ប្រទេសថៃ ៖ ក្រោយពីលោក សេដ្ឋា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុប្រទេសថៃ បានប្រកាសប្រគល់ប្រាក់ខែ និងប្រាក់ឧបត្ថម្ភក្នុងការប្រជុំ ដែលលោកទទួលបានពីការកាន់តំណែងជារៀងរាល់ខែទៅឱ្យមូលនិធិផ្សេងៗ ដើម្បីជួយសង្គ្រោះក្រុមពលរដ្ឋងាយរងគ្រោះ កាលពីថ្ងៃទី១ ខែតុលា ឆ្នាំ២០២៣ ទំព័រហ្វេសប៊ុកមូលនិធិកុមារ (FOUNDATION FOR CHILDREN) បានសរសេរថា ៖ «ប្អូនៗកុមារ និងបុគ្គលិករបស់មូលនិធិទាំងអស់ សូមថ្លែងអំណរគុណដល់នាយករដ្ឋមន្ត្រីថៃ លោក សេដ្ឋា ថាវីស៊ីន ព្រមទាំងមន្ត្រីពាក់ព័ន្ធ ដែលបានផ្តល់ប្រាក់បរិច្ចាគចំនួន៤ម៉ឺន៥ពាន់បាត ដើម្បីប្រើប្រាស់ជាប្រយោជន៍សម្រាប់កុមារនៅក្នុងមូលនិធិ ចំនួន៩០នាក់» ។ទំព័រហ្វេសប៊ុកមូលនិធិកុមារបន្តថា ៖ «ការផ្តល់ប្រាក់បរិច្ចាគពីលោក សេដ្ឋា ថាវីស៊ីន នាយករដ្ឋមន្ត្រីថៃ សម្រាប់ជួយកុមារនៅក្នុងមូលនិធិ គឺបានផ្តល់ស្នាមញញឹម និងសេចក្តីសុខដល់កុមារទាំងអស់ ព្រមទាំងបុគ្គលិកមូលនិធិយ៉ាងខ្លាំង ។ យើងខ្ញុំសូមថ្លែងអំណរគុណចំពោះគម្រោងល្អៗរបស់លោកនាយករដ្ឋមន្ត្រី ដែលបានជួយគាំទ្រដល់មូលនិធិកុមារលើកនេះ ។ លោកនាយករដ្ឋមន្ត្រីតែងតែស្តាប់មតិយោបល់ និងបញ្ហាដែលយើងជួបការលំបាក ហើយស្វែងរកដំណោះស្រាយឱ្យយើងផងដែរ» ។

ទំព័រហ្វេសប៊ុកមូលនិធិកុមារបញ្ជាក់ថា ៖ «ម្ហូបអាហារពេលល្ងាចសម្រាប់ជីវិតថ្មី ដែលទទួលបានពីមេដឹកនាំប្រទេសចិត្តល្អ លោក សេដ្ឋា ថាវីស៊ីន គឺម្ហូបញំមីសួ, សាច់មាន់ចៀន និងសម្លកែងស៊ុ ដាក់បន្លែនិងបង្គា» ។ លើសពីនេះ ទំព័រហ្វេសប៊ុកមូលនិធិកុមារ ក៏បានបង្ហោះរូបភាពក្រុមកុមារកំពុងអង្គុយញ៉ាំអាហារ និងផ្លែឈើផងដែរ ប្រកបដោយទឹកមុខញញឹម ៕ ប្រភព ៖ The better

រដ្ឋធានីហាណូយ៖ ក្រុមហ៊ុនអភិវឌ្ឍន៍អចលនទ្រព្យដ៏ធំបំផុតមួយ នៅវៀតណាម កំពុងតែប្រឈមមុខនឹងការចោទប្រកាន់ អំពីការបោកបញ្ឆោតលុយ រាប់រយលានដុល្លារអាមេរិក ពីប្រជាជន ជាង៦០០០នាក់ ហើយថៅកែរបស់ក្រុមហ៊ុននេះ និង អ្នកពាក់ព័ន្ធ ត្រូវបានចាប់ខ្លួន និង ប្រឈមមុខនឹងទោសទណ្ឌផងដែរ។

សារព័ត៌មាន VNExpress បានចេញផ្សាយ កាលពីថ្ងៃសៅរ៍ ទី៣០ ខែកញ្ញា ថា ប្រធានក្រុមហ៊ុនអភិវឌ្ឍន៍អចលនទ្រព្យតាន់ហងមីញ (Tan Hoang Minh) លោក ដូ អាញឌុង (Do Anh Dung) បានរងការចោទប្រកាន់ ពីការចេញកញ្ចប់មូលបត្របំណុល ចំនួន៩តាមរយៈក្រុមហ៊ុនបុត្រសម្ព័ន្ធ ដើម្បីលួចប្រាក់ជាង ៨,៦ពាន់ពាន់លានដុង ឬស្មើនឹងប្រហែល៣៥៣,៨៤លានដុល្លារអាមេរិក ពីក្រុមអ្នកវិនិយោគ ចំនួន ៦ ៦០០នាក់។

លោក Do Anh Dung រួមជាមួយនឹងកូនប្រុសរបស់គាត់ ដូ ហង វៀត (Do Hoang Viet) និង អនុប្រធានក្រុមហ៊ុន Tan Hoang Minh ហើយមនុស្សសំខាន់ៗ ចំនួន១៣នាក់ផ្សេងទៀត ត្រូវបាននាយកដ្ឋានប៉ូលិសស៊ើបអង្កេត នៃក្រសួងសន្តិសុខសាធារណៈ ចោទប្រកាន់ ពីបទទទួលទ្រព្យសម្បត្តិ ដោយការក្លែងបន្លំ កាលពីថ្ងៃសុក្រ (ទី២៩ ខែកញ្ញា)។

ក្រុមហ៊ុន Tan Hoang Minh Group មានដើមទុន ចំនួន១០ពាន់ពាន់លានដុង ឬ ស្មើនឹងប្រហែល ៤២១,៥៨លានដុល្លារអាមេរិក។ ក្រុមហ៊ុននេះ ត្រូវបានបង្កើតឡើង នៅក្នុងឆ្នាំ១៩៩៣ ដោយលោក ដូ អាញឌុង (Do Anh Dung)។ ប៉ុន្ដែដើម្បីដំណើរការជាសាជីវកម្មនោះ ក្រុមហ៊ុនរបស់លោក ឌុង ក៏បានបង្កើត ឬ ទិញភាគហ៊ុនរបស់ក្រុមហ៊ុន ចំនួន៤៥ ក្រោយការទទួលបានមនុស្ស ធ្វើជាតំណាង ស្របច្បាប់របស់ពួកគេ។

ក្រុមហ៊ុន Tan Hoang Minh Group បានធ្លាក់ចូលទៅក្នុងវិបត្ដិហិរញ្ញវត្ថុ នៅក្នុងឆ្នាំ២០២១ ហើយនៅខែមករា ឆ្នាំ២០២២ ក្រុមហ៊ុនបានជំពាក់លុយធនាគារ ប្រហែល២០ពាន់ពាន់លានដុង ឬប្រហែលជាង ៨៤៣,១៦លានដុល្លារអាមេរិក ដោយមិនរាប់បញ្ចូលទាំងកញ្ចប់មូលបត្របំណុល ចំនួន៨ ដែលក្រុមហ៊ុនបានចេញ តាំងពីឆ្នាំ២០២១ រហូតមក។

ប៉ូលិសវៀតណាម បានអះអាង ថា លោក ដូ អាញឌុ ត្រូវបានចាប់ខ្លួន កាលពីខែមេសា ឆ្នាំ២០២២។ ចំណែកលុយទាំងអស់ ដែលគាត់បានបោកប្រាស់ពីក្រុមអ្នកវិនិយោគ បានបញ្ជូនចេញអស់ នៅក្នុងអំឡុងពេលដំណើរការស៊ើបអង្កេត៕

ប្រទេសចិន ៖ ពលរដ្ឋចិនបានធ្វើដំណើរកម្សាន្តនៅតាមតំបន់ទេសចរណ៍ពេញនិយមនៅប្រទេសចិនយ៉ាងច្រើនកុះករ ក្នុងថ្ងៃឈប់សម្រាករយៈពេល៨ថ្ងៃ (Golden Week) ដែលគិតចាប់ពីថ្ងៃទី២៩ ខែកញ្ញា តទៅ និងក្នុងពិធីអបអរសាទរទិវាបុណ្យជាតិ លើកទី៧៤ឆ្នាំ ដែលត្រូវនឹងថ្ងៃទី១ ខែតុលា ឆ្នាំ២០២៣ ។

ក្នុងអំឡុងថ្ងៃឈប់សម្រាករយៈពេលយូរថ្ងៃ និងទិវាបុណ្យជាតិរបស់ចិន គេសង្កេតឃើញថា ពលរដ្ឋចិនរាប់លាននាក់បានធ្វើដំណើរកម្សាន្តនៅក្នុងប្រទេសរបស់ខ្លួន ដូចជា មហាកំផែងចិននៅទីក្រុងប៉េកាំង និងតំបន់ទេសចរណ៍ផ្សេងៗនៅទីក្រុង Hangzhou ខេត្ត Zhejiang ។

ទីក្រុងប៉េកាំង គឺជាគោលដៅទេសចរណ៍របស់ពលរដ្ឋចិន ក្នុងថ្ងៃឈប់សម្រាក Golden Week បន្ទាប់មក គឺទីក្រុង Shanghai និងទីក្រុង Hangzhou ។ កាលពីថ្ងៃទី១ ខែតុលា ឆ្នាំ២០២៣ សារព័ត៌មានក្នុងប្រទេសចិនរាយការណ៍ថា តំបន់ទេសចរណ៍ល្បីឈ្មោះនៅទីក្រុងប៉េកាំង រួមទាំងវិមានរដូវក្តៅ, ឧទ្យានអូឡាំពិក និងសួនសាធារណៈផ្សេងៗ មានពលរដ្ឋចិនធ្វើដំណើរមកកម្សាន្តជាង១លាននាក់ ។

ក្រសួងគមនាគមន៍ចិនប៉ាន់ស្មានថា ក្នុងអំឡុងពេលថ្ងៃឈប់សម្រាក Golden Week នឹងមានការធ្វើដំណើរកម្សាន្តចំនួន២.០៥០ជើង រួមទាំងការធ្វើដំណើរតាមរថភ្លើង, ផ្លូវល្បឿនលឿន, ផ្លូវទឹក និងការធ្វើដំណើរតាមយន្តហោះផងដែរ ៕ប្រភព ៖ TNN World

ប្រទេសវៀតណាម ៖ បើតាមការិយាល័យស្ថិតិជាតិវៀតណាមបញ្ជាក់ថា ក្នុងរយៈពេល៩ខែដំបូងនៃឆ្នាំ២០២៣ ប្រទេសវៀតណាមទទួលបានភ្ញៀវទេសចរបរទេសចំនួន៨លាន៩សែននាក់ ហើយចំនួននេះបានកើនឡើងលើសគោលដៅដែលវៀតណាមកំណត់ទៅទៀត គឺវៀតណាមកំណត់គោលដៅស្មើត្រឹមតែ៨លាននាក់ប៉ុណ្ណោះ ។

ចំនួនភ្ញៀវទេសចរក្នុងរយៈពេល៩ខែនៃឆ្នាំ២០២៣ បានកើនឡើងជាង៤ដង បើធៀបនឹងឆ្នាំ២០២២ ។ ចំណែកនៅខែកញ្ញា ឆ្នាំ២០២៣ ចំនួនភ្ញៀវទេសចរបរទេសដែលធ្វើដំណើរមកកាន់វៀតណាម ស្មើជាង១លាននាក់ ហើយខែកញ្ញា គឺជាខែទី៣ ជាប់ៗគ្នា ដែលភ្ញៀវទេសចរបរទេសធ្វើដំណើរមកវៀតណាម លើសពីចំនួន១លាននាក់ ។

ភ្ញៀវទេសចរកូរ៉េខាងត្បូងបានធ្វើដំណើរមកកាន់វៀតណាមច្រើនបំផុត គឺស្មើជាង២លាន៥សែននាក់ក្នុងរយៈពេល៩ខែដំបូងនៃឆ្នាំ២០២៣ ។ បន្ទាប់មក គឺភ្ញៀវទេសចរចិន ស្មើ១លាន១សែននាក់ ។ ចំណែកភ្ញៀវទេសចរតៃវ៉ាន់ស្ថិតក្នុងលំដាប់ទី៣ ស្មើនឹង៥៧ម៉ឺន៥ពាន់នាក់ ខណៈភ្ញៀវទេសចរអាមេរិកស្ថិតក្នុងលំដាប់ទី៤ ស្មើនឹង៥៤ម៉ឺន៨ពាន់នាក់ ។ រីឯភ្ញៀវទេសចរជប៉ុនស្ថិតក្នុងលំដាប់ទី៥ ស្មើនឹង៤១ម៉ឺន៤ពាន់នាក់ ។

ក្រុមប្រឹក្សាទេសចរណ៍វៀតណាមបញ្ជាក់ថា ឧស្សាហកម្មទេសចរណ៍របស់វៀតណាមទទួលបានការគាំទ្រយ៉ាងល្អពីរដ្ឋាភិបាល ខណៈរដ្ឋាភិបាលបានបន្ធូរបន្ថយគោលនយោបាយទិដ្ឋាការសម្រាប់ភ្ញៀវទេសចរបរទេស ។ គេសង្ឃឹមថា នៅចុងឆ្នាំ២០២៣ វៀតណាមនឹងអាចទទួលភ្ញៀវទេសចរពីក្រៅប្រទេស បានប្រមាណពី១២លាននាក់ ទៅ១៣លាននាក់ ឬច្រើនជាងនេះ ។

រដូវកាលដែលវៀតណាមទទួលបានភ្ញៀវទេសចរច្រើនបំផុត គឺចាប់ពីខែកញ្ញា ដល់ខែមេសា ព្រោះក្នុងអំឡុងពេលនេះ នឹងមានភ្ញៀវទេសចរមកពីប្រទេសលោកខាងលិចនាំគ្នាមកវៀតណាម ដើម្បីសម្រាកលំហែរកាយក្នុងអំឡុងពេលសម្រាករដូវរងា ។

ចាប់តាំងពីថ្ងៃទី១៥ ខែសីហា ឆ្នាំ២០២៣ រហូតមក វៀតណាមបានអនុម័តការចុះឈ្មោះតាមប្រព័ន្ធអេឡិចត្រូនិក E-Visa សម្រាប់ភ្ញៀវទេសចរមកពីគ្រប់ប្រភេទ និងគ្រប់តំបន់ ។ ក្រៅពីនេះ រដ្ឋាភិបាលវៀតណាមបានបន្ថែមរយៈពេលស្នាក់នៅវៀតណាម ចាប់ពី១៥ថ្ងៃ មកស្មើនឹង៤៥ថ្ងៃសម្រាប់ពលរដ្ឋមកពីប្រទេសចំនួន១៣ ដែលទទួលបានការលើកលែងទិដ្ឋាការពីប្រទេសវៀតណាមតែម្ខាង ។

កាលពីឆ្នាំ២០១៩ ប្រទេសវៀតណាមបានទទួលភ្ញៀវទេសចរបរទេសសរុបចំនួន១៨លាននាក់ ហើយវៀតណាមទទួលបានប្រាក់ចំណូលពីវិស័យទេសចរណ៍ជាង៣ម៉ឺនលានដុល្លារអាមេរិក ៕ ប្រភព ៖ mgronline

ប្រទេសថៃ ៖ អាជីវករលក់បន្លែ និងទំនិញផ្សេងៗនៅតាមផ្សារក្នុងខេត្ត Uthai Thani ប្រទេសថៃ បានត្អូញត្អែរថា ស្ថានភាពសេដ្ឋកិច្ចថៃមិនសូវល្អទេ ទើបធ្វើឱ្យពួកគេលក់ទំនិញមិនដាច់ ហើយស្ទើរតែគ្មានអតិថិជនមកដើរផ្សារសោះ ។ ពួកគេបានសំណូមពរឱ្យរដ្ឋាភិបាលជួយពន្លឿនការដោះស្រាយបញ្ហានេះឱ្យបានឆាប់រហ័ស ។ នេះបើតាមការចុះផ្សាយរបស់សារព័ត៌មានថៃឈ្មោះ 3Plus News នៅថ្ងៃទី២ ខែតុលា ឆ្នាំ២០២៣ ។

ក្រុមសារព័ត៌មានថៃបានដើរពិនិត្យមើលក្នុងផ្សារមួយកន្លែងនៅខេត្ត Uthai Thani ឃើញថា មានអាជីវករដាក់លក់អាហារស្រស់ៗជាច្រើនមុខ ដូចជា សាច់ជ្រូក, សាច់មាន់ និងបន្លែបង្ការផ្សេងៗ ប៉ុន្តែអាជីវករទាំងនេះត្អូញត្អែរថា ពួកគេលក់របស់របរមិនសូវដាច់ទេ ខណៈអាជីវករខ្លះទៀតបានបង្ហោះក្នុងបណ្តាញសង្គមអំពីភាពស្ងប់ស្ងាត់នៅក្នុងផ្សារ ។ សារព័ត៌មានថៃបានសួរទៅអាជីវករ ហើយពួកគេម្នាក់ៗត្អូញត្អែរដូចៗគ្នាថា ចាប់តាំងពីទំនិញឡើងថ្លៃជាបន្តបន្ទាប់មក បានធ្វើឱ្យអតិថិជនមកទិញទំនិញ អាហារស្រស់ និងបន្លែទៅធ្វើម្ហូប កាន់តែតិចជារៀងរាល់ថ្ងៃ ។

អាជីវករបន្តថា អតិថិជនបាននាំគ្នាទិញម្ហូបអាហារច្រកថង់ស្រាប់ជំនួសវិញ ដោយសារម្ហូបច្រកថង់មានតម្លៃថោកជាងម្ហូបដែលពួកគេទិញមកធ្វើខ្លួនឯង ដែលតម្រូវឱ្យមានគ្រឿងទេស, សាច់សត្វ និងបន្លែស្រស់ ។ ដូច្នេះ អាជីវករបានលក់របស់របរយកប្រាក់ចំណេញតាមការចំណាយដើមទុនប៉ុណ្ណោះ មិនហ៊ានឡើងថ្លៃទេ ព្រោះបើឡើងថ្លៃខ្ពស់ខ្លាំងពេក ក៏គ្មានអ្នកទិញដែរ ហើយបរិយាកាសស្ងប់ស្ងាត់នៅតាមផ្សារបានកើតឡើងយូរមកហើយ ។

ចុងក្រោយ អាជីវករលក់ទំនិញនៅតាមផ្សារបានសំណូមពរឱ្យរដ្ឋាភិបាលជួយដោះស្រាយបញ្ហាទំនិញឡើងថ្លៃឱ្យចុះថោកជាងនេះ ដោយពួកគេនិយាយថា កត្តាដែលធ្វើឱ្យទំនិញឡើងថ្លៃ ដោយសារបញ្ហាចម្បង គឺតម្លៃប្រេងឥន្ធនៈ ។ បើទោះជាពេលកន្លងមក ប្រទេសថៃបានប្រកាសបញ្ចុះតម្លៃប្រេងឥន្ធនៈក្តី ប៉ុន្តែតម្លៃនេះនៅតែថ្លៃដដែល ។

តម្លៃប្រេងឥន្ធនៈ គឺជាដើមទុនសម្រាប់ថ្លៃដឹកជញ្ជូន ហើយអាជីវករចង់ឱ្យរដ្ឋាភិបាលគ្រប់គ្រងតម្លៃទំនិញឡើងថ្លៃផងដែរ ព្រោះអ្នកទិញរអ៊ូដាក់អាជីវករថា ពួកគេបានទិញរបស់របរទៅដាក់ក្នុងទូរទឹកកកទុកធ្វើម្ហូបឱ្យតិចជាងមុន ដោយសារពួកគេត្រូវចំណាយប្រាក់លើផ្នែកផ្សេងទៀត ។ ដូច្នេះ បើរដ្ឋាភិបាលមិនយកចិត្តទុកដាក់ និងដោះស្រាយបញ្ហាទាំងនេះទេ ស្ថានភាពនឹងកាន់តែអាក្រក់លើសមុនថែមទៀត ៕ ប្រភព ៖ 3Plus News