលវាដំណើរការតាមរយៈ Internet of Things (IoT) ឬឧបករណ៍អេឡិចត្រូនិកផ្សេងៗដែលអាចតភ្ជាប់ ឬបញ្ជូនទិន្នន័យឱ្យគ្នាដោយសារអ៊ីនធើរណេត ។ ទូរស្វ័យប្រវត្តិនេះអាចចម្ហិនម្ហូបអាហារផ្សេងៗលក់ឱ្យអតិថិជន និងមិនខុសគ្នាពីការចម្អិនរបស់មនុស្សទេ ។

នារីជាអតិថិជនម្នាក់និយាយថា ៖ «បើនិយាយពីភាពខុសប្លែកគ្នារវាងអាហារដែលធ្វើដោយម៉ាស៊ីននេះ ជាមួយអាហារធ្វើដោយមនុស្ស និយាយតាមត្រង់ ខ្ញុំមិនឃើញវាខុសប្លែកគ្នាប៉ុន្មានទេ ។ ម្ហូបដែលធ្វើដោយទូរស្វ័យប្រវត្តិមើលទៅគួរឱ្យចង់ញ៉ាំ ហើយវាថែមទាំងមានជំនាញធ្វើម្ហូបល្អជាងមនុស្សទៀតផង ខណៈមនុស្សភាគច្រើនមិនចេះធ្វើម្ហូបដោយខ្លួនឯងទេ» ។

ក្រៅពីនេះ ទីក្រុងហាំងចូវ គឺជាទីតាំងការិយាល័យកណ្តាលរបស់ក្រុមហ៊ុន Alibaba ដែលប្រកបអាជីវកម្មផ្នែក E-Commerce ដ៏ធំបំផុតនៅប្រទេសចិន ។ ចំណែកក្រុមហ៊ុន Taobao ដែលមានកម្មវិធីទិញទំនិញតាមអនឡាញពេញនិយមរបស់ពលរដ្ឋចិន ក៏មានទីតាំងស្ថិតនៅទីក្រុងនេះដែរ ៕ ប្រភព ៖ TNN World