រដ្ឋធានីកៀវ៖ បណ្ដាប្រទេសលោកខាងលិច និង សម្ពន្ធមិត្ត បានខ្នះខ្នែងយ៉ាងខ្លាំង ជួយផ្ដត់ផ្គង់គ្រឿងសព្វាវុធទំនើបៗ ដល់រដ្ឋាភិបាលក្រុងកៀវ ដើម្បីធ្វើសង្គ្រាម ទប់ទល់នឹងការឈ្លានពានរបស់រុស្ស៊ី ហើយយន្ដហោះចម្បាំងដ៏ទំនើបជំនាន់ទី៤ ផលិតដោយសហរដ្ឋអាមេរិក ប្រភេទ F-16 ក៏នឹងត្រូវដាក់ពង្រាយ នៅក្នុងប្រទេសអ៊ុយក្រែន នាពេលខាងមុខ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃចន្ទ ទី៤ ខែកញ្ញា ថា លោក អូឡេកស៊ី រេស្នីកូវ (Oleksii Reznikov) រដ្ឋមន្រ្ដីក្រសួងការពារជាតិអ៊ុយក្រែន បានបញ្ជាក់ នៅក្នុងបទសម្ភាសន៍មួយ ថា គាត់សង្ឃឹម ថា យន្ដហោះចម្បាំង ផលិតដោយសហរដ្ឋអាមេរិក ប្រភេទ F-16 ត្រូវផ្គត់ផ្គង់ដោយសម្ពន្ធមិត្តរបស់អ៊ុយក្រែន នឹងត្រូវដាក់ពង្រាយ ប្រឆាំងនឹងរុស្ស៊ី នៅខែនិទាឃរដូវក្រោយ។

លោករដ្ឋមន្ត្រីការពារជាតិអ៊ុយក្រែន បានបញ្ជាក់ ថា អ្នកបើកយន្តហោះ ត្រូវតែត្រូវហ្វឹកហាត់នៅលើយន្តហោះប្រភេទនេះ ហើយហេដ្ឋារចនាសម្ព័ន្ធ អ្នកជំនាញ និង កន្លែងជួសជុល ត្រូវតែមាន នៅមុនពេលយន្ដហោះទាំងនេះ នឹងត្រូវដាក់ពង្រាយទៅកាន់សមរភូមិជួរមុខ។ រីឯប្រទេសហូល្លង់ដ៍ ដាណាម៉ាក និង ន័រវេស សុទ្ធតែបានសន្យាផ្ដល់យន្តហោះ F-16 មកដល់ប្រទេសអ៊ុយក្រែន។

លោកប្រមុខរដ្ឋមន្រ្ដីក្រសួងការពារជាតិ បានបន្ថែម ថា គាត់ត្រូវតែសរសេរលិខិតជាច្រើនជាមួយនឹងការធានា ថា គ្រឿងសព្វាវុធទាំងអស់របស់អង្គការណាតូ នឹងត្រូវប្រើប្រាស់ ម្រាប់តែគោលបំណងការពារតែប៉ុណ្ណោះ ហើយក៏មិនមែនប្រើប្រាស់ វាយប្រហារ នៅលើទឹកដីរបស់រុស្ស៊ី នោះដែរ៕

ប្រទេសឥណ្ឌូណេស៊ី ៖ ឥណ្ឌូណេស៊ីបានព្យាយាមទាក់ទាញវិនិយោគិនបរទេសឱ្យមកបណ្តាក់ទុននៅប្រទេសរបស់ខ្លួនបន្ថែមទៀត តាមរយៈការផ្តល់ទិដ្ឋាការមាសដល់វិនិយោគិនបរទេស ។ វិនិយោគិនបរទេសអាចប្រើប្រាស់ទិដ្ឋាការមាសសម្រាប់រស់នៅឥណ្ឌូណេស៊ីរយៈពេលពី៥ឆ្នាំ ដល់១០ឆ្នាំ ហើយទិដ្ឋាការនេះនឹងអាស្រ័យលើវិនិយោគិនទាំងនោះយកប្រាក់មកវិនិយោគនៅឥណ្ឌូណេស៊ីតិចឬច្រើនប៉ុនណា ។

គោលបំណងដែលរដ្ឋាភិបាលឥណ្ឌូណេស៊ីផ្តល់ទិដ្ឋាការមាសដល់វិនិយោគិន ឬជនបរទេសដែលមកបើកក្រុមហ៊ុននៅប្រទេសឥណ្ឌូណេស៊ី គឺដើម្បីទាក់ទាញឱ្យជនបរទេសយកប្រាក់មកវិនិយោគនៅឥណ្ឌូណេស៊ីបន្ថែមទៀតដើម្បីជំរុញសេដ្ឋកិច្ច ។ Silmy Karim ជានាយកការិយាល័យអន្តោប្រវេសន៍ឥណ្ឌូណេស៊ី លើកឡើងថា វិនិយគិនបរទេសនឹងទទួលបានទិដ្ឋាការមាស ដែលអនុញ្ញាតឱ្យពួកគេអាចស្នាក់នៅឥណ្ឌូណេស៊ី ចាប់ពី៥ឆ្នាំ ទៅ១០ឆ្នាំ ហើយវាអាស្រ័យលើពួកគេនឹងនាំប្រាក់មកវិនិយោគនៅឥណ្ឌូណេស៊ីតិចឬច្រើនប៉ុនណា ។

ប្រសិនបើជនបរទេសយកប្រាក់មកវិនិយោគបើកក្រុមហ៊ុននៅឥណ្ឌូណេស៊ី ស្មើទឹកប្រាក់ចំនួន២៥០ម៉ឺនដុល្លារអាមេរិក ពួកគេនឹងអាចរស់នៅឥណ្ឌូណេស៊ីបានរយៈពេល៥ឆ្នាំ ។ រីឯវិនិយោគិនបរទេសដែលវិនិយោគបើកក្រុមហ៊ុន ស្មើទឹកប្រាក់ចំនួន៥០០ម៉ឺនដុល្លារអាមេរិក ពួកគេនឹងអាចរស់នៅឥណ្ឌូណេស៊ី រយៈពេល១០ឆ្នាំ ។

ចំណែកក្រុមហ៊ុនចម្រុះជាតិសាសន៍មកវិនិយោគនៅឥណ្ឌូណេស៊ី បើវិនិយោគស្មើទឹកប្រាក់ចំនួន២៥លានដុល្លារអាមេរិក ឥណ្ឌូណេស៊ីនឹងអនុញ្ញាតឱ្យនាយកគ្រប់គ្រងក្រុមហ៊ុនអាចរស់នៅឥណ្ឌូណេស៊ីរយៈពេល៥ឆ្នាំ ឬបើវិនិយោគក្នុងទឹកប្រាក់ចំនួន៥០លានដុល្លារអាមេរិក ពួកគេនឹងអាចរស់នៅឥណ្ឌូណេស៊ីរយៈពេល១០ឆ្នាំ ។ ការផ្តល់សិទ្ធិស្នាក់នៅប្រទេសឥណ្ឌូណេស៊ីរយៈពេលយូរដល់វិនិយោគិនបរទេស គឺជាគោលនយោបាយដែលប្រទេសជាច្រើនបានអនុវត្ត ដើម្បីទាក់ទាញវិនិយោគិនបរទេស រួមមាន អាមេរិក, អៀរឡង់, នូវែលសេឡង់ និងអេស្ប៉ាញ ៕ ប្រភព ៖ Nation

ប្រទេសវៀតណាម ៖ ប្រធានសមាគមផ្លែដូងវៀតណាមឈ្មោះ Nguyen Thi Kim Thanh រំពឹងថា ការនាំចេញផ្លែដូងរបស់វៀតណាមនឹងមានតម្លៃស្មើ១ពាន់លានដុល្លារអាមេរិកនៅឆ្នាំ២០២៥ ក្រោយពីអាមេរិក និងចិនអនុញ្ញាតឱ្យវៀតណាមនាំចេញផ្លែដូងទៅកាន់ប្រទេសរបស់ខ្លួន ។

នៅពេលអាមេរិកជិតបើកទីផ្សារនាំចូលដូងវៀតណាម ប្រទេសចិនបានអនុញ្ញាតឱ្យវៀតណាមនាំចូលដូងជាផ្លូវការរួចហើយ ។ ដូច្នេះ ធ្វើឱ្យអាជីវកម្មក្នុងស្រុកព្យាយាមអភិវឌ្ឍន៍ចម្ការដូង និងចុះឈ្មោះធ្វើជាតំបន់វត្ថុធាតុដើម Organic ដើម្បីបំពេញតម្រូវការរបស់ទីផ្សារពិភពលោក ។ កាលពីឆ្នាំ២០២២ ការនាំចេញផ្លែដូងរបស់វៀតណាមមានតម្លៃស្មើជាង៧០០លានដុល្លារអាមេរិក ប៉ុន្តែនៅពេលអាមេរិក និងចិនយល់ព្រមនាំចូលផ្លែដូងវៀតណាម បានធ្វើឱ្យវៀតណាមរំពឹងថា នៅចុងឆ្នាំ២០២៤ និងដើមឆ្នាំ២០២៥ តម្លៃការនាំចេញផ្លែដូងនឹងកើនឡើងរហូតដល់១ពាន់លានដុល្លារអាមេរិក ។

កាលពីមុន ប្រទេសវៀតណាមមិនទាន់មានគម្រោងអភិវឌ្ឍន៍ចម្ការដូងទេ ប៉ុន្តែនៅឆ្នាំ២០២១ ផ្លែដូងត្រូវបានគេចាត់ទុកជាដំណាំឧស្សាហកម្មចម្បងមួយរបស់វៀតណាម ជាពិសេស នៅពេលបម្រែបម្រួលអាកាសធាតុ គឺក្រុមហ៊ុនធំៗនៅក្នុងប្រទេសនេះប្រមាណ២០ក្រុមហ៊ុនបាននាំចេញផ្លែដូងទៅកាន់ទូទាំងពិភពលោក ហើយមានប្រទេសចំនួន៣៥ ដែលបាននាំចូលផ្លែដូងវៀតណាម ។

លោក Luu Van Phi ជាប្រធានមន្ទីរឧស្សាហកម្ម និងពាណិជ្ជកម្មខេត្ត Tien Giang លើកឡើងថា នៅខេត្តផ្សេងៗរបស់វៀតណាមមានចម្ការដូងប្រមាណ៣៥.០០០ហិកតា ហើយចម្ការដូងភាគច្រើនស្ថិតនៅខេត្ត Go Cong Tay, Cho Gao, My Tho និង Tan Phu Dong ។ ដូច្នេះ ការនាំចេញផ្លែដូងវៀតណាមទៅកាន់អាមេរិកនឹងជួយឱ្យតម្លៃកើនឡើងខ្ពស់ ហើយប្រាក់ចំណូលរបស់កសិករក៏ល្អប្រសើរផងដែរ ដែលធ្វើឱ្យពួកគេមានទំនុកចិត្តវិនិយោគលើចម្ការដូង ។ ក្រៅពីនេះ លោកសង្កេតឃើញថា ដូង១ផ្លែនៅចម្ការមានតម្លៃចាប់ពី៣.០០០ដុង ទៅ៤.០០០ដុង ប៉ុន្តែអតិថិជននៅទីក្រុងហូជីមិញត្រូវចំណាយប្រាក់រហូតដល់២ម៉ឺនដុង ។ បញ្ហាចំនួន២ ដែលត្រូវដោះស្រាយនៅពេលនេះ គឺកាត់បន្ថយដើមទុនត្រូវបង់ឱ្យឈ្មួញកណ្តាល និងបង្កើនប្រាក់ចំណូលរបស់កសិករ ។

ចំណែកអនុប្រធានមន្ទីរកសិកម្ម និងអភិវឌ្ឍន៍ជនបទខេត្តបេនចែ ឈ្មោះ Huynh Quang Duc លើកឡើងថា ក្នុងខេត្តមានចម្ការដូងជាង១៥.០០០ហិកតា ហើយបច្ចុប្បន្ន មានក្រុមហ៊ុនប្រមាណ១០ ទាំងក្នុងខេត្ត និងក្រៅខេត្តកំពុងចុះឈ្មោះដាំដើមដូង និងនាំចេញដូងផងដែរ ។ គេនឹងពង្រីកការនាំចេញដូងជាផ្លូវការទៅកាន់ប្រទេសចិន និងអាមេរិក ហើយបានលើកទឹកចិត្តយ៉ាងខ្លាំងដល់អាជីវកម្មដូង ដែលពួកគេទទួលបានសិទ្ធិនាំចេញទៅក្រៅប្រទេស ៕ ប្រភព ៖ AEC connect

បរទេស៖ ប្រឡាយដែលមានប្រវែង ១១ គីឡូម៉ែត្រ ជាមួយទទឹង ១០០ ម៉ែត្រ នឹងក្លាយជាប្រឡាយដំបូងគេដែលត្រូវបានសាងសង់នៅក្នុងប្រទេសអារ៉ាប៊ីសាអូឌីត ដើម្បីបម្រើតម្រូវការការធ្វើដំណើរ និងការកម្សាន្តរបស់ប្រជាជន។
យោងតាមប្រភពព័ត៌មាន Alarabiya News ដែលបានរាយការណ៍កាលពីថ្ងៃទី ១ ខែកញ្ញាថា គម្រោងអភិវឌ្ឍន៍ថ្មីនេះគឺជាផ្នែកមួយនៃគម្រោងតំបន់ទីក្រុង MARAFY ដែលមានទីតាំងនៅភាគខាងជើងនៃរដ្ឋធានី Jeddah។

គម្រោង MARAFY មិនត្រឹមតែមានសោភ័ណភាពប៉ុណ្ណោះទេ ថែមទាំងបម្រើដល់ការដឹកជញ្ជូន ការភ្ជាប់លំនៅដ្ឋាន និងសហគមន៍ក្នុងតំបន់ផងដែរ ដែលវាអាចផ្ទុកមនុស្សបានប្រហែល ១៣០,០០០ នាក់។ MARAFY ត្រូវបានគេប្រៀបធៀបទៅនឹងទីក្រុងធំៗដូចជា Chicago, Stockholm, Hamburg និង London ដែលជាតំបន់មាត់ទឹកដើរតួជាកន្លែងសម្រាកលំហែកាយ និងការកម្សាន្តសម្រាប់អ្នករស់នៅ។ គម្រោង MARAFY នឹងរួមបញ្ចូលស្រុកជាច្រើន ដែលនីមួយៗមានលក្ខណៈប្លែកពីគេ ដោយសង្កត់ធ្ងន់លើបេតិកភណ្ឌស្ថាបត្យកម្ម និងវប្បធម៌ក្នុងស្រុក។ ស្រុក និងទីក្រុង Jeddah នឹងត្រូវបានតភ្ជាប់ទៅប្រព័ន្ធដឹកជញ្ជូនច្រើនបែប ដែលរួមមានឡានក្រុង តាក់ស៊ីទឹក ស្ថានីយ៍រថភ្លើងក្រោមដី និងប្រឡាយតភ្ជាប់ទៅកាន់អាកាសយានដ្ឋានអន្តរជាតិ King Abdulaziz។

លោក David Grover នាយកប្រតិបត្តិនៃអចលនទ្រព្យ Roshn បាននិយាយថា “MARAFY នឹងធ្វើឱ្យប្រសើរឡើងនូវគុណភាពនៃជីវិត និងមានឥទ្ធិពលយ៉ាងខ្លាំងទៅលើរដ្ឋធានី Jeddah” ។ “នេះគឺជាគម្រោងមួយក្នុងចំណោមគម្រោងល្បីៗដែលមានគោលបំណងបង្កើតសហគមន៍រស់រវើក និងសេដ្ឋកិច្ចដែលរីកចម្រើន”។
អារ៉ាប៊ីសាអូឌីត សង្ឃឹមថា គម្រោងថ្មីនេះ នឹងទាក់ទាញអ្នកស្រុក រួមជាមួយអ្នកទស្សនាកាន់តែច្រើនជុំវិញពិភពលោក។ ពួកគេក៏បានមើលឃើញថាភូមិសាស្ត្រគឺជាអត្ថប្រយោជន៍មួយក្នុងការក្លាយជាមជ្ឈមណ្ឌលនៃសេដ្ឋកិច្ចពិភពលោក៕
ប្រភព៖vnexpress

បរទេស៖ អង្គការស្រាវជ្រាវអវកាសឥណ្ឌា (ISRO) បានបាញ់បង្ហោះដោយជោគជ័យនូវ យាន Aditya-L1 ពីមជ្ឈមណ្ឌលអវកាស Satish Dhawan នៅម៉ោង ១៣:២០ នាទី នាថ្ងៃទី ២ ខែកញ្ញា ។

យានអវកាស Aditya-L1 បានទៅដល់គន្លងផែនដីទាបនៃព្រះអាទិត្យដោយជោគជ័យ បន្ទាប់មកស៊ើបអង្កេតនឹងបាញ់ប្រព័ន្ធជំរុញរបស់វា ហើយឆ្ពោះទៅកាន់ចំណុច Lagrange 1 (L1) រវាងផែនដី និងព្រះអាទិត្យ។ Lagrange 1 (L1) គឺជាចំណុចលំនឹងនៃទំនាញផែនដី ដែលមានចម្ងាយ ១.៥ លានគីឡូម៉ែត្រពីផែនដី។ ដូចនេះយានអវកាស Aditya-L1 នឹងអាចសិក្សាពីព្រះអាទិត្យដោយមិនរងផលប៉ះពាល់ពីបាតុភូត occultation សេឡេស្ទាលឡើយ។

បេសកកម្មនេះមានគោលដៅវិទ្យាសាស្ត្រជាច្រើន ដែលឧបករណ៍ទាំងប្រាំពីររបស់ Aditya-L1 ត្រូវបានរចនាឡើងដើម្បីសង្កេតមើលបរិយាកាសរបស់ព្រះអាទិត្យ ផ្ទៃវាលម៉ាញេទិក និងភាគល្អិតជុំវិញផ្កាយ។ តំបន់ខ្លាំងបំផុតមួយដែលយានអវកាស Aditya-L1 នឹងសិក្សាគឺបរិយាកាសខាងលើរបស់ព្រះអាទិត្យ។
ពេលយានអវកាស Aditya-L1 បានទៅកាន់គន្លងផែនដីទាបនៃព្រះអាទិត្យ អ្នកវិទ្យាសាស្រ្តក៏បានរកឃើញអាថ៌កំបាំងនៃមេរោគ Corona ដែលធ្វើពីប្លាស្មានឹងអាចក្តៅរហូតដល់ ១.១ លានអង្សាសេ។ លើសពីនេះគេក៏សង្កេតឃើញថាអណ្តាតភ្លើងព្រះអាទិត្យ និងការផ្ទុះ Coronal (CMEs) គឺជាការផ្ទុះដ៏ខ្លាំងក្លាដែលអាចប៉ះពាល់ដល់អាយុជីវិតនៅលើផែនដី។

Coronal (CMEs) គឺជាពពកដ៏ធំនៃប្លាស្មា ដែលបាញ់ចូលទៅក្នុងលំហ នៅពេលដែលបន្ទាត់ដែនម៉ាញេទិចរបស់ព្រះអាទិត្យត្រូវបានបង្វិល និងបង្វិលត្រឡប់មកវិញត្រង់ក្នុងដំណើរការដែលហៅថា ការតម្រឹមម៉ាញេទិកឡើងវិញ។ រឿងនេះតែងតែកើតឡើងនៅក្នុងតំបន់សកម្មខ្លាំងនៃព្រះអាទិត្យ ដែលបង្ហាញពីអត្ថិភាពនៃពន្លឺថ្ងៃ។ ពន្លឺថ្ងៃអាចនាំឱ្យមានវិទ្យុសកម្មអេឡិចត្រូម៉ាញេទិក ដែលជារឿយៗអមជាមួយ CMEs ប៉ុន្តែក៏អាចកើតឡើងដោយឯករាជ្យផងដែរ។

ដូច្នេះហើយយានអវកាស Aditya-L1 នឹងពិនិត្យមើលអ័ក្សម៉ាញេទិក coronal និងប្លាស្មា ដោយវាស់សីតុណ្ហភាព ល្បឿន និងដង់ស៊ីតេរបស់វា ហើយយានអវកាសក៏នឹងសាកល្បងសក្ដានុពលដែនម៉ាញេទិចរបស់ព្រះអាទិត្យ ដែលដឹកនាំធ្នូ ដើម្បីការពារភពផែនដី៕
ប្រភព៖vnexpress

រដ្ឋធានីញូវដេលី៖ ប្រទេសម៉ាឡេស៊ី និង ហ្វីលីពីន កំពុងតែចូលរួមជាមួយនឹងឥណ្ឌា តវ៉ាប្រឆាំងនឹងការគូសវាសផែនទីថ្មីរបស់រដ្ឋាភិបាលក្រុងប៉េកាំង ទាមទារយកដែនដី នៅក្នុងតំបន់ជម្លោះ តាមអ្វីដែលក្រសួងការបរទេសចិន បានអះអាង អំពីក្ដីសង្ឃឹម លើភាគីពាក់ព័ន្ធ អាចមើលឃើញផែនទីស្ដង់ដារថ្មី នៅក្នុងគោលដៅ និង វិធីសាស្រ្ដសមហេតុផល។

សារព័ត៌មាន Channel News Asia បានចេញផ្សាយ នៅថ្ងៃសុក្រ ទី១ ខែកញ្ញា ថា ប្រទេសម៉ាឡេស៊ី និង ហ្វីលីពីន កំពុងតែធ្វើឡើង ស្របនឹងសកម្មភាពរបស់ឥណ្ឌា តវ៉ាប្រឆាំងនឹងប្រទេសចិន ជុំវិញការបោះពុម្ពផែនទីថ្មី ទាមទារដែនដី នៅតំបន់មានជម្លោះ ស្របពេលឥណ្ឌូណេស៊ី អះអាង ថា ការគូសខ្សែបន្ទាត់ដែនដីណាមួយ ត្រូវតែធ្វើឡើង ដោយអនុលោមតាមច្បាប់នានារបស់អន្ដរជាតិ។

ក្រសួងធនធានធម្មជាតិចិន កាលពីថ្ងៃទី២៨ ខែសីហា បានចេញផ្សាយផែនទីមួយឈ្មោះ «China Standard Map Edition 2023 (ឆាយណាស្ដែនដាដម៉ែប អេឌីសិន ២០២៣)» ដោយបង្ហាញ អំពីការទាមទារដែនដី នៅសមុទ្រចិនខាងត្បូង ដែលមានជម្លោះ ជាមួយនឹងប្រទេសម៉ាឡេស៊ី វៀតណាម ហ្វីលីពីន និង ប្រ៊ុយណេ ព្រមទាំងតំបន់ដីមួយចំនួនទៀត ស្ថិតក្នុងប្រទេសឥណ្ឌា និង រុស្ស៊ី។

ការចេញផ្សាយផែនទីថ្មីរបស់ចិន កើតឡើង នៅមុនកិច្ចប្រជុំកំពូលរបស់សមាគមប្រជាជាតិអាស៊ីអាគ្នេយ៍ (អាស៊ាន) នឹងត្រូវធ្វើឡើង នៅក្នុងប្រទេសឥណ្ឌូនេស៊ី ចន្លោះពីថ្ងៃទី៥ ដល់ថ្ងៃទី៧ ខែកញ្ញា និង កិច្ចប្រជុំកំពូលរបស់ក្រុមប្រទេសមានសេដ្ឋកិច្ចជឿនលឿន G20 ចន្លោះពីថ្ងៃទី៩ ដល់ថ្ងៃទី១០ ខែកញ្ញា នៅក្នុងប្រទេសឥណ្ឌា ស្របពេលមេដឹកនាំចិន ត្រូវគេរំពឹង ថា នឹងអញ្ជើញទៅចូលរួម នៅក្នុងកិច្ចប្រជុំនោះផងដែរ។

សារព័ត៌មានរបស់ម៉ាឡេស៊ី The Star បានរាយការណ៍ ថា លោក ហ្សាមប្រ៊ី អាប់ឌូល កាឌៀរ (Zambry Abdul Kadir) រដ្ឋមន្ត្រីក្រសួងការបរទេសម៉ាឡេស៊ី បានបញ្ជាក់ កាលពីថ្ងៃព្រហស្បតិ៍ (ទី៣១ ខែសីហា) ថា ប្រទេសម៉ាឡេស៊ី បានផ្ញើលិខិតតវ៉ាមួយ ទៅកាន់ប្រទេសចិន ក្រោយការទាមទាររបស់ក្រុងប៉េកាំង នៅសមុទ្រចិនខាងត្បូង ក៏ដូចជា ការគូសវាផែនទីថ្មីនេះ ផងដែរ។

ការប្ដឹងតវ៉ានេះ បានកើតឡើង ក្រោយពេលក្រសួងការបរទេសម៉ាឡេស៊ី បានថ្លែង នៅមុននេះ ថា ម៉ាឡេស៊ី មិនទទួលស្គាល់ ចំពោះការទាមទារដែនដីរបស់ចិន នៅសមុទ្រចិនខាងត្បូង។ រីឯផែនទីថ្មីគូសវាសដោយប្រទេសចិន នឹងមិនមានសិទ្ធិអំណាចអ្វី មកលើប្រទេសម៉ាឡេស៊ី នោះឡើយ។

លោករដ្ឋមន្ត្រីក្រសួងការបរទេសម៉ាឡេស៊ី បានថ្លែង នៅខាងក្រៅព្រឹត្ដិការណ៍ឯករាជ្យ ថា សកម្មភាពបន្ទាប់របស់ម៉ាឡេស៊ី កំពុងតែធ្វើឡើង ក្រោយពេលមានសេចក្ដីថ្លែងការណ៍របស់ក្រសួងការបរទេសម៉ាឡេស៊ី បានផ្ញើកំណត់ការទូតតវ៉ា ទៅកាន់ប្រទេសចិន។

ក្រសួងការបរទេសម៉ាឡេស៊ី កាលពីថ្ងៃពុធ បានបញ្ជាក់ ថា ផែនទីមាននេះ ស្ថិតក្នុងចំណោមបញ្ហាផ្សេងៗទៀត ដោយបានបង្ហាញ អំពីការទាមទារដែនដីជាឯកតោភាគីរបស់ចិន នៅសមុទ្រខាងត្បូង ដោយរួមទាំងតំបន់សមុទ្ររបស់ម៉ាឡេស៊ី ស្ថិតក្នុងរដ្ឋសាបាស (Sabah) និង រដ្ឋសារ៉ាវ៉ាក (Sarawak)។

ជាមួយគ្នានេះដែរ លោកស្រី រេតណូ ម៉ាស៊ូឌី (Retno Marsudi) រដ្ឋមន្រ្ដីក្រសួងការបរទេសឥណ្ឌូណេស៊ី បានបញ្ជាក់ កាលពីថ្ងៃព្រហស្បតិ៍ (ទី៣១ ខែសីហា) ថា ការគូសវាសខ្សែព្រំដែនណាមួយ ត្រូវតែធ្វើឡើង អនុលោមតាមអនុសញ្ញាអង្គការសហប្រជាជាតិ ស្តីពីច្បាប់សមុទ្រ ឆ្នាំ១៩៨២ ហៅកាត់ UNCLOS 1982។.

បើតាមទីភ្នាក់ងារសារព័ត៌មានរបស់បារាំង AFP បានឲ្យដឹង ថា អាជ្ញាធរឥណ្ឌា កាលពីថ្ងៃអង្គារ (ទី២៩ ខែសីហា) បានតវ៉ាយ៉ាងខ្លាំងក្លា ប្រឆាំងនឹងការគូសវាសផែនទីថ្មីរបស់ចិន។

ផែនទីថ្មីរបស់ប្រទេសចិន ត្រូវបានគេរាយការណ៍ អំពីការទាមទារភាពជាកម្មសិទ្ធិ នៅលើដែនដី ដែលរដ្ឋាភិបាលក្រុងញូវដេលី អះអាង ថា តំបន់ទាំងនោះជាទឹកដីរបស់ឥណ្ឌា រួមទាំងទឹកដីនៅជិតកន្លែង ដែលបបានប្រយុទ្ធជាមួយនឹងចិន នៅក្នុងឆ្នាំ២០២០ផងដែរ។

លោក អារីនដាម បាកឈី (Arindam Bagchi) អ្នកនាំពាក្យ ក្រសួងការបរទេសឥណ្ឌា បានបញ្ជាក់ នៅក្នុងសេចក្ដីថ្លែងការណ៍មួយ ថា «ថ្ងៃនេះ យើងបានតវ៉ាយ៉ាងខ្លាំងក្លា តាមរយៈបណ្តាញការទូត ជាមួយភាគីចិន លើអ្វីដែលហៅថា «ផែនទីស្តង់ដារឆ្នាំ២០២៣របស់ចិន ដោយបានទាមទារយកទឹកដីរបស់ឥណ្ឌា»៕