រដ្ឋធានីហាណូយ៖ ក្រុមអ្នកពាក់ព័ន្ធ នៅក្នុងវិស័យឧស្សាហកម្ម បានច្រានចោលនូវការព្រួយបារម្ភ ថា វៀតណាម អាចនឹងដើរតាមលំនាំឥណ្ឌា ហាមឃាត់ការនាំចេញអង្ករ ខណៈឥឡូវ ប្រទេសអាស៊ានមួយនេះ កំពុងតែខិតខំប្រឹងប្រែង បង្កើនការដាំដុះស្រូវ។

ប្រទេសវៀតណាម កំពុងតែសម្លឹងមើល អំពីតម្រូវការកើនឡើងខ្ពស់ ហើយតម្លៃអង្កររបស់ខ្លួនក៏ឡើងខ្ពស់ ក្រោយពេលឥណ្ឌា ជាប្រទេសផ្គត់ផ្គង់អង្ករដ៏ធំជាងគេ នៅលើពិភពលោក បានប្រកាសពីការទប់ស្កាត់នូវការនាំចេញអង្ករ កាលពីខែមុន

ក្រុមអ្នកដើរតួនាទីយ៉ាងសំខាន់ នៅក្នុងវិស័យឧស្សាហកម្ម បានអះអាង ថា តម្លៃអង្ករនៅលើពិភពលោក កំពុងតែឡើងថ្លៃ ហើយវាជាឱកាសដ៏ល្អបំផុត សម្រាប់វៀតណាម នៅក្នុងការជំរុញផលិតកម្ម និង ការនាំចេញ។ ប៉ុន្តែការព្រួយបារម្ភក៏បានកើតឡើងផងដែរ ចំពោះបញ្ហាអាកាសធាតុមិនអំណោយផលឲ្យ ដោយសារតែការប្រែប្រួលអាកាសធាតុ នាំឲ្យប៉ះពាល់ដល់ដំណាំ នាពេលអនាគត។

ឥណ្ឌា បានដាក់បម្រាមនូវការនាំចេញអង្ករ កាលពីខែកក្កដា ដើម្បីរក្សាតម្លៃអង្ករសំរូប នៅក្នុងស្រុក ដោយសារអតិផរណា និង ការភ័យខ្លាច អំពីការខ្វះខាតអង្ករ នៅក្នុងប្រទេស។ ការទប់ស្កាត់នូវការនាំចេញអង្ករ បានធ្វើតាមការដាក់កំហិត លើការនាំចេញអង្ករខូច កាលពីខែកញ្ញាឆ្នាំ២០២២។

វិធានការរបស់ឥណ្ឌា បានធ្វើឱ្យតម្លៃអង្ករ នៅលើពិភពលោក កើនឡើងខ្ពស់ ខណៈអ្នកទិញបានងាកទៅរកប្រភពផ្សេងៗទៀត ចំពេលមានការព្រួយបារម្ភ ថា ការផ្គត់ផ្គង់មានកម្រិត នឹងជំរុញឱ្យមានអតិផរណាលើស្បៀងអាហាររបស់ពិភពលោក ហើយបណ្តាលឱ្យមានការទប់ស្កាត់ស្រដៀងគ្នា ពីបណ្ដាប្រទេសជាអ្នកផ្គត់ផ្គង់ផ្សេងៗទៀត។

បុរស វ័យ៣៩ឆ្នាំម្នាក់ បានប្រាប់ដល់សារព័ត៌មាន CNA ខណៈចុះពិនិត្យវាលស្រែរបស់គាត់នៅជាយទីក្រុងកាន់ធើ (Can Tho) ដែលជាទីក្រុងមួយ នៅតាមតំបន់ដីសណ្ដទន្លេមេគង្គ នាភាគខាងត្បូង ប្រទេសវៀតណាម ថា «តម្លៃស្រូវ កាលពីប៉ុន្មានឆ្នាំកន្លងមកនេះ មានតម្លៃប្រហែល ០,២២ដុល្លារ ទៅ ០,២៣ ដុល្លារ នៅក្នុងមួយគីឡូក្រាម។ ដូច្នេះនៅពេលឈ្មួញមក ហើយផ្តល់ជូនដល់ខ្ញុំ ២៨សេន នៅក្នុងមួយគីឡូក្រាម គឺខ្ញុំសប្បាយចិត្តណាស់។ តម្លៃស្រូអាចនឹងកើនដល់០,៣៤ដុល្លារ ក្នុង១គីឡូក្រាម»។

លោក ហ្វាម ហ៊្វុក ហ៊ូ (Pham Phuoc Huu) ប្រធានផ្នែកផលិតកម្ម នៃក្រុមហ៊ុននាំចេញអង្ករ Hoang Minh Nhat Food (ហ៊ួងមីញញ៉ាតហ៊្វូដ) បានបញ្ជាក់ ថា «ចាប់តាំងពីឥណ្ឌា បានហាមឃាត់នូវការនាំចេញអង្ករមក តម្លៃអង្ករ នៅទីនេះបានឡើងខ្ពស់បំផុត។ តម្លៃនឹងកើនឡើង ជារៀងរាល់ពីរបីម៉ោងម្តង មិនមែនត្រឹមតែមួយថ្ងៃនោះឡើយ»។

បណ្ដាក្រុមហ៊ុននាំចេញអង្ករជាច្រើនរបស់វៀតណាម មានការស្ទាក់ស្ទើរ នៅក្នុងការចុះកិច្ចសន្យាថ្មី ជាមួយក្រុមហ៊ុនទិញអន្តរជាតិ ដោយសារតែតម្លៃអង្ករមានការប្រែប្រួលយ៉ាងខ្លាំង។ ដូច្នេះក្រុមហ៊ុនទាំងអស់របស់វៀតណាម ពិបាកនឹងបំពេញកិច្ចសន្យាដែលមានស្រាប់ ជាមួយក្រុមហ៊ុននានា ជាអ្នកទិញ៕

ព្រះច័ន្ទដ៏អស្ចារ្យបំផុតប្រចាំឆ្នាំនឹងបំភ្លឺភពផែនដីជាថ្មីម្តងទៀតនៅថ្ងៃទី ៣០ ខែសីហា ឆ្នាំ២០២៣នេះ ដែលស្ថិតនៅចំណុចជិតបំផុតនៃផ្ទៃផែនដី។
យោងតាមប្រភពព័ត៌មាន Live Science បានឱ្យដឹងថា ព្រះច័ន្ទដ៏ធំបំផុត និងភ្លឺបំផុតត្រូវបានគេដាក់រហស្សនាមថា “ព្រះច័ន្ទពណ៌ខៀវ” ។ ព្រះច័ន្ទពណ៌ខៀវមានពីរប្រភេទដែលវាកើតឡើងក្នុងខែតែមួយ ដូច្នេះព្រះច័ន្ទប្រភេទទីមួយហៅថា Sturgeon ដែលកើតឡើងនៅថ្ងៃទី ១ ខែសីហា និង ព្រះច័ន្ទប្រភេទទីពីរហៅថា Blue moon កើតឡើងនៅចុងខែនេះ នាថ្ងៃទី៣០ ខែសីហា ឆ្នាំ២០២៣។

ព្រះច័ន្ទពណ៌ខៀវជាទូទៅលេចឡើង ២-៣ ឆ្នាំម្តង ដែលវានឹងកើតឡើងបន្តទៀតនៅថ្ងៃទី២៦ ខែសីហា ឆ្នាំ២០២៦។ Blue moon កើតឡើងនៅពេលដែលព្រះច័ន្ទពេញលេញនៅជិតផែនដីបំផុតក្នុងគន្លង។ គន្លងរបស់ព្រះច័ន្ទនៅជុំវិញផែនដីគឺរាងអេលីប ដូច្នេះរៀងរាល់ខែ វាឆ្លងកាត់ចំណុចដែលនៅជិតផែនដីបំផុត និងចំណុចឆ្ងាយបំផុតពីផែនដី នេះបើយោងតាម Fred Espenak ដែលជាតារាវិទូប្រចាំអង្គការណាសា។

ព្រះច័ន្ទពេញវង់ទីពីរនៅក្នុងខែសីហានេះគឺស្ថិតនៅចម្ងាយ ៣៥៧,៣៤៤ គីឡូម៉ែត្រពីផែនដី វាគឺជាព្រះច័ន្ទដ៏ធំបំផុតនិងភ្លឺបំផុតប្រចាំឆ្នាំ ហើយចំពោះព្រះច័ន្ទបន្ទាប់ទៀតហៅថា Super moon ដែលវានឹងរះនៅថ្ងៃទី២៩ ខែកញ្ញា និងជាព្រះច័ន្ទចុងក្រោយនៃឆ្នាំ ២០២៣ ផងដែរ៕ប្រភព៖vnexpress

ប្រទេសស្កុតឡែន ៖ លោក ក្រូហ្វតនែវិន បានប្រែក្លាយផ្ទៃដីប្រមាណជិត៣៣រ៉ៃ ដែលមានទីតាំងស្ថិតនៅចំណុចកណ្តាលនៃប្រទេសស្កុតឡែន ឱ្យក្លាយជាចម្ការផ្កាឈូករ័ត្នពណ៌លឿងរីកយ៉ាងស្រស់បំព្រង ប៉ុន្តែគ្មានអ្នកណាជឿថា នៅទីនេះមានចម្ការផ្កាឈូករ័ត្នដ៏ធំបែបនេះទេ ។ បច្ចុប្បន្ន លោក ក្រូហ្វតនែវិន ធ្វើការងារផ្នែកអាជីវកម្មបសុសត្វ ដែលបន្តតំណែងពីឪពុក-ម្តាយរបស់លោក ។

លោក ក្រូហ្វតនែវិន ក៏មិននឹកស្មានថា ផ្កាឈូករ័ត្នដែលលោកបានដាំលេងៗនៅជុំវិញកសិដ្ឋានកាលពី៣ឆ្នាំមុននោះក្លាយជាទីកន្លែងទេសចរណ៍មួយដ៏ល្បីល្បាញ ដែលបានទាក់ទាញភ្ញៀវទេសចរជាតិ និងអន្តរជាតិជាច្រើននាក់មកកម្សាន្តទេ ។ អាកាសធាតុត្រជាក់នៅប្រទេសស្កុតឡែន ស្ទើរតែមិនអំណោយផលដល់ការដាំដុះផ្កាឈូករ័ត្នទេ ។ ការដាំលើកដំបូងឃើញថា ផ្កាឈូករ័ត្នបានដុះលូតលាស់ និងរីកស្គុះស្គាយពេញដើម ដូច្នេះ លោក ក្រូហ្វតនែវិន ក៏បានពង្រីកផ្ទៃដីដាំបន្ថែមទៀតជាបន្តបន្ទាប់ រហូតដល់មានផ្ទៃដីជិតស្មើ៣៣រ៉ៃ និងមានផ្កាឈូករ័ត្នជាង២សែន៥ម៉ឺនដើម ។

ក្រៅពីនេះ លោក ក្រូហ្វតនែវិន ក៏បានបង្កើតទីកន្លែងដាំដុះឱ្យមានរូបរាងខុសៗគ្នាផងដែរ ។ ជាក់ស្តែង កាលពីឆ្នាំ២០២២ លោកបានដាំផ្កាឈូករ័ត្នមានរាងជាផែនទីប្រទេសស្កុតឡែនដ៏ធំមួយ ហើយនៅឆ្នាំ២០២៣ លោកបានដាំផ្កាឈូករ័ត្នឱ្យមានរូបរាងជាផ្លូវដើរខ្វាត់ខ្វែង ។ បើគេក្រឡេកមើលរូបភាពថតពីលើអាកាស វាបានក្លាយជាចម្ការផ្កាឈូករ័ត្នពណ៌លឿងដ៏ស្រស់ស្អាត និងទាក់ទាញភ្នែកយ៉ាងខ្លាំង ។

នៅពេលដើមផ្កាឈូករ័ត្នធំ គឺវានឹងមានកម្ពស់ប្រមាណ២ម៉ែត្រ ហើយលោក ក្រូហ្វតនែវិន តែងថតចម្ការផ្កាឈូករ័ត្នបង្ហោះក្នុងយូធូបជានិច្ច ដើម្បីទាក់ទាញអ្នកទស្សនាមកកម្សាន្តនៅចម្ការរបស់លោក ដែលលោកបានដាក់ឈ្មោះថា «GLOAGBURN» ។ លោកនិយាយថា មានភ្ញៀវទេសចរជាតិ និងអន្តរជាតិមកកម្សាន្តនៅចម្ការរបស់លោកជាហូរហែ មុនពេលវាជ្រុះស្វិតក្នុងរយៈពេល៤សប្តាហ៍ ។

អ្នកមកលេងនៅចម្ការផ្កាឈូករ័ត្ន ពួកគេចូលចិត្តដើរនៅតាមផ្លូវខ្វាត់ខ្វែងនេះ ព្រមទាំងថតរូបជាមួយផ្កាឈូករ័ត្នផងដែរ ហើយបើពួកគេចង់ដើរពេញចម្ការទាំងអស់ គឺត្រូវចំណាយពេលចាប់ពីកន្លះម៉ោង ទៅ១ម៉ោង ។ រីឯកុមារវិញសប្បាយរីករាយនឹងការរត់នៅតាមផ្លូវតូចៗក្នុងចម្ការនេះ ដែលម្ចាស់ចម្ការបានរៀបចំឡើងយ៉ាងពិសេសសម្រាប់កុមារ ។ សម្រាប់តម្លៃចូលទស្សនាចម្ការផ្កាឈូករ័ត្ន «GLOAGBURN» របស់លោក ក្រូហ្វតនែវិន គឺមនុស្សចាស់ត្រូវចំណាយប្រាក់ចំនួប៥ផោនក្នុងម្នាក់ រីឯកុមារមានអាយុក្រោម១២ឆ្នាំ អាចចូលកម្សាន្តដោយមិនគិតថ្លៃ ៕ ប្រភព ៖ World Pulse